Toeem-y y sũurã sẽn na yɩl n zoe a Zeova
Toeem-y y sũurã sẽn na yɩl n zoe a Zeova
“B sã n da sakẽ bal n toeem b sũyã sẽn na yɩl n zoe maam la sẽn na yɩl n tũ mam noyã wakat fãa.”—TÕODO 5:29, NW.
1. Bõe yĩng tɩ d tõe n kɩs sɩd tɩ daar n wat tɩ nebã na n paam b mens ne rabeemã?
RABEEMÃ namsa ãdem-biisã sẽn na maan yʋʋm kob-gĩna. Kom, bãase, bi-beer bɩ zabr dabeem ninga neb milyõ rãmb yɩɩr pʋgẽ wakat fãa. Woto wã yĩnga, Ninsaal dʋrwa rãmbã gãnegr (Déclaration universelle des droits de l’homme) sɩngr goam wilgdame tɩ b tʋllame tɩ dũniyã lebg zĩig ãdem-biisã fãa sẽn na n “paam b mens ne rabeemã.” * Zu-noogo, Wẽnnaam mengã kõta tõnd bas-m-yam tɩ dũni a woto na n waame, baa ne sẽn pa na n tũ ne ninsaal modgrã. Ne a no-rɛɛs a Mise tũnugri, a Zeova kãabda tõnd t’a dũni paalgã sẽn yaa tɩrgã pʋgẽ ‘ned ka na n yɛɛs a nin-buiidã ye.’—Miise 4:4.
2. a) Wãn to la Gʋlsg Sõamyã sagend tõnd tɩ d zoe Wẽnnaam? b) Sʋgs-bʋs n tõe n wa, d sã n vaeesd Wẽnnaam zoeesã sẽn yaa tɩlae ne-dã?
2 La rabeem me tõe n yɩɩ sõma. Gʋlsg Sõamyã pʋgẽ, b sagenda Wẽnnaam sõgen dãmbã n yɩlemdẽ tɩ b zoe a Zeova. A Moiiz yeela Israɛll nebã: “Bɩ y zoe Zusoab a Wẽnnaam n sak bãmb bala.” (Tõodo 6:13) Yʋʋm kob-gĩn poore, a Salomo gʋlsame: “Zoe Wẽnnaam la f sak bãmb tõodo. Tɩ bõe, ninsaal fãa tog n maana woto.” (Koɛɛg Soaba 12:13) Ne malɛgsã sẽn wilgd tõnd sor tɩ d moond koe-noogã maasem, tõnd me sagenda nebã fãa tɩ b ‘zoe Wẽnnaam la b waoog bãmba.’ (Wilgri 14:6, 7) A Zeova zoeesã toor sẽn ka be, kiris-nebã segdame n nong-a ne b sũur fãa. (Matɩe 22:37, 38) Wãn to la d tõe n nong Wẽnnaam la d zoet-a me? Bõe yĩng tɩ d segd n zoe Wẽnnaam sẽn tar nonglem? D sã n bɩɩs wẽn-zoeere bõe nafa la d paamda? Sẽn na yɩl n leok sʋgs-kãensã, d segd n deng n bãnga Wẽnnaam zoees sẽn dat n yɛɛlga, la zoe-kãng buudã sẽn tar yõod wʋsg to-to tõnd zems-n-taarã ne a Zeova wã pʋgẽ.
Naneb kãsenga, waoogr wʋsg la zoeese
3. Wẽnnaam zoees rat n yeelame tɩ bõe?
3 Kiris-nebã segdame n zoe Wẽnnaam sẽn yaa b Naandã. Zoees kãng võor a yembr yaa “naneb kãseng la waoogr kãseng ne Naandã, la zoees sẽn yaa sõma f sẽn tar n pa rat n sãam a sũur ye.” Woto, Wẽnnaam zoees tara pãng zĩis a yiib tõnd vɩɩmã pʋgẽ: tõnd manesmã ne Wẽnnaam la tõnd manesmã ne tʋʋm nins a sẽn kisã. Vẽenega, bõn-kãensã b yiibã tara yõod wʋsgo, la zemsame tɩ tõnd vaees-b neere. Wala sebr a yembr (Vine’s Expository Dictionary of New Testament Words) sẽn wilgdã, sã n yaa ne kiris-nebã, zoe-kãng sẽn naag ne waoogrã ‘yaa bũmb sẽn tusd-b tɩ b maan yɛl b vɩɩmã pʋgẽ, b tẽebã yɛl la b vɩɩm manesmã yɛl wɛɛngẽ.’
