A Zeova yaa sũ-mar Wẽnnaam

“Zusoab sẽn yaa Wẽnnaam sẽn yaa ninbãan-zoeta la bark kõata [sõmblem soaba, NW]. Mam sũur ka yikd tao-tao ye, la mam nonglem yaa wʋsgo.”—YIKRI 34:6.

1, 2. a) Pĩnd wẽndẽ wã, ãnd n dɩ a Zeova sũ-marã nafre? b) “Sũ-mar” võor yaa bõe?

A NOWE wakatã nebã, Israɛll nebã sẽn da togd sor rasempʋɩɩgẽ wã ne a Moiizã, a Zezi sẽn da be tẽng zugã wakat Zʋɩf rãmbã, b fãa vɩɩmda yɛl toɛy-toɛya. La b fãa rɩɩ a Zeova sũ-marã sẽn be yamleoogã nafa. Ne neb kẽere, rẽ kɩtame tɩ b paam vɩɩm. La a Zeova sũ-marã yaa sẽn na yɩl tɩ tõnd me paam vɩɩm.

² Sũ-mar yaa bõe? Wakat bʋg la a Zeova wilgd-a, la bõe yĩnga? B wilgame tɩ “sũ-mar” yaa “tõog-m-meng toog pʋgẽ bɩ no-baoodem pʋgẽ, n paas f sẽn na n ket n saagd wakat fãa tɩ mo-yõsr na n wa saame.” Zʋg-sõng kãngã tara bõn-datla. Sẽn yɩɩd fãa, a bee nafr ne ned ning sẽn wa ne yellã. La tall sũ-mar pa rat n yeel tɩ sak wẽng ye. Sũ-marã bõn-datl sã n pidsi, bɩ bʋʋm sã n kaẽ tɩ b na n ket n tar sũ-mare, a tɛk la zĩ-kãnga.

3. A Zeova sũ-marã bõn-datl yɩɩ bõe, la a koakã yaa bõe?

³ Ninsaalbã tõe n talla sũ-mare, la ya a Zeova n kõt mak-sõng sẽn yɩɩd fãa ne sũ-marã tallgo. Yel-wẽndã sẽn wa n sãam zems-n-taar ning sẽn be a Zeova la ninsaalbã sʋkã yĩnga, tõnd Naandã talla sũ-mar ne maag-m-menga, la a kõo sor tɩ ãdem-biis nins sẽn tek yam n kos sugrã tõe n maneg b zems-n-taarã ne-a. (2 Pɩɛɛr 3:9; 1 Zã 4:10) La Wẽnnaam sũ-marã bõn-datl sã n wa pidsi, a na n zaba ne neb nins sẽn maand wẽngã ne yamleoogã, n sãam zãmaan-wẽng kãngã.—2 Pɩɛɛr 3:7.

A zemsa ne Wẽnnaam zʋg-kãsemsã

4. a) Wãn to la b gom sũ-marã yell Hebre Gʋlsg Sõamyã pʋgẽ? (Ges-y tẽngr notã me.) b) Wãn to la no-rɛɛs a Nahum bilg a Zeova, la bõe la rẽ wilgd a Zeova sũ-marã wɛɛngẽ?

⁴ Hebre Gʋlsg Sõamyã pʋgẽ, b tũnuga ne Hebre gom-biis a yiib n gom sũ-marã yelle. Gom-bi-kãens võor sɩd-sɩd yaa “yõ-bogd zulum,” tɩ b lebg-b tɩ “sũur pa yikd tao-tao” Traduction du monde nouveau wã pʋgẽ. * No-rɛɛs a Nahum goma Wẽnnaam sũ-marã yell n yeele: “Zusoaba sũur ka yikd tao-tao ye, la b tara pãng wʋsgo. Bãmb ka kõt nin-wẽns bʋʋm ye.” (Nahũm 1:3) Woto yĩnga, a Zeova sũ-marã pa bãnd sẽn wilgd t’a ka wilgd a zu-sobendã ye, la a leb n tara koaka. Pãng sẽn ka to Wẽnnaamã sũur sẽn pa yikd tao-tao la a leb n tar pãn-kãsengã wilgdame t’a sũ-marã tara bõn-datla. A tara pãng n na n sɩbge, la a basdame n pa na n maan-a tao-tao, sẽn na yɩl n kõ wẽng-maandã sor t’a toeeme. (Ezekɩɛll 18:31, 32) Woto yĩnga, a Zeova sũ-marã ya a nonglmã pukri, la wilgdame t’a rɩkda a pãngã n tʋmd ne yam.

