Siglgã zug Sull sẽn yaa toor ne Sosiete wã to-to
Siglgã zug Sull sẽn yaa toor ne Sosiete wã to-to
WATCH Tower Bible and Tract Society of Pennsylvania yʋʋmd-yʋʋmd tigissã maanda hal yʋʋmd 1885, yʋʋm vẽkr kiuugã tɛka. Kiris-neb nins sẽn zaeyã tigisg sẽn da maand yʋʋm kob-gĩnd 19 soabã saabẽ wã, Sosiete kãng taoor dãmb ra tara saasẽ vɩɩmã saagre. Sɩda, yɩɩ woto wakat fãa la bala.
La wakat n zĩnd tɩ yɩ toore. Yʋʋmd 1940, a Hayden Covington, sẽn da yaa Sosiete wã sagend laloa wã wɛɛngẽ wã, la “piis a taab[ã]” nedã sẽn da tar tẽng zug vɩɩm saagrã, la b ra yãk wala Sosiete wã taoor soaba. (Zã 10:16) A sõgna wala Sosiete wã perzidã pʋgdg sẽn sɩng ne yʋʋmd 1942 n tɩ ta yʋʋmd 1945. Rẽ wẽnde, saam-biig a Covington yãka a toorẽ yam n zãgs t’a kõn yɩ taoor soaba, sẽn na yɩl n tũ sẽn wõnd ra ya a Zeova raab wakat kãngã, sẽn yaa tɩ Pensilvani Sosiete wã taoor dãmb fãa segd n yɩɩ kiris-neb sẽn zaeyã. A Lyman Swingle ledga a Hayden Covington taoor dãmbã sullẽ, tɩ b vot a Frederick Franz t’a yɩ perzidã pʋgdga.
Bõe yĩng t’a Zeova sõgen dãmbã ra tẽed tɩ Watch Tower Bible and Tract Society of Pennsylvania taoor dãmbã fãa ra segd n yɩɩ kiris-neb sẽn zae? Yaa tɩ rẽ wẽnde, b ra getame tɩ Pennsylvania Sosiete wã taoor dãmbã sull yaa bũmb a yembre ne a Zeova Kaset rãmbã Siglgã zug Sull neb gilli. Bala wakat fãa yaa rap sẽn zae ne vʋʋsem sõngã.
Yʋʋmd-yʋʋmd tigisg b sẽn pa yĩmdi
Yʋʋmd-yʋʋmd tigisg ning b sẽn maan yʋʋmd 1944, zĩ-likr kiuug rasem a 2 wã sasa, Pitsburgã, Pensilvani Sosiete wã maana no-sɩɩr a yoob sẽn demsd a noy gãnegr sebrã. Noy gãnegr sebrã ra wilgdame tɩ ra yaa sẽn kõt-b ligd Sosiete wã tʋʋmd yĩngã n da tõe n vote. La remsg a tãab-n-soabã yiisa segl-kãngã. Kɩbar b sẽn togs yʋʋmd-yʋʋmd tigis-kãng zugã yetame: “B na n teka Sosiete wã neb tɩ ra yɩɩg 500 ye . . . Ned ning fãa b sẽn yãk segd n yɩɩ ned sẽn sõgend wakat fãa Sosiete wã pʋgẽ bɩ wakat pʋɩ-sʋk a Zeova Kaset rãmbã [tiging] pʋgẽ, la a segd n talla yam buud ning Soaalã sẽn tarã.”
Rẽ poore yaa neb sẽn sakd a Zeova zãng fasɩ n da votd n yãk Sosiete wã taoor dãmba. Rẽ pa be ne ligd ning b sẽn kõt Rĩungã tʋʋmd yĩngã waooglem ye. Woto zemsa ne yɛlã manegr sẽn kẽngd taoor bilf-bilfã b sẽn deng n togs Ezai 60:17 pʋgẽ wã. D karemda be woto: “Mam na n waa ne sãnem t’a reeg zũud zĩiga la m wa ne wanzũri n kɩt t’a reeg kut zĩiga tɩ zũud reeg raad zĩiga tɩ kut me reeg kug zĩiga. Mam na n kɩtame tɩ laafɩ soog foom tɩ tɩrlem lebg fo tʋʋm soaadba.” A sẽn gomd “yel-gɛtb” (NW ) la “tʋʋm soaadba” yellã, bãngr-gom-kãngã gomda manegr siglgã na-kẽndɩ wɛɛngẽ a Zeova nin-buiidã sʋka.
Yel-kãseng kãng sẽn yaa kɩt tɩ siglgã tũ teokarasi wã sorã waa ‘zaabr ne yibeoog tus a yi la kobs-tã’ yell b sẽn gom Daniɛll 8:14 pʋgẽ wã saabẽ. Wakat kãngã, b talla “zĩ-sõngã” n wa a zĩig sẽn zemsẽ wã.
