D ra vɩɩmd d mens yĩng yɛs ye
D ra vɩɩmd d mens yĩng yɛs ye
“[Kirist] kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye.”—2 KORẼNT DÃMBA 5:15.
1, 2. No-bʋg sẽn be Gʋlsg Sõamyã pʋgẽ n tus a Zezi karen-biisã tɩ b bas rat-m-yembrã?
RA YAA a Zezi yaoolem yʋng tẽng zugu. Lɛɛr a wãn pʋgẽ bala, a ra na n dɩka a vɩɩmã n kõ, neb nins fãa sẽn da na n wilg tɩ b tara tẽeb ne-a wã yĩnga. Baraar yʋngo, a Zezi togsa a tʋm-tʋmd sakdbã yɛl wʋsg sẽn tar yõodo. Wala makre, a togs-b-la bũmb ning sẽn da na n kɩt tɩ b bãng a karen-biisã. A yeelame: “Mam kõta yãmb tõog paalga. Bɩ yãmb nong taaba. Bɩ y nong taab wa mam sẽn nong yãmbã. Yãmb sã n nong taaba, neba fãa na n bãngame tɩ yãmb yaa mam karen-biisi.”—Zã 13:34, 35.
2 Kiris-neb hakɩkã segd n wilga nonglem hakɩk ne taaba, la b lʋɩɩs b tẽed-n-taasã raab taoore. B pa segd n maan sãmb-sãmb la b ‘sak kũum b zo-rãmba yĩng’ ye. (Zã 15:13) Wãn to la pipi kiris-nebã sak no-paalgã? A sebr ning yʋʋr sẽn yi wã pʋgẽ (Apologétique), a Tɛrtiliẽ sẽn da yaa yʋʋm kob-gĩnd a yiib-n-soab gʋlsd a ye wã lebs n togsa neb a taab goam kiris-nebã zut n yeel woto: ‘Ges-y b sẽn nong taab to-to, b sẽn sak n na n ki taab yĩng to-to.’
3, 4. a) Bõe yĩng tɩ d segd n lak d mens ne rat-m-yembrã? b) Bõe la d na n yã sõs-kãngã pʋgẽ?
3 Tõnd me segd n ‘tʋka taab zɩɩb n pids Kirist tõogo.’ (Galat dãmba 6:2) Baasg zãnga, rat-m-yembrã yaa bõn-gɩdgd kãseng sẽn tõe n kɩt tɩ tõnd pa sak n tũ Kirist tõogã la d ‘nong a Zeova tõnd Wẽnnaam ne d sũur fãa, ne d sɩɩga fãa, la ne d yam fãa, la d nong d yak wa d meng’ ye. (Matɩe 22:37-39) D sẽn pa zems zãngã yĩnga, d nong n baooda d mens nafr bala. Rẽ sã n naag ne vɩɩmã yɩɩre, wags-n-taarã lekollẽ wã bɩ tʋʋma zĩigẽ, la bao n kõ noorã sẽn pa nana wã, rẽ paasda tõnd rat-m-yembrã. Rat-m-yembrã pa bũmb sẽn lebd poorẽ ye. Tʋm-tʋmd a Poll keooga tõnd tɩ: “Yaoolem wakate . . . neba na n yɩɩ beed dãmba.”—2 Tɩmote 3:1, 2.
4 A Zezi tẽng zug koe-moonegã saab sẽnese, a kõo a karen-biisã noy a tãab sẽn da tõe n sõng-b tɩ b mao ne rat-m-yembrã. No-kãens la bʋse, la wãn to la b tõe n naf tõndo?
Yellã tɩɩm meng-menga
5. A Zezi sẽn da wa n moond Galile rɩtg babgẽ wã, bõe la a wilg a karen-biisã, la bõe yĩng tɩ rẽ sãam b sũyã?
5 A Zezi ra moonda Galile rɩtg babgẽ wã, Filip Sezare wã noore. Zĩ-kãngã sẽn be bãan la a yaa neerã tõe n wõnda yõ-noogr zĩiga, la pa kɩɩs-m-meng raab zĩig ye. La a Zezi sẽn da wa n be be wã, a sɩngame n wilgd a karen-biisã “tɩ yaa tɩlae tɩ [yẽ] kẽng Zerizalɛm n paam namsg wʋsg kãsem dãmba la maan-kʋʋdba kãsem dãmba ne gʋlsdba nusẽ, la tɩ b na n kʋʋ [yẽ], la tɩ dasem a tãab raare [a] na n vʋʋgame.” (Matɩe 16:21) A Zezi sẽn vẽneg yel-kãngã n togs a karen-biisã ra segd n sãama b sũyã, bala hal tɩ ta sasa kãnga, b ra saagdame tɩ b Zusoabã ra na n lugla a Rĩungã tẽng zugu.—Luk 19:11; Tʋʋma 1:6.
