“Bao-y a Zeova la a pãngã”

“Zusoaba [a Zeova, NW ] nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.”—2 KƖBAYA 16:9.

1. Pãng yaa bõe, la yaa wãn-wãn la ninsaalbã tʋm ne-a?

PÃNG tõe n dat n yeela yɛl wʋsgo. A tõe n yaa bũmb tõogre, zu-sobend bɩ pãng neb a taab zutu, tõog n tʋm bɩ n tall pãn-tusdga, tõog yĩngã wɛɛngẽ (pãngã), pãn-tõog bãngrã bɩ vɩɩm-manesmã wɛɛngẽ. Sã n yaa ne pãngã wilgr wɛɛngẽ ninsaalbã pa tar kɩba-noog ye. Kʋdemd yel-gɛt a Lord Acton sẽn gomd pãng ning sẽn be politisiẽ rãmbã nusẽ wã wɛɛngẽ yeelame: “Pãng sãamda neda, la pãng wʋsg sãamda ned fas-fasɩ.” Rũndã-rũndã kʋdemd yel-gɛtbã tara makr wʋsg sẽn wilgd tɩ naoor wʋsgo a Lord Acton goamã yaa sɩda. Yʋʋm kob-gĩnd 20 soabã sasa, ‘ninsaal dɩɩ naam ninsaal zug a wẽng yĩng’ n yɩɩd pĩndã. (Koɛɛg Soaba 8:9, NW ) Na-toos sẽn yaa zãmb rãmb tʋma ne b pãngã tɩ loog noore, la b yãgsa neb milyõ rãmb yõyã. Pãng sã n pa loms ne nonglem, yam la tɩrlem fãa, a yaa yelle.

2. Wilg-y wãn-wãn la a Zeova zʋgdã tar pãn-tusdg a sẽn tʋmd to-to ne a pãngã pʋgẽ.

² Sẽn yaa lebend ne ninsaalb wʋsgo, wakat fãa Wẽnnaam tʋma sõma ne a pãngã. “Zusoaba [a Zeova, NW ] nif geta dũniyã zĩiga fãa n dat n sõng neb nins sẽn dat Wẽnnaam ne b sũyã fãa wã.” (2 Kɩbaya 16:9) A Zeova tʋmda ne a pãngã tɩ tũud sore. Maag-m-mengã kɩtame tɩ Wẽnnaam nan pa pidsd bʋ-kaoorã nin-wẽnsã zutu, sẽn na yɩl n kõ-b sor tɩ b tek yam n kos sugri. Nonglmã tus-a lame t’a kɩt tɩ wĩntoogã yãgd ninsaalbã fãa zutu, nin-tɩrsã la sẽn pa-b nin-tɩrsã. Sẽn na n baase, tɩrlmã na n tus-a lame t’a rɩk a pãngã sẽn ka koakã n menems ned ning sẽn tar tõog n wat ne kũumã: a Sʋɩtãan Munaafɩɩkã.—Matɩe 5:44, 45; Hebre dãmba 2:14; 2 Pɩɛɛr 3:9.

3. Bõe yĩng tɩ Wẽnnaam pãngã sẽn tõe fãa wã yaa bʋʋm sẽn sek tɩ d teeg-a?

³ Tõnd yĩngr Ba wã pãng sẽn yɛɛsdã yaa bʋʋm tɩ d na n tall bas-m-yam la bas-yard ne a kãabsã la a koglgã. Bi-kɩdg tara bas-m-yam ne sãamba, a sã n gãda a ba nugu, a sẽn mi t’a ba wã pa na n bas tɩ bũmb maan-a wã yĩnga. Woto me, tõnd yĩngr Ba wã sẽn yaa ned ning ‘sẽn tar pãng wʋsg n tõe n fãagã’ na n kogla tõnd ne wẽng buud fãa sẽn kaoosde, d sã n kẽnd ne-a. (Ezai 63:1; Miise 6:8) La wala Ba-sõngo, a Zeova pidsda a kãabsã wakat fãa. A pãngã sẽn ka koakã kõta tõnd bas-yard kaset t’a ‘goama na n tõoga bũmb ninga yẽ sẽn tʋm-a t’a tɩ maana.’—Ezai 55:11; Tɩt 1:2.

