‘Kell-y n tall m goama’

“Yãmb sã n tall mam goama, yãmb yaa mam karen-biis hakɩka.”—ZÃ 8:31.

1. a) A Zezi basa bõe tẽng zug n yaool n leb saasẽ? b) Sogs-bʋs la d na n leoke?

A ZEZI KIRIST sẽn yaa kiris-nebã tũudum lugundã sẽn wa n lebd saasẽ wã, a pa gʋls sɛb n bas bɩ n me ro-bɛd wall a kãag arzɛgs n zam n bas tẽng zug n yaool n loog ye. A basa karen-biisi, la a wilg yɛl nins ned sẽn dat n yɩ a karen-biig sẽn segd n maanã takɩ. Sɩda, a Zã Evãnzillã pʋgẽ, d yãta a Zezi sẽn gom yel-kãsems a tãab ned ning fãa sẽn dat n yɩ a karen-biig sẽn segd n maane. Bõn-kãensã b sẽn segd n maana yaa bõe? Bõe la d tõe n maan n pids-ba? La wãn to la tõnd mengã tõe n sɩd bãng tɩ d tara zʋg nins b sẽn baoodã n yɩ Kirist karen-biig rũndã-rũndã? *

2. Bõe n yaa bũmb sẽn tar yõod wʋsg b sẽn baood tɩ ned maan n yɩ karen-biiga, wa b sẽn gʋls a Zã Evãnzillẽ wã?

² Kiis a yoob sẽn deng a Zezi kũumã, a kẽnga Zerizalɛm n moon kʋʋngã sẽn da tigim be n na n maan Zãn Kibsã semen tõrã. Woto kɩtame tɩ kibsã pʋɩ-sʋk wakate, “kʋʋnga sʋka wʋsg tẽe” yẽnda. A Zezi kell n talla moonego, hal tɩ kibsã yaoolem daare, ‘neb wʋsg tẽ’ yẽ yɛsa. (Zã 7:10, 14, 31, 37; 8:30) Sasa kãnga, a Zezi goma ne sẽn nan lebg-b tẽedb paalmã n togs bũmb sẽn tar yõod wʋsg b sẽn baood tɩ karen-biig maane, wa tʋm-tʋmd a Zã sẽn gʋls woto wã: ‘Yãmb sã n tall m goama, yãmb yaa mam karen-biis hakɩka.’—Zã 8:31.

3. Zʋg-bʋg n yaa tɩlae sẽn na yɩl tɩ ned ‘kell n tall [a Zezi] goama’?

³ A Zezi sẽn gom woto wã, a ra pa rat n yeel tɩ karen-bi-paalsã tẽeb ra pa sek ye. A ra wilgdame tɩ b ra tõe n yɩɩ a karen-biis hakɩka, b sã n kell n tall a goama la b wilg tɩ b tara sũ-mare. B ra saka a goama, la masã b ra segd n kell n tall-a lame. (Zã 4:34; Hebre dãmba 3:14) Sɩda, a Zezi ra geta sũ-marã wa bũmb sẽn tar yõod wʋsg ne a karen-biisã hali t’a sẽn wa n sõs ne a tʋm-tʋmdbã yaoolem tɩ be a Zã Evãnzillã pʋgẽ wã, a Zezi sagl-b woto naoor a yiibu: ‘Kell-y n tũ maam.’ (Zã 21:19, 22, NW ) Pipi kiris-neb wʋsg maana woto. (2 Zã 4) Bõe n sõng-b tɩ b tall sũ-mare?

4. Yaa bõe n sõng pipi kiris-nebã tɩ b tall sũ-mare?

⁴ Tʋm-tʋmd a Zã sẽn yɩ Kirist karen-biig hakɩk sẽn na maan yʋʋm 70 wã goma bõn-kãseng sẽn sõng bãmb yelle. A pẽga kiris-neb hakɩkã n yeele: “Yãmb tara pãnga la Wẽnnaam goama bee yãmb pʋsẽ la yãmb tõoga wẽng soabã.” Kirist karen-bi-kãensã talla sũ-mare, bɩ b kell n talla Wẽnnaam goama, Wẽnnaam goama sẽn pa bãmb pʋsẽ wã yĩnga. B ra nanda a goama ne b sũy fãa. (1 Zã 2:14, 24) Woto me rũndã-rũndã, sẽn na yɩl n ‘tall sũ-mar  hal tɩ saabã ta,’ d segd n mao n talla Wẽnnaam goama d pʋsẽ. (Matɩe 24:13) Wãn to la d tõe n maan woto? Makr a Zezi sẽn dɩk n leokd sok-kãngã.

