A Zeova Gomdã vɩɩme

A Daniɛll sebrã tags-kãsemse

SEBR a ye (Holman Illustrated Bible Dictionary) yeela woto: “Biiblã sɛb sʋka, a Daniɛll sebrã yaa sebr sẽn sidgd yĩns n yɩɩda. Kibay nins sẽn be sebrã pʋgẽ wã yaa sɩd wakat fãa yĩnga.” A Daniɛll kibarã sɩngda ne yɛl nins sẽn maan yʋʋmd 618 sẽn deng a Zezi rogmã, Babilon rĩm a Nebukadnezaar sẽn kẽng Zerizalɛm n tɩ gũbg-a n yõg Israɛll kom-bɩɩs kẽer n kẽng ne yembd Babilonã. (Daniɛll 1:1-3) A Daniɛll da bee kom-bɩɩs kãens sʋka, la tõe t’a ra pa ta yʋʋm 20 ye. A Daniɛll gʋlsa a sebrã n baas Babilon tẽngã pʋgẽ. A Daniɛll sẽn wa n kolg yʋʋm 100, Wẽnnaam pʋlm-a-la woto: “Ta f tɛk raar n vʋʋse. La fo na n vʋʋgame n deeg f zĩig wakatã sɛɛb raare.”—Daniɛll 12:13.

A Daniɛll gʋlsa a sebrã pipi babg n wilg yɛlã tɩ pʋgd taab wala yaa ned a to n get n togsd-a t’a gʋlsdẽ, la a gʋlsa babg a yiib-n-soabã wa yẽ meng n get yɛlã n gʋlsdẽ. A Daniɛll sebrã tara bãngr-goam sẽn wilgd dũni gill pãn-soaadb toor-toor naam dɩɩb sɩngr la b naam saabo, Mesi wã waoong sẽn na n yɩ wakat ninga, la bãngr-goam a taab sẽn na n pids tõnd wakatã. * No-rɛɛsã lebg n tẽega a vɩɩmã yell n wilg kibay sẽn tõe n sõng-d tɩ d yɩ wẽn-sakdba. A Daniɛll koɛɛgã vɩɩme la tara pãnga.—Hebre dãmba 4:12.

BÕE LA A DANIƐLL SEBRÃ PƲGẼ KIBAYÃ ZÃMSD TÕNDO?

(Daniɛll 1:1–6:29)

Yʋʋmd 617 sẽn deng a Zezi rogmã, a Daniɛll ne a zo-rãmb a tãabã, a Sadrak, a Mesak, la a Abɛdnego ra bee Babilon na-zakã pʋgẽ. Yʋʋm a tãabã b sẽn dɩk n na n zãms-b Babilon nebã rog-n-mik la yɛl a taabã, kom-bɩɩsã kell n modg n talla b burkĩndã Wẽnnaam taoore. Yʋʋm a nii loogr poore, rĩm a Nebukadnezaar zãmsa zãmsd võor wʋmb sẽn yaa toogo, t’a Daniɛll sõng-a t’a tẽeg a zãmsdã la a wilg-a a võor me. Rĩmã sak n deegame t’a Zeova yaa “wẽnnaam dãmb fãa Wẽnnaam, la rĩm dãmb soaala,” la t’a “vẽnegda neb ne bõn-bãn ninsaal sẽn pa tõe n bãnge.” (Daniɛll 2:47). La kaoosg poore, a Nebukadnezaar yĩma bũmb ning a sẽn bãng sɩd Wẽnnaamã zugã. A Daniɛll zo-rãmb a tãabã sẽn tõdg tɩ b kõn pʋʋs bõn-naandgã, rĩmã kɩtame tɩ b ning-b wʋng bugum sẽn wɩng wʋsg pʋgẽ. Sɩd Wẽnnaamã fãagã b tãabã fãa t’a Nebukadnezaar bãng tɩ “Wẽnnaam a to ka be n tõe n fãag neb wa [a Zeova] sẽn maanã ye.”—Daniɛll 3:29.

