Belsg n kõ sẽn namsd-bã

SẼN na maan yʋʋm kobse, yɩl n bãng bõe n kɩt tɩ Wẽnnaam bas tɩ namsgã beẽ wã yɩɩ sok-kãseng leokr sẽn yɩ toog ne filozof rãmb la tũudmã yel-mitb wʋsgo. Kẽer da yetame tɩ sẽn mik tɩ Wẽnnaam yaa pãng sẽn ka koak soabã, tog n yaa yẽ me n kɩt tɩ namsgã beẽ. Sebr a ye (Les Homélies clémentines) sẽn pa tar sɩd halhaal sẽn yi yʋʋm kob-gĩnd a yiib-n-soabẽ wã gʋlsd ra yeelame tɩ Wẽnnaam zãada dũniyã ne nus a yiibu. Ne a “goabg nugã,” a tũnugda ne a Sʋɩtãan n wat ne namsgã la toogã, la ne a “rɩtg nugã,” a tũnugda ne a Zezi n fãagdẽ la a ningd barka.

Baa neb kẽer sã n mi tɩ pa Wẽnnaam n wat ne namsgã, b sẽn pa rat n sak n deeg tɩ Wẽnnaam tõe n basa namsgã tɩ beẽ wã kɩtame tɩ b yetẽ tɩ namsg pʋs n kae meng ye. A Mary Baker Eddy gʋlsa woto: “Wẽngã yaa tagsg sẽn be f yamẽ bal n pa tar tikr vẽeneg ye. B sã n da get yel-wẽnã, bãasã la kũuma wala zaalem, b na menemẽ.”—Science et Santé avec la clef des Écritures.

Yel-beed nins sẽn zĩnd hal pĩndã, sẽn yɩɩd fãa dũni gill pipi zabrã tɛk n wa tõk rũnd-kãngã wã kɩtame tɩ neb wʋsg tolg n yeel vẽeneg bal tɩ Wẽnnaam pa tar tõog n na n gɩdg namsgã ye. Bãngd a David Wolf Silverman sẽn yaa Zʋɩfã gʋlsa woto: “Mam tagsdame tɩ dũni gill zabr a yiib-n-soabã tɛka, Naazi rãmbã sẽn varg Erop pʋgẽ Zʋɩf rãmbã ne neb a taab n kʋ kʋ-beedã, kɩtame tɩ b pa tõe n bool Wẽnnaam wa sẽn zems tɩ pãng sẽn ka koak soab ye.” A yeela woto n paase: “D sã n dat n bãng Wẽnnaam sẽn ya a soaba, d segd n deegame t’a sõmblmã ne wẽngã belem tũuda taaba. Sã n yaool n yaa woto, rat n yeelame t’a pa pãng sẽn tõe fãa soaba ye.”

La yeel tɩ Wẽnnaam n wat ne namsgã, t’a pa tõe n gɩdg-a, bɩ pʋs n yeel meng tɩ namsg kae pa kõt neb nins sẽn namsdã belsg hakɩk ye. La sẽn yaa yell n yɩɩda, tẽeb a woto buud meng pʋs n yaa lebend fasɩ ne Biiblã sẽn gomd Wẽnnaam ning yellã zʋgdo. A yaa tɩrlem soaba, pãng sẽn tõe fãa, la nonglem Wẽnnaam. (Zoob 34:10, 12; Zeremi 32:17; 1 Zã 4:8) La bõe la Biiblã yet bũmb ning sẽn kɩt tɩ Wẽnnaam bas tɩ namsgã beẽ wã wɛɛngẽ?

Wãn-to la namsgã sɩng-yã?

