Yãmb sakrã nooma a Zeova wʋsgo
Yãmb sakrã nooma a Zeova wʋsgo
“M biiga, maan yam n kõ maam sũ-noogo.”—YELBŨNA 27:11.
1. Bõe n so neb wʋsg rũndã-rũndã?
SOOG-M-MENG la kɩɩsg yam n so neb wʋsg rũndã-rũndã. Tʋm-tʋmd a Poll lɛtr ning a sẽn tool Efɛɛz kiris-nebã pʋgẽ, a wilga rẽ võor n yeel woto: “Yãmb dag n yaa kũum y beegrã ne y yel-wẽnã yĩnga. Pĩnda, yãmb dag n kẽnda yel-wẽn-kãens pʋgẽ wa sẽn zems dũni kãngã sẽn kẽnd to-to wã, n sakd yĩngr pãng naabã, sɩɩg ning sẽn tʋmd wẽn-kɩɩsdbã pʋgẽ mosã wã.” (Efɛɛz rãmba 2:1, 2, Kãab-paalgã Koe-noogo) Yaa a Sʋɩtãan la ‘yĩngr pãng naab’ ning sẽn kɩtd-a tɩ dũniyã neb wʋsg yaa kɩɩsdbã. Hal pipi kiris-nebã wakatẽ menga a ra sɩng n tusda nebã tɩ b kɩɩsdẽ. La sẽn zems dũni gill pipi zabrã sasa b sẽn dig-a saasẽ wã tɛka, a maneg n tusda nebã tɩ b kɩɩsd n yɩɩd pĩndã.—Wilgri 12:9.
2, 3. Bõe yĩng tɩ d segd n sak a Zeova?
2 La tõnd sẽn yaa kiris-nebã, d miime tɩ d segd n saka Wẽnnaam a Zeova ne d sũy fãa, bala yẽ n naan tõnd la a zãad-do. A leb n yaa ãndũniyã fãa Soaal sẽn nong tõndo, la a yaa d Fãagda. (Yɩɩl Sõamyã 148:5, 6; Tʋʋma 4:24; Kolos rãmba 1:13; Wilgri 4:11) A Moiiz wakatẽ wã, Israɛll nebã ra miime t’a Zeova la b Vɩɩm-kõt la b Fãagda. Rẽ n so t’a Moiiz yeel-b woto: “Gũus-y la y maan wa Zusoab a Wẽnnaam sẽn yeel yãmbã.” (Tõodo 5:32) Yaa a Zeova bal la b sɩd ra segd n sake. La pa yã n kaoos la b lebg kɩɩsdb n tõdg b Soaalã ye.
3 Tõnd sẽn sakd yĩngr la tẽng Naandã yõod taa zĩ-bʋgo? Daar a yembre, Wẽnnaam da kɩtame t’a no-rɛɛs a Sãmwɛll yeel rĩm a Sayull tɩ “sakr yɩɩda maando.” (1 Sãmwɛll 15:22, 23) Wãn to la sakr yɩɩd maando?
‘Sakr sẽn yɩɩd maandã’ võore
4. Bõe la d tõe n maan tɩ yɩ wa kũun d sẽn kõt a Zeova?
4 Yaa sɩd tɩ sẽn yaa a Zeova n naan bũmba fãa wã, tõnd tarmã fãa yaa yẽ n so. Rẽ wã, tõnd ye tara bũmb d sẽn tõe n kõ-a bɩ? N-ye, bũmb sẽn yaa sõma hal wʋsg la tõnd tar n tõe n kõ-a. Bõn-kãng yaa bõe? Saglg ning sẽn pʋgdã wilgd-d-la sẽn yaa bũmb ninga. Be, b yet-d-la woto: “M biiga, maan yam n kõ maam sũ-noogo, tɩ m paam n leok sẽn paoogd-a maamã.” (Yelbũna 27:11) Ad tõnd sã n sakd Wẽnnaam, noom-a-la wʋsg wa kũun d sẽn kõt-a. Baa ne tõnd sẽn yit zĩis toɛy-toɛya, tɩ d bãngrã la d yɛlã pa yen wã, d sã n sakd Wẽnnaam, d wilgdame t’a Sʋɩtãan sẽn dõd ãdem-biisã n yeel tɩ b baa a ye pa tõe n kell n sak Wẽnnaam toog pʋgẽ wã pa sɩd ye. Ad woto sɩd yaa zu-no-kãseng n kõ-do!