5. Wãn to la a Zeova sũ-marã zems ne a tɩrlmã?

⁵ A Zeova sũ-marã leb n zemsa ne a tɩrlmã. A puka a meng a Moiiz wala “Wẽnnaam sẽn yaa ninbãan-zoeta la bark kõata. Mam sũur ka yikd tao-tao ye, la mam nonglem yaa wʋsgo.” (Yikri 34:6) Yʋʋm  loogr poore, a Moiiz pʋʋs n pẽga a Zeova woto: “Bãmb tʋʋma zemsa zãnga. Bãmb soɛya fãa yaa tɩrse. Bãmb yaa Wẽnnaam sẽn maand sɩda n ka maand wẽng ye. Bãmb yaa sõngo la tɩrga.” (Tõodo 32:4) N-ye, a Zeova nimbãan-zoeerã, a sũ-marã, a la a tɩrlmã fãa zemsda ne taab n womd bi-sõma.

A Zeova sũ-marã, sasa sẽn deng sa-kãsengã

6. Kaset kãseng bʋg n be n wilgdẽ t’a Zeova wilga sũ-mar ne a Ãdem la a Hawa kambã?

⁶ A Ãdem ne Hawa kɩɩsgã Edɛnã sãama b zems-n-taar sẽn tar yõod wʋsgã ne b Naand a Zeova wakat fãa yĩnga. (Sɩngre 3:8-13, 23, 24) B sẽn zãag ne Wẽnnaam woto wã kɩtame tɩ kambã rog ne yel-wẽnã, pa-zems-zãngã, la b kiidẽ. (Rom dãmba 5:17-19) Baa ne pipi ninsaalb a yiibã sẽn da maan yel-wẽndã ne yamleoogã, a Zeova kõ-b-la sor tɩ b rog kamba. Kaoosg poore, a paka sor ne nonglem tɩ tõe n yɩ sabab t’a Ãdem ne a Hawa kambã ne b yagensã tõog n paam zems-n-taar ne yẽ. (Zã 3:16, 36) Tʋm-tʋmd a Poll wilga woto: “Wẽnnaam wilga bãmb nonglem tõnd yĩnga, tɩ tõnd sẽn da ket n yaa yel-wẽna rãmba Kirist kii tõnd yĩnga. Tɩ bõe, a sã n yaa tɩ tõnd sẽn da yaa bɛɛba wakate, Wẽnnaam Biiga kũum yiisa yell ninga sẽn da be tõnd ne Wẽnnaam sʋkã, tɩ yella sɛ tõnd ne Wẽnnaam sʋkã, sẽn yɩɩda, tõnd na n paama fãagre bãmb Biiga vɩɩma yĩnga.”—Rom dãmba 5:8-10.

7. Wãn to la a Zeova wilg sũ-mar sẽn deng sãoong sa-kãsengã, la bõe yĩng tɩ zãmaan ning sẽn deng sãoong sa-kãsengã sãoong zems kɛpɩ?

⁷ A Zeova sũ-marã yɩɩ vẽeneg a Nowe wakatã. Sẽn yɩɩd yʋʋm koabg sẽn deng sãoong sa-kãsengã, “Wẽnnaam yãame tɩ dũniyã yaa wa bũmb sẽn põoge, tɩ bõe, ninsaalba fãa ra maanda wẽng dũniyã zugu.” (Sɩngre 6:12) La a Zeova talla sũ-mar ne ãdem-biisã wakat sẽn yãk koak pʋgẽ. A yeelame: “Mam sɩɩga sẽn kõt vɩɩma ka na n pa ne ninsaal wakat fãa ye, bãmb sẽn yaa ninsaalba yĩnga, ninsaal yʋʋm na n zemsa koabg la pisi bala.” (Sɩngre 6:3) Yʋʋm 120 kãens kõo a Nowe sẽk t’a rog kamb la a ka koom koglg la a keoog a wakatẽ nebã tɩ sãoong sa-kãseng n wate, Wẽnnaam sẽn wa n kõ-a noor t’a maan dẽ wã. Tʋm-tʋmd a Pɩɛɛr gʋlsame: ‘A Nowe wakate, Wẽnnaam da maana sũ-mar n kaoos wʋsg koglga maaneg wakate. La neb bilf bal n põs ne koomã, bãmb yaa  neb a nii.’ (1 Pɩɛɛr 3:20) Sɩda, neb nins sẽn da pa be a Nowe zakẽ wã pa “kelg” a moonegã ye. (Matɩe 24:38, 39, NW ) La a sẽn kɩt t’a Nowe ka koglgã la a yɩ ‘tɩrlem koe-moaand’ sẽn na maan yʋʋm pi-gĩna, a Zeova kõo a Nowe wakatẽ nebã sẽk tɩ sek sẽn na yɩl tɩ b tek yam n bas b nen-kɛglem manesmã la b balm-a. (2 Pɩɛɛr 2:5; Hebre dãmba 11:7) B sẽn wa n baas n sãam zãmaan-wẽng-kãngã wã ra yaa bũmb sẽn zems kɛpɩ.

