‘Bɩ y kẽng n maan karen-biisi, n lis-ba’
‘Bɩ y kẽng n maan karen-biisi, n lis-ba’
“Bɩ y kẽng n maan neba buud fãa tɩ b yɩ mam karen-biisi n lis bãmb . . . la y zãms bãmb tɩ b sak bũmb nins fãa mam sẽn da togs yãmbã.”—MATƖE 28:19, 20.
1. Sard bʋg la Israɛll buudã rɩk Sinayi Tãngã sɛɛgẽ?
SẼN zems yʋʋm 3500 sẽn looge, buud tõr neb n maan Wẽnnaam pʋlengo. Yaa Israɛll nebã. B ra tigma Sinayi Tãngã sɛɛgẽ, la b fãa togsa woto: “Bũmb nins fãa Zusoaba sẽn yeelã, tõnd na n maaname.” Sasa kãng tɛkã, Israɛll lebga nin-buiid sẽn dɩk b meng n kõ Wẽnnaam, n lebg a neba. (Yikri 19:5, 8; 24:3) B ra gũudame t’a kogl-ba, la b ra gũudẽ me t’a tall-b tɩ b tɩ vɩɩmd tẽng sẽn tar “bĩisim ne sɩɩd wʋsg” pʋgẽ zãmaan woo zãmaana.—Maankʋʋre 20:24.
2. Zems-n-taar bʋg la nebã tõe n paam ne Wẽnnaam rũndã-rũndã?
2 La wala a Azaf sẽn togsã, Israɛll nebã “ka ges Wẽnnaam kãabgã ye, la bãmb zãgsame n ka kẽn wa sẽn zems bãmb tõoga ye.” (Yɩɩl Sõamyã 78:10) B pa tõog n pids wẽeneg ning b yaab rãmbã sẽn da wẽen ne a Zeova wã ye. Rẽ kɩtame tɩ b wa baas n kong zood sẽn ka to ning b sẽn da tar ne Wẽnnaamã. (Koɛɛg Soaba 5:4; Matɩe 23:37, 38) Woto kɩtame tɩ Wẽnnaam “tũus neb bu-zẽmsa sʋk b menga yʋʋra yĩnga.” (Tʋʋma 15:14) La yaoolem day kãensã sasa me, a tigimda “kʋʋn-kãsengã . . . tɩ ned ka tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛy-toɛya fãa.” Kʋʋn-kãng sak n deega woto ne sũ-noogo: “Fãagr yaa tõnd Wẽnnaam sẽn zao geerã zugã pãng yĩnga la Pebilã pãng yĩnga.”—Wilgri 7:9, 10.
3. Bõe ne bõe la ned segd n maan sẽn na yɩl n paam zems-n-taar ne Wẽnnaam?
3 Ned sã n dat n zĩnd neb nins sẽn tar zems-n-taar kãngã ne Wẽnnaamã sʋka, a segd n dɩka a meng n kõ a Zeova la a reeg koom lisg zãma sʋk n wilg rẽ vẽenega. Rɩk-m-meng-n-kõ la lisgã wilgdame tɩ f saka noor sẽn yaa vẽeneg ning a Zezi sẽn kõ a karen-biisã woto wã: “Bɩ y kẽng n maan neba buud fãa tɩ b yɩ mam karen-biisi, n lis bãmb ne Ba la Biiga la Sɩɩg Sõng yʋʋre. La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Israɛll nebã reng n kelga “kãabgã sebr” karengo. (Yikri 24:3, 7, 8) Rẽ kɩtame tɩ b bãng a Zeova sẽn baood tɩ b maan bũmb ningã. Woto, rũndã-rũndã me, Wẽnnaam daabã bãngr sẽn yaa takɩ sẽn be a Gomdã sẽn yaa Biiblã pʋgẽ wã yaa tɩlae ne ned t’a yaool n deeg lisgu.
