Gũus-y tɩ b ra belg-y ye

‘Bɩ y gũus neere tɩ ned da sãam yãmb ne belgr sẽn ka yõod ye.’—KOLOS RÃMBA 2:8.

1-3. a) Mak-bʋs n wilgd tɩ belgrã kẽe vɩɩmã nens fãa pʋsẽ la bala? b) Bõe yĩng tɩ belgrã sẽn be dũniyã pʋgẽ wã pa segd n ling-du?

“YÃMB sẽn yaa laloa mitba sʋka, yãmb y wãn la ned sẽn wa n dat yãmb sõngr zɩ n yag ziri?” Yaa woto la laloa karen-saamb sogs neb wʋsg yʋʋm a wãn sẽn looge. Leokrã yɩɩ bõe? A wilgame: “Laloa mitb tusa wã sʋka, yaa laloa mit a ye bal la ned pa wa togs ziri.” Bõe yĩnga? “Laloa mit kãng sɩnga a tʋʋmdã ne sosiete kẽenga, la a nan pa paam n gom ne ned sẽn dat a sõngr ye.” Yel-kãngã wilgda yel-sɩd sẽn sãamd sũuri. Ziri wã la belgrã pida dũni kãngã.

² Belgrã buud yaa toor-toore, la a kẽe rũndã-rũndã vɩɩmã nens fãa pʋsẽ la bala. Kɩbayã pida ne makr sẽn wilgd rẽ. B wilgda politisiẽ rãmb sẽn yagd ziri, ligd gɛɛndb la laloa mitb sẽn yagd ziri n yetẽ tɩ sosiete paama yõod wʋsgo, piblisite maandb sẽn belgd raadense, bʋʋd-n-taas sẽn zãmbd asirãns rãmbã. La woto yaa makr a wãn bala. Tũudmã me belgda neba. Ziri kiris-neb taoor dãmb belga nebã, n zãms ziri wala sɩɩg pa kiidã, bugum yir la Tãablmã.—2 Tɩmote 4:3, 4.

³ Belgr kãensã fãa segd n linga tõnd bɩ? Ayo. Biiblã keoogda tõnd ‘yaoolem wakatã’ wɛɛngẽ woto: “La nin-wẽnsa ne zãmb dãmb na n maana wẽng n paase, b na n belga neb a taaba la bãmb mens na n paama belgre.” (2 Tɩmote 3:1, 13) D sẽn yaa kiris-nebã, d segd n gũusa d mens ne tagsa sẽn tõe n belg-d tɩ d bas sɩdã. Rẽ wata ne sogs-kãensã b yiibã: Bõe yĩng tɩ belgrã be wʋsg rũndã-rũndã, la wãn to la d tõe n gũus tɩ b ra belg-do?

Bõe yĩng tɩ belgr wʋsg be rũndã-rũndã?

4. Wãn to la Biiblã wilgd bũmb ning sẽn kɩt tɩ belgrã pid dũniyã?

⁴ Biiblã wilgda bũmb ning sẽn kɩt tɩ belgrã pid dũni kãngã wã vẽenega. Tʋm-tʋmd a Zã gʋlsame tɩ “dũniyã fãa bee wẽng soaba nugẽ.” (1 Zã 5:19) “Wẽng soaba” ya a Sʋɩtãana. A Zezi yeela woto yẽ wɛɛngẽ: “Sʋɩtãana la yãmb ba, la yãmb dat n maana yãmb ba ratem. Yẽ yaa nin-kʋʋd hal sɩngre, la yẽ ka paad sɩd pʋgẽ ye, sɩda sẽn ka be yẽ pʋgẽ wã yĩnga. Yẽ sẽn yagd ziri, yẽ gomda a meng sũur pʋgẽ dẽnda, tɩ bõe, yẽ yaa ziri yagda, la ziri ba.” Rẽ yĩnga yaa lingri, dũni kãngã sẽn tũud a naabã tagsgo, a manesem la a belgrã tʋʋm bɩ?—Zã 8:44; 14:30; Efɛɛz rãmba 2:1-3.

5. Wãn to la a Sʋɩtãan modgd n paasdẽ sẽn na yɩl n belg nebã saabã wakat kãngã, la sẽn tɩ yɩɩd fãa, ãnd dãmb la a zabd ne?

