Yãmb na n paama a Zeova barka bɩ?
Yãmb na n paama a Zeova barka bɩ?
“Yãmb sã n sak [a Zeova, NW] Wẽnnaam koɛɛgã, yaa bark kãensa la y na n paam.”—TÕODO 28:2.
1. Yaa Israɛll nebã manesem bʋs n da na kɩt tɩ b paam bark bɩ kãab-wẽnse?
WE-RAOOGÃ pʋgẽ kẽn-toog sẽn kaoos yʋʋm 40 saab sẽnese, Israɛll nebã ra bee Moaab rasempʋɩɩsẽ wã. Kãabg Tẽngã ra bee b taoore. Masã a Moiiz gʋlsa Tõod sebrã sẽn da tar bark la kãab beed a pʋgẽ wã. Israɛll nebã sã n da “sak [a Zeova, NW ] Wẽnnaam koɛɛgã,” n tũ a noorã, yaa bark la b ra na n “paam.” B ra ya a Zeova “neba,” t’a ra nong-ba, n da rat n wilg a pãngã n sõng-ba. La b sã n da pa kelg-a, sãmbg sẽn ka be, yel-beed n sɩd ra na n paam-ba.—Tõodo 8:10-14; 26:18; 28:2, 15.
2. Hebre gom-biis nins b sẽn lebg tɩ “ket n kelgdẽ” la “paam” sẽn be Tõodo 28:2 pʋgẽ wã võor yaa bõe?
2 Hebre gom-biig ning b sẽn lebg tɩ “ket n kelgdẽ” (NW ) sẽn be Tõodo 28:2 pʋgẽ wã wilgda bũmb sẽn maand wakat fãa. A Zeova nin-buiidã pa segd n kelg-a wakat-wakat bal ye. B ra segdame n ket n kelgd-a wakat fãa. Ra yaa ne woto maaneg bal la b ra na n paam Wẽnnaam barkã. Hebre gom-biig ning b sẽn lebg tɩ “paam[a]” yaa gom-biig sẽn tɩ loe ne tãoosgo, tɩ naoor wʋsgo a võorã yaa “paam” bɩ “ta.”
3. Wãn to la d tõe n yɩ wa a Zozue, la bõe yĩng tɩ woto tar yõod wʋsgo?
3 Israɛll taoor-lʋɩt a Zozue yãkame n na n kelg a Zeova, tɩ rẽ kɩt t’a paam barka. A Zozue yeelame: “Bɩ y bao y sẽn na n tũ a soab rũnda . . . Maam ne m yir dãmba yẽ, tõnd na n tũu [a Zeova, NW ]”. Nin-buiidã sẽn wʋm woto b leokame: “Bɩ Zusoaba ra sak tɩ d bas bãmb n tũ wẽnnaam a to ye.” (Zozue 24:15, 16) A Zozue sẽn tall yam-sõngã yĩnga, a rog-taasã sʋka a zĩnda neb a wãna sẽn paam zu-noog n kẽ Kãab Tẽngẽ wã sʋka. Rũndã-rũndã, tõnd bee Kãabg Tẽng sẽn yalem n yɩɩd wʋsg noore. Yaa tẽng zug arzãna bark sẽn na n yɩɩg a Zozue wẽndẽ rẽndã zĩig sẽn zãr n gũud neb nins sẽn tat Wẽnnaam yamã. Yãmb na n paama bark kãens bɩ? Y sã n ket n kelgd a Zeova y na n paamame. Sẽn na yɩl n sõng-y tɩ y maan woto, bɩ y ges pĩnd Israɛllã buud yɛla, la neb sẽn kõ makr sẽn kõt zãmsgo.—Rom dãmba 15:4.
Bark bɩ kãab-wẽngã?