4. Bõe la ned segd n maan sẽn na yɩl n tõog n deeg lisgu? (Paas-y zĩ-gũbrã sẽn be yĩngrã.)
4 Vẽenega, a Zezi ra ratame t’a karen-biisã tẽeb paam yẽbgr sõma tɩ b yaool n deeg lisgu. A pa kõ a karen-biisã noor tɩ b maan karen-biis bal ye. A leb n kõ-b-la noor tɩ b zãms-b tɩ b ‘sak bũmb nins fãa yẽ sẽn da togs-bã.’ (Matɩe 7:24, 25; Efɛɛz rãmba 3:17-19) Woto yĩnga, naoor wʋsgo, neb nins sẽn tar zʋg-sõma nins sẽn zems ne lisgã reegrã zãmsa Biiblã kiis wʋsgo, yʋʋm tõr bɩ yʋʋm a yi, sẽn na yɩl tɩ b lisgã ra yɩ yãg-yãg bũmb b sẽn maan n pa reng n tags tɩ bɩ ye. Lisgã meng sã n wa ta n sa, sẽn dat-b n deeg lisgã leokda sogs-kãsems a yiib tɩ n-ye. A Zezi sẽn wilg vẽeneg tɩ ‘tõnd n-ye segd n yɩɩ n-ye wã, la d ayo segd n yɩɩ ayo wã’ yĩnga, na n yɩɩ sõma ne tõnd ned kam fãa tɩ d maag d yĩns n lebg n ges lisgã sogsg a yiib kãensã võore.—Matɩe 5:37.
Tek-yam-n-kos-sugr la rɩk-f-meng-n-kõ wã
5. Yel-kãsems a yiib bʋs zut la lisgã sogsg gomd n tadgdẽ?
5 Lisgã pipi sokrã sokda sẽn dat n deeg-a lisgã n na n bãng a sã n teka yam n kos sugr a pĩnd vɩɩmã manesmã yĩnga, la a sã n dɩka a vɩɩmã n kõ a Zeova n na n maan a raabã. Sok-kãngã wilgda yɛl a yiib maaneg sẽn yaa tɩlae tɩ f yaool n deeg lisgu. Yaa tek-yam-n-kos-sugrã la rɩk-m-meng-n-kõ wã.
6, 7. a) Bõe yĩng tɩ tek yam n kos sugrã yaa tɩlae ne neb nins fãa sẽn dat n deeg lisgã? b) Toeen-bʋs la ned segd n maane, a sã n wa tek yam n kos sugri?
6 Bõe yĩng tɩ ned segd n tek yam n kos sugr n yaool n deeg lisgu? Tʋm-tʋmd a Poll wilgame tɩ: “Tõnd da kẽnda wa sẽn zems tõnd yĩnga ratem wẽngã n pidsd tõnd yĩnga ratem la tõnd tagsgo.” (Efɛɛz rãmba 2:3) Nand tɩ tõnd paam Wẽnnaam daabã bãngr sẽn zems kɛpɩ, d ra vɩɩ wa dũniyã neba, n da pʋgd b bõn-datɩ wã la d tũud b noyã. Ra yaa dũni kãngã wẽnnaam a Sʋɩtãan n da so tõnd vɩɩmã. (2 Korẽnt dãmba 4:4) La d sẽn bãng Wẽnnaam daabã, d rata ne d sũy fãa n vɩɩmde, pa sẽn na yɩl n ‘sak ninsaal datem wẽnga ye, la yaa sẽn na yɩl n sak Wẽnnaam yam.’—1 Pɩɛɛr 4:2.
7 Vɩɩm manesem paalg kãngã bee bark wʋsgo. Sẽn yɩɩd fãa, a pakda sor tɩ d tõe n paam a Zeova zoodo. A Davɩɩd maka zood kãng ne boolg sẽn na yɩl n sig Wẽnnaam “zãndẽ” la a ‘tãn-sõngẽ’ wã rʋʋbo, tɩ woto sɩd yaa zu-no-kãsenga. (Yɩɩl Sõamyã 15:1) Wa sẽn zemse, a Zeova pa boond ned yaar ye, la yaa ned ning fãa “sẽn kẽnd ne pʋ-peelem la a maand tɩrga la a gomd sɩd ne a sũur fãa.” (Yɩɩl Sõamyã 15:2) Wala sẽn zems ne tõnd yɛlã sẽn da yaa to-to sẽn deng tɩ d bãng sɩdã, tõe tɩ no-kãensã b sẽn dat tɩ d tũ wã kɩtame tɩ ra yaa tɩlae ne-d tɩ d modg n toeem d yel-manesmã la d zʋgã. (1 Korẽnt dãmba 6:9-11; Kolos rãmba 3:5-10) Bũmb ning sẽn kɩt tɩ d sak n na n toeem woto wã yaa d sẽn tek yam n kos sugrã, d sũur sẽn sãam wʋsg ne d pĩnd vɩɩmã, la d sẽn sɩd rat ne d sũur fãa n ta a Zeova yam masã wã yĩnga. Rẽ kɩtdame tɩ d sak n toeem d vɩɩmã fãa. Sẽn dat n yeel tɩ d basdame n ye pa vɩ d mens raab yĩng bal wala dũniyã neb ye, la d baooda masã n dat n ta Wẽnnaam yam.—Tʋʋma 3:19.