‘Wẽnnaam koɛɛgã kelgre’

5. a) Zĩis buud toor-toor bʋs yell la a Zezi gom a makr a yembrẽ? b) A Zezi makrã pʋgẽ, bõn-buudã la zĩigã makda bõe?

⁵ A Zezi rɩka makr n gom bʋt sẽn bʋt bõn-buud yelle, tɩ be a Matɩe, a Mark la a Luk Evãnzill dãmbẽ wã. (Matɩe 13:1-9, 18-23; Mark 4:1-9, 14-20; Luk 8:4-8, 11-15) Y sã n wa karemd kɩba-kãensã, y na n mikame tɩ makrã b sẽn dɩkã sẽn wilgd bũmb ning n tɩ yɩɩdã yaa tɩ bõn-buud yɛngã lʋɩta zĩis buud toor-toor zutu, tɩ b biisã womb me yaa toor-toore. Pipi zĩigã yaa riglimdi, tɩ yiib-n-soabã tom pa waoogẽ, tɩ tãab-n-soabã pid ne gõose. Zĩig a naas-n-soabã yaa toor ne zĩ-kãensã b tãabã, bala a yaa ‘zĩ-sõngo.’ Sã n yaa ne a Zezi mengã sẽn wilg b võorã, bõn-buudã yaa Rĩungã koɛɛg sẽn be Wẽnnaam Gomdã pʋgẽ wã, tɩ zĩigã makd neba sũy sẽn pa taabã. Baa ne zĩis buud toɛy-toɛyã sẽn makd nebã sẽn wõnd taab zĩis kẽerã, neb nins zĩ-sõngã sẽn makdã tara manesem sẽn welg-b toor ne sẽn ket-bã.

6. a) A Zezi makrã pʋgẽ, wãn to la zĩig a naas-n-soabã yaa toor ne zĩis a tãabã, la rẽ võor yaa bõe? b) Bõe n yaa tɩlae ne tõnd sẽn yaa Kirist karen-biisã, sẽn na yɩl n tall sũ-mare?

⁶ Luk 8:12-15 pʋgẽ kɩbarã wilgdame tɩ zĩis a naasã fãa pʋsẽ, nebã ‘wʋmda koɛɛgã.’ La neb nins sẽn tar ‘sũ-sõngã’ pa ‘kelgd koɛɛgã’ bal ye. B ‘talld-a lame n womd biis ne sũ-mare.’ Zĩ-sõng sẽn bʋgs n ta hal tẽngr kɩtame tɩ bõn-buudã kɩ yẽga, tɩ rẽ kɩt t’a bɩ n wom biisi. (Luk 8:8) Woto me, neb nins sẽn tar sũ-sõngã wʋmda Wẽnnaam gomdã võor n nand-a la b reegd-a. (Rom dãmba 10:10; 2 Tɩmote 2:7) Wẽnnaam gomdã paada b pʋsẽ, rẽ n kɩt tɩ b womd biis ne sũ-mare. Woto, tõnd sẽn yaa karen-biisã, sẽn na yɩl n tall sũ-mare, yaa tɩlae tɩ d nand Wẽnnaam Gomdã ne d sũur fãa. (1 Tɩmote 4:15) La wãn to la d tõe n tall mi-beoog ne d sũur fãa ne Wẽnnaam Gomdã?

Sũurã halhaal la tagsg neere

7. Manesem bʋg la b rɩk n tɩ loe ne sũ-sõngo?

⁷ Ges-y Biiblã sẽn dɩkd sũ-sõng n tɩ loe ne manesem ning n yɩlemdẽ wã. ‘Nin-sõng [sũur] tagsdame n yaool n leokdẽ.’ (Yelbũna 15:28) ‘Zusoaba sẽn yaa mam pĩiga la mam fãagda, bɩ y kɩt tɩ mam noor goama ne m sũura tagsg zems yãmb nin gesgo.’ (Yɩɩl Sõamyã 19:15) ‘Mam sũur na n tagsa tags sõama.’—Yɩɩl Sõamyã 49:4.

8. a) D sã n karemd Biiblã, bõe la d pa segd n maane, la bõe la d segd n maane? b) Bõe nafa la d paamda, d sã n tagsd Wẽnnaam Gomdã zug pʋʋsg pʋgẽ? (Paas-y zĩ-gũbr ning sẽn yaa ‘B kɩɩ yẽg sɩdã pʋgẽ’ wã.)

