Neb sẽn lagem taab dũniyã gill zug n get taab yelle

F SÃ N ges f nif yaadem tɛka, yaa neb woo neb la f neyã. Wʋsg kʋʋlame, sãnda komsame tɩ kẽna lebg toogo. Pagb kẽer n tʋte, tɩ kãad paals zãad kamba. B fãa yaa neb sẽn zoe n tɩ noke. Yaa rapa, pagb ne kamba, tẽngã pʋgẽ zabre, sabaab rãmb la yɛl a taab sẽn modg tɩ b yi b yiy n zoe n tɩ nok tẽn-yakẽ. Yɩɩ tɩlae ne neb kẽer tɩ b zoe n bas b yiyã naoor wʋsgo. Bũmb sã n wilgdẽ tɩ tẽng pʋgẽ zabr bɩ sabaab n wate, b tigimda teed bilf zakã pʋgẽ, n peeg b kamb n zoe n kẽng bãan sẽn be n yɩɩdẽ. Yɛlã sã n maage, neb wʋsg lebgd n waa b ba-yirã n ye zĩndi.

Yʋʋmã sẽn tong taabã pʋsẽ, Repiblik Sãntrafrikɛn sakame n deeg neb sẽn yi tẽns sãnda pʋsẽ n wa. Sẽn pa kaoos pʋgẽ, yɩɩ tɩlae ne neb tusa, a Zeova Kaset rãmb sẽn naage, tɩ b zoe zabrã sẽn yik Repibilik Demokaratik di Kõngo n kẽng Repibilik Sãntrafrikɛn sẽn yaa bãan zĩigã.

Saam-biisã wata ne sõngre

Repibilik Sãntrafrikɛn Kaset rãmbã gesame tɩ yaa zu-noog ne-b tɩ b sigl sõngr neb a taabã yĩnga. B maana segls toor-toor n deeg saam-biisã sẽn yaa kiris-nebã sẽn da watã. Sɩngrẽ wã, b yãa zĩis saam-biisã yiyẽ, la sãambã sõor sẽn paasã yĩnga, yɩɩ vẽeneg tɩ b ra segd n maana segl-kãsems a taab n paase. B kɩtame tɩ Rĩung Rot kẽer lebg gãag zĩisi. Kaset rãmb nins sẽn be zĩ-kãensã sakame n lugl kuurã bugum, robine koom, la b maneg roogã pʋg n kirbsaas tɩ yɩ sõma ne neb nins b sẽn da na n ning be wã. Sãambã tʋma ne saam-biisã sẽn be zĩ-kãensã, sẽn na yɩl n maan zĩ-gãads kãensã. B sigla kiris-neb tigimsã fãa Lingala buud-gomdã pʋgẽ. Rẽ yaa sẽn na yɩl tɩ watbã paam tẽeb rɩɩb sẽn kõt vɩɩm. Zĩ-kãens Kaset rãmbã ne sãambã sẽn lagem n tʋm sõma wã wilgame tɩ saam-biirã sɩd bee tẽn-tẽnsã fãa pʋsẽ.

Yel-kãngã pʋgẽ, pa wakat fãa la zagsã neb fãa naag taab n wa ye. Wakat-wakate, zak neb sẽn da welg taab lebg n tigma taab b taabã zĩigẽ. B ra gʋlsda neb nins fãa sẽn ta ne laafɩ wã yʋy Rĩung Roogẽ fãa. B ra maanda segls sẽn na yɩl n yã neb nins sẽn da ket n ka be wã. Tʋʋmd will ning sẽn get  a Zeova Kaset rãmbã tʋʋmd yell tẽn-kãng pʋgẽ wã tʋma mobill dãmb a tãab daar fãa sẽn na yɩl n sõng Kaset rãmb nins sẽn da ket n be sorẽ wã, la sẽn na yɩl n bao Kaset rãmb nins sẽn menemã. B ra tõe n bãnga mobil kãensã n welg ne bãnd sẽn yaa kãseng sẽn gʋls n yetẽ tɩ “WATCH TOWER—a Zeova Kaset rãmbã.”

Mams-y n ges kamb a yopoe wã yɛlã sẽn da welg-b ne b roagdbã, sũur sẽn yɩ noogo, b sẽn yã mobill a Zeova Kaset rãmbã sẽn so wã. B zoee tao-tao n kẽng mobillẽ wã n yeel tɩ b ya a Zeova Kaset rãmba. Saam-biisã rɩk-b-la ne mobillã n kẽng Rĩung Roogẽ, tɩ b yaool n tɩ yã b zagsã rãmba.

Yaa bõe n sõng kiris-nin-kãensã sẽn tar kɩs-sɩdã tɩ b mao ne yel-kãensã naoor wʋsg la pa vugr bala? B ra kɩsa sɩd zãng fasɩ tɩ b ra vɩɩ yaoolem dayã b sẽn da reng n togs Gʋlsg Sõamyã pʋsẽ wã.—2 Tɩmote 3:1-5; Wilgri 6:3-8.

Woto yĩnga, b miimi tɩ ka la bilfu, Wẽnnaam a Zeova na n kɩtame tɩ zabã, kisgrã, nen-kɛglmã la mo-yõsrã sa. Nokrã yell na n yɩɩ tẽegr bala. Nananda, wa sẽn zems ne tʋm-tʋmd a Poll saglg ning sẽn be 1 Korẽnt dãmba 12:14-26 pʋgẽ wã, a Zeova Kaset rãmbã modgdame n na n ges taab yelle. Baa ne kʋɩlsã la todsã sẽn welg-b ne taabã, tɩ b buud goamã yaa toor-toorã, la b zãr ne taabã, b taabã yell pak-b lame. Woto yĩnga, b yɩta tao-tao n maan bũmbu, ned sã n wa be ratem pʋgẽ.—Zak 1:22-27.

[Kart, seb-neng 30]

(Sebrã meng pʋgẽ la y tõe n yã fãa)

AFIRIKI

Repibilik Sãntrafrikɛn

Repibilik Demokratik di Kõngo

[Kartã soaadbã]

Mountain High Maps® Copyright © 1997 Digital Wisdom, Inc.

[Foto rãmba, seb-neng 30]

Rĩung Rot a tãab pʋsẽ la b ra reegd sãambã

[Foto, seb-neng 31]

B tilga rɩɩb seglg zĩis tao-tao

[Foto, seb-neng 31]

Sãambã talla waoong woo waoongo

[Picture on page 31]

B sẽn dog-b la b sẽn zoe n yaa nokense