8. Yaa wãn to la ned rɩkd a meng n kõ Wẽnde, la bõe loees la rẽ tar ne lisgã?
8 Lisgã pipi sokrã babg a yiib-n-soabã pʋgẽ, b sokda sẽn dat-b n deeg lisgã n na n bãng b sã n dɩka b mens n kõ a Zeova n na n maan a raabã. Rɩk-m-meng-n-kõ wã yaa bõn-kãseng a yembr sẽn yaa tɩlae tɩ f yaool n deeg lisgu. Yaa pʋʋsg pʋgẽ la d wilgd tɩ d rat n dɩka d vɩɩmã n kõ a Zeova, Kirist maasem yĩnga. (Rom dãmba 14:7, 8; 2 Korẽnt dãmba 5:15) Rẽ, a Zeova lebgda d Zusoab la d Soaala, la wa a Zezi, Wẽnnaam daabã maaneg kõt-d-la sũ-noogo. (Yɩɩl Sõamyã 40:9; Efɛɛz rãmba 6:6) D vɩɩmã pʋgẽ, yaa vugr bal la d rɩkd d mengã n kõ a Zeova, la rẽ pa reem yell ye. Sẽn mik tɩ rɩk-m-meng-n-kõ wã yaa bũmb d sẽn maand tõnd ne Wẽnnaam sʋk balã, bũmb ning d sẽn na n yeel zãma wã taoorã na n yɩɩ kaset n kõ nebã fãa tɩ tõnd rɩka d meng n kõ d saasẽ Ba wã.—Rom dãmba 10:10.
9, 10. a) Wẽnnaam daabã maaneg baoodame tɩ d maan bõe? b) Wãn to la Nazi taoor dãmbã meng sak n deeg tɩ tõnd rɩka d mens n kõ Wẽnde?
9 Bõe la d segd n maane, d sã n dat n tũ a Zezi makrã Wẽnnaam daabã maaneg pʋgẽ wã? A Zezi yeela a karen-biisã: “Ned sã n dat n tũ maam, bɩ a kɩɩs a meng raabo n dɩk a kũum [da-luk] n tũ maam.” (Matɩe 16:24) Ad yɛl a tãab tõnd sẽn segd n maane. Pipi, d segd n ‘kɩɩsa d meng raabo.’ Sẽn dat n yeel tɩ d na n zãgsa d tʋlsem nins sẽn pa zemsã, la d sak Wẽnnaam saglsã la a sor-wilgrã. Yiib-n-soaba, d segd n ‘dɩka d kũum da-luka.’ A Zezi wakatã, ra-luk ra makda yãnd la namsgo. D sẽn yaa kiris-nebã yĩnga, d sakda namsg koe-noogã yĩnga. (2 Tɩmote 1:8) Baa dũniyã neb sẽn tõe n yaal-d bɩ b ning-d taalã, d pa zoet yãnd ye, la wa a Zezi, d tara sũ-noogo, d sẽn mi tɩ d tata Wẽnnaam yamã yĩnga. (Hebre dãmba 12:2) Sẽn na n baase, d segd n tũu a Zezi wakat fãa.—Yɩɩl Sõamyã 73:26; 119:44; 145:2.