5. D sã n kɩɩsd Naandã, maand-a-la bõe? Rɩk-y makr n wilgi.
5 Wẽnnaam geta tõnd sẽn yãkd yam n maand bũmb ninsã. D sã n kɩɩsd a noyã, maand-a-la bõe? A sã n get d sẽn maand bũmb sẽn pa segde, sãamda a sũuri. (Yɩɩl Sõamyã 78:40, 41) D rɩk makr wa logtor sẽn na n sagl bãad t’a ra ye rɩ rɩbd kẽere, t’a tõdg n ket n dɩt rɩ-kãense. Rẽ yĩnga logtorã sũur na yɩ noog ne-a sɩda? Woto me, d sã n kɩɩsd a Zeova yaa vẽeneg tɩ d sãamda a sũuri, bala a miime tɩ na n yɩɩ wẽng ne-do.
6. Bõe n na n sõng-d tɩ d tõog n sakd Wẽnnaam?
6 Bõe n na n sõng tõnd ned kam fãa t’a yɩ sakda? Wa rĩm a Salomo, d segd n kosa Wẽnnaam t’a kõ-d “sũ-sõngo.” A Salomo kosa Wẽnnaam t’a kõ-a yam bɩ ‘sũ-sõng’ t’a tõe “n bãng sẽn yaa sõma ne wẽng n bak” n tõog n zã Israɛll nin-buiidã. (1 Rĩm dãmba 3:9, NW) Dũni kãngã sẽn pid ne kɩɩsdbã pʋgẽ, yaa tɩlae tɩ d paam sũur sẽn yaa sõma n tõe n bãng sõma ne wẽng n bake. Wẽnnaam kõ-d-la Biiblã sẽn yaa a Gomdã la sɛb d sẽn tar n zãmsd Biiblã, n paas tigissã la kãsem dãmbã sẽn get-d yellã, n na n sõng-d tɩ d tall sũy sẽn yaa sõma n tõog n yɩ sakdba. Rẽ yĩnga d rɩta woto fãa yõod sõma-sõma bɩ?
7. Bõe yĩng t’a Zeova nong sakr n yɩɩd maando?
7 Rẽ wɛɛngẽ, d tẽeg tɩ pĩnd wẽndẽ, a Zeova ra yeela Israɛll nebã tɩ sakr yɩɩda rũmsã maand b sẽn da kõt-a wã menga. (Yelbũna 21:3, 27; Oze 6:6; Matɩe 12:7) La sẽn yaa yẽ n da kos tɩ b kõt maand kãensã, bõe yĩng t’a yeel-b woto? A võorã yaa tɩ yaa bũmb ning sẽn kɩt t’a soab kõt maoongã n tar yõod n yɩɩda. A soab segd n kõo maoongã a sẽn tʋll n ta Wẽnnaam yamã yĩnga. A pa segd n maan rẽ tɩ yaa b minung bal ye. Ned sẽn tũud Wẽnnaam sã n sɩd rat n ta a yam, a na n modg n tũuda a noyã fãa. Bũmb ning Wẽnnaam sẽn nong n tɩ yɩɩd tõnd sẽn tõe n kõ-a, pa maandã ye, yaa d sakrã.
Makr sẽn yaa keoogr n kõ-do
8. Bõe n kɩt t’a Zeova wa pa le nong a Sayulli?
8 Biiblã kibar ning sẽn gomd rĩm a Sayull yellã wilgdame tɩ sakr sɩd tara yõod wʋsg Wẽnnaam nifẽ. A Sayull naamã sɩngrẽ, a ra yaa sik-m-meng soaba, n da pʋd n ‘tagsdẽ t’a yaa bilfu.’ La kaoosg zugẽ, bũmb nins a sẽn wa n yik n maandẽ wã wilgame t’a lebga wuk-m-meng soab la a tar tags-kɛga. (1 Sãmwɛll 10:21, 22; 15:17) A Sayull da wa n segd n tɩ zaba ne Filisti nebã, t’a Sãmwɛll yeel-a t’a yals t’a wa kõ a Zeova maand la a wilg-a a sẽn tog n maanega. La a Sãmwɛll wa n kaoosda waoong tɩ nin-buiidã sɩng sãeegre. A Sayull sẽn yã rẽ wã, a yik n “yõoga maandã” a toore. La woto sãama a Zeova sũuri. A Sãmwɛll wa n waame tɩ rĩmã bao n na n kõ a meng bʋʋm, n yeel tɩ yaa a sẽn kaoosã yĩng la yẽ ‘modg a meng’ n yõog maandã n na n bao a Zeova sõngre. A Sayull yamẽ, maoongã kũun yõod n yɩɩd a Sãmwɛll noorã sakre. A ra yeel-a lame t’a yals tɩ yẽ wa kõ maoongã. Rẽ n so t’a Sãmwɛll yeel-a woto: “Yãmb maana yalemdo. Yãmb ka sak Zusoaba noor ye.” A Sayull sẽn kɩɩs a Zeova wã, a sũur sãama wʋsg ne-a t’a wilg t’a pa ye nong-a ye.—1 Sãmwɛll 10:8; 13:5-14
