“Kaset buud fãa yĩnga”
“Kaset buud fãa yĩnga”
“Yãmb na n yɩɩ mam kaset dãmb . . . dũniyã tɛk fãa.”—TƲƲMA 1:8.
1. Wakat bʋg la yɛ la karen-biisã wʋm bãngr-gomd ning sẽn be Matɩe 24:14 pʋgẽ wã?
A ZEZI goam nins sẽn be Matɩe 24:14 pʋgẽ wã yaa goam tõnd wʋsg sẽn mi sõma hali n tẽr-b ne zug menga. La ada yaool n yaa bãngr-gom-kãseng menga! Mams-y n ges-y a Zezi karen-biisã tagsg sẽn da yɩ to-to, b sẽn wʋm gom-kãensã wã. Ra yaa yʋʋmd 33. Karen-biisã zĩnda ne a Zezi sẽn na maan yʋʋm a tãabo, la masã, b tũ-a lame n wa Zerizalɛm. B yãa yel-soalem nins a sẽn maanã, la b kelg a zãmsgã. Baa ne b sũy sẽn da yaa noog ne sɩd-kãsems nins a Zezi sẽn da zãms-bã, b ra miime tɩ pa nebã fãa sũy n da noom ne rẽ ye. A Zezi ra tara bɛɛb sẽn tar pãnga, minim la naam wʋsgo.
2. Yel-tood bʋs la kɩɩsg bʋg la karen-biisã ra na n sege?
2 Daar a ye, Oliiv tɩɩs Tãngã zugu, karen-biis a naas n da be be ne a Zezi, n da maag b yĩns n kelgd-a neere, t’a gomd ne-b yɛl la zu-loees nins b sẽn da na n segã yelle. Sẽn da reng rẽ, a Zezi ra togs-b lame tɩ b ra na n kʋ-a lame. (Matɩe 16:21) Masã, a togs-b-la vẽeneg tɩ bãmb me ra na n sega nams-toaag b tẽebã yĩnga. A yeelame: “B na n ninga yãmb neb nins sẽn na n nams yãmba nusẽ tɩ b kʋ yãmba. La buud fãa na n kisga yãmb mam yʋʋra yĩnga.” La ra pa na n tek woto ye. Zɩlem-be-no-rɛɛsdbã ra na n belga neb wʋsgo. Neb kẽer n da na n lak n lʋɩ n bas sɩdã sorã, n yik n kisg b taaba, la b zãmb-b menga, tɩ “neb wʋsg” me na n bas tɩ b nonglmã ne Wẽnnaam la ne a Gomdã maage.—Matɩe 24:9-12.
3. Bõe yĩng t’a Zezi goam nins sẽn be Matɩe 24:14 pʋgẽ wã sɩd yaa lingri?
3 Yaa a Zezi sẽn wa n gom yel-tood kãensã sẽn sãamd sũurã yell poor bal la a togs koɛɛg a to sẽn ling karen-biisã hal wʋsgo. A yeelame: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) N-ye, tʋʋmd ning a Zezi sẽn sɩng Israɛllã, sẽn yaa ‘kɩs sɩdã kasetã’ ra na n kell n kẽnga taoor n yalg n ta dũniyã gill zugu. (Zã 18:37) Ad sɩd yaa bãngr-gom-kãseng sẽn sek lingr tɛkẽ! Moon koɛɛgã tẽnsã fãa pʋsẽ wã meng ra na n yɩɩ tʋʋm-toogo. Sẽn paase, a maaneg ‘buuda fãa kisgr’ taoor da na n yɩɩ yel-solemd menga. La tʋʋm-kãseng kãngã pidsg ra na n kɩtame tɩ b kils a Zeova naanã, a yɩɩdmã la a pãngã, n pẽg a nonglmã, a nimbãan-zoeerã la a sũmarã. Sẽn paase, rẽ ra na n kõo a sõgen dãmbã segb tɩ b wilg b tẽeb la b wẽn-sakre.
4. Ãnd dãmb la b bobl kasetã kũun tʋʋmde, la gom-bʋs sẽn kengd pɛlg la a Zezi togs-yã?