⁸ Wala Biiblã gʋlsdb kãensã, tõnd me segd n pʋʋsame la d tags Wẽnnaam Gomdã la a tʋʋmã zug sõma ne mi-beoogo. Tõnd sã n wa karemd Biiblã bɩ sɛb nins sẽn tik Biiblã zugã, d pa segd n maan yãg-yãg wala sãamb sẽn wa n kaagd zĩ-neer ye. B geta zĩisã n toeemdẽ n yãgdẽ, n filimd bũmb nins fãa b sẽn ne wã, n yaool n pa maagd b mens n get zĩigã sõma ye. D sã n wa zãmsd Biiblã, d segd n dɩka sẽk n tagse, n mams Biiblã babg ning d sẽn  zãmsdã yɛla. * D sẽn maagd d yĩng n tagsd d sẽn karemda zugã yĩnga, Wẽnnaam Gomdã kẽeda d sũurã sõma. A kẽeda tõnd sũurã la a toeemd tõnd tagsgã. A leb n tusda tõnd tɩ d togs Wẽnnaam bũmb ning sẽn be d sũurẽ wã pʋʋsg pʋgẽ. Woto yĩnga, tõnd loeesã ne Wẽnnaam a Zeova wã pãng paasdame, tɩ nonglem ning d sẽn tar ne Wẽnnaamã kɩtdẽ tɩ d ket n tũud a Zezi, baa yel-tood pʋsẽ. (Matɩe 10:22) Vẽenega, tags Wẽnnaam sẽn yetã zug yaa tɩlae, d sã n dat n pa kɩs-sɩd pʋgẽ hal tɩ saabã ta.—Luk 21:19.

9. Wãn to la d tõe n sɩd kɩt tɩ d sũurã ket n deegd Wẽnnaam Gomdã?

⁹ A Zezi sẽn dɩk makr ningã wilgdame me tɩ yɛl n tõe n gɩdg bõn-buudã sẽn yaa Wẽnnaam goama bɩʋʋngo. Woto yĩnga, sẽn na yɩl n kell n yɩ karen-biis hakɩka, d segd n 1) bãnga gɩdgr nins b sẽn mak ne zĩ-yood tɩ b gom b yell makrã pʋgẽ wã, la 2) d mao n dems gɩdg-kãens wall d gil-ba. D sã n maan woto, d na n sɩd kɩtame tɩ d sũyã ket n deegd Rĩungã bõn-buud la t’a ket n womd biisi.

‘Sẽn be-b sor kɩrengã’ paamda tiisgu

10. Bilg-y pipi zĩigã yell a Zezi sẽn gom a makrẽ wã, la y wilg a võore.

¹⁰ Pipi zĩig ning bõn-buudã sẽn dʋʋgdẽ  wã yaa “sor kɩrenga,” zĩig ning b sẽn ‘tabd’ bõn-buudã. (Luk 8:5) Zĩig sẽn be sor-kɩreng n pasgd pʋʋg yaa zĩig so-loaadbã sẽn tabd wʋsgo. (Mark 2:23) Woto me, neb nins sẽn basd tɩ dũni kãngã tʋʋm ka tɛkã rɩk b sẽkã la b pãngã tõe n gesame tɩ b tʋʋma loog-b lame, tɩ rẽ kɩt tɩ b pa tar mi-beoog ne Wẽnnaam goamã ne b sũur fãa ye. B wʋmd-a lame, la b sẽn pa bʋgsd a zugã kɩtame t’a ket n pa kẽed b sũyã ye. B pa yãt n tall nonglem ne-a la ‘Sʋɩtãana wa n yiis Wẽnnaam koɛɛga bãmb sũyã pʋsẽ tɩ bãmb ra tẽ n paam fãagr ye.’ (Luk 8:12) D tõeeme tɩ ra yɩ woto ne-d bɩ?

11. Wãn to la d tõe n maan tɩ d sũurã ra lebg wa zĩig sẽn diglmi?

¹¹ Yɛl wʋsg la d tõe n maan tɩ d sũurã ra wa lebg wa sor-kɩreng zĩig sẽn pa womd biis ye. Zĩig b sẽn tab tɩ riglim tõe n ye lebga bʋgsg n womd biisi, so-loaadb sã n ye pa tũud be. Woto me, bao sẽk n zãms Wẽnnaam Gomdã la tags a zug tõe n kɩtame tɩ sũur wa lebg wa zĩ-sõng sẽn womd biisi. Pa d sẽn na n fõr n kẽ dũniyã yɛlẽ la d na n tõog n maan woto ye. (Luk 12:13-15) La yaa d sẽn na n sɩd bao sẽk n tags vɩɩmã “bũmb nins sẽn yaa sõama n yɩɩda” zutu.—Filip rãmba 1:9-11.

