‘Gũus-y y mens’ sõma

“Zɩt deegda a sẽn wʋmd bũmb ninga fãa. La [yam soab] gũusda ne a sẽn maand bũmb ningã.”—YELBŨNA 14:15.

1, 2. a) Yaa bõe la a Lot sẽn vɩɩmd bũmb ning Sodommã zãmsd tõndo? b) ‘Gũus-y y mensã’ rat n yeelame tɩ bõe?

A ABRAHAAM sẽn wa n yeel a Lot t’a reng n yãk tẽng ning a sẽn da ratã, a Lot ninã ra geta babg ning sẽn paam zãgsg sõma wa ‘a Zeova zẽed zĩigã.’ Zĩigã ra wõnda a zemsa kɛpɩ ne a na tɩ tilg a zakã be, bala “a Lot yãka Zʋrdẽ zĩ-sõnga fãa a meng yĩnga,” n tɩ tilg a sik-zĩig Sodom noore. Baasg zãnga, yɛl nins ninsaal nin sẽn ne balã ra yaa belgre, bala yambẽ be, “Sodom dapa [da] yaa tʋʋm beed dãmb la neb sẽn beeg Zusoaba wʋsgo.” (Sɩngre 13:7-13) Yɛl nins sẽn maan be wã waa ne bõn wʋsg n kõ a Lot la a zakã rãmba. Yẽ ne a kompugli wã wa n baas n tɩ vɩɩ tãng bokẽ. (Sɩngre 19:17, 23-26, 30) Bũmb ning a sẽn da get tɩ yaa neerã, wa n mikame tɩ yaa wẽnga.

² Kibarã sẽn wilg bũmb ning sẽn paam a Lotã tara zãmsg n kõ Wẽnnaam sõgen dãmbã rũndã-rũndã. D sã n wa segd n yãk yam n maan bũmbu, d segd n gũus n bãnga yɛl nins sẽn tõe n wa wã, la d gũus tɩ d ninã sẽn ne wã bal ra wa tudg-d ye. Rẽnd zemsame la Wẽnnaam Gomdã sẽn sagend tõnd tɩ d ‘gũus d mense.’ (1 Pɩɛɛr 1:13) Gɛrk gom-biig ning b sẽn lebg ka tɩ ‘gũus-y y mensã’ yaa “tall yõk-m-menga.” Sã n yaa ne Biibl mit a Lenski, yõk-m-meng kãng yaa “maag-m-menga, tags-tɩ-bɩ, mag yɛlã tɩrga, tɩ kɩtdẽ tɩ d tõe n dɩk sard sẽn zemse.” Bɩ d ges yɛl kẽer sẽn baood tɩ d tall gũus-m-menga.

D gũus ne afɛɛr dãmbã

3. Bõe yĩng tɩ d segd n gũusi, d sã n wa rat n maan afɛɛre?

³ D rɩk makr ne ned b sẽn waoogd sẽn na n yeel-y tɩ y wa tɩ y maan afɛɛre, tɩ tõe tɩ nin-kãng soabã me yaa a Zeova balemda. A sɩd tẽedame t’a sẽn kãabd yãmb bũmb ningã na n kẽesa yõodo, t’a yeel yãmb tɩ y maan tao-tao tɩ ra wa yõsg-y ye. Tõe tɩ y sɩng masã n get rẽ sẽn na n wa maneg yãmb ne a y zakã rãmb vɩɩm to-to. Tõe tɩ y tags meng tɩ rẽ na n kõ-y-la sẽk n paas tɩ y tʋm tẽebã tʋʋm n paase. La Yelbũna 14:15 keoogda tõndo: “Zɩt deegda a sẽn wʋmd bũmb ninga fãa. La nin-yẽeseng gũusda ne a sẽn maand bũmb ningã.” Afɛɛr tõe n sɩngame tɩ b tẽed t’a na n kẽesa yõod wʋsgo, la rẽ tõe n kɩtame tɩ d pa geel a yel-toodã la yel-lingdem nins a sẽn tõe n wa ne wã zãng ye. (Zak 4:13, 14) Yell a woto buud pʋgẽ, ad sɩd tara yõod wʋsg tɩ d gũus sõma-sõma!