La tigisg b sẽn pa yĩmd sẽn zĩnd yʋʋmd 1944 poore, sʋk-kãseng n da ket n be. Sẽn mik tɩ rẽ wẽnde Siglgã zug Sull da tɩ loee wʋsg ne Pensilvani Sosiete wã taoor dãmb sull sẽn tar neb a yopoe wã, rẽ rat n yeelame tɩ Siglgã zug Sull da pa tol n tõe n tall tɩ yɩɩg kiris-neb a yopoe sẽn zae bɩ? Sẽn paase, sẽn mik tɩ yaa sosiete wã neb n votd taoor dãmbã, rẽ rat n yeelame tɩ sosiete wã neb da votda Siglgã zug Sull neb yʋʋmd-yʋʋmd tigisgẽ wã bɩ? Watch Tower Bible and Tract Society of Pennsylvania taoor dãmbã yaa yembr ne Siglgã zug Sull neb bɩ, bɩ b yaa toor-toore?
Yʋʋmd-yʋʋmd tigisg a to b sẽn pa yĩmdi
B leoka sʋgs-kãensã yʋʋmd-yʋʋmd tigisg ning sẽn zĩnd yʋʋmd 1971, zĩ-likr kiuug pipi daarã. Tigis-kãng wakatã, sõsd a yembr n wilg tɩ siglgã zug sull sẽn yit “kɩs-sɩd la gũusd yambã” pʋgẽ wã renga Watch Tower Bible and Tract Society of Pennsylvania n beẽ sẽn na maan yʋʋm kobse. (Matɩe 24:45-47, NW ) Siglg zug sull la b maan yʋʋmd 33 T.W. Pãntekotã, sẽn yɩɩd yʋʋm kob-gĩn 18 tɩ Pensilvani sosiete wã nan pa beẽ ye. Sɩngrẽ wã, siglgã zug sull da pa tar doap a 7 ye, la yaa tʋm-tʋmdb 12. Vẽenega, a nebã sõor da paasa kaoosg poore, bala “Zerizalɛm tʋm-tʋmdba ne kãsem dãmba” n da lʋɩt taoore. (Tõnd n ning italikã.)—Tʋʋma 15:2.
Yʋʋmd 1971, sõsdã leb n wilgame tɩ Sosiete Wats Tawa nebã ra pa tõe n vot Siglgã zug Sull neb sẽn zaeyã ye. Bõe yĩnga? A yeelame tɩ “bala, siglgã zug sull sẽn yit ‘yambã’ sull pʋgẽ wã pa ninsaal ba a ye n yãkd-a ye. Ya a Zezi Kirist . . . sẽn yaa kiris-neb tiging hakɩkã Zu-raoogã, la ‘kɩs-sɩd la gũusd yambã’ sull Soaal la a Zusoabã n yãkd-a.” Rẽnd vẽenega, asosiasiõ ba a yembr neb pa tõe n vot n yãk Siglgã zug Sull neb ye.
Sõsdã kẽnga taoor n togs gom-kãngã võor sẽn tagma: “Siglgã zug sull pa tar taoor dãmb wala perzidã, perzidã pʋgdga, sekertɛɛr sẽn yaa ligd yel-gɛt la a sõangd ye. A tara b tigsg taoor-lʋɩt bala.” Yʋʋm wʋsg pʋgẽ, Pensilvani sosiete wã perzidã me n da yaa Siglgã zug Sull taoor soaba. Rẽ tɛka pa na n leb n yɩ woto ye. Baa ne b minimã la b tõodã sẽn pa zem taabã, Siglgã zug Sull neb zɩɩb na n zenga taaba. Sõsdã paasa woto: “Siglgã zug sull ned fãa tõe n yɩɩ taoor lʋɩt b tigisg sasa, n pa yɩ . . . Sosiete wã perzidã ye . . . Fãa bee ne taoor lʋɩɩrã sẽn gilgd n tat ned fãa to-to siglgã zug sull pʋgẽ wã.”
Yʋʋmd 1971 tigisgã sasa, welgr vẽeneg la b maan Siglgã zug Sull neb sẽn zae ne vʋʋsem sõngã, la Pensilvani sosiete wã sull neb sʋka. La Siglgã zug Sull neb ra ket n yaa Sosiete wã taoor dãmba. La rũndã-rũndã d tõe n maana sʋk-kãngã: Bʋʋm sẽn tik Gʋlsg Sõamyã zut beeme sẽn wilgd tɩ yaa Watch Tower Bible and Tract Society of Pennsylvania taoor dãmbã n segd n yɩ Siglgã zug Sull neb bɩ?