6. Bõe yĩng t’a Zezi zab a Pɩɛɛr sõma?
6 Zĩig pʋgẽ, a Pɩɛɛr “boola [a Zezi] kɛɛng n sɩng n leng bãmb n yeele: ‘Zusoaba, Wẽnnaam ka na n sak t’a yɩ woto ye! Bõn-kãng ka na n paam yãmb ye.’ ” A Zezi manesem yɩɩ wãn to? “A Zezi wẽnemdame n yeel yẽnda yaa: ‘Leb mam poorẽ Sʋɩtãana. Fo dat n gɩdga mam sore, tɩ bõe, fo tagsg ka Wẽnnaam dẽnd ye, yaa ninsaal dẽnda.’ ” Ad nin-kãensã b yiibã tagsa sɩd ra yaa toor wʋsg ne taaba! A Zezi saka mong-m-meng vɩɩm ning Wẽnnaam sẽn da tʋll t’a vɩɩmdã. Ra yaa vɩɩm sẽn da na n wa baas ne a kũum namsg ra-luk zug kiis a wãn pʋgẽ. A Pɩɛɛr da sagenda a Zezi t’a bao naar vɩɩm. A Pɩɛɛr yeela a Zezi tɩ ‘Wẽnnaam ka na n sak tɩ yɩ woto ye!’ Sãmbg sẽn ka be, yaa ne yam-sõng la a Pɩɛɛr sẽn gomã. Ne rẽ fãa, a Zezi zab-a lame, a sẽn bas t’a Sʋɩtãan toeem a yamã sasa kãnga wã yĩnga. A Pɩɛɛr da pa ‘tagsd wa Wẽnnaam ye, ra yaa wa ninsaala.’—Matɩe 16:22, 23.
7. Wala b sẽn gʋls tɩ be Matɩe 16:24 pʋgẽ wã, bõe la a Zezi wilg a karen-biisã tɩ b maane?
7 D tõe n wʋma a Pɩɛɛr goamã buud rũndã-rũndã. Dũniyã nong n yeta ned t’a ra mong a meng ‘bɩ t’a ra nams a vɩɩmã ye.’ La a Zezi ra sagenda a karen-biisã tɩ b tall tagsg sẽn yaa toor fasɩ ne rẽ. A sagla a karen-biisã tɩ: “Ned sã n dat n tũ maam, bɩ a kɩɩs a meng raabo n dɩk a kũum [da-luk] n tũ maam [wakat fãa].” (Matɩe 16:24) Bãngr sebr a yembr (The New Interpreter’s Bible) yeelame: “Gom-kãensã pa neb nins sẽn nan pa karen-biisã yĩng ye, la yaa goam sẽn kɩtd tɩ neb nins sẽn zoe n sak Kirist boollã tags b karen-biilmã zugu.” Yaa tẽedbã n segd n tũ noy a tãabã a Zezi sẽn kõ verse wã pʋgẽ wã. Bɩ d ges-b ball-balle.
8. Wilg-y kɩɩs f meng raabã sẽn dat n yɛɛlga.
8 Pipi, d segd n kɩɩsa d meng raabo. Gɛrk gom-biig ning b sẽn lebg tɩ ‘kɩɩs f meng raabã’ wilgdame tɩ f sakame n na n kɩɩs f mengã rat-m-yembr tʋlsem bɩ f meng nafre. Kɩɩs f mengã raab pa f sẽn na n mong f meng yel-nood kẽer wakat-wakat bal ye. A pa rat n yeel me tɩ d mong d meng ne bõn-sõng buud fãa bɩ d sãam d mensã ye. Tõnd pa ‘so tõnd mens’ yɛs ye, sẽn dat n yeel tɩ d sakame n dɩk d vɩɩmã fãa la bũmb nins fãa d sẽn tarã n kõ a Zeova. (1 Korẽnt dãmba 6:19, 20) D pa vɩ rat-m-yembr vɩɩm ye, la d rɩkda d vɩɩmã n maand Wẽnnaam daabã. D sẽn kɩɩs d mensã raabã rat n yeelame tɩ d yãka yam n na n maan Wẽnnaam daabã, baa rẽ sã n kɩɩsda tõnd mengã sẽn tʋll n maanã. D wilgdame tɩ d rɩka d mengã zãng n kõ Wẽnnaam, d sã n dɩk d mengã n kõ-a n deeg lisgu. Rẽ poore, d modgdame n na n vɩɩmd tɩ zems ne d sẽn dɩk d mengã n kõ-a wã d yõor tɛka.