4. Wãn to la d tõe n tall naneb la waoogr wʋsg ne d Naandã?
4 Wãn to la d tõe n bɩɩs naneb kãseng la waoogr wʋsg ne d Naandã? D tara rabeem sẽn naag ne naneb sẽn yaa kãsenga, d sã n ne zĩ-neere, koom sẽn zoet n sigd geemdẽ bɩ wĩndg lʋɩɩs sẽn be rasãndã. Naneb kãng pãng paasdame, d sã n tõog ne d tẽebã nini, n yã tɩ yaa Wẽnnaam la bõn-kãensã naanda. Sẽn paase, wala rĩm a Davɩɩde, tõnd neeme tɩ d pa baa fʋɩ a Zeova naanegã sẽn yaa yel-solemd wʋsgã taoor ye. “Mam sẽn get saasẽ sẽn yaa yãmb nus tʋʋmda ne kiuuga la ãdsa yãmb sẽn ning b zĩigẽ wã, ninsaal yaa bõe tɩ yãmb tẽr a yelle?” (Yɩɩl Sõamyã 8:4, 5) Naneb kãseng kãng wata ne waoogr sẽn yaa kãsenga, tɩ rẽ tusd tõnd tɩ d pʋʋs a Zeova bark la d pẽg-a, a sẽn maand bũmb nins fãa n kõt tõndã yĩnga. A Davɩɩd leb n gʋlsa woto: “Mam pʋʋsda yãmb bark bõn-kãsems a woto yĩnga. Mam wẽnda bõn-bãnde, [yaa yel-solemde], yãmb tʋʋma yaa bõn-bãna.”—Yɩɩl Sõamyã 139:14.
5. Bõe yĩng tɩ d segd n zoe a Zeova, la mak-sõng bʋg la d tar rẽ wɛɛngẽ?
5 Naneb sẽn yaa kãseng la waoogr wʋsg wata ne zoees sẽn yaa sõma la sẽn naag ne waoogr Wẽnnaam sẽn yaa Naandã pãngã, la a sẽn yaa ãndũniyã Naabã yĩnga. Tʋm-tʋmd a Zã yãab pʋgẽ, ‘neb nins sẽn tõog we-rũngã la a makrã,’ sẽn dat n yeel tɩ Kirist karen-biis nins sẽn zae ne vʋʋsem sõngã sẽn be b saasẽ yasrã zĩigẽ wã, moondame: “Zusoaba Wẽnnaam Sẽn-tõe-fãa wã, yãmb tʋʋma yaa kãsemse, la b seka yɛɛsgo. Buud fãa Rĩma, yãmb sẽn maanda fãa yaa tɩrga la sɩda. Zusoaba, ãnda n ka na n zoe yãmba la a waoog yãmb yʋʋre?” (Wilgri 15:2-4) Wẽnnaam zoees b sẽn paamde, b sẽn tar waoogr sẽn yaa kãseng ne a ziirã yĩnga, tusda nin-kãensã sẽn dɩt naam ne Kirist saasẽ Rĩungã pʋgẽ wã tɩ b waoogd Wẽnnaam n get-a wa zu-sobend sẽn yɩɩd fãa wã yẽgre. D sã n ges bũmb nins fãa a Zeova sẽn pidsi, la a sẽn dɩt naam ãndũniyã zug ne tɩrlem ningã, d pa tar bʋʋm n paas n na n zoe-a sɩda?—Yɩɩl Sõamyã 2:11; Zeremi 10:7.
