A Zeova yaa tõnd zĩ-lilldga
A Zeova yaa tõnd zĩ-lilldga
“[Fo sẽn yeel tɩ] Zusoaba, yãmb yaa zĩ-lilldg mam yĩnga. . . . Wẽng kõn tol n seg foom ye.”—YƖƖL SÕAMYÃ 91:9, 10.
1. Bõe yĩng tɩ d tõe n yeel t’a Zeova yaa d zĩ-lilldga?
A ZEOVA yaa zĩ-lilldg hakɩk n kõ a sõgen dãmbã. Tõnd sã n dɩk d mensã zãng n kõ-a, tõeeme tɩ ‘yɛl gũbg tõndo, la b ka sẽbg tõnd ye, toog wʋm tõndo, la tõnd yam ka yo ye, neb namsd tõndo, la Wẽnnaam ka bas tõnd ye, neb pãb tõnd n lubi, la b ka sãam tõnd ye.’ Bõe yĩnga? A Zeova sẽn kõt tõnd “pãng ning sẽn yɩɩd pãn-zaalgã” yĩnga. (2 Korẽnt dãmba 4:7-9) N-ye, tõnd yĩngr Ba wã sõngda tõnd tɩ d tall wẽn-zoeer vɩɩm, tɩ d tõe n gãd yɩɩl-gʋlsdã gom-kãensã ne d sũur fãa: “Zusoaba, yãmb yaa zĩ-lilldg mam yĩnga. Fo kɩtame tɩ Sẽn-ka-to yɩ laafɩ zĩiga. Wẽng kõn tol n seg foom ye.”—Yɩɩl Sõamyã 91:9, 10.
2. Bõe la b tõe n yeel Yɩɩl Sõama 91 soabã wɛɛngẽ, la yaa bõe la a kãabda?
2 Tõe tɩ ya a Moiiz n gʋls Yɩɩl Sõamyã 91 soabã gom-kãensã. Yɩɩllã zugẽ goam wilgdame tɩ yaa yẽ n maan Yɩɩl Sõamyã 90 soabã, tɩ Yɩɩl Sõamyã 91 soabã pʋgl tɩ b pa gom gʋlsd a to yell ye. Tõe tɩ b ra yɩɩnda Yɩɩl Sõamyã 91 soabã woto: Ned a yembr n dengd n yɩɩle (Yɩɩl Sõamyã 91:1, 2), tɩ yɩɩndb sull sokdẽ (Yɩɩl Sõamyã 91:3-8). Tõe tɩ sẽn pʋgl dẽ yaa ned a ye koɛɛga (Yɩɩl Sõamyã 91:9a) tɩ sull yɩɩl n soke (Yɩɩl Sõamyã 91:9b-13). Rẽ poore, tõe tɩ yaa yɩɩnd a yembr n yɩɩnd n baase. (Yɩɩl Sõamyã 91:14-16) Sẽn yɩ to-to fãa, Yɩɩl Sõamyã 91 soabã kãabda tẽeb bãan kiris-neb sull nins sẽn zae ne vʋʋsem sõngã, la a kõt bas-m-yam kãng buud b tũud-n-taasã sull sẽn dɩk b mens n kõ Wẽnnaamã. * Bɩ d ning d mens a Zeova sõgen dãmb kãens zĩigẽ n vaees yɩɩn-kãngã.
D tara bãan ‘Wẽnnaam zĩ-soalgdga pʋgẽ’
3. a) “Sẽn-ka-to zĩ-soalgdga” yaa bõe? b) Bõe la d paamda, d sã n ‘paad Sẽn-tõeyã fãa wã maasmẽ’?
