Soaalã zaabr dɩɩbã tara yõod wʋsg ne-yã

SOAALÃ zaabr dɩɩb tara yõod sẽn kaoosd wakat fãa yĩng ne-y bɩ? Sẽn na yɩl n bãnge, bɩ d reng n ges võor ning a Zezi Kirist meng sẽn kõ yel-kãngã sẽn pa wõnd a taabã.

Yʋʋmd 33 Nizã kiuug rasem 14 zaabre, a Zezi tigma a tʋm-tʋmdb 12 wã Zerizalɛm yĩngr do-pʋgẽ n na n maan Pakã b sẽn maand yʋʋmd-yʋʋmdã. B sẽn dɩ Pakã rɩɩb n sa wã poore, zãmb soab a Zida yik n yiime n na n tɩ zãmb a Zezi. (Zã 13:21, 26-30) Ne tʋm-tʋmdb 11 wã sẽn ketã, a Zezi sɩnga “Soaalã zaabr dɩɩb siglgu.” (1 Korẽnt dãmba 11:20, NW) B leb n boonda bõn-kãngã me tɩ Tẽegre, bala a Zezi kõo a karen-biisã noor baraar n yeel-ba: “Bɩ y maan bõn-kãngã n tẽegd mam yelle.” Yaa bõn-kãngã bal la a Zezi kõ kiris-nebã noor tɩ b maand n tẽegd a yelle.—1 Korẽnt dãmba 11:24.

Sã n yaa ne gom-biis võor sebr a yembre, (Webster) tẽegr yaa bũmb sẽn “kɩtd tɩ f ket n tẽr bũmb yelle,” bɩ n kɩtdẽ tɩ f “pa yĩmd-a ye.” Zĩis wʋsgo, nebã nong n lugenda bũmb n tẽegd yelle, bɩ b yãkd raar n tẽegdẽ, wall b tẽegd ned bɩ bũmb sẽn tar yõod wʋsg yelle. Woto, a Zezi me lugla tẽegr dɩ-kãngã sẽn na yɩl tɩ sõngd a karen-biisã tɩ b ket n tẽegd yel-kãsems nins a sẽn maan baraarã. Tẽegrã rɩ-kãngã ra na n wa sõnga zãmaan nins sẽn na n pʋgã neba, tɩ b sã n wa maand-a bɩ b tẽegd a Zezi sẽn tũnug ne bũmb nins tɩ yɩ makr n maan bõn-sãang ning baraar yʋng t’a võorã tagem hal wʋsgã yelle. Yaa bõe la a Zezi tũnug ne, la b võor yaa bõe? Bɩ d ges Biiblã kibay nins sẽn wilgd bũmb ning sẽn zĩnd yʋʋmd 33 wã daar yʋngã.

Bõn-makds sõamyã

“Bãmb yaool n dɩka buri n ning barka n kao n kõ bãmba n yeele: ‘Ada yaa mam yĩnga sẽn sãam yãmb yĩnga. Bɩ y maan bõn-kãnga n tẽegd mam yelle.’ ”—Luk 22:19.

A Zezi sẽn dɩk burã n yeel tɩ “ada yaa mam yĩngã,” a ra wilgdame tɩ burã sẽn pa tar dabɩllã makda yẽ yĩngã sẽn pa tar yel-wẽndã, a sẽn na n kõ “tɩ yɩ dũniyã vɩɩmã.” (Zã 6:51) Baa ne Biiblã lebgr kẽer pʋsẽ b sẽn lebg Gɛrek gom-biig ning sẽn yaa es·tinʹ tɩ “yaa mam yĩngã,” a Thayer Biibl gom-biis võor sebrã (Greek-English Lexicon of the New Testament) wilgame tɩ naoor wʋsgo, gom-bi-kãngã rat  n yeelame tɩ: “makda, rat n yeelame tɩ.” A gomda makr yelle.—Matɩe 26:26.