4, 5. a) Bõe n yɩ, Rĩm a Aza sẽn teeg a Zeova vẽenegã? b) Bõe n tõe n zĩndi, d sã n teeg ninsaal yam n bao d zu-loeesã tɩɩm?

⁴ Bõe yĩng tɩ tar yõod wʋsg woto tɩ d rɩk sard kãn-kãe n da yĩm koglg ning d yĩngr Ba wã sẽn kõt-dã? Bala yɛlã tõe n wa lim-d lame tɩ d yĩm d bãan hakɩkã sẽn beẽ. D nee rẽ rĩm a Aza makrã pʋgẽ. Yẽ ra yaa rao sẽn da nong n teeg a Zeova. A Aza naamã rɩɩb wakate, Etiopi tãb-biis sẽn tar sodaas tus-kẽemd n wa n zab ne Zida. A sẽn yã tɩ bɛ wã sodaas pãng n yɩɩdã a Aza pʋʋsa woto: “Zusoaba, yaa yãmb bal n tõe n kẽ pãens rãmb ne sẽn ka pãens rãmb sʋk n sõnge. Zusoab a Wẽnnaam, sõng-y-do; tɩ bõe, tõnd teega yãmba, la yaa ne yãmb yʋʋra la tõnd yi n na n tɩ zab ne zãma kãngã. Yãmb yaa tõnd Wẽnnaam. Bɩ y ra bas tɩ ninsaalb tõog yãmb ye.” (2 Kɩbaya 14:10) A Zeova reega a Aza kosgã n kõ-a tõogr kãsenga.

 ⁵ Baasg zãnga, a sẽn sõgen ne kɩs-sɩd yʋʋm wʋsg poore, a Aza bas-yardã ne tõog ning a Zeova sẽn tar fãagrã wɛɛngẽ wã boogame. Sẽn na yɩl n põs Israɛll rɩtg rĩungã zabr sẽn da laandã, a kedg n baoo Siiri sõngre. (2 Kɩbaya 16:1-3) Baa ne noor madgrã a sẽn kõ Siiri Rĩm a Benhadaadã pa kɩt tɩ yell ning Israɛll sẽn da rat n wa ne Zida zugã pa wa ye. A Aza sẽn maan kaool ning ne Siiri wã ra wilgda bas-yard kaalem ne a Zeova. No-rɛɛs a Hanani sʋk-a-la woto vẽenega: “Etiopi rãmbã ne Libi rãmbã ra pa tãp-biis sẽn yaa kãseng wʋsgo, ne saar dãmb ne wed-rʋʋdb wʋsgo, la fo sẽn teeg a Zeova wã, a pa ning bãmb f nugẽ sɩda?” (2 Kɩbaya 16:7, 8, NW ) Baasg zãnga a Aza zãgsa lengr kãngã. (2 Kɩbaya 16:9-12) D sã n wa segd zu-loeese, bɩ d ra teeg ninsaalb yam yɛlã tɩɩm baoob pʋgẽ ye. Sẽn yaa lebende, d tall bas-yard ne Wẽnnaam, bala ninsaalb pãng teegr na n wa baasa ne sũ-sãams tɩ sik kaẽ ye.—Yɩɩl Sõamyã 146:3-5.

Bao-y pãng ning a Zeova sẽn kõtã

6. Bõe yĩng tɩ d segd n ‘bao a Zeova la a pãngã’?

⁶ A Zeova tõe n kõo a sõgen dãmbã pãng la a kogl-ba. Biiblã sagenda tõnd tɩ d “bao Zusoaba ne bãmb pãngã.” (Yɩɩl Sõamyã 105:4) Bõe yĩnga? Bala d sã n maan yɛl ne Wẽnnaam pãnga, d na n dɩka d pãngã n tʋm tɩ naf neb a taabã, la pa sẽn na n maan-b wẽng ye. Zĩig a to ba a yembre d pa yãt makr sẽn yaa sõma n yɩɩd a Zezi Kirist rẽndã, sẽn maan yel-soalem wʋsg ne “a Zeova pãngã” ye. (Luk 5:17, NW ) A Zezi ra tõe n dɩka a vɩɩmã zãng n bao arzɛka, yʋʋr la naam kãseng menga. (Luk 4:5-7) A yaool n pa maan woto ye, a rɩka pãng ning Wẽnnaam sẽn kõ-a wã n form la a zãms nebã, n sõng-b la a sãoog-ba. (Mark 7:37; Zã 7:46) Ad sɩd yaa mak-sõng tɛkẽ n kõ tõndo!