⁵ Masã sẽn yaa saabã wakatã, a Sʋɩtãan modgd n belgda nebã n paasdẽ. B rig-a lame n sik tẽngã zugu. A miime t’a wakat sẽn ketã yaa koɛɛga, tɩ kɩt t’a sũ-puugrã “yaa kãsenga.” A rata ne a sũur fãa n sãam ninsaalb wʋsg wa a sẽn tõe tɛka, tɩ rẽ kɩt t’a “belgd dũniyã fãa.” (Wilgri 12:9, 12) Pa wakat-wakat bal la a Sʋɩtãan yaa bɛlgd ye. La a modgda wakat fãa n na n belg ãdem-biisã. * A zabrã pʋgẽ, a tũnugda ne belgr la zãmb buud fãa n na n lud sẽn pa tẽedbã yam tɩ b ra wa kolg Wẽnnaam ye. (2 Korẽnt dãmba 4:4) Sẽn yɩɩd fãa, belgr mit kãngã baoodame n na n sãam neb nins sẽn balemd Wẽnnaam ne “b sɩɩs la ne sɩda.” (Zã 4:24; 1 Pɩɛɛr 5:8) Ra yĩm-y abada t’a Sʋɩtãan sɩd yeelame tɩ: ‘Mam tõe n kɩtame tɩ neba fãa bas Wẽnnaam’ ye. (Zoob 1:9-12) Bɩ d ges a Sʋɩtãan ‘sɩlma’ kẽere, la d ges d sẽn tõe n gũus ne sɩlem kãens to-to.—Efɛɛz rãmba 6:11.

Gũus-y tɩ sɩdã kɩɩsdb ra belg-y ye

6, 7. a) Sɩdã kɩɩsdb tõe n yetame tɩ b balemda ãnd la b tẽed bõe? b) Wãn to la Gʋlsg Sõamyã wilgd sɩdã kɩɩsdb sẽn dat bũmb ninga vẽenega?

⁶ Hal sẽn kaoose, a Sʋɩtãan tũnuga ne sɩdã kɩɩsdb sẽn na yɩl n belg Wẽnnaam sõgen dãmbã. (Matɩe 13:36-39) Sɩdã kɩɩsdb tõe n yetame tɩ b balemda a Zeova la tɩ b tẽeda Biiblã, la b yaool n zãgsda a tẽng zug siglgã. Kẽer pʋd n leb n sakda ‘Babilon Kãsengã’ sẽn yaa dũni gill ziri tũudmã zãmsg sẽn paoogd Wẽnnaamã. (Wilgri 17:5; 2 Pɩɛɛr 2:19-22) Wẽnnaam vẽnega Biiblã gʋlsdb tɩ b gʋls gom-biis sẽn tar pãng wʋsg n puk sɩdã kɩɩsdb yam-wẽns la b manesem.

⁷ Sɩdã kɩɩsdb kãensã rata bõe? B sẽn bas tẽebã b sẽn da get pĩnd wa sɩdã pa sek-b ye. Naoor wʋsgo, b ratame n belg neb a taab n paas bãmba. Sɩdã kɩɩsdb wʋsg pa kẽngd kɛɛng n tɩ maan b mens karen-biis ye, la b baoodame n na n “belg karen-biisa [sẽn dat n yeel tɩ Kirist karen-biisã] tɩ b tũ bãmba.” (Tʋʋma 20:29, 30) Ziri karen-saam dãmbã wɛɛngẽ, tʋm-tʋmd a Poll keoogda tõnd ne yãgb woto: “Bɩ y gũus neere tɩ ned da sãam yãmb . . . ye.” (Kolos rãmba 2:8) Woto pa bilgd sɩdã kɩɩsdb wʋsg sẽn makd n na n maana sɩda? Wala neb wagdr sẽn belgd sẽn pa gũusd a soab n yiis a zakẽ n zoe ne wã, woto, sɩdã kɩɩsdb me rat n sãama tigingã neb nins sẽn tẽed-bã, n baood n na n yiis-b bãgrã pʋgẽ.

8. Bõe la sɩdã kɩɩsdb maand sẽn na yɩl n pids b bõn-datlã?

⁸ Bõe la sɩdã kɩɩsdb maand sẽn na yɩl n pids b bõn-datlã? Naoor wʋsgo, b golemda yɛlã, n pa togsd sɩd zãnga, la b yagd ziri vẽenega. A Zezi ra miime t’a karen-biisã na n namsame, neba sẽn ‘na n dõd-b rõadg  buud fãa’ wã yĩnga. (Matɩe 5:11, Sebr Sõngo) Kɩɩsdb kãensã sẽn yaa wẽnsã togsda sẽn pa sɩd sẽn na yɩl n belg neb a taabã. Tʋm-tʋmd a Pɩɛɛr yeelame tɩ d gũus ne sɩdã kɩɩsdb sẽn gomd “sɩlem goama,” sẽn yelgd zãmsg sẽn yaa ‘belgrã,’ la b ‘tekd Gʋlsg Sõamyã võy’ b mens raab pidsg yĩngã. (2 Pɩɛɛr 2:3, 13; 3:16) Zu-bʋko, sɩdã kɩɩsdb tõog n ‘sãama kẽer tẽebo.’—2 Tɩmote 2:18.