Wẽnnaam pa naan ninsaalbã tɩ b nams ye. A ra naana pipi ninsaalb a yiibã, a Ãdem ne a Hawa tɩ b zems zãng kɛpɩ b yĩnsã pʋgẽ la b yamẽ wã, n sel tɩɩs wʋsg n maan arzãn n ning-b be, zĩig vɩɩm sẽn yaa noog wʋsgo, la a bobl-b tʋʋm kãseng sẽn kõt sũ-noog me. (Sɩngre 1:27, 28, 31; 2:8) La b sã n da rat n kell n tall sũ-noog wakat fãa, b ra segd n sakame tɩ Wẽnnaam dɩ naam b zutu, la a yãk sõma ne wẽnga n wilg-ba. Tɩɩg n da makd no-kãngã Wẽnnaam sẽn kõ wã, b sẽn boond tɩ “sõma ne wẽng bãngr tɩɩga.” (Sɩngre 2:17) A Ãdem ne a Hawa ra tõe n wilgame tɩ b sakda Wẽnnaam, b sã n da tũ a sẽn yeel tɩ b ra wa saag n dɩ tɩ-kãng biigã. *

Zu-bʋko, a Ãdem ne a Hawa pa sak Wẽnnaam noorã ye. Malɛk a ye sẽn tõdg tɩ b  wa bool-a kaoosg zugẽ t’a Sʋɩtãan kɩtame t’a Hawa tẽ tɩ Wẽnnaam sakr pa na n naf-a ye. A yeelame tɩ Wẽnnaam da mongd-a-la bũmb sẽn tar yõod hal wʋsgo: soog-m-mengã, paam sor n yãk sẽn yaa sõma bɩ wẽngã. A Sʋɩtãan yeelame t’a sã n yãk tɩɩga biig n dɩ, ‘a nina na n pukame t’a lebg wa Wẽnnaam n mi sõma ne wẽng n bake.’ (Sɩngre 3:1-6; Wilgri 12:9) Soog-m-mengã raab sẽn kẽ a Hawa yamẽ wã, a yãka tɩɩga biig n dɩ, t’a Ãdem me maan woto.

Baraar bala a Ãdem ne a Hawa sɩnga b kɩɩsgã biis yãabo. Bãmb sẽn tõdg Wẽnnaam naamã, b konga koglg la sũ-noog ning wẽn-sakrã sẽn da kõt bãmbã. Wẽnnaam dig-b lame n yiis arzãnã pʋgẽ la a yeel a Ãdem woto: “Kãab wẽng bee tẽnga zug fo yĩnga . . . Fo na n namsa f vɩɩm tɛka n dɩ tẽnga bõn-koaadla biisi. Yaa ne fo neng tʋʋlg la f na n paam dɩɩb n dɩ n wa tãag f sẽn na n lebg tẽnga tom fo sẽn yi a pʋgẽ wã.” (Sɩngre 3:17, 19) Ra yaa bãase, toogo, kʋʋlem la kũum la a Ãdem ne a Hawa na n yã masã. Namsgã kẽe ninsaal vɩɩmã pʋgẽ rẽ tɛka.—Sɩngre 5:29.

Yellã welgre

Kẽer tõe n soka woto: ‘Wẽnnaam da pa tõe n kell n bas a Ãdem ne a Hawa yel-wẽndã taal bal laa?’ Ayo, bala woto ra na n kɩtame tɩ b pa tall waoogr ne Wẽnnaam zu-sobendã wa pĩndã ye, la tõe n paasa kɩɩsgã meng tɩ wa wa ne namsg wʋsg n paase. (Koɛɛg Soaba 8:11) Sẽn paase, Wẽnnaam sã n da mum a nin kɛgrã zug n pa maan bũmbu, yaa wa yẽ meng naag n maanda wẽngã. Biiblã gʋlsd a Moiiz tẽega tõnd woto: “Bãmb tʋʋma zemsa zãnga. Bãmb soya fãa yaa tɩrse. Bãmb yaa Wẽnnaam sẽn maand sɩda n ka maand wẽng ye. Bãmb yaa sõngo la tɩrga.” (Tõodo 32:4) Sẽn na n yɩl n tʋm tɩ zems ne a mengã noyã, sɩd ra zemsame tɩ Wẽnnaam bas t’a Ãdem ne a Hawa nams b kɩɩsgã yĩnga.