9. a) A Zezi sẽn da wa n be tẽng zugã sasa, namsg ra-luk ra makda bõe? b) Wãn to la d rɩkd d namsg ra-luka?
9 Yiib-n-soaba, d segd n dɩka d namsg ra-lukã. A Zezi pipi karen-biisã wakatẽ wã, namsg ra-luk ra makda namsgo, yãnd la kũum. Ra yaa tʋʋm beed maandbã bal la b ra segd n kʋ namsg ra-luk zugu, bɩ b kũumã la b kaad raoog zugu. Ne gom-kãngã, a Zezi wilgame tɩ kiris-ned segd n segla a meng n sak namsgo, yaalg la kũum menga, a sẽn pa dũniyã rẽndã yĩnga. (Zã 15:18-20) Tõnd sẽn yaa kiris-nebã, d sẽn tũud noy ninsã kɩtame tɩ d yaa toor ne dũniyã neba. Yaa rẽ n so tɩ dũniyã tõe n ‘gom tõnd wẽnga.’ (1 Pɩɛɛr 4:4) Rẽ tõe n zĩnda lekollẽ wã, tõnd tʋʋmã zĩigẽ la zakã pʋgẽ menga. (Luk 9:23) Baasg zãnga, d sakdame tɩ dũniyã neb yaal tõndo, d sẽn pa leb n vɩ d mens yĩngã yĩnga. A Zezi yeelame: “Bark bee yãmb zutu neb sẽn na n gom yãmb wẽnga, la b nams yãmba, la b sãbs yãmb mam yĩnga. Bɩ y maan sũ-noogo n kɩdem, yãmb keoor sẽn yaa kãseng [saasẽ] wã yĩnga.” (Matɩe 5:11, 12) Sɩda, Wẽnnaam lohormã paoong n tar yõod n yɩɩda.
10. A Zezi tũub wakat fãa baooda bõe maanego?
10 Tãab-n-soaba, a Zezi Kirist yeelame tɩ d segd n tũu yẽ wakat fãa. Sã n yaa ne bãngr sebr a yembr (An Expository Dictionary of New Testament Words) a Vine sẽn gʋlsã, tũ rat n yeelame tɩ yɩ tũud-n-taag ne, “ned sẽn debd zĩ-yend ne-fo.” Pipi Zã 2:6 yetame: “Sẽn yet-a tɩ yẽ tũuda [Wẽnnaam], yẽ me tog n kẽnda wa [Kirist] sẽn dag n kẽndã.” Wãn to la a Zezi kẽn-yã? A Zezi sẽn da tar nonglem ning ne a saasẽ Ba wã la ne a karen-biisã pa yɩ nonglem sẽn naag ne rat-m-yembr ye. A Poll gʋlsa woto: “Kirist ka maan sẽn noom bãmb meng ye.” (Rom dãmba 15:3) Baa a Zezi sã n da ya, bɩ kom sã n da tar-a, a ra lʋɩɩsda neb a taabã raab taoore. (Mark 6:31-34) A Zezi leb n modga wʋsg n moon Rĩungã la a zãms nebã. D segd n dɩka a togs-n-taar n moon ne yẽesem n pids tʋʋmd ning sẽn yaa ‘maan neba buud fãa tɩ b yɩ a karen-biis la d zãms bãmb tɩ b sak bũmb nins fãa a Zezi sẽn togsã.’ (Matɩe 28:19, 20) A manesmã fãa pʋgẽ, Kirist basa makr n kõ-do, la d segd n ‘tũu yẽ naowã’ neere.—1 Pɩɛɛr 2:21.
