D ra yaa we-baase, la masã d lebga piisi!

Maam ne a Sakina sẽn da wa n yaa kompugl-kɩdse, d ra yaa yagse. A Sakina ra yaa bedr n tar pãnga, tɩ mam yaool n da yaa kɩdg la bãanega. D ra nong n wẽeda no-koɛɛma, la daar a yembre d pãba taab sõma. Rẽ tɛkã, d ye pa gomd ne taaba d pa pʋʋsd taaba. Tõnd d yiibã fãa wa n toeema zĩiga, n ye pa mi taab sẽn beẽ ye.

Yʋʋmd 1994, m sɩnga Biiblã zãmsg ne a Zeova Kaset rãmbã, la bilf-bilfu, mam toeema m zʋgã. Yʋʋm a naas poore, mam sẽn wa n kẽng d daar a yembr Tigis-kãseng sẽn yaa Zall Buzumbura sẽn yaa Burundi na-tẽngã, linga maam wʋsgo, m sẽn yã a Sakina wã. M sũurã ra nooma a sẽn da be be wã, la d pʋʋsa taab d wee n pʋʋs taab bala. Baraar zaabre, ling-m-la wʋsgo, m sẽn yã-a neb nins sẽn dat n deeg lisgã sʋkã! Yẽ me ra toeema wʋsgo. A ra pa leb n yaa zab-zabd ning mam sẽn da nong n wẽed no-koeemd ne wã ye. Ad sɩd yaa yel-solemd menga, m sẽn yã-a t’a kõt kaset zãma sʋk t’a rɩka a meng n kõ Wẽnnaam n deeg koom lisgã!

A sẽn yi koomẽ wã, m yɩɩ tao-tao n tɩ walem a tʋbrẽ wã: “Fo tẽra tõnd sẽn da zabd taab to-to ninga sɩda?” T’a yeele, “N-ye, m tẽrame, la rẽ yaa sẽn looge. M lebga nin-paalg masã.”

Tõnd d yiibã fãa tara sũ-noog d sẽn bãng Biiblã sɩd sẽn kõt zems-n-taarã, la d sẽn da tar zʋg wa we-baase, n toeem n lebg bʋgsg wa piis Pe-Kɩɩm Kãseng a Zeova a Wẽnnaam sẽn so wã yĩnga. Sãmbg sẽn ka be, sɩd ning sẽn yit Biiblã pʋgẽ wã sɩd toeemda neda.