A Zeova yaa ned ning sẽn tar pãng wʋsgã
A Zeova yaa ned ning sẽn tar pãng wʋsgã
“Yaa bãmb pãng kãsenga ne b noora yĩng n kɩt tɩ bãmb fãa beẽ.”—EZAI 40:26.
1, 2. a) Tõnd fãa teega tẽngã pãng yẽg-bʋgo? b) Wilg-y bũmb ning sẽn kɩt t’a Zeova yaa pãng fãa Yẽgr sẽn yɩɩdã.
TÕND wʋsg geta pãng wa bũmb sẽn zems tɩ d paam. Wala makre, tõnd pa tagsd kʋʋrã pãng sẽn kõt tõnd vẽenemã la tʋʋlmã bɩ kʋʋrã teoog fãa d sẽn tõe n tarẽ wã tʋʋmd yell wʋsg ye. B sã n wa kup kʋʋrã wã ne lingr la d bãngd tɩ kʋʋrã pãng sã n kaẽ, ninsaalbã galʋ-tẽns ra pa na n mars sõma ye. Bugmã wʋsg sẽn yɩɩd tõnd sẽn teegã yita wĩntoogẽ wã, sẽn yaa tẽngã pãng yẽgr ning sẽn tɩ yɩɩdã. * Segõnd fãa, wĩntoogã sẽn kõt tʋʋlmã yõogda bõn-yood ton dãmb milyõ a nu, n kõt tẽngã pãng ning sẽn zãad vɩɩmã.
2 Yaa yɛ la wĩntoogã pãn-kãngã fãa yita? Ãnd n maan yĩngr pãn-kãngã? Yaa Wẽnnaam a Zeova n naan-a. Yɩɩl Sõamyã 74:16 gomda a yell n yetẽ: “Yãmb naana kiuug la wĩndga.” N-yẽe, yaa a Zeova la pãng fãa Yẽgr sẽn yaa kãseng n yɩɩdã, wala a sẽn yaa vɩɩmã fãa Yẽgrã. (Yɩɩl Sõamyã 36:10) D pa segd abada n ges t’a pãngã yaa bõn-zaalg ye. Ne no-rɛɛs a Ezai tũnugri, a Zeova tẽegda tõnd tɩ d ges yĩngr bõn-yoodã wala wĩntoogã la ãdsã, la d bʋgs b sẽn wa n be to-to wã zugu. “Zẽk-y y nens yĩngri n gese. Yaa ãnda n naan ãdsã la a mi b sõore; la pʋd bãmb fãa b yʋya? Yaa bãmb pãng kãsenga ne b noora yĩng n kɩt tɩ bãmb fãa beẽ.”—Ezai 40:26; Zeremi 32:17.
3. Wãn-wãn la a Zeova pãngã wilgr nafd tõndo?
3 A Zeova sẽn tar pãng wʋsgã yĩnga, d tõe n kɩsa sɩd tɩ wĩntoogã na n ket n kõta tõnd vẽenem la tʋʋlem ning d vɩɩmã sẽn teeg n beẽ wã. Baasg zãnga, d teega Wẽnnaam pãngã wʋsg n yɩɩd d yĩngã yel-datem pidsg yĩnga. Tõnd sẽn paam fãagrã ne yel-wẽna la kũumã, tõnd saagrã beoog-daar yĩngã, la tõnd sẽn teeg a Zeova wã fãa tɩ loee zãng ne a pãngã wilgri. (Yɩɩl Sõamyã 28:6-9; Ezai 50:2) Biiblã pida ne makr sẽn kõt kaset ne a Zeova pãngã sẽn naand la a fãagdẽ wã, n fãagd a nin-buiidã la a sãamd a bɛɛbã.
Wẽnnaam pãngã yaa vẽeneg naanegã pʋgẽ
4. a) Bõe tagsg la a Davɩɩd tall a sẽn wa n ges yʋng sa-gãnã? b) Bõe la yĩngrã bõn-yood wilgd Wẽnnaam pãngã wɛɛngẽ?