Sũ-mar mak-sõng b sẽn tall ne Israɛlle

8. Wãn-wãn to la a Zeova wilg a sũ-marã ne Israɛll buudã?

⁸ A Zeova sẽn tall sũ-mar ning ne Israɛllã kaoosame n yɩɩg yʋʋm 120. Sẽn yɩɩd yʋʋm 1500 b sẽn yɩ Wẽnnaam nin-buiid a sẽn yãkã sasa, wakat sẽn zĩnd tɩ Israɛll nebã pa mak Wẽnnaam sũ-marã tɩ loog noor paooda. Semen dãmb a wãn bal b sẽn fãag-b Eziptã poore, b kẽe wẽn-naands pʋʋsgo, n wilg tɩ b pa nand b Fãagdã baa bilf ye. (Yikri 32:4; Yɩɩl Sõamyã 106:21) Yʋʋm kob-gĩn nins sẽn pʋglã, Israɛll nebã yẽgma rɩɩb ning a Zeova sẽn kõ-b ne yel-solemd rasempʋɩɩgẽ wã poorẽ, n yẽgem ne a Moiiz la a Aarõ, n gom a Zeova wẽnga, la b yo ne pagb sẽn yaa wẽn-zɩtba, n kẽ Baall baleng pʋgẽ menga. (Sõdbo 11:4-6; 14:2-4; 21:5; 25:1-3; 1 Korẽnt dãmba 10:6-11) Ne bʋʋm, a Zeova ra tõe n sãama a nin-buiidã, la a talla sũ-mar ne-ba.—Sõdbo 14:11-21.

9. Wãn to la a Zeova wilg t’a yaa Wẽnnaam sẽn tar sũ-mar bʋ-kaoodbã la nanambsã wakate?

⁹ Bʋ-kaoodbã wakate, Israɛll nebã lʋɩɩ wẽn-naands pʋʋsg pʋgẽ naoor ka tɛka. B sẽn maan woto wã, a Zeova bas-b-la b bɛɛbã nusẽ. La b sã n da tek yam n kos sugr n kos a sõngre, a ra tallda sũ-mar ne-ba, n yik bʋ-kaoodb tɩ b fãag-ba. (Bʋkaoodba 2:17, 18) Nanambsã wakat sẽn kaoosã sasa, rĩm dãmb nins sẽn kõ b mens a Zeova zãng-zãngã pa yɩ wʋsg ye. La baa rĩm dãmb nins sẽn tall kɩs-sɩdã naam wakate, nin-buiidã ra nong n gẽdgda sɩd balengã ne ziri balengã. A Zeova sã n da yik no-rɛɛsdb tɩ b yeel a nin-buiidã tɩ b gũus ne kɩɩsgã, b ra basda bãmb n kelgd zãmb maan-kʋʋdb la ziri no-rɛɛsdba. (Zeremi 5:31; 25:4-7) Sɩda, Israɛll nebã namsa a Zeova sɩd no-rɛɛsdbã n kʋ bãmb kẽer menga. (2 Kɩbaya 24:20, 21; Tʋʋma 7:51, 52) Baasg zãnga, a Zeova kell n talla sũ-mare.—2 Kɩbaya 36:15.

A Zeova sũ-marã pa sa ye

10. Wakat bʋg la a Zeova sũ-marã ta a tɛka?

¹⁰ La sẽn loogã wilgdame tɩ Wẽnnaam sũ-marã tara koaka. Yʋʋmd 740 S.D.T.W., a basame tɩ Asiri nebã tõog Israɛll buud piigã n tall-b n kẽng yembdo. (2 Rĩm dãmba 17:5, 6) La yʋʋm kob-gĩnd ning sẽn pʋglã saabẽ, a basame tɩ Babilon nebã pig Zidã rĩungã sẽn tar buud a yiibã n sãam Zerizalɛm ne a wẽn-doogã.—2 Kɩbaya 36:16-19.