4. Wẽnnaam deega a Salomo pʋʋsgã n kõ-a bõe, la tõnd tagsg segd n yɩɩ wãn to ne bark kãense?
4 Rĩm a Salomo naama rɩɩb wakat fãa pʋgẽ la bala, Israɛll nebã paama bark kãsems sẽn yit a Zeova nengẽ. B paama bãan la bõn-sõama wʋsgo. (1 Rĩm dãmba 5:5) A Salomo arzɛkã yʋʋr yii wʋsgo, ba a sẽn da pa kos tɩ Wẽnnaam kõ-a arzɛkã. Sẽn yaa lebende, a sẽn da ket n yaa bi-bɩɩg n pa tar minim wʋsg sasa, a pʋʋsame n na n paam sũur sẽn sakde. A Zeova reega a kosgã n ning-a barka, n kõ-a yam la bãngre. Rẽ kɩtame t’a Salomo tõog n kao nin-buiidã bʋʋd tɩ zemse, n bãng sõma ne wẽng n bake. Baa ne Wẽnnaam sẽn kõ-a arzɛk la ziir me a sẽn da yaa bi-bɩɩgã, a Salomo talla naneb wʋsg ne tẽebã arzɛk sẽn tar yõod wʋsg n yɩɩdã. (1 Rĩm dãmba 3:9-13) Tõnd nug sã n zãada wʋsg tɩ pa woto me, d segd n sɩd talla mi-beoog wʋsgo, d sã n paam a Zeova barkã la tẽebã arzɛk wʋsgo!
5. Bõe n maane, Israɛll la Zida buudã sẽn pa kell n kelg a Zeova wã?
5 Israɛll nebã pa tall mi-beoog ne a Zeova barka ye. B sẽn pa kell n kelg-a wã yĩnga, kãab wẽns nins b sẽn deng n togsã waa b zutu. Rẽ kɩtame tɩ Israɛll la Zida soolmã bɛɛb tõog-b n tall-b n kẽng yembdo. (Tõodo 28:36; 2 Rĩm dãmba 17:22, 23; 2 Kɩbaya 36:17-20) Nams-kãng kõo Wẽnnaam nin-buiidã yam tɩ b bãng t’a Zeova barkã wata neb nins bal sẽn kelgd-a wã zut bɩ? Zʋɩf rãmb kell ning sẽn lebg n kul b ba-yirã yʋʋmd 537 S.D.T.W. paama weer n na n wilg b ‘sũyã sã n da zãmsa yam,’ la b bãng tɩ masã b ra segd n ket n kelgda Wẽnnaam.—Yɩɩl Sõamyã 90:12.
6. a) Bõe yĩng t’a Zeova tʋm a Azze la a Zakari tɩ b tɩ togs a nin-buiidã bãngr-goama? b) No-bʋg la Wẽnnaam tũnug ne a Azze n bilg n wilgi?
6 Zʋɩf rãmb nins sẽn lebg n wa b ba-yirã mee tẽn-kugr n sɩng tʋʋm Zerizalɛm wẽn-doogẽ wã. La kɩɩs-toaag sẽn wa n zĩndi, b yẽesmã maagame tɩ meebã yalse. (Ɛsdras 3:1-3, 10; 4:1-4, 23, 24) B sɩngame me n baood naar b mens yĩnga. Woto kɩtame tɩ Wẽnnaam tʋm no-rɛɛsdb a Azze ne a Zakari tɩ b tɩ lebs n nek a nin-buiidã yẽesem sɩd balengã yĩnga. A Zeova tũnuga ne a Azze n yeele: “Togame tɩ yãmb zĩ y ro-neeba pʋsẽ tɩ mam dooga lʋɩ? . . . Tags-y neer n ges y sẽn na n maan to-to. Yãmb bʋta wʋsgo, la y kẽebda bilfu. Yãmb dɩtame la y yũuda, la y ka tɩgd ye. . . . La ned sã n tʋm n dɩk yaoodo, yaa wa a suii yolg sẽn tar võor pʋgẽ.” (Azze 1:4-6) Bas tẽebã yɛl n bao tẽng zug arzɛgsã pa wat ne a Zeova bark ye.—Luk 12:15-21.
