D bao sũur sẽn tat a Zeova yam
D bao sũur sẽn tat a Zeova yam
“Mam Wẽnnaam, bɩ y maan sũur sẽn tar pʋ-peelem n kõ maam, la y leb n kõ maam yam sõama sẽn ka yuusd ye.”—YƖƖL SÕAMYÃ 51:12.
1, 2. Bõe yĩng tɩ d sũurã yell segd n pak-do?
A RA yaa woko, n yaa rasãng me. No-rɛɛs a Sãmwɛll sẽn yã-a wã, a sũur yɩɩ noog t’a yeel t’a Zese bi-kãseng kãngã n da yaa ned ning Wẽnnaam sẽn yãk n na n ledg rĩm a Saullã. La a Zeova togsa woto: “Ra ges [biribl kãnga] rasãnda ne a woglma ye. Bala, mam ka yãk-a ye. . . . Ninsaal geta nin sẽn ne, la Wẽnnaam geta sũuri.” A Zeova yãka a Zese biribl ning sẽn yaa yao zʋʋgã, a Davɩɩd, sẽn yaa ‘ned sẽn ta a yam.’—1 Sãmwɛll 13:14; 16:7.
2 Wẽnnaam tõe n karma ninsaal sũuri, wala a sẽn togs vẽeneg kaoosg poorã: “Mam yaa Zusoaba. Mam mii neb sũy tagsg sẽn yaa bũmb ninga. Mam maanda ned fãa wa sẽn zems a manesem ne a tʋʋma.” (Zeremi 17:10) N-ye, “Zusoaba n makd [“n feesd,” NW ] ned sũuri.” (Yelbũna 17:3) La yaa ninsaal sũ-bʋgã la a Zeova sẽn feesdã? La bõe la d tõe n maan n paam sũur sẽn tat a yam?
‘Nedã sẽn yaa to-to a sũurẽ wã’
3, 4. Sẽn yɩɩd fãa, wãn to la b tũnugd ne gom-bil ning sẽn yet tɩ ‘sũurã’ Biiblã pʋgẽ? Kõ-y makr a wãna.
3 ‘Sũur’ yaa gom-biig sẽn pukd sẽn zems naoor tusr Gʋlsg Sõamyã pʋgẽ. Zĩis wʋsg sẽn yɩɩd pʋsẽ, b gomda a yell makr wɛɛngẽ. Wala makre, a Zeova yeela no-rɛɛs a Moiiz tɩ: “Togs Israɛll neba tɩ b bao kũun n kõ maam. Reeg kũun ned kam fãa nengẽ sẽn kõt ne yamleoogo.” La neb nins sẽn wa ne kũunã yaa “neb nins fãa sũur sẽn noom ne Zusoaba.” (Yikri 25:2; 35:21) Vẽenega, makr wɛɛngẽ sũurã neng a yembr yaa tʋlsem, sẽn yaa pãng ning sẽn tusd tõnd tɩ d maand yɛlã. Tõnd makr sũurã leb n pukda d sũ-noogo, d sũ-sãams la d rabeem, d raab la d nonglem. Sũur tõe n yika wʋsgo, bɩ a zoe rabeem wʋsgo, n tall sũ-sãoong bɩ a pid ne sũ-noogo. (Yɩɩl Sõamyã 27:3; 39:4; Zã 16:22; Rom dãmba 9:2) A tõe n talla wuk-m-meng bɩ sik-m-menga, nonglem bɩ kisgri.—Yelbũna 16:5; Matɩe 11:29; 1 Pɩɛɛr 1:22.
