Rĩungã koe-moondb togsdame

“Yãmb mii Biiblã wʋsgo”

A ZEZI sẽn da tar yʋʋm 12 sẽn gom ne tũudmã nanambs sẽn be Zerizalɛmã ne raoodã, “a leokra yɛɛsa neb nins fãa sẽn wʋma.” (Luk 2:47) Woto me, rũndã-rũndã, a Zeova sõgen dãmb wʋsg sẽn yaa kom-bɩɩs tara raood n gomd ne b karen-saam dãmb la b karen-bi-taas Wẽnnaam la Biiblã wɛɛngẽ, la naoor wʋsgo, rẽ womda biis sẽn be yamleoog woto me.

A Tiffany tara yʋʋm 14, la a karen-doogẽ wã sõsg la b maan Biiblã yʋʋm semen dãmb 70 bãngr-gomd sẽn be Daniɛll 9:24-27 pʋgẽ wã zugu. Karen-saambã wilga yɛl a wãn verse rãmbã wɛɛngẽ, n gom a yell zugẽ-zugẽ la tao-tao.

Pipi wã, a Tiffany ra sãmbda a sã n na n zẽka nug bɩ a pa na n zẽke. La a yeelame tɩ “b sẽn pa wilg verse kãensã võor zãngã ra namsda maam. La m nee nee wa bãng tɩ m zẽka m nugã.” Linga karen-saambã hal wʋsgo, ned sẽn sɩd tar gomd n na n togs gom-kãngã zugã, bala ne karen-biis wʋsgo a võorã wʋmb ra yaa toogo.

A Tiffany paama sor n na n wilg bãngr-gomdã võor n yik yĩngr n tiig n gome. A sẽn gom n sa, karen-doogã fãa ra yaa sɩɩ. A Tiffany ra yɛɛsda bilfu. Rẽ, karen-doogã fãa wẽe nug-poak n kaoose.

“Waii, Tiffany, f goam yaa goama, f goam yaa goama,” woto la karen-saambã togs n yɩlem wʋsgo. A sak n deegame t’a ra miime tɩ verse kãensã võor pa tek woto ye, la a Tiffany n yɩ pipi ned ning sẽn wilg bãmb verse kãensã võor zãng woto wã. Karengã saabẽ, a sʋka a Tiffany a sẽn maan to-to n bãng Biiblã wʋsg woto.

T’a leoke: “Yaa m sẽn ya a Zeova Kaset soabã yĩnga. M roagdbã wilga maam bãngr-gom-kãngã võor naoor yak tɩ m yaool n tõog n wʋm a võorã.”

A Biiblã bãngr yɛɛsa a karen-bi-taasã me wʋsgo. Karen-biig a yembr yeela a Tiffany woto: “Masã, m mii bũmb ning sẽn kɩt tɩ yãmb a Zeova Kaset rãmbã kẽnd zak-zakã. Yãmb mii Biiblã wʋsgo.” A taab kãabame tɩ b ye kõn tiis-a a tẽebã yĩng abada ye.

A Tiffany sẽn yeel a roagdbã bũmb ning a sẽn vɩɩmdã, b sagl-a lame t’a kõ a karen-saambã Bãngr Sẽn Tar n Debd Vɩɩm Sẽn-Kõn-Saẽ Wã sebre. A sẽn maan woto n wilg babg ning sẽn gomd a Daniɛll bãngr-gomdã yellã, karen-saambã sak n deega sebrã tao-tao n pʋʋs-a bark rẽ yĩnga.

Sɩd-sɩda, kom-bɩɩs sẽn yaa kiris-neb sã n gomd b roagdbã sẽn zãms-b bũmb ning Wẽnnaam la Biiblã zugã ne raoodo, b wata ne pẽgr la waoogr n kõ a Zeova la bark n kõ b mense.—Matɩe 21:15, 16.