Karemdbã sʋgsgo

Noor ning Wẽnnaam sẽn kõ Zeremi 7:16 pʋgẽ wã rat n yeelame tɩ ned sẽn pa tek yam n kos sugr tɩ b yiis-a kiris-neb tigingã pʋgẽ, kiris-ned pa segd n pʋʋs Wẽnnaam a yĩng bɩ?

A sẽn togs a bʋ-kaoorã Zida sẽn yaa kɩɩsdã zugã poore, a Zeova yeela a Zeremi: “Zeremi, ra pʋʋs maam nin-kãens yĩng ye. Ra yãb n kos maam b yĩng ye. Bala, mam ka na n kelg ye.”—Zeremi 7:16.

Bõe yĩng t’a Zeova yeel a Zeremi t’a ra pʋʋs Israɛll nebã yĩnga? Vẽenega, yaa b sẽn da kɩɩsd a Tõogã tɩ loog noorã yĩnga. Ad b sẽn da maand bũmb ning vẽeneg n pa zoet yãndã: “Yãmb zuudame. Yãmb kʋʋdame. Yãmb yoodame. Yãmb maanda ziri kaseto. Yãmb maanda maand n kõt Baal la y waoogd bu-zẽms wẽnnaam dãmb yãmb sẽn ka mi.” Woto yĩnga, a Zeova yeela Zʋɩf rãmb nins sẽn da ka tẽebã woto: “Mam na n diga yãmb tɩ y yi mam nengẽ wa m sẽn da rig Efraim buuda sẽn yaa y saam-biisã.” Sɩd-sɩda, ra na n yɩɩ bũmb sẽn pa zems ne a Zeremi bɩ ne ned buud fãa t’a pʋʋs a Zeova t’a toeem A bʋ-kaoorã.—Zeremi 7:9, 15.

Woto me, tʋm-tʋmd a Zã gʋlsame n wilg Wẽnnaam pʋʋsg sẽn zems sẽn ya a soaba. Pipi, a kõo kiris-nebã bas-m-yam woto: “Tõnd sã n kos bũmb sẽn zems bãmb daabo, b kelgda tõndo.” (1 Zã 5:14) Woto, pʋʋs neb a taabã yĩngã wɛɛngẽ, a Zã kẽngda taoor woto: “Ned sã n yã t’a ba-biig maand yel-wẽna sẽn ka [wat ne, NW ] kũum, bɩ a kos Wẽnnaam, la Wẽnnaam na kõ a ba-biiga vɩɩm, bãmb na kõ neb nins sẽn maand yel-wẽna sẽn ka yɩt kũuma vɩɩm. Yel-wẽn beeme sẽn yɩt kũum, mam ka yet tɩ y pʋʋs Wẽnnaam yel-wẽn kãng yĩng ye.” (1 Zã 5:16) A Zezi leb n goma yel-wẽnd ‘sẽn kõn paam sugr’ yelle, sẽn yaa yel-wẽnd b sẽn maan n beeg vʋʋsem sõngã.—Matɩe 12:31, 32.

 Woto rat n yeelame tɩ neb nins fãa b sẽn yiis kiris-neb tigingã pʋgẽ, yel-wẽnd b sẽn maan n pa tek yam n kos sugr yĩngã maana yel-wẽn “sẽn yɩt kũum,” tɩ b pa segd n pʋʋs b yĩng bɩ? Pa tɩlae tɩ yɩ woto ye, bala yɛl wʋsg sẽn yɩɩd pʋsẽ, beegr a woto pa yel-wẽn sẽn wat ne kũum ye. Sɩda, yaa toog tɩ d bãng sã n yaa yel-wẽn sẽn wat ne kũum. Makr sẽn wilgd rẽ yaa Zida rĩm a Manase. A mee tẽn-kug ziri wẽnnaam dãmb yĩnga, n dɩk a meng komdibli n maan maando, n sao tɩɩm la a ning wẽn-naands a Zeova roogã pʋgẽ. Sɩda, Biiblã yetame t’a Manase ne nin-buiidã maana “wẽng n yɩɩd buud nins Zusoaba sẽn da kɩt tɩ Israɛll neba kʋ wã.” Woto fãa yĩngã, a Zeova sɩbga a Manase n kɩt tɩ b sẽb-a wa yamb n tall n kẽng Babilon.—2 Rĩm dãmba 21:1-9; 2 Kɩbaya 33:1-11.

