Sõss nins sẽn loogã sõng-d lame tɩ d paam sokr ning sẽn pʋgdã leoore: Yãmb mii Wẽnnaam sõma bɩ? Tõnd yãa Biiblã pʋgẽ tɩ Wẽnnaam yʋʋr yaa a Zeova, la tɩ yaa nonglmã la a zʋg-kãseng n yɩɩda. Tõnd yãame me t’a zoe n maana bũmb toor-toor ninsaalbã neer yĩnga, la tɩ bũmb a taab la a na n wa maane. Bũmb wʋsg la y tõe n bãng Wẽnnaam zug n paase. La tõe tɩ y sokda y meng yaa: M sã n bao n bãng Wẽnnaam sõma, wãn to la na n naf maam?

A Zeova pʋlmame tɩ y ‘sã n bao bãmba, b na n basame tɩ y yã bãmba.’ (1 Kibayã 28:9) Mams-y n ges-y bark ning y sẽn na n paam y sã n bao n bãng Wẽnnaam sõma. Y na n paama a ‘Zeova zoodo.’ (Yɩɩn-sõamyã 25:14, Wẽnnaam Sebre, 1983) Wãn to la zood a woto na n naf-yã?

Sũ-noog hakɩɩkã. A Zeova yaa sũ-noog Wẽnnaam. (1 Tɩmote 1:11, MN) Y sã n paam zood sõma ne-a la y rɩk a togs-n-taare, y na n paama sũ-noog hakɩɩkã. Sũ-noogã na n sõngame tɩ y yamã gãe bãane, tɩ y tagsa wã yaa sõma, tɩ y yĩns laafɩ wã me paase. (Yɩɩn-sõamyã 33:12) Sẽn paas me, y na n tõog n gila yɛl sẽn tõe n sãam y vɩɩmã, n maan bũmb toor-toor sẽn nafd-yã, la y paas y zems-n-taarã ne y taabã. Woto y vɩɩmã na n talla barka. Y na n wa kɩsa sɩd ne yɩɩn-gʋlsdã sẽn yeelã. A yeelame yaa: “Ne maam, tɩ pa Wẽnnaam sɛɛgẽ n tar yõodo.”—Yɩɩn-sõamyã 73:28.

Wẽnnaam na n gesa y yelle. A Zeova pʋlma a nin-buiidã yaa: “Mam na n sagla foom, la mam nin na n bee fo zugu.” (Yɩɩn-sõamyã 32:8) Woto rat n yeelame t’a Zeova na n gesa a nin-buiidã ned kam fãa yelle, la a sõng ned fãa wa sẽn zemse. (Yɩɩn-sõamyã 139:1, 2) Y sã n paam zood sõma ne a Zeova, y na n yãame t’a bee ne yãmb wakat fãa.

Beoog-daar sẽn na n yɩ neere. A Zeova wilgda y sẽn tõe n maan tɩ y vɩɩmã tall bark masã mengã. La pa rẽ bal ye. A paka sor me tɩ y tõe n paam beoog-daar sẽn na n yɩ neere. (Ezayi 48:17, 18) Biiblã yetame yaa: ‘Vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirist, yãmb sẽn tʋm a soabã.’ (Zã 17:3) Wakat-kãnga sẽn yaa toog wakatã, Wẽnnaam sẽn pʋlem tõndã yaa wa baare, n sõngd tõnd tɩ d yas kãn-kãe la d pa vigsdẽ ye.—Ebre-rãmbã 6:19.

Tõnd tara bʋʋm wʋsg n na n bao n bãng Wẽnnaam sõma, la d paam zood sẽn tar pãng ne-a. Tõnd goma bʋʋm a wãn yell bala. Y sã n dat n bãng n paase, sõs-y ne a Zeova Kaset soaba, wall y kẽ jw.org sẽn yaa tõnd sɩtã pʋgẽ.