3 Yɩɩl-gʋlsdã yɩɩla woto: “Ned ninga fãa sẽn zĩ Sẽn-ka-to zĩ-soalgdga pʋgẽ paada Sẽn-tõeyã fãa wã maasmẽ. Mam yeta Zusoaba yaa: ‘Yãmb yaa zĩ-lilldga la mam pãng zĩiga la mam Wẽnnaam mam sẽn dellda.’” (Yɩɩl Sõamyã 91:1, 2) “Sẽn-ka-to zĩ-soalgdga” yaa koglg zĩig makr wɛɛngẽ n kõ tõndo, la sẽn yɩɩd fãa a yaa koglg zĩig ne sẽn zae-bã, a Sʋɩtãan sẽn zabd ne n yɩɩdã. (Wilgri 12:15-17) A ra na n sãamẽ-la tõnd fãa, sã n da paẽ koglg ning d sẽn paamde, d sẽn paad ne Wẽnnaam sẽn deegd tõnd wa sãamb tẽebã wɛɛngẽ wã yĩnga. ‘D sẽn paad Sẽn-tõeyã fãa wã maasmẽ’ wã yĩngã, d paamda Wẽnnaam maasem sẽn kogendã. (Yɩɩl Sõamyã 15:1, 2; 121:5) Zĩ-lilldg bɩ koglg zĩig bɛɛb sẽn yɛɛsd kolgr ka be sẽn yɩɩd Naab sẽn-ka-to la Soaal a Zeova ye.—Yelbũna 18:10.
4. Bõe la ‘liuul bẽt’ a Sʋɩtãan tũnugd ne, la yaa wãn to la d põsd-a?
4 Yɩɩl-gʋlsdã paasdame: “Tɩ bõe, bãmb fãagda foom ne tãoog ned [“liuul bẽt,” NW ] sẽn bẽta la ne bã-loangdg sẽn yaa sãoongo.” (Yɩɩl Sõamyã 91:3) Pĩnd Israɛllẽ wã, liuuli bẽtbã ra nong n tũnugda ne bẽds n yõgd-ba. “Liuul bẽt” a Sʋɩtãan bẽdsa sʋka, d tõe n sõdga a siglgã la a ‘sɩlem tʋʋmã.’ (Efɛɛz rãmba 6:11) Bẽds sẽn solg la b ning tõnd sorã zug sẽn na yɩl n tus tõnd tɩ d kẽ wẽng pʋgẽ n sãam d tẽebã. (Yɩɩl Sõamyã 142:4) La tõnd sẽn zãgs tɩ d kõn maan wẽngã, ‘tõnd põsda bẽtba sũud wa liuuli.’ (Yɩɩl Sõamyã 124:7, 8) Ad d sɩd tara mi-beoog ne a Zeova, a sẽn fãag tõnd ne ‘liuul bẽt’ sẽn yaa wẽngã!—Matɩe 6:13.
5, 6. Bõe “bã-loangdg” n wa ne “sãoongo,” la bõe yĩng t’a ka tõogd a Zeova nin-buiidã?
5 Yɩɩl-gʋlsda gomda ‘bã-loangdg sẽn yaa sãoong’ yelle. Wala bã-loangdga, bũmb n be n wat ne ‘sãoong’ ãdem-biisã zutu, la neb nins sẽn teend a Zeova naam sẽn ka to wã zutu. Rẽ wɛɛngẽ, pĩnd yɛl mit a Arnold Toynbee gʋlsa woto: “Dũni gill Zabr a Yiib-n-soabã saab tɛka, tẽn-nonglmã kɩtame tɩ tẽns sẽn so b mensã sõor paas naoor a yiibu . . . Masã wã, ãdem-biisã manesem wata ne welgr n paasdẽ.”
6 Yʋʋm kob-gĩnã pʋsẽ, nanambs kẽer yãnga tẽn-tẽnsã mo-yõs sẽn wat ne welgrã. B leb n baoome tɩ nebã waoog-ba, bɩ b waoog yimaas rãmb bɩ bõn-makds buud toor-toore. La a Zeova zɩ n bas tɩ “bã-loangdg” a woto tõog a sõgen dãmb sẽn tar kɩs-sɩdã ye. (Daniɛll 3:1, 2, 20-27; 6:8-11, 17-23) D sẽn yaa saam-biis sẽn tar nonglem sẽn be tẽns toɛy-toɛy pʋsẽ wã, ya a Zeova la d sakd zãng-zãnga, n pa kẽesd d toog dũniyã naam yɛlẽ wa Gʋlsg Sõamyã sẽn yetã, n miẽ tɩ “buud fãa sʋka, ned ninga sẽn zoet [Wẽnnaam] la sẽn maand tɩrga, yẽ soab tata bãmb yam.” (Tʋʋma 10:34, 35; Yikri 20:4-6; Zã 13:34, 35; 17:16; 1 Pɩɛɛr 5:8, 9) Baa ne d sẽn namsd “beemã,” (NW ) poorẽ tɩ rẽ pukd ne d sẽn namsd d sẽn yaa kiris-nebã yĩngã, d tara sũ-noogo, la d tar bãan tẽebã wɛɛngẽ “Sẽn-ka-to zĩ-soalgdga pʋgẽ.”