Leokrã yaa ayo. Pa Pensilvani sosiete wã bal la a Zeova Kaset rãmbã tũnugd ne ye. A taab n be. A yembr yaa Watchtower Bible and Tract Society of New York Incorporated. A kɩtdame tɩ d tʋʋmdã yaa nana Etazĩni. A Zeova barkã yɩɩ vẽeneg sosiete kãng zugu, baa ne a taoor dãmbã wʋsg sẽn yɩɩd sẽn yaa “piis a taab[ã]” nebã. B tũnugda ne International Bible Students Association Gãrãnd Bertayn. Asosiasiõ rãmb a taab la b tũnugd ne sẽn na yɩl tɩ Rĩungã nafa kẽng taoor tẽns a taab pʋsẽ. Bãmb fãa tʋmda ne taab zems-n-taar pʋgẽ, la b sõngdame tɩ koe-noogã moond dũniyã gill zugu. B sẽn beẽ zĩig ning fãa, la b taoor dãmbã sẽn yaa neb nins fãa, yaa Siglgã zug Sull n wilgd asosiasiõ kãensã sor la a tũnugd ne-b tɩ zems ne Wẽnnaam sor-wilgrã. Woto, b bobla sosiete kãens tʋʋmd sẽn yaa sõng tɩ Rĩungã nafa paase.
D sã n tar asosiasiõ nafda tõndo. Woto kɩtame tɩ d tũud tẽng ning d sẽn beẽ wã laloa, wala Wẽnnaam Gomdã sẽn baood tɩ d maana. (Zeremi 32:11, Sebr Sõngo; Rom dãmba 13:1) Asosiasiõ rãmbã kɩtdame tɩ Rĩungã koɛɛg yelgr tʋʋmd lebg nana. La b kɩtdẽ tɩ Biibl dãmba, sɛba, periodik rãmba, seb-biy la bõn-yood a taabã yiisgã yaa nana. B tũnugda ne asosiasiõ kãens sẽn na yɩl me n welg yɛl sẽn tɩ loe ne zĩis paoongo, ne sõngr sabaab wakate, kõntra rãmb sẽn na yɩl n paam zĩis n maan tigis-kãsemse, la yɛl a taaba. D tara mi-beoog ne tʋʋm a woto asosiasiõ kãensã sẽn maandã.
A Zeova yʋʋrã n lʋɩt taoore
Yʋʋmd 1944, b remsa Watch Tower Bible and Tract Society of Pennsylvania noy b sẽn gʋlsã t’a bõn-datɩ wã yɩ vẽenese. Sosiete wã bõn-datɩ wã a ye sẽn yaa kãseng yaa: “Sẽn na yɩl n moon Wẽnnaam rĩungã evãnzill Kirist Zezi sor-wilgr pʋgẽ tẽn-tẽnsã fãa pʋsẽ, n kõ kaset Wẽnnaam a ZEOVA sẽn yaa pãng sẽn-tõe-fãa soabã yʋʋrã, a Gomdã la a yɩɩdmã wɛɛngẽ.”
Yʋʋmd 1926 tɛkã, ‘kɩs-sɩd yambã’ lʋɩɩsa a Zeova yʋʋrã taoore. Sẽn yɩɩd fãa, yʋʋmd 1931 wã yɩɩ kãsenga. Yɩɩ wakat kãng la Biiblã Zãmsdb rɩk yʋʋr ning sẽn ya a Zeova Kaset rãmbã. (Ezai 43:10-12, NW ) Sosiete wã sɛb sẽn gom n tadg Wẽnnaam yʋʋrã zugã kẽer la woto: Jéhovah (1934), “ Que ton nom soit sanctifié (1961), la “ Les nations sauront que je suis Jéhovah ” — Comment ? (1971).
Zemsame tɩ d gom Les Saintes Écritures — Traduction du monde nouveau, b sẽn yiis a tõrã ne ãngilind yʋʋmd 1960 yelle. A tara a Zeova yʋʋrã zĩig ning fãa Tetragrammã sẽn pukdẽ Hebre Gʋlsgã pʋgẽ wã. Vaeesg neer kɩtame tɩ b ning Wẽnnaam yʋʋrã zĩis 237 pʋsẽ kiris-neb Gerɛk Gʋlsgã pʋgẽ a sẽn da segd n zĩndẽ wã. Ad d sɩd tara mi-beoog ne a Zeova, a sẽn kõ sor tɩ “yambã” la a Siglgã zug Sull tũnug ne asosiasiõ rãmb n kɩt tɩ b bãng a yʋʋrã dũniyã gill zugã!
