A Zeova nagsda a nin-buiidã ne vẽenem
A Zeova nagsda a nin-buiidã ne vẽenem
“Yik n yãge [paga, NW ]; tɩ bõe, fo vẽenem waame, la Zusoaba ziira zẽka fo zugu.”—EZAI 60:1.
1, 2. a) Ãdem-biisã yɛl yaa wãn-wãn to? b) Ãnda rãmb n wa ne likã ãdem-biisã zutu?
“WẼND na kõ-d a Ezai rãmb la a Poll sõng rãmb buudu!” Yaa woto la Etazĩni Perzidã a Harry Truman ra yeel ne sũ-sãang yʋʋmd 1940 tɛk yʋʋm pi-gĩndã pʋgẽ. Bõe yĩng t’a yeel woto? Ya a sẽn da yã tɩ yẽ wakatẽ dũniyã ra rata taoor dãmb sẽn tar vɩɩm manesem sẽn yaa sõma wʋsgã yĩnga. Ãdem-biisã ra nan yita yʋʋm kob-gĩnd 20 soabã wakat ning sẽn tall-a sũ-sãams n yɩɩdã, sẽn yaa dũni gill zabr a yiib-n-soabã pʋgẽ. Baa zabrã sẽn da sa wã, dũniyã ra ket n ka tar bãan ye. Sũ-sãamsã ra ket n beeme. Sɩda, yʋʋm 57 la woto zab-kãng sẽn sa, la dũniyã ket n bee sũ-sãams pʋgẽ. Perzidã a Truman sã n da ket n beẽ rũndã-rũndã, yaa vẽeneg t’a ra na n ket n neeme tɩ d rata taoor dãmb sẽn tar vɩɩm manesem sẽn yaa sõma wala a Ezai la tʋm-tʋmd a Poll sẽn tallã.
2 D ka mi Perzidã Truman sã n da mii woto ye, la a Poll goma ãdem-biisã sẽn be lik ning pʋgẽ wã yelle, n keoog a sɛbã pʋsẽ tɩ b maan gũusg ne lig-kãngã. Wala makre, a Poll keooga a tẽed-n-taasã woto: ‘Tõnd zabr ka ne ninsaal sẽn yaa nemd la zɩɩmã ye, la yaa ne lik rĩm-dãmba la a pãens sẽn so naam tẽng zug ka wã, la wẽng maaneg sɩɩsã sẽn be yĩngrã.’ (Efɛɛz rãmba 6:12, Kãab-paalgã Koe-noogo) A Poll gom-kãensã wilgame t’a ra miime tɩ dũniyã bee tẽeb lik pʋgẽ, la sẽn paase, tɩ yaa zĩn dãmb sẽn tar pãnga a sẽn bool tɩ ‘rĩm dãmb sẽn so naam tẽng zugã’ n wa ne lig-kãnga. Sẽn mik tɩ yaa malɛgs sẽn tar pãng n wa ne dũniyã likã, bõe la ninsaan-zaals tõe n maan n kɩt t’a wɩlge?
3. Baa ne ãdem-biisã sẽn be lik pʋgẽ wã, a Ezai ra reng n togsame tɩ kɩs-sɩd dãmbã na n paama bõe?
3 A Ezai me goma ãdem-biisã sẽn be lik ning pʋgẽ wã yelle. (Ezai 8:22; 59:9) La Wẽnnaam vẽneg-a lame t’a reng n gom tõnd wakatã yelle, n yeel tɩ baa lik wakat kãngã sasa, a Zeova na n kɩtame tɩ neb nins sẽn nong vẽenemã paam vẽnegre. Yaa sɩd t’a Poll ne a Ezai ka be ne tõnd rũndã-rũndã ye, la d tara sɛb nins vʋʋsem sõngã sẽn vẽneg-b tɩ b gʋlsã tɩ tõe n wilg-d sore. Sẽn na yɩl n bãng neb nins sẽn nong a Zeova wã sẽn tõe n paam bark nins seb-kãens pʋsẽ, bɩ y ges a Ezai bãngr-goama sẽn be a sebrã sak 60 pʋgẽ wã.
Makr wɛɛngẽ pagã kõta vẽenem
4, 5. a) Bõe la a Zeova kõ pagã noor t’a maane, la bõe la a kãab-yã? b) Kɩba-bʋs sẽn kõt sũ-noog la Ezai sak 60 tara?
