Wẽnnaam daabã sã n wa maan dũniyã zugu

A ZEZI sẽn zãms a karen-biisã tɩ b pʋʋs “Tɩ yãmb daab maan dũniyã zug wa sẽn maand [saasẽ wã,]” a ra zoe n zĩnda saasẽ ne a Ba wã. (Matɩe 6:10; Zã 1:18; 3:13; 8:42) Sẽn deng t’a Zezi yɩ ninsaala, a yãa bũmb nins fãa sẽn maan saasẽ la tẽng zug tɩ ra zems ne Wẽnnaam daabã. Sasa kãens sẽn da be yamleoogã tʋʋm da kõta sũ-noogo.—Yelbũna 8:27-31.

Wẽnnaam pipi bõn-naandsã yaa “malɛk rãmbã, pãn-kãsems rãmba sẽn sakd bãmb noor la b kelgd bãmb goama.” B ra yaa ‘a tʋm-tʋmdb sẽn maand yẽ raabo,’ la b ket n maanda woto. (Yɩɩl Sõamyã 103:20, 21) Malɛk fãa ra tõe n yãka a sẽn na n maan bũmb ning bɩ? N-ye, la tẽngã naanegẽ, “Wẽnnaam komdibli wã fãa kaasa ne sũ-noogo.” (Zoob 38:7) B sẽn kaas ne sũ-noogã ra wilgdame tɩ b sũur ra nooma ne Wẽnnaam sẽn maan bũmb ningã, la b saka rẽ.

Wẽnnaam sẽn naan tẽngã n sa wã, a segl-a lame sẽn na yɩl tɩ ninsaal zĩnd a zugu, n yaool n naan pipi rao wã ne a pagã. (Sɩngre, sak a 1) Rẽ me ra kõta sũ-noog bɩ? Wẽnnaam Gomdã yetame: “La Wẽnnaam yãa bũmb nins fãa bãmb sẽn naanã, la gese, a yaa sõama wʋsgo.” N-ye, a ra zemsa zãnga.—Sɩngre 1:31.

Bõe la Wẽnnaam da rat tõnd pipi yaab rãmbã, b kambã la b yagensã yĩnga? Sã n yaa ne Sɩngre 1:28, Wẽnnaam sẽn da rat ne bãmba wã me ra yaa sõma wʋsgo: “La Wẽnnaam ninga bãmb zut barka n yeel-b tɩ b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” Sẽn na yɩl n pids tʋʋm-kãngã sẽn be yamleoogã, tõnd pipi yaab rãmbã ne b kambã la b yagensã ra tog n ket n vɩɩ wakat sẽn pa sate. Bũmb ba a yembr da pa wilgd tɩ yel-beedo, wẽg taaba, sũ-sãams bɩ kũum n na n wa ye.

Wakat kãng tɩ Wẽnnaam daabã ra maanda saasẽ la tẽng zugu. Neb nins sẽn da sakd a raabã ra na n paama sũ-noog wʋsgo. La maana wãn tɩ ye pa woto?

B kɩɩsa Wẽnnaam daabã tɩ yɩ lingri. La rẽ ra pa yell sẽn ka tɩɩm ye. Baasg zãnga, rẽ waa ne sũ-sãams sẽn kaoos wʋsg sẽn kɩt tɩ neba pa ye wʋmd Wẽnnaam daabã ne ãdem-biisã võor sõma ye. Yɩɩ bũmb sẽn nams tõnd fãa. Kɩɩs-kãng yɩɩ bõe?