A Nebukadnezaar ye zãmsa zãmsd a to sẽn tar pãnga. A yãa tɩ-bedr b sẽn kɛ n lub n sẽb a vikã ne bãens sẽn na yɩl ta ra tob ye. A Daniɛll wilga zãmsdã võore. Zãmsdã pidsa bilfu, a Nebukadnezaar sẽn  yik gãeems tɩ kaoos t’a ye paam laafɩ wã. Kaoosg poore, rĩm a Bɛlsazaar maana kibs kẽeng n kõ a kug-zĩidbã, n kɩt tɩ b rɩk a Zeova roogã laas n yũ ne rãam n paoog-a. Yʋn-kãng bala, b kʋʋ a Bɛlsazaar tɩ Meed raoa a Darius reeg a soolmã. (Dan. 5:30, 31) A Darius wakatẽ wã, a Daniɛll sẽn wa n tar yʋʋm 90 la zaka, tẽngã kug-zĩidb kẽer maana sɩlem n na n kʋ-a sũ-kĩir yĩnga. La a Zeova “fãaga a Daniɛll tɩ gɩgma wã pa kʋ-a ye.”—Daniɛll 6:28.

Sogsg b sẽn leoke:

1:11-15—Rẽ yĩnga yaa Zida kom-bɩɩs a naasã sẽn da rɩt rɩɩb sẽn pa naag ne nemdã n kɩt tɩ b nensã yɩlg bɩ? Ayo! Rɩɩb baa a ye pa tõe n kɩt tɩ ned toeem woto rasem piig pʋgẽ bal ye. Yaa a Zeova n kɩt tɩ kom-bɩ-kãensã nens yɩlg n yaa neeba, b sẽn sak n teeg-a wã yĩnga.—Yelbũna 10:22.

2:1—Yɩɩ wakat bʋg la a Nebukadnezaar zãms n yã bõn-naandg sẽn yaa kãsengã? Kibarã wilgdame tɩ yɩɩ “a Nebukadnezaar sẽn deeg naam tɩ yʋʋm yiiblẽ.” A Nebukadnezaar reega naamã yʋʋmd 624 sẽn deng a Zezi rogmã. A naamã yʋʋm a yiib-n-soab sɩnga yʋʋmd 623. Yʋʋm wʋsg a Nebukadnezaar naamã reegr poore, a tɩ reega Zida. A Nebukadnezaar naamã rɩɩb yʋʋm a yiib-n-soabã sasa t’a Daniɛll nan pa wa Babilon wee yẽ n wilgd zãmsd võore. B tika yʋʋmd 607 zugu sẽn yaa sasa ning Babilon rĩm a Nebukadnezaar sẽn sãam Zerizalɛmmã n lebg ãndũniyã pãn-soaadã n bãng a naamã rɩɩb yʋʋm a yiib-n-soabã sẽn yɩ sasa ninga.

2:32, 39—Bõe n kɩt tɩ b yeel tɩ wanzuri rĩungã pa ta sãnemã rĩungã, la tɩ zũudã rĩung me pa ta wanzuri wã rĩungu? Bõn-naandgã babg ning sẽn yaa wanzuri wã makda Meed ne Pɛrs rãmbã rĩungã, la a pa ta Babilon b sẽn mak ne bõn-naandgã zugã sẽn yaa sãnemã ye, bala b pa tõog n deeg Zida tẽngã ye. Pãn-soaad ning sẽn pʋgd bãmba wã yaa Gɛrɛse. B mak-a-la ne bõn-naandgã babg ning sẽn yaa zũudã. Wala zũud sẽn pa ta wanzuri wã, Gɛrɛs me pa ta Meed ne Pɛrs ye. Baa ne Gɛrɛs soolmã sẽn yalem n yɩɩdã, a pa paam zu-noog n yiis Wẽnnaam nin-buiidã yembd wala Meed la Pɛrs nebã sẽn maanã ye.

4:5, 6—Rẽ yĩngã a Daniɛll meng lebga bagbã naab bɩ? Ayo! Yaa a sẽn yaa “Babilon yam dãmbã fãa kãsmã” yĩng bal la b sẽn boond-a tɩ “bagb naabã.”—Daniɛll 2:48.