4 Yaa pag sẽn be nimbãaneg wʋsgo, sẽn vãb tẽng lik bida pʋgẽ la b taas Ezai sak 60 pipi goamã. Zĩig pʋgẽ, vẽenem n wa tɩ likã wɩlge, t’a Zeova bool pagã woto: “Yik n yãge [paga, NW ]; tɩ bõe, fo vẽenem waame, la Zusoaba ziira zẽka fo zugu.” (Ezai 60:1) Wakat ra taame masã tɩ pagã segd n yik n puk Wẽnnaam vẽenema, a ziirã. Bõe yĩnga? D paamda leokrã verse ning sẽn pʋgdã pʋgẽ, sẽn yet tɩ: “Gese, lik na n luda dũniyã, la lik sẽn yaa bida na n luda nebã. Zusoaba na n zẽka fo zugã tɩ b ziira puk fo zugu.” (Ezai 60:2) Pagã sẽn sak a Zeova noorã, yaa vẽeneg t’a na n paama barka. A Zeova yeelame: “Buud a taaba na n waa fo vẽenema pʋgẽ. La rĩm dãmb na n waa fo vẽenema yãgb yĩnga.”—Ezai 60:3.
5 Verse rãmb a tãab kãensã goam sẽn kõt sũ-noogã yaa Ezai sak 60 verse rãmb a taabã sẽn ketã sɩngr-goam la b kʋmsgo. A reng n togsda yɛl nins makr wɛɛngẽ pagã sẽn na n vɩɩmdã, la a wilgd d sẽn tõe n maan to-to n pa a Zeova vẽenemã pʋgẽ baa ne ãdem-biisã sẽn be lik pʋgẽ wã. La gom-bãnã sẽn be sɩngr verse a tãab kãensã pʋgẽ wã makda bõe?
6. Ezai sak 60 pagã yaa ãnda, la ãnda rãmb n tʋmd a yʋʋr yĩng tẽng zugu?
6 Pag ning yell b sẽn gom Ezai 60:1-3 pʋgẽ wã yaa Siõ, sẽn ya a Zeova yĩngr siglgã sẽn yaa bõn-naands ninsaal nif sẽn ka ne wã. Rũndã-rũndã tẽng zugu yaa “Israɛll sẽn yaa Wẽnnaam dẽnda” neb nins sẽn ketã n tʋmd Siõ yʋʋr yĩnga. Israɛll kãng yaa kiris-neb sẽn zae ne vʋʋsem sõng tiginga, t’a nebã yit tẽns toɛy-toɛya, sẽn saagd n na n wa rɩ naam ne Kiristã saasẽ. (Galat dãmba 6:16) Tẽeb bu-kãngã neb sõor zãng wa n yɩɩ neb 144 000. La tõnd wakatã Ezai sak 60 pidsda b rãmb nins sẽn ket tẽng zug ‘yaoolem wakatã’ zugu. (2 Tɩmote 3:1; Wilgri 14:1) Bãngr-gomdã leb n togsda yɛl wʋsg kiris-nin-kãensã sẽn zae ne vʋʋsem sõngã tũud-n-taas zutu, sẽn yaa ‘kʋʋn-kãsengã’ sẽn be ‘piis a taabã’ sʋkã.—Wilgri 7:9; Zã 10:16.