4 A Zezi wilga a karen-biisã vẽeneg tɩ tʋʋm kãseng n da gũud-ba. Nand t’a Zezi rʋ saasẽ, a puk-b lame n yeele: “Sɩɩg Sõng sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.” (Tʋʋma 1:8) Sɩda, ra pa na n kaoos la neb a taab wa naag-b ye. Baasg zãnga, karen-biisã sõor da ket n yaa bilfu. Ad karen-biisã sẽn bãng tɩ Wẽnnaam vʋʋsem sõngã pãng n na n sõng-b tɩ b tõog n tʋm tʋʋm-kãnga Wẽnnaam sẽn bobl-bã sɩd kenga b pɛlga!
5. Bõe la pipi karen-biisã pa bãng kasetã kũun wɛɛngẽ?
5 Karen-biisã ra miime tɩ b ra segd n moona koe-noogã la b ‘maan neb sẽn yit buud fãa tɩ b yɩ karen-biisi.’ (Matɩe 28:19, 20) La b ra pa mi kasetã sẽn da segd n yelg n ta zĩig ning ye. B ra leb n pa mi saabã sẽn da na n wa wakat ning ye. Tõnd me pa mi ye. Yaa a Zeova a ye bal n mi yel-kãensã. (Matɩe 24:36) B sã n wa kõ kasetã tɩ pid n ta a Zeova sẽn dat to-to wã, a na n kɩtame tɩ dũni wẽng kãngã sa. Yaa sasa kãng bal la kiris-nebã na n bãng tɩ koe-moonegã tʋʋmd pidsame n ta wala a Zeova sẽn da rat to-to wã. Pipi karen-biisã ra pa tõe n mams n bãng kasetã kũun sẽn da yelg n ta to-to saabã wakat ye.
Kasetã kũun a Zezi pipi karen-biisã zãmaanẽ
6. Bõe n zĩnd yʋʋmd 33 Pãntekotã, la rẽ poor bilfu?
6 A Zezi pipi karen-biisã zãmaanẽ, Rĩungã mooneg la karen-biisã maaneg tʋʋmd woma bi-sõma wʋsgo. Yʋʋmd 33 Pãntekotã daare, sẽn zems karen-biis 120 n da be yĩngr doogẽ Zerizalɛm. Wẽnnaam pʋdga a vʋʋsem sõngã b zutu, tɩ tʋm-tʋmd a Pɩɛɛr gom goam sẽn tall pãnga, n wilg yel-solemd kãngã võore, hal tɩ neb 3000 lebg tẽedb n deeg lisgu. Rẽ ra yaa sɩngr bala. Baa ne tũudmã taoor dãmb sẽn maan modgr wʋsg n na n yals koe-noogã moonegã, a Zeova “ra fãagda neb n paasdẽ.” Rẽ poor bilfu, “daop sẽn tẽ kolga tus a nu.” Rẽ poor me, “tẽedba sẽn sak Zusoaba tara paasg hal tɩ lebg neb kʋʋngo, daop ne pagba.”—Tʋʋma 2:1-4, 8, 14, 41, 47; 4:4; 5:14.
7. Bõe yĩng t’a Korney tuubgã yɩ bõn-kãsenga?
7 Yel-kãseng a to me n zĩnd yʋʋmd 36. Yaa a Korney sẽn yaa bu-zẽng nedã tuubg la a lisgu. A Zeova sẽn da wa n yeel tʋm-tʋmd a Pɩɛɛr t’a tɩ yã nin-kãngã sẽn yaa wẽn-zoɛtã, a Zeova wilgame t’a Zezi noor ning sẽn yeel tɩ b ‘maan nebã sẽn be buudã fãa pʋsẽ tɩ b yɩ karen-biisã,’ ra pa tek Zʋɩf rãmb nins sẽn be tẽns toɛy-toɛyã bal ye. (Tʋʋma 10:44, 45) Neb nins sẽn da lʋɩt taoorã yel-manesem yɩɩ wãn to? Tʋm-tʋmdbã la kãsem dãmbã sẽn be Zide wã sẽn wa n bãng tɩ koe-noogã ra segd n taasa bu-kãens sẽn pa Zʋɩf buudã nebã me, b pẽga Wẽnnaam. (Tʋʋma 11:1, 18) La nananda, koe-noogã mooneg tʋʋmd ra ket n womda biis Zʋɩf rãmbã sʋka. Yʋʋm a wãn poore, tõe tɩ yaa yʋʋmd 58, bu-zẽms neb nins sẽn lebg tẽedbã toor sẽn ka be, ‘Zʋɩf rãmb tusa wʋsg me n tẽ.’—Tʋʋma 21:20.