‘Sẽn be-b pĩigã zugã’ zoeta rabeem

12. A Zezi makã pʋgẽ, bõe n sɩd kɩt tɩ kaafã kʋɩt zĩig a yiib-n-soabẽ wã?

¹² Bõn-buudã sẽn lʋɩ zĩig a yiib-n-soabẽ wã, a ka pa be bal wa pipi zĩigẽ wã ye. A pusa yẽg n bɩ. La wĩndg sẽn zẽke, a tʋʋlgã kɩtame tɩ kaafã zelg n kʋɩ. La bãng-y t’a sẽn kʋɩyã pa wĩndgã yĩng ye. Zĩ-sõngẽ bõn-bɩtgã me bee wĩntoogẽ, la a pa kʋɩt ye, a bɩta sõma. Bõe yĩng tɩ yẽ pa kiidẽ? A Zezi wilgame tɩ kaafã sẽn kʋɩtã ya a ‘toma sẽn ka waooga yĩnga,’ la “maasr sẽn ka waooga yĩnga.” (Matɩe 13:5, 6; Luk 8:6) Tom ning sẽn gãneg “kugr” zugã pa wʋsg ye. Rẽ kɩtame tɩ kaafã pa tõe n kɩ yẽg tɩ sek a na paam koom n yals sõma ye. Kaafã sẽn kʋɩtã yaa tomã sẽn pa waoogã yĩnga.

13. Neb nins sẽn wõnd zĩig tom sẽn pa waoogã yaa nin-bʋs buudu, la sɩd yaa bõe n kɩt tɩ b manesma yaa woto?

¹³ Makrã bab-kãngã gomda neb nins sẽn ‘deegd koɛɛgã ne sũ-noogo,’ n tũud a Zezi ne yẽesem “wakat bilf bala” yelle. (Luk 8:13) “Toog bɩ namsg” sẽn zabd wa wĩnto-sãeeng sã n paam-ba, rabeem n kẽed-b tɩ b sũ-noogã ne b pãngã sa, tɩ b bas Kirist tũubu. (Matɩe 13:21) La bũmb ning sẽn sɩd kɩt tɩ b zoet rabeema pa kɩɩsgã b sẽn segd b tẽebã yĩngã ye. Tɩ bõe, Kirist karen-biis sõor ka tɛk n maand sũ-mar namsg buud toor-toor pʋsẽ, la b yaool n ket n yalsda kãn-kãe. (2 Korẽnt dãmba 2:4; 7:5) Bũmb ning sẽn sɩd kɩt tɩ neb kẽer zoet rabeem n wa lʋɩyã, yaa tɩ b sũyã sẽn wõnd pĩigã gɩdgd-b lame tɩ b pa tagsd tẽebã yɛl sẽn yaa sõma wã zut neer ye. Woto yĩnga, b mi-beoogã ne a Zeova la ne a gomdã pa zulum, a leb n ka pãng sẽn sek a soabã na tõog n yals kãn-kãe kɩɩsg taoor ye. D na n maana wãn tɩ woto ra paam-do?

14. Bõe la ned segd n maan t’a sũurã ra wa lebg wa zĩig tom sẽn pa waooge?

¹⁴ Ned fãa segdame n modg tɩ bõn-gɩdgds sẽn wõnd kugri, wala sũ-kẽk sẽn yaa kãsenga, rat-m-yembr sẽn solge, bɩ tags-wẽng ra zĩnd a sũurẽ ye. Yel-kãensã buud sã n zoe n beeme, Wẽnnaam Gomdã sẽn tar pãngã tõe n yiis-a lame. (Zeremi 23:29; Efɛɛz rãmba 4:22; Hebre dãmba 4:12) Rẽ poore, d sã n bʋgs la d pʋʋse, ‘koɛɛgã na n sela’ d sũurẽ wã n kɩ yẽg sõma. (Zak 1:21) Woto na n kõ-d-la pãng tɩ d mao  ne raood komsgã, la d paam daood n kell n yɩ kɩs-sɩd dãmba, baa ne yel-toodã fãa.