7. Siõ yɛlã ra yaa wãn-wãn yʋʋmd 1918 wã pʋgẽ, la wãn to la b ra reng n wilg rẽ bãngr-goam pʋgẽ?
7 Rẽ yĩnga wakat n zĩnd tɩ “Israɛll sẽn yaa Wẽnnaam dẽnda” ra be lik pʋgẽ, wa makr wɛɛngẽ pagã sẽn deng n mak n wilgã bɩ? N-ye, rẽ sɩd maana sẽn yɩɩd yʋʋm 80 la woto. Dũni gill pipi zabrã sasa, kiris-neb nins sẽn zae ne vʋʋsem sõngã ra maoo wʋsg sẽn na yɩl tɩ kaset kũun tʋʋmdã kell n kẽng taoore. La yʋʋmd 1918 wã, zabrã yaoolem yʋʋmde, moonegã tʋʋmd b sẽn siglã yalsame la bala. B rõda a Joseph Rutherford, sẽn da get tʋʋmdã yell dũniyã gill zugã ne kiris-neb a taab sẽn yaa taoor dãmba, n kao b bʋʋd tɩ b ra segd n kẽes b roog yʋʋm wʋsg yĩnga. Wilgr sebrã pʋgẽ, b ra reng n bilga kiris-neb nins sẽn zae ne vʋʋsem sõng n be tẽng zug sasa kãnga wã wa kũum sẽn gãe “tẽng-kãseng ninga b sẽn boond ne makr goama tɩ Sodom wala Ezipta sʋka [so-yaleng zugu, NW ].” (Wilgri 11:8) Ad wakat kãng ra sɩd yɩɩ lik wakat n kõ Siõ, a kambã sẽn zae ne vʋʋsem sõngã sẽn tʋmd a yʋʋr yĩng tẽng zugã!
8. Toeen-kãseng bʋg n zĩnd yʋʋmd 1919 wã, tɩ wa ne bõe?
8 La toeen-kãseng n zĩnd yʋʋmd 1919 wã pʋgẽ. A Zeova kõo Siõ vẽenem. Israɛll sẽn yaa Wẽnnaam dẽndã neb nins sẽn ket tẽng zugã tikame n yik n na n puk Wẽnnaam vẽenemã, n lebs n sɩng koe-noogã mooneg ne raoodo. (Matɩe 5:14-16) Yẽesma kiris-nin-kãensã sẽn leb n paamã kɩtame tɩ neb a taab wa a Zeova vẽenema pʋgẽ. Sẽn deng-b n wa wã paama vʋʋsem sõng zaeeb n wa paas Israɛll sẽn yaa Wẽnnaam dẽndã neba. B bool-b lame tɩ rĩm dãmb Ezai sak 60:3 pʋgẽ, bala b yaa rogem-pʋɩɩr dɩt-n-taas ne Kirist Wẽnnaam saasẽ Rĩungã pʋgẽ. (Wilgri 20:6) Rẽ poore kʋʋng kãseng sẽn yaa piis a taabã neb sɩngame n wat a Zeova vẽenemã pʋgẽ. Bãmb n yaa “buud a taaba” tɩ b gom b yell bãngr-gomdã pʋgẽ wã.
Pagã kamb waa yiri!
9, 10. a) Pagã sẽn gesã, bõn-kãseng bʋg la a yã-yã, la bõe la rẽ ra reng n makdẽ? b) Bõe n kɩt tɩ Siõ tõe n maan sũ-noogo?
9 Masã a Zeova sɩngame n togsd kɩbay n paasd bũmb ning b sẽn togs Ezai 60:1-3 pʋgẽ wã zugu. A leb n kõo pagã noor a to. Kelg-y a sẽn yet bũmb ningã: “Zẽk f neng n ges zĩiga fãa.” Pagã sakame n gese, la ad a sẽn yã bũmb ningã be yamleoogo! A kambã watame. Verse wã kẽnga taoor n yetẽ: “Bãmb fãa tigimdame n wat fo nengẽ. Fo komdibli wã yita zĩ-zãrsẽ n watẽ, la neb bugda fo kompugli wã b nusẽ.” (Ezai 60:4) Rĩungã koɛɛg b sẽn sɩng mooneg dũniyã gill zug yʋʋmd 1919 wã tɛka kɩtame tɩ nin-paals tusa wa lebg a Zeova sõgen dãmba. Bãmb me lebga “komdibli” la “kompugli,” sẽn yaa Israɛll sẽn yaa Wẽnnaam dẽndã neb sẽn zae ne vʋʋsem sõngo. Woto, a Zeova nagsa Siõ ne a sẽn wa ne neb 144 000 sullã yaoolem neb vẽenem pʋgẽ wã.