7. Zʋgd kãseng bʋg la d bɩɩsda, d sã n maand yɛlã ne Wẽnnaam pãng la pa ne tõnd meng pãnga?

⁷ Sẽn paase, tõnd sã n maan yɛlã ne “pãng ninga Wẽnnaam sẽn kõ” tõndã, rẽ na n sõnga tõnd tɩ d tall sik-m-menga. (1 Pɩɛɛr 4:11) Neb nins sẽn baood pãng b mens yĩngã lebgda tɩtaam dãmba. Makr ne rẽ yaa Asiri Rĩm a Esar-haddon sẽn wuk a meng n yeel woto wã: “Mam tara pãnga, m tara pãng fãa, m yaa gãndaoogo, m yaa kãseng wʋsgo.” Sẽn yaa lebende, a Zeova “yãka dũniyã bũmb nins sẽn ka pãngã n ning pãens rãmba yãnde.” Woto, kiris-ned hakɩk sã n wukd a menga, a wukda a meng a Zeova yĩnga, bala a miime tɩ bũmb ning a sẽn maana pa yɩ ne yẽ meng pãng ye. ‘D sã n sikd d mens Wẽnnaam sẽn yaa pãng soaba taoore,’ na n waa ne zẽkr meng-menga.—1 Korẽnt dãmba 1:26-31; 1 Pɩɛɛr 5:6.

8. Pipi, bõe la d segd n maan sẽn na yɩl n paam a Zeova pãngã?

⁸ Wãn-wãn la d paamd Wẽnnaam pãngã? Pipi, d segd n pʋʋs n kosa pãng kãngã. A Zezi kõo a karen-biisã bas-m-yam t’a Ba wã na n kõo a vʋʋsem sõngã neb nins sẽn kot-a wã. (Luk 11:10-13) Ges-y rẽ sẽn kõ Kirist karen-biisã pãng ningã, b sẽn wa n yãk n na n sak Wẽnnaam n bas tũudmã nanambs sẽn da kõ-b noor tɩ b ye ra kõ kaset a Zezi wɛɛngẽ wã. B sẽn wa n pʋʋs n kos a Zeova sõngrã, b pʋʋsgã b sẽn maan ne pʋ-peelmã paama reegre, la vʋʋsem sõngã kõ-b-la pãng tɩ b ket n moond koe-noogã ne raoodo.—Tʋʋma 4:19, 20, 29-31, 33.

9. Wilg-y zĩig a yiib soab pʋgẽ d sẽn tõe n paam tẽebã pãngã, la y wilg makr sẽn yit Gʋlsg Sõamyã pʋgẽ sẽn wilgd t’a yaa sõma.

 ⁹ Yiib-n-soaba, d tõe n paama tẽeb pãng Biiblã pʋgẽ. (Hebre dãmba 4:12) Wẽnnaam gomdã pãng ra yaa vẽeneg Rĩm a Zozias wakatã. Baa ne Zida rĩm kãngã sẽn da zoe n yiis payẽ rãmbã wẽn-naands tẽngã pʋgẽ wã, a Zeova Tõogã b sẽn yã ne lingr wẽn-doogẽ wã tus-a lame t’a modg n paas yɩlgr tʋʋm kãng pãngã. * A Zozias mengã sẽn wa n karem Tõogã a toor nin-buiidã taoor poore, buudã tõr maana kaool ne a Zeova, la b maana modgr a yiib-n-soab sẽn tar pãng n yɩɩd n zab ne wẽn-naands pʋʋsgã. A Zozias remsgã bi-sõma kɩtame t’“a yõor tɛka, b pa bʋdg n bas a Zeova tũub ye.”—2 Kɩbaya 34:33, NW.