7. Wãn to la a Zeova kogend tõnd ‘ne a pɩgsã’?
7 A Zeova sẽn yaa tõnd zĩ-lilldgã kɩtame tɩ d paamd belsg ne gom-kãensã: “Bãmb põgendeda foom ne b pɩgsa la fo na n paama zĩ-lilldg bãmb pɩgsa tẽngre. Bãmb sɩda yaa gãong ne gãntika.” (Yɩɩl Sõamyã 91:4) Wẽnnaam kogenda tõndo, wala liuuli ma sẽn põgended a kamb n kogend-bã. (Ezai 31:5) ‘A põgendeda tõnd ne a pɩgsã.’ Ne a pɩgsã, liuul luta a kambã, n kogend-b tɩ bũmb ra wa rɩ-b ye. Tõnd sẽn yaa wa liuun-biyã, d tara bãan a Zeova makr wɛɛngẽ pɩgsã tẽngre, d sẽn lill d meng a kiris-neb siglg hakɩkã pʋgẽ wã yĩnga.—Rut 2:12; Yɩɩl Sõamyã 5:2, 12.
8. Wãn to la a Zeova “sɩda” yaa gãong sẽn yalem la lalg sẽn kogende?
8 Tõnd tara bas-yard ne “sẽn yaa sɩda” bɩ sẽn be kɩs-sɩda. Yaa wala pĩnd wẽndẽ gãongã sẽn da yaa yalengã. Naoor wʋsgo a yaa wa kʋɩlenga, la bedr tɩ sek a na lud ned yĩngã tõre. (Yɩɩl Sõamyã 5:13) D sã n kɩs sɩd ne kogl-kãngã, yiisda rabeem buud fãa. (Sɩngre 15:1; Yɩɩl Sõamyã 84:11) Wala tõnd tẽebã, Wẽnnaam sẽn yaa sɩd soabã yaa gãong sẽn yalem n kõt koglgo, sẽn yalsd a Sʋɩtãan kʋl-fɩbã sẽn yõogd wa bugmã, la sẽn kokd bɛɛbã pɛɛmã. (Efɛɛz rãmba 6:16) A leb n yaa lalg sẽn tar pãng tɩ f tõe n solg a poorẽ n yals kãn-kãe.
‘Tõnd kõn tol n zoe rabeem ye’
9. Bõe yĩng tɩ yʋng tõe n kõ rabeem wʋsgo, la bõe yĩng tɩ tõnd pa zoet rabeem?
9 Yɩɩl gʋlsdã sẽn gũud Wẽnnaam koglgã yĩnga, a yeelame: “Fo kõn tol n zoe rabeem yʋngo, pĩim sẽn tãood wĩntoogo la bã-loangdg sẽn gõod lik pʋgẽ ne sãoong sẽn sãamd wĩnto-sʋk ye.” (Yɩɩl Sõamyã 91:5, 6) Neb wʋsg sẽn tũnugd ne lik n maand wẽngã yĩng kɩtame tɩ yʋng tõe n yɩ rabeem kãseng wakate. Tẽeb likã sẽn pid tẽngã rũndã-rũndã wã pʋgẽ, tõnd bɛɛbã nong n tũnugda ne belgr tʋʋm sẽn na yɩl n sãam tõnd tẽebã, la b yals tõnd koe-moonegã. La ‘tõnd kõn tol n zoe rabeem yʋng ye,’ bala a Zeova gũuda tõndo.—Yɩɩl Sõamyã 64:2, 3; 121:4; Ezai 60:2.
10. a) Wõnda “pĩim sẽn tãood wĩntoogã” yaa bõe, la d manesem yaa wãn to pĩim kãng taoore? b) “Bã-loangdg sẽn gõod lik pʋgẽ wã” halhaal yaa wãn-wãna, la bõe yĩng tɩ d pa zoet rẽ?