4 Wa sẽn zems ne rẽ, naoor wʋsgo, “sũur” tɩ loee ne tʋlsem la sũ-noog ne sũ-sãams la yɛɛsgo, tɩ “yam” yaool n tɩ loe ne tagsg la bãngre. Yaa woto la d segd n wʋm gom-kãensã võore, a sã n wa pukd woto Gʋlsg Sõamyã pʋsẽ. (Matɩe 22:37; Filip rãmba 4:7) La sũur ne yam kẽeda taaba. Wala makre, a Moiiz sagla Israɛll nebã woto: “Woto yĩnga, bɩ y tags y sũur pʋgẽ la y bãng tɩ Zusoaba yaa Wẽnnaam sẽn be yĩngri la dũniyã zug n ka tar to ye.” (Tõodo 4:39) A Zezi yeela gʋlsdb nins sẽn da zãmbd-a wã woto: “Yaa bõe tɩ yãmb tar tags-wẽns y sũyã pʋsẽ?” (Matɩe 9:4) B leb n tõe n dɩka “yam” ne “bãngre,” la ‘tagsg’ n tɩ loe ne sũuri. (1 Rĩm dãmba 3:12; Yelbũna 15:14; Mark 2:6) Woto yĩnga, makr wɛɛngẽ sũurã tõe n tɩ loee ne tõnd bãngrã, sẽn yaa tõnd tagsa wã bɩ d yɛlã võor wʋmbã.
5. Makr wɛɛngẽ sũurã yaa bõe?
5 Sã n yaa ne sebr a yembre, makr wɛɛngẽ sũurã yaa “nedã meng nedemd nif zĩiga, sẽn yaa nedã sẽn yaa to-to a sũurã pʋgẽ tɩ rẽ yaa vẽeneg a tʋʋmã pʋsẽ, a tʋlsmã, a sẽn nong bũmb ninsã, a sũ-nood la a sũ-sãams ne a yɛɛsgã, a sẽn nong bũmb nins wʋsgo, a mamsgã, a yamã, a bãngrã, a tõodã, a sẽn tẽed bũmb nins la a tagsgã, a pʋ-tẽerã la a sẽn mi wã pʋgẽ wã.” A sɩd makda tõnd sẽn sɩd yaa to-to wã, ‘nedã sẽn yaa to-to a sũurẽ wã.’ (1 Pɩɛɛr 3:4, NW ) Yaa sũ-kãng la a Zeova sẽn get la a feesdẽ wã. Woto yĩnga, a Davɩɩd ra tõe n pʋʋsa woto: “Mam Wẽnnaam, bɩ y maan sũur sẽn tar pʋ-peelem [“sẽn nedge,” Sebr Sõngo] n kõ maam, la y leb n kõ maam yam sõama sẽn ka yuusd ye.” (Yɩɩl Sõamyã 51:12) Wãn to la d tõe n paam sũur sẽn nedge?
“Tags-y” Wẽnnaam goama “yell neere”
6. Sagl-bʋg la a Moiiz kõ Israɛll kambã, b sẽn da wa n be Moaab rasempʋɩɩgẽ wã?
6 A sẽn da wa n sagend Israɛll kambã sẽn da tigim Moaab rasempʋɩɩgẽ wã, n nan pa kẽ Kãabg Tẽngã a Moiiz yeelame: “Tags-y goam nins fãa mam sẽn togs yãmb rũndã wã yell neere, la y rɩk bãmb n wilg y kamba tɩ b gũus b mense n sak tõod kãensa fãa goama.” (Tõodo 32:46) Israɛll nebã ra segd n ‘deega goama ne b sũuri.’ (Sebr Sõngo) Ra yaa b sẽn da na n mi Wẽnnaam noyã sõma bal la b ra na n tõog n zãms-b b kambã tɩ kẽ-b sũyã.—Tõodo 6:6-8.
7. Wẽnnaam Gomdã ‘yell tagsg ne d sũy fãa’ baooda bõe maanego?
7 Bõn-kãseng b sẽn baood tɩ b maan sẽn na yɩl n paam sũ-yɩlemd yaa paam Wẽnnaam daabã la a bõn-datɩ wã bãngr hakɩka. Yaa zĩ-yɛng bal la bãng-kãng tõe n paame, yaa Gʋlsg Sõamyã vʋʋsem sõng sẽn vẽneg tɩ b gʋlsã pʋgẽ. (2 Tɩmote 3:16, 17) La zug bãngr yen-yen bal pa na n sõng tõnd tɩ d paam sũur sẽn tat a Zeova yam ye. Sẽn na yɩl tɩ bãngr sɩd kẽ tõnd sõma, rɩlla d sɩd tags bũmb ning d sẽn zãmsdã zug sõma, bɩ d ‘gãd-a ne d sũur fãa.’ (Tõodo 32:46, An American Translation) Wãn to la rẽ maanda? Yɩɩl gʋlsd a Davɩɩd wilga woto: “Mam tẽegda kʋdemd wakate n gomd yãmb tʋʋma fãa yelle, la m tagsd yãmb nus tʋʋma yelle.”—Yɩɩl Sõamyã 143:5.