10. Manesem a tãab-n-soab bʋg la d na n tũnug ne n paam pãng ning sẽn yit a Zeova nengẽ wã, la bõe yĩng t’a tar yõod wʋsgo?

¹⁰ Tãab-n-soaba, d paamda pãng a Zeova nengẽ ne kiris-neb lagem-n-taarã maasem. A Poll sagla kiris-nebã tɩ b kẽng tigissã wakat fãa sẽn na yɩl n “yik taab ratem tɩ maan nonglem la tʋʋm sõama” la d kõ taab raoodo. (Hebre dãmba 10:24, 25) B sẽn wa n yiis a Pɩɛɛr bi-bees roogẽ wã ne yel-solemdã, a ra rat n zĩnda ne a saam-biisã, rẽ n so t’a kẽng a Zã Mark ma wã roogẽ tɩrga, bala “neb wʋsg ra tigma be n pʋʋsdẽ.” (Tʋʋma 12:12) Sɩda, b fãa ra tõe n paa b yiy n pʋʋse. La b yãkame n na n lagem taab n pʋʋs la b keng taab pels sasa toog kãngã pʋgẽ. A Poll so-toak ning a sẽn maan Rom sẽn yɩ wok la tall yɛlã saab sẽnese, a sega saam-biis sãnda Puteoli, la kaoosg poore a sega saam-biis a taab sẽn da tog sor n na n wa ges-a. A manesem yɩɩ bõe? “A Poll sẽn yã bãmba, yẽ pʋʋsa Wẽnnaam bark n keng a sũuri.” (Tʋʋma 28:13-15) A ra paama kengre, a sẽn da be ne a kiris-nin-taasã ye yaasã. Tõnd me paamda kengr ne d kiris-nin-taasã lagem-n-taare. Tõnd sã n tar paam-m-meng n tõe n tigim taab fãa, d pa segd n mak n kẽn d yembr so-sẽk ning sẽn tar n debd vɩɩmã zĩigẽ wã ye.—Yelbũna 18:1; Matɩe 7:14.

11. Sõdg-y yɛl kẽer pʋsẽ d sẽn dat “pãng ning sẽn yɩɩd pãn-zaalgã” n yɩɩd sasa a taabã.

¹¹ Ne pʋʋsg wakat fãa, Wẽnnaam Gomdã zãmsgo, la lagem-n-taar ne tẽed-n-taasã maasem, d “paam[da] daood Zusoaba tũudum pʋgẽ n deeg bãmb pãng kãsengã.” (Efɛɛz rãmba 6:10) Sãmbg sẽn ka be, tõnd fãa rata “daood Zusoaba tũudum pʋgẽ.” Kẽer namsda bãag sẽn koms-b yĩnga, a taab yaa kʋʋlmã n namsd-ba, bɩ b kẽed-n-taag sẽn maan kaalem yĩnga. (Yɩɩl Sõamyã 41:4) Kẽer tõogda toogo, b kẽed-n-taag sẽn pa tẽedã kɩɩsg yĩnga. Roagdba, sẽn yɩɩd fãa roagdb nins sẽn yaa b yembr n wubd b kambã tõe n tagsdame tɩ nug tʋʋm maaneg sẽn dɩkd daarã tõr sẽka, tɩ rẽ wa paas zak zãabã yaa zɩɩb sẽn kõt yaamse. Kiris-neb nins sẽn yaa kom-bɩɩsã rata pãng n yals kãn-kãe b tũud-n-taasã weoogr taoore, la b zãgs dorgã la yoobã. Ned ba a yembr pa segd n maan yam-yoog la a kos a Zeova n paam “pãng ning sẽn yɩɩd pãn-zaalgã” sẽn na yɩl n mao ne zu-loe-kãensã ye.—2 Korẽnt dãmba 4:7, NW.