4. Wãn to la d tõe n ‘gũus ne d sẽn maand bũmb ningã,’ d sã n wa magd n na n kẽes d meng afɛɛr pʋgẽ?

⁴ Ned sẽn yaa gũusd maagda a yĩng n fees afɛɛr b sẽn kãab-a, n yaool n yãk yam. (Yelbũna 21:5) Naoor wʋsgo, d sã n fees woto, mikdame tɩ yɛl n be tẽngre. Mams-y yel-kãngã n gese: Ned sẽn baood n na n dɩk samd ne yãmb n maan afɛɛre, n kãabdẽ t’a na n lebsa ligdã ne yõod wʋsgo, y sã n sak n peng-a. A sẽn kãabd bũmb ningã wõnda sõma ne-y tɩ y rat n sake, la yaa yel-bʋs n tõe n wa zĩnd a pʋgẽ? Sẽn deeg-a samdã sakame n na n lebs ligdã, baa tʋʋmdã sã n pa yãk neng bɩ, bɩ samdã yaoob bee ne tʋʋmdã sẽn na n yɩ sõma? Bɩ tʋʋmdã sã n pa yãk nenga, yãmb ligdã na n kell n yɩɩ bõne? Y tõe n leb n soka y meng woto: “Bõe yĩng tɩ yaa ned nengẽ la a pengd ligdã? Bãnk rãmbã getame tɩ b sã n peng ned ligd  t’a maan afɛɛrã kãngã, a na n wa yɩɩ bõn bɩ?” F sã n dɩk sẽk n tags yɛl nins rẽ sẽn tõe n wa ne wã zugu, na n sõng-y lame tɩ y geel afɛɛrã b sẽn kãabd-y wã tɩ zemse.—Yelbũna 13:16; 22:3.

5. a) Manesem bʋg sẽn yaa yam tʋʋmd la a Zeremi tall-yã, a sẽn wa n da pʋʋgã? b) Bõe yĩng tɩ tar yõod tɩ b gʋls zems-taab sebr afɛɛr fãa yĩnga?

⁵ No-rɛɛs a Zeremi sẽn wa n da pʋʋg ne a saamb biig a Hanamell me sẽn da yaa a Zeova balemdã, a gʋlsa zĩigã raab sebr kaset rãmb taoore. (Zeremi 32:9-12) Rũndã-rũndã, ned sẽn tar yam na n kɩtame tɩ afɛɛr fãa pʋgẽ a sẽn maan ne neba, baa a roagdba, bɩ a tẽed-n-taas tall sebr sẽn gʋls n wilg b sẽn zems taab to-to wã. * Zems-taab sebr sẽn segl sõma n wilgd bũmb nins sẽn segd n maan takɩ wã sõngdame tɩ mo-yõs ra wa zĩndi, la b kell n kogl bãmb ne taab zems-n-taarã me. La kẽer sẽn pa gʋls zems-taab sebr yĩnga, naoor wʋsgo, waa ne zu-loees n paase, afɛɛr mo-yõs sã n wa be a Zeova sõgen dãmb ne taab sʋka. Zu-bʋko, zu-loe-kãens tõe n waa ne sũ-sãamse, sũ-kẽk la tẽeb basg menga.

6. Bõe yĩng tɩ d segd n gũus d mens ne rat-tɩ-looge?

⁶ D segd n gũusa d mens ne rat-tɩ-loogã me. (Luk 12:15) B sã n kãab ned yõod wʋsgo, tõe n luda a yamã t’a pa yã zu-loees nins afɛɛrã sẽn tõe n tallã ye. Baa neb kẽer sẽn paam zu-nood a Zeova tʋʋmdã pʋgẽ lʋɩɩ bẽd-kãngã pʋgẽ. Wẽnnaam Gomdã keoogda tõnd tɩ: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tara sek yãmba.” (Hebre dãmba 13:5) Kiris-ned sã n wa rat n kẽ afɛɛr pʋgẽ, a segd n soka a menga: ‘Rẽ yĩnga sɩd yaa tɩlae tɩ mam kẽ a pʋgẽ bɩ?’ D sã n tall vɩɩm sẽn pa gĩd ne laog-baoondo, la d sã n lʋɩɩs a Zeova balengã taoore, na n zãaga tõnd ne “yel-tood sẽn ka tõe n sõde.”—1 Tɩmote 6:6-10.

Kiris-neb nins sẽn pa kẽ kãadmã zu-loeese

7. a) Zu-loe-bʋs la kiris-neb wʋsg sẽn pa kẽ kãadmã segda? b) Wãn to la tõnd sẽn yãkd kẽed-n-taag to-to wã wilgd d sã n sakda Wẽnnaam?