Wẽnnaam Gomdã pʋɩɩb yãngame
Wakat fãa, a Zeova nin-buiidã kõo kaset a yʋʋrã zugu. B kɩtame tɩ b bãng a Gomdã sõma, b sẽn yiis sɛb milyõ rãmb sẽn tik Biiblã zugu, n paas Biiblã meng n pʋɩyã. Yʋʋm kob-gĩnd 20 soabã pipi babgẽ, The Emphatic Diaglott lebga Sosiete Wats Tawa rẽnd laloa wã taoore. Biibl kãng ya a Benjamin Wilson kiris-neb Gerɛk Gʋlsgã lebgr ne ãngilindi. Yaa lebgr b sẽn maan gom-biig fãa a to tẽngre. Sosiete wã yiisa King James Version sẽn tar seb-nens 500 gom-paasdmã, Biibl Zãmsdbã yiisgã. Yʋʋmd 1942, a yiisa King James Version wã ne seb-neng kɩreng referãns rãmba. Rẽ poore, yʋʋmd 1944, Sosiete wã sɩngame n yiisd American Standard Version, yʋʋmd 1901 wã rẽnda, sẽn tar Wẽnnaam yʋʋrã. A Zeova yʋʋrã me ra bee The Bible in Living English a Stephen T. Byington sẽn lebgã pʋgẽ, tɩ Sosiete wã yiis-a yʋʋmd 1972.
Asosiasiõ rãmb nins a Zeova Kaset rãmbã sẽn tũnugd ne wã sõnga ne Biiblã kãens fãa yiisg la b pʋɩɩbo. La sẽn yɩɩd fãa yaa lagem-n-tʋm sõma ning sẽn be Sosiete Wats Tawa la a Zeova Kaset rãmb sull ning sẽn zaeyã sʋkã, tɩ Biibl lebgr sull sẽn lebg Traduction du monde nouveau wã neb be sʋkã. D sũy yaa noogo, bala lebgr kãng tõrã bɩ a babg bee ne buud-goam 38 pʋgẽ hal rẽ tɛk n tõk masã, t’a sõorã yɩɩd 106 400 000. The Watch Tower Bible and Tract Society of Pennsylvania sɩd yaa Biibl yiisg sosiete!
B ‘yãka’ ‘kɩs-sɩd yambã’ n ning ‘a zusoabã paoong fãa zugu.’ Rotã sẽn be dũni gill tʋʋmdã yẽgrẽ Niu York Etazĩni wã, n paas filiall dãmb 110 sẽn be dũniyã gill zugã bee zusoabã paoong sʋka. Yambã sull neb miime tɩ b na n kolg n togsa Wẽnnaam taoore, ne b sẽn tʋm ne bũmb nins b sẽn bobl-bã to-to wã. (Matɩe 25:14-30) La rẽ pa gɩdgd ‘yambã’ t’a yãk yel-gɛtb sẽn tar tõog ‘piis a taabã’ sʋk n bobl-b zɩɩb laloa wã taoore, la yɛl-gesg zɩɩb ye. Sɩda, rẽ kõta Siglgã zug Sull neb sẽk n paas “pʋʋsga ne Wẽnnaam koɛɛga togsg” yĩnga.—Tʋʋma 6:4.
Dũni kãngã yɛlã sã n kõt sor fãa, Siglgã zug Sulli, sẽn tʋmd “kɩs-sɩd la gũusd yambã” yʋʋr yĩngã, na n ket n tũnugda ne asosiasiõ rãmba. Bõn-kãensã zemsame, la b pa tɩlae ye. Baa goosneema sã n yiis noor n tɩ asosiasiõ ra zĩndi, moonegã tʋʋmd na n ket n kẽngda taoore. Baa masã, tẽns nins pʋsẽ gɩdgr sẽn be, tɩ b pa tũnugd ne asosiasiõ wã, Rĩungã koɛɛg moondame, b maanda karen-biisi, teokarasi wã fɩɩgr kẽngda taoore. Woto maandame, bala a Zeova Kaset rãmbã sendame la b zãgsd koom, tɩ ‘Wẽnnaam kɩtdẽ tɩ ket n bɩtẽ.’—1 Korẽnt dãmba 3:6, 7.
D gẽegda sẽn wat beoogo, la d kɩsa sɩd t’a Zeova na n gesa a nin-buiidã yelle, tẽeba la b laog ratem wɛɛngẽ. Yẽ ne a Biribl a Zezi Kirist na n ket n kõta sor-wilgr la teelg sẽn na yɩl tɩ Rĩungã mooneg tʋʋmd baasã. Sɩda, bũmb ning fãa tõnd sẽn maand Wẽnnaam sõgenegã wɛɛngẽ wã ‘pa ne sodaas bɩ ne pãng ye, la yaa ne a Zeova vʋʋsem sõngã.’ (Zakari 4:6, NW ) Woto yĩnga, d pʋʋsdame n kot Wẽnnaam a Zeova sõngre, n miẽ tɩ ne pãng ning a sẽn kõtã, d na n tõog n baasa tʋʋmd ning a sẽn kõ-d tɩ d maan saabã wakat kãngã wã!