Bõe yĩng tɩ Wẽnnaam pa kell n sãam pipi ninsaalb a yiibã ne a Sʋɩtãana, sẽn yaa malɛk ning sẽn tus bãmb tɩ b kɩɩsã zĩig pʋgẽ? A tara pãn-kãseng n da tõe n maan woto. A Ãdem ne a Hawa ra pa na n dogẽ kamb b yel-wẽndã sẽn na n long tɩ b bãng namsg la kũum ye. La Wẽnnaam sã n da tũnug ne a pãngã n maan woto, a ra pa na n kɩt tɩ malɛgsã ne ninsaalba bãng tɩ yẽ zu-sobendã zemsame ye. Sẽn ye paas me, a Ãdem ne a Hawa sã n da ki n pa paam kamba, ra na n kɩtame tɩ Wẽnnaam sẽn da kãab-b tɩ b rog kamb sẽn zems zãng n pids dũniyã pa pids ye. (Sɩngre 1:28) La “Wẽnnaam ka ninsaal ye.  . . . Bãmb sã n yeel tɩ b na n maana bũmbu, b maandame.”—Sõdbo 23:19.

Wẽnnaam a Zeova yamã sẽn zems zãnga yĩnga, a basame tɩ kɩɩsgã kaoos wakat bilf yĩnga. Woto, kɩɩsdbã ra na n paama wakat sẽn sek n yã soog-m-meng Wẽnnaam taoor sẽn wat ne biis ninsi. Yɛl nins fãa sẽn da na n puk ãdem-biisã vɩɩm pʋgẽ wã ra na n wilga vẽeneg tɩ Wẽnnaam sor-wilgrã yaa tɩlae ne ninsaalbã, la tɩ Wẽnnaam naamã la sõma n yɩɩd ninsaalbã bɩ a Sʋɩtãan naamã. Wakat kãng pʋgẽ me, Wẽnnaam dɩka segls sẽn na yɩl tɩ yẽ sẽn da tʋlg bũmb ning tẽnga gill wɛɛngẽ hal sɩngrẽ wã kell n paam pidsgu. A kãabame tɩ “yageng” n na n wa ‘pogl a Sʋɩtãan zugu,’ n menes a kɩɩsgã ne a bi- wẽnsã fãa kɛpɩ wakat fãa yĩnga.—Sɩngre 3:15.

A Zezi Kirist n yaa yageng ning b sẽn da kãabã. D karemda 1 Zã 3:8 pʋgẽ tɩ “Wẽnnaam Biiga waame . . . n na n sãam Sʋɩtãana tʋʋma.” A maana woto, a sẽn dɩk a vɩɩmã sẽn zems zãngã n kõ tɩ yɩ maoong n dol ãdem-biisã sẽn dog ne yel-wẽnã la kũumã yĩnga. (Zã 1:29;  1 Tɩmote 2:5, 6) B kãaba neb nins fãa sẽn na n sɩd wilg b tẽeb ne a Zezi maoongã tɩ b na n paama b mens ne namsgã wakat fãa yĩnga. (Zã 3:16; Wilgri 7:17) Rẽnda na n yɩɩ wakat bʋgo?

Namsgã saabo

Wẽnnaam zu-sobendã kɩɩsg waa ne namsg sẽn pa tõe n bãng n bilgi. Dẽnd woto, zemsame tɩ Wẽnnaam puk a zu-sobendã ne manesem zẽng sẽn na n yɩl n yiis ãdem-biisã namsg la a pids a pipi raabã ne tẽngã. A Zezi goma Wẽnnaam sẽn segl bõn-kãngã wã yelle, a sẽn wa n zãms a karen-biisã tɩ b pʋʋs woto wã: “Tõnd Ba sẽn be arzãna . . . tɩ yãmb soolem wa, tɩ yãmb daab maan dũniyã zug wa sẽn maand arzãna.”—Matɩe 6:9, 10.

Wakat ning Wẽnnaam sẽn bas ãdem-biisã tɩ b sigl b toorẽ goosneema rãmb n soog b mens tɩ b gesã saab kolgame. Wẽnnaam lugla a Rĩungã saasẽ yʋʋmd 1914, t’a Zezi Kirist ya a Rĩma, tɩ rẽ pidsd Biiblã bãngr goama. * Ka la bilfu, a na n wãa ãdem-biisã goosneema rãmb fãa tɩ b menem.—Daniɛll 2:44.