⁷ A Zeova sõgen dãmb wʋsg ratame n kẽ kãadem, la b nan pa yã kẽed-n-taag sẽn tog ne-b ye. Tẽns sãnda pʋsẽ, b pẽdgda sẽn nan pa kẽ-b kãadmã tɩ b kẽ kãadem. Yaool n mik tɩ f tẽed-n-taasã sʋka, pa neb wʋsg la f tõe n yã sẽn tõe n yɩ f kẽed-n-taag ye. (Yelbũna 13:12) La kiris-nebã sak n deegame tɩ b sã n tũ Biiblã saglg ning sẽn yet tɩ d kẽ kãadem ne “ned sẽn tũud Zusoaba bala,” a wilgda a sakr ne a Zeova. (1 Korẽnt dãmba 7:39) Sẽn na yɩl n yals kãn-kãe weoogrã la kʋɩɩbgã d sẽn segdã taoore, kiris-neb nins sẽn pa kẽ kãadmã segd n gũusa b mens sõma-sõma.

8. Mak-bʋg la Sulamit poakã paam-yã, la wãn to la kiris-nin-pogsã tõe n seg mak-kãngã buud rũndã-rũndã?

⁸ Rĩm a Salomo Yɩɩll sebrã pʋgẽ, weoogẽ bipugl b sẽn boond tɩ Sulamit yamleoog n kẽ-a. Sẽn na yɩl n do bipuglã, a wilg-a-la a tarem, a naam la a neerem, baa ne bipuglã sẽn da zoe n nong rasãng a to wã. (A Salomo Yɩɩllã 1:9-11; 3:7-10; 6:8-10; 7:1) Yãmb sã n yaa kiris-nin-poaka, ned tõe n nonga yãmb tɩ  yãmb pa rat-a ye. Ned sẽn be yãmb tʋʋmã zĩigẽ, tõe tɩ yaa y patrõ wã menga, tõe n sɩngame n pẽgd yãmb la a maand-y neere, la a baood soay n na n pẽneg-y wakat fãa. Gũus-y ne nin-kãngã sẽn maand woto tɩ tõe n tall yamleoog ne-yã. Baa ne nin-kãngã raab ne yãmbã sẽn pa roob bɩ yoob tʋlsem wakat buud fãa wã, naoor wʋsgo, yaa ne tʋlsem kãngã. Wala Sulamit poakã, bɩ y yɩ “wa lalga.” (A Salomo Yɩɩllã 8:4, 10) Zãgs-y roob kãensã buudã fãa. Hal y tʋʋmã sɩngr bɩ y kɩt tɩ y tʋmd-n-taasã bãng tɩ y yaa a Zeova Kaset soaba, la y tũnug ne segb buud fãa n moon-b koe-noogã. Rẽ na n yɩɩ koglg n kõ-yã.

9. Tũnug ne Ẽntɛrnetã n tall zood ne sãan tõe n waa ne yel-bʋse? (Ges-y zĩ-gũbr ning sẽn be seb-neng 30 pʋgẽ wã me.)

⁹ Ẽntɛrnetã zĩis nins b sẽn yãk sẽn na yɩl n sõng sẽn pa kẽ-b kãadmã tɩ b yã kẽed-n-taagã yaa bũmb sẽn piuugd wʋsg masã. Neb kẽer geta rẽ wala sor sẽn pak n kõ-b tɩ b na n bãng neb b sẽn pa tõe n seg ne manesem zẽnga. La f sã n fõr n kẽ zood pʋgẽ ne sãan zond-yaare, a tõe n waa ne zu-loees meng-menga. Ẽntɛrnetã pʋgẽ, yaa toog tɩ f bãng sẽn yaa sɩd la sẽn pa sɩd n welge. (Yɩɩl Sõamyã 26:4) Pa ned ning fãa sẽn yet t’a yaa a Zeova sõgen n sɩd yaa a sõgen ye. Sẽn paase, roob sẽn tũud ne Ẽntɛrnetã tõe n kɩtame tɩ f yõg zood sẽn tar pãng wʋsg tao-tao, tɩ f le pa tõe n tags tɩrg yellã zug ye. (Yelbũna 28:26) Yaa ne Ẽntɛrnetã tũnugr tɩ yaa ne manesem zẽng me, pa yam tʋʋmd tɩ d tall zood wʋsg ne ned d sẽn pa mi wʋsg ye.—1 Korẽnt dãmba 15:33.

