Tall-y gũub manesem!
Tall-y gũub manesem!
“Mam na n gũu Wẽnnaam, bãmb yaa mam fãagda. Mam Wẽnnaam na n kelga maam.”—MIISE 7:7.
1, 2. a) Wãn-wãn la Israɛll nebã sẽn ges yɛlã nen-wẽnsã maan bãmb wẽng rasempʋɩɩgẽ wã? b) Bõe n tõe n paam kiris-ned sẽn pa bɩɩsd manesem ning sẽn zemsã?
VƖƖMÃ pʋgẽ, d tõe n yãa yɛl wʋsg nen-sõma wã bɩ b nen-wẽnsã. Fãa bee ne tõnd manesmã. Israɛll nebã sẽn da wa n be rasempʋɩɩgẽ wã, b ra kõt-b-la mann ne yel-solemde. B ra segd n gesa tẽn-koɛɛngẽ sẽn gũbg bãmbã n tall mi-beoog wʋsg ne a Zeova, a sẽn kõ-b rɩɩbã. Woto b ra na n talla manesem sõngo. Sẽn yaa lebende, b tẽega rɩɩbã buud toor-toor wʋsg sẽn da be Eziptã, tɩ b yẽgem tɩ mannã pa noom ye. Ad sɩd yaa manesem wẽnga!—Sõdbo 11:4-6.
2 Woto me, rũndã-rũndã, kiris-ned manesem tõe n kɩtame tɩ yɛlã wõneg sõma bɩ wẽnga. Kiris-ned sã n pa tar manesem sẽn zemsã, a tõee nana-nana n menems a sũ-noogã, la woto ra na n yɩɩ yell wʋsgo, bala wala a Nehemi sẽn yeelã: “Sũ-noog ninga Zusoaba sẽn kõ yãmba na n yɩɩ [tõnd] pãnga.” (Nehemi 8:10) Manesem sẽn yaa sõma la sẽn pukd sũ-noog sõngdame n kɩtdẽ tɩ d kell n tall pãnga, la a paasda laafɩ la zems-n-taar tigingã pʋgẽ.—Rom dãmba 15:13; Filip rãmba 1:25.
3. Wãn-wãn la a Zeremi sẽn ges yɛla nen-sõma wã sõng-a toog wakate?
3 A Zeremi gesa yɛlã nen-sõma, baa ne a sẽn vɩɩmd wakat tood sasa wã. Baa ne a sẽn maan kaset ne Zerizalɛm lʋɩɩsã yel-beed yʋʋmd 607 S.D.T.W., a ra tõe n yãa yɛlã nen-sõma. A Zeova ra pa na n yĩm Israɛlle, la buudã ra na n põsame. A Zeremi gʋlsa Wiisg sebrã pʋgẽ woto: “Zusoaba nonglmã ka sɛt ye. Bãmb ninbãan-zoeer ka tar tɛk ye. Yibeoog fãa, bãmb le lebgda paalse. Yãmb sɩd yaa kãsenga.” (Wiisgu 3:22, 23) Hal pĩnd wẽndẽ wã n tãag masã, Wẽnnaam sõgen dãmb nins sẽn zĩnd yel-tood sẽn yaa kãsems n yɩɩdã pʋsẽ baoome n na n ket n get yɛlã nen-sõma, bɩ n tall sũ-noog meng a manesmã pʋgẽ.—2 Korẽnt dãmba 7:4; 1 Tesalonik rãmba 1:6; Zak 1:2.
4. Manesem bʋg la a Zezi tall-yã, la wãn-wãn la rẽ sõng-a?
4 Yʋʋm kob-gĩn a yoob a Zeremi poore, a Zezi paama sõngr n tõog toogo, a sẽn ges yɛlã nen-sõma wã yĩnga. D karemda woto: “Bãmb [a Zezi] saka kũum [ra-luka, NW ] n ka zoe yãnd ye, sũ-noog sẽn be bãmb taoora yĩnga, la b zaoo Wẽnnaam geer dɩtgo.” (Hebre dãmba 12:2) Baa ne kɩɩsg bɩ namsg buud fãa a Zezi sẽn da segd n segã, baa kũum namsg ra-lukã zugu, a kell n ninga ‘sũ-noog sẽn be a taoorã’ a yamẽ. Sũ-no-kãng ra yaa zu-noog ning a sẽn da tar n na n wilg t’a Zeova naam sẽn-ka-to wã zemsame, la a sõms a yʋʋrã, la a wa wa ne bark kãsems n kõ ãdem-bi-sakdbã beoog-daarã.