8. Sʋgs-bʋs zut la d tõe n tags d zãmsgã wakate?
8 Tõnd me segd n tagsa a Zeova tʋʋmã zut ne mi-beoogo. D sã n karemd Biiblã bɩ sɛb sẽn tik Biiblã zugu, d segd n tagsa sʋgsg wala woto zutu: ‘Yaa bõe la rẽ zãmsd maam a Zeova zugu? A Zeova zʋg-sõma bʋs la m yã tɩ puk ka? Bõe la kɩba-kãngã zãmsd maam a Zeova sẽn nong la a sẽn pa nong zugu? D sã n tall manesem a Zeova sẽn nonge a biisã yaa bõe, d sã n mak rẽ ne manesem a sẽn pa nong biisi? Wãn to la zãms-kãngã tɩ loe ne m sẽn zoe n miẽ wã?’
9. Meng zãmsgã la bʋgsgã yõod taa hal zĩ-bʋgo?
9 A Lisa * sẽn tar yʋʋm pisi la a yiibã wilga a sẽn wa n sɩng n nong zãmsg la bʋgsg sẽn maand ne bõn-datl yõod to-to woto: “Mam sẽn deeg lisgã yʋʋmd 1994 poore, mam tũu sɩdã sõma sẽn na maan yʋʋm a yiib bala. Mam da kẽnda kiris-neb tigissã fãa, n da rɩkd lɛɛr 30 n digd 40 kiuug fãa koe-moonegã pʋgẽ, la m da maand tũud-n-taar ne kiris-neb a taabã. Rẽ poore, m sɩnga zãagre. Mam leba poorẽ wʋsg hali n kɩɩs Wẽnnaam noore. La m yamã waame, tɩ m bao n na n dems m vɩɩmã. Ad m sũur sɩd yɩɩ noog wʋsg a Zeova sẽn yã m sẽn tek yam n kos sugr n leb n sak-ma! M nong n tagsda woto: ‘Bõe yĩng tɩ mam lʋɩ tẽebã wɛɛngẽ?’ Leokr ning sẽn wat mam yamẽ wã wakat fãa yaa m sẽn bas n pa maan zãmsg ne bʋgsg sẽn tar bõn-datlã yĩnga. Sɩd ning sẽn be Biiblã pʋgẽ wã ra pʋd n pa kẽ mam sũurã ye. Sẽn sɩng ne masã, meng zãmsgã la bʋgsgã na n yɩɩ bõn-kãseng mam vɩɩmã pʋgẽ wakat fãa.” Tõnd sã n bɩt bãngr pʋgẽ, a Zeova, a Biriblã la a Gomdã wɛɛngẽ, ad sɩd tara yõod wʋsg tɩ d bao sẽk n bʋgs sõma!
10. Bõe yĩng tɩ d segd n yɩ tao-tao n bao sẽk n maan d meng zãmsg la d bʋgse?
10 Dũni kãngã sẽn pid ne tʋʋma pʋgẽ, yɩl n yã sẽk n zãms la bʋgs sɩd pa nana ye. Baasg zãnga, rũndã-rũndã, kiris-nebã bee Kãabg Tẽng sẽn yaa kãseng noore: yaa Wẽnnaam dũni paalg sẽn yaa tɩrgã. (2 Pɩɛɛr 3:13) Yel-lingdem wala “Babilon kãsenga” sãoongo, la “Magoog Goog” zabrã a sẽn na n maan ne a Zeova nin-buiidã yaa yɛl sẽn wat ka la bilfu. (Wilgri 17:1, 2, 5, 15-17; Ezekɩɛll 38:1-4, 14-16; 39:2) Bũmb ning sẽn watã tõe n yɩɩ makr ne nonglem ning tõnd sẽn tar ne a Zeova wã. D segd n yɩɩ tao-tao masã n bao sẽk n tags Wẽnnaam Gomdã zug ne d sũy fãa!—Efɛɛz rãmba 5:15, 16, NW.