9. Wãn to la a Sayull kell n wilg t’a yaa kɩɩsda?
9 La rẽ yĩnga rĩmã rɩka yam yel-kãngã pʋgẽ bɩ? Ayo! Kaoosg zugẽ, a Zeova kõo a Sayull noor t’a sãam Amalɛk buudã me zãnga, bala b ra zaba ne Israɛll nebã tɩ b pa beeg-b ye. Wẽnnaam yeela a Sayull t’a ra bas baa rũng meng ye. A sak n “zaba ne Amalɛk nebã n tõog-ba, sẽn sɩng ne Havila hal tɩ ta Suur.” A Sãmwɛll sẽn wa n na n seg-a wã, a Sayull sũur da yaa noog wʋsg b sẽn tõog zabrã yĩnga, tɩ kɩt t’a yeel a Sãmwɛll woto: “Wẽnd na kõ-y yõore! Mam saka Zusoaba noore.” La a Sayull ne a nebã yaool n da pa tũ noy nins b sẽn kõ-bã zãng ye. B basa rĩm a Agaag vɩɩga, la “piisa ne niiga la rũm-nobdsa ne pe-bi nins sẽn yaa neer n yɩɩd b taabã la bõn-sõma wã.” Sẽn na yɩl n kõ a meng bʋʋm, rĩm a Sayull yeelame tɩ “neba basa piis ne niig nins sẽn yaa sõma wã n na n maan maand n kõ Zusoab a Wẽnnaam.”—1 Sãmwɛll 15:1-15.
10. Yam bʋg la a Sayull kell n pa rɩke?
10 Dẽ poorẽ, a Sãmwɛll yeela a Sayull woto: “Maand ka noogd Zusoaba sũur wa sakr sẽn noogd bãmb sũura ye. Gese, sakr yɩɩda maando la kelgre yɩɩda pe-raad kaam.” (1 Sãmwɛll 15:22) A Zeova sẽn da wilg tɩ b segd n sãama rũmsã fãa wã, b ra pa tõe n dɩk rũn-kãensã n kõ a maand t’a reeg ye.
D yɩ sakdb bũmba fãa pʋgẽ
11, 12. a) Wãn to la a Zeova get modgr nins d sẽn maand sẽn na yɩl n ta a yamã? b) Wãn to la ned tõe n belg a meng n tẽ t’a maanda Wẽnnaam daab n yaool n yaa kɩɩsda?
11 A Zeova sũur nooma wʋsg ne a nin-buiidã b sẽn tar b tẽebã kãn-kãe baa b sã n namsd-bã. A sũur nooma b sẽn ket n moond Rĩungã koɛɛgã tɩ neb wʋsg yaool n pa kelgd-bã, n paas b sẽn ket n wɩngd ne tigissã kẽnde, baa ne yɩl n paam n kõ noorã sẽn dɩkd sẽk n paasdẽ wã. Hakɩka, d sẽn maand bõn-kãensã sẽn tar yõodã noom-a-la wʋsgo! A Zeova nanda modgr nins d sẽn maand n tũud-a wã, d sã n maanda woto d sẽn nong-a yĩnga. Nebã tõeeme n pa ne tõnd sẽn maood ne d sũur fãa to-to wã ye. La Wẽnnaam yẽ neeme la a na n keo-do.—Matɩe 6:4.
12 La sẽn na yɩl n ta Wẽnnaam yam zãnga, d segd n sak-a-la bũmba fãa pʋgẽ. D pa segd n belg d mens abada n tags tɩ d tõe n yãka Wẽnnaam noyã kẽer n tũudẽ la d bas kẽer ye. Wala makre, nina tõe n belga a meng n tags t’a sã n kẽnd tigissã, n moond koɛɛgã la a tʋmd tẽebã tʋʋm sãnda, a tõe n yoodame wall a maand yel-wẽn-kãsems a taaba. Woto yaa tudgri tɛkẽ!—Galat dãmba 6:7, 8.