Tall-y gũub manesem
5. Yel-bʋg pʋgẽ la gũub manesem na n sõng tõnd tɩ d kell n tall tagsg ning sẽn zems yɛlã zutã?
5 Tõnd sã n bao n tall tagsg manesem buud ning a Zezi sẽn tallã, d pa na n menems sũ-noog ning sẽn yit a Zeova nengẽ wã ye, baa yɛlã sã n pa maan wakat fãa wa tõnd sẽn datã, bɩ b sã n pa maan wakat ning tõnd sẽn gẽegd-bã. No-rɛɛs a Miise yeelame: “La ne maam, mam na n gesa Zusoabã. Mam na n gũu Wẽnnaam, bãmb yaa mam fãagda.” (Miise 7:7; Wiisgu 3:21, NW ) Tõnd me tõe n talla gũub manesem. Wãn-wãna? Ne manesem wʋsgo. Bũmb sẽn be, d tõe n tagsame tɩ saam-biig sẽn tar zu-sobend tudgame, la tɩ b segd n maana bũmb n dems yellã tao-tao. Gũub manesem na n sõnga tõnd tɩ d tags woto: ‘A sɩd ra tudgame bɩ, bɩ yaa maam n tudgi? A sã n da tudgame, tõe t’a Zeova basame tɩ yɛlã wa, a sẽn tagsd tɩ nedã tõe n demsame la tɩ remsg ne toom pa na n yɩ tɩlae wã yĩng bɩ?’
6. Wãn-wãn la gũub manesem na n sõng ned sẽn maood ne a meng zu-loɛɛga?
6 Gũub manesem tõe n yaa tɩlae, d sã n tar zu-loɛɛg sẽn namsd tõndo, bɩ d sã n maood ne pãn-komslem. D rɩk makr ne d sẽn na n kos a Zeova sõngre, tɩ yellã ket n beẽ. Bõe la d na n maane? D segdame n ket n maand d sẽn tõe tɛk sẽn na yɩl n welg yellã la sẽn paas bɩ d tall tẽeb ne a Zezi gom-kãensã: “Bɩ y kose [ket n kotẽ, NW ] tɩ b na kõ-yã, bɩ y bao tɩ y na yã, bɩ y wẽ kʋɩlenga tɩ b na pak n kõ-yã.” (Luk 11:9) Ket-y n pʋʋsdẽ, la y gũ a Zeova. Wakat sẽn zems pʋgẽ, la ne yẽ sẽn dat t’a yɩ to-to wã, a Zeova na n deega y pʋʋsgã.—1 Tesalonik rãmba 5:17.
7. Wãn-wãn la gũub manesem na n sõng tõnd tɩ d tagsgã ne Biiblã võor b sẽn wilgd sõma n paasd bilf-bilfã zemse?
7 Biiblã bãngr-goam sã n pidsdẽ, tõnd wʋmda Gʋlsg Sõamyã võor sõma n paase. La wakat kẽere, d tõe n tagsame tɩ vẽnegr ning kaoosa waoongo. A sã n pa wat tao-tao wa tõnd sẽn datã, d na n sak n gũume bɩ? Tẽeg-y t’a Zeova yãame tɩ zemsame t’a puk “Kirist yel-solgdg sõngã” bilf-bilfu, sẽn yɩɩd yʋʋm 4 000 pʋgẽ. (Efɛɛz rãmba 3:3-6, NW ) Woto yĩnga, d tara bʋʋm n na n yɩ yãg-yãg soab bɩ? D sãmbda sã n yaa Wẽnnaam n yãk “kɩs-sɩd la gũusd yambã” t’a kõ a Zeova nin-buiidã “b rɩɩbã wakat sẽn zems pʋgẽ wã” bɩ? (Matɩe 24:45, NW ) Bõe yĩng tɩ d na n mong d mens sũ-noog ning sẽn yit Wẽnnaam nengẽ wã, d sẽn pa wʋm bũmba fãa võor zãngã yĩnga? Tẽeg-y tɩ ya a Zeova n dɩkd sard n na n wilg a ‘yɛl sẽn solgã,’ wakat ning la manesem ning sẽn zems ne-a wã.—Amos 3:7, NW.