4 Tʋm-tʋmd a Poll wilgame tɩ tõnd Naandã ‘pãng sẽn ka sɛtã b yãt-a-la bũmb nins a sẽn naana pʋgẽ.’ (Rom dãmba 1:20) Yʋʋm kob-gĩn sẽn deng rẽ, yɩɩl-gʋlsd a Davɩɩd sẽn da yaa rũm-kɩɩmã, ra segd n nong n geta yʋng sa-gãnã, n ne ãndũniyã sẽn yaa kãseng to-to wã, la a Naandã pãnga. A gʋlsame: “Mam sẽn get saasẽ sẽn yaa yãmb nus tʋʋmda ne kiuuga la ãdsa yãmb sẽn ning b zĩigẽ wã, ninsaal yaa bõe tɩ yãmb tẽr a yelle? La ninsaalb kamb yaa bõe tɩ yãmb gũud-ba?” (Yɩɩl Sõamyã 8:4, 5) Baa ne a minimã ne yĩngr bõn-yoodã sẽn da tar koakã, a Davɩɩd ra miime t’a ra yaa zaalem, b sã n mak-a ne tõnd ãndũni wã sẽn yaa kãsengã Naanda. Rũndã-rũndã, yĩngr yel-vaeesdbã mii yɛl wʋsg n yɩɩd ãndũniyã yalem la pãng ning sẽn tɛɛnd-a wã wɛɛngẽ. Wala makre, b yetame tɩ segõnd fãa, tõnd wĩntoogã yiisda pãng sẽn zems TNT megaton dãmb milyõ rãmb 100 000 pusgri. * Yaa pãn-kãng fĩ-fĩi bal n tat tẽngã, la rẽ yaool n seka vɩɩmã fãa sẽn be tõnd tẽngã zugã zãabo. La tõnd wĩntoogã zãr ne a yɩ ãdg ning sẽn tar pãng n yɩɩd saasẽ wã. Ãds kẽer sẽn kõt pãng ning segõnd a yembr pʋgẽ balã taa wĩntoogã sẽn kõt pãng ning daar a yembr pʋgẽ wã. Rẽ, bɩ y mams Ned ning sẽn naan yĩngr bõn-kãensa wã sẽn tar pãng ningã! Zemsame la a Elihu sẽn zẽk a koɛɛg n yeel woto wã: “Tõnd ka tõe n tõog n ta bãmb nengẽ ye. Bãmb pãnga ne b tɩrlma yaa wʋsgo, la b ka bʋʋd bʋʋd kɛgr ye.”—Zoob 37:23.
5. A Zeova pãngã kaset bʋg la d ne a tʋʋmã pʋsẽ?
5 D sã n ‘baood Wẽnnaam tʋʋma’ wa a Davɩɩd sẽn maana, d na n yãa kaset sẽn yaa vẽeneg ne a pãngã zĩig fãa: sobgã la ko-pɛmã pʋsẽ, sa-tãsã la sa-yãgbã pʋgẽ, kʋɩl-bɛdã la tãn-bɛdã pʋsẽ. (Yɩɩl Sõamyã 111:2; Zoob 26:12-14) Sẽn paase, wa a Zeova sẽn tẽeg a Zoobã, rũmsã kõta kaset ne A pãngã. Behemot bɩ yemd bee bãmb sʋkã. A Zeova yeela a Zoob woto: “A pãng be a sɛɛgẽ . . . A nao wã [a kõbã, NW ] yaa wa kutu.” (Zoob 40:15-18) We-naaf pãngã sẽn yɛɛsdã me b ra mi-a-la sõma Biiblã gʋlsg wẽndẽ, la a Davɩɩd pʋʋsame tɩ b fãag-a ne ‘gɩgemd noor la ne we-naaf yɩɩla.’—Yɩɩl Sõamyã 22:21; Zoob 39:9-11.