‘Sẽn be-b gõosã sʋkã’ sũy pʋyame

15. a) Bõe yĩng tɩ zĩig a tãab-n-soabã yell a Zezi sẽn goma pak tõnd n yɩɩda? b) Bõe n wat n baas n maan zĩig a tãab-n-soabẽ wã, la bõe yĩnga?

¹⁵ Zĩig a tãab-n-soaba sẽn tar gõosã paka tõnd n tɩ yɩɩd fãa, bala a wõnda zĩ-sõngã yɛl kẽer pʋgẽ. Wa zĩ-sõngã, zĩig ning sẽn tar gõosã basdame tɩ bõn-buudã yi n kɩ yẽg n sɩng bɩʋʋngo. Sɩngrã, zĩis a yiibã ki wã bɩʋʋng yaa yembre. La sã n wa beẽ-beẽ, bũmb n wat n gɩdg kaafã bɩʋʋngo. Zĩ-kãngã yẽ yaa toor ne zĩ-sõngã, bala a wat n pida ne gõose. Kaafã sã n bɩt zĩ-kãngã, a segd n maoome tɩ ‘gõosã sẽn bɩt ne-a’ wã ra rɩ-a ye. Wakat n na n zĩnd t’a yiibã na n mao n bao rɩɩbo, vẽenem la weere, la yaa gõosã n na n baas n lim kaafã n ‘dɩ-a.’—Luk 8:7.

16. a) Nin-bʋs n wõnd zĩig sẽn tar gõose? b) Sã n yaa ne Evãnzill dãmb a tãabã, yaa bõe la gõosã makda?—Ges-y tẽngr notã.

¹⁶ Nin-bʋs buud n wõnd zĩig ning sẽn tar gõosã? A Zezi wilgdame tɩ: “Yaa neb nins sẽn wʋmd Wẽnnaam koɛɛgã n loogdẽ n sakdẽ tɩ yɩɩr ne arzɛgse la dũniyã vɩɩm sũ-noog rɩt Wẽnnaam koɛɛgã, tɩ bãmb ka wom bi-moaam ye.” (Luk 8:14) Wala bõn-buudã b sẽn bʋdã la gõosã sẽn bɩt zĩigẽ wã wakat yɛngã, neb kẽer makdame n na n tũ Wẽnnaam gomdã la b bao ‘vɩɩmã sũ-noog’ me. B bʋta Wẽnnaam Gomdã b sũyã pʋsẽ, la bõn-yood a taab pʋgb n wat n dat n sãam-a. Tẽebã wɛɛngẽ, b sũyã pʋyame. (Luk 9:57-62) Rẽ gɩdgda bãmb tɩ b pa rɩkd sẽk tɩ sek n pʋʋs la b tags Wẽnnaam Gomdã zug sõma ye. B pa rɩlgd b mens ne Wẽnnaam goama tɩ seke, tɩ woto kɩt tɩ b pa tar mi-beoog ning sẽn yaa tɩlae sẽn na yɩl n ket n yas kãn-kãeyã ye. Bilf-bilfã, bõn-datɩ sẽn pa tẽeb rẽnd wat n lima b tẽebã hal n wa ‘rɩ-a.’ * Ad woto sɩd yaa baas-wẽng n kõ neb nins sẽn pa nong a Zeova ne b sũyã fãa wã!—Matɩe 6:24; 22:37.

17. Yãk-bʋg la d segd n maan vɩɩmã pʋgẽ sẽn na yɩl tɩ makr wɛɛngẽ gõosã yell a Zezi sẽn gomã ra wa sãam-do?

¹⁷ D sã n lebs yĩngã yɛl poorẽ la d rɩk tẽebã yɛl n lʋɩɩs taoore, dũni kãngã toodã la a yõ-noogrã pa na n wa sãam-d ye. (Matɩe 6:31-33; Luk 21:34-36) D pa segd abada n maan laas-laas ne Biiblã kareng la d sẽn karma zug bʋgsg ye. D na n yãa sẽk n zĩnd n tags sõma la d pʋʋse, d sã n maan d sẽn tõe tɛk n pa gĩd d vɩɩmã ye. (1 Tɩmote 6:6-8) Wẽnnaam sõgen dãmb nins sẽn maan woto, n võ makr wɛɛngẽ gõosã sẽn na yɩl n kõ kaafã rɩɩbo, vẽenem la weer n paas t’a wom biisã, b paamda a Zeova barka. Ad a Sandra sẽn tar yʋʋm 26 sẽn yeele: “Mam sã n tags bark nins m sẽn paam sɩdã pʋgẽ wã yelle, m mikdame tɩ  dũniyã pa tõe n kõ baa fʋɩ sẽn tõe n dɩk n mak ne rẽ ye!”—Yɩɩl Sõamyã 84:12.