8. Wãn to la koe-noogã nafd nebã yembr-yembre?
8 Yaa sɩd tɩ sõorã fɩɩgr yɩɩ wʋsg pipi kiris-nebã zãmaanẽ, la d pa segd n yĩm abada tɩ yaa nebã sõor la b sẽn wilgdã ye. Biiblã koɛɛg b sẽn wʋmã talla pãnga. (Hebre dãmba 4:12) A toeema neb nins sẽn sak-a wã vɩɩm wʋsgo. Nebã manega b vɩɩmã, n yeelg nedemd paalgã wa fuugu, n paam zems-n-taar ne Wẽnnaam. (Efɛɛz rãmba 4:22, 23) Yaa woto me rũndã-rũndã. La neb nins fãa sẽn sak koe-noogã tara saag-kãseng sẽn yaa vɩɩmd wakat sẽn kõn sa.—Zã 3:16.
Wẽnnaam tʋmd-n-taase
9. Pipi kiris-nebã sak n deegame tɩ b paama zu-noog la zɩɩb bʋgo?
9 Pipi kiris-nebã pa tags tɩ yaa ne bãmb pãng la tʋʋmdã sẽn pidsã ye. B sak n deegame tɩ b paama ‘vʋʋsem sõngã pãng’ teelg b moonegã tʋʋmdẽ. (Rom dãmba 15:13, 19) Ra yaa a Zeova n kɩt tɩ fɩɩgrã zĩndi. Wakat kãng me, kiris-nin-kãensã bãngame tɩ b ra paama zu-noog la zɩɩb n na n yɩ “tʋmd-n-taas ne Wẽnnaam.” (1 Korẽnt dãmba 3:6-9) Woto yĩnga, wa sẽn zems ne a Zezi saglgã, b tʋmda tʋʋmd ning b sẽn kõ-bã ne b pãng tɛka.—Luk 13:24.
10. Modg-bʋs la pipi kiris-neb kẽer maan sẽn na yɩl n kõ kasetã buudã fãa sʋka?
10 A Poll sẽn da yaa “bu-zẽms tʋm-tʋmdã” toga sor n maan kilometa tusa tẽn-koɛɛng la mogr zugu, n lugl tigims wʋsg Azi sẽn yaa Rom porvẽnsã pʋgẽ la a kẽng Gɛrs soolmẽ wã me. (Rom dãmba 11:13) A leb n kẽnga Rom tẽngẽ wã menga, la tõe t’a kẽnga Ɛspayn me. Sʋkendã, b kõo tʋm-tʋmd a Pɩɛɛr noor t’a moon koɛɛgã zʋmb rãmbã, sẽn dat n yeel tɩ Zʋɩf rãmbã bɩ sẽn kẽ-b bãongã. A kẽnga Babilon n na n tɩ togs koɛɛgã beenẽ me. Wakat kãng tɩ Zʋɩf rãmbã tũudum da tara pãng wʋsg Babilonne. (Galat dãmba 2:7-9; 1 Pɩɛɛr 5:13) Neb a taab sõor sẽn waoog me n tʋm Soaalã tʋʋmd wʋsg beenẽ. Bãmb sʋka, d tõe n sõdga pagb wala a Tirfɛn la a Tirfooze. Pag a to yʋʋr sẽn boond t’a Pɛrsid me la b yeel t’a ‘tʋma Zusoaba tʋʋmd wʋsgo.’—Rom dãmba 16:12.
11. Wãn to la a Zeova ning karen-biisã modgr barka?
11 A Zeova ninga nin-kãensã la neb a taab me sẽn tall yẽesem tʋʋmdã pʋgẽ wã modgr bark wʋsgo. A Zezi sẽn togs tɩ b ra na n kõo tẽnsã fãa kasetã poore, pa yã n ta yʋʋm 30 la a Poll gʋls n wilg tɩ koe-noogã ra ‘moona dũniyã fãa’ ye. (Kolos rãmba 1:23) Saabã waa rẽ wẽnd bɩ? Bũmb a yembr n kɩt tɩ d tõe n yeel tɩ n-ye. Bala Zʋɩf rãmbã zãmaan saa yʋʋmd 70 a Zezi rogmã poore, Rom tãb-biisã sẽn wa n sãam Zerizalɛm ne a wẽn-doogã. La rũndã-rũndã, a Zeova wilgame tɩ kaset sẽn yaa kãseng n yɩɩd woto zĩig sẽn zãr la b segd n kõ t’a yaool n sãam a Sʋɩtãan dũni wẽngã.