6. Bõe la loalg makd Gʋlsg Sõamyã pʋgẽ, la bõe yĩnga? (Ges-y tẽngr notã.)
6 Loalg pãngã yĩng kɩtame t’a makd a Zeova pãngã Biiblã pʋgẽ. * Tʋm-tʋmd a Zã sẽn yã a Zeova geerã yãab pʋgẽ wã bilgda bõn-naands vɩɩs a naase, t’a yembr da tar neng sẽn wõnd loalg nenga. (Wilgri 4:6, 7) Vẽenega, a Zeova zʋgd kãsems a naasã a yembr seribẽ kãensã sẽn makdã yaa pãngã. A taabã yaa nonglem, yam la tɩrlem. Sẽn mik tɩ pãngã yaa Wẽnnaam nedemdã neng sẽn tar yõod wʋsgã yĩnga, d sã n wʋm a pãngã võor vẽenega, la a sẽn dɩkd-a n tʋmd to-to wã võore, rẽ na n pẽnega tõnd ne-a n paase, la sõng-d tɩ d rɩk togs-n-taar ne-a n dɩk pãng buud fãa d sẽn tar n tʋm sõma.—Efɛɛz rãmba 5:1.
“Tãb-biis soab a Zeova, sẽn yaa pãng soabã”
7. Wãn-wãn la d tõe n kɩs sɩd tɩ sõma wã na n tõoga wẽngã?
7 Gʋlsg Sõamyã pʋgẽ, b boonda a Zeova tɩ “Wẽnnaam sẽn-tõe-fãa,” naam yʋʋr sẽn tẽegd tõnd tɩ d pa segd abada n paoog a pãngã bɩ d maan sãmb-sãmb ne tõog ning a sẽn tar n na n tõog a bɛɛbã ye. (Sɩngre 17:1; Yikri 6:3) Tõe n wõnda a Sʋɩtãan dũniyã vigla kãn-kãe, la a Zeova nifẽ, “ninsaalba fãa yaa wa koom tosgr a ye sẽn yit yʋʋr pʋgẽ. B zemsa wa wubsg sẽn be balãns zugu.” (Ezai 40:15) Wẽnnaam pãn-kãng maasem yĩnga, sãmbg ka be tɩ sõmbã na n tõoga wẽngã ye. Wakat kãngã wẽnemã sẽn yaa wʋsgã sasa, d tõe n paama belsg n bãng tɩ “Zusoaba sẽn yaa Saasẽ-pãng-soaba [tãb-biis soab a Zeova, NW ] la Israɛll-pãng-soaba” na n yiisa wẽngã wakat fãa yĩnga.—Ezai 1:24; Yɩɩl Sõamyã 37:9, 10.
8. Yĩngr tãp-biis bʋs la a Zeova kõt noore, la bõe n wilgd tɩ b tara pãngã?
8 Gomd ning sẽn yaa “tãb-biis soab a Zeova” wã sẽn pukd naoor 285 Biiblã pʋgẽ wã, yaa Wẽnnaam pãngã tẽegr a to. “Tãb-biis” nins yell b sẽn gom ka wã yaa bõn-naands sẽn yaa malɛk rãmb a Zeova sẽn kõt noyã. (Yɩɩl Sõamyã 103:20, 21; 148:2) Yʋʋn-yɛnga, malɛk kãensã a yembr bal kʋʋ Asiri sodaas 185 000 sẽn da rat n wa ne yell Zerizalɛm zugã. (2 Rĩm dãmba 19:35) Tõnd sã n mi pãng ning a Zeova yĩngr tãb-biisã sẽn tarã, d pa na n bas tɩ kɩɩsdbã kẽes-d rabeem nana-nana ye. Tãb-biis tõr sẽn da wa n gũbg no-rɛɛs a Eliize n na n zab ne-a wã, a ra pa maand yɩɩr wala a tʋm-tʋmda ye, bala ne a tẽebã nini, a ra tõe n yãa saasẽ tãb-biis wʋsg sẽn da sõngd-a.—2 Rĩm dãmba 6:15-17.