8. Wãn-wãn la a Zeova maag-m-mengã tall nafr ne neb wʋsgo?
8 Kẽer tõe n komsa raoodo, bala b tagsdame tɩ yʋʋm wʋsg sõgeneg ne kɩs-sɩd poore, b tõeeme n pa vɩɩmd n yã “Zusoaba [a Zeova, NW ] ra-kãsenga sẽn tar dabeema” ye. (Zoɛll 3:3, 4) La b raood tõe n kengame, b sã n get yellã nen-sõngã. A Pɩɛɛr sagla woto: “Bɩ y bãng tɩ Zusoab sẽn maand sũ-mara [maag-m-menga, NW ] yaa yãmb fãagre yĩng[a].” (2 Pɩɛɛr 3:15) A Zeova maag-m-mengã kõo neb milyõ rãmb sẽn yaa tɩrs sor tɩ b bãng sɩdã. Woto pa bõn-kãseng sɩda? Sẽn paase, a Zeova sã n maagd a meng n paasdẽ, d tara sẽk n yɩɩd n na n “maan bũmb nins sẽn zems [tõnd] fãagra ne dabeem la rigbu.”—Filip rãmba 2:12; 2 Pɩɛɛr 3:11, 12.
9. Tõnd sã n pa tõe n maan yɛl wʋsg a Zeova sõgenegã pʋgẽ, wãn-wãn la gũub manesem tõe n sõng-d tɩ d tõog toog yellã pʋgẽ?
9 Gũub manesem tõe n sõnga tõnd tɩ d ra koms raoodo, kɩɩsg d tẽebã yĩnga, bãaga, kʋʋlem bɩ yɛl a taab sã n wa gɩdg tõnd Rĩungã tʋʋmdã. A Zeova gũudame tɩ tõnd sõgen-a ne d sũyã fãa. (Rom dãmba 12:1) Baasg zãnga, Wẽnnaam Biriblã sẽn zoet “far soaba ne ninbãan ned ninbãaneg[a]” pa baood tɩ tõnd maan tɩ yɩɩg d sẽn tõeyã ye. Yaa woto me ne a Zeova. (Yɩɩl Sõamyã 72:13) Woto, b raoonda tõnd tɩ d maan d sẽn tõe, n gũud ne maag-m-meng hal tɩ yɛlã wa toeeme, tõe n yaa toeeng yɛl siglg kãngã pʋgẽ bɩ sẽn wata wã pʋgẽ. Tẽeg-y woto: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.”—Hebre dãmba 6:10.
10. Wẽn-kɩɩsg manesem bʋg la ned sẽn tar gũub manesem tõe n gili? Wilg-y a võore.
10 Gũub manesem sõngda tõnd me tɩ d lak d mens ne tɩtaam. Kẽer sẽn lebg sɩdã kɩɩsdb ra pa rat n gũ ye. Tõe tɩ b tagsame tɩ yɛl la b ra segd n demse, Biiblã võor wʋmb pʋgẽ bɩ yɛlã siglg wɛɛngẽ. La b pa sak n deeg t’a Zeova vʋʋsem sõngã tusda kɩs-sɩd la gũusd yambã t’a maan remsg Yẽ wakatã a sẽn yãkã pʋgẽ, la pa tõnd sẽn tõe n wa tags tɩ yaa tɩlaeyã sasa ye. La remsg buud fãa segd n tɩ zemsa ne a Zeova raabã, pa tõnd mensã tagsa ye. Sɩdã kɩɩsdb basdame tɩ tɩtaam manesem golem b tagsgã n kɩt tɩ b lake. La b sã n da tallẽ tagsg manesem ning Kirist sẽn tarã, b ra na n tõog n kell n talla b sũ-noogã la b pa a Zeova nin-buiidã sʋka.—Filip rãmba 2:5-8, NW.