10 D bãng tɩ sẽn pa nong-b tõndã kẽer meng sak n deegame t’a Zeova Kaset rãmbã rɩka b mens n kõ Wẽnnaam zãnga, n na n maan a raabã. D rɩk makr ne b sẽn yeel a Zeova Kaset rãmbã tɩ b maan bũmb ning Alemayn Nazi rãmbã nams-bɛɛg zak ning sẽn zĩnd Busenvald pʋgẽ wã. B sẽn zãgs tɩ b kõn bas b tẽebã, b yeel-b lame tɩ b tik b nug sebr sẽn yet woto zugu: “Mam ket n yaa Biiblã Zãmsda, la m kõn tol n kɩɩs pʋleng ning m sẽn maan ne a Zeova wã ye.” Sɩd-sɩda, woto wilgda Wẽnnaam sõgen dãmb nins fãa sẽn yaa sakdb sẽn dɩk b mens n kõ-a wã tagsg sẽn yaa a soabã vẽenega.—Tʋʋma 5:32.
Wilgdame tɩ f lebga a Zeova Kaset soaba
11. Ned sẽn deeg lisg paamda zu-no-bʋgo?
11 Yiib-n-soab sokrã sokda ned ning sẽn dat n deeg lisgã n na n bãnge, pipi, a sã n miime t’a lisgã kɩtdame tɩ b bãng t’a lebga a Zeova Kaset soaba. Lisgã poore, a lebgda tʋm-tʋmd b sẽn kõ sore, n zãad a Zeova yʋʋrã. Rẽ yaa zu-noogo, la zɩɩb sẽn pa reem yell me. Sẽn paase, rẽ kɩtdame tɩ ned ning sẽn deeg lisgã rɩk fãagr sẽn ka saabã sore, a wee n modg n kell n yɩ sakd a Zeova taoore.—Matɩe 24:13.
12. Paam zu-noog n zã a Zeova yʋʋrã naaga ne zɩɩb bʋgo?
12 Sɩd-sɩda, paam n zãad Wẽnnaam a Zeova sẽn yaa pãng sẽn tõe fãa Soabã yʋʋrã yaa waoogr kãseng meng n kõ tõndo. No-rɛɛs a Miise yeelame: “Nin-buiida fãa na n kẽna ned kam fãa ne a wẽnnaamã yʋʋr yĩnga, la tõndo, tõnd na n kẽna ne a Zeova tõnd Wẽnnaam yʋʋrã yĩnga wakat sẽn pa yãk tɛka, n-yẽe wakat fãa.” (Miise 4:5, NW) Baasg zãnga, woto yaa zu-zẽkr bũmb yaa sɩda, la a naaga ne zɩɩbo. D segd n vɩɩmda d vɩɩmã tɩ wa ne waoogr n kõ yʋʋr ning d sẽn zãadã. Wala a Poll sẽn tẽeg Rom kiris-nebã, ned sã n pa tũud a sẽn moondã, Wẽnnaam yʋʋrã ‘paamda tʋʋsgo,’ bɩ paoogre.—Rom dãmba 2:21-24.
13. Bõe yĩng t’a Zeova sõgen dãmb nins sẽn dɩk b mens n kõ-a wã tar zɩɩb n na n kõ kaset b Wẽnnaamã zugu?
13 Ned sã n lebg a Zeova Kaset soaba, a segdame me n sak n kõ kaset Wẽnnaam zugu. A Zeova ra yeta Israɛll buudã neb sẽn da rɩk b mens n kõ-a wa tɩ b yɩ a kaset rãmba, sẽn na yɩl n kõ kaset t’a yaa Wẽnnaam sẽn ka sɩngr la sẽn ka saabo. (Ezai 43:10-12, 21) La Israɛll buudã pa tʋk zɩɩb kãng ye, tɩ kɩt tɩ b wa baas n kong a Zeova lohormã zãnga. Rũndã-rũndã, kiris-neb hakɩkã tara zu-noog n na n kõ kaset a Zeova zugu. D maanda woto, d sẽn nong-a wã, la d sẽn dat ne d sũy fãa t’a yʋʋrã paam sõmsgã yĩnga. D sã n mi sɩdã d saasẽ Ba wã la a raabã zugu, d na n yɩɩ wãn n sĩndi? D tagsda wa tʋm-tʋmd a Polle, a sẽn da wa n yetẽ tɩ: “Ne maam, tɩ moon koe-noogã ka waoogr baoob ye. Wẽnnaam yet-m lame tɩ m moone. Mam sã n ka moon koe-noogã toog n na n paam maam.”—1 Korẽnt dãmba 9:16, Kãab-paalgã Koe-noogo.