10 Wõnda ‘pĩim sẽn tãood wĩntoogã’ yaa zabr goama. (Yɩɩl Sõamyã 64:4-6; 94:20) D sã n ket n zãmsd nebã sɩdã, baa b kɩɩsd tõnd koe-moonegã vẽeneg-vẽeneg woto me b namsda b mens zaalem. Sẽn paase, tõnd pa yɛɛsd “bã-loangdg sẽn gõod lik pʋgẽ” ye. Woto yaa makr wɛɛngẽ bã-loangdg sẽn tar dũni kãngã sẽn sãam vɩɩm manesmã la tũudmã wɛɛngẽ wã, n be a Sʋɩtãan nugẽ wã. (1 Zã 5:19) Lik kãng kʋʋda nebã yam la b sũyã, n basd nebã zɩɩlem pʋgẽ tɩ b pa mi a Zeova, a raabã la a seglsã ye. (1 Tɩmote 6:4) Dũni kãng sẽn be likẽ woto wã pʋgẽ d pa zoet rabeem ye, bala d tara tẽeb vẽenem wʋsgo.—Yɩɩl Sõamyã 43:3.
11. Bõe n paamd neb nins sẽn paamd ‘sãoong wĩnto-sʋkã’?
11 “Sãoong sẽn sãamd wĩnto-sʋk” pa yɛɛsd tõnd me ye. “Wĩnto-sʋk[ã]” tõe n maka bũmb ning dũni kãngã sẽn boond tɩ vẽnegrã. Neb nins sẽn kẽed dũniyã laog nonglmã pʋgẽ wã paamda sãoong tẽebã wɛɛngẽ. (1 Tɩmote 6:20, 21) Tõnd sẽn moond Rĩungã koɛɛg ne raoodã, d pa zoet bɛ ba a yembr ye, bala ya a Zeova n kogend tõndo.—Yɩɩl Sõamyã 64:2; Yelbũna 3:25, 26.
12. Ãnd dãmb sɛɛgẽ la neb tusa ‘rʋʋgda,’ la yaa wãn-wãna?
12 Yɩɩl-gʋlsdã kẽngda taoor woto: “Baa tusr sã n lʋɩ fo sɛɛgẽ tɩ tus piig lʋɩ fo rɩtgo, bũmb kõn tol n paam foom ye. Fo na n gesa ne f nin bala n yã nin-wẽnsa tʋʋm yaoodo.” (Yɩɩl Sõamyã 91:7, 8) B sẽn pa rɩk a Zeova n maan b zĩ-lilldgã yĩng kɩtame tɩ neb wʋsg ‘lʋɩt’ n kiid tẽebã wɛɛngẽ tõnd “sɛɛgẽ.” Sɩda, “tus piig” lʋɩɩ rũndã-rũndã tẽeb Israɛllã neb “rɩtgo.” (Galat dãmba 6:16) D yaa kiris-neb sẽn zae tɩ d bee b tũud-n-taas sẽn dɩk b mens n kõ Wẽnnaamã sʋk me, d tara bãan Wẽnnaam “zĩ-soalgdg[ã]” pʋgẽ. ‘D geta nin-wẽnsa tʋʋm yaood’ bala. B kẽebda toogo, leebgã, tũudmã la zĩis a taab wɛɛngẽ.—Galat dãmba 6:7.
‘Wẽng kõn tol n seg tõnd ye’
13. Yel-be-bʋs n pa paamd tõndo, la bõe yĩnga?
13 Baa ne dũni kãngã bãan sẽn tar menengã, d ningda Wẽnnaam pipi zĩigẽ, la d tar raoodo, yɩɩl-gʋlsdã gom-kãensã yĩnga: “Zusoaba, yãmb yaa zĩ-lilldg mam yĩnga. Fo kɩtame tɩ Sẽn-ka-to yɩ laafɩ zĩiga. Wẽng kõn tol n seg foom ye, la bã-wẽng kõn kolg fo zaka ye.” (Yɩɩl Sõamyã 91:9, 10) N-ye, a Zeova yaa tõnd zĩ-lilldga. Baasg zãnga, tõnd me segd n maaname tɩ Sẽn-ka-to yɩ ‘d laafɩ zĩiga,’ tɩ yaa be la d paamd koglgo. D pẽgda a Zeova a sẽn yaa Ãndũniyã Naab sẽn-ka-to wã, n get-a wa ‘d laafɩ zĩiga,’ wa a Soab ning sẽn kõt-a tõnd bãana, la d moond a Rĩungã koe-noogo. (Matɩe 24:14) Woto yĩnga, wẽng nins b sẽn bilg tɩ loog yɩɩn-kãngã pʋgẽ wã ba a ye ‘kõn tol n seg tõnd ye.’ Baa tood wala tẽn-digimdgu, seb-bɛda, sa-bɛda, komã, la zabã sã n naag tõnd ne neb a taabã n namsdẽ, bõn-kãensã pa sãamd tõnd tẽebã bɩ d tẽeb bãanã ye.