11. Wãn-wãn la d tõe n dɩ sẽk ning d sẽn dɩkd n gũudẽ wã nafre, tɩ ne rẽ bɩ d tũud ãnd dãmb makre?
11 Sɩda, tall gũub manesem pa rat n yeel tɩ d yɩ kʋɩɩm bɩ d zĩ n pa maand bũmb ye. D tara yɛl n na n maane. Wala makre, d segd n talla tʋʋm wʋsg meng Biibl zãmsgã pʋgẽ, tɩ ne woto bɩ d wilg tɩ d tara ratem ne tẽebã yɛl wala no-rɛɛsdb nins sẽn tall kɩs-sɩdã la malɛgsã meng sẽn da tallã. A Pɩɛɛr goma ratem kãng yell n yeele: “Wẽnnaam no-rɛɛsdba sẽn pĩnd n togs bark ninga sẽn bĩng yãmb yĩnga ra baoo ne b sũyã fãa n dat n bãng fãagr kãng võore . . . la malɛk rãmba me ra rat n bãnga bõn-kãens võyã.” (1 Pɩɛɛr 1:10-12) Pa meng zãmsgã bal n yaa tɩlae ye, la tigissẽ wã kẽng n pa vaal la pʋʋsgã me yaa tɩlae. (Zak 4:8) Neb nins sẽn wilgd tɩ b miime tɩ b tara tẽeb ratem n deegd tẽebã rɩɩb wakat fãa, la b lagemd ne b tẽed-n-taasã wilgdame tɩ b tara Kirist tagsg manesmã.—Matɩe 5:3, NW.
Tall-y tagsg sẽn sɩd zemse
12. a) Soog-m-meng bʋg la a Ãdem ne a Hawa bao-yã? b) Ãdem-biisã sẽn maan wa a Ãdem ne a Hawa wã baasa ne bõe?
12 Wẽnnaam sẽn da wa n naan pipi rao wã la a pagã, a kõo a meng sor n na n yãk noy sẽn tɩ loe ne sẽn yaa tɩrg la wẽngã. (Sɩngre 2:16, 17) A Ãdem ne a Hawa ra rata n sooga b mens n bas Wẽnnaam sor-wilgrã, la rẽ baas n waa ne dũni ning tõnd sẽn ne tɩ gũbg tõnd rũndã-rũndã wã. Tʋm-tʋmd a Poll yeelame: “Rao a yembr n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd neba fãa, fãa sẽn maand yel-wẽna yĩnga.” (Rom dãmba 5:12) Ninsaal sẽn vɩɩmd yʋʋm tus a yoob pʋgẽ sẽn sɩng ne a Ãdmã wilgame t’a Zeremi gom-kãensã yaa sɩda: “O Zeova, mam mii neer tɩ ninsaal sẽn yi tẽng tomẽ pa so a meng sor ye. Ninsaal sẽn kẽnd pa so a nao-yakemd sor wilgr meng ye.” (Zeremi 10:23, NW ) Sak n deeg t’a Zeremi goamã yaa sɩd pa rat n yeel tɩ d tẽedame tɩ yɛlã ka tɩɩm ye. Yaa tagsg sẽn sɩd zemse. A wilgda yʋʋm kob-gĩn wʋsgã “ninsaal . . . [sẽn] dɩ naam ninsaal zug a wẽng yĩngã” võore, bala ninsaalbã rɩɩ naam ne soog-m-meng n pa bao Wẽnnaam sor-wilgr ye.—Koɛɛg Soaba 8:9, NW.