9. Bõe yĩng tɩ d segd n tall bas-yard ne Wẽnnaam koglgã wa a Zezi?
9 Woto me, a Zezi ra miime tɩ malɛk rãmbã teend-a lame, a sẽn da wa n seg neb kʋʋng ne sʋʋs la rasab Gɛtsemane zẽedẽ wã. A sẽn yeel a Pɩɛɛr t’a lebs n sui a sʋʋgã a wʋʋgẽ wã poore, a Zezi yeel-a lame tɩ sã n yaa tɩlae, a ra tõe n kosa a Ba wã “malɛk rãmb tus pis-yopoe la a yiib[u].” (Matɩe 26:47, 52, 53) Tõnd me sã n nand yĩngr tãb-biisã sẽn be ne Wẽnnaamã woto, d na n talla bas-yard zãng ne Wẽnnaam teelgã. Tʋm-tʋmd a Poll gʋlsame: “Dẽ, tõnd na n yeelame tɩ bõe ne yell kãnga? Wẽnnaam sã n be ne tõndo ãnda n tõe n tõog-do?”—Rom dãmba 8:31.
10. A Zeova rɩkda a pãngã n tʋmd ãnd dãmb yĩnga?
10 Rẽnd d tara bʋʋm wʋsg n na n tall bas-yard ne a Zeova koglgã. Wakat fãa a tũnugda ne a pãngã n maand neere, tɩ zems ne a zʋgd a taabã sẽn yaa tɩrlmã, yamã la nonglmã. (Zoob 37:23; Zeremi 10:12) Baa neb nins sẽn tar pãngã sã n nong n tabd naong rãmbã la talsã n baood paoong ne rat-m-yembre, a Zeova ‘zẽkda ned ning sẽn ka pãng t’a yi wubsg pʋgẽ,’ la a “tara pãng tɩ fãage.” (Yɩɩl Sõamyã 113:5-7; Ezai 63:1) Wala a Zezi ma a Maari, sẽn yaa sik-m-meng soabã sẽn yeelã, “Wẽnnaam Sẽn-tõeyã fãa” wã tʋmda ne a pãngã ne nonglem, n sõng neb nins sẽn zoet-a wã, n sikd wuk-m-mens rãmbã la a zẽkd sik-m-mens rãmbã.—Luk 1:46-53.
A Zeova pukda a pãngã a sõgen dãmbã
11. Kaset bʋg la Israɛll nebã maan ne Wẽnnaam pãngã yʋʋmd 1513 S.D.T.W.?
11 Yɛl wʋsg pʋsẽ, a Zeova puka a pãngã a sõgen dãmbã. Wala makre, yɩɩ woto Sinai Tãngã sɛɛg yʋʋmd 1513 S.D.T.W. Rẽ tɩ Israɛll nebã ra zoe n yãa Wẽnnaam pãn-yɛɛsdgã pukri. Tood piig sẽn wa ne sãoong n da wilg t’a Zeova nugã tara pãnga, la a wilg tɩ Ezipt wẽnnaam dãmbã ka pãng ye. Rẽ poor bilfu, Mogr Miuugã pasgr ne yel-solemd la a Faraõ tãb-biisã sãoong kõo kaset n paas tɩ Wẽnnaam tara pãnga. Kiis a tãab loogr poore, Sinai Tãngã sɛɛga, a Zeova kosa Israɛll nebã tɩ b lebg “a neb buuda fãa sʋka.” Bãmb me kãaba woto: “Bũmb nins fãa Zusoaba sẽn yeelã, tõnd na n maaname.” (Yikri 19:5, 8) Rẽ, a Zeova wilga a pãngã sõma-sõma. Sa-tãs la sa-yãgb ne baorg peebg bʋrg pʋgẽ, Sinai Tãngã yiisa bug-zõos la a rigimdi. Nebã sẽn be yɩɩgã yɛɛsame. La a Moiiz yeel-b lame tɩ yel-kãngã segd n zãms-b-la wẽn-zoeere, zoees sẽn da na n tus-b tɩ b sak b sɩd Wẽnnaam a yembr a Zeova sẽn tar pãng sẽn tõe fãa wã.—Yikri 19:16-19; 20:18-20.
