Yãmb sã n dat n bãng ned sõma, tõe tɩ y na n deng n sok-a lame yaa: “Yãmb yʋʋr la a ãnda?” Mams-y y yamẽ wã tɩ y soka Wẽnnaam sok-kãnga, a na n leokame tɩ bõe?

“Mam yaa a Zeova, mam yʋʋr la woto.”—Ezayi 42:8, MN.

Yʋʋrã tara yõod Wẽnnaam mengã nifẽ. Pa ned a to n pʋd Wẽnnaam a yʋʋrã ye. Yaa yẽ mengã n yãke. A Zeova yeelame: “Yõwã na n yɩɩ mam yʋʋr wakat fãa. Nebã na n boonda maam ne yʋ-kãng zamaan woo zamaane.” (Yikri 3:15) Biiblã pʋgẽ, b pʋta Wẽnnaam yʋʋrã n yɩɩd a naam yʋyã fãa. Wala makre, Sẽn-tõe-a-fãa, Ba, Zu-soaba, bɩ Wẽnnaam. A yʋʋrã leb n bee be n yɩɩd ned buud fãa yʋʋre. Wala makre, a Abrahaam, a Moyiiz, a Davɩɩd bɩ a Zeezi yʋʋrã. Sẽn paase, a Zeova mengã ratame tɩ nebã bãng a yʋʋrã. Biiblã yetame: “B na n bãngame tɩ yãmb y yembr bal yʋʋr la a Zeova, n yaa Sẽn-Ka-To sẽn so dũniyã gilli.”—Yɩɩn-sõamyã 83:18, MN.

Yʋʋrã tara yõod a Zeezi nifẽ. Pʋʋsg ning nebã sẽn boond tɩ “tõnd Ba sẽn be arzãnã” pʋgẽ, a Zeezi yeela a karen-biisã tɩ b pʋʋs n kos tɩ Wẽnnaam ‘yʋʋr paam waoogre.’ (Matye 6:9) A Zeezi mengã pʋʋsa Wẽnnaam n yeel yaa: ‘M ba, waoog-y y yʋʋrã!’ (Zã 12:28) Sẽn da pak a Zeezi n yɩɩd yaa a waoog Wẽnnaam yʋʋrã. Rẽ n so t’a pʋʋs n yeel yaa: “Mam kɩtame tɩ b bãng yãmb yʋʋrã, la m na n le kɩtame tɩ b bãng-a.”—Zã 17:26.

Yʋʋrã tara yõod neb nins sẽn mi Wẽnnaam sõma wã nifẽ. Pĩnd wẽndẽ, Wẽnnaam nin-buiidã ra  miime tɩ yaa a yʋʋrã yĩng la a sẽn kogend-b la a fãagd-bã. Biiblã yetame: ‘A Zeova yʋʋrã yaa gãsg sẽn tar pãnga, nin-tɩrg sã n zoe n tɩ kẽ be, yell kõn paam-a ye.’ (Yel-bũnã 18:10) ‘Neb nins fãa sẽn na n bool a Zeova yʋʋrã bal n na n põse.’ (Zowɛll 3:5) Biiblã wilgame tɩ yaa Wẽnnaam yʋʋrã n na n kɩt tɩ b bãng neb nins sẽn tũud-a wã n bake. Ad b sẽn yete: ‘Buud a taabã ned kam fãa kẽnda ne a wẽnnaam yʋʋre, la tõndo, tõnd kẽnda ne a Zeova daar fãa, la wakat sẽn ka sɛta.’ (Miise 4:5; Tʋʋma 15:14)

Yaa Wẽnnaam bal n tog ne yʋ-kãngã. Bãngdb wʋsg yeelame tɩ Zeova wã rat n yeelame tɩ: “A kɩtdame tɩ yɩ.” Wẽnnaam a Zeova sẽn wa n gom ne a Moyiizã, a wilga a yʋʋrã sẽn dat n yɛɛlga. A yeel-a lame: “Mam yaa mam sẽn yaa a soabã.” (Yikri 3:14) Dẽnd Wẽnnaam yʋʋrã pa wilgd bal tɩ yẽ la Naandã, sẽn kɩt-a tɩ bũmb fãa beẽ wã ye. Wilgdame me t’a tõe n lebga a sẽn date, bɩ n kɩt t’a sẽn naanã fãa yɩ wa a sẽn date, sẽn na yɩl n pids a raabã. Wẽnnaam naam yʋyã wilgda a yasrã, a ziirã bɩ a pãngã sẽn yaa to-to. La yaa a yʋʋrã sẽn yaa Zeova wã bal n wilgd a sẽn sɩd yaa Wẽnnaam ninga, la a sẽn tõe n lebg a soabã.

Wẽnnaam yʋʋrã wilgdame tɩ tõnd yell pak-a lame. Wẽnnaam yʋʋrã võorã wilgdame t’a nonga tõnd ne a bõn-naandsã fãa. Sẽn paase, Wẽnnaam sẽn vẽneg a yʋʋrã n togsã wilgdame t’a ratame tɩ d bãng-a. Yaa yẽ n yãk yam n na n wilg tõnd a yʋʋrã, nand meng tɩ d bao n na n bãnge. Dẽnd yaa vẽeneg tɩ Wẽnnaam datame tɩ d bãng t’a sɩd beeme, t’a pa zãr ne-do, la tɩ d tõe n lebga a zoa.—Yɩɩn-sõamyã 73:28.

D sã n pʋt Wẽnnaam yʋʋrã, d wilgdame tɩ d nong-a lame. Wala makre, tõe tɩ y yeela ned sẽn dat n lebg y zoa, t’a boond yãmb ne y yʋʋrã meng-menga. A soabã sã n zãgs t’a kõn bool yãmb ne y yʋʋrã, y tagsg na n yɩɩ wãna? Tarẽ-n-tarẽ, tõe tɩ y wa sok y meng a soabã sã n sɩd rat n lebga y zoa. Yaa woto me ne a Zeova. A wilga ninsaalbã a yʋʋrã, la a yeel tɩ b pʋt-a. D sã n maand woto, d wilgda a Zeova tɩ d ratame n lebg a zoa. A nee neb nins sẽn waoogd a yʋʋrã.—Malasɩ 3:16.

Y sã n dat n bãng Wẽnnaam sõma, pipi, y tog n bao n bãng a yʋʋrã. La rẽ bal pa sek ye. Y tog n bao n bãnga yʋʋrã sẽn wilgd a sẽn yaa Wẽnnaam ning buudã. Y tog n bao n bãnga a zʋg-kãsemsã.