‘A kõta ned ning sẽn yɛ pãnga’

12. Wãn-wãn la a Zeova teend tõnd kiris-ned ministɛɛrã pʋgẽ?

¹² Sẽn paase, a Zeova kõta a sõgen dãmbã pãnga, b sã n tʋmd a tʋʋmdã. D karemda woto a Ezai bãngr-gomdã pʋgẽ: “Ned sã n yɛ, bãmb kõt-a-la pãnga. Ned pãng sã n booge, bãmb paasd-a-la pãnga. . . . Neb nins sẽn teegd Zusoaba [a Zeova, NW ] pãng paasda wakat fãa. Bãmb na n yɩga wa sɩlse. Bãmb na n zoeeme la b pãng ka na n sɛ ye. Bãmb na kẽname n ka yɛ ye.” (Ezai 40:29-31) Tʋm-tʋmd a Poll mengã paama pãng n tʋm a ministɛɛrã tʋʋmde. Rẽ kɩtame t’a ministɛɛrã wom biis sõma. A gʋlsa kiris-neb nins sẽn be Tesalonikã woto: “Tõnd Koe-noog ka ta yãmb nengẽ ne goam bal ye, la a taa ne pãnga la ne Sɩɩg Sõngo.” (1 Tesalonik rãmba 1:5) A moonegã la a zãmsgã ra tara pãng n na n toeem a kɛlgdbã vɩɩm wʋsgo.

13. Bõe n kõ a Zeremi pãng t’a kẽng taoor baa ne kɩɩsgã?

 ¹³ D sã n wa seg yam-kaalg d tẽebã pʋʋgẽ wã, la sã n mik tɩ d moona tẽebã pʋʋg kãng pʋgẽ n yɩlem yʋʋm wʋsg tɩ pa wom biis wʋsgo, d tõe n komsa raoodo. Woto me, kɩɩsgã, yaalgã la yam-kaalgã a sẽn segã kɩtame t’a Zeremi ra koms raoodo. ‘M ka na n le togs Zusoaba yelle walla m gom bãmb yʋʋr yell ye,’ woto la a ra yet a menga. La a ra pa tõe n sĩnd ye. A koɛɛgã ‘lebga wa bugum a sũura pʋgẽ, a bee a kõab pʋsẽ.’ (Zeremi 20:9) Yaa bõe n kõ-a pãn-paalg kɩɩsg a woto fãa taoore? “Zusoaba bee ne maam wa gãndaoog sẽn tar pãnga,” woto, la a Zeremi yeel-yã. (Zeremi 20:11) A Zeremi sẽn tall naneb ning ne a koɛɛgã yõod sẽn yaa kãsengã la ne tʋʋmd ning Wẽnnaam sẽn bobl-a wã kɩtame t’a sak a Zeova sẽn kõ-a raoodã.

Pãng sẽn pogende, la pãng sẽn sãoogde

14. a) Zɩlemdã pãngã yaa wʋsg n ta zĩ-bʋgo? b) Kõ-y makr sẽn wilgd wẽng ning zɩlemd sẽn tõe n maana.

¹⁴ Pa pãng ning fãa tõnd sẽn tarã n yit Wẽnnaam mengã nengẽ ye. Wala makre, zɩlemd tara pãng n tõe n pogl la a sãooge. “Zelemd n tõe tɩ ned vɩɩnde, la zelemd n tõe tɩ ned ki,” woto la a Salomo keoogd tõndo. (Yelbũna 18:21) A Sʋɩtãan sõs-koɛɛgã a sẽn tall ne a Hawa wã wilgda wẽng wʋsg ning goam sẽn tõe n wa ne wã. (Sɩngre 3:1-5; Zak 3:5) Tõnd me tõe n maana wẽng wʋsg ne zɩlemdã. F sã n gom n sãbg bipugl bedrem, a tõe n tiigame n ye pa rat n dɩ rɩɩb hal tɩ lebg bãaga. F sã n pa tags tɩ bɩ n dɩk kãnegr goam n tɩ togs neda, tõe n sãama zood sẽn da sɩng n be hal sẽn kaoose. N-yẽe, zɩlemd rata yõkre.