9, 10. a) Wãn to la d tõe n gũus tɩ sɩdã kɩɩsdb ra belg-do? b) Bõe yĩng tɩ d sũy pa sãamde, d sã n wa segd n dems tõnd sẽn wʋmd Wẽnnaam daabã to-to wã?

⁹ Wãn to la d tõe n gũus tɩ sɩdã kɩɩsdb ra belg-do? Yaa d sẽn na n tũ Wẽnnaam Gomdã saglg sẽn yet tɩ: “Gũus[-y] ne neb nins sẽn maand welgre la sẽn wat ne yɛl sẽn ka zems ne koɛɛg ninga yãmb sẽn zãmsã. Bɩ y lak ne bãmba.” (Rom dãmba 16:17) Tõnd ‘lakda ne bãmba,’ n zãgsd b tagsa wã, yaa bãmb mensã n gomd tɩ yaa sebr zug bɩ ẽntɛrnetã pʋgẽ me. Bõe yĩng tɩ d maand woto? Pipi, yaa Wẽnnaam Gomdã sẽn yet tõnd tɩ d maan woto wã yĩnga. Sẽn paase, yaa d sẽn kɩs sɩd t’a Zeova rata tõnd neer wakat fãa wã yĩnga.—Ezai 48:17, 18.

¹⁰ Yiib-n-soaba, d nonga siglg ning sẽn zãmsd tõnd sɩd sẽn tar yõod nins sẽn welgd tõnd vẽeneg ne Babilon Kãsengã. La d sak n deegame me tɩ d pa mi Wẽnnaam daabã zãng ye. Tõnd sẽn wʋmd yɛlã võor to-to wã paama remsg yʋʋmã sẽn pʋg taabã pʋsẽ. Kiris-neb nins sẽn yaa wẽn-sakdbã gũudame t’a Zeova wa ne rems-kãens fãa. (Yelbũna 4:18) La nananda, d pa na n bas siglg ning Wẽnnaam sẽn tʋmd ne wã ye, bala d nee yɛl sẽn wilgd vẽeneg t’a ningda sigl-kãng barka.—Tʋʋma 6:7; 1 Korẽnt dãmba 3:6.

Gũus-y n da belg y mens ye

11. Bõe yĩng tɩ ninsaalbã sẽn pa zems zãngã nong n belgd b mense?

¹¹ Ninsaalb sẽn pa zems zãngã nong n belgda b mense, la a Sʋɩtãan yɩta tao-tao n tũnug ne rẽ n kʋɩɩb-ba. Zeremi 17:9 yetame: “Ninsaal sũur tara ziri n yɩɩd bũmb fãa, la a yaa wẽng wʋsgo.” T’a Zak gʋls woto: “Ned kam fãa tara makr a meng wẽnga ratem sẽn makd yẽnda n bẽt yẽnda.” (Zak 1:14) Tõnd sũurã ratem sã n wa mak-do, a sɩd tõe n kɩtame tɩ yel-wẽnã tʋlsem wõneg bũmb sẽn be yamleoog la sẽn ka yelle. Tagsg a woto yaa belgre, bala f sã n sak n maan yel-wẽnã, rẽ wat n baasa ne f wãabo.—Rom dãmba 8:6.

12. Wãn to la belg-m-mengã tõe n yɩ bẽdg ne-do?

¹² Belg-m-mengã tõe n bẽda tõnd nana-nana. Sũurã sẽn yaa zãmb soabã tõe n baoa  bʋʋm n kõ a meng zʋg-wẽng taoore, bɩ yel-wẽn-kãseng maaneg taoore. (1 Sãmwɛll 15:13-15, 20, 21) Tõnd sũurã sã n wa be yell taoore, a tõeeme n wa bao bʋʋm n kõ a meng manesem sẽn pa zems taoore. D rɩk makr ne reema. Reem kẽer yaa sõma n be yamleoogo. La naoor wʋsgo, dũni kãngã sẽn wilgd reem nins sĩnima wã la televiziõ wã la ẽntɛrnetã pʋsẽ wã yaa reem wẽns la yoob yɛla. Yaa nana tɩ tõnd tags tɩ d tõe n gesa reem sẽn pa lebd be tɩ pa sãam-d ye. Kẽer tagsda woto menga: “A sã n pa namsd mam sũur-kasetã, yell bɛɛ?” La nin-kãens ‘belgda b mens ne tagsg sẽn ka sɩda.’—Zak 1:22.