6. Bõe yĩng tɩ d segd n zoe n da maan bũmb sẽn sãamd a Zeova sũuri?
6 Baasg zãnga, naneb sẽn yaa kãsengã la waoogr wʋsgã toor sẽn ka be, Wẽnnaam zoeesã me rat n yeelame tɩ d segd n zoeeme n da maan bũmb sẽn sãamd Wẽnnaam sũuri, bɩ n kɩɩs-a ye. Bõe yĩnga? Bala baa ne a Zeova ‘sũur sẽn ka yikd tao-tao, la a tar nonglem wʋsgã,’ d segd n tẽegame t’a ‘na n kɩtame tɩ yel-wẽna sɩbgr zĩndi.’ (Yikri 34:6, 7) Baa ne a Zeova sẽn tar nonglem la nimbãan-zoeerã, a pa sakd yel-kɛg la beegr ne yamleoog ye. (Yɩɩl Sõamyã 5:5, 6; Habakuk 1:13) Neb nins sẽn maand wẽng ne yamleoog a Zeova nifẽ la b pa tekd yam n kos sugri, la b kɩɩsd-a wã pa tõe n põs sɩbgr ye. Wa tʋm-tʋmd a Poll sẽn wilgã, “a seka rabeem kãsenga tɩ lʋɩ Wẽnnaam sẽn vɩya nugẽ.” D sã n zoet n pa rat n kẽ yell a woto buud pʋgẽ, wat n baas n yɩɩ koglg ne-do.—Hebre dãmba 10:31.
‘Yaa yẽ la tõnd sũurã segd n gãde’
7. Bõe ne bõe yĩng la d sẽn segd n tall bas-yard ne a Zeova pãngã sẽn fãagdã?
7 Wẽnnaam zoees sẽn naag ne waoogr kãseng la d sẽn mi t’a tara pãn-kãseng sẽn wat ne naneb wʋsgã yaa yɛl sẽn kɩt tɩ d segd n teeg a Zeova la d tall bas-yard ne-a. Wa biig sẽn tar bãan a ba sɛɛgẽ wã, tõnd me tara bãan la bas-yard a Zeova sor-wilgrã pʋgẽ. Ges-y Israɛll nebã manesem sẽn yɩ to-to, a Zeova sẽn tall-b n yiis Eziptã poore: “La Israɛll neba yãa pãng kãseng ninga Zusoaba sẽn maan Ezipt rãmbã. La neba zoee Zusoabã, la bãmb tẽe Zusoaba ne b tʋm-tʋmd a Moiiz.” (Yikri 14:31) A Elize sẽn vɩɩmd bũmb ningã me kõta kaset tɩ “Zusoaba malɛk rãmb gũbgda neb nins sẽn zoet bãmbã n fãagd bãmba.” (Yɩɩl Sõamyã 34:8; 2 Rĩm dãmba 6:15-17) Rũndã-rũndã, yɛl nins sẽn zĩnd a Zeova nin-buiidã sʋkã la tõnd mengã sẽn yã yɛl ninsã sɩd wilgdame tɩ Wẽnnaam tʋmda ne a pãngã n sõngd neb nins sẽn balemd-a wã. (2 Kɩbaya 16:9) Woto, d bãngame masã tɩ “sẽn zoeta Zusoaba . . . ka yɛɛsd bũmb ye.”—Yelbũna 14:26.
8. a) Bõe yĩng tɩ Wẽnnaam zoees tusd tõnd tɩ d kẽn a soayã pʋsẽ? b) Wilg-y tõnd sẽn segd n “gãd” a Zeova to-to.
8 Tõnd sã n tar Wẽnnaam zoees sẽn yaa zoe-sõngã buudu, na n kɩtame tɩ d rell-a la d tall bas-yard ne-a yembo, la na n leb n tusa tõnd tɩ d kẽn a soayã pʋsẽ. A Salomo sẽn wa n pak wẽn-doogã, a pʋʋsa a Zeova woto: “Woto, [Israɛll] na n zoee yãmb n sak bũmb nins yãmb sẽn data wakat fãa bãmb sẽn be tẽng ninga yãmb sẽn kõ tõnd yaab rãmba pʋgẽ.” (2 Kɩbaya 6:31) A Moiiz ra reng n sagla Israɛll nebã tɩ: “Bɩ y tũ Zusoab a Wẽnnaam la y zoe bãmba. Sak-y bãmb tõodã n kelg b koɛɛgã la y waoog bãmba n gãd b kãn-kãe.” (Tõodo 13:5) Wa verse kãensã sẽn wilg vẽenegã, yaa tõnd sẽn teegd Wẽnnaam la d tar bas-yard ne-a wã n kɩt tɩ d tʋll n kẽn a Zeova soayã pʋsẽ la d ‘gãd-a’ wã. N-ye, wẽn-zoeer sõngda tõnd tɩ d sak a Zeova, tɩ d balm-a, la d gãd-a, wa biig sẽn sɩd gãt a ba a sẽn teeg la a tar bas-yard zãng-zãnga.—Yɩɩl Sõamyã 63:9; Ezai 41:13.
