‘Bɩ y kolg Wẽnnaam, la a na kolg yãmba’

Pĩndã, la masã: A paama pãng n tõog n toeem

A SANDRA yaa pag sẽn yit Megsiko. A yeelame tɩ yẽ ra yaa bãmb zakã bi-wɛgemdga. B sẽn pa ges a yell ne nonglem wʋsgã yĩng kɩtame t’a bi-bɩɩlmã sasa pa yɩ sõma ye. A yeela woto: “Mam sẽn da wa n yaa bi-bɩɩgã, mam vɩɩmã ra pa tol n tar bõn-datl ye. M da tara sãmbs wʋsgo, la m pʋd n da pa wʋmd m vɩɩmã meng võor lae-lae ye.”

A Sandra sẽn wa n ta kolɛɛse, a sɩnga a ba wã divẽ yũub yiri. Bilf-bilfã, a wa n daada divẽ wã a toore, n lebg rã-yũuda. “Mam yamã ra yii ne m vɩɩmã zãng fasɩ.” Woto la a yeel-yã. A Sandra wa n mak n kong n kẽe dorg rɩkre. A yeelame: “Bũmb ning sẽn da tõe n sõng maam tɩ m yĩm m yɛlã, ra yaa bũmb ning m sẽn da suy m korgẽ wã bala: rãam butell bɩ tɩ-biisi, wall dorg ning b sẽn boond tɩ marizuana wã bilfu.”

A Sandra sẽn wa n sa a logtoeemdã kareng poore, a tolg n lʋɩɩ rãamã yembd pʋgẽ zãng fasɩ. A zoe n maka a meng kʋʋbo, la a põsame.

A Sandra kẽe tũudum toɛy-toɛy n saagdẽ t’a na n paama tẽeb sõngr la belsgo, la baas n pa yãk neng ye. A sẽn wa n ye pa tagsd t’a na n tɩlgame n tolg n koms raood fasɩ wã, naoor wʋsgo, a kelem n boola Wẽnnaam woto: “Fo bee yɛ? Bõe yĩng tɩ fo pa sõngd maam?” A yellã wẽnem da maneg n zẽname, tɩ paga a ye sẽn ya a Zeova Kaset soab wa wa n na n sõs ne-a. Woto wa n baasa ne Biibl zãmsgo. A Sandra sũur yɩɩ noog hal wʋsg a sẽn wa n bãng t’a Zeova ‘pẽnegda neb nins suy sẽn sãamã, la a fãagd sũ-pa-noom dãmbã.’—Yɩɩl Sõamyã 34:18.

Pag ning sẽn zãmsd Biiblã ne a Sandra wã sõng-a lame t’a bãng t’a Zeova miime t’a Ãdem yel-wẽndã sẽn bẽeg tõndã yĩnga, d pa zems zãng ye. A Sandra wa n bãngame tɩ Wẽnnaam mii tõnd sẽn pa tõe n tũ a no-tɩrsã tɩ zems zãng fasɩ wã võore. (Yɩɩl Sõamyã 51:7; Rom dãmba 3:23; 5:12, 18) A sẽn bãng t’a Zeova pa get tõnd pãn-komslmã bala, la t’a leb n pa baood tɩ tõnd maan sẽn yɩɩd d pãngã, a sũur sɩd yɩɩ noog hal wʋsgo. Yɩɩl-gʋlsdã ra soka woto: “[Zeova,] mam soaala, yãmb sã n tẽeg yel-wẽna n ka base, ãnda n na n yalse?”—Yɩɩl Sõamyã 130:3.

Biiblã zãms-kãseng a ye sẽn kõ a Sandra sũ-noog wʋsg yɩɩ a Zezi Kirist sẽn kõ a meng maoong n dol tõnd yĩngã. Ne maoong-kãngã maasem, a Zeova wilga nimbãan-zoeer ne ãdem-biis nins sẽn yaa sakdbã, n sak-b ne b pãn-komslmã fãa. (1 Zã 2:2; 4:9, 10) N-ye, d sɩd tõe n paama d “yel-wẽna sugri,” tɩ woto tõe n sõng-d tɩ d mao ne yam-ka-m-meng buud fãa n tõoge.—Efɛɛz rãmba 1:7.

A Sandra paama zãmsg sẽn tar yõod wʋsg ne tʋm-tʋmd a Poll makrã. A Poll talla mi-beoog wʋsg ne Wẽnnaam sẽn tall sõmblem ning ne-a, n kõ a pĩnd beegrã fãa sugr la a sõng-a t’a tõog n mao ne a pãn-komslmã sẽn da ket n namsd-a wã. (Rom dãmba 7:15-25; 1 Korẽnt dãmba 15:9, 10) A Poll remsa a vɩɩmã, n ‘modg a meng n tõog a yĩngã’ sẽn na n yɩl n kell n ta Wẽnnaam yam. (1 Korẽnt dãmba 9:27) A pa bas t’a ratem wẽnsã kẽes-a yel-wẽna yembd pʋgẽ ye.

 A Sandra pãn-komslmã nams-a lame, la a kell n maoo ne-a. A pʋʋsa a Zeova ne a sũur fãa n kos t’a sõng-a t’a tõog a pãn-komslmã, la a kell n zoe a nimbãanega. (Yɩɩl Sõamyã 55:23; Zak 4:8) A Sandra sẽn bãng tɩ Wẽnnaam sɩd geta a yellã, a tõog n toeema a vɩɩmã. Ad a sẽn yeele: “Mam tara sũ-noog m sẽn zãmsd neb a taabã Biiblã wakat fãa wã.” A Sandra zug wa n yɩɩ noog t’a tõog n sõng a kẽem ne a yao sẽn yaa kompugli tɩ b bãng a Zeova. A sẽn ‘maand yel-sõmdã’ yĩnga, a tʋmda a logtoeemdã tʋʋmd a Zeova Kaset rãmbã tigis-kãsemsẽ me ne yamleoogo.—Galat dãmba 6:10.

A Sandra sẽn da yaa dorgã la rãamã yamb pĩndã, a vɩɩmã lebga wãn masã? Ne bas-yardo, a yeela woto: “Mam yamã lebga vẽenega. Masã m ye pa yũud rãam, sɩgaare, la m pa rɩkd dorg ye. Mam pa rat bõn-kãensã ba a yembr yas ye. Mam paama m sẽn da baoodã.”

[Goam sẽn tar pãngã, seb-neng a 9]

“Mam paama m sẽn da baoodã”

[Zĩ-gũbri, seb-neng a 9]

Biiblã noy tara pãnga

Ad Biiblã noy kẽer sẽn sõng neb wʋsg tɩ b tõog n bas minim wẽns sẽn da rẽgemd-ba.

“Bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.” (2 Korẽnt dãmba 7:1) Wẽnnaam barkda neb nins sẽn yɩlgd b mens la b lakd ne manesem dẽgdã.

“[A Zeova] zoees la wẽng kisgri.” (Yelbũna 8:13) Wẽn-zoeer hakɩk sõngda ned t’a sɩd tõog n bas minim wẽnse, wala dorgã rɩkrã. B sẽn tat a Zeova yamã toor sẽn ka be, neb nins sẽn toeem b vɩɩmã paamda koglg ne bã-wẽnse.

“Sak soolem soaadba ne nanambsã.” (Tɩt 3:1) Tẽns wʋsg pʋsẽ, laloa wã gɩdga dorg tallg bɩ a rɩkre. Kiris-neb hakɩkã pa sɩɩsd bɩ n dɩkd dorg ye.