13. Tagsg bʋg sẽn zems la a Zeova Kaset rãmbã tara, sã n yaa ne bũmb ning ninsaalbã sẽn tõe n maana wɛɛngẽ?
13 Ãdem-biisã sẽn be yɛl nins pʋsẽ wã yĩnga, a Zeova Kaset rãmbã miime tɩ yɛl nins b sẽn tõe n dems yɛl siglg kãngã pʋgẽ wã tara koaka. D sã n get yɛlã nen-sõma, tõe n sõnga tõnd tɩ d tall d sũ-noogã, la pa rẽ la yɛlã fãa tɩɩm ye. Yʋʋmd 1950 yʋʋm pi-gĩndã sɩngrẽ, Amerik tũudum taoor soab n yiis sebr b sẽn koos wʋsgo, n bool-a tɩ Tags-sõng pãnga (Le pouvoir de la pensée positive). Sebrã ra sagendame tɩ b ra tõe n tõoga bõn-gɩdgds wʋsg sẽn yɩɩde, b sã n ges yɛlã nen-sõma. Tagsg sẽn yaa sõma sɩd zemsa pẽgre. La nebã sẽn vɩɩmd n yã wã wilgdame tɩ bãngrã, tʋʋm minimã, laogã la yɛl a taabã boogda yɛl nins tõnd yembr-yembrã sẽn tõe n maana. La sã n yaa ne dũniyã gill zug yɛlã, ad yɛlã yaa wʋsg n loog hal n kɩt tɩ ninsaalbã pa tõe n yidg-ba, baa b sẽn sõs n get yɛlã nen-sõma to-to fãa!
14. A Zeova Kaset rãmbã geta yɛlã nen-wẽns bɩ? Wilg-y-yã.
14 B sẽn get yɛl a woto ne tagsg sẽn sɩd zemsã yĩnga, wakat ninga neba yetame t’a Zeova Kaset rãmbã geta yɛlã nen-wẽnse. Sẽn yaa lebende, b rata ne b sũy fãa n togs nebã tɩ b bãng Ned ning bal sẽn tõe n maneg ãdem-biisã vɩɩm wakat fãa yĩngã. Sã n yaa ne rẽ wɛɛngẽ me, b rɩkda togs-n-taar ne Kirist tagsgã manesem. (Rom dãmba 15:2) La b rɩkda sẽk wʋsg n sõngd nebã tɩ b tall zood ne Wẽnnaam. B miime tɩ kaoosg zugẽ, rẽ na n maana neer sẽn yaa sõma n yɩɩdã.—Matɩe 28:19, 20; 1 Tɩmote 4:16.
15. Wãn-wãn la a Zeova Kaset rãmbã tʋʋmd manegd nebã vɩɩm?
15 A Zeova Kaset rãmbã pa zɩ zu-loees nins sẽn namsd ãdem-biisã ye, sẽn yɩɩd fãa minung nins sẽn yaa lebend ne Gʋlsg Sõamyã sẽn sãamd neda, tɩ b ne rẽ zĩig fãa wã. Nand tɩ ned sẽn nong sɩdã lebg a Zeova Kaset soaba, a maanda toeengo. Naoor wʋsgo, a segd n basa minim wẽns sẽn pa tat Wẽnnaam yam. (1 Korẽnt dãmba 6:9-11) Woto, a Zeova Kaset rãmbã sõnga sẽn sakd-b sɩdã tɩ b tõog n bas rã-tɩgre, dorge, yoob la reem n bao ligdi. Neb a woto sẽn paam demsgã zãmsa b zags neb yell gesgo, b zɩɩbã tʋkr ne pʋ-peelem n pa reem ye. (1 Tɩmote 5:8) B sã n sõng nebã la zagsã woto, zu-loees nins sẽn be babgã neb sʋkã boogdame. Woto kɩtdame tɩ dorgã yembdo, pãng maaneg zagsã pʋsẽ la yɛl a taabã booge. Bãmb mensã sẽn yaa tẽng-n-biis sẽn tũud laloa wã, la b sẽn sõngd neb a taabã tɩ b toeem b vɩɩmã tɩ yɩ sõma n paasã yĩnga, a Zeova Kaset rãmbã boogda zɩɩb ning sẽn zao goosneema zugã, sẽn maood n na n yiis zĩnd-n-taarã zu-loeesã.