10 Yãmb wee n tags sũ-noog ning Siõ sẽn paamã, a sẽn paam t’a kambã wa a nengẽ wã yelle. A Zeova leb n togsa Siõ bũmb a to sẽn kɩt t’a segd n maan sũ-noogo. D karemda woto: “Fo sã n yã yõ wã, fo nenga na n pɩlame. La fo na n yɛɛsame n paam sũ-no-kãsenga; tɩ bõe, ko-kãseng na n waa fo nengẽ ne arzɛgse, la buud a taaba arzɛgs na n waa fo nengẽ.” (Ezai 60:5) Wa sẽn zems ne bãngr-gom kãensã, sẽn sɩng ne yʋʋmd 1930 tɛk yʋʋm pi-gĩndã, kiris-neb kʋʋng wʋsg sẽn saagd n na n vɩɩmd tẽng zug n kaoog n wa Siõ. B yita “ko-kãsenga” sẽn yaa ãdem-biisã sẽn zãag ne Wẽnnaamã sʋka. Bãmb n yaa arzɛgs sẽn yit buud a taabã pʋsẽ wã, la ‘buuda fãa soolem bõn-neebã.’ (Azze 2:7; Ezai 57:20) Gũus-y n ges me tɩ ‘bõn-neeb’ kãensã ned kam fãa ka balemd a Zeova wa a sẽn dat to-to ye. Ayo, b paasda Siõ ziiri, ne b sẽn naag b saam-biisã sẽn zae ne vʋʋsem sõngã n balemdẽ wã, n lebg “yãgr a yembr” ne bãmb n tar ‘pe-kɩɩm a yembrã.’—Zã 10:16.
Toandb la rũm-kɩɩmb wata Siõ
11, 12. Bilg-y kʋʋng ning b sẽn yã tɩ b wat Siõ wã.
11 Tigisg a woto waoong b sẽn deng n togsã wilgdame t’a Zeova pẽgdbã sõor na n fɩɩga wʋsgo. B reng n togsa rẽ bãngr-gomd ning sẽn pʋgdã pʋgẽ. Mams-y wala y sẽn na n yas ne makr wɛɛngẽ pagã Siõ Tãngã zugu. Yãmb sẽn ges yaangã, bõe la y ne? “Yʋgma wʋsg na n pida fo tẽngã. Yaa yʋgma nins sẽn yi Madiã la Efa wã. Neb nins fãa sẽn be Seba wã na n zɩlga yʋgma sãnem la tɩdare n wa fo nengẽ n wa moon Zusoaba pẽgre.” (Ezai 60:6) Toandb kʋʋng n teesd Zerizalɛm ne yʋgma wʋsgo. Ges-y koe, yʋgmã bee zĩig fãa wa koom sẽn lim tẽngã fãa! Lɛɛbdbã zɩta kũun sẽn tar yõod wʋsgo, sẽn yaa “sãnem la tɩdare.” La toandb kãens waa Wẽnnaam vẽenemã pʋgẽ sẽn na yɩl n pẽg-a neb sʋka, sẽn na yɩl n ‘moon Zusoabã pẽgre.’
12 Ka toandbã bal n wat ye. Rũm-kɩɩmb me n da kaoogd n wat Siõ. Bãngr-goamã paasa woto: “Kedaar dũm-bõonega fãa na n tigma taab fo nengẽ. Nebazot pe-raada fãa na n yɩɩ fo rẽnda.” (Ezai 60:7a) Bu-rãmb sẽn yaa rũm-kɩɩmb me n wat galʋ-tẽn-sõngẽ wã ne b rũms nins sẽn yaa sõma n yɩɩdã n na n wa kõ a Zeova. B kõo b mens meng n na n tʋm Siõ yĩnga! Wãn-wãn la a Zeova reeg sãan-kãensã? Wẽnnaam mengã leokame: “Bãmb na n dʋʋme n ta mam tẽn-kugrẽ wã tɩ m deeg-ba. La mam na n waooga m dooga sẽn tar ziirã.” (Ezai 60:7b) A Zeova saka sãan-kãensã kũunã la b sõngrã ne waoogre. B belma be wã kõo a roogã ziiri.
13, 14. Bõe la b yã tɩ yit nin-taoor n watẽ?