13, 14. a) Gʋlsg Sõamyã mak-bʋg n wilgd tɩ pa wakat fãa la tõnd sũur-kasetã yaa sor-wilgd sẽn be bas-m-yam? b) Wãn to la d tõe n gũus n da belg d mense?

¹³ Wãn to la d tõe n gũus n da belg d mense? Pipi, d segd n tẽegame tɩ pa wakat fãa la d tõe n tall bas-yard ne ninsaal sũur-kasetã ye. D rɩk makr ne tʋm-tʋmd a Poll sẽn da maana. Nand t’a lebg kiris-neda, a namsa Kirist karen-biisã. (Tʋʋma 9:1, 2) Tõe t’a sũur-kasetã pa nams-a sasa kãng ye. Vẽenega, a sũur-kasetã ra belg-a lame. A Poll yeelame tɩ yaa yẽ “sẽn maan bõn-kãens ne zɩɩlem la ka tẽeba yĩnga.” (1 Tɩmote 1:13) Woto, tõnd  sũur-kasetã sẽn pa namsd tõnd reem yĩngã bal pa wilgd tɩ tõnd sẽn maanda yaa sõma ye. Yaa sũur-kaset sẽn yaa sõma sẽn paam Wẽnnaam Gomdã zãmsg bal n tõe n wilg ned sor sẽn be bas-m-yam.

¹⁴ Tõnd sã n pa rat n belg d mense, sagls sẽn kõt sõngr n be d sẽn segd n ning d yamẽ. Fees-y y mengã pʋʋsg pʋgẽ. (Yɩɩl Sõamyã 26:2; 2 Korẽnt dãmba 13:5) Y sã n fees y mengã ne pʋ-peelem, tõe n kɩtame tɩ y bãng tɩ y segd n toeema y tagsgã bɩ y yel-manesmã. Kelg-y neb a taaba. (Zak 1:19) Sẽn mik tɩ fees-m-meng nong n tika tõnd mengã sẽn tagsd zug balã yĩnga, yaa yam tʋʋmd tɩ d kelg kiris-neb a taab sẽn bɩ tagsg sẽn yaa tɩrgã. Y sã n wa mik tɩ y rɩkda sard bɩ y maanda yɛl sẽn pa zems kiris-nin-taas sẽn bɩ nif gesgẽ, y tõe n soka y menga: ‘Rẽ yĩnga, yaa mam sũur-kasetã sẽn ka paam zãmsg tɩ zemsã, bɩ yaa mam sũurã n belgd-ma?’ Zãms-y Biiblã la sɛb nins sẽn tik Biiblã zugã wakat fãa. (Yɩɩl Sõamyã 1:2) Rẽ maaneg na n sõng-y lame tɩ y tagsgã la y tʋlsmã zems ne Wẽnnaam noyã.

Gũus-y ne a Sʋɩtãan ziri wã

15, 16. a) A Sʋɩtãan sẽn maood n dat n belg tõndã, a yelgda ziri bʋse? b) Wãn to la d tõe n maan tɩ ziri kãensã ra belg-do?

¹⁵ A Sʋɩtãan sẽn maood n na n belg tõndã, a yelgda ziri buud toor-toore. A ratame tɩ tõnd tags tɩ laogã kõta sũ-noogo, la naoor wʋsgo, yaa sũ-sãams la a wat ne. (Koɛɛg Soaba 5:9-11) A ratame tɩ tõnd tẽ tɩ dũni wẽng kãngã na n paa wakat fãa, baa ne yɛlã sẽn wilgd vẽeneg tɩ d vɩɩ ‘yaoolem wakatã.’ (2 Tɩmote 3:1-5) A Sʋɩtãan yelgda tagsa sẽn yet tɩ yoob pa yell ye, baa ne sẽn baood-b yõ-noogrã manesem sẽn nong n wat ne yel-beed b zutã. (Galat dãmba 6:7) Wãn to la d tõe n maan tɩ ziri kãensã ra belg-do?