‘Segl-y y sũy n vaees Wẽnnaam Gomdã’
11. Wãn to la b tõe n dɩk tõnd sũurã n mak ne zĩiga?
11 B tõe n dɩka makr wɛɛngẽ sũurã n mak ne zĩig b sẽn tõe n bʋd sɩdã bõn-buudu. (Matɩe 13:18-23) B nong n segenda tẽng sɩd-sɩdã sẽn na yɩl n ko tɩ koodã tõog n bɩ. Woto me, tõnd segd n segla d sũurã, sẽn na yɩl tɩ Wẽnnaam Gomdã kẽ-a n paase. Maan-kʋʋd a Ɛsdras “segla a sũur n na n vaees a Zeova tõogã la a tũ-a.” (Ɛsdras 7:10, NW ) Wãn to la d tõe n segl d sũurã?
12. Bõe n na n sõng tõnd tɩ d segl d sũurã zãmsgã yĩnga?
12 D sã n dat n segl d sũurã sõma d sã n wa rat n vaees Wẽnnaam Gomdã, yaa d sẽn na n pʋʋs ne d sũur fãa. Balemdb hakɩkã sẽn yaa kiris-nebã tigiss sɩngdame la b baasd ne pʋʋsgo. Ad sɩd zemsame tɩ d sɩng d meng Biibl zãmsg fãa ne pʋʋsg sẽn yit d sũurẽ, la d tall wẽn-zoeer manesem d zãmsgã wakate!
13. Sẽn na yɩl n paam sũur sẽn tat a Zeova yam, bõe la d segd n maane?
13 B segd n segla makr wɛɛngẽ sũurã t’a bas tagsa a sẽn gãd dem-dem tɩ tikr kaẽ wã. A Zezi wakatẽ tũudmã taoor dãmb ra pa rat n maan woto ye. (Matɩe 13:15) Sẽn yaa lebende, a Zezi ma a Maari bãnga bõn-kãens fãa võor “a sũur pʋgẽ,” a sẽn tik sɩd nins a sẽn da wʋma zutã. (Luk 2:19, 51) A lebga a Zezi karen-biig sẽn tar kɩs-sɩda. A Lidi sẽn yit Tiatiirã kelga a Polle, “la Zusoaba paka a sũur t’a reeg[e].” Yẽ me lebga tẽeda. (Tʋʋma 16:14, 15) Bɩ d ra tol n gãd d mens tagsa kãn-kãe bɩ n nong zãmsg sẽn yit neb nengẽ ye. Sẽn yaa lebend bɩ d sak “tɩ baa neba fãa sã n yaa zĩrẽ yagdba, Wẽnnaam yaa sɩd soab[a].”—Rom dãmba 3:4.
14. Wãn to la d tõe n segl d sũy n kelg kiris-neb tigissẽ wã?
14 Sẽn yɩɩd fãa, tara yõod wʋsg tɩ d segl d sũyã n kelg kiris-neb tigissẽ wã. Yel-tiisdem tõe n kɩtame tɩ d ye pa kelgd b sẽn togsd bũmb ningã ye. Goam nins b sẽn togsdã tõeeme n pa tall pãn-tusdg wʋsg tõnd zutu, d sã n tagsd yɛl nins sẽn maan daarã pʋgẽ wã zut wʋsgo, bɩ d sã n tagsd bũmb ning sẽn gũud tõnd beoogã zugu. D segdame n dɩk sard sẽn pa vigsd ne d meng n kelg la d zãmse, d sã n dat n dɩ zãmsg ning b sẽn kõtã nafa. Ad d sɩd na paam nafa wʋsgo, d sã n yãk yam sõma-sõma n na n wʋm verse rãmbã võor b sẽn wilgdã nafa!—Nehemi 8:5-8, 12.