12, 13. Yel-bʋs n tus a Eli t’a bas a tʋʋmdã, la wãn-wãn la a Zeova kõ-a pãnga?
12 Yʋʋm kob-gĩn wʋsg loogr poore, a Eli wakatã, Sinai Tãngẽ wã Wẽnnaam pãngã wilgr a to n zĩndi. No-rɛɛsã ra zoe n yãa Wẽnnaam pãngã wilgri. Yʋʋm a tãab la pʋɩ-sʋk pʋgẽ, Wẽnnaam ‘paga saasã,’ Israɛll buudã sẽn kɩɩs sɩdã yĩnga. (2 Kɩbaya 7:13) Warã sẽn wa ne koma sasa, gãabd n dɩlg a Eli Kerit ko-zoetmã longẽ, la kaoosg poore, pʋg-kõor sẽn da tar zom ne kaam bilf la Wẽnnaam maan ne yel-solemd tɩ pa satẽ sẽn na yɩl n dɩlg-a. A Zeova kõ a Eli pãng meng t’a vʋʋg pʋg-kõor kãngã biribla. Sẽn na n baase, b maana Wẽndlmã mak-kãseng sẽn yɩ vẽeneg Karmell Tãngã zugu. Bugum n yi saasẽ n dɩ a Eli maoongã. (1 Rĩm dãmba 17:4-24; 18:36-40) Baasg zãnga, rẽ poor bilfu, a Eli yɛɛsame n koms raoodo, a Zezabɛll sẽn da yeel t’a na n kʋ-a lame wã. (1 Rĩm dãmba 19:1-4) A zoe n yii tẽngã, n tagsdẽ t’a no-rɛɛs tʋʋmdã saame. Sẽn na yɩl n kõ-a bas-m-yam la pãngã, ne nonglem, a Zeova mengã wilg-a-la a pãngã.
13 A Eli sẽn da wa n solg tãng bokẽ wã, a yãa pãens a tãab wilgr a Zeova sẽn tar tõog b zutu: yaa sebg sẽn tar pãnga, tẽn-digimdgu, la sẽn na n baase, bugum. Baasg zãnga, a Zeova sẽn wa n gom ne a Eli wã, a goma ‘bãanem-bãanem n sik a koɛɛgã.’ A kõ-a-la tʋʋm n paas la a yeel-a t’a Zeova balemdb sẽn yaa kɩs-sɩd dãmb 7 000 da ket n be tẽngẽ wã. (1 Rĩm dãmba 19:9-18, NW ) Wala a Eli, d sã n koms raoodo, d ministɛɛrã sẽn pa womd biisã yĩnga, d tõe n kosa a Zeova t’a kõ-d “pãng ning sẽn yɩɩd pãn-zaalgã,” sẽn yaa pãng sẽn tõe n keng tõnd tɩ d ket n moond koe-noogã n pa basdẽ wã.—2 Korẽnt dãmba 4:7, NW.