10. Wãn to la kiris-neb nins sẽn pa kẽ kãadmã tõe n paam raood kengr b tẽed-n-taasã nengẽ?

¹⁰ A Zeova ‘tara sũ-bʋgsem hal wʋsg’ ne a sõgen dãmbã. (Zak 5:11) A miime tɩ kiris-neb nins sẽn pa kẽ kãadem tɩ pa tũ ne b yamleoogã zu-loees mi n komsda b raoodo, la a nanda b wẽn-sakrã. Wãn to la neb a taabã tõe n keng b raoodo? D segd n pẽgd-b lame, b sakrã la b mong-m-meng yamã yĩnga. (Bʋkaoodba 11:39, 40) D sã n wa na n naag neb a taab n maan sũ-noog la d keng taab tẽebo, d tõe n bool-b lame tɩ b wa lagem-do. Yãmb maana woto sẽn pa kaoos bɩ? Sẽn paase, d tõe n pʋʋsa b yĩnga, n kos a Zeova t’a sõng-b tɩ b kell n tall tẽeb sẽn tar pãnga, la b paam sũ-noog a sõgenegã pʋgẽ. Ne d sẽn sɩd kelgd b yell neerã, d tõe n wilgame tɩ d nanda saam-bi-kãensã sẽn yaa sakdbã wa a Zeova sẽn nand-b to-to wã.—Yɩɩl Sõamyã 37:28.

D sã n wa maood ne bãaga

11. Bã-kɛgeng tɩbsg tõe n talla zu-loe-bʋse?

¹¹ Bã-kɛgeng sã n tar tõnd mengã bɩ d nin-nongre, ad sɩd yaa sũ-sãoong menga! (Ezai 38:1-3) D sã n wa baood d bãaga tɩɩm bɩ d bãng me tɩ tara yõod tɩ d tũ Gʋlsg Sõamyã noyã. Wala makre, kiris-nebã na n gũusame n sak Biiblã noor ning sẽn yet tɩ d lak d mens ne zɩɩmã, la b zãag b mens ne tɩbsg buud fãa sẽn tar loees ne zĩn dãmbã. (Tʋʋma 15:28, 29; Galat dãmba 5:19-21) La tõe n yɩɩ toog wʋsg ne neb nins sẽn pa zãms logtoeemdã tɩ b bãng tɩbsg toor-toor nins sẽn zemsã. Yaa bõe n tõe n sõng tõnd tɩ d gũus d mens sõma-sõma?

12. Wãn to la kiris-ned tõe n tall tagsg sẽn yaa tɩrga, a sã n wa get tɩbsg toor-toor sã n sakdame?

¹² Yam soab “gũusda ne a sẽn maand bũmb ningã,” n maand vaeesg Biiblã la kiris-nebã sɛbẽ. (Yelbũna 14:15) Dũniyã babs nins sẽn pa tar logtoɛɛmb la logtor yiy wʋsgã pʋsẽ, tõe tɩ yaa rog-n-mik tɩt sẽn tũnugd ne vãad la tɩɩs  yẽgã bal n be. D sã n wa rat tɩbs-kãng buudã, tõe n yɩɩ sõngr ne-do, tɩ d ges zãmsg ning d sẽn tõe n paam yʋʋmd 1987 Gũusg Gasgã, tʋʋl-nif kiuug rasem 15, seb-neng 26-9 pʋgẽ wã. Be b wilgda tõnd yɛl nins sẽn tõe n zĩnd tɩbs-kãngã buud pʋgẽ wã. Wala makre, tõe tɩ d segd n bãnga woto: B mii ned ning sẽn kõt tɩ-kãnga wã wa ned sẽn naagd a tɩbsgã ne zĩn-dãmb yɛl bɩ? Tɩbsgã tika tẽeb ning sẽn yet tɩ bãagã bɩ kũumã sẽn wa wã yaa f sẽn beeg wẽnnaam dãmbã (bɩ yaab rãmbã sɩɩse) wall yaa bɛɛb n tũnug ne sõod n yõk-fã bɩ? Maando, baoong bɩ tɩɩm goama, bɩ zĩn dãmb yɛl a taab la b tũnugd ne tɩɩmã seglg bɩ a maanegã pʋgẽ bɩ? (Tõodo 18:10-12) Vaeesg woto na n sõnga tõnd tɩ d tũ sagl-kãngã vʋʋsem sõng sẽn vẽneg tɩ b gʋlsã: “Bɩ y mak bũmb fãa; la sẽn yaa neere, bɩ y gãd kãn-kãe.” * (1 Tesalonik rãmba 5:21) Rẽ na n sõnga tõnd tɩ d tall tagsg sẽn yaa tɩrg tɩbsgã zugu.