7. Bõe yĩng t’a Zeova yeel Zʋɩf rãmbã tɩ: “Tags-y neer n ges y sẽn na n maan to-to”?
7 Zʋɩf rãmbã ra fõr n kẽe b daar fãa tʋʋmã pʋsẽ n yĩm tɩ b ra tõe n paama Wẽnnaam barkã. Bark-kãng ra yaa saag sẽn na n ni-b la b sẽn da na n kẽ sẽoog n ko n paame, la rẽ fãa ra bee ne b sẽn da na n sak Wẽnnaam baa bɛɛbã kɩɩsg taoore. (Azze 1:9-11) Rẽnd sagl-kãngã sɩd zemsame: “Tags-y neer n ges y sẽn na n maan to-to.” (Azze 1:7) Sɩda, a Zeova ra yet-b lame: ‘Tags-y n gese! Ges-y y sẽn namsd zaalem y pʋtẽ wã n bãng tɩ yaa y sẽn bas m balengã roog vɩʋʋgã’ yĩnga. A Zeova no-rɛɛsdbã goam a vʋʋsem sõngã sẽn vẽneg tɩ b togsã baas n kẽe sẽn kɛlg-bã sũyã, bala nin-buiidã ye sɩnga tʋʋm wẽn-doogẽ wã, n me-a n baas yʋʋmd 515 S.D.T.W.
8. Sagl-bʋg la a Zeova kõ Zʋɩf rãmbã a Malaki wakatã, la bõe yĩnga?
8 Kaoosg zugẽ, no-rɛɛs a Malaki wakatã, Zʋɩf rãmbã ye sɩnga yam-yoog maaneg tẽebã wɛɛngẽ, hali n wat ne maand sẽn pa sakd reegr Wẽnnaam taoore. (Malaki 1:6-8) Woto kɩtame t’a Zeova sagl-b tɩ b rɩk b paoonga yembr piig zug n wa a rooga laog bĩngr zĩigẽ. La a paas tɩ b mak-a n gese a kõn pak saag t’a ni-ba, la a kõ-b bark wʋsg tɩ sek-ba. (Malaki 3:10) Ad sɩd ra yaa yalemd ne Zʋɩf rãmbã, b sẽn da namsd bũmb nins yĩng Wẽnnaam sẽn da na n kõ-b wʋsgo, b sã n da sak a noorã balã!—2 Kɩbaya 31:10.
9. D na n vaeesa neb a tãab bʋs vɩɩm kɩbar sẽn be Biiblã pʋgẽ?
9 Biiblã pa wilgd Israɛll buudã pĩnd yɛl sẽn yɩ to-to bal ye. A leb n goma neb wʋsg sẽn paam Wẽnnaam bark bɩ a kãab wẽns yelle, tɩ rẽ fãa ra be ne b sẽn kell n kelg a Zeova bɩ b pa kelg-a wã. Bɩ d ges zãmsg ning bãmb b tãabo, a Boaaz, a Naball la a Ana makr sẽn tõe n kõ-do. Rẽ wɛɛngẽ wã, bɩ y karem a Rut sebrã, n paas 1 Sãmwɛll 1:1–2:21 la 1 Sãmwɛll 25:2-42.
A Boaaz kelga Wẽnnaam
10. Bõe ne bõe pʋgẽ la a Boaaz la a Naball da wõnd taaba?
10 Baa ne a Boaaz la a Naball sẽn pa vɩɩmd wakat yɛngã, b ra tara yɛl kẽer sẽn wõnd taaba. Wala makre, rap a yiibã fãa vɩɩmda Zida tẽngã. B ra tara pʋto, la arzɛka, la b yiibã fãa ra paama sor n na n tall sõmblem ne ned sẽn be sõngr daab pʋgẽ. La b sẽn wõnd taabã teka zĩ-kãensã bala.