13 Wẽnemd-y masã n ges nin-taoore. Bõe la yãmb ne? Yãmb nee zĩ-zãrgẽ tɩ wõnd wala sawad-pɛɛlg n yadg mogrã zugu. A Zeova sʋka sʋkr ning y sẽn tar y yamẽ wã: “Yaa ãnda rãmb n yɩgd wa sawato la wal sẽn dabd b tʋgdẽ wã?” (Ezai 60:8) A Zeova wẽneg n leokame, n yeele: “Tẽns nins koom sẽn gũbga tẽeda maam. Yaa Tarsis koom kogend n deng taoore n na n tɩ tall fo kamba ne b wanzũri la b sãnema n yi zĩ-zãrsẽ n wa. Zusoaba sẽn yaa fo Wẽnnaama yʋʋr yĩnga la Israɛll Sõng-soaba sẽn kõ foom waoogra yĩnga.”—Ezai 60:9.
14 Mams-y y yamẽ wã n ges yɛlã sẽn da yaa to-to. Sawad pɛɛlg kãng pẽnegame, tɩ b ne-a masã t’a wõnd bõn-tẽgs wʋsg sẽn gũm taab n be zĩ-zãrgẽ, nin-taoore. A ra wõnda wala liuuli wʋsg sẽn laand ko-wiisã zut n watẽ. La b sẽn kolg n paasa, y mikame tɩ b yaa koom kogendo, tɩ b pɛɛla tẽes sẽn na yɩl n kok sobgã. Dẽ, koom kogendã sẽn teesd Zerizalɛmã wõnda wal wʋsgo. Kom kogend wʋsgã yii zĩ-zãrsẽ n zoet tʋʋll-tʋʋll n wat Zerizalɛm ne tẽedb wʋsg sẽn na yɩl tɩ b balem a Zeova.
A Zeova siglgã neb sõor fɩɩgdame
15. a) Ezai 60:4-9 reng n goma fɩɩgr bʋg yelle? b) Yam bʋg la kiris-neb hakɩkã pukda?
15 Ad bãngr-goam nins sẽn be verse a 4 n tɩ a 9 wã pʋgẽ wã sɩd bilgda fɩɩgr ning sẽn maand dũniyã zug yʋʋmd 1919 wã tɛk ne manesem sẽn tar pãnga! Bõe yĩng t’a Zeova bark Siõ ne fɩɩgr a woto? Yaa Israɛll sẽn yaa Wẽnnaam dẽnda sẽn sakd n maandẽ t’a Zeova vẽenemã yãgd wakat fãa yʋʋmd 1919 tɛkã yĩnga. La rẽ yĩnga yãmb gũusame n ges tɩ sã n yaa ne verse a 7 wã, sẽn wat-b paalmã “dʋʋme n ta [Wẽnnaam] tẽn-kugrẽ wã” bɩ? Tẽn-kugr bee maoong yĩnga, dẽ bãngr-goamã zĩ-kãngã tẽegda tõnd t’a Zeova tʋʋmda baooda modgr la mong-m-menga. Tʋm-tʋmd a Poll gʋlsame: “Mam kota yãmb . . . tɩ y kõ y yĩnsa tɩ yɩ maan-vɩɩs sẽn yaa sõma la sẽn zems Wẽnnaam yam. La yõ wã zemsa yãmb maanego.” (Rom dãmba 12:1) Sẽn zems ne a Poll goamã, kiris-neb hakɩkã ka ges tɩ yaa bũmb sẽn sek bal tɩ b kẽngd tũudum tigisg vugr rasem a yopoe pʋgẽ bal ye. B rɩkda b sẽkã, b pãngã, la b arzɛgsã n teend baleng sẽn yaa yɩlemdã. Rẽ yĩnga balemdb sẽn tar kɩs-sɩd woto belem pa kõt a Zeova roogã ziir sɩda? A Ezai bãngr-gomda yeelame tɩ ra na n yɩɩ woto. La d tõe n kɩsa sɩd me tɩ balemdb sẽn yaa yẽesens woto me tara ziir a Zeova nifẽ.