Kasetã kũun rũndã-rũndã
12. Wãn to la Biiblã Zãmsdb ra wʋmd noor ning b sẽn kõ tɩ b moon koe-noogã võore?
12 Sẽn deng tɩ yʋʋmd 1900 wã ta, kiris-neb ne yʋʋr tũudmã kɩɩsa sɩdã n kaoos yʋʋm wʋsgo. La yʋʋmd 1900 wã sẽn wa n kolgdẽ wã, Wẽnnaam baleng hakɩkã lebg n luglame. Wakat kãng tɩ b ra boonda a Zeova Kaset rãmbã tɩ Biiblã Zãmsdba. Sasa-kãng tɛk tɩ b bãnga noor ning b sẽn kõ tɩ b maan karen-biis dũniyã gill zugã sẽn da rat n yɛɛlg vẽenega. (Matɩe 28:19, 20) Yʋʋmd 1914 tɩ ra yaa sẽn kolg neb 5100 n da moond koe-noogã, la b ra moond-a-la tẽns 68 pʋsẽ. La rẽ wẽndẽ meng tɩ Biiblã Zãmsdb kãensã ra pa wʋm Matɩe 24:14 võor zãng ye. Yʋʋmd 1900 wã sẽn wa n kolgdẽ wã, tɩ Sosiete rãmb n da zoe n lebg Biiblã sẽn tar koe-noogã bɩ evãnzillã buud goam wʋsg pʋsẽ, la b ra zoe n pʋɩ-a-la dũniyã gill zug me. Woto yĩnga, maana yʋʋma tɩ Biiblã Zãmsdb ra tagsd tɩ kasetã zoe n kõo tẽn-tẽnsã pʋsẽ.
13, 14. Wẽnnaam daabã võor wʋmb sẽn yaa vẽeneg n yɩɩd bʋg la b wilg yʋʋmd 1928 Gũusg Gasgã pʋgẽ?
13 La bilf-bilfu, a Zeova kɩtame t’a nin-buiidã wʋm a raabã la a sẽn na n pids bũmb nins ka la bilfã võor n paase. (Yelbũna 4:18) Yʋʋmd 1928 wã yʋʋm-sar kiuug pipi daar Gũusg Gasgã ne ãngilindã togsa woto: “D tõe n yeelame tɩ Biiblã b sẽn lebg goam toor-toor n pʋɩyã pidsa b sẽn da reng n togs tɩ Rĩungã koe-noogã na n mooname wã bɩ? Ayo! Baa ne b sẽn pʋɩ Biibl dãmb wʋsg woto wã, ket n yaa tɩlae ne Wẽnnaam kaset dãmbã sul-bil sẽn be tẽng zugã tɩ b yiis sɛb sẽn wilgd Wẽnnaam daabã beoog-daar yĩngã võore. B leb n segdame me n lebg n kẽng zags nins pʋsẽ b sẽn basẽ Biibl kãensã wã n tɩ ges nebã. Sã n pa rẽ, nebã pa na n tol n bãng tɩ Mesi Rĩungã la b lugl tõnd wakatã ye.”
14 Gũusg Gasg kãng paasa woto: “Yʋʋmd 1920, . . . Biiblã Zãmsdb wa n wʋma Soaalã bãngr-gomd ning sẽn be Matɩe 24:14 pʋgẽ wã võor sõma. B bãngame tɩ “koe-noog” ning b sẽn da segd n moon dũniyã gill zug tɩ yɩ kaset ne bu-zẽmsã bɩ tẽnsã fãa nebã ra pa koe-noog sẽn moond rĩung sẽn da nan wat ye. Yaa koe-noog sẽn segd n wilg vẽeneg tɩ Mesi sẽn yaa Rĩmã zoe n sɩnga a naamã rɩɩb dũniyã gill zutu.”