13, 14. a) Wãn to la d tõe n wilg tɩ d tara tagsg sẽn zemse, d sã n wa baood yĩns laafɩ? b) Bõe yĩng tɩ d segd n tall tagsg sẽn zemse, d sã n wa sõsd yĩns laafɩ wã la tɩbsgã yɛl zut ne neb a taabã?

¹³ D segd n talla tagsg sẽn zems vɩɩmã nens fãa pʋsẽ, d yĩnsã laafɩ baoob sẽn naage. D sã n get d yĩnsã laafɩ yell tɩ zemse, wilgdame tɩ d nanda vɩɩmã sẽn tar yõod wʋsg Wẽnd sẽn kõ-dã. Zemsame tɩ d sã n wa pa keeme, bɩ d bao tɩɩm. La d pa tõe n paam yĩns laafɩ sẽn zems zãng hal tɩ wakat ning Wẽnnaam sẽn yãk n na n sãoog ‘buud fãa bãasã’ nan pa ta ye. (Wilgri 22:1, 2) D segd n gũusame tɩ d yĩnsã laafɩ yell da pak-d hali tɩ d wa lebs d tẽebã yɛl sẽn tar yõod n yɩɩdã poorẽ ye.—Matɩe 5:3; Filip rãmba 1:10.

¹⁴ D leb n segd n talla tagsg la manesem sẽn zemse, d sã n wa sõsd yĩns laafɩ wã la tɩbsgã yɛl yell ne neb a taabã. Pa yel-kãens n segd n yãmb tõnd goamã, d sã n wa tigim ne d tẽed-n-taasã kiris-neb tigissẽ wã la tigis-kãsemsẽ wã ye. Sẽn paase, yam-yãkr nins d sẽn maand tɩbsgã wɛɛngẽ wã nong n tara loees ne Biiblã noyã, ne d sũur-kasetã, la d zems-n-taarã ne a Zeova wã. Rẽnd pa na n yɩ nonglem tʋʋmd ne-d tɩ d modg d tẽed-n-taag t’a tũ tõnd tagsa wã, bɩ d pẽdg-a t’a zãgs yẽ meng sũur-kasetã sẽn yet-a t’a maan bũmb ningã ye. Baa ne d sẽn tõe n sok tigingã neb nins sẽn bɩ sõma tẽebã pʋgẽ wã, yaa kiris-ned fãa n segd n “tʋk a meng zɩɩbo,” n yãk yam, la “ned kam fãa na n togsa a meng yell  Wẽnnaam taoore.”—Galat dãmba 6:5; Rom dãmba 14:12, 22, 23.

D sã n wa be zu-loees pʋsẽ

15. Zu-loees tõe n kɩtame tɩ d tall yel-manesem bʋgo?

¹⁵ Zu-loees tõeeme n kɩt t’a Zeova sõgen dãmb hakɩkã meng gom wall b tʋm ne yalemdo. (Koɛɛg Soaba 7:7) A Zoob sẽn da wa n be mak-toaag pʋgẽ wã, a talla tagsg sẽn pa zemse, tɩ yɩ tɩlae tɩ b rems a tagsgã. (Zoob 35:2, 3; 40:6-8) Baa ne “a Moiiz [sẽn da] yaa sik-m-meng soab wʋsg n yɩɩd neba fãa sẽn be dũniyã zugã,” vugri, b yika a sũur t’a gom ne sũ-yikri. (Sõdbo 12:3; 20:7-12; Yɩɩl Sõamyã 106:32, 33) A Davɩɩd talla yõk-m-meng sõma n pa bao n kʋ Rĩm a Sayull ye, la a Naball sẽn da wa n tʋʋs-a la a kãas a tãb-biisã raadã, a Davɩɩd sũurã yika wʋsg t’a tagsgã golem. Yaa a Abigayill sẽn wa n kẽ sʋkã bal la a Davɩɩd leb n paam tagsg sẽn zemse, n pa tʋm tʋʋm-beed ye.—1 Sãmwɛll 24:3-8; 25:9-13, 32, 33.