15. Wãn to la sik-m-mengã sõngd tõnd tɩ d yɩ neb sẽn sakd zãmsg n paasdẽ?
15 Wala birg ningr sẽn paasd zĩig noomã, woto me, tõnd sã n bɩɩsd sik-m-menga, tẽebã yɛl ratem, bas-m-yam, wẽn-zoeer la nonglem ne Wẽnnaam, rẽ tõe n kɩtame tɩ tõnd makr wɛɛngẽ sũurã yɩ sõma n paase. Sik-m-meng bʋkda sũur n sõngd tõnd tɩ d sakd zãmsg n yɩɩda. A Zeova yeela Zida rĩm a Zozias woto: “Fo sẽn wʋm mam sẽn yeel[ã] . . . fo sũur sãamame tɩ f sik f meng mam taoore n pãrs f fut n yãbe. La mam me wʋma fo koɛɛgã.” (2 Rĩm dãmba 22:19) A Zozias sũurã ra tara sik-m-meng la a sakdẽ. Sik-m-mengã sõnga a Zezi karen-biisã sẽn da yaa “nin-tals sẽn ka paam zãmsgã” tɩ b wʋm tẽebã sɩd võor n dɩk-b n tʋm, tɩ “yam dãmba la yẽesem dãmba” yaool n pa tõog n bãng rẽ ye. (Tʋʋma 4:13; Luk 10:21) Bɩ d ‘sik d mens Wẽnnaam taoore,’ d sã n wa baood n na n paam sũur sẽn tat a Zeova yam.—Ɛsdras 8:21.
16. Bõe yĩng tɩ modgr yaa tɩlae sẽn na yɩl n bɩɩs tẽebã rɩɩb ratem?
16 A Zezi yeelame: “Sũ-noog rãmb la neb nins sẽn mi tɩ b tara tẽeb ratmã.” (Matɩe 5:3, NW ) Baa ne b sẽn kõ tõnd tõog tɩ d tõe n tall tẽebã, dũni wẽng kãngã pãn-tudg bɩ zʋgd wala kʋɩɩngã tõe n muda ratem kãngã tõnd sẽn tarã. (Matɩe 4:4) Tõnd segd n bɩɩsa ratem sẽn yaa sõma ne tẽebã rɩɩbo. Baa sɩngrẽ wã Biiblã kareng la meng zãmsgã sã n pa be yamleoog ne tõndo, d sã n pẽdge, d na n mikame tɩ bãngrã na n ‘kõo tõnd sũ-noogo,’ tɩ d gũud zãmsgã sasa ne yãgbo.—Yelbũna 2:10, 11.
17. a) Bõe yĩng tɩ d segd n tall bas-yard zãng ne a Zeova? b) Wãn to la d tõe n bɩɩs bas-yard ne Wẽnnaam?
17 Rĩm a Salomo sagla woto: “Teeg Zusoaba ne f sũur fãa la f ra teeg f meng bãngr ye.” (Yelbũna 3:5) Sũur sẽn tar bas-yard ne a Zeova miimi tɩ bũmb nins fãa A sẽn kot bɩ a sẽn yet a Gomdã pʋgẽ tɩ b maana yaa tɩrg wakat fãa. (Ezai 48:17) Sɩd-sɩda, a Zeova zemsa ne tõnd teegr zãng-zãnga. A tõe n pidsa bũmb ning fãa a sẽn yãk n na n maana. (Ezai 40:26, 29) Bãng-y t’a yʋʋrã võor sɩd-sɩd yaa: “A kɩtdame tɩ yɩ,” tɩ rẽ kõt tõnd bas-yard t’a tõe n pidsa bũmb ning fãa a sẽn kãabã! A “manesem fãa yaa tɩrga la bãmb tʋʋma fãa bee nonglem.” (Yɩɩl Sõamyã 145:17) Yaa sɩd tɩ sẽn na yɩl n bɩɩs bas-yard ne Wẽnnaam, d segdame n ‘lemb n ges tɩ Zusoaba yaa sõama,’ n tũ bũmb ning d sẽn zãmsd Biiblã pʋgẽ wã tõnd mengã vɩɩm pʋgẽ, la d tagsd nafa nins rẽ sẽn wat ne wã zugu.—Yɩɩl Sõamyã 34:9.