Yaa woto me ne divẽ wã. A Zezi yeelame: “Bon-yũudl kãngã yaa mam zɩɩm sẽn yaa kãab paalg zɩɩm sẽn daag yãmb yĩnga.”—Luk 22:20.

A Matɩe kibarã pʋgẽ, a Zezi yeela woto divẽ wã wɛɛngẽ: ‘Yõ wã [makda] mam zɩɩm sẽn yaa kaool paalg zɩɩm sẽn daag neb wʋsg yel-wẽna sugr yĩnga.’ (Matɩe 26:28) A Zezi ra rɩka divẽ wã wala makre, bɩ bũmb sẽn makd yẽ meng zɩɩmã. Yẽ mengã zɩɩm sẽn daagã n na n yɩ ‘kaool paalgã’ yẽbgre, a karen-biis nins sẽn zae ne vʋʋsem sõng sẽn na n dɩ naam ne yẽ n yɩ rĩm dãmb la maan-kʋʋdb saasẽ wã yĩnga.—Zeremi 31:31-33; Zã 14:2, 3; 2 Korẽnt dãmba 5:5; Wilgri 1:5, 6; 5:9, 10; 20:4, 6.

Divẽ wã leb n yaa sẽn na n tẽegdẽ tɩ ya a Zezi zɩɩmã sẽn daagã zug bal la b tõe n tik “n kõ yel-wẽna sugri,” tɩ rẽ pak sor n kõ neb nins sẽn lagemd n yũud-a wã tɩ b na n wa tɩ naag Kirist saasẽ n dɩ naam. Wa sẽn zemse, yaa sẽn paam-b saasẽ boollã tɩ b sõorã yaa bilfã bal n tõe n wãb burã la b yũ divẽ wã Tẽegrẽ wã.—Luk 12:32; Efɛɛz rãmba 1:13, 14; Hebre dãmba 9:22; 1 Pɩɛɛr 1:3, 4.

La yaa wãn to yẽ ne a Zezi karen-biis nins fãa sẽn pa be kaool paalgã pʋgẽ wã? Karen-bi-kãens yaa Soaalã ‘piis a taabã’ sẽn pa na n tɩ lagem ne Kirist saasẽ n dɩ naamã. Bãmb gũudame n na n vɩɩmd wakat sẽn kõn sa, tẽngã sẽn na n lebg arzãnã zugu. (Zã 10:16; Luk 23:43; Wilgri 21:3, 4) B sẽn yaa kiris-neb ‘kʋʋn-kãseng’ sẽn tar kɩs-sɩd ‘n maand [Wẽnnaam] tʋʋmd wĩn-toog ne yʋngã,’ yaa ne sũ-noog la mi-beoog la b wat Soaalã zaabr dɩɩbẽ n na n yɩ gɛtb bala. B goamã ne b tʋʋmã sɩd wilgda woto: “Fãagr yaa tõnd Wẽnnaam sẽn zao geera zuga pãng yĩnga la Pebila pãng yĩnga.”—Wilgri 7:9, 10, 14, 15.

B segd n tẽeg-a-la naoor a wãn yʋʋmd pʋgẽ?

“Bɩ y maan bõn-kãnga n tẽegd mam yelle.”—Luk 22:19.

Yʋʋmd pʋgẽ, yaa naoor a wãn la b segd n maan Kirist kũumã Tẽegre? A Zezi ra pa wilg rẽnda n fasem ye. Baasg zãnga, sẽn mik t’a lugl-a-la Nizã rasem 14 Pakã zaabrã, Israɛll nebã sẽn da maand yʋʋmd-yʋʋmdã, yaa vẽeneg t’a Zezi ra ratame tɩ b maan Tẽegrã woto me. Israɛll nebã ra maanda Pakã yʋʋmd-yʋʋmd n tẽegd b sẽn fãag-b n yiis Ezipt yembdẽ wã, tɩ kiris-nebã maand Kirist kũumã Tẽegr yʋʋmd fãa n tẽegd a kũumã sẽn yiisd b yel-wẽnã la kũumã yembd pʋgẽ wã.—Yikri 12:11, 17; Rom dãmba 5:20, 21.