Nong Wẽnnaam rat n yeelame tɩ d zoe-a
9. Bõe loees n be Wẽnnaam nonglem la Wẽnnaam zoees sʋka?
9 Sã n yaa ne Gʋlsg Sõamyã, zoe Wẽnnaam pa rat n yeel tɩ d pa tõe n nong-a ye. Sẽn yaa lebende, b kõo Israɛll nebã noor tɩ b ‘zoe Zusoaba la b tũ bãmb sore la b nong bãmba.’ (Tõodo 10:12) Woto, Wẽnnaam zoees tɩ loee ne Wẽnnaam nonglem sõma-sõma. Wẽnnaam zoees tusda tõnd tɩ d kẽn a soayã pʋsẽ, la rẽ me kõta kaset tɩ tõnd nong-a lame. (1 Zã 5:3) Rẽ yaa bũmb sẽn zemse, bala, d sã n nong neda, d zoeta d na n wa sãam a sũuri. Israɛll nebã sãama a Zeova sũuri, b sẽn yɩ tõatb rasempʋɩɩgẽ wã. Sɩd-sɩda, d pa rat n maan bũmb tɩ wa ne sũ-sãoong woto n kõ d saasẽ Ba wã ye. (Yɩɩl Sõamyã 78:40, 41) Sẽn yaa lebende, ‘Zusoaba zoɛtbã sẽn tat bãmb yama’ yĩnga, tõnd sakrã la d kɩs-sɩdã ne-a wã noogda a sũuri. (Yɩɩl Sõamyã 147:11; Yelbũna 27:11) Nonglem Wẽnnaam yĩng tusda tõnd tɩ d maan sẽn noom-a, la Wẽnnaam zoeesã kɩtdame tɩ d pa rat n sãam a sũur ye. Nong Wẽnnaam la zoe-a wã pa manesem sẽn kɩɩsd taab ye, la b lokda taaba.
10. Wãn to la a Zezi wilg tɩ ra yaa ne yamleoog la a zoet a Zeova?
10 Vẽenega, a Zezi Kirist vɩɩmã wilgda d sẽn tõe n zoe Wẽnnaam la d nong-a me to-to. No-rɛɛs a Ezai gʋlsa woto a Zezi wɛɛngẽ: “Zusoaba sɩɩga na n paa bãmb zugu, yaa yam ne yẽesem sɩɩga la saglg ne pãng sɩɩga la bãngre la Zusoaba zoees sɩɩga. Bãmb na n maana sũ-noog Zusoaba zoees yĩnga.” (Ezai 11:2, 3) Sã n yaa ne bãngr-gom-kãngã, Wẽnnaam vʋʋsem sõngã tusa a Zezi t’a zoe a saasẽ Ba wã. Sẽn paase, d neeme tɩ zoe-kãngã ra zãr ne a yɩ zɩɩb ne a Zezi, a ra kõt-a-la sũ-noogo. A Zezi sũur da nooma ne Wẽnnaam daabã maanego, la a sũur noogre, baa yel-tood sẽn pa tõe n bãng n bilgã pʋsẽ. A sẽn da mi tɩ b na n ka-a-la namsg ra-lukã zugu a yeela a Zeova woto: “Ka sẽn zems mam daab ye, la sẽn zems yãmb daabo.” (Matɩe 26:39) A Zeova kelga a Biriblã bõosg n kõ-a pãnga, n fãag-a ne kũum, a sẽn tall wẽn-zoeer woto wã yĩnga.—Hebre dãmba 5:7.
D zãms a Zeova zoeese
11, 12. a) Bõe yĩng tɩ d segd n zoe Wẽnnaam? b) Wãn to la a Zezi zãms tõnd tɩ d zoe a Zeova?