A Zeova pãngã kõta kaset t’A kãabsã na n paama pidsgu
14. Bõe la a Zeova mengã yʋ-peell wilgda, la wãn-wãn la a pãngã tɩ loe ne a yʋʋrã?
14 A Zeova pãngã me tɩ loee sõma ne a yʋʋrã la a raabã pidsgu. Yʋʋr sẽn ka to sẽn yaa Zeova wã sẽn dat n yeel t’ “A kɩtdame tɩ yɩ” wã wilgdame t’a maanda a meng ned sẽn yaa kãabs Pidsda. Bũmb bɩ ned ba a yembr pa tõe n gɩdg Wẽnnaam t’a pa pids a raabã ye, baa sãmb-sãmb rãmbã sẽn tõe n tags tɩ rẽ pa sɩdã. Wa a Zezi sẽn yeel a tʋm-tʋmdbã vugrã, “Wẽnnaam tõee bũmb fãa.”—Matɩe 19:26.
15. Wãn-wãn la b tẽeg a Abrahaam la a Saara tɩ bũmb pa be n yaa toog ne a Zeova?
15 Wala makre, vugri, a Zeova kãaba a Abrahaam la a Saara t’a na n kɩtame tɩ b yagensã yɩ bu-kãsenga. Baasg zãnga, b kell n paa woto n pa paam kamb sẽn na maan yʋʋm wʋsgo. B yiiba fãa ra kʋʋla wʋsgo, a Zeova sẽn da wa n yeel-b tɩ kãabgã na n pidsame t’a Saara la wã. Malɛka leokame n yeele: “Bũmb beeme tɩ Zusoaba ka tõe n maan sɩda?” (Sɩngre 12:1-3; 17:4-8; 18:10-14) Yʋʋm kob-gĩn a naas loogr poore, a Moiiz sẽn wa n baas n tigim a Abrahaam yagensã sẽn da lebg bu-kãseng masã Moaab Rasempʋɩɩgẽ wã, a tẽeg-b lame tɩ Wẽnnaam da pidsa a kãabgã. A Moiiz yeelame: “Bãmb [a Zeova] nonga yãmb yaab rãmbã n yãk bãmb yagensã n yiis yãmb Ezipt tẽng ne pãng kãsenga. Bãmb diga bu-kãsems sẽn tar pãng n yɩɩd yãmb n deeg b tẽnsã n kõ yãmb tɩ y soog wa bãmb sẽn maand rũnda wã.”—Tõodo 4:37, 38.
16. Bõe yĩng tɩ Sadiseẽ rãmbã tudgi, b sẽn kɩɩs kũum vʋʋgrã?
16 Yʋʋm kob-gĩn loogr poore, a Zezi lenga Sadiseẽ rãmbã sẽn pa tẽ vʋʋgrã. Bõe yĩng tɩ b tõdg tɩ b kõn tẽ Wẽnnaam kãabgã a sẽn kãab t’a na n vʋʋga sẽn ki-bã? A Zezi yeel-b lame: “Yãmb ka mi Gʋlsg Sõamyã wala Wẽnnaam pãnga me ye.” (Matɩe 22:29) Gʋlsg Sõamyã kõta tõnd bas-m-yam tɩ ‘b rãmb nins fãa sẽn be tẽegr yaad pʋsẽ wã na n wʋma ninsaal Biriblã koɛɛgã n yi.’ (Zã 5:27-29, NW ) Tõnd sã n mi Biiblã sẽn yet bũmb ning vʋʋgrã zugã, d bas-yardã ne Wẽnnaam pãn-tõogã na n tusa tõnd tɩ d sɩd tẽ tɩ kũum na n vʋʋgame. Wẽnnaam “na n [sɩd] sãama kũum wakat sẽn-ka-sɛta. . . . Tɩ bõe, yaa Zusoabã n gom.”—Ezai 25:8.