13. D sã n wa yaa d ye, bõe n tõe n wa kɩt tɩ d rat n kɩɩs a Zeova?
13 Rẽ n so tɩ d segd n sok d mens woto: ‘Rẽ yĩnga, bũmb nins m sẽn maand daar fãa wã pʋgẽ, la baa yɛl nins sẽn wõnd paka maam a ye balã pʋsẽ, m sakda a Zeova bɩ?’ A Zezi yeela woto: “Ned ninga sẽn maand sɩd ne bũmb bilfu, a maanda sɩd ne bũmb kãseng me. La sẽn ka maand-a sɩd ne bũmb bilfu, a ka maand sɩd ne bũmb kãsems me ye.” (Luk 16:10) Rẽ yĩnga d ‘zakã pʋgẽ’ menga, d ‘kẽnda ne pʋ-peelem’ baa d sã n wa yaa d ye bɩ? (Yɩɩl Sõamyã 101:2) Sɩd-sɩda, baa d zagsã pʋsẽ, bũmb tõe n wa kɩtame tɩ d kɩɩs Wẽnnaam. Tẽns wʋsg pʋsẽ, nebã sẽn nong n tar ordinatɛɛr dãmb b zagsẽ wã yĩnga, b tõe n gesa yoobã yɛl faag-faaga. Sẽn zems yʋʋm a wãn woto, f sã n da rat yel-kãensã buud n gese, zĩis n da be tɩ sã n pa be bala, ned pa tõe n paam-b n ges ye. Rẽ yĩnga d sã n wa yaa d ye, d na n sak n tũ a Zezi no-kãngã ne d sũur fãa bɩ? A yeela woto: “Mam yeta yãmb tɩ ned ninga fãa sẽn get pag ne datem wẽnga, a maana yoob ne yẽnda a sũur pʋgẽ.” D na n tõdga baa yaa yoobã yɛl meng gesg bɩ? (Matɩe 5:28; Zoob 31:1, 9, 10; Yɩɩl Sõamyã 119:37; Yelbũna 6:24, 25; Efɛɛz rãmba 5:3-5) La filim dãmb nins b sẽn yiisd televiziõ rãmbẽ wã tɩ kẽer wilgd nen-kɛglem tʋʋmã yẽ? Rẽ yĩnga d sak n deegame t’a Zeova sẽn ‘kis ned sẽn nong n maand a taab pãngã’ yaa bũmb sẽn zemse, tɩ kɩt tɩ d kis filim kãensã bɩ? (Yɩɩl Sõamyã 11:5) La rãamã solg n yũ tɩ loogã? Pa rã-tɩgrã bal la Biiblã gɩdgẽ ye, a yeta kiris-nebã tɩ b ra nong rãam tɩ loog nug ye.—Tɩt 2:3; Luk 21:34, 35; 1 Tɩmote 3:3.
14. Ligdã baoob pʋgẽ, wãn to la d tõe n wilg tɩ d sakda Wẽnnaam?
14 D segd n gũusa ligdã baoob wɛɛngẽ me. Wala makre, d na n sak n maana zãmb baa yaa bilf sẽn na yɩl n paam ligd wʋsg la tao-tao bɩ? D na n sakd n maanda sɩlem n da yaood d lampo rãmbã bɩ? Bɩ d na n sak n tũu noor ning sẽn yet woto wã: “Bɩ y kõ neba fãa sẽn zems bãmba, bɩ y kõ yõor yaood dɛɛgdba yõor yaoodo.”—Rom dãmba 13:7.
D sak Wẽnnaam d sẽn nong-a wã yĩnga
15. Bõe yĩng la d sẽn sakd a Zeova noyã?
15 Wẽnnaam noyã sakr wata ne barka. Wala makre, d sẽn pa yũud sɩgaar n pa yood la d pa sakd tɩ b ning-d zɩɩm d sẽn mi t’a yaa bõn-sõng wʋsg Wẽnnaam nifẽ wã, d tõe n põsa bãas kẽere. Sẽn paase, d sẽn tũud Biiblã noy tõnd ne neb a taabã zĩid-n-taar pʋgẽ, d zagsã pʋsẽ vɩɩm la laogã wɛɛngẽ wã, nafd-d lame. (Ezai 48:17) Woto fãa yaa bark toor-toor sẽn wilgd Wẽnnaam noyã tũub yõodo. La pa d sẽn nafd-dã yĩng la d sakd Wẽnnaam ye. Sẽn tɩ yɩɩd fãa, yaa d sẽn nong-a wã yĩng n kɩt tɩ d maand a raabã. (Zoob 1:9-11; 2:4, 5) Wẽnnaam a Zeova naana tõnd tɩ d tõe n sak a soab ning d sẽn data. D yãka yam n na n sak yẽ d sẽn dat n ta a yamã, la d sẽn dat n maand sẽn yaa tɩrgã yĩnga.—Rom dãmba 6:16, 17; 1 Zã 5:3.