11. Bõe yĩng tɩ tar yõod tɩ d kɩɩs d mengã raabo, tɩ d rɩk d namsg ra-lukã, la d kell n tũ a Zezi Kirist wakat fãa?
11 Tara yõod wʋsg tɩ d kɩɩs d mengã raabo, tɩ d rɩk d namsg ra-lukã, la d kell n tũ a Soab ning sẽn kõ tõnd mak-sõngã wakat fãa. Tõnd sã n maan woto, na n kɩtame tɩ d ra tall rat-m-yembr sẽn kɩɩsd nonglem sẽn pa baood a meng nafrã ye. Sẽn paase a Zezi yeelame: “Ned ninga sẽn na n gũ a vɩɩm, a vɩɩm na sãam, la ned ninga sẽn na n bas a vɩɩm mam yĩnga, a na paam a vɩɩm. La ned sã n paam dũniyã bũmb fãa, t’a meng vɩɩm yaool n sãam, a yõod bee yɛ? Walla ned na n tɛka a vɩɩm ne bõe?”—Matɩe 16:25, 26.
D pa tõe n sak zu-soben dãmb a yiib ye
12, 13. a) Yaa bõe n da pak bi-bɩɩg ning sẽn da yaa naabã sẽn kos a Zezi saglgã? b) Sagl-bʋg la a Zezi kõ bi-bɩɩgã, la bõe yĩnga?
12 Kiis a wãn a Zezi sẽn wilg vẽeneg t’a karen-biisã segd n kɩɩsa b mensã poore, bi-bɩɩg sẽn yaa arzɛk soab la naab n wa a nengẽ n yeele: “Karensaamba, bõe la m tog n maan sẽn yaa sõama tɩ m tõe n paam vɩɩm sẽn ka sɛta?” A Zezi yeel-a lame t’a ‘sak tõodã,’ la a togs-a tõod kãens kẽere, tɩ bi-bɩɩgã yeele: “Mam saka bãmb fãa.” Raoã ra wõnda pʋ-peelem soaba, la a ra maana a sẽn tõe fãa sẽn na yɩl n tũ Tõogã noyã. Rẽ n so t’a soke: “La bõe n keta?” A Zezi togsa bi-bɩɩgã t’a maan bũmb sẽn pa wõnd a taaba, n yeele: “Fo sã n dat n zems zãnga [bɩ “n yɩ sõng zãnga,” Sebr Sõngo], bɩ f kẽng n koos fo sẽn tara fãa n kõ naong rãmba, la fo na paam paoong [saasẽ]. La wa n tũ maam.”—Matɩe 19:16-21.
13 A Zezi yãame tɩ sẽn na yɩl tɩ bi-bɩ-kãngã maan a Zeova raabã ne a sɩɩgã fãa, a ra segd n basa bõn-kãseng ning sẽn tiisd-a a vɩɩmã pʋgẽ wã, sẽn dat n yeel t’a arzɛkã. A Zezi karen-biig hakɩk pa tõe n maan zu-soben dãmb a yiib raab ye. A “ka tõe n sak Wẽnnaam la arzɛgs yiib fãa ye.” (Matɩe 6:24) A segd n talla ‘nif sẽn yaa sõma’ sẽn get tẽebã yɛl bala. (Matɩe 6:22) Bas f paoong la rɩk-b n kõ naong rãmbã yaa mong-m-meng tʋʋmde. A Zezi ra yeta bi-bɩɩgã sẽn yaa naabã t’a bas a laogã n paam zu-no-kãseng ning sẽn yaa wʋk arzɛk saasẽ wã, sẽn yaa arzɛk sẽn da na n wa kõ-a vɩɩm sẽn pa sate, la kɩt t’a wa paam n dɩ naam ne Kirist saasẽ wã. Bi-bɩɩgã ra pa sak n na n kɩɩs a meng raab ye. “A looga ne sũ-sãoongo, tɩ bõe, a tara paoong wʋsgo.” (Matɩe 19:22) La a Zezi karen-biis a taab talla manesem sẽn yaa toore.
14. Zĩm-yẽedb a naasã manesem yɩɩ wãn to a Zezi sẽn bool-b tɩ b wa tũ-a wã?
14 Yʋʋm a yiib sẽn deng rẽ, a Zezi ra boola zĩm-yẽedb a naas yʋy sẽn boond t’a Pɩɛɛre, a Ãndere, a Zak la a Zã me woto. Bãmb b yiib n da yẽed zĩm sasa kãngã, t’a yiibã ra manegd zĩm-gãmba wã. A Zezi yeel-b la woto: “Tũ-y maam, la mam na maan yãmb tɩ y yɩ mam neba baoodba.” B naasa fãa wa n basa b zĩmã yẽeb n tũ a Zezi b yõor tɛka.—Matɩe 4:18-22.