4:7, 8, 17-19—A Nebukadnezaar zãmsdã pʋgẽ tɩɩgã makda bõe? Pipi, tɩɩgã makda rĩm a Nebukadnezaar sẽn yaa ãndũni fãa naabã. La a naamã sẽn ta “dũniyã fãa” wã yĩnga, tɩɩgã makda bũmb sẽn yaa kãseng n yɩɩd a Nebukadnezaar meng naamã. Daniɛll 4:14 wilgdame tɩ zãmsdã kɩtdame tɩ d bãng tɩ yaa Sẽn-ka-to soabã n so ninsaalbã soolem. Dẽnd tɩɩgã makda a Zeova naam sẽn ka to wã, sẽn yɩɩd fãa sẽn tɩ loe ne tẽngã. Woto yĩngã, a Nebukadnezaar zãmsdã makda bũmb a yiibu: yẽ mengã naamã, la a Zeova naam sẽn ka to wã.

4:13, 20, 24, 29, 30—Wakat a yopoe wã makda rasem bɩ yʋʋm a wãna? Toeeng nins fãa sẽn maan a Nebukadnezaar mengã  zugã wilgdame tɩ wakat a yopoe wã yɩɩda rasem a yopoe. A Nebukadnezaar nengẽ wã, wakat a yopoe wã yaa yʋʋm a yopoe bɩ rasem 2520. Sã n yaa ne a pidsg kãsengã, wakat a yopoe wã makda yʋʋm 2520. (Ezekɩɛll 4:6, 7) Wakat kãng sɩnga ne Zerizalɛm sãangã yʋʋmd 607 sẽn deng a Zezi rogmã n tɩ baas ne a Zezi sẽn deeg naam saasẽ yʋʋmd 1914.—Luk 21:24.

6:7-11—Sẽn mik t’a Zeova pa yãk manesem takɩ pʋʋsgã yĩngã, rẽ yĩngã ra pa yam tʋʋmd t’a Daniɛll solg n pʋʋs rasem 30 wã pʋgẽ sɩda? Neb wʋsg ra miime t’a Daniɛll ra pʋʋsda naoor a tãab daar fãa. Yaa rẽ yĩng la neb nins sẽn da baood n na n maan-a wẽngã kɩt tɩ b gɩdg tɩ ned ra pʋʋs wẽnnaam a to wã. A Daniɛll sã n da toeem a sẽn da pʋʋsd to-to wã, neb a taabã tõe n tagsame t’a sak n basa a Wẽnnaamã tũubu, tɩ rẽ tõe n kɩt tɩ b tẽ t’a pa tõog n kell n sak a Zeova ne a sũur fãa ye.

Zãmsg tõnd yĩnga:

1:3-8. A Daniɛll ne a tũud-n-taasã sẽn yãk yam n na n kell n sak a Zeova wã wilgda vẽeneg tɩ wubr ning b sẽn paam-b roagdbã nengẽ wã tara yõod wʋsgo. Roagdb sẽn zoet Wẽnnaam sã n dengd n baood Wẽnnaam b vɩɩmã pʋgẽ la b zãmsd b kambã me tɩ b maand wa bãmba, na n sõnga b kambã tɩ b tõog n yals kãn-kãe kʋɩɩbg nins fãa pʋgẽ b sẽn tõe wa seg lekoll dãmbẽ wã bɩ zĩis a taabã.

1:10-12. A Daniɛll wʋma bũmb ning sẽn kɩt tɩ “sõgen-kãsengã” ra zoet rĩmã võore, tɩ rẽ kɩt t’a pa pẽdg-a t’a sõng-b ye. La kaoosg poore, a Daniɛll tɩ kosa “gũudã” sẽn da tõe n sak n sõng-bã. Tõnd me sã n wa tar zu-loeese, d segd n bao n wʋma yɛlã võor la d tʋm ne yam.

2:29, 30. Wala a Daniɛlle, segd n yɩɩ a Zeova la d waoogda, a sẽn kõ-d bãngre, zʋg-sõmã, la tõod a taab d sẽn paam a sẽn zãmsd tõndã yĩnga.

3:16-18. Tõe tɩ Hebre kom-bɩɩs a tãabã sã n da sak n dɩ na-zakẽ wã rɩɩbo, b ra pa na n tall raood n leok vẽeneg tɩ b pa na n pʋʋs sãnem bõn-naandgã ye. Tõnd me segd n modg n yɩɩ kɩs-sɩd rãmb bũmb fãa pʋgẽ.—1 Tɩmote 3:11.

