Y segd n zĩnda tũudum pʋgẽ bɩ?

‘PA TƖLAE tɩ m zĩnd tũudum pʋgẽ bɩ m kẽng wẽnd-doogẽ wakat fãa sẽn na yɩl n tẽ Wẽnnaam ye!’ Yaa woto la neb wʋsg tagsd tũudmã wɛɛngẽ. Sɩda, kẽer tagsdame tɩ b sã n yi yɩng n get bũmb nins Wẽnnaam sẽn naanã, b pẽe Wẽnnaam n yɩɩd b sẽn na n kẽng pʋʋsg wẽnd-doogẽ. Rũndã-rũndã, nebã nong n tagsdame tɩ tũudum pʋgẽ zĩndg pa tɩlae sẽn na yɩl n tẽ Wẽnnaam ye.

La neb a taab pa tagsd woto ye. B yetame tɩ tũudum pʋgẽ zĩndg yaa bũmb sẽn tar yõod la sẽn yaa tɩlae menga, f sã n dat n ta Wẽnnaam yam. Woto yĩnga, bao n bãng tũudum pʋgẽ zĩndg sã n sɩd yaa tɩlaeyã segd n paka ned fãa, la pa neb nins sẽn vaeesd n dat n bãng sẽn sak-b tũudum la sẽn pa sak-b tũudmã sõorã bal la pakẽ ye. La sẽn yaa to-to fãa, tõnd zems-n-taarã ne Wẽnnaam sẽn tɩ loe ne rẽ wã yĩnga, pa zems tɩ d bao n bãng Wẽnnaam sẽn tagsd bũmb ning yel-kãngã zug sɩda? La bõe la d tõe n zãms a Gomdã sẽn yaa Biiblã pʋgẽ yel-kãngã zugu?

Wẽnnaam sẽn tall manesem ning ne nebã pĩnd wẽndẽ

Yʋʋm 4 400 la bal sẽn looge, sa-kãseng koom n lim tẽngã gilli. B pa tõe n yĩm yel-kãngã nana-nana ye, la dũniyã gill zugu, nebã tara soalem sẽn tɩ loe ne yel-kãngã. Baa ne solem-kãens sẽn tar yɛl kẽer sẽn tɩ badg taabã, b tara zĩis wʋsg sẽn wõnd taaba. Wala makre, b fãa wilgdame tɩ yaa ninsaalb la rũms a wãn bal n põse.

Sẽn põs-b sãoong sa-kãsengã wakatã yaa b zut sẽn yɩ noog yĩng bɩ? Biiblã wilgdame tɩ pa woto ye. D bãng tɩ Wẽnnaam pa togs ned kam fãa sãoong sa-kãsengã yell ye. La a togsa a Nowe tɩ yẽ me togs a wakatẽ nebã tɩ sãoong sa-kãsengã ra kolgame.—Sɩngre 6:13-16; 2 Pɩɛɛr 2:5.

Põsbã ra bee ne f sẽn na n zĩnd sull ning Wẽnnaam sẽn yãkã pʋgẽ la f sak a sor-wilgrã a sẽn da kõt a Nowe wã. Baa rũmsã sẽn da be koglgã pʋgẽ wã sẽn põs sãoong sa-kãsengã sasa wã yaa b sẽn naag ne sul-kãnga wã yĩnga. Noy sẽn yaa takɩ la b kõ a Nowe, n wilg-a bũmb nins sẽn yaa tɩlae a sẽn segd n maan rũmsã vɩɩm koglg yĩnga.—Sɩngre 6:17–7:8.

Yʋʋm kobs poore, a Nowe yagens nins sẽn yaa a biribl a Sɛm kambã wa n yɩɩ yembs Ezitpi. La Wẽnnaam da rat n fãag-b lame n tall-b n kẽng tẽng ning a sẽn da kãab b yaab a Abrahaamã. Sasa kãng me, leb n pa nebã yembr-yembr la Wẽnnaam vẽneg rẽ ye, la a reng n vẽneg-a-la neb nins a sẽn tũus tɩ b yɩ b taoor dãmbã, sẽn dat n yeel t’a Moiiz la a kẽem a Aarõ. (Yikri 3:7-10; 4:27-31) Wẽnnaam sẽn wa n fãag yemb-kãensã n yiis Eziptã, a kõ-b-la a Tõogã Sinayi tãngẽ wã, la a kɩt tɩ b lebg Israɛll buudu.—Yikri 19:1-6.

Israɛll nebã yembr-yembr ra tõe n paama fãagre, b sẽn da lagem ne sull ning Wẽnnaam sẽn luglã, la b sẽn da tũud sul-kãng taoor dãmb Wẽnnaam sẽn yãkã sor-wilgrã yĩngã bala. B leb n seglame tɩ Ezipt nebã yembr-yembr da tõe n lagem ne sul-kãng sẽn da tar Wẽnnaam lohormã vẽenegã. Israɛll nebã sẽn da wa n yi Eziptã, nin-kãens tũ n loogame, tɩ rẽ kɩt tɩ b ra tõe n paam Wẽnnaam barkã.—Yikri 12:37, 38.

Pipi yʋʋm kob-gĩndẽ wã, a Zezi sɩnga a koe-moonegã, n tigim neb tɩ b lebgd a karen-biisi. A gesa a karen-biisã sull yelle, la a ges bãmb yembr-yembr me yelle. A Zezi yeela tʋm-tʋmdb 11 wã sẽn yɩ sakdbã tɩ: “Yãmb yaa neb sẽn pa ne maam m makra pʋgẽ n ka bas ye. Yaa woto yĩng la mam kõt yãmb soolem wa m Ba sẽn kõ maam soolmã.” (Luk 22:28, 29) Kaoosg poore, Wẽnnaam vʋʋsem sõngã waa karen-biisã zutu, b sẽn da wa n tigim taabã.—Tʋʋma 2:1-4.

Mak-kãensã wilgda vẽeneg tɩ pĩnd wẽndẽ wã, wakat fãa Wẽnnaam da siginda a nin-buiidã n wilgd-b sore. A Nowe, a Moiizi, a Zezi la neb a taab la Wẽnnaam taas noyã, la a tũnuga ne nin-kãens n kɩt tɩ b taas a koeesã neb nins yell b sẽn da getã. D pa tar bʋʋm n na n tẽ tɩ Wẽnnaam manesmã yaa toor ne a sõgen dãmbã rũndã-rũndã ye. Yaa sɩd tɩ rẽ wata ne sokr a to: Tũudum pʋgẽ zĩndg sekame bɩ? D na n leoka sok-kãseng kãngã sõsg ning sẽn pʋgdã pʋgẽ.

 [Foto, seb-neng a 4]

Hal sẽn kaoose, Wẽnnaam siginda a nin-buiidã n wilgd-b sore