11. Wãn to la a Zeova tall sũ-mare, ba a sẽn da wa n kaood bʋʋdã?

¹¹ La baa ne a sẽn da pidsd a bʋ-kaoorã  Israɛll la Zida zutã, a Zeova pa yĩm sũ-mar tallg ye. A Zeova tũnuga ne a no-rɛɛs a Zeremi n deng n togs t’a na n lebs n lugla a nin-buiidã a sẽn yãkã. A yeelame: “Babilon yʋʋm pis-yopoe wã sã n wa pidi, mam na n wilga yãmb tɩ m tagsda y yelle n kɩt tɩ y lebg n wa zĩ-kãnga wa m sẽn da kãab yãmbã. Yãmb na n yãa maam. La mam na n lebsa yãmb y zĩisĩ. Mam na n kɩtame tɩ y yi tẽns nins fãa mam sẽn da rig yãmb tɩ y kẽngã n lebg n wa zĩig ninga mam sẽn da yiis yãmb n tɩ kẽes yembdã.”—Zeremi 29:10, 14.

12. Wãn to la Zʋɩf rãmb kell sẽn lebg n wa Zida wã wa n baas n yɩ Wẽnnaam sor-wilgr sẽn na yɩl n segl Mesi wã waoongo?

¹² Zʋɩf rãmb nins sẽn da be yembdã kell n sɩd leba Zida n tɩ lebs n lugl a Zeova balengã wẽn-doogã b sẽn lebs n me wã pʋgẽ Zerizalɛm. A Zeova raabã sẽn da pidsdã sasa, kell kãng ra na n yɩɩ wa “Zusoaba meenem” sẽn kõt yolsg la barka. B ra na n talla raood la pãng me wala “gɩgemd sẽn be rũms sʋka.” (Miise 5:6, 7) Tõe tɩ gom-kãngã pidsa Makabe rãmbã wakate. Yɩɩ wakat kãng la Zʋɩf rãmbã, Makabe zaka rãmb sẽn da rɩt naam b zutã, rig b bɛɛbã n yiis Kãabg Tẽngẽ wã la b lebg n dɩk wẽn-doogã b sẽn da rẽgma n kõ Wẽnnaam. Woto, tẽngã ne wẽn-doogã ra paama koglgo, tɩ kell sẽn tar kɩs-sɩd tõog n deeg Wẽnnaam Biriblã, a sẽn wa n puk wala Mesi wã.—Daniɛll 9:25; Luk 1:13-17, 67-79; 3:15, 21, 22.

13. Baa Zʋɩf rãmbã sẽn kʋ a Biriblã poore, wãn to la a Zeova kell n tall sũ-mar ne-ba?

¹³ Baa Zʋɩf rãmbã sẽn kʋ a Biriblã poore, a Zeova kell n talla sũ-mar ne-b yʋʋm a tãab la pʋɩ-sʋk n paase, n kõ bãmb b yen-yen bal zu-noog tɩ b yɩ a Abrahaam tẽeb wɛɛngẽ yagengã sull neba. (Daniɛll 9:27) * Sẽn deng yʋʋmd 36 T.W. la a poore, Zʋɩf rãmb kẽer n sak bool-kãngã, la woto, wala a Poll sẽn wilg rẽ poorã, “kẽer ketame sẽn paam bark tũusgu.”—Rom dãmba 11:5.

14. a) Yʋʋmd 36 T.W., ãnd dãmb n paam zu-noog n zĩnd a Abrahaam yagengã sull neb sẽn yalgã sʋka? b) Wãn to la a Poll wilg a tagsgo, sã n yaa ne manesem ning a Zeova sẽn yãkd tẽeb Israɛllã nebã?

