MAMS-Y y yamẽ tɩ y geta video sẽn gomd ned vɩɩm yelle. Tõe tɩ yaa yɩɩn-yɩɩnd yʋʋr sẽn yi, tɩ yãmb meng nong-a. Video wã sɩngrẽ, b wilga a sẽn wa n yaa biiga, n wa wilg a sẽn sɩng mizikã zãmsgo, n wẽed yʋʋm-teoog n yɩlemdẽ. Rẽ poore, b wilga a sẽn maand kõnsɛɛr-dãmba, n gilgd tẽns toɛy-toɛya, t’a yʋʋrã yi dũniyã gill zugu. La b wa n wilga a sẽn kʋʋle, n wa baas n ki.

B sɩd maana video a woto buud n wilg neb vɩɩm sẽn yɩ to-to. Tõe tɩ b rãmbã yɩɩ yɩɩn-yɩɩndb bɩ siãnsã bãngdb wall neb sẽn da maand ɛspoor tɩ b yʋy yi, la b fãa baasgã yaa a ye. Tõeeme tɩ b rãmbã maana bõn-sõma buud toor-toore. La tags-y n ges-y b sẽn da na n tõog n maan n paase, b sã n da pa kʋʋl n baas n ki.

Bʋko, ned buud fãa kiidame. (Koɛɛg soaba 9:5) Baa a sẽn maan a soab fãa, a pa tõe n pa kʋʋle, la a ki ye. Agsɩdã wall bã-kɛgeng tõe n tiig n kʋʋga sãnda yõy menga. Wa Biiblã sẽn yetã, ninsaal yaa wa yibeoog wulg sẽn “pukd wakat bilf yĩnga, la a wẽneg n meneme.”—Zak 4:14.

Neb kẽer sẽn pa mi sẽn wat beoogã, la b pa mi b sẽn vɩ wã yĩngã, b yetame “tɩ d rɩ la d yũ, tɩ bala beoogo d na n kiime.” (1 Korẽnt rãmbã 15:32) La rẽ yĩnga, neb nins sẽn vɩ woto wã, pa b sẽn mi tɩ b pa tõe n põs kũumã sɩda? Ned buud fãa wat n soka a meng yaa: ‘Vɩɩmã tɛk la woto bɩ?’ Sẽn yɩɩd fãa, a sã n wa segd zu-loeese. Yɛ la d tõe n paam sok-kãngã leoore?

Neb wʋsg tẽedame tɩ yaa siãnsã bãngdb n tõe n sõng-ba. Yaa sɩd tɩ bãngdbã tʋʋmã sõngdame tɩ nebã vɩ n kaoosdẽ. Bãngdb kẽer ket n tʋmda sẽn na yɩl n wogl ninsaal vɩɩmã n paase. B tʋʋmã na n yãka neng tɩ pa na n yãk me, sokr n kete: Bõe yĩng tɩ ninsaal kʋʋndẽ la a kiidẽ? Wakat n wat tɩ kũumã sẽn yaa d bɛ wã pa na n le zĩnd bɩ? D na n goma rẽ yelle, la d leok sokr a to: Vɩɩmã tɛk la woto bɩ?