16, 17. a) Wãn to la a Zezi sak Wẽnnaam nonglem yĩnga? b) Wãn-wãn la d tõe n dɩk a togs-n-taare?
16 A Zezi kõ-d-la mak-sõng sẽn ka to, a sẽn sak a Zeova a sẽn nong-a ne a sũur fãa wã yĩngã. (Zã 8:28, 29) A Zezi sẽn da wa n be tẽng zugã, a ‘zãmsa sakr ne namsg nins a sẽn namsã.’ (Hebre dãmba 5:8, 9) Wãn to? A Zezi “sika a menga n sak n ki, hali n ki kũum [da-luk, NW] zugu.” (Filip rãmba 2:7, 8) Yaa sɩd t’a Zezi ra zoe n yaa sakd saasẽ. La a sẽn wa tẽng zug n paam makrã, a kell n wilgame t’a sɩd yaa sakda. D tõe n kɩsa sɩd tɩ b sẽn yãk a Zezi t’a lebg Maan-kʋʋdb kãsem a ba-biis nins sẽn paam vʋʋsem sõngã zaeebã la tẽedbã fãa yĩngã, a na n tõog n tʋma a tʋʋmdã tɩ zems kɛpɩ.—Hebre dãmba 4:15; 1 Zã 2:1, 2.
17 La tõnd yẽ? D tõe n dɩka a Zezi togs-n-taar n lʋɩɩsd Wẽnnaam daabã sakr taoore. (1 Pɩɛɛr 2:21) Baa b sã n wa modgd tõnd n dat tɩ d kɩɩse, pa rẽ bɩ d yamã sã n wa tusd-d tɩ d maan kɛgre, d sã n kell n tũ a Zeova noyã d sẽn nong-a yĩnga, d sũur na n yɩɩ noogo. (Rom dãmba 7:18-20) Wẽnnaam sakr baoodame me tɩ d sakd neb nins sẽn lʋɩt sɩd tũudmã tʋʋmd taoorã baa ne b sẽn yaa koangdbã. (Hebre dãmba 13:17) D sã n sakd a Zeova noyã baa ned sã n wa pa ne-do, noom-a-la wʋsgo.
18, 19. D sã n sakd Wẽnnaam d sẽn nong-a yĩnga, bõe la d na n paame?
18 Rũndã-rũndã, tõnd sẽn dat n sak a Zeova zãng-zãngã, tõe n wa kɩtame tɩ d segd n sak n deeg namsgo. (Tʋʋma 5:29) Sẽn paase, noor ning a Zeova sẽn kõ-d n yeel tɩ d moon a koɛɛgã la d maand karen-biisã sakr baoodame tɩ d kell n tall d tẽebã n tãag dũni kãngã saabo. (Matɩe 24:13, 14; 28:19, 20) Yɩl n ket n kẽnd tigissã baa ne dũniyã sẽn kɩt tɩ yɛlã pa nana ne-dã baooda modgre. Wẽnnaam sẽn nong-dã nee d sẽn maood to-to n sakd-a yel-kãensã fãa pʋsẽ wã. La sẽn na yɩl n tõog n sak-a zãng-zãnga, d segd n maoa ne d tʋls-wẽnsã, n modg n kisg wẽnga, la d nong sẽn yaa sõma.—Rom dãmba 12:9.
19 D sã n maand a Zeova raabã d sẽn nong-a la mi-beoog yĩnga, a na n dol-d-la d sẽn yaa ned ‘sẽn baood-a’ wã yĩnga. (Hebre dãmba 11:6) Yaa sɩd tɩ bũmb nins d sẽn modgd n maand n kõt a Zeova ne yamleoogã yaa sõma la noom-a lame, la yaa d sẽn na n sakd-a ne d sũy fãa d sẽn nong-a yĩng n noom-a n yɩɩda.—Yelbũna 3:1, 2.
Y na n leokame tɩ bõe?
• Bõe yĩng tɩ d tõe n yeel tɩ d tara bũmb d sẽn tõe n kõ a Zeova?
• Bõe ne bõe la a Sayull maan n sãam Wẽnnaam sũuri?
• Wãn to la d tõe n wilg tɩ d kɩsa sɩd tɩ sakr yɩɩda maando?
• Yãmb sakda a Zeova bõe yĩnga?
[Zãmsgã sogsgã]
[Foto rãmba, seb-neng 22]
Baa y sã n wa yaa y yembre, y sakda Wẽnnaam bɩ?