Wẽnnaam daabã, tõdgrã fãa sasa

“Wẽnnaam komdibli wã” sẽn yaa malɛgsã sʋka, a ye n tags t’a tõe n gɩdga Wẽnnaam daabã ne ninsaalbã, n paam nafr rẽ pʋgẽ. Malɛg-kãng sẽn da tagsd rẽ yell n paasdẽ wã, a yamẽ wã lebgda wa bũmb sẽn tõe n yɩ, tɩ rẽ yamleoogã tar paasgo. (Zak 1:14, 15) Tõe t’a tagsame t’a sã n tõog tɩ pipi ninsaalbã kelg-a n bas Wẽnnaam, na n yɩɩ tɩlae ne Wẽnnaam t’a sak wags-n-taag a naam sẽn ka to wã rɩɩbẽ. La tõe t’a tagsame  tɩ Wẽnnaam pa na n sãam bãmb tɩ wa gɩdg a raabã pidsg ye. A tagsame tɩ Wẽnnaam a Zeova ra na n toeema a raabã bilf n sak tɩ yẽ me rɩ naam ninsaalbã a sẽn naanã zutu. Wa sẽn zemse, kaoosg poore, b boola tõat kãng t’a Sʋɩtãana, sẽn dat n yeel tɩ “Kɩɩsda.”—Zoob 1:6.

A Sʋɩtãan tũu a mengã tʋlsem n tɩ gom ne pagã, n tus-a t’a kɩɩs Wẽnnaam daabã la a soog a menga. A yeela paga woto: ‘Yãmb ka na n ki ye. Y na n lebga wa Wẽnnaam n mi sõama ne wẽng n bake.’ (Sɩngre 3:1-5) Pagã tagsame t’a sã n sak a Sʋɩtãan sẽn yeelã, a na n tõog n sooga a menga. A ra getame tɩ woto yaa bũmb sẽn yaa sõma ne-a, rẽ n so t’a sake. Rẽ poore, a kɩtame t’a sɩdã sak n tũ-a.—Sɩngre 3:6.

Ra pa woto la Wẽnnaam da rat a Ãdem la a Hawa la yĩng ye. Ra yaa bãmb n dat woto. La rẽ ra na n waa ne yel-beedo. Wẽnnaam da zoe n yeel-b lame tɩ manesem a woto na n kɩtame tɩ b ki. (Sɩngre 3:3) Wẽnnaam da pa naan-b tɩ b tõe n kɩɩs yẽ n soog b mens tɩ yɩ sõma ne-b ye. (Zeremi 10:23) Sẽn paase, b ra na n yɩɩ neb sẽn pa zems zãnga, la pa-zems-zãngã la kũumã ra segd n longa b kambã la b yagensã masã. (Rom dãmba 5:12) A Sʋɩtãan da pa tõe n gɩdg rẽ ye.

Yel-kãensã toeema Wẽnnaam daabã ne ãdem-biisã la tẽngã wakat fãa yĩng bɩ? Ayo. (Ezai 55:9-11) La rẽ waa ne goam sẽn da baood welgre: Ãdem-biisã tõe n ‘lebga wa Wẽnnaam n mi sõma la wẽng n bak’ wala a Sʋɩtãan sẽn da yetã bɩ? Sẽn dat n yeel tɩ b sã n kõ tõnd sẽka, d tõe n bãnga sẽn yaa tɩrg la wẽnga, sẽn nafd la sẽn pa nafd d toor d vɩɩmã nens fãa pʋsẽ bɩ? Zemsame tɩ tõnd sak Wẽnnaam zãng-zãnga, a naamã rɩɩb sẽn yaa sõma n yɩɩdã yĩng bɩ? Zemsame tɩ tõnd sak a raabã zãng bɩ? Yãmb na n leoka sogs-kãensã wãn to?

Ra yaa ne manesem a yembr bal la b ra tõe n welg yel-kãensã nebã la malɛgsã fãa taoore: Yaa Wẽnnaam sẽn na n bas neb nins fãa sẽn dat soog-m-mengã tɩ b mak n ges la b tõog t’a yɩ sõma. B kʋʋb bal ra pa na n welg yɛlã, sẽn tɩ loe ne goam nins b sẽn wa ne wã ye. B sã n bas ãdem-biisã tɩ b soog b mens n kaoos tɩ seke, goamã ra na n yãka nenga, bala b soog-m-mengã biis na n yɩɩ vẽenega. Wẽnnaam wilgame tɩ yaa woto la a na n welg yɛlã, a sẽn wa n yeel pagã t’a na n paama kambã. Yaa woto la ninsaalbã buud sɩng fɩɩgre. Yaa rẽ maasem yĩng la tõnd sẽn vɩ rũndã-rũndã wã.—Sɩngre 3:16, 20.

