Biiblã tõe n sõnga yãmb tɩ y paam sũ-noogo

BIIBLÃ pa logtoeemd sebr ye. La a wilgdame tɩ sũ-noog wall sũ-sãoong tõe n toeema ned yam la a yĩnsã laafɩ. Biiblã yetame tɩ “sũ-noog wata ne laafɩ. La sũ-sãoong boogda yĩns keelem.” A paasdame: “Fo raood komsa toog daar bɩ? F pãngã na n yɩɩ kɩdga.” (Yelbũna 17:22; 24:10, NW) Sũ-sãoong tõe n booga d keelem n kɩt tɩ d tags tɩ d yaa pãn-komsem soab n pa tʋll n toeem wall d bao sõngr ye.

Sũ-sãoong leb n tõe n komsa ned tẽebo. Naoor wʋsgo, neb nins sẽn tagsd tɩ b ka barkã tẽedame tɩ b pa tol n tõe n paam Wẽnnaam zood la a bark ye. A Simone d sẽn gom a yell sõsg ning sẽn loogã pʋgẽ wã ra sãmbdame tɩ yẽ “sẽn yaa to-to wã, a pa tol n tõe n ta Wẽnnaam yam ye.” La d sã n ges Biiblã sẽn yaa Wẽnnaam Gomdã pʋgẽ, d yãtame tɩ Wẽnnaam nanda neb nins sẽn maood n dat n ta a yamã.

B yell sɩd paka Wẽnnaam

Biiblã yeta tõnd tɩ “Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã.” Wẽnnaam pa paoogd “sik-m-meng yam ne sũ-sãoong”  soab ye, a kãabame t’a ‘na n kõo sik-m-mens rãmb sũ-keelem la a paas sũ-sãoong rãmba pãnga.’—Yɩɩl Sõamyã 34:19; 51:19; Ezai 57:15.

Vugri, Wẽnnaam Biribl a Zezi yãame tɩ yaa tɩlae t’a kɩt t’a karen-biisã bãng tɩ Wẽnnaam nee bõn-sõng a tʋm-tʋmdbã nengẽ. A Zezi rɩka makr n wilg tɩ yirg meng sẽn yaa liuulã sã n lʋɩ tẽngã, baa neb wʋsg sẽn get t’a yõod pa waoogã, Wẽnnaam mii a tiiri. A leb n wilgame tɩ Wẽnnaam mii ninsaalbã yel-bõoneg fãa, hal ne b zoobdã sõor menga. A Zezi baasa a makrã n yeele: “Dẽ yĩnga, bɩ y ra zoe rabeem ye. Yãmb bee yõod n yɩɩd yirs wʋsgo.” (Matɩe 10:29-31) * A Zezi wilgame tɩ baa ninsaalbã sẽn tagsd to-to b mensã zutu, sẽn tar-b tẽebã tara yõod Wẽnnaam nifẽ. Tʋm-tʋmd a Pɩɛɛr tẽegda tõnd tɩ “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.

Tall-y tagsg sẽn zemse

Wẽnnaam Gomdã sagenda tõnd tɩ d tall tagsg sẽn zems d mensã zutu. Wẽnnaam vẽnega tʋm-tʋmd a Poll t’a gʋls woto: “Ne bark ninga b sẽn kõ maamã, mam yeta ned kam fãa sẽn be yãmb sʋka t’a ra tags tɩ yẽ yaa sõama n yɩɩd sẽn zems ye. La bɩ yẽ tags ne gũus-m-meng wa sẽn zems Wẽnnaam sẽn pʋɩ tẽeb n kõ ned kam fãa.”—Rom dãmba 12:3.

Yaa vẽeneg tɩ d pa rat n pẽg d meng tɩ loog n wa lebg tɩtaam soaba, la d pa rat n tags tɩ d ka bark me ye. D segd n talla tagsg sẽn zems d mengã zugu, n bãng d zʋg-sõma wã la d pãn-komsmã. Rẽ wɛɛngẽ, pag a ye sẽn yaa kiris-ned yeela woto: “Mam pa nin-wẽnga, la m sõmblem pa yɩɩd neb a taaba me ye. Mam tara zʋg-sõma la pãn-kõmsem wa neba fãa.”

Yaa sɩd tɩ tagsg sẽn zems paoong pa nana ye. Yɩl n bas tags-wẽns d sẽn sɩng n tar d mengã zug hal sẽn na maan yʋʋmã, baooda modgre. La ne Wẽnnaam sõngre, d tõe n toeema d zʋgã la d sẽn tagsd to-to vɩɩmã zugã me. Sɩd yaa woto la Wẽnnaam Gomdã sagend tõnd tɩ d maane. D karemda woto: “Tɩ y bas yãmb pĩnd tʋʋma sẽn yaa nin-kʋdga rẽnda sẽn sãamd yẽnda ne a ratem wẽnga fãa sẽn yaa belgrã, la tɩ yãmb paam tagsg manegre n yeelg nin-paalga Wẽnnaam sẽn naan wa bãmb wẽnego ne tɩrlem la pʋ-peelem sẽn wat ne sɩda.”—Efɛɛz rãmba 4:22-24.

Tõnd sã n mao n maneg d yamã la d tagsa wã, d tõe n toeemame n paam tagsg sẽn zemse. A Lena d sẽn gom a yell sõsg ninga sẽn loogã pʋgẽ wã wa n bãngame  t’a sã n ket n tagsdẽ tɩ ned pa nong-a bɩ tɩ ned pa rat n sõng-a, baa fʋɩ pa na n tõog n toeem a sẽn tagsd to-to a meng zugã ye. Biiblã sagl-bʋg n sõng a Lena, a Simone la neb a taab tɩ b tõog n toeeme?