15. Wãn to la a Zeova rũndã-rũndã Kaset soab a ye mong a meng wʋsg n tũ a Zezi?
15 Rũndã-rũndã, kiris-neb wʋsg rɩka zĩm yẽedb a naasã togs-n-taare, la b pa maan wa bi-bɩɩgã sẽn yaa arzɛk soab la naabã ye. B basa arzɛgs la naam dũniyã pʋgẽ sẽn na yɩl n maan a Zeova raabã. A Deborah yeelame: “Mam sẽn da wa n tar yʋʋm 22, m da segd n dɩka sard sẽn yaa kãsenga. M karma Biiblã sẽn na maan kiis a yoobe, la m da rat n dɩka m vɩɩmã n kõ a Zeova, la m zakã rãmb ra kɩɩsda maam hal wʋsgo. B ra tara ligd wʋsg-wʋsgo, n da getẽ tɩ mam sã n lebg a Zeova Kaset soaba na n yɩɩ yãnd n kõ bãmb sẽn yaa ligd rãmbã. B kõo maam lɛɛr 24 tɩ m yãk naar vɩɩm, wall sɩdã. M sã n da pa bas Kaset rãmbã nengẽ kẽngr zãng-zãnga, m zakã rãmb ra na n kɩtame tɩ m pa paam rogem pʋɩɩr ye. A Zeova sõnga maam tɩ m dɩk sard ning sẽn zemsã, la a kõ-m-la pãng tɩ m tũ m sardã. Yaa yʋʋm 42 masã la mam maand wakat fãa koe-moonegã tʋʋmde, la m pa maand m bãngẽ ye. Mam sẽn bas rat-m-yembr la yõ-noogr vɩɩmã kɩtame tɩ m vɩɩmã pa yɩ faoor la a pa wa ne sũ-sãams wa m sẽn ne m zakã neb nengẽ wã ye. Maam ne m sɩdã sõnga sẽn yɩɩd neb koabg tɩ b bãng sɩdã. Nin-kãens sẽn yaa mam kamb tẽebã wɛɛngẽ wã tara yõod wʋsg ne maam n yɩɩd arzɛk buud fãa.” A Zeova Kaset rãmb milyõ rãmb a taab me tagsda woto. La yãmb yẽ?
16. Wãn to la d tõe n wilg tɩ d pa vɩ d mens yĩng yɛsa?
16 B sẽn pa le rat n vɩɩmd b mens yĩng yɛsã kɩtame t’a Zeova Kaset rãmb tusa yaa so-pakdba, sẽn yaa neb sẽn dɩkd sẽk wʋsg wakat fãa n moond Rĩungã. Neb a taab yɛl sẽn da pa kõt-b sor tɩ b kẽes b mens koe-moonegã pʋgẽ wakat fãa wilgdame tɩ b tara so-pakrã yam, n teend Rĩungã mooneg tʋʋmd wa b sẽn tõe tɛka. Roagdbã wilgda yam-kãngã buudu, b sã n mongd b mens yɛl kẽer la b rɩkd b sẽkã wʋsg sẽn na yɩl n zãms b kambã tẽebã yɛla. Tõnd ned kam fãa tõe n wilga ne manesem buud toor-toor tɩ Rĩungã yɛl n wat pipi d vɩɩmã pʋgẽ.—Matɩe 6:33.
Ãnd nonglem n tusd tõndo?
17. Yaa bõe n tusd tõnd tɩ d mong d mense?
17 Nonglem sẽn pa baood d mens nafrã wilgr pa nana ye. La tags-y bũmb ning sẽn tusd tõndã yelle. A Poll gʋlsame: “Kirist nonglem n so tõndo, tõnd sẽn mi sɩd tɩ yembr [n] ki neba fãa yĩnga . . . Bãmb kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋga yĩnga.” (2 Korẽnt dãmba 5:14, 15) Yaa Kirist nonglmã n tusd tõnd tɩ d le pa vɩ d mens yĩng ye. Ad woto sɩd yaa pãn-tusd-kãseng menga. Kirist sẽn ki tõnd yĩngã yĩnga, d pa segd n vɩɩmd a yĩng sɩda? Ad yaa mi-beoog ning tõnd sẽn tare, nonglem kãseng ning Wẽnnaam ne Kirist sẽn tall ne tõndã n tusd tõnd tɩ d rɩk d vɩɩmã n kõ Wẽnnaam n lebg Kirist karen-biisi.—Zã 3:16; 1 Zã 4:10, 11.