14. D sẽn ya a Zeova sõgen dãmbã, bõe yĩng tɩ to-kʋʋdsã pa bẽegd tõndo?
14 Kiris-neb nins sẽn zaeyã yaa wa sãamb sẽn vɩ fu-rot pʋsẽ, n welg toor ne zãmaan-kãngã. (1 Pɩɛɛr 2:11) ‘Bã-wẽng kõn kolg bãmb zaka meng ye.’ Tõnd saagdame n na n vɩɩmd saasẽ tɩ yaa tẽng zug me, d pa dũni kãngã rẽnd ye, la tẽeb to-kʋʋdsã pa bẽegd tõnd ye. Wala makre, yoobã, laogã nonglem, ziri tũudmã, la ‘we-rũngã’ ne a “wẽnegã” sẽn yaa Tẽn-tẽns sẽn Lagem taabã (O.N.U.).—Wilgri 9:20, 21; 13:1-18; Zã 17:16.
15. Zĩ-bʋs wɛɛngẽ la d paamd malɛgsã sõngre?
15 Sẽn tɩ loe ne koglg ning d sẽn paamdã, yɩɩl-gʋlsdã paasdame: “[A Zeova] kõta b malɛk rãmba noor tɩ b gũ foom f soaya fãa zutu. Bãmb na n tebenda foom b nusĩ tɩ f naoora da wa lak kugr ye.” (Yɩɩl Sõamyã 91:11, 12) B kõo malɛgsã tõog tɩ b kogl tõndo. (2 Rĩm dãmba 6:17; Yɩɩl Sõamyã 34:8-10; 104:4; Matɩe 26:53; Luk 1:19) B gũuda tõnd ‘d soaya fãa zutu.’ (Matɩe 18:10) Tõnd sẽn yaa Rĩungã koe-moondbã, d paamda malɛk rãmbã sor-wilgr la b gũubu, la d pa lakd n lʋɩ tẽebã wɛɛngẽ ye. (Wilgri 14:6, 7) Baa ‘kug’ wala noy b sẽn yiis sẽn gɩdgd tõnd koɛɛgã mooneg pa kɩt tɩ tõnd lʋɩ n kong Wẽnnaam lohorem ye.
16. Wãn to la “gɩgem-poll” zabr yaa toor ne “ruruug” rẽnda, la tõnd manesem yaa wãn to zab-kãng taoore?
16 Yɩɩl gʋlsdã kẽngda taoor woto: “Fo na n taba gɩgemd ne ruruugu, fo na n taba [gɩgem-poll ne wag-kẽenfo, NW ].” (Yɩɩl Sõamyã 91:13) Wa gɩgem-poll sẽn pigd bũmb vẽenegã, tõnd bɛɛb kẽer kɩɩsda tõnd vẽenega, n yiisd noy n dat tɩ d moonegã yalsã. La kɩɩsg vẽeneg-vẽenegã toor sẽn ka be, bɛɛbã zaba ne tõnd ne lingr tɩ wõnd ruruug sẽn yi a solgr zĩigẽ n na n pig neda. Wakat ninga tũudmã taoor dãmb gãandeda tẽng n tũnugd ne noy-lugendba, bʋ-kaoodb la neb a taab n zabd ne tõndo. La ne a Zeova teelgo, d tũnugda ne laafɩ manesem n baood yolsg bʋ-kaoodbã taoore, tɩ woto bɩ d ‘teend koe-noogã la d wilgd laloa wã taoor t’a zemsame.’—Filip rãmba 1:7, NW; Yɩɩl Sõamyã 94:14, 20-22.
17. Wãn to la tõnd tabd ‘gɩgem-pollã’?
17 Yɩɩl-gʋlsdã gomda ‘gɩgem-poll ne wag-kẽenf tabr’ yelle. Gɩgem-poll sẽn tar get yaa we-rũng sẽn tõe n yɩ toaag wʋsgo, tɩ wag-kẽenf tõe n yɩ parwẽnde. (Ezai 31:4, NW ) Baa gɩgem-poll ne get sẽn sõs n yaa toaag to-to fãa, a sã n wa zabd ne tõnd vẽenega, makr wɛɛngẽ tõnd tabd-a lame, d sẽn sakd Wẽnnaam la pa ninsaalbã bɩ b sigls sẽn wõnd gɩgmã. (Tʋʋma 5:29) Woto, ‘gɩgemd’ sẽn kõt rabeemã pa maand tõnd baa fʋɩ tẽebã wɛɛngẽ ye.