16. Bõe yĩng t’a Zeova Kaset rãmbã pa kẽesd b mens dũniyã sul sẽn maood n baood toeengã pʋsẽ?
16 Woto, a Zeova Kaset rãmbã toeema nebã vɩɩm manesem dũniyã zug bɩ? Be neere, yʋʋm pi-gĩnd sẽn loogã, Kaset rãmb sẽn da moond koɛɛgã sõor sẽn da pa ta 3 800 000 paasame n ta 6 000 000 la bala. Rẽ yaa fɩɩgr sẽn zems neb 2 200 000, tɩ bãmb wʋsg bas minim wẽnse, b sẽn wa n lebg kiris-nebã. Neb wʋsg vɩɩm n maneg n paase! La sõor kãngã paooda wʋsgo, b sã n mak-a ne nebã fɩɩgr dũniyã pʋgẽ wakat kãng sasa wã rẽnda, sẽn yɩ 875 000 000! A Zeova Kaset rãmbã yãame tɩ neb nins sẽn sakdã sõngr kõta sũ-noogo, baa ne b sẽn mi tɩ ãdem-biisã sʋka yaa neb a wãn bal n na n tũ vɩɩmã sorã. (Matɩe 7:13, 14) Baa ne Kaset rãmbã sẽn gũud toeeng nins sẽn yaa sõma n yɩɩd Wẽnnaam a ye bal sẽn tõe n wa ne dũniyã gill zugã, b pa kẽesd b mens dũniyã sul sẽn maood n baood toeengã pʋsẽ ye. Naoor wʋsgo, sul-kãens sɩngda ne yam-sõngo, la a baasda ne sũ-sãams la nen-kɛglem menga.—2 Pɩɛɛr 3:13.
17. Bõe la a Zezi maan n sõng neb nins sẽn gũbg-a wã, la bõe la a pa maane?
17 A Zeova Kaset rãmbã sẽn tar manesem kãngã wã tara bas-yard ne a Zeova wala a Zezi sẽn tall bas-yard ning a sẽn da wa n be tẽng zugã. Yʋʋm kob-yendẽ wã, a Zezi sãooga bãas ne yel-soalma. (Luk 6:17-19) A vʋʋga kũum menga. (Luk 7:11-15; 8:49-56) La a pa yiis bãasã sẽn yaa zu-loɛɛgã la a tõog kũumã sẽn yaa bɛ wã ye. A ra miime tɩ ra pa wakat ning Wẽnnaam sẽn yãk rẽ yĩngã ye. A sẽn da yaa ninsaal sẽn zems zãng sẽn tar tõod kãsemsã, a Zezi ra tõeeme me n maan yɛl wʋsg n welg zu-loees wʋsg naamã wɛɛngẽ la nin-buiidã vɩɩm zu-loe-bɛda. Wõnda a wakatẽ nebã sãnda ra ratame t’a reeg naamã n tʋm woto, la a Zezi pa sak ye. D karemdame: “Neb kãens sẽn yã a Zezi sẽn maan bõn-bãna b yeelame: ‘Sɩda, bãmb yaa Wẽnnaam no-rɛɛs ninga sẽn tog n wa dũniyã zugã.’ La a Zezi sẽn mik tɩ bãmb na n wa modga bãmb tɩ b yɩ rĩma bãmb leb n kẽnga tãng zug b yembr bala.”—Zã 6:14, 15.
18. a) Wãn-wãn la a Zezi tall gũub manesem wakat fãa? b) Wãn-wãn la a Zezi tʋʋmdã toeem yʋʋmd 1914 tɛka?
18 A Zezi zãgsame n pa kẽes a meng politikã yɛlẽ bɩ n maan tʋʋm bal sẽn nafd nin-buiidã ye, bala a ra miime tɩ wakat ning a sẽn na n dɩ naam n yɩ rĩm la a sãoog bãas ne yel-soalmã ned kam fãa yĩng la zĩig fãa wã ra nan pa ta ye. Ba a sẽn wa n dʋ saasẽ n lebg bõn-naandg nif sẽn pa ne la sẽn pa kiidã poore, a ra ratame n gũ wakat ning a Zeova sẽn yãkã n yaool n maan bũmb rẽ wɛɛngẽ. (Yɩɩl Sõamyã 110:1, NW; Tʋʋma 2:34, 35, NW ) La, a zĩnigrã wala Wẽnnaam Rĩungã Rĩm yʋʋmd 1914 tɛka, a kẽngdame n na n “tõoge la a baas a tõogrã.” (Wilgri 6:2, NW; 12:10) Ad d tar mi-beoog wʋsg n na n sak a naamã, tɩ wakat kãng pʋgẽ bɩ neb nins sẽn yet tɩ b yaa kiris-nebã yãk n na n tall zɩɩlem ne Biiblã zãmsg sẽn tɩ loe ne Rĩungã!