18. Bõe yĩng tɩ mong-m-meng vɩɩm tar yõodo?
18 Ra leb n vɩɩmd d mens yĩngã tara yõod bɩ? Bi-bɩɩg sẽn yaa arzɛk soab la naabã sẽn zãgs Kirist boolgã la a loogã poore, a Pɩɛɛr yeela a Zezi: “Gese, tõnd basa bũmb fãa n tũ yãmba. Woto, yaa bõe la tõnd na n deege?” (Matɩe 19:27) A Pɩɛɛr ne tʋm-tʋmdb a taabã sɩd kɩɩsa b mense. Bõe la b ra segd n paam tɩ yɩ b keoore? Pipi, a Zezi yeel-b lame tɩ b na n paama zu-noog n dɩ naam ne yẽ saasẽ. (Matɩe 19:28) A Zezi leb n bẽda ne rẽ n gom bark nins a karen-biisã ned kam fãa sẽn da tõe n paama yelle, n yeele: “Ned ka be sẽn na n bas a yir walla a ba-bi-raop walla a ba-bi-pogs walla a ma walla a ba walla a kamb walla a pʋt mam yĩng ne Koe-nooga yĩnga, sẽn kõn paam yiri la ba-bi-raop la ba-bi-pogse la ma rãmba la kamba la pʋto naoor koabg . . . masã zamaan kãngã pʋgẽ [ye]. La dũniyã sẽn wata, a na paam vɩɩm sẽn ka sɛta.” (Mark 10:29, 30) D na n paamame tɩ yɩɩg d sẽn basã. Tõnd tẽeb pʋgẽ ba rãmbã, ma rãmbã, ba-bi-rap la ba-bi-pogs la kambã pa tar yõod wʋsg n yɩɩd bũmb buud fãa tõnd sẽn bas Rĩungã yĩngã sɩda? Ãnd n paam vɩɩm sẽn be bark n yɩɩda? A Pɩɛɛr bɩ, bɩ bi-bɩɩg ning sẽn yaa arzɛk soab la naabã?
19. a) Bõe n kõt sũ-noog hakɩkã? b) Bõe la d na n yã sõsg ning sẽn pʋgdã pʋgẽ?
19 Ne a goam la a tʋʋmã, a Zezi wilgame tɩ yaa f sẽn na n kõ la f sõng la f paamd sũ-noogo, la pa f sẽn na n yaa rat-m-yembr soab ye. (Matɩe 20:28; Tʋʋma 20:35) Tõnd sã n le pa vɩ d mens yĩnga, la yaa Kirist la d tũud wakat fãa, d paamda sũ-no-kãseng d vɩɩmã pʋgẽ masã, la d saagd n na n paam vɩɩm sẽn pa satã beoog-daare. Yaa sɩda, d sã n kɩɩs d mensã raabo, a Zeova lebgda d Zusoaba. Rẽ kɩtdame tɩ d lebg Wẽnnaam yembse. Bõe yĩng tɩ yembd kãng tar keoore? Wãn to la a tar pãn-tusdg sard nins tõnd sẽn dɩkd d vɩɩmã pʋgẽ wã zutu? Sõsg ning sẽn pʋgdã na n leoka sogs-kãensã.
Yãmb tẽrame bɩ?
• Bõe yĩng tɩ d segd n kɩɩs rat-m-yembr tʋlsmã?
• Kɩɩs d mens raabã, rɩk d namsg ra-lukã, la tũ a Zezi wakat fãa rat n yeelame tɩ bõe?
• Yaa bõe n tusd tõnd tɩ d pa vɩɩmd d mens yĩng yɛsa?
• Bõe yĩng tɩ mong-m-meng vɩɩm tar yõodo?
[Zãmsgã sogsgsã]
[Foto, seb-neng a 9]
‘Zusoaba, Wẽnnaam ka na n sak tɩ yɩ woto ye!’
[Foto rãmba, seb-neng 11]
Nonglmã n kɩt t’a Zeova Kaset rãmbã moond Rĩungã ne yẽesem