Sẽn yaa yʋʋmd-yʋʋmd la b nong n tẽegd bõn-kãseng yellã pa yel-sãang ye. D rɩk makr ne yi-kãadb sẽn na n dat n maan b kãadmã kõom daar tẽegre, wall tẽng rãmb sẽn na n dat n tẽeg yel-kãseng sẽn zĩnd b tẽngã kʋdemd pʋgẽ. Yʋʋmd fãa, yaa vugr bal la b nong n maand bõn-kãensã tẽegre. Bũmb sẽn be yamleoog yaa tɩ Kirist loogrã zugẽ, sẽn na maan yʋʋm kobse, b ra ket n boonda neb wʋsg sẽn da tẽed Kiristã tɩ “Piig la a naasã rãmba,” b sẽn da maand a Zezi kũumã Tẽegr vugr yʋʋmd fãa Nizã rasem 14 yĩnga.

Tẽegrã maaneg yaa nana la a võorã tagmame

Tʋm-tʋmd a Poll wilgame tɩ Soaalã zaabr dɩɩbã tẽegr na n sõnga a Zezi karen-biisã tɩ b  ket n ‘moond Zusoaba kũum.’ (1 Korẽnt dãmba 11:26, Sebr Sõngo) Woto yĩnga, Tẽegrã ra na n wilgda tʋʋm kãseng ning a Zezi sẽn tʋm Wẽnnaam daabã pidsg pʋgẽ a kũumã maasem yĩngã.

A Zezi Kirist sẽn kell n tall kɩs-sɩd hal n tãag a kũumã, a wilgame tɩ Wẽnnaam a Zeova yaa Naand sẽn tar yam la nonglem n leb n yaa Naab sẽn ka to sẽn tar tɩrlem. Sẽn yaa lebend ne a Sʋɩtãan sẽn yeelã, a Zezi pa maan wa a Ãdem ye. A kõo kaset ne a tʋʋmã tɩ baa nams-toaag pʋgẽ, ninsaal tõe n kell n talla kɩs-sɩd ne Wẽnnaam.—Zoob 2:4, 5.

Soaalã zaabr dɩɩb leb n kɩtdame tɩ d ket n tẽegd a Zezi maoongã sẽn pukd nonglem ningã ne mi-beoog wʋsgo. Baa ne nams-toos nins fãa a sẽn deegã taoore, a Zezi kell n saka a Ba wã zãng-zãng n pa tol n kɩɩs-a ye. Woto, a ra tõe n dɩka a ninsaal vɩɩmã sẽn zems zãngã n yao a Ãdem yel-wẽndã samd sẽn yaa kãseng wʋsgã. Wala a Zezi meng sẽn wilgã, a waame ‘n na n kõ a vɩɩmã tɩ yao neb wʋsg yĩnga.’ (Matɩe 20:28) Woto kɩtame tɩ neb nins fãa sẽn tar tẽeb ne a Zezi wã tõe n paam b yel-wẽnã sugr la vɩɩm sẽn kõn sa, wa sẽn zems ne Wẽnnaam sẽn da tʋlg bũmb ning ninsaalbã yĩng hal sɩngrẽ wã.—Rom dãmba 5:6, 8, 12, 18, 19; 6:23; 1 Tɩmote 2:5, 6. *

A Zeova sẽn maan segl-kãensa fãa n na n fãag ãdem-biisã wilgda a sõmblmã d sẽn pa segd ne wã sẽn yaa kãsengã. Biiblã yetame: “Wẽnnaam sẽn tʋm bãmb Biiga sẽn-ka-to dũniyã pʋgẽ tɩ tõnd paam vɩɩm bãmb maasem yĩnga wilgdame tɩ bãmb nonga tõndo. La nonglem kãng ka tõnd sẽn nong Wẽnnaam ye, yaa bãmb n nong tõndo n tʋm bãmb Biiga tɩ b yɩ maoong tõnd yel-wẽna yĩnga.”—1 Zã 4:9, 10.