¹⁶ Rɩ-y makr nins sẽn be Biiblã pʋgẽ wã nafa. Biiblã tara makr sẽn tɩ loe ne neb a Sʋɩtãan ziri wã sẽn belge, tɩ yaa keoogr ne tõndo. B ra nonga laogo, la b ra pa leb n ges tɩ b ra vɩɩ b zãmaan-wẽngã saab wakat ye, bɩ b maana yoobo, tɩ rẽ fãa wa ne baas-beedo. (Matɩe 19:16-22; 24:36-42; Luk 16:14; 1 Korẽnt dãmba 10:8-11) D rɩk yam ne makr nins sẽn be rũndã-rũndã wã. Zu-bʋko, wakat ninga, kiris-neb kẽer wa n ye pa neẽ tɩ d vɩɩ yãgb wakat ye. Rẽ kɩtame tɩ b wa tags tɩ b sẽn tũud Wẽnnaamã, b kongda bõn-sõngo. Nin-kãens buudã tõe n basa sɩdã n bao yõ-noogr vɩɩm. La nin-kãens bee “zĩ-saals pʋse,” bala sã n wa beẽ-beẽ, b wat n yãa b wẽn-kɩɩsgã biisi. (Yɩɩl Sõamyã 73:18, 19) Yaa sõma tɩ d rɩk yam ne neb a taabã kongre.—Yelbũna 22:3.

17. Bõe yĩng t’a Sʋɩtãan yelgd ziri ning sẽn yet t’a Zeova pa nong tõnd la a pa get tɩ d tara yõodã?

¹⁷ Ziri a to la a Sʋɩtãan yelgd tɩ neb wʋsg sɩd tẽeda. Yaa ziri ning sẽn yet t’a Zeova pa nong tõnd la a pa get tɩ d tara yõodã. A Sʋɩtãan dɩka yʋʋm tusa n fees ninsaalbã sẽn pa zems zãngã. A mii sõma tɩ raood komsg tõe n booga d tẽebã. (Yelbũna 24:10, Sebr Sõngo) Woto yĩnga, a yelgda ziri ning sẽn yet tɩ d pa tar yõod Wẽnnaam nifẽ wã. B sã n ‘lub’ tõnd tɩ d sɩd tagsdẽ t’a Zeova pa get tõnd yelle, d tõe n wa rat n basa tẽebã. (2 Korẽnt dãmba 4:9) Yaa woto bal la Bɛlgd kãsengã rata. Rẽnd yaa wãn to la d tõe n gũus t’a Sʋɩtãan ziri kãngã ra belg-do?

18. Wãn to la Biiblã kõt-d bas-m-yam t’a Zeova nong-d lame?

¹⁸ Bʋgs-y Biiblã sẽn yet bũmb ning  Wẽnnaam nonglmã ne tõndã zugu. Wẽnnaam Gomdã rɩkda bilgr sẽn be yamleoog sẽn kõt tõnd bas-m-yam t’a Zeova tẽra d yell la a nonga tõnd ned kam fãa. A ningda yãmb nintãmã a “ko-waoog pʋgẽ,” sẽn dat n yeel t’a neeme la a tẽr nintãm ning yãmb sẽn daagde, n maood n na n kell n yɩ wẽn-sakdã. (Yɩɩl Sõamyã 56:9) A mii yãmb ‘sũy sẽn wat n sãame,’ la a pẽe ne-y sasa kãense. (Yɩɩl Sõamyã 34:19) A mii yɛlã fãa yãmb zugu, n paas “yãmb zoobda” sõore. (Matɩe 10:29-31) Sẽn tɩ yɩɩd fãa, Wẽnnaam “kõo b Biiga sẽn ka to” wã yãmb yĩnga. (Zã 3:16; Galat dãmba 2:20) Wakat-wakate, tõe tɩ yaa toog tɩ y tẽ tɩ verse kãensã pidsda yãmb mengã zugu. La d segd n tẽe a Zeova goamã. A ratame tɩ tõnd tẽ t’a nong-d lame, pa wala neb sull bal ye, la yaa tõnd yembr-yembre.

19, 20. a) Bõe yĩng tɩ tar yõod tɩ y bãng la y zãgs a Sʋɩtãan ziri ning sẽn yaa t’a Zeova pa nong yãmbã? b) Wãn to la kaagr yel-gɛt a sõng neb sẽn koms raoodo?