15. Wãn-wãn la d tõe n tʋm ne d zɩlemdã n kenge la d sãooge?

¹⁵ Baasg zãnga, zɩlemd tõe n maana neer la a paoog neda. Biiblã yel-bũnd yetame: “Ned sẽn ka gũusd goam zabda wa sʋʋg sẽn wãag neda. La yam soab goam wata ne laafɩ.” (Yelbũna 12:18) Kiris-neb nins sẽn tar yamã tʋmda ne zɩlemdã pãng n bels yam-ka-m-meng rãmbã la sẽn be-b sũ-sãoong pʋgẽ b nin-nongr kaalem yĩngã. Zood goam tõe n kõo bi-bɩɩg ning sẽn maood ne a kom-bɩ-taasã weoogr sẽn yaa wẽngã raoodo. Ned sẽn tagsd n yaool n gom zɩlemd tõe n kõo saam-biis la saam-bi-pogs nins sẽn kʋʋlã bas-m-yam tɩ b ket n tara yõod la b nong-b lame. Gom-nood tõe n nooga sẽn bẽed-bã sũyã. Sẽn yɩɩd fãa, d tõe n tũnuga ne d zɩlemdã n moon Rĩungã koɛɛg sẽn tar pãngã tɩ neb nins fãa sẽn datã kelge. Tõnd tõe n moona Wẽnnaam gomdã, sã n mik tɩ tõnd sũurã nong-a lame. Biiblã yetame: “Fo sã n tõe n sõng f yaka, bɩ f sõng-a la f ra zãgs ye.”—Yelbũna 3:27.

 Pãngã rɩk-n-tʋm sẽn zemse

16, 17. B sã n wa wilgd zu-sobend ning Wẽnnaam sẽn bobl-bã, wãn-wãn la kẽem dãmbã, roagdbã, sɩdbã la pagbã tõe n dɩk a Zeova togs-n-taare?

¹⁶ Baa ne a sẽn tõe fãa wã, a Zeova rɩta naam tigingã zug ne nonglem. (1 Zã 4:8) Yel-gɛtb nins sẽn yaa kiris-nebã rɩkda a togs-n-taar n get Wẽnnaam bãgrã yell ne nonglem, n pa tʋmd ne b zu-sobendã tɩ loog ye. Yaa sɩd tɩ wakat-wakate, yel-gɛtbã segd n ‘wilga neba b kongre la b lenge la b sagle,’ la b maanda woto ‘ne sũ-maasem wʋsgo, la [zãmsg tõogo, NW ].’ (2 Tɩmote 4:2) Woto, wakat fãa, kẽem dãmbã tagsda goam nins zut tʋm-tʋmd a Pɩɛɛr sẽn gʋls n taas neb nins sẽn tar zu-sobend tigingã pʋgẽ wã: “Bɩ y rɩlg Wẽnnaam piisa sẽn be yãmb nusẽ wã, ka modgr yĩng ye, la yaa ne yamleoogo sẽn zems Wẽnnaam yam, ka ligd yĩng ye, la yaa nonglem yĩnga, ka tɩ soog bãmb ne pãng ye, yaa tɩ yɩ mamsg bãmb yĩnga.”—1 Pɩɛɛr 5:2, 3; 1 Tesalonik rãmba 2:7, 8.

¹⁷ Roagdbã la sɩdbã me tara zu-sobend a Zeova sẽn kõ-ba, la b segd n tʋma ne pãn-kãngã n sõnge, n dɩlg la b wilg nonglem. (Efɛɛz rãmba 5:22, 28-30; 6:4) A Zezi makrã wilgdame tɩ b tõe n tʋma sõma ne zu-sobend kãng ne nonglem tɩ wom biisi. Kiblgã sã n kõ ne kɩls tɩ zems la sõma wakat fãa, kambã pa na n koms raood ye. (Kolos rãmba 3:21) Kãadmã pãng paasdame, sɩdb nins sẽn yaa kiris-nebã sã n tʋmd ne b zu-sobendã nonglem pʋgẽ tɩ pagbã tar waoogr sõma-sõma ne b sɩdbã zu-sobendo, n pa baood n na n maan tɩ yɩɩg tõog ning Wẽnnaam sẽn kõ-bã n bao n soog b sɩdbã bɩ n maan b sẽn dat ye.—1 Pɩɛɛr 3:7.