La rẽ ra pa rat n yeel tɩ Wẽnnaam ra na n basa ninsaalbã la malɛg-tõatbã tɩ b maan b sẽn dat fãa ye. Wẽnnaam pa bas a naam sẽn ka to wã ye, a leb n pa bas a raabã pidsg ye. (Yɩɩl Sõamyã 83:19) A wilga woto vẽeneg n deng n togs tɩ b na n wa baas n sãama malɛk ning sẽn yɩ sabab tɩ tõdgrã zĩndã, la a kɩt tɩ rẽ sẽn wa ne yɛl ninsa fãa sa. (Sɩngre 3:15) La hal sɩngrẽ wã, Wẽnnaam da pʋlma ãdem-biisã tɩ b na n paama yolsgo.

La nananda, tõnd pipi yaab rãmbã ne kamb nins b sẽn da na n paama basa Wẽnnaam naamã. Wẽnnaam sã n da rat tɩ sard ning b sẽn dɩkã bi-wẽns ra nams-ba, a ra segd n modg-b lame tɩ b tũ a raabã b  yel-manesmã fãa pʋgẽ. A sã n da maan woto, a pa na n kõ-b sor tɩ b soog b mens tɩ b ges ye.

Yaa sɩd tɩ ned kam fãa ra tõe n yãka yam n sak Wẽnnaam naamã. B ra tõe n bãnga Wẽnnaam daabã sẽn ya a soab ne nebã sasa kãngã la b sak-a wa b sẽn tõe tɛka. (Yɩɩl Sõamyã 143:10) Baasg zãnga, ãdem-biisã soog-m-meng yell sã n pa welge, b ra pa na n põs zu-loees ye.

Ãdem-biisã sɩngrẽ bala, lebga vẽeneg tɩ ned fãa segd n yãka a sẽn be a soab poorẽ. A Ãdem pipi biig a Kayẽ kʋʋ a yao a Abɛlle, bala “yẽ menga tʋʋm yaa wẽnse la a ba-biiga rẽnd yaa sõama.” (1 Zã 3:12) Ra pa Wẽnnaam daabã la woto ye, bala Wẽnnaam da keooga a Kayẽ la a sɩbg-a rẽ poore. (Sɩngre 4:3-12) A Kayẽ yãka soog-m-meng ning a Sʋɩtãan sẽn kãab-a wã. Woto kɩtame t’a ‘ra yaa wẽng soaba rẽnda.’ Neb a taab me n maan woto.

Sẽn yɩɩd yʋʋm 1 500 ninsaalbã naaneg poore, “dũniyã neba lebga bõn-põaas Wẽnnaam nifẽ, la dũniyã neba ra maanda taab pãnga.” (Sɩngre 6:11) B ra segd n kogla tẽngã t’a ra wa sãam zãng ye. Wẽnnaam kɩtame tɩ sãoong sa-kãseng wa, la a kogla zak a yembr sẽn da yaa tɩrg sasa kãnga: Yɩɩ a Nowe, a pagã la a komdibli wã ne b pagba. (Sɩngre 7:1) Tõnd fãa yaa bãmb yagense.

Wakat kãng tɛka, Wẽnnaam kõo neb nins sẽn sɩd da tʋll n bãng a raabã sor-wilgri. A vẽnega rap sẽn yaa wẽn-sakdb tɩ b gʋls a goama ned ning fãa sẽn dat n bao a sor-wilgrã yĩnga. Gom-kãens gʋlsa Biiblã pʋgẽ. (2 Tɩmote 3:16) Ne nonglem, Wẽnnaam kõo ãdem-bi-sakdbã sor tɩ b tall zems-n-taar ne-a, hali n lebg a zo-rãmba. (Ezai 41:8) La a kõ-b-la pãng ning sẽn segdã sẽn na yɩl n tõog n mao ne zu-loees nins ãdem-biisã sẽn seg b yʋʋm tusa soog-m-mengã sasa wã. (Yɩɩl Sõamyã 46:2; Filip rãmba 4:13) Ad d sɩd segd n talla mi-beoog rẽ fãa yĩnga!