¹⁹ Bãng-y ziri wã n welge, la y zãgs-a. Yãmb sã n miẽ tɩ ned yagda ziri, y tõe n kogla y meng n gũus t’a ra belg-y ye. Rẽnd yãmb sã n bãng t’a Sʋɩtãan dat n belga yãmb n kɩt tɩ y tẽ t’a Zeova pa nong yãmbã, woto meng na n sõng-y la wʋsgo. Gũusg Gasgã talla sõsg sẽn da keoogd nebã tɩ b gũus ne a Sʋɩtãan sɩlmã, tɩ kiris-ned a yembr yeel woto: “Mam da zɩ n bãng t’a Sʋɩtãan tũnugda ne mam sũurã tagsa n na n koms m daood ye. Mam sẽn bãng rẽ wã kɩtame tɩ m tʋll n zãgs tags-kãense.”

²⁰ D ges kaagr yel-gɛt sẽn be Amerikdisiid tẽng a yembrẽ sẽn maan to-to. A sã n tʋg n na n ges a tẽed-n-taas nins sẽn koms raoodã, a nong n sokd-b lame: ‘Fo tẽeda Tãablmã bɩ?’ Tɩ sẽn koms-a raoodã nong n leok tɩ: ‘Yaa vẽeneg tɩ m pa tẽed ye,’ a sẽn bãng tɩ woto ya a Sʋɩtãan ziri a ye wã yĩnga. Tɩ yel-gɛtã ye sok-a: ‘Fo tẽeda bugum yir bɩ?’ T’a soaba ye leok tɩ ‘ayo!’ Rẽ, kãsem soabã yet-b lame t’a Sʋɩtãan tara ziri a to, la naoor wʋsgo nebã pa mi tɩ yaa ziri ye. A yet-b lame tɩ b ges Approchez-vous de Jéhovah * sebrã, seb-neng 249, sull 21, sẽn wilgd ziri ning sẽn yaa t’a Zeova pa nong tõnd ned kam fãa wã. Yel-gɛtã wilga bi-sõma nins a sẽn paame, a sẽn sõng neb sẽn koms raood tɩ b bãng a Sʋɩtãan ziri kãngã la b zãgs-a wã.

Gũus-y ne belgre

21, 22. Bõe yĩng tɩ d mi a Sʋɩtãan sẽn belgd nebã to-to wã, la bõe la d segd n dɩk sard kãn-kãe n maane?

²¹ Yaoolem wakat kãngã baasgã, pa lingr ne-do, a Sʋɩtãan sã n ket n wat ne ziri la belgr wʋsg ye. Zu-noogo, a Zeova pa bas tõnd zɩɩlem pʋgẽ ne a Sʋɩtãan sẽn belgd nebã to-to wã ye. Biiblã la sɛb nins sẽn tik Biiblã zug ‘tʋm-tʋmd sẽn tũud sɩd la sẽn tar yamã’ sẽn yiisdã pukda a Sʋɩtãan belgrã vẽenega. (Matɩe 24:45) Tõnd sẽn mi a Sʋɩtãan sɩlma tiirã yĩnga, d pa na n bas t’a tõog-d ye.—2 Korẽnt dãmba 2:11.

²² Rẽ wã yĩng bɩ d gũus ne sɩdã kɩɩsdb tagsa. Bɩ d rɩk sard kãn-kãe n lak d mens ne belg-m-mengã bẽdgo. La bɩ d bãng a Sʋɩtãan ziri wã fãa la d zãgs-ba. D sã n maan woto, d na n kogla zems-n-taar ning d sẽn tar ne “Wẽnnaam sen so sɩda,” sẽn kis belgrã.—Yɩɩl Sõamyã 31:6; Yelbũna 3:32.

[Tẽngr note rãmbã]

Y tẽrame bɩ?

• Bõe yĩng tɩ belgr wʋsg be dũniyã pʋgẽ rũndã-rũndã?

• Wãn to la d tõe n maan tɩ sɩdã kɩɩsdb ra belg-do?

• Wãn to la d tõe n gũus n da wa belg d mense?

• Wãn to la d tõe n gũus t’a Sʋɩtãan ziri wã ra wa belg-do?

[Study Questions]

[Foto, seb-neng 17]

Ra belg-y y mens reema wɛɛngẽ ye

[Foto rãmba, seb-neng 18]

Gũus-y n da belg y meng ye, la fees-y y mengã pʋʋsg pʋgẽ, n kelg neb a taabã, la y zãms Wẽnd Gomdã wakat fãa