Biiblã noy sẽn paasd sũ-noogo

“Bas f yell ne Zusoabã, la bãmb na kogl foom.” (Yɩɩl Sõamyã 55:23) Pipi, pʋʋsgã tõe n sõng-d lame tɩ d paam sũ-noog hakɩka. A Simone yeelame: “Mam sũurã sã n da sãam fãa, m pʋʋsda a Zeova n kos a sõngre. Mam zu-loeesã fãa pʋsẽ, a kõ-m-la pãng la sor-wilgri.” Yɩɩl-gʋlsdã sẽn sagl tõnd tɩ d bas d yell ne a Zeova wã, a tẽegd-d lame tɩ d yell paka a Zeova, la t’a getame tɩ d zemsa ne a sõngre. Yʋʋmd 33 pakã daar yʋngo, a Zezi sẽn wilg a karen-biisã tɩ yẽ loogr ta n saame wã, b sũyã sãamame. A sagl-b lame tɩ b pʋʋs Ba wã la a yeel-b woto: “Bɩ y kose, la yãmb na reege tɩ yãmb sũ-nooga na pidi.”—Zã 16:23, 24.

“Sẽn kõt-a sũ-noog yɩɩda sẽn deegd-a.” (Tʋʋma 20:35, Sebr Songo) Wa a Zezi sẽn zãms nebã, f sã n kõ kũuni, f paamda sũ-noog hakɩka. Biiblã sɩd kãngã tũub kɩtdame tɩ d get neb a taabã raab yell n yĩmd d pãn-komsmã. Neb nins d sẽn sõngdã sã n wilgd b mi-beoogo, d sũur nooma ne d menga. A Lena kɩsa sɩd t’a sẽn moond Biiblã koe-noog a yagsã sõngd-a-la ne manesem a yiibu. A yeelame: “Pipi, a kõta maam sũ-noog buud ning yell a Zezi sẽn gomã. Yiib-n-soaba, neb a taabã sũy sẽn noom ne koe-noogã, wẽneg n noogda mam sũuri.” D sã n sõngd nebã ne yamleoogo, d na n yãame tɩ Yelbũna 11:25 sẽn yetã yaa sɩda. A yetame tɩ: “Ned sã n maand neere, a na n tɩgame. La ned sã n sõngd a taaba, a na n paama sõngre.”

“Nimbãan dãmb tara toog raar fãa. La sũ-noog soab yir yaa wa kibs wakat fãa.” (Yelbũna 15:15) Tõnd fãa tõe n tagsa d meng la d yɛlã zut wa d sẽn date. D tõe n tagsa tags-wens tɩ sãam d sũuri, wala d sẽn tõe n tall tags-tɩrs tɩ kɩt tɩ d sũur yɩ noog wa d bee kibs zĩigẽ wã. A Simone yeelame: “Mam modgdame n get yɛlã ne yam-sõngo. M dɩkda m sẽkã n zãmsd Biiblã, n moond koe-noogã la m pʋʋsd wakat fãa. M baood n na n zĩnda ne neb sẽn get yɛlã ne yam-sõng me. Sẽn paase, m makd n na n sõnga neb a taab ne b zu-loeesã.” Yam-sõng kãngã wata ne sũ-noog hakɩk wala Biiblã meng sẽn sagend-dã: “Nin-tɩrse, bɩ y maan sũ-noog ne Zusoabã n kɩdem. Tɩrlem sẽn be neb nins sũyã pʋsẽ wã, bɩ y kaas ne sũ-noogo.”—Yɩɩl Sõamyã 32:11.

“Tũud-n-taag hakɩk nonga wakat fãa, la a yaa saam-biig sẽn dog toog wakat yĩnga.” (Yelbũna 17:17, NW) D  sã n togs d sũurẽ yell ned d sẽn nong wall sagend sẽn zems ne d bas-yardo, tõe n sõng-d lame tɩ d tõog n pĩnd n yiis tags-wẽnsã tɩ b ra wa lim-d ye. D sã n gomd ne neb a taabã, tõe n sõng-d lame tɩ d tall tagsg sẽn zems yɛlã zutu. A Simone sak n deega woto: “Mam sã n togs ned m sẽn tagsde, sõngd-m-la wʋsgo. Y segd n togsa ned y tagsgo. Naoor wʋsgo, rẽ bal sekame.” Y sã n maan dẽ, y na n mikame tɩ yel-bũnd ninga sẽn yet tɩ ‘yɩɩr kɩtdame tɩ ned sũur sãam la gom-nood kõt-a-la sũ-noogã’ yaa sɩda.—Yelbũna 12:25.

Bũmb ning y sẽn tõe n maane

Biiblã noyã sẽn tõe n sõng-d tɩ d tõog sũ-sãamsã la d paam sũ-noog hakɩkã sʋka, yaa bãmb b wãn bal la d sẽn vaeesã. Yãmb me sã n maooda ne sũ-sãamse, d sagend-y lame tɩ y vaees Biiblã sẽn yaa Wẽnnaam Gomdã sõma n paase. Modg-y n tall-y tagsg sẽn zems y mengã la y zems-n-taarã ne Wẽnnaamã zugu. D saagda ne d sũur fãa tɩ ne Wẽnnaam Gomdã sor-wilgri, y na n tõog n paama sũ-noog hakɩk bũmb nins y sẽn maandã fãa pʋsẽ.

[Tẽngr note]

[Foto, seb-neng a 7]

Biiblã noy tũub kõta sũ-noogo