14, 15. a) Tʋʋm-kãseng bʋg la a Zeova siglgã tar tõnd tẽebã bɩʋʋng pʋgẽ? b) Segl-bʋs n sõngd tõnd tẽebã wɛɛngẽ?
14 Sokr a yiib-n-soabã leb n tẽegda sẽn dat-a n deeg lisgã t’a segd n saka a Zeova siglgã vʋʋsem sõngã sẽn wilgd sorã. Tõnd pa d yembr n balemd Wẽnnaam ye. D saam-biisã fãa sõngre, b teelg la b raood kengr yaa tɩlae ne-do. (1 Pɩɛɛr 2:17; 1 Korẽnt dãmba 12:12, 13) Wẽnnaam siglgã sõngr yaa tɩlae ne tõnd d tẽebã bɩʋʋng pʋgẽ. A kõta tõnd sɛb wʋsg sẽn tik Biiblã zug sẽn sõngd tõnd tɩ d bɩ bãngr sẽn zems kɛpɩ wã pʋgẽ, tɩ d tʋm ne yam, d sã n wa be zu-loees taoore, la a sõngd tõnd tɩ d tall zood sõma-sõma ne Wẽnnaam. Wala biig ma sẽn dɩlgd-a sõma la a get a yell neerã, “tʋm-tʋmd sẽn tũud sɩd la sẽn tar yamã” kõta tẽeb rɩɩb wʋsg wakat sẽn zems sasa, sẽn na yɩl tɩ tõnd bɩ tẽebã pʋgẽ.—Matɩe 24:45-47; 1 Tesalonik rãmba 2:7, 8.
15 Semen fãa tigissã wakate, a Zeova nin-buiidã paamda zãmsg la raood kengre, sẽn na yɩl n yɩ a Zeova Kaset rãmb sẽn tar kɩs-sɩd ne-a. (Hebre dãmba 10:24, 25) Wẽnnaam Tʋʋmdã Lekoll zãmsda tõnd tɩ d bãng n gom zãma sʋka, la Tʋʋmdã Tigisgã zãmsda tõnd tɩ d bãng d sẽn na n taas koe-noogã to-to tɩ yɩ sõma. Tõnd tigissẽ wã, la ne tõnd meng Biibl zãmsgã maasem, d tõe n yãa a Zeova vʋʋsem sõngã sẽn tʋmd n wilgd a siglgã sore. Ne d sẽn maand woto wakat fãa wã maasem, Wẽnnaam keoogda tõnd tɩ d gũus ne bẽdsã, n zãmsd tõnd tɩ d yɩ koe-moondb sẽn tʋmd sõma, la a sõngd tõnd tɩ d ra gũs tẽebã pʋgẽ ye.—Yɩɩl Sõamyã 19:8, 9, 12; 1 Tesalonik rãmba 5:6, 11; 1 Tɩmote 4:13.
Bũmb ning sẽn segd n tus-d tɩ d reeg lisgã
16. Yaa bõe n tusd tõnd tɩ d rɩk d mensã n kõ a Zeova?
16 Woto, lisgã sogsg a yiibã tẽegda sẽn dat-b n deeg lisgã koom lisgã võore, la zɩɩb nins a sẽn dogend b zutã. La yaa bõe masã n segd n tus-b tɩ b yãk yam n deeg lisgu? Yaa a Zeova zʋg-sõma wã la a sẽn tar yel-manesem ning ne tõndã n kɩtd tɩ d kẽngd a nengẽ, pa modgr yĩng ye. (Zã 6:44) ‘Wẽnnaam sẽn yaa nonglmã’ yĩnga, a rɩta a naamã ãndũniyã fãa zug ne nonglem, pa ne pãng ye. (1 Zã 4:8) Yaa a Zeova zʋg-sõma wã, la a sẽn tar yel-manesem ning ne tõndã n veoogd tõnd n kẽngd a nengẽ. A Zeova kõo a Biribl yend ning a sẽn naan a toorã tõnd yĩnga, la a kãabd tõnd beoog-daar sẽn yaa sõma la sẽn ka to ye. (Zã 3:16) Rẽ kɩtame tɩ tõnd me rat n dɩk d vɩɩmã n kõ-a.—Yelbũna 3:9; 2 Korẽnt dãmba 5:14, 15.