11. Wãn to la a Boaaz wilg t’a ra ket n kelgda a Zeova?
11 A Boaaz vɩɩmda Israɛll bʋ-kaoodbã wẽnde. A talla waoogr ne neb a taabã, la a tigisgã pʋgẽ tʋm-tʋmdbã ra nand-a-la hal wʋsgo. (Rut 2:4) A Boaaz saka Tõogã n kɩt tɩ b bas bũmb a pʋʋgẽ wã tɩ sẽn namsd-bã la naong rãmbã tõog n tɩ yiisi. (Maankʋʋre 19:9, 10) Yaa bõe la a Boaaz maan-yã, a sẽn wʋm a Rut la a Naomi kɩbarã, n yã t’a Rut tʋmda sõma n na n ges a sɩda ma sẽn kʋʋl yellã? Sẽn yɩɩd fãa a gesa a Rut yell n kõ rapã noor tɩ b bas-a t’a tɩ yiis a pʋʋgẽ wã. A Boaaz no-goama la a nonglem manesmã wilgame t’a ra yaa rao sẽn tar tẽeb la sẽn kelg a Zeova. Woto yĩnga, a paama Wẽnnaam lohorem n ta a yam.—Maankʋʋre 19:18; Rut 2:5-16.
12, 13. a) Wãn to la a Boaaz wilg waoogr kãseng ne a Zeova tõogã sẽn tɩ loe ne ra-n-deegã? b) Wẽnnaam bark bʋs la a Boaaz paam-yã?
12 Kaset sẽn yaa kãseng n yɩɩd sẽn wilgd t’a Boaaz ra kelgda a Zeova wakat fãa ra ya a sẽn pa tall rat-m-yembr manesem Wẽnnaam tõog ning sẽn da tɩ loe ne yao n deeg f nedã wɛɛngẽ wã. A Boaaz maana a sẽn tõe fãa, sẽn na yɩl t’a roagd a Elimelɛk sẽn yɩ a Naomi sɩd sẽn maan kaalma rogem-pʋɩɩr kell n pa a Elimelɛk zakã pʋgẽ. Ne “ned ba-biig sẽn ki pag peegr” maasem yĩnga, pʋg-kõor da segd n kẽe kãadem ne a sɩdã sẽn maan kaalma ned sẽn kĩ ne-a n yɩɩdã, sẽn na yɩl tɩ biribl ning b sẽn na n paama kell n tall a rogem-pʋɩɩrã. (Tõodo 25:5-10; Maankʋʋre 25:47-49) A Rut sakame n na n kẽ kãademã a Naomi zĩigẽ, a Naomi rogma sẽn da sa wã yĩnga. Ned sẽn kĩ ne a Elimelɛk n yɩɩd sẽn zãgs a Naomi sõngrã poore, a Boaaz rɩka a Rut n maan a paga. B ra geta b biribl a Obɛd wa a Naomi biiga, t’a ya a Elimelɛk rogem pʋɩɩr dɩt sẽn zems ne tõogã.—Rut 2:19, 20; 4:1, 6, 9, 13-16.
13 A Boaaz paama bark wʋsgo, a sẽn sak Wẽnnaam tõogã n pa bao a meng nafrã yĩnga. Ne b biribl a Obɛd maasem, yẽ ne a Rut ra paama bark n lebg a Zezi Kirist yaab rãmba. (Rut 2:12; 4:13, 21, 22; Matɩe 1:1, 5, 6) Ne a Boaaz sẽn pa tall rat-m-yembrã, d bãngame tɩ neb nins sẽn wilgd nonglem ne b taab la b tũud Wẽnnaam noyã paamda barka.