A Zezi tẽng-zug koe-moonegã a sẽn maan wakat bilf pʋgẽ wã sasa, a kõo Wẽnnaam naamã luglg sẽn na n wa ne bark nins ãdem-biisã zugã reng-n-lɛmbga. Evãnzill dãmbã wilga vẽeneg t’a Zezi talla nimbãan-zoeer ne naong rãmbã, neb a taabã sẽn da bak n pa nandẽ wã. A sãooga bãad dãmba, n dɩlg kom sẽn da tar-b rãmba, la a vʋʋg kũum. Baa sebg mengã a tãsame tɩ sĩndi. (Matɩe 11:5; Mark 4:37-39; Luk 9:11-16) Tags-y n ges a Zezi sẽn na n maan bõn-sõma ninsã, a sã n wa tũnug ne a maoongã sẽn yɩ rond sẽn wat ne yɩlgrã n na n tʋm ãdem-biis nins fãa sẽn yaa sakdbã nafr yĩnga! Biiblã kãabame tɩ ne Kirist naamã maasem, Wẽnnaam “na n yẽesa nintãma fãa t’a ra le zĩnd [ãdem-biisã] ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.”—Wilgri 21:4.

Belsg sẽn namsd-bã yĩnga

Ad sɩd kengda d raoodo, d sẽn mi tɩ pãng sẽn ka to Soab a Zeova sẽn yaa tõnd Wẽnnaam sẽn pid ne nonglmã geta d yelle, la tɩ ka la bilfu a na n yolsa ãdem-biisã! Bãad sẽn namsd hal wʋsg nong n saka tɩpg fãa sẽn na n kõ-a laafɩ, baa tɩpgã zabd wʋsgo. Woto me, tõnd sã n miẽ tɩ Wẽnnaam sẽn na n welg yellã ne manesem ningã na n waa ne nafa n kõ-d wakat sẽn kõ n sa yĩnga, rẽ tõe n sõng-d lame tɩ d mao ne wakat bilf pʋgẽ zu-loees nins fãa d sẽn segdã.

A Ricardo yell b sẽn gom sõsg ning sẽn loogã pʋgẽ wã me bãnga Biiblã kãabs a sẽn zamsã sẽn tõe n kõ-a belsg to-to. A tẽegame n yet woto: “Mam pagã kũum poore mam da nong n zãagda m meng hal wʋsg ne nebã. La pa kaoos la m bãng tɩ woto pa tõe n kɩt tɩ m pagã vʋʋge, la tɩ rẽ yãdgda m sũ-sãoongã ye.” La a Ricardo pẽdga ne kiris-neb tigissẽ wã kẽngr la a taasd Biiblã koɛɛgã neb a taabã. A Ricardo yeelame: “Mam sẽn ne a Zeova sẽn sõngd maam ne nonglem la a reegd m pʋʋsgã baa yel-bõoneg pʋsẽ wã, m pẽneg-a lame n paase. Yaa m sẽn bãng Wẽnnaam nonglmã woto wã  n sõng-m tɩ m tõog n mao ne yel-kãngã sẽn yɩ wẽng hal n tɩ yɩɩg ne-ma.” Ad a sẽn sak n deege: “Baa ne masã mam pagã kaalem ket n namsd-m-la wʋsgo, la m kɩsa sɩd zãng fasɩ t’a Zeova sẽn basd yɛl nins fãa tɩ beẽ wã pa tõe n nams tõnd wakat fãa yĩng ye.”

Wala a Ricardo la neb milyõ rãmb a taaba, yãmb me gũuda ne yãgb wakat ning ninsaalbã sẽn ‘ka na n wa le tẽeg wall b tags namsgã sẽn nan tar-b masã wã yell’ bɩ? (Ezai 65:17) Tall-y bas-m-yam tɩ y tõe n paama nafa nins fãa Wẽnnaam Rĩungã sẽn na n wa ne wã, y sã n tũ Biiblã sagl kãngã: “Bɩ y bao a Zeova wakat ning yãmb sẽn ket n tõe n yã yẽ. Bõos-y yẽ wakat ning a sẽn ket n pẽ ne yãmba.”—Ezai 55:6, NW.