18. Wãn to la wẽn-zoeerã sõngd tõnd tɩ d sak Wẽnnaam sor-wilgrã?
18 A Salomo leb n goma bũmb a to sẽn kɩtd tɩ tõnd sũyã sak Wẽnnaam sor-wilgrã, n yeele: “Zoe Zusoabã n bas wẽnga.” (Yelbũna 3:7) A Zeova yeela woto pĩnd Israɛllã wɛɛngẽ: “Mam datame tɩ bãmb [sũy, NW ] yɩ woto wakat fãa tɩ b zoe maam n sak mam tõoda tɩ bãmb ne b kamba paam sũ-noog daar fãa.” (Tõodo 5:29) N-ye, neb nins sẽn zoet Wẽnnaamã sakd-a lame. A Zeova tara tõog n tõe “n sõng neb nins sẽn dat Wẽnnaam ne b sũyã fãa wã,” la a tar tõog n na n sɩbg neb nins sẽn kɩɩsd-a wã. (2 Kɩbaya 16:9) Bɩ d tall zoees sẽn naag ne waoogre, n pa rat n sãam Wẽnnaam sũur ye, la bɩ rẽ tall pãn-tusdg tõnd tʋʋma, d tagsgã la d sũyã zutu.
‘Nong-y a Zeova ne y sũurã fãa’
19. Wãn-wãn la nonglem tõe n sõng n kɩt tɩ tõnd sũurã sak a Zeova sor-wilgrã?
19 Nonglmã kɩtdame tɩ tõnd sũurã sak a Zeova sor-wilgrã n yɩɩd zʋg-sõma a taabã fãa. Sũur sẽn pid ne nonglem Wẽnnaam yĩng kɩtdame tɩ ned rat ne a sũurã fãa n bãng bũmb ning sẽn tat Wẽnnaam yam la sẽn pa tat a yam. (1 Zã 5:3) A Zezi yeelame: “Nong Zusoaba fo Wẽnnaam ne f sũur fãa, la ne f sɩɩga fãa, la ne f yam fãa.” (Matɩe 22:37) Bɩ d paas d nonglmã ne Wẽnnaam, n minim n tagsd a sõmblmã yelle, n gomd ne-a wakat fãa wala ne zo-nongre, la d gomd a yell ne neb a taabã ne yẽesem.
20. Wãn to la d tõe n paam sũur sẽn tat a Zeova yam?
20 D sã n na n kʋmse: Paam sũur sẽn tat a Zeova yam baoodame tɩ d bas tɩ Wẽnnaam Gomdã toeem tõnd sẽn yaa to-to d sũurã pʋgẽ wã. D mengã segdame n zãmsd Gʋlsg Sõamyã sõma, la d bʋgsd a zug ne mi-beoogo. D tõe n maana woto tɩ yɩ sõma n yɩɩge, d sã n segl d sũurã, sẽn dat n yeel tɩ sũur sẽn pa gãd tagsa sẽn ka tikr dem-dem, sũur sẽn pid ne zʋg-sõma sẽn kɩt tɩ d reegd zãmsgo! N-ye, ne a Zeova sõngre d tõe n paama sũur sẽn tat a yam. La yaa bõe ne bõe la d tõe n maan sẽn na yɩl n kogl d sũurã?
[Tẽngr note]
^ sull 9 B toeema yʋʋrã.
Wãn to la y na n leokẽ?
• Makr wɛɛngẽ sũ-bʋg la a Zeova sẽn feesdã?
• Wãn to la d tõe n ‘tags’ Wẽnnaam Gomdã ‘zug ne d sũur fãa’?
• Wãn to la d segd n segl d sũurã n yaool n vaees Wẽnnaam Gomdã?
• Zãms-kãngã vaeesg tus-y lame tɩ y rat n maan bõe?
[Zãmsgã sogsgã]
[Foto, seb-neng 12]
A Davɩɩd bʋgsa tẽebã yɛl zut ne mi-beoogo. La yãmba?
[Foto rãmba, seb-neng 16]
Segl-y y sũurã n yaool n zãms Wẽnnaam Gomdã