16. Tẽn-kʋdem wẽndẽ wã, ãnda rãmb n sõng ne Zerizalɛm lebs-n-me wã tʋʋma, la tõnd wakatã ãnda n maand tʋʋm a woto buudu?
16 Sẽn wa-b paalmã rat n tʋmame. Bãngr-gomdã kẽngda taoor n yetẽ: “Sãamba na n le mee fo lalsa yɛsa, la b rĩm dãmba na n lebga yãmb tʋm-tʋmdba.” (Ezai 60:10) Gom-kãensã reng n paama pidsg pipi, Zʋɩf rãmbã sẽn da wa n yi yembd Babilon n leb b tẽngẽ wã sasa. Sasa kãngã rĩm dãmb la buud a taab neb n sɩd sõng n lebs n me wẽn-doogã la Zerizalɛm galʋ-tẽngã. (Ɛsdras 3:7; Nehemi 3:26) Gom-kãensã pidsg tõnd wakatã pʋgẽ, kʋʋn-kãsengã sõnga kellã sẽn zae ne vʋʋsem sõngã n keng sɩd balengã pãnga. B sõngame n keng kiris-neb tigimsã, tɩ woto paas a Zeova siglgã sẽn wõnd wa galʋ-tẽngã ‘lals’ pãnga. B leb n meta Rĩung Roto, tigis-kãsems roto, la Betɛll zagse. Ne manesem kãensã fãa, b sõngda b saam-biisã sẽn zae ne vʋʋsem sõngã n pidsd a Zeova siglgã neb sõor sẽn tar fɩɩgrã raab toɛy-toɛya!
17. Manesem a yembr a Zeova sẽn tũnug ne n nags a nin-buiidã la bʋgo?
17 Ad Ezai 60:10 goamã sɩd kengd pɛlga! A Zeova yeelame: “Mam da wẽe foom m su-puugra wakate, la masã, mam zoee fo nimbãanega n deeg foom.” (Ezai 60:10) N-ye, yʋʋmd 1918 la yʋʋmd 1919 wã pʋgẽ, a Zeova sɩd kibla a nin-buiidã. La rẽ loogame. Masã yaa wakat a Zeova sẽn na n zoee a sõgen dãmb nins sẽn zae ne vʋʋsem sõngã la b tũud-n-taasã sẽn yaa piis a taabã nimbãanega. Bũmb ning sẽn wilgd vẽeneg tɩ yaa woto wã ya a Zeova sẽn bark-b ne fɩɩg-kãsengã, tɩ b tõe n yeel makr wɛɛngẽ t’a ‘nags-b lame’ wã.
18, 19. a) Bõe la a Zeova kãab nin-paals nins sẽn wat a siglgã pʋgẽ wã wɛɛngẽ? b) Bõe la Ezai sak 60 verse nins sẽn ketã tar n na n togs-do?
18 Yʋʋmd fãa, “sãamb” tus kobs a taab n wat a Zeova siglgã pʋgẽ, la sor ket n pakame tɩ bãmb wʋsg a taab na n pʋgle. A Zeova yeela Siõ woto: “Fo kʋɩlensa na n pagsa wakat fãa. B ka na n pag wĩntoog ne yʋng ye. B na n pakame tɩ neba tõe n tall buud a taaba arzɛgs n wa kẽ be. La bãmb dĩm dãmba na n lʋɩɩ taoore.” (Ezai 60:11) Kɩɩsdb kẽer n makd n na n pag ‘kʋɩlens’ kãense, la d miimi tɩ b ka na n tõog ye. A Zeova yeelame tɩ sẽn ya a soab fãa kʋɩlensã na n ket n pagsame. Fɩɩgrã na n kell n kẽnga taoore.
19 A Zeova ninga a nin-buiidã bark ne manesem a taaba, n kɩt tɩ b tall ziir yaoolem day kãensã pʋgẽ. Ezai sak 60 verse rãmb nins sẽn ketã reng n togsa manesem kãens sẽn yaa bũmb ninsi.
Y tõe n wilga a võor bɩ?
• Ãnda la Wẽnnaam “pagã,” la ãnda rãmb n tʋmd a yʋʋr yĩng tẽng zugu?
• Wakat bʋg la Siõ kambã ra vãb tẽnga, la wakat bʋg la b ‘yik-yã’?
• Wãn-wãn la a Zeova tũnug ne makr toɛy-toɛy n deng n togs Rĩungã koe-moondb fɩɩgr rũndã-rũndã sẽn na n yɩ to-to?
• Ne manesem bʋs la a Zeova maan t’a vẽenem yãg a nin-buiidã zugu?
[Zãmsgã sogsgã]
[Foto, seb-neng 20]
A Zeova kõo “pagã” noor t’a yiki
[Foto, seb-neng 22]
Koom kogend wʋsgã wõnda wal sẽn be yaang n watẽ