15. Wãn to la kasetã kũun tʋʋmd paam pãng yʋʋmd 1920 wã tɛka?
15 “Kaset rãmb sul-bil ning” sẽn da be yʋʋmd 1920 n tɩ tãag yʋʋmd 1930 wã pa kell n pa n yɩ sul-bil ye. Yʋʋm nins sẽn pʋglã, b bãnga ‘piis a taabã’ neb sẽn yaa ‘kʋʋng kãseng’ n welg vẽenega, tɩ b kell n sɩng b baoobo. (Wilgri 7:9; Zã 10:16) Rũndã-rũndã, yaa koe-noogã moondb 6613829 n moond koɛɛgã tẽns 235 pʋsẽ. Bãngr-gomdã pidsgã sẽn yaa kãseng woto wã sɩd noogda sũur menga! ‘Wẽnnaam soolmã koe-noog’ zɩ n moon wʋsg tɩ zãag zĩig woto ye. D da nan zɩ n yã a Zeova sõgen dãmb hakɩk wʋsg woto tẽngã zug ye.
16. Bõe la b pids rɩẽ yʋʋmdã sasa? (Ges-y rapoorã, seb-neng 23-26 pʋgẽ.)
16 Yʋʋmd 2005 tʋʋmd yʋʋmdã sasa, kaset rãmb kʋʋn-kãngã tʋma wʋsgo. B rɩka sẽn yɩɩd lɛɛr dãmb milyaar n moon koe-noogã tẽns 235 pʋsẽ. Lebg-n-tɩ-ges milyõ rãmb la b maan-yã, la b zãms Biiblã ne neb milyõ rãmba. Yaa a Zeova Kaset rãmbã n pids tʋʋm-kãngã. B kõo b laog la b sẽk ne yamleoog n moon b taabã Wẽnnaam Gomdã. (Matɩe 10:8) A Zeova tũnugda ne a vʋʋsem sõngã pãn-kãsengã n ket n kõt a sõgen dãmbã pãng tɩ b pidsd a raabã.—Zakari 4:6.
D modg wʋsg n kõ kasetã
17. Wãn to la a Zeova nin-buiidã sakd a Zezi goam nins sẽn yet tɩ d moon koe-noogã?
17 Baa ne sẽn yaa sẽn kolg yʋʋm 2000 la a Zezi sẽn yeel tɩ koe-noogã ra segd n mooname wã, Wẽnnaam nin-buiidã yẽesem tʋʋmdã pʋgẽ pa boog ye. D miime tɩ d sẽn maood n na n maan sẽn yaa neerã, d pukda a Zeova zʋg-sõma wala nonglmã, nimbãan-zoeerã la a sũ-marã. Wala Wẽnnaam mengã, d pa tʋll tɩ ned baa a yembr sãam ye, la d tʋllame tɩ nebã tek yam n kos sugri, la b paam zems-n-taar ne a Zeova. (2 Korẽnt dãmba 5:18-20; 2 Pɩɛɛr 3:9) Wẽnnaam a Zeova vʋʋsem sõngã sẽn pid a Kaset rãmbã yĩnga, b ket n wɩngd n moonda koe-noogã dũniyã ween-vɩɩs a naasã fãa. (Rom dãmba 12:11) Rẽ kɩtame tɩ neb sẽn be zĩis fãa sakd sɩdã, la b tũud a Zeova sor-wilgrã a sẽn kõt ne nonglmã. Ad makr a wãn sẽn na n wilg rẽ.
18, 19. Toeen-bʋs la neb kẽer sẽn sak koe-noogã maan tɩ yãmb tõe n sõdg n wilgi?
18 A Charles da yaa koaad Kenya tẽngã. Yʋʋmd 1998, a koosa tab sẽn ta toand a 8, tɩ b kõ-a sebr sẽn wilgd t’a yaa tab-koaad mit sẽn ka to a tẽngẽ wã. Wakat kãnga a sɩnga Biiblã zãmsgo. Pa kaoos la a wa bãng tɩ ned sẽn kood tab kɩɩsda noor ning a Zezi sẽn kõ n yeel tɩ f nong f to wã ye. (Matɩe 22:39) A Charles sẽn wa n tags n gese, a bãngame tɩ ‘tab-koaad mit sẽn ka to’ pʋd n yaa ‘nin-kʋʋd sẽn ka to,’ t’a ning a tab-pʋʋgã tɩɩm n kʋ tabã fãa. A modgame n kẽng taoor wʋsg tẽebã pʋgẽ n dɩk a meng n kõ Wẽnnaam n deeg lisgu, la masã a yaa wakat fãa so-pakda, la kãsemb sõngda.