17. Bõe la tõnd pa rɩk d mens n kõ?
17 Tõnd pa rɩk d mengã n kõ ninsaalb siglg sẽn tar bõn-datl n pʋgd bɩ tʋʋmd ye, la yaa a Zeova mengã. Tʋʋmd ning Wẽnnaam sẽn bobl a nin-buiidã na n wa toeemame, la b sẽn dɩk b mens n kõ-a wã pa tar saab ye. Wala makre, a sẽn yeel a Abrahaam t’a maan bũmb ningã ra yaa toor fasɩ ne a sẽn da yeel a Zeremi t’a maan bũmb ningã. (Sɩngre 13:17, 18; Zeremi 1:6, 7) La bãmb b yiibã fãa tʋma tʋʋmd ning Wẽnnaam sẽn bobl-bã, b sẽn da nong Wẽnnaam la b ra tʋll n maan a raabã ne kɩs-sɩdã yĩnga. Saabã wakat kãngã sasa, Kirist karen-biis nins fãa sẽn deeg lisgã maoodame n na n tũ noor ning Kirist sẽn kõ n yeel tɩ d moon Wẽnnaam Rĩungã koe-noog la d maan karen-biisã. (Matɩe 24:14; 28:19, 20) D sã n tʋm tʋʋm-kãngã ne d sũy fãa, yaa manesem sẽn be rasãnd d sẽn tũnugd ne n wilgd d nonglem ne d saasẽ Ba wã, la d wilgdẽ tɩ d sɩd rɩka d mens n kõ-a.—1 Zã 5:3.
18, 19. a) Ne d lisgã reegre, d togsda bõe zãma sʋka? b) Yaa bõe la d na n yã sõsg ning sẽn pʋgdã pʋgẽ?
18 Sãmbg sẽn ka be, lisgã pakda sor n kõ tõnd tɩ d paam bark wʋsgo, la yaa d bãng t’a pa reem yell ye. (Luk 14:26-33) A wilgdame tɩ d rata ne d sũy fãa tɩ d rɩk-m-meng-n-kõ wã yɩ zɩɩb ning yõod sẽn yɩɩd zɩɩb a taabã fãa wã. (Luk 9:62) D sã n wa reeg lisgã tɛka, sɩd-sɩda, d togsda woto zãma sʋka: “Bãmb yaa tõnd Wẽnnaam wakat sẽn ka sɛta. Bãmb na n tɛɛ tõnd hal tɩ ta d kũum.”—Yɩɩl Sõamyã 48:15,.
19 Sõsg ning sẽn pʋgdã na n leoka sogsg a taab d sẽn maand koom lisgã wɛɛngẽ wã. Bʋʋm sẽn sek bee sẽn tõe n kɩt tɩ ned pa rat n deeg lisg bɩ? Yʋʋmã kẽeda sʋk bɩ? Wãn to la nebã fãa tõe n sõng n kɩt tɩ lisgã sasa tall burkĩndi?
Y tõe n wilga a võor bɩ?
• Bõe yĩng tɩ kiris-ned fãa segd n tek yam n kos sugr n yaool n deeg lisgu?
• Rɩk-m-meng-n-kõ Wẽnnaamã baooda bõe maanego?
• Paam zu-noog n zã a Zeova yʋʋrã naaga ne zɩɩb bʋse?
• Yaa bõe n segd n tus tõnd tɩ d yãk yam n deeg lisgu?
[Zãmsgã sogsgã]
[Zĩ-gũbri/Foto, seb-neng 20]
Lisgã sogsg a yiibã
Rẽ yĩnga yãmb tika a Zezi Kirist maoongã zug n tek yam n kos y yel-wẽna sugri, la y rɩk y mens n kõ a Zeova n na n maan a raabã bɩ?
Rẽ yĩnga yãmb miime tɩ y rɩk-m-meng-n-kõ la lisgã kɩtdame tɩ y lebg a Zeova Kaset rãmb n lebg Wẽnnaam siglgã a vʋʋsem sõngã sẽn wilgd sorã neb bɩ?
[Foto, seb-neng 21]
Rɩk-m-meng-n-kõ wã yaa pʋleng sẽn pa reem yell ned sẽn maand a Zeova pʋʋsg pʋgẽ
[Foto, seb-neng 23]
Tõnd moonegã tʋʋmd wilgdame tɩ d rɩka d mens n kõ Wẽnnaam