Baa ne a Manase yel-wẽnã sẽn da yaa kãsems wʋsgã yaa yel-wẽn nins buud sẽn wat ne kũumã bɩ? Yaa ayo, bala kɩbarã kẽngda taoor n yet yẽ wɛɛngẽ: “La a tooga pʋgẽ, a kosa Zusoaba sõngre n sik a meng wʋsg a yaab rãmba Wẽnnaam taoore. Yẽ pʋʋsa bãmba, la Wẽnnaam leoka a pʋʋsgã la b kelg a kosgã n lebs-a Zerizalɛm a soolma pʋgẽ. La woto, a Manase bãngame tɩ yaa Zusoaba bal n yaa Wẽnnaam.”—2 Kɩbaya 33:12, 13.

Woto yĩnga, d pa segd n yãg n yeel tɩ ned tara taal ne yel-wẽnd sẽn wat ne kũum, b sẽn yiis a soabã tigingã pʋgẽ wã yĩng bal ye. Tõe n kaoosame tɩ nedã sũur halhaal wa lebg vẽenega. Sɩda, b nong n yetame tɩ yiisgã bõn-datl a yembr yaa sẽn na yɩl n tus yel-wẽn-maandã t’a yamã wa, t’a tek yam n kos sugr n toeeme.

Sẽn mik tɩ nedã ye pa be tigingã pʋgẽ wã yĩnga, toeeng buud fãa a soabã sẽn maand a sũurã la a manesmã pʋgẽ yaa neb nins sẽn pẽ ne-a wã n tõe n deng n yã rẽ. Nin-kãens tõe n ya a kẽed-n-taaga bɩ a zakã neba. Neb nins sẽn ne toeen-kãensa wã tõe n wa tagsame tɩ beegdã pa maan yel-wẽnd ning sẽn wat ne kũumã ye. B tõe n wa ratame n pʋʋs t’a paam pãng sẽn yit Wẽnnaam Gomdã vʋʋsem sõng sẽn vẽneg tɩ b gʋlsã pʋgẽ, la t’a Zeova maan sẽn zems ne a raab yel-wẽn-maandã wɛɛngẽ.—Yɩɩl Sõamyã 44:22; Koɛɛg Soaba 12:14.

Neb kẽer sẽn be zĩig ningã kɩtame tɩ b tõe n yã kaset sẽn sek n na n tags tɩ yel-wẽn-maandã teka yam n kos sugri, la tõeeme n pa woto ne tigingã neb wʋsg ye. B sã n wʋm ned sẽn pʋʋsd zãma sʋk ned b sẽn yiis yĩnga, na n yɩɩ lingr ne-ba, bɩ bũmb sẽn na n kẽes-b yam-yuusg pʋgẽ, bɩ sẽn na n kɩt tɩ b lak tẽebã wɛɛngẽ menga. Woto yĩnga, neb nins sẽn tagsd tɩ b tõe n pʋʋsa yel-wẽn-maandã yĩnga, b segd n maana rẽ bãmb b yembr pʋʋsg sasa bala, n bas yellã sẽn ketã tigingã kãsem dãmbã nugẽ.

[Foto, seb-neng 30]

A Manase paama a yel-wẽnã sẽn sɩd yɩ kãsemsã sugri, a sẽn sik a meng a Zeova taoorã yĩnga

[Seb-neng 29 fotã sẽn yitẽ]

B yiis-a-la Illustrirte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s pʋgẽ