11 Sẽn yaa lebend ne rabeem ning d sẽn tar ne pãn-kãsems la yel-yɛɛsds nins sẽn be tẽngã zugã taoorã, Wẽnnaam zoeesã pa wat nana-nana woto ye. Yaa woto yĩng n kɩt tɩ Davɩɩd Kãseng a Zezi Kirist taasd tõnd bool-kãngã bãngr-goam pʋgẽ: “Mam kamba, wa-y-yã! Kelg-y maam. La mam na zãms yãmb Zusoaba [a Zeova, NW ] zoeese.” (Yɩɩl Sõamyã 34:12) Wãn to la d tõe n paam zãmsg a Zezi nengẽ n zoe a Zeova?
12 A Zezi zãmsda tõnd tɩ d zoe a Zeova, a sẽn sõngd tõnd tɩ d bãng a saasẽ Ba wã nedemdã sẽn be yamleoog wʋsgã yĩnga. (Zã 1:18) A Zezi mengã makr wilgda Wẽnnaam sẽn tagsd to-to, la a manesem sẽn yaa to-to ne neb a taabã, bala a Zezi puka a Ba wã nedemd tɩ zems zãnga. (Zã 14:9, 10) Sẽn paase, a Zezi maoongã maasem, d tõeeme n pẽneg a Zeova, n pʋʋs n kos d yel-wẽnã sugri. Wẽnnaam nimbãan-zoeerã pukr kãseng kãngã a yen-yen wã bal yĩng seka d na zoe-a. Yɩɩll gʋlsdã gʋlsa woto: “Sugr [hakɩkã, NW ] bee yãmb nengẽ, tɩ neb tõe n zoe yãmba.”—Yɩɩl Sõamyã 130:4.
13. Yel-bʋs sẽn be Yelbũnã sebrẽ n sõngd tõnd tɩ d zoe a Zeova?
13 Yelbũna sebr wilgda yɛl toor-toor sẽn sõngd tõnd tɩ d bɩɩs wẽn-zoeere. “M biiga, fo sã n deeg mam goama, la f tẽeg bũmb ninga mam sẽn wilg fooma n kelg yam neere la f bao bãngr ne f sũur fãa, n-ye, fo sã n bao bãngr ne yam . . . , fo na n bãnga Zusoaba zoees sẽn yaa bũmb ninga, la f na n yãa b bãngra sẽn yaa to-to.” (Yelbũna 2:1-5) Woto yĩnga, sẽn na yɩl n zoe Wẽnnaam, d segd n zãmsa a Gomdã, n modg ne d sũur fãa n wʋm a zãmsgã võore, tɩ rẽ poor bɩ d tũ a saglsã neere.
14. Wãn to la d tõe n tũ saglg ning b sẽn taas Israɛll rĩm dãmbã?
14 B ra kõo pĩnd Israɛll rĩm fãa noor t’a gʋls Tõogã sɛb n ‘karemd-a daar fãa a yõor tɛka n zãms a Zeova sẽn ya a Wẽnnaamã zoeese, sẽn na yɩl n sak tõogã goama fãa.’ (Tõodo 17:18, 19) Biiblã kareng la a zãmsg tara yõod wʋsg ne tõndo, d sã n dat n zãms a Zeova zoeese. D sã n tũ Biiblã noy d vɩɩmã pʋgẽ, bilf-bilfu, d paamda yam la bãngr ning sẽn yit Wẽnnaam nengẽ wã. D wat n wʋma ‘a Zeova zoees võore,’ bala d nee bark nins rẽ sẽn wat ne tõnd vɩɩmã zugã, la d get d zems-n-taarã ne Wẽnnaamã wa bũmb sẽn tar yõod wʋsgo. Sẽn paase, d sã n tigimd taab ne d tẽed-n-taasã, kom-bɩɩs la nin-kẽemb tõe n kelga zãmsg ning Wẽnnaam sẽn kõtã, n zãms Wẽnnaam zoees la b kẽn a soayã pʋsẽ.—Tõodo 31:12.