18. Tõnd sẽn yaa kiris-nebã, wãn to la d tõe n kell n tall Wẽnnaam goamã la d tall sũ-mare?

¹⁸ Rẽnd vẽenega, Wẽnnaam Gomdã sã n ket n be tõnd sũyẽ wã, d fãa, kom-bɩɩs la kãsemb sẽn yaa Kirist karen-biisã, d na n kell n talla Wẽnnaam Gomdã la d tall sũ-mare. Woto yĩnga, bɩ d gũus tɩ tõnd makr wɛɛngẽ sũurã ra tol n diglmi, n da yɩ wa zĩig tom sẽn pa waooge, bɩ n tall gõos ye, la d modg t’a kell n yɩ bʋgsg la zulunga. D sã n maan woto, d na n tõog n deega Wẽnnaam goamã sõma n ‘wom biis ne sũ-mare.’—Luk 8:15.

[Tẽngr not rãmbã]

Y na n leokame tɩ bõe?

• Bõe yĩng tɩ d segd n ‘kell n tall a Zezi goama’?

• Wãn to la d tõe n kɩt tɩ Wẽnnaam goama pa d sũyẽ wã?

• Zĩis a naasã yell a Zezi sẽn gomã makda nin-bʋs buudu?

• Wãn to la y tõe n yã sẽk n tags Wẽnnaam goama zugu?

[Zãmsgã sogsgã]

[Zĩ-gũbri/Foto, seb-neng 19]

‘B kɩɩ yẽg sɩdã pʋgẽ’

NEB wʋsg sẽn yɩ Kirist karen-biis n kaoos wilga yʋʋmd ne a to fãa tɩ b ‘kɩɩ yẽg sɩdã pʋgẽ.’ (2 Pɩɛɛr 1:12) Yaa bõe n sõngd-b tɩ b tall sũ-mare? Ges-y bãmb kẽer goama.

“Mam baasda daarã ne Biiblã kareng la pʋʋsgo. Rẽ m tagsda m sẽn karma zugu.”—A Jean, sẽn deeg lisg yʋʋmd 1939.

“M sã n tags n ges a Zeova sẽn tar ziir to-to ning la a yaool n nong tõnd wʋsgã, kõt-m-la sũur pʋgẽ bãan la pãng tɩ m tõe n pa kɩs-sɩd pʋgẽ.”—A Patricia, sẽn deeg lisg yʋʋmd 1946.

“M sẽn kell n minim n zãmsd Biiblã sõma la m deegd ‘Wẽnnaam bõn-zulumsã,’ m tõog n ket n maanda a Zeova raabã.”—1 Korẽnt dãmba 2:10, NW; a Anna, sẽn deeg lisg yʋʋmd 1939.

“Mam karemda Biiblã la tõnd sɛbã sẽn tik Biiblã zugã sẽn na yɩl n vaees m sũurã la bũmb nins sẽn tusd maam m yel-manesmã pʋgẽ wã.”—A Zelda sẽn deeg lisg yʋʋmd 1943.

“Sasa nins sẽn yɩ sõma n yɩɩg ne maam yaa m sẽn wat n yi n kẽnd n gomd ne a Zeova pʋʋsg pʋgẽ n wilgd-a sẽn sɩd be m sũurã pʋgẽ wã.”—A Ralph, sẽn deeg lisg yʋʋmd 1947.

“Mam sɩngda be-vẽerã ne daar verse wã vaeesgo, la m karem Biiblã. Rẽ kɩtdame tɩ m tar bõn-paalg n na n bʋgs a zug daarã tõre.”—A Marie, sẽn deeg lisg yʋʋmd 1935.

“Sã n yaa ne maam, Biiblã verse fãa vaeesg sɩd kõta maam pãnga.”—A Daniel, sẽn deeg lisg yʋʋmd 1946.

Wakat bʋg la yãmb dɩkd sẽk n pʋʋs la y bʋgs Wẽnnaam goama zugu?—Daniɛll 6:11; Mark 1:35; Tʋʋma 10:9.

[Foto, seb-neng 22]

D sã n ning tẽebã yɛl pipi zĩigẽ, d tõe n ‘woma biis ne sũ-mare’