A Naball pa kelg ye
14. A Naball da yaa nin-bʋg buudu?
14 A Naball pa kelg a Zeova wa a Boaaz ye. A kɩɩsa Wẽnnaam Tõogã sẽn yet tɩ: “Nong f to wala f menga.” (Maankʋʋre 19:18, Sebr Sõngo) A Naball da pa ned sẽn tar tẽeb ye. A ra “yaa nin-wẽnga n ka maand neer ye.” A meng sõgen dãmbã ra get-a-la wala “nin-wẽng[a].” Wa sẽn zemse, a yʋʋr sẽn yaa Naballã rat n yeelame tɩ “yalma.” (1 Sãmwɛll 25:3, 17, 25) Woto, wãn to la a Naball maan-yã, a sẽn da paam weer n na n sõng ned sẽn dat sõngrã, sẽn dat n yeel t’a Davɩɩd sẽn yaa ned a Zeova sẽn yãkã?—1 Sãmwɛll 16:13.
15. Manesem bʋg la a Naball tall ne a Davɩɩde, la wãn to la a Abigaill yɩ toor ne a sɩdã zĩ-kãng wɛɛngẽ?
15 A Davɩɩd ne a sodaasã sẽn da be a Naball rũmsã weoogẽ wã, b kogl-b-la ne wagda wã sẽn da nong n sũud taab n wat n zuudã, n pa kos tɩ b yao ligd ye. “Tõnd sẽn be ne bãmb n gũud d rũmsã, bãmb yɩɩ wa yãgr tõnd yĩnga [wĩntoog ne yʋngo, NW],” woto la a Naball rũm-kɩɩmbã yeel-yã. Baasg zãnga a Davɩɩd sẽn wa n tʋm neb tɩ b tɩ kos a Naball rɩɩbã, a Naball “zab-b lame,” n lebs-b nus-vɩʋʋgo. (1 Sãmwɛll 25:2-16) A Naball pag a Abigaill yɩɩ tao-tao n bao rɩ-rɩtɩ n na n tɩ kõ a Davɩɩd. A Davɩɩd sũurã ra yika wʋsg hal t’a segl n na n tɩ sãam a Naball ne a rapã. Rẽ, a Abigaill sẽn yãk yam ningã fãaga neb wʋsg yõyã, la sõnga a Davɩɩd me t’a põs zɩɩm samde. La a Naball rat-tɩ-loogã la a toolmã ya n zãaga zĩiga. Sẽn zems rasem piig poore, “Zusoaba wẽe a Naball t’a ki.”—1 Sãmwɛll 25:18-38.
16. Wãn to la d tõe n dɩk a Boaaz togs-n-taar la d zãag d mens ne a Naball manesmã zãng fasɩ?
16 Ad a Boaaz ne a Naball sɩd yɩ neb sẽn yaa toor wʋsg ne taaba! D ra tall toolem la rat-m-yembr wa a Naball ye, la d rɩk a Boaaz nin-sõmblmã la a sẽn maand neer tɩ pa tũ ne rat-m-yembrã togs-n-taare. (Hebre dãmba 13:16) D tõe n maana woto n tũ tʋm-tʋmd a Poll sagl-kãngã: “Tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.” (Galat dãmba 6:10) Rũndã-rũndã, a Zezi “piis a taab[ã]” sẽn yaa kiris-neb nins sẽn saagd n na n vɩɩmd tẽngã zugã, tara zu-noog n na n maan a Zeova sẽn zae neb 144 000 kelle, sẽn na n paam vɩɩm sẽn pa tõe n ki saasẽ wã neere. (Zã 10:16; 1 Korẽnt dãmba 15:50-53; Wilgri 14:1, 4) A Zezi geta nonglem tʋʋm-kãensã wa yaa yẽ mengã la b maan-ba, la bõn-sõma kãensã maaneg wata ne a Zeova bark wʋsgo.—Matɩe 25:34-40; 1 Zã 3:18.