Ned ning sẽn zoet a Zeova tara sũ-noogo
15. Wãn to la Wẽnnaam zoees tɩ loe ne baleng ning tõnd sẽn balemd-a wã?
15 D sã n ges b sẽn togs bũmb ning zugẽ wã, d neeme tɩ Wẽnnaam zoees yaa manesem sõng tõnd fãa sẽn segd n talle, bala rẽ yaa bũmb a ye sẽn yaa kãseng a Zeova balengã pʋgẽ. Woto kɩtdame tɩ tõnd teeg-a zãng-zãnga, tɩ d kẽn a soayã pʋsẽ, la d gãd-a neere. Wala sẽn yɩ to-to ne a Zezi Kiristã, Wẽnnaam zoeesã tõe n tusa tõnd me tɩ d pids d sẽn dɩk d meng n kõ wã kaool masã la wakat sẽn pa sat yĩnga.
16. Bõe yĩng t’a Zeova sagend tõnd tɩ d zoe yẽ?
16 Wẽnnaam zoees zɩ n yɩ rabeem kʋʋdg bɩ zoees sẽn weoogd ned ye. “Bark bee neb nins fãa sẽn zoet Zusoabã n kẽnd bãmb soɛya pʋsẽ wã zutu,” woto la Biiblã yet tɩ kõt tõnd bas-m-yam. (Yɩɩl Sõamyã 128:1) A Zeova sagenda tõnd tɩ d zoe yẽ, bala a miimi tɩ rẽ na n kogla tõndo. D sã n ges goam nins sẽn pʋgdã a sẽn taas a Moiizã, d neeme t’a rata tõnd neere: “[Israɛll nebã] sã n da sakẽ bal n toeem b sũyã sẽn na yɩl n zoe maam la sẽn na yɩl n tũ m noyã wakat fãa, sẽn na yɩl tɩ yɩ neer ne bãmb ne b kambã, wakat sẽn pa yãk tɛk yĩnga.”—Tõodo 5:29, NW.
17. a) Bõe nafa la d paamd Wẽnnaam zoees pʋgẽ? b) Wẽnnaam zoeesã nen-bʋs la d na n vaees sõsg ning sẽn pʋgdã pʋgẽ?
17 Woto me, tõnd sã n toeem d sũurã n zoe Wẽnnaam, na n yɩɩ neer ne-do. Wãn to-to? Pipi, manesem a woto na n taa Wẽnnaam yam, la na n pẽnega tõnd ne-a. A Davɩɩd meng sẽn vɩɩmd yɛl ninsã, a mikame tɩ “bãmb kõta b zoɛtba b sẽn dat bũmb ninga. La bãmb wʋmda bãmb kɛlenga n fãagd bãmba.” (Yɩɩl Sõamyã 145:19) Yiib-n-soaba, wẽn-zoeerã na n nafa tõndo, bala a na n toeema tõnd manesmã ne sẽn yaa wẽnga. (Yelbũna 3:7) Sõsg ning sẽn pʋgdã na n wilga zoe-kãng sẽn kogend tõnd ne yell tẽebã wɛɛngẽ to-to, la a na n lebg n tẽega tõnd kɩbay Gʋlsg Sõamyã pʋgẽ sẽn wilgd neb sẽn zoe Wẽnnaam tɩ rẽ sõng-b tɩ b zãag b mens ne wẽnga.
[Tẽngr note]
^ sull 1 O.N.U. Asãmble Zenerallã yãka Ninsaal dʋrwa rãmbã gãnegr yʋʋmd 1948, yʋʋm-sar kiuug rasem 10.
Y tõe n leoka sʋgs-kãensã bɩ?
• Wẽnnaam zoees rat n yeelame tɩ bõe, la wãn to la rẽ toeemd tõnd manesmã?
• Bõe loees n be Wẽnnaam zoees la kẽn ne Wẽnnaamã sʋka?
• Wãn to la a Zezi makrã wilgd tɩ Wẽnnaam zoees tɩ loee ne Wẽnnaam nonglem?
• Wãn to la d tõe n toeem d sũurã n zoe a Zeova?
[Zãmsgã sogsgã]
[Foto, seb-neng 22]
B ra kõo Israɛll rĩm dãmbã noor tɩ b gʋls Tõogã sebr togsend la b karm-a daar fãa
[Foto, seb-neng 23]
A Zeova zoees kɩtdame tɩ tõnd teeg-a wa biig sẽn teegd a ba
[Fotã soaadbã, seb-neng 20]
Ãdsã: Photo by Malin, © IAC/RGO 1991