18. a) Wãn-wãn la d segd n dɩk a Zeova togs-n-taar n tõog d sũ-yikrã? b) Bõe la neb nins sẽn tar zu-sobendã segd n mak n ning neb nins yell b sẽn getã sũyẽ?

¹⁸ Sẽn yɩɩd fãa, neb nins sẽn tar zu-sobend zakã pʋgẽ la tigingã pʋgẽ wã segd n gũusame n tõog b sũ-yikrã, bala sũ-yikr wata ne rabeem lakẽ pa nonglem ye. No-rɛɛs a Nahũm yeelame: “Zusoaba sũur ka yikd tao-tao ye, la b tara pãng wʋsgo.” (Nahũm 1:3; Kolos rãmba 3:19) Tõnd sũ-yikrã tõogr yaa bãnd tɩ d tara pãnga, tɩ d sã n yaool n pa tõog-a bɩ wilgdẽ tɩ d tara pãn-komslem. (Yelbũna 16:32) Zakã la tigingã pʋgẽ, d sẽn dat bũmb ningã yaa d kɩt tɩ nonglem zĩndi, nonglem a Zeova yĩnga, nonglem ne taaba, la nonglem no-tɩrsã yĩnga. Nonglmã yaa zems-n-taarã loɛtg ning sẽn tara pãng n yɩɩdã, la tʋlsem ning sẽn tara pãng n yɩɩd sẽn na yɩl n maan sẽn yaa tɩrgã.—1 Korẽnt dãmba 13:8, 13; Kolos rãmba 3:14.

19. Bas-m-yam bʋg sẽn kõt belsg la a Zeova kõta, la wãn-wãn la d segd n maan dẽ taoore?

¹⁹ Bãng a Zeova yaa sak n deeg a pãngã. A Zeova tũnuga ne a Ezai n yeel woto: “Fo ka mi la? Fo ka wʋm la? Zusoaba [a Zeova, NW ] yaa Wẽnnaam sẽn ka sɛta. Yaa bãmb n naan dũniyã soolem fãa. Bãmb ka yɛɛda la b pãng ka sɛt me ye.” (Ezai 40:28) A Zeova pãngã pa tõe n sa ye. Tõnd sã n teeg-a n pa teeg d mensã, a pa na n bas-d ye. A kõta tõnd bas-m-yam woto: “Ra zoe-y rabeem ye; mam bee ne yãmba. Ra yɛɛs-y ye; mam yaa yãmb Wẽnnaam. Mam na n kenga yãmba, mam na n sõnga yãmba. Mam na n talla yãmb ne m nug rɩtg sẽn tõogdã.” (Ezai 41:10) Tõnd manesem segd n yɩɩ wãn-wãn a sẽn get tõnd ne nonglmã? Wala a Zezi, wakat fãa bɩ d rɩk pãng buud fãa a Zeova sẽn kõt-dã n sõng la d keng neb a taabã. Bɩ d tõog d zɩlemdã t’a sãoog la a ra pogl ye. La bɩ d pa nekr pʋgẽ wakat fãa tẽebã wɛɛngẽ, n yals kãn-kãe tẽebã pʋgẽ, la d paam keelem n paas d Naand Kãseng a Zeova pãngã maasem yĩnga.—1 Korẽnt dãmba 16:13.

[Tẽngr note]

Y tõe n wilga a võor bɩ?

• Wãn-wãn la a Zeova tʋmd ne a pãngã?

• Wãn-wãn la d tõe n paam a Zeova pãngã?

• Wãn-wãn la d segd n tʋm ne zɩlemdã pãnga?

• Wãn-wãn la zu-sobend ning Wẽnnaam sẽn kõ wã tõe n yɩ barka?

[Zãmsgã sogsgã]

[Foto, seb-neng 26]

A Zezi rɩka a Zeova pãngã n sõng neb a taaba

[Foto rãmba, seb-neng 28]

Tõnd tõe n moona Wẽnnaam Gomdã, sã n mik tɩ tõnd sũurã bee Wẽnnaam gomdã zugu