16. Yaa bõe n tõe n sõng tõnd tɩ d ra yɩ yãg-yãg n maan bũmbu?

¹⁶ Tõnd me tõe n sega zu-loees sẽn tõe n golem d tagsgã. D sã n maag d yĩns n kelg neb a taabã tagsg neer wala a Davɩɩd sẽn maanã, tõe n sõnga tõnd tɩ d ra yɩ yãg-yãg n wa maan yel-wẽnd ye. (Yelbũna 19:2) Sẽn paase, Wẽnnaam Gomdã sagenda tõnd tɩ: “Bɩ y rig ne dabeem n da maan yel-wẽn ye. Bɩ y gom yãmb sũyã pʋsẽ yãmb gãas pʋsẽ, la bɩ y sĩndi.” (Yɩɩl Sõamyã 4:5) Sã n tõeyã, yaa yam tʋʋmd ne-d tɩ d yaas tɩ d sũurã sig tɩ d yamã gãande, tɩ d yaool n maan bũmb bɩ n yãk yam. (Yelbũna 14:17, 29) D tõe n baoa a Zeova sõngr pʋʋsg pʋgẽ, “la Wẽnnaam laafɩ sẽn yɩɩd neba bãngr fãa na gũ [tõnd] sũyã la [tõnd] tagsgo Kirist Zezi maasem yĩnga.” (Filip rãmba 4:6, 7) Bãan kãngã Wẽnnaam sẽn kõtã na n kɩtame tɩ tõnd yel-manesmã zemse, la sõng-d tɩ d gũus sõma.

17. Bõe yĩng tɩ d segd n teeg a Zeova sẽn na yɩl n gũus sõma?

¹⁷ Ne modgr nins fãa tõnd sẽn maand n na n gil yɛlã la d tʋm ne yamã, d fãa tudgdame. (Zak 3:2) Tõe tɩ d bee tudg-wẽng zug n pa miẽ meng ye. (Yɩɩl Sõamyã 19:13, 14) Sẽn paase, tõnd sẽn yaa ninsaalbã, d pa tar tõog bɩ sor n na n wilg d meng na-yakemd sor ye. Yaa a Zeova bal n tar tõog la so-kãnga. (Zeremi 10:23) Ad d sɩd tara mi-beoogo, a sẽn kõt-d bas-m-yam woto wã: “Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.” (Yɩɩl Sõamyã 32:8) N-ye, ne a Zeova sõngre, d tõe n gũusa sõma.

[Tẽngr not rãmbã]

Wãn to la y na n leoke?

Wãn to la d tõe n gũusi,

• b sã n wa kãab-d afɛɛre?

• d sã n wa baood kẽed-n-taaga?

• d sã n wa ka laafɩ?

• d sã n wa be zu-loees pʋsẽ?

[Zãmsgã sogsgã]

[Zĩ-gũbri, seb-​neng 30]

Y tõe n kɩsa sɩd ne woto bɩ?

Gom-kãensã bee Ẽntɛrnetã pʋgẽ, sẽn baood-b kẽed-n-taasã yĩnga:

“Baa ne tõnd sẽn modgd to-to fãa, d pa tõe n bãng ned sẽn sɩd yaa a soab ye.”

“Tõnd pa tõe n kɩs sɩd zãng fasɩ tɩ kibay nins sẽn be be wã zemsa kɛpɩ, tɩ b togsa yɛlã fãa zãng bɩ tɩ b tara yõod ye.”

“Saglsã, goamã, kãabsã, tagsa toɛy-toɛyã la kibay a taab sẽn be be wã yaa gʋlsdbã bɩ neb nins sẽn togs-bã rẽnda, la d pa segd n tẽ-b tɩlae ye.”

[Foto, seb-​neng 29]

Yam soab “gũusda ne a sẽn maand bũmb ningã”

[Foto rãmba, seb-​neng 31]

Wãn to la kiris-nin-pogsã tõe n dɩk Sulamit poakã togs-n-taare?

[Foto, seb-​neng 32]

“Bɩ y mak bũmb fãa; la sẽn yaa neere, bɩ y gãd kãn-kãe”