Gũub wata ne sũ-sãoong bɩ sũ-noogo?
19. Wakat bʋg la gũub ‘kɩtd tɩ sũur bẽ,’ la wakat bʋg la a kõt sũ-noogo?
19 A Salomo ra miime tɩ gũub tõe n sãama sũuri. A gʋlsame: “Fo sã n ka paam f sẽn data tao-tao, fo sũur sãamdame [bẽedame, NW ].” (Yelbũna 13:12) Sɩd-sɩda, ned sã n gẽegd bũmb sẽn pa tõe n pidsi, a sũurã tõe n bẽe sũ-sãoongã yĩnga. La f sã n gũud sũ-noog yɛla, tõe tɩ yaa kãadem, biig rogem, bɩ tiging ne neb d sẽn nonge, tõe n kɩtame tɩ d pid ne sũ-noog wʋsgo, hal sẽn kaoos t’a daarã pa ta ye. Sũ-noog kãng paasdame, d sã n tũnug ne gũubã wakat ne yam, n maand segls yel-noogã sẽn watã yĩnga.
20. a) Yel-kãsems bʋs la d gẽegd n na n yã ne kɩs-sɩda? b) Wãn-wãn la d tõe n paam sũ-noog la d gũudẽ t’a Zeova pids a raabã?
20 D sã n tar bas-yard zãng-zãng tɩ d sẽn gẽegd bũmb ninsã na n pidsame, baa d sã n pa mi wakat ning b sẽn na n pidsã, gũubã sasa pa segd n kɩt tɩ d ‘sũurã bẽ’ ye. Wẽnnaam balemdbã sẽn tar kɩs-sɩdã miime tɩ Kirist Yʋʋm Tusr Naamã rɩɩb kolga wʋsgo. B kɩsa sɩd tɩ b na n yãa kũumã la bãasã saabo. Ne gẽegr sẽn tar pãng la sũ-noogo, b gũuda wakat ning b sẽn na n deeg neb milyaar dãmba sẽn na n vʋʋg kũ-rãmbã sʋkã, tɩ bãmb nin-nongdsã be b sʋkã. (Wilgri 20:1-3, 6; 21:3, 4) Wakat kãngã bõn-vɩɩlɩ wã zĩig sẽn be yell pʋgẽ wã sasa, b maanda sũ-noogo, b sẽn tar saagr sẽn yaa sɩd-sɩd n na n yã Arzãnã luglg tẽng zugã. (Ezai 35:1, 2, 7) Rẽnd ad sɩd yaa yam bũmb tɩ d rɩk gũubã wakat n tʋm ne yam, n ‘maand Zusoaba tʋʋmd wʋsgo wakat fãa’! (1 Korẽnt dãmba 15:58) Ket-y n dɩt tẽebã rɩɩbo. Bao-y zood n paas ne a Zeova. Bao-y neb nins sũy sẽn tusd-b tɩ b sõgen a Zeova wã. Keng-y y tẽed-n-taasã raoodo. Rɩ-y sẽk buud fãa a Zeova sẽn bas tɩ beẽ wã nafa wa y sẽn tõe tɛka. Rẽ, a Zeova gũub kõn kɩt tɩ yãmb ‘sũurã bẽ’ abada ye. Sẽn yaa lebende, a na n pida yãmb ne sũ-noogo!
Y tõe n wilga a võor bɩ?
• Wãn-wãn la a Zezi tall gũub manesem?
• Yel-bʋs pʋsẽ la kiris-nebã segd n tall gũub manesem?
• Bõe yĩng t’a Zeova Kaset rãmbã sũy noomẽ tɩ b gũ a Zeova?
• Wãn-wãn la b tõe n kɩt t’a Zeova gũub kõ sũ-noogo?
[Zãmsgã sogsgã]
[Foto rãmba, seb-neng 23]
A Zezi tõoga toogo, sũ-noog ning sẽn be a taoorã yĩnga
[Foto, seb-neng 24]
Yʋʋm wʋsg sõgeneg poor me d tõe n ket n tara sũ-noogo
[Foto, seb-neng 26]
Neb milyõ rãmb manega b vɩɩmã n paase, b sẽn lebg a Zeova Kaset rãmbã