17. Beoog-daar bʋg sasa la a Zeova teegr na n tall yõod ne manesem sẽn yaa toor zalle?
17 Ka la bilfu, wakat n na n wa zĩnd tɩ tõnd ned kam fãa segd n tall bas-yard ne Wẽnnaam pãngã sẽn fãagdã ne manesem sẽn yaa toor zalle. A Sʋɩtãan Munaafɩɩk na n yika zabr ne Wẽnnaam nin-buiidã, sẽn na n wõnd a ka koglgã. (Ezekɩɛll 38:14-16) Rẽ, Wẽnnaam na n wilga a pãn-kãsengã n sõng tõndo, la neba fãa na n bãngame t’a yaa a Zeova. (Ezekɩɛll 38:21-23) Yaa masã la d segd n keng d tẽebã la d bas-yardã ne Wẽnnaam Sẽn-tõe-fãa wã, sẽn na yɩl n da miim wakat kãseng kãng sẽn wata ye.
18. a) Nafa bʋs la d paamda, d sã n bʋgs a Zeova pãngã zugu? b) Sʋk-bʋg la d na n vaees sõsg ning sẽn pʋgdã pʋgẽ?
18 Sãmbg sẽn ka be, bʋʋm wʋsg n be tɩ d na n bʋgs a Zeova pãngã zugu. D sẽn get a tʋʋmã neerã sasa, d tʋlla ne sik-m-meng n pẽg d Naand Kãsengã la d pʋʋs-a barka, a sẽn dɩkd a pãngã n tʋmd ne yam la nonglem woto wã yĩnga. D sã n teeg tãb-biis soab a Zeova, ned pa na n tol n kẽes-d rabeem ye. Tõnd tẽebã ne a kãabsã pa na n vigs ye. La y tẽeg tɩ b naana tõnd Wẽnnaam wõnego. Woto yĩnga, tõnd me tara pãnga, baa sã n yaa pãng sẽn tar koaka. Wãn-wãn la d tõe n dɩk togs-n-taar ne d Naandã, d sẽn tʋmd ne d pãngã to-to wã pʋgẽ? D na n vaeesa rẽ sõsg ning sẽn pʋgdã pʋgẽ.
[Tẽngr note]
^ sull 1 B nong n tagsdame tɩ tẽngã pʋgẽ bõn-yõogdem kãensã sẽn yaa petrollã la sarbõ wã, sẽn kõt kʋʋrã wʋsgã pãng yita wĩntoogẽ wã.
^ sull 4 Sẽn yaa lebende, bõmb nikleɛɛr sẽn tara pãng n yɩɩd b sẽn mak n gesã pusgr pãng taa TNT megaton 57.
^ sull 6 We-naaf ning yell b sẽn gom Biiblã pʋgẽ wã yaa tẽn-kʋdem wẽndẽ we-naaf buudu (ne latẽ yaa urus). Yʋʋm tus a yiib sẽn looge, b ra yãta rũm-kãensã Goll tẽngẽ wã (sẽn yaa Fãrens masã wã), la a Jule Cesar gʋlsame n bilg-b woto: “Wobg bedrem pa yɩɩd Uri kãensã wʋsg ye, sã n pa b manesmẽ wã, b kõbgẽ wã, la b yalẽ wã sẽn yaa niig rẽndã. B pãngã yaa kãsenga, la b zoeesa tʋʋlame: b nif sã n da sok ninsaal bɩ rũngã, b pa basd-a ye.”
Y tõe n leoka sʋgs-kãensã bɩ?
• Wãn-wãn la naanegã kõt kaset ne a Zeova pãngã?
• Tãb-biis bʋs la a Zeova tõe n tũnug ne n sõng a nin-buiidã?
• Sasa bʋs la a Zeova wilg a pãngã?
• Bas-yard kaset bʋg la d tar t’a Zeova na n pidsa a kãabsã?
[Zãmsgã sogsgã]
[Foto, seb-neng 21]
“Zẽk-y y nin yĩngr n gese. Ãnda n naan bõn-kãensã?”
[Fotã soaadbã]
Photo by Malin, © IAC/RGO 1991
[Foto, seb-neng 24]
D sã n bʋgs a Zeova pãngã wilgr zutu, d tẽebã ne a kãabsã paasdame