‘Bɩ Wẽnnaam daabã maan’ zãnga

Wẽnnaam sẽn maan bũmb nins hal tɩ ta masã wã pa a raabã fãa ne ãdem-biisã la woto ye. Tʋm-tʋmd a Pɩɛɛr gʋlsame: “Wa sẽn zems bãmb kãabgo, tõnd gũuda yĩngr paalg la tẽn-paalga, tɩrlem sẽn na n zĩnd b pʋsẽ.” (2 Pɩɛɛr 3:13) Gom-kãensã sẽn yaa makr goamã tɩ loee ne goosneema paalg sẽn na n dɩ naam ãdem-biisã zutu, la ãdem-biis siglg paalg goosneema kãng sẽn na n sooge.

No-rɛɛs a Daniɛll gʋlsa gom-kãensã sẽn yaa vẽenesã: “Rĩm dãmb kãens sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam . . . zĩndi. A na n wãa soolem kãens fãa tɩ b menem n bas-a t’a yaas wakat fãa.” (Daniɛll 2:44) Bãngr-gom-kãngã ra reng n togsda rũndã-rũndã zãmaanã sẽn yaa wẽngã saabo, la Wẽnnaam Rĩungã bɩ a goosneema wã sẽn na n ledg-a wã yelle. Ad yaa koe-noog menga! B na n wa yĩma zabã la rat-m-yembrã sẽn pids rũndã-rũndã dũniyã ne nen-kɛglem sẽn ye rat n sãam tẽngã.

Wakat bʋg la bõn-kãensã na n zĩndi? A Zezi karen-biisã kosa woto: “Bɩ y togs tõnd bõn-kãens sẽn na n zĩnd wakat ninga la bãnd ninga sẽn na n wilg yãmb waoongo la dũniyã sɛɛb wakate.” A Zezi leokrã babg a yembr yetame: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:3, 14.

Nebã fãa miime tɩ b moonda koe-noogã masã dũniyã gill zugu. Tõe tɩ y nee woto yãmb sẽn be sak ningã pʋgẽ. Porfesɛɛr a Charles Braden gʋlsa woto a sebrã (Ceux-ci croient aussi, [ãngil.]) pʋgẽ: “A Zeova Kaset rãmbã sɩd pidsa tẽngã ne b kasetã kũuni. . . . Tũudum ba a yembr pa be dũniyã zug sẽn wilg yẽesem la sẽn nang pãng Rĩungã koe-noog mooneg pʋgẽ wa a Zeova Kaset rãmbã ye.” Kaset rãmbã moonda koe-noogã sẽn yɩɩd tẽns 230 pʋsẽ la sẽn kolg buud-goam 400 pʋsẽ. Tʋʋm-kãngã pidsg b sẽn da reng n  togsã zɩ n tʋm n ta woto dũniyã gill zug ye. Woto yaa kaset wʋsg nins sẽn be wã a yembr sẽn wilgd tɩ wakat kolgame masã tɩ Wẽnnaam Rĩungã na n ledg ninsaalbã goosneema rãmba.

Rĩung ning a Zezi sẽn yeel tɩ b na n mooname wã ya a soab ning meng a sẽn zãms tõnd tɩ d pʋʋs a yĩng woto wã: “Tɩ yãmb soolem wa, tɩ yãmb daab maan dũniyã zug wa sẽn maand [saasẽ wã].” (Matɩe 6:10) N-ye, yaa ne Rĩungã maasem la Wẽnnaam na n pids a raabã sẽn tɩ loe ne ãdem-biisã la tẽngã.

Woto rat n yeelame tɩ bõe? Bɩ d bas tɩ Wilgri 21:3, 4 leoke: “Mam wʋma koe-kãseng sẽn yi geerẽ wã n yeele: ‘Gese, Wẽnnaam yir bee neba sʋka. La bãmb na n zĩnda ne bãmba, la bãmb na n yɩɩ bãmb neba, la bãmb menga na n paa ne bãmba. Bãmb na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.’ ” Rẽ la Wẽnnaam daabã na n sɩd maan zãng tẽngã zug la saasẽ. * Yãmb pa rat n yã sasa kãng sɩda?

[Tẽngr note]

[Foto, seb-neng a 4]

B sẽn kɩɩs Wẽnnaam daab n bao soog-m-mengã waa ne yel-beedo