N-ye, ad Zezi kũumã Tẽegr sɩd yaa bõn-kãseng tɛkẽ! A maanegã yaa nana hal wʋsgo, n kɩt tɩ dũniyã gill zugu, baa yɛlã sẽn sõs n yaa to-to bɩ b ket n tõe n maan-a. A leb n yaa makr sẽn zems n tẽegd a yõodã labsem wakat sẽn kaoos pʋgẽ.

A võorã ne yãmbã

Tõnd Soaal a Zezi Kirist kũumã sẽn yɩ mãoongã yɩɩ toog hal wʋsg ne yẽ la a Ba a Zeova. A Zezi sẽn yɩ ninsaal sẽn zems zãngã  yĩnga, kũumã pa tol n bẽeg-a baa bilf wa a sẽn bẽeg tõnd fãa wã ye. (Rom dãmba 5:12; Hebre dãmba 7:26) A Zezi ra tõe n vɩɩmda wakat sẽn kõn sa yĩnga. B ra pʋs n pa tõe n kʋ-a ne pãnga, sã n da pa tũ ne yẽ mengã raab ye. A yeelame: “Ned ka yiisd mam vɩɩm ye, yaa mam meng n kõt-a.”—Zã 10:18.

Baasg zãnga, a Zezi sakame n dɩk a vɩɩmã sẽn zems zãngã n kõ tɩ yɩ maoongo, tɩ rẽ kɩt t’a na n “sãam Sʋɩtãana sẽn so kũuma pãnga, la b fãag neb nins sẽn da zoet kũum n be yembd pʋgẽ b yõor tɛkã.” (Hebre dãmba 2:14, 15) Kirist nonglmã sẽn kɩt t’a rɩk a meng n kõ maoongã yɩɩ vẽeneg ne a sẽn sak n ki kũum ningã. A ra reng n mii a sẽn da na n nams la a wa baas n ki to-to wã.—Matɩe 17:22; 20:17-19.

A Zezi kũuma Tẽegr leb n kɩtdame tɩ d tẽeg nonglem kãseng ning sẽn tɩ yɩɩdã, tõnd saasẽ Ba a Zeova sẽn wilgã. Ad a Zeova sũur sɩd sãama wʋsgo, yẽ sẽn yaa Ba sẽn pid ne nonglem ‘la nimbãan-zoeer hal wʋsgã,’ a sẽn wa n wʋm a Zezi “sẽn kelem n pʋʋs ne kosg la nintãma” Getsmane zẽedẽ wã, n paas a sẽn wa n get b sẽn namsd a Zezi wʋsgo, n ka-a ra-lukã zug ne wẽnem sẽn loog noore, t’a nams wʋsg n yaool n wa ki wã. (Zak 5:11; Hebre dãmba 5:7; Zã 3:16; 1 Zã 4:7, 8) Baa yel-kãensã sẽn loog na maan yʋʋm 2000 masã wã, rẽ zug tagsg yen-yen bal ket n kõta neb wʋsg sũ-sãamse.

Tags-y n ges Wẽnnaam a Zeova ne a Zezi Kirist sẽn yao yaood sẽn yaa toog hal wʋsg woto tõnd sẽn yaa yel-wẽn-maandbã yĩngã! (Rom dãmba 3:23) Tõnd maooda ne yel-tood wakat fãa, d sẽn dog ne yel-wẽn n yaa pa-zems-zãng rãmba yĩngã. Baasgo, ne tẽeb sẽn tik a Zezi maoongã sẽn yɩ rondã zugu, d tõe n kosa Wẽnnaam d yel-wẽnã sugri. (1 Zã 2:1, 2) Woto kɩtame tɩ d tõe me n kolg Wẽnnaam ne raoodo, la d tall sũur kaset sẽn yaa yɩlemde. (Hebre dãmba 4:14-16; 9:13, 14) Sẽn yɩɩd fãa, d saagd n na n wa vɩɩmda wakat sẽn kõn sa tẽngã zug sẽn na n lebg arzãnã pʋgẽ. (Zã 17:3; Wilgri 21:3, 4) Yaa a Zezi sẽn tʋm tʋʋm-kãseng sẽn ka to n dɩk a meng n kõ maoongã yĩng n kɩt tɩ d tõe n paam bark kãensã la a taab sõor ka-tɛkã.