Sẽn na yɩl n tõog n maan dẽ, ning-y Wẽnnaam Gomdã kareng la a zãmsg sõma-sõma pipi zĩigẽ y vɩɩmã pʋgẽ. Mao-y n bãng Wẽnnaam la a sẽn tʋm a soabã, a Zezi Kirist. Modg-y n vɩɩmd tɩ zems ne Wẽnnaam noyã tɩ yaa woto la y na n wilg tɩ y sakda a naam sẽn ka to wã. Woto na n kõ-y-la sũ-no-kãseng masã mengã, baa y sã n segda zu-loeese. La beoog daare, y na n vɩɩmda dũni sẽn pa na n tall namsg pʋgẽ.—Zã 17:3.

[Tẽngr not rãmbã]

[Zĩ-gũbri, seb-neng a 6, 7]

WÃN TO LA D TÕE N MAO NE NAMSGÃ?

“Bɩ y bas yãmb yɩɩra fãa ne [Wẽnnaam].” (1 Pɩɛɛr 5:7) Tõnd mengã sã n wa namsdẽ bɩ d ne toog sẽn tar d nin-nongre, d tõeeme n wa pa mi d sẽn maandga, d sũur tõe n puugame, bɩ d tagsdẽ tɩ b bas-d lame menga. Kell-y n tall bas-m-yam t’a Zeova mii tõnd toogã. (Yikri 3:7; Ezai 63:9) Wala tẽn-kʋdem wẽndẽ neb nins sẽn tall tẽebã, d tõe n pelga d pʋg n wilg-a d sẽn maand sãmbs ne yɛl ninsã, la d yɩɩrã. (Yikri 5:22; Zoob 10:1-3; Zeremi 14:19; Habakuk 1:13) Tõe t’a pa maan yel-solemd n yiis-d d zu-loeesã pʋgẽ ye, la tõnd sã n pʋʋs-a ne d sũur fãa, a tõe n kõ-d-la yam la raood tɩ d tõog n mao ne zu-loeesã.—Zak 1:5, 6.

“Bɩ y ra sak tɩ makr sẽn wẽnd bugum sẽn makd yãmba ling yãmb wa bõn-sãang ye.” (1 Pɩɛɛr 4:12) Ka wã, a Pɩɛɛr gomda namsg f sẽn deegd tẽebã yĩngã yelle, la a goamã leb n tɩ loee takɩ ne namsg buudã fãa tẽed sẽn tõe n sege. Naongã, bãasã la nin-nongdsã kũum namsda ãdem-biisã. Biiblã yetame tɩ “zu-beed” tõe n paama sẽn yaa ned ning fãa (Koɛɛg Soaba 9:11) Yel-kãensã bee ãdem-biisã vɩɩm pʋgẽ rũndã-rũndã. Tõnd sã n mi woto tiiri na n sõng-d lame tɩ namsg la yel-beed sã n wa wa bɩ d tõog n mao ne-ba. (1 Pɩɛɛr 5:9) Sẽn yɩɩd fãa, d sã n tẽeg tɩ ‘Zusoaba geta nin-tɩrse, la bãmb tʋb wʋmda bãmb kelems b sẽn dat sõngr wakate,’ woto na n yɩɩ belsg hal wʋsg n kõ-do.—Yɩɩl Sõamyã 34:16; Yelbũna 15:3; 1 Pɩɛɛr 3:12.

‘Bɩ y maan sũ-noog ne yãmb sẽn gũud yãmb tẽeb pidsgã.’ (Rom dãmba 12:12) Wall tɩ d tagsd yel-nood nins sẽn loogã yell wakat fãa tɩ sãamd d sũurã, d tõeeme n tagsd Wẽnnaam sẽn kãab t’a na n kɩtame tɩ namsg fãa sa wã yelle. (Koɛɛg Soaba 7:10) Tẽeb kãng sẽn tar tikr vẽenegã na n kogla tõnd wala kut-pugl sẽn kogend zug to-to wã. Tẽebã boogda vɩɩma zu-loees la a kɩtdẽ tɩ zu-loe-kãens ra gudg tõnd yamã wall sãam d tẽeba ye.—1 Tesalonik rãmba 5:8.

[Foto, seb-​neng a 5]

A Ãdem ne a Hawa zãgsa Wẽnnaam naamã

[Foto, seb-​neng a 7]

Wẽnnaam kãaba dũni namsg sẽn ka na n zĩndi