A Ana makrã la a barkã
17. Mak-bʋs la a Ana yã-yã, la a tagsg yɩɩ wãn to?
17 A Ana sẽn yaa pag sẽn yaa wẽn-sakdã me paama a Zeova barka. A ra bee Efrayim babg ning sẽn tar tãensã pʋgẽ ne a sɩd a Ɛlkana sẽn da yaa Levi buudã nedã. A ra tara pag a to wa sẽn zems ne Tõogã noy rẽ wɛɛngẽ wã. Pog-kãng yʋʋrã la a Penina. A Ana ra ket n yaa pʋg-kiiri, tɩ woto ra yaa yãnd meng ne Israɛll poaka, t’a pʋg-to a Penina yaool n da tar kamb wʋsgo. (1 Sãmwɛll 1:1-3; 1 Kɩbaya 6:1, 18, 19) Baasg zãnga, a Penina pa bels a Ana ye. A maana pʋ-toog n sãam a Ana sũur hal t’a ra yãbd tɩ rɩɩb yamleoog pa tar-a ye. Sẽn yaa wẽng n yɩɩdã, yaa tɩ yɩɩ woto “yʋʋmd fãa,” wakat ning fãa zakã sã n kẽng a Zeova roogẽ wã Silo. (1 Sãmwɛll 1:4-8) Ad a Penina sɩd pa tall nimbãan-zoeer ye, la ad woto sɩd yɩɩ makr n kõ a Ana! Ne rẽ fãa, a Ana zɩ n ning a Zeova taal ye. A sɩdã sã n da rebd Silo me, a zɩ n pa yir ye. La sãmbg sẽn ka be, a wa n baasame n na n paam barka.
18. Mak-sõng bʋg la a Ana bas-yã?
18 A Ana basa mak-sõng n kõ a Zeova nin-buiidã rũndã-rũndã, sẽn yɩɩd fãa, neb nins sũy sẽn sãame, neb a taab sẽn gom-b tɩ pa yɩ-b noog yĩnga. Yɛl a woto pʋsẽ, a tɩɩmã pa f sẽn na n zãag f meng ne neb a taabã ye. (Yelbũna 18:1) A Ana pa bas t’a makrã boog a tʋlsmã ne Wẽnnaam goama kelgre ye. A ra ket n kẽngda zĩig ning b sẽn zãmsd gom-kãng Wẽnnaam nin-buiidã sẽn tigim baleng yĩngã. Rẽnd woto kɩtame t’a kell n tall pãng tẽebã pʋgẽ. A tẽebã pãng pukda pʋʋsg sẽn be rasãnd pʋgẽ sẽn be 1 Sãmwɛll 2:1-10 pʋgẽ. *
19. Wãn to la d tõe n wilg tɩ d nanda tẽebã yɛla?
19 Rũndã-rũndã, d sẽn ya a Zeova sõgen dãmbã, d pa balemd-a sɛk roogẽ ye. Baasg zãnga, d tõe n wilgame tɩ d nanda tẽebã yɛl wa a Ana sẽn wilgã. Wala makre, d wilgdame tɩ d nanda tẽebã arzɛgs wʋsgo, d sẽn na n kẽnd kiris-neb tigissẽ wã la tigis-kãsemsẽ wã n pa vaandẽ ye. Bɩ d tũnug ne yel-kãensã n keng taab raood a Zeova sɩd balengã pʋgẽ. Sɩda, a kõo tõnd “pãng tɩ d sak bãmba tɩ rabeem kaẽ ye, la d kẽn bãmb taoor daar fãa ne sõmblem la tɩrlem.”—Luk 1:74, 75; Hebre dãmba 10:24, 25.
20, 21. Wãn to la a Ana paam keoor a wẽn-sakrã yĩnga?
20 A Ana wẽn-sakrã pa ling a Zeova ye, la a keo-a-la hal wʋsgo. Zakã sẽn da rebd Silo yʋʋmd-yʋʋmdã sasa, vugri a Ana pʋʋsa Wẽnnaam ne a sũur fãa ne nintãm n maan pʋleng woto: “Saasẽ-pãng-soaba, yãmb sã n ges mam namsgã n tẽeg m yell n ka yĩm, la y sã n kõ maam biribla, mam na n dɩk-a lame n kõ yãmb a yõor tɛka.” (1 Sãmwɛll 1:9-11) Wẽnnaam kelga a Ana kosgã n ning-a barka, n kõ-a biribl yʋʋr sẽn boond t’a Sãmwɛll. Biigã sẽn wa n bas bĩisim, b rɩk-a lame n kẽng Silo t’a tɩ sõgen sɛk roogẽ wã.—1 Sãmwɛll 1:20, 24-28.