18. “Wag-kẽenf[ã]” tẽegda tõnd ãnd yelle, la bõe la d segd n maane, a sã n wa zabd ne tõndo?
18 Gerɛk Sɛptãntã pʋgẽ, b boonda “wag-kẽenf” tɩ “dragõ.” Woto sɩd tẽegda tõnd “dragõ kãsenga sẽn yaa wag-kʋdre sẽn boond tɩ diable la Sʋɩtãana” yelle. (Wilgri 12:7-9; Sɩngre 3:15) A yaa wala waaf sẽn yaa parwẽnd sẽn tõe n sãrg rũng n kʋ n volã. (Zeremi 51:34) A Sʋɩtãan sã n makd n dat n bẽd tõndo, n sẽbg-d ne dũni kãngã yɛlã n vol-do, bɩ d fʋsg d meng n tab “wag-kẽenf” kãnga. (1 Pɩɛɛr 5:8) Kellã sẽn zaeyã segd n maana woto, b sã n dat n naag n pids Rom dãmba 16:20 wã.
Tõnd fãagrã yita a Zeova nengẽ
19. Bõe yĩng tɩ tõnd rɩkd a Zeova n maand d zĩ-lilldga?
19 Yɩɩl-gʋlsdã bilgda Wẽnnaam sẽn gomd wẽn-tũud hakɩkã wɛɛngẽ woto: “Mam na n fãaga yẽnda; tɩ bõe, yẽ nonga maam. Mam na n zẽka yẽnda; tɩ bõe, yẽ mii mam yʋʋre.” (Yɩɩl Sõamyã 91:14) Gomd ning sẽn yaa “mam na n zẽka yẽnda” wã rat n yeela sɩd-sɩd tɩ “mam na n zẽk-a-la yĩngri,” sẽn dat n yeel tɩ zĩig ning b sẽn pa tõe n paam-a. Tõnd sẽn ya a Zeova sõgen dãmbã, d rɩka yẽ n maan d zĩ-lilldga, sẽn yɩɩd fãa ‘tõnd sẽn nong yẽ wã’ yĩnga. (Mark 12:29, 30; 1 Zã 4:19) Wẽnnaam me ‘fãagda tõnd’ d bɛɛbã nusẽ. B kõn tol n tõog n menems tõnd tẽngã zug ye. Sẽn yaa lebende, d na n paama fãagre, bala d mii Wẽnnaam yʋʋrã la d kot ne-a ne tẽebo. (Rom dãmba 10:11-13) La d rɩka sard kãn-kãe n na n ‘kẽn a Zeova yʋʋrã yĩng wakat fãa yĩnga.’—Miise 4:5, NW; Ezai 43:10-12, NW.
20. Yɩɩl Sõamyã 91 wã baasgẽ, yaa bõe la a Zeova kãab a sõgen sẽn tar kɩs-sɩdã?
20 Yɩɩl 91 soaba baasgẽ, a Zeova yeta a sõgen dãmb sẽn tar kɩs-sɩdã woto: “Yẽ na n boola maam la mam na n leoka yẽnda. Mam na n zĩnda ne yẽnda toog pʋgẽ. Mam na n fãaga yẽnda la m waoog-a. Mam na n tɩgsa yẽnda yõ-woko n kɩt t’a yã mam fãagre.” (Yɩɩl Sõamyã 91:15, 16) Tõnd sã n pʋʋsa Wẽnnaam n maan-a kosg tɩ zems ne a raabã, a reegda d pʋʋsgã. (1 Zã 5:13-15) Tõnd zoe n paama toog wʋsgo, kisgr ning a Sʋɩtãan sẽn kɩt tɩ b tall ne tõndã yĩnga. La gomd ning sẽn yet tɩ “Mam na n zĩnda ne yẽnda toog pʋgẽ” wã segenda tõnd beoog daar yel-tood yĩnga, la a kõt tõnd bas-m-yam tɩ Wẽnnaam na n teela tõndo, b sã n wa na n sãam zãmaan-wẽng kãngã.