D tall naneb ne Soaalã zaabr dɩɩbo

Sãmbg sẽn ka be, Soaalã zaabr dɩɩb yaa “Wẽnnaam bark kãsenga,” d sẽn da pa segd ne wã pukri. Sẽn paase, Wẽnnaam a Zeova sẽn kõ maoongã sẽn yɩ rondã n sak t’a Zezi maan a mengã maoong ne nonglmã, a kõ-d-la ‘kũun noor sẽn ka tõe n togse.’ (2 Korẽnt dãmba 9:14, 15) Wẽnnaam sẽn tʋm nonglem tʋʋm kãsems woto a Zezi Kirist maasem yĩngã pa kɩtd tɩ y tar mi-beoog sẽn yaa kãseng ne-a sɩda?

D tara bas-m-yam tɩ woto sɩd kɩtame tɩ y tar mi-beoog wʋsgo. Yaa rẽ n so tɩ d boond-y ne d sũur fãa tɩ y wa naag a Zeova Kaset rãmbã n maan a Zezi kũumã Tẽegre. Rõandã yʋʋmdã, Tẽeg-kãng na n yɩɩ arba raare, tʋʋl-nif kiuugã pʋgẽ rasem 16 wĩndgã kõom poore. Ne sũ-noogo, a Zeova Kaset rãmb nins sẽn be yãmb sakẽ wã na n sõng-y lame tɩ y bãng bõn-kãseng kãngã sẽn na n zĩnd zĩig ninga, la a maanegã lɛɛr takɩ.

[Tẽngr note]

[Zĩ-gũbri/Foto rãmba, seb-​neng a 6]

“WOTO YAA MAM YĨNGÃ,” BƖ “WOTO MAKDA MAM YĨNGÃ?” BƲG LA SƖDA?

A Zezi sẽn da wa n yeel tɩ yẽ yaa “yãgr noore,” la t’a ‘yaa viyn tɩɩg mengã,’ ned ba a ye ra pa tags t’a yaa yãgr noor sɩd-sɩda, bɩ t’a ra yaa viyn tɩɩg sɩd-sɩd ye. (Zã 10:7; 15:1) Woto me, Biibl a yembr (La Bible de Jérusalem) sẽn lebs n dɩk a Zezi goamã n yeel tɩ: “Kup kãngã yaa kaool paalgã,’ d pa tond n tags tɩ yaa kupã meng n da yaa kaool paalgã ye. Leb n yaa woto me ne a sẽn yeel tɩ burã ‘ra yaa’ yẽ yĩngã. Vẽenega, ned fãa ra pa tõe n kɩɩs t’a ra ratame bal n wilg tɩ burã ra makda yẽ yĩngã ye. Sẽn zems ne woto, a Charles B. Williams Biiblã lebgrẽ, b ningame tɩ: “Woto makda mam yĩngã.”—Luk 22:19, 20.

[Foto, seb-​neng a 5]

Wa sẽn zemse, bur sẽn ka rabɩllã la divẽ wã makda a Zezi yĩngã sẽn pa tar yel-wẽndã, ne a zɩɩma sẽn daagã

[Foto, seb-​neng a 7]

A Zezi kũumã Tẽegr yaa Wẽnnaam a Zeova ne a Zezi Kirist sẽn wilg nonglem kãseng ningã tẽegre