21 A Ana wilga nonglem ne Wẽnnaam n pids a pʋlengã a Sãmwɛll wɛɛngẽ wã. La tags-y bark wʋsg ning yẽ ne a Ɛlkana sẽn paame, b biribl nongrã sẽn da sõgend a Zeova wã yĩnga! Roagdb sẽn yaa kiris-neb wʋsg tara sũ-no-kãngã buudu, bala b komdibli wã la b kompugli wã yaa so-pakdb koe-noogã mooneg pʋgẽ, Betɛllã zak neba, bɩ b waoogd a Zeova ne manesem a taaba.
Ket-y n kelgd a Zeova!
22, 23. a) Ne bõe la d tõe n kɩs sɩda, d sã n ket n kelgd a Zeova koɛɛgã? b) Bõe la d na n yã sõsg ning sẽn pʋgdã pʋgẽ?
22 Ne bõe la tõnd tõe n kɩs sɩda, d sã n ket n kelgd a Zeova? D na n paama bark tẽebã wɛɛngẽ, d sã n wilg tɩ d nonga Wẽnnaam ne d sũur fãa la d pids d rɩk-m-meng-n-kõ-a wã pʋlengo. Baa woto maaneg sã n kɩt tɩ d segd n maan sũ-mara mak-toos pʋsẽ, d na n paama a Zeova barkã tɩ sãmbg ka be ye, la naoor wʋsgo, yaa ne manesem sẽn yaa kãseng n yɩɩd tõnd sẽn tagsdã.—Yɩɩl Sõamyã 37:4; Hebre dãmba 6:10.
23 Bark wʋsg la b na n kõ Wẽnnaam nin-buiidã beoog-daare. B sẽn kelgd a Zeova la b sakd-a wã yĩnga, ‘kʋʋng kãseng’ n na n paam koglg “to-kãsenga” pʋgẽ, la b na n vɩɩmd ne sũ-noog Wẽnnaam dũni paalgã pʋgẽ. (Wilgri 7:9-14; 2 Pɩɛɛr 3:13) Beenẽ, a Zeova na n pidsa nin-buiidã fãa tʋlsem nins sẽn zemsã tɩ seke. (Yɩɩl Sõamyã 145:16) Baasg zãnga, wala sõsg ning sẽn pʋgdã sẽn na n wilgã, baa masã menga, neb nins sẽn kelgd a Zeova koɛɛgã paamda ‘bark sõama fãa la kũun sõma fãa sẽn yit yĩngrã.’—Zak 1:17.
[Tẽngr note]
^ sull 18 A Ana goama wõnda pa-kul sẽn pa mi rao a Maari goamã, a sẽn togse, a sẽn bãng bal t’a ra na n lebga Mesi wã ma wã.—Luk 1:46-55.
Yãmb tẽrame bɩ?
• Bõe la Israɛll pĩnd yɛlã tõe n zãms tõnd Wẽnnaam barkã wɛɛngẽ?
• Wãn to la a Boaaz la a Naball yaa toore?
• Wãn to la d tõe n dɩk a Ana togs-n-taare?
• Bõe yĩng tɩ d segd n ket n kelgd a Zeova koɛɛgã?
[Zãmsgã sogsgã]
[Foto, seb-neng a 8]
Rĩm a Salomo pʋʋsame n na n paam sũur sẽn sakde, t’a Zeova ning-a bark n kõ-a yam
[Foto, seb-neng 10]
A Boaaz talla waoogr la sõmblem ne neb a taabã
[Foto, seb-neng 13]
A Ana paama bark wʋsg a sẽn teeg a Zeova wã yĩnga