4:21-24. Sẽn na yɩl n tõog n moon Wẽnnaam Rĩungã koɛɛg sẽn naag ne Wẽnnaam bʋ-kaoorã, d segd n talla tẽeb la raood ning a Daniɛll sẽn tallã buudu. Yaa a tẽebã la a raoodã n kɩt t’a tõog n togs bũmb ning sẽn da na n maan rĩm a Nebukadnezaarã, la a sẽn segd n maan bũmb nins sẽn na yɩl n zĩnd a naamẽ wã n kaoosã.

5:30; 6:1. Bũmb ning b sẽn deng n togs Babilon rĩmã zugã pidsame. (Ezai 14:3, 4, 12-15) A Sʋɩtãan sẽn yaa wuk-m-meng soab wa Babilon rĩm dãmbã me na n paama sãang woto.—Daniɛll 4:30; 5:2-4, 23.

A DANIƐLL SẼN YÃ YƐL NINSÃ WILGDA TÕND BÕE?

(Daniɛll 7:1–12:13)

Yʋʋmd 553 sẽn deng a Zezi rogmã, a Daniɛll sẽn wa n paam a pipi vẽnegrã, a ra taa yʋʋm 70 la zaka. A yãa rũm-bed a naas sẽn makd ãndũniyã pãn-soaadb sẽn na n sɩng b naam dɩɩb yẽ wakatẽ wã hal n wa tãag rũndã-rũndã. A paama vẽnegr n yã saasẽ yɛla. Vẽnegrã pʋgẽ, a yãa ned sẽn wõnd ninsaal-biiga, b sẽn kõ naam sẽn ka saabo. (Daniɛll 7:13, 14) Yʋʋm a yiib loogr poore, a Daniɛll paama vẽnegr Meed la Pɛrs zugu, Gɛrɛse, la siglg sẽn na n wa lebg “rĩm sẽn tar nen-keelem n yaa sɩlem soaba.”—Daniɛll 8:23.

D bee yʋʋmd 539 sẽn deng a Zezi rogmã. Babilon lʋɩɩme, tɩ Meed raoa a Darius lebg Kalde soolmã rĩmã. A Daniɛll pʋʋsa a Zeova t’a lebg n maneg yẽnda ba-yirã. A sẽn da ket n pʋʋsdẽ, a Zeova tʋma malɛk a Gabriyɛll t’a wa kõ-a “yam ne bãngre” t’a tõog n bãng Mesi wã waoong sẽn na n yɩ sasa ninga.  (Daniɛll 9:20-25) Yʋʋmd 536/535 taame, sasa kãng tɩ Israɛll nebã kellã lebg n kẽnga Zerizalɛm. Neb n gɩdg-b tɩ b ra me wẽnd-doogã ye. Rẽ me lebga sũ-sãang n kõ a Daniɛlle. A Daniɛll ra pʋʋsda yel-kãng zug t’a Zeova tʋm malɛg-kãseng a ye ta wa a nengẽ. Malɛkã sẽn keng a Daniɛll raoodã poore, a togsa-a-la bãngr-gomd sẽn wilgd rɩtg rĩmã ne goabg rĩmã sẽn zabd taab naamã yĩngã. Rĩm dãmb a yiibã zabrã sɩnga wakat ning a Alɛgsãndr le Gãrã soda-kãsems a naasã sẽn pʋɩ a soolmã n na n tɩ tãag Na-bi-kãseng a Mikaɛll sẽn na n yiki.—Daniɛll 12:1.

Sogsg b sẽn leoke:

8:9—“Tẽn-sõngã” makda bõe? Tẽn-sõngã makda yɛlã sẽn da yaa to-to ne kiris-neb nins sẽn paam vʋʋsem sõng zaeebã sẽn da be tẽngã zugã, sasa ning Ãngeletɛɛr la Amerik sẽn fãoog taab n yaa dũni gill pãn-soaadã.

9:21—Bõe yĩng t’a Daniɛll bool malɛk a Gabriyɛll tɩ “raoa”? Yaa a Daniɛll sẽn da reng n yã a Gabriyɛll t’a wõnd ninsaal vẽnegrã pʋgẽ wã yĩngã.—Daniɛll 8:15-17.