¹⁴ Yʋʋmd 36 T.W., neb nins sẽn da pa Zʋɩf rãmb la b pa bu-zẽms neb sẽn tuub n sak Zʋɩf rãmbã tũudmã me paama zu-noog pipi n na n yɩ a Abrahaam yagens tẽebã wɛɛngẽ. Neb nins fãa sẽn saka me paamame t’a Zeova tall nimbãan-zoeer la sũ-mar ne-ba. (Galat dãmba 3:26-29; Efɛɛz rãmba 2:4-7) A Poll wilgame t’a sak n deegame la a tall mi-beoog wʋsgo, yam la raab ning sẽn kɩt t’ a Zeova wilg sũ-mar sẽn naag ne nimbãan-zoeerã yĩnga. A Zeova tũnuga ne manesem kãng n tigim neb nins b sẽn boolã sõor zãng tɩ b lok tẽeb Israɛllã zãnga. Rẽ n so t’a Poll zẽk a koɛɛg n yeele: “Ges  Wẽnnaam yam la b bãngr sẽn ka tɛka. Ned ka tõe n bãng bãmb yam yãkra ye, la a ka tõe n fees n bãng bãmb sẽn maand bũmb ninsa me ye.”—Rom dãmba 11:25, 26, 33; Galat dãmba 6:15, 16.

A tara sũ-mare, a yʋʋrã yĩnga

15. Sẽn yɩɩd fãa bõe yĩng la Wẽnnaam sẽn tar sũ-marã, la yel-bʋg welgr n baood sẽka?

¹⁵ Bõe yĩng t’a Zeova maand sũ-mare? Pipi, yaa sẽn na yɩl n maan t’a yʋ-sõngã paam pẽgre, la a wilg a naam sẽn-ka-to wã zemsgo. (1 Sãmwɛll 12:20-22) A sẽn kɩɩs a Zeova sẽn dɩt a naam sẽn-ka-to wã to-to wã, a Sʋɩtãan waa ne yell sẽn baood welgre. Yel-kãng welgr zãng-zãng bõn-naandsã fãa taoor ra baooda sẽka. (Zoob 1:9-11; 42:2, 5, 6) Woto yĩnga, b sẽn da wa n namsd a nin-buiidã Eziptã, a Zeova yeela a Faraõ: “Mam basa foom tɩ f ket n vɩ sẽn na yɩlga tɩ fo yã mam pãngã, la tɩ mam yʋʋra saag dũniyã tɛk fãa.”—Yikri 9:16.

16. a) Wãn to la a Zeova sũ-marã kɩt t’a tõog n segl nin-buiid a yʋʋrã yĩnga? b) Wãn to la a Zeova yʋʋrã na n paam pekre, la wãn to la b na n wilg a naam sẽn-ka-to wã zemsgo?

¹⁶ Tʋm-tʋmd a Poll lebs n togsa goam nins a Zeova sẽn taas a Faraõ wã, a sẽn da wa n wilg Wẽnnaam sũ-marã tʋʋmd A yʋ-sõngã pẽgr pʋgẽ wã. Rẽ wɛɛngẽ, a Poll gʋlsame: “Sã n mik masã tɩ baa ne Wẽnnaam sẽn dat n wilg a sũ-puugrã la a kɩt tɩ b bãng a pãngã, maana sũ-mar wʋsg ne sũ-puugr laas b sẽn maan tɩ zems ne sãoongã, sẽn na yɩl t’a tõog n wilg a ziirã arzɛk ninbãan-zoeer laasã a sẽn deng n segl ziir yĩngã, woto, bãmb boola tõndo, ka sẽn be Zʋɩf rãmba sʋk bal ye, la bu-zẽms me, a wa bãmb sẽn yeel a Oze sebr pʋgẽ: ‘Mam na n boola neb nins sẽn da ka mam nebã tɩ mam neba. Ned ninga sẽn da ka nin-nongrã mam na n boola yẽ tɩ nin-nongre.’” (Rom dãmba 9:17, 22-25) A Zeova sẽn tall sũ-marã kɩtame t’a ra tõe n tũus ‘neb bu-zẽmsa sʋk a menga yʋʋr yĩngã.’ (Tʋʋma 15:14) B Taoor Soab a Zezi Kirist sor-wilgr pʋgẽ, “nin-sõms” kãensã yaa Rĩungã rogem-pʋɩɩr dɩtb a Zeova sẽn na n tũnug ne n pek A yʋ-kãsengã la a wilg  A naam-sẽn-ka to wã zemsgo.—Daniɛll 2:44; 7:13, 14, 27, NW; Wilgri 4:9-11; 5:9, 10.

