Karemdbã sʋgsgo

Evãnzill dãmb a tãab n gomd yẽgeng ning yell b sẽn maane, b sẽn zae a Zezi ne kaam ligd sẽn yaa toog wʋsgã yĩnga. Yaa tʋm-tʋmdb wʋsg la sẽn yẽgma bɩ, bɩ sẽn yɩɩd fãa, ra ya a Zida?

D nee yel-kãngã b sẽn togs a Matɩe, a Mark la a Zã Evãnzill dãmbẽ wã. Wõnda ya a Zida n lʋɩ taoor yẽgengã pʋgẽ, ne tʋm-tʋmdb a taab a wãn sẽn sak a sẽn yetã. Yel-kãngã wilgda bũmb ning sẽn kɩt tɩ d tõe n tall mi-beoog ne d sẽn tar Evãnzill dãmb a naasã. Gʋlsd fãa sẽn gʋlsã ra zemsa kɛpɩ, la b fãa sẽn togs yɛl nins n welgã pa yembr ye. D sã n mak kɩbay sẽn wõnd taab n gese, d paamda togs-n-welg n paas ne yɛl wʋsgo.

Matɩe 26:6-13 kɩbarã wilgda yellã sẽn maan zĩig ninga: wãoor a Simo zakẽ wã Betani, la a pa togs pag ning sẽn pʋdg tɩdarã kaam a Zezi zugã yʋʋr ye. A Matɩe wilgdame: “Karem-biisa sẽn yã bõn-kãnga bãmb sũyã ka yɩ noog ye,” tɩ b yẽgem n yeel tɩ b ra tõe n koosa tɩdarã kaam n kõ ligdã naong rãmba.—Tõnd n ning italikã.

A Mark kɩbarã tara kɩba-kãensã wʋsg sẽn yɩɩde. La a paasdame t’a paka tʋkã. Tʋg-kãng ra tara tɩdar kaam sẽn da yaa “naar halaale,” wala a soab ning buud sẽn yit Ẽndã. Sã n yaa ne yẽgengã, a Mark wilgdame tɩ “kẽer sũy yikame,” la “bãmb yẽgma ne pʋg-kãnga.” (Mark 14:3-9) (Tõnd n ning italikã.) Woto, kɩbay a yiibã wilgdame tɩ sẽn yɩɩd tʋm-tʋmd a yembr n da kẽ yẽgengã pʋgẽ. La yaa wãn-wãn la rẽ sɩng-yã?

A Zã nif sẽn da maan kasetã togsa bũmb n welge. A wilga pagã yʋʋre, n yeel tɩ ya a Maari sẽn ya a Mart la a Lazaar ma-bi-poakã. A Zã togsa bõn-kãngã n welg me, d sẽn tõe n ges tɩ b lokda taaba, la b pa kɩɩsd taabã: “A Maari . . . walg[a] a Zezi nao wã n yẽes ne a zoobdo.” D sã n naag kɩbayã taaba, d tõe n yãame tɩ ra ya a Maari n ning tɩdar kaama a Zezi zug la a nao wã, t’a Zã sɩd wilgdẽ tɩ yaa “naar halaal[e].” A Zã ra pẽe a Zezi wʋsgo, la a ra pa nong tɩ b paoog a Zezi ye. D karemda woto: “A Zida Iskariot sẽn na n zãmb bãmba yeelame: ‘Yaa bõe t’a ka koos tidar kaam kãng denie kobs-tã n kõ naong rãmba?’ ”—Zã 12:2-8.

Yaa sɩd t’a Zida me ra ya a Zezi “karem-biig a ye,” la d nee a Zã sũ-pa-noangã, ned sẽn tar yasr kãngã buudã sẽn da magd n na n zãmb a Zezi wã. Seb-lɛbgd a Dr. Cornelius Howard Matheny wilgda woto Zã 12:4 wɛɛngẽ: “Gom-biig sẽn wilgd tʋʋmd sẽn na n maan masã sẽn yaa ‘be maaneg zugu’ [bɩ, “sẽn da be maaneg zugã”] la gomd sẽn wilgd tʋʋmd sẽn maand masã sẽn yaa ‘be zãmbg zugã’ [bɩ “ra bee zãmbg zugã”] b yiibã fãa wilgda tʋʋmd sẽn kẽngd taoore. Rẽ wilgdame t’a Zida sẽn zãmb a Zezi wã pa yɩ ne tʋʋmd sẽn maan zĩig pʋgẽ woto ne lingr ye, bala a tagsa a sẽn na n maana la a reng n geel tɩ ket rasem wʋsgo.” A Zã waa ne vẽenem n wilg t’a Zida yẽgengã “ka tɩ yẽ tagsda naong rãmba yell ye, yaa yẽ sẽn yaa wagdre la yẽ sẽn zãad ligda korgã, yẽ zuuda bãmb sẽn suiid a pʋgẽ wã.”

Woto, wõnda bũmb sẽn pa lingri, wagdr a Zida sẽn sɩng yẽgengã, bala a ra na n paamame n zu, kaama ligd sẽn yaa toogã sã n da koos tɩ b rɩk ligdã n ning ligdã koglgẽ a sẽn da zãadã pʋgẽ. A Zida sẽn yẽgem woto wã, tõe tɩ tʋm-tʋmdb a taab n sak n naag-a n yẽgem, n tẽed t’a bee bʋʋm. La ra ya a Zida la yẽgengã taoor soaba.