9:27—Yaa kaool bʋg n kaoos n tãag yʋʋmd 36 a Zezi rogmã poore? B sẽn ka a Zezi raoogã zug n kʋ yʋʋmd 33 wã, kaool ning b sẽn boond t’a Moiiz Tõogã saame. La a Zeova sẽn kell n bas kaool ning a sẽn da maan ne a Abrahaamã tɩ yʋʋmd 36 a Zezi rogmã poorã ta wã, yaa sẽn na yɩl n kɩt tɩ pĩnd wẽndẽ Israɛllã neb paam lohorem b sẽn yaa a Abrahaam yagensã yĩngã. Kaool kãng ket n bee “Israɛll sẽn yaa Wẽnnaam dẽnda” neb yĩnga.—Galat dãmba 3:7-9, 14-18, 29; 6:16.

Zãmsg tõnd yĩnga:

9:1-23; 10:11. A Daniɛll sẽn da yaa sik-m-meng soaba, wẽn-sakda, a sẽn da modgd n pʋʋsd wakat fãa la a zãmsd Wẽnnaam Gomdã yĩngã Wẽnnaam nong-a-la wʋsgo. A sẽn da maand woto wã sõng-a lame t’a kell n yɩ wẽn-sakd a yõor tɛka. Bɩ tõnd me kell n tũ a Daniɛll mak-sõngã.

9:17-19. Baa d sã n pʋʋsd n kot Wẽnnaam tɩ dũni paalg ning tɩrlem sẽn na n zĩnd a pʋgẽ wã wa, pa segd n yaa tõnd yɛlã la d namsgã bal la d rat tɩ sa ye. Sẽn segd n pak-d n yɩɩd yaa a Zeova yʋʋrã na paam waoogre, la nebã na bãng tɩ yaa yẽ la naab sẽn ka to wã.—2 Pɩɛɛr 3:13

10:9, 11, 18, 19. Wala malɛkã sẽn wa n keng a Daniɛll raoodã, tõnd me segd n sõngda taab la d kengd taab raood ne d goamã.

12:3. Yaoolem wakatã sasa, “yam dãmbã,” rat n yet tɩ kiris-neb nins sẽn paam vʋʋsem sõng zaeebã ‘yãgda wa fɩtl dãmba,’ n sõngdẽ tɩ ‘neb wʋsg lebgd nin-tɩrse. “Kʋʋn-kãsengã” neb bɩ “piis a taabã” bee bãmb sʋka. (Fil. 2:15; Wil. 7:9; Zã 10:16) Neb nins sẽn paam vʋʋsem sõng zaeebã na n yãga zãng-zãng “wa ãds” a Zezi yʋʋm tusr naamã rɩɩb sasa b sẽn na n tʋm ne-a n kɩt tɩ neb nins sẽn yaa sakdb n be tẽng zugã fãa rɩ rondã nafa wã. “Piis a taabã” segd n sak n tũu sẽn paam-b vʋʋsem sõng zaeebã, la b sõng-b n tʋm sẽn yaa tʋʋmd ning fãa neb sũy fãa.

A Zeova ningda neb nins sẽn zoet yẽ wã barka

Bõe la a Daniɛll sebrã zãmsd tõnd Wẽnnaam ning d sẽn balemdã zugu? Bɩ d vaeesd bãngr-goam nins sẽn be seb-kãng pʋgẽ sẽn pidsã la sẽn ket n nan pa pidsã. Ad bãngr-gom-kãensã sɩd wilgda vẽeneg t’a Zeova sɩd pidsda a gomdã!—Ezai 55:11.

Bõe la a Daniɛll sebrã babg ning sẽn gomd kibay yellã zãms tõnd a Zeova zugu? Hebre kom-bɩɩs a naasã sẽn tõdg tɩ b pa na n tall na-zakẽ wã nebã manesmã buudã, Wẽnnaam kõ-b-la ‘bãngr la yam.’ (Dan. 1:17) Sɩd Wẽnnaamã tʋma malɛk t’a tɩ fãag a Sadrak, a Mesak la a Abɛdnego bugmã pʋgẽ. A Zeova fãaga a Daniɛll gɩgmã bok pʋgẽ. A Zeova sõngda neb nins sẽn teeg-b yẽ wã, n kogend-b la a ningd-b barka.—Yɩɩl 115:9, 13.

[Tẽngr note]

[Foto, seb-neng 10]

Bõe yĩng la Wẽnnaam sẽn nong a Daniɛll wʋsgã?