21. Wãn to la sẽn zae-bã zoe n paam ziiri?
21 Baa ne a Sʋɩtãan kɩɩs-toaagã, sẽn zae-b nins sẽn ket ne tõndã fãa na n paama ziir saasẽ wakat ning a Zeova sẽn yãkã, b tẽng zug ‘yõ-wokã’ saab poore. La Wẽnnaam fãag-kãsemsã zoe n waa ne tẽeb ziir n kõ sẽn zae-bã. La ad sɩd yaa waoogr ne-ba, b sẽn segd n lʋɩ taoor n yɩ a Zeova Kaset rãmb tẽngã zug yaoolem day kãensã wã! (Ezai 43:10-12) A Zeova sẽn na n fãag a nin-buiidã ne fãag-kãseng ning sẽn yɩɩd fãa wã na n zĩnda a zab-kãsengã sasa Armagedõ, a sã n wa na n wilg a naam sẽn-ka-to wã zemsg la a pek a yʋ-sõngã.—Yɩɩl Sõamyã 83:18, NW; Ezekɩɛll 38:23; Wilgri 16:14, 16.
22. Ãnd dãmb la ‘a Zeova na n kɩt tɩ b yã fãagre’?
22 Tõnd yaa kiris-neb sẽn zae tɩ d yaa b tũud-n-taas sẽn dɩk b mens n kõ Wẽnnaamã me, d teega Wẽnnaam t’a fãag-do. “Zusoaba ra-kãseng sẽn tar dabeema” sasa, neb nins sẽn balemd Wẽnnaam ne kɩs-sɩdã na n paama fãagre. (Zoɛll 3:3-5) Tõnd sʋkã neb nins sẽn na n yɩ ‘kʋʋng kãsengã’ neb sẽn na n põs n kẽ Wẽnnaam dũni paalgã pʋgẽ wã, la sẽn na n kell n tall kɩs-sɩd yaoolem makrã wakatã na n ‘paama yõ-woko,’ sẽn yaa vɩɩm sẽn ka saabã. A na n vʋʋga neb wʋsg me. (Wilgri 7:9; 20:7-15) Sɩda, yaa ne sũ-noog wʋsg la a Zeova ‘na n kɩt tɩ d yã fãagr’ ne a Zezi Kirist maasem. (Yɩɩl Sõamyã 3:9) Saag-kãseng kãngã sẽn be tõnd taoorã yĩngã, bɩ d ket n baood Wẽnnaam sõngr sẽn na yɩl n bãng n sõd tõnd dasmã tɩ ning-a ziiri. Bɩ d ket n wilgdẽ t’a Zeova yaa tõnd zĩ-lilldg ne d no-goam la d tʋʋma.
[Tẽngr note]
^ sull 2 Kiris-neb Gerɛk Gʋlsg Sõamyã gʋlsdb pa gom Yɩɩl Sõamyã 91 soabã yell n tɩ loe-a ne bãngr-goam Mesi wã wɛɛngẽ ye. La d miime t’a Zeova ra yaa zĩ-lilldg la pãng zĩig n kõ a Zezi Kirist a sẽn da yaa ninsaalã sasa. A yaa woto me ne a Zezi karen-biis sẽn zaeyã la b tũud-n-taasã sull sẽn dɩk b mens n kõ-a ‘sɛɛbã wakat’ kãngã wã.—Daniɛll 12:4.
Wãn to la y na n leokẽ?
• “Sẽn-ka-to zĩ-soalgdga” yaa bõe?
• Bõe yĩng tɩ d pa zoet rabeem?
• Wãn to la ‘wẽng pa tond n seg tõndo’?
• Bõe yĩng tɩ d tõe n yeel tɩ tõnd fãagrã yita a Zeova nengẽ?
[Zãmsgã sogsgã]
[Foto, seb-neng 15]
Yãmb mii a Zeova sẽn yaa sɩd soabã sẽn yaa gãong sẽn yalem n kõ tõnd to-to bɩ?
[Foto rãmba, seb-neng 16]
A Zeova sõngda a sõgen dãmbã tɩ b moon koɛɛgã, baa ne bɛɛbã zab-lingdim la b kɩɩsg vẽeneg-vẽenegã fãa
[Fotã soaadbã]
Ruruugã: A. N. Jagannatha Rao, Trustee, Madras Snake Park Trust ▼