A Zeova sũ-marã wata ne fãagre

17, 18. a) Tõnd sã n maan bõe n tõe n wa kɩt tɩ d pa tall naneb ne a Zeova sũ-marã n pa bãnge? b) Wãn to la b sagend tõnd tɩ d ges a Zeova sũ-marã?

¹⁷ Sẽn sɩng ne ninsaal sẽn lʋɩ yel-wẽndã pʋgẽ tɩ yɩ yel-beedã hal tɩ ta masã, a Zeova wilgame t’a yaa Wẽnnaam sẽn tar sũ-mare. Sũ-mar ning a sẽn tall sẽn deng sãoong sa-kãsengã kõo wakat tɩ b kõ keoogr tɩ seke, la kɩt tɩ b tõog n bao fãagr sore. La a sũ-mar kãng taa a tɛka, tɩ sãoong sa-kãsengã wa. Woto me rũndã-rũndã, a Zeova wilgda sũ-mar sẽn yaa kãsenga, la rẽ kaoosdame n yɩɩd neb kẽer sẽn da tẽedã. Baasg zãnga, woto pa segd n kɩt tɩ d koms raood ye. F sẽn na n koms raood woto ne f sẽn na n pa tall naneb ne Wẽnnaam sũ-marã fãa yaa yembre. A Poll sʋkame: “Bɩ fo ka nand Wẽnnaam sõmblma ne b sũ-mara la sũ-maasma sẽn yaa wʋsgã; fo ka mi tɩ Wẽnnaam sõmblmã takda foom tɩ f yam tek tɩ f kos sugr la?”—Rom dãmba 2:4.

¹⁸ Tõnd ned ba a ye pa tõe n bãng hal sẽn ta zĩ-bʋg la d rat Wẽnnaam sũ-marã sẽn na yɩl n kɩs sɩd tɩ d tata a yam tɩ sek d na paam fãagr ye. A Poll sagla tõnd tɩ d “maan bũmb nins sẽn zems [tõnd] fãagra ne dabeem la rigbu.” (Filip rãmba 2:12) Tʋm-tʋmd a Pɩɛɛr gʋlsa a kiris-nin-taasã tɩ: “Zusoaba ka kaoosda tɩ pids bãmb kãabg wa neb kẽer sẽn tagsda ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri.”—2 Pɩɛɛr 3:9.

19. Wãn to la d tõe n dɩ a Zeova sũ-marã nafre?

¹⁹ Woto yĩnga, bɩ d ra yɩ yãg-yãg ne manesem ning a Zeova sẽn get yɛlã yellã ye. Sẽn yaa lebend ne rẽ, bɩ y tũ a Pɩɛɛr saglg ning sẽn pʋgdã, la y “bãng tɩ Zusoaba sẽn maand sũ-mara yaa yãmb fãagr yĩng[a].” Ãnd fãagr yĩnga? Yaa tõndo, la neb a taab ka tɛk sẽn ket n dat n wʋm “koe-noog[ã].” (2 Pɩɛɛr 3:15; Matɩe 24:14) Rẽ na n sõnga tõnd tɩ d tall naneb wʋsg ne sũ-mar wʋsg ning a Zeova sẽn tallã, tɩ tus tõnd tɩ d tall sũ-mar ne neb a taabã.

[Tẽngr not rãmba]

Y tõe n wilga a võor bɩ?

• ‘Sũ-mar’ võor yaa bõe Biiblã pʋgẽ?

• Wãn to la a Zeova tall sũ-mar sẽn deng sãoong sa-kãsengã, Babilon yembdã poore, la pipi yʋʋm kob-gĩndẽ wã?

• Yaa yel-kãsems bʋs yĩng la a Zeova sẽn tall sũ-marã?

• Wãn to la d segd n ges a Zeova sũ-marã?

[Zãmsgã sogsgã]

[Foto, seb-neng 23]

A Zeova sũ-marã sẽn deng sãoong sa-kãsengã kõo nebã sor sõma tɩ b tek yam n kos sugri

[Foto, seb-neng 24]

Babilon lʋɩɩsã poore, Zʋɩf rãmbã rɩɩ a Zeova sũ-marã nafre

[Foto, seb-neng 25]

Pipi yʋʋm kob-gĩndẽ wã, Zʋɩf rãmb la neb sẽn pa Zʋɩf rãmb rɩɩ a Zeova sũ-marã nafre

[Foto rãmba, seb-neng 26]

Rũndã-rũndã, kiris-nebã tũnugda ne a Zeova sũ-marã sõmã