19 Sãmbg sẽn ka be, a Zeova tũnugda ne kasetã b sẽn kõt dũniyã gill zugã n dĩmsd tẽn-tẽnsã, tɩ bõn-neebã, sẽn dat n yeel tɩ nebã watẽ. (Aze 2:7) A Pedro sẽn vɩ Portigallã kẽe semineerẽ, a sẽn da wa n tar yʋʋm 13. A ra rat n lebga misioneer n zãms neb a taaba Biiblã. Wakat bilf poore, a yi n basa semineerã, bala b ra pa zãmsd-b Biiblã wʋsg b karengã pʋgẽ ye. Yʋʋm a yoob poore, a ra zãmsda ninsaal yel-manesem la a tagsg b sẽn boond tɩ pisikolozi wã Lisbon inivɛrsite n wã. A ra vɩɩ ne a pʋgdb sẽn yaa a Zeova Kaset soaba, t’a sagl-a t’a zãms Biiblã. Sasa kãng t’a Pedro ra pa kɩs sɩd ne Wẽnnaam belmã ye. A ra leb n pa mi a sã n na n zãmsa Biiblã bɩ a pa na n zãms ye. A goma ne a karen-saambã n wilg a sãmb-sãmbã, tɩ karen-saambã yeel-a tɩ pisikolozi wã wilgdame tɩ ned sã n pa tõe n yãk yam n maan bũmbu, a sãamda a menga. Rẽ kɩtame t’a Pedro yãk yam n na n kɩt tɩ b zãms-a Biiblã. A reega lisg sẽn pa kaoose, la masã yẽ mengã zãmsda neb a taab Biiblã.
20. Bõe yĩng tɩ d tõe n kɩdem, b sẽn kõt tẽnsã kaset tɩ zãagd zĩig wʋsgã yĩnga?
20 D ket n pa mi b sẽn na n kõ kasetã tẽn-tẽnsã tɩ ta zĩig ning ye. D leb n pa mi saabã waoong daar la a lɛɛr ye. Tõnd miime bal tɩ na n yɩɩ ka la bilfu. Tõnd kɩdemdame, koe-noogã mooneg wʋsg woto wã sẽn yaa bãnd a ye sẽn wilgd tɩ ka la bilfu, Wẽnnaam Rĩungã na n ledga ninsaalbã goosneema rãmbã. (Daniɛll 2:44) Yʋʋmd fãa, neb milyõ rãmb n paamd zu-noog n sakd koe-noogã, la woto waoogda tõnd Wẽnnaam a Zeova. Bɩ d yãk yam n yɩ wẽn-sakdb wakat fãa, la d naag d saam-biisã sẽn be dũniyã gill zugã n ket n tʋmd tʋʋmd ning sẽn yaa kõ tẽnsã fãa kasetã. D sã n maand woto, d na n fãaga d mense, la d fãag neb nins sẽn kelgd tõndã.—1 Tɩmote 4:16.
Y tẽrame bɩ?
• Bõe yĩng tɩ Matɩe 24:14 yaa bãngr-gom-kãsenga?
• Modg-bʋs la pipi kiris-nebã maan moonegã pʋgẽ, la rẽ woma bi-bʋse?
• Wãn to la Biiblã Zãmsdb wa n bãng tɩ b segd n taasa tẽnsã fãa kasetã?
• Y sẽn ges a Zeova nin-buiidã tʋʋmd rɩẽ yʋʋmdã, bõe la y yã tɩ be yamleoog ne-yã?
[Zãmsgã sogsgã]
[Taablo, seb-neng 23-26]
A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 2005
(Ges-y volim relie wã pʋgẽ)
[Kart/Foto, seb-neng 21]
A Poll toga sor n maan kilometa tusa tẽn-koɛɛng la mogr zug n moon koe-noogã
[Foto, seb-neng 20]
A Zeova yeela a Pɩɛɛr t’a tɩ kõ a Korney ne a zakã rãmb kasetã