‘D gũus neer n tʋm tʋʋmd ning Zusoabã sẽn kõ tõndã’
‘D gũus neer n tʋm tʋʋmd ning Zusoabã sẽn kõ tõndã’
“Gũus neer n tʋm tʋʋmd ninga Zusoaba sẽn kõ [foo] wã n maan-a n baase.”—KOL. 4:17.
1, 2. Tʋʋm-bʋg la kiris-nebã segd n tʋm nebã sõngr yĩnga?
TƲƲM-KÃSENG la tõnd segd n tʋm nebã sõngr yĩnga. Nebã sẽn na n yãk yam n maan bũmb ning rũndã-rũndã wã tõe n kɩtame tɩ b wa paam n põs “to-kãsengã” sasa, wall b ki. (Wil. 7:14) Wẽnnaam vẽnega sẽn gʋls-a Yelbũn sebrã t’a yeel woto: “Fãag neb nins b sẽn yõg n na n tɩ kʋ wã. Gɩdg tɩ b ra kʋ-b ye.” Ad gom-kãensã võor sɩd tagmame! Tõnd sã n bas n pa keoog nebã tɩ b bãng b sẽn segd n maan bũmb ning n põse, b sã n ki yaa tõnd yelle. Yelbũnd ning d sẽn karem mas-masã wã yeta woto me: “Fo sã n yeel tɩ yãmb da ka bãnge, sẽn feesd-a nebã fãa sũyã miimi. Bãmb nee foom. Bãmb miimi. Bãmb lebsda neb wa sẽn zems b tʋʋma.” Dẽnd a Zeova Kaset soab baa a ye pa tõe n yeel t’a ka mi yell ning sẽn tõe n paam nebã ye.—Yel. 24:11, 12.
2 Vɩɩmã tara yõod wʋsg a Zeova nifẽ. A yeta a sõgen dãmbã tɩ b maan b sẽn tõe tɛk n sõng tɩ neb wʋsg paam fãagre. Wẽnnaam nin-buiidã fãa segd n togsa koɛɛg ning sẽn be Biiblã pʋgẽ n kõt vɩɩmã tɩ nebã wʋme. Tõnd tʋʋmdã wõnda gũud sẽn ne yell sẽn wat t’a zẽk a koɛɛg n togs tɩ nebã bãnge. Tõnd pa rat tɩ Wẽnnaam wa ning-d taal ned kũum yĩng ye. (Eze. 33:1-7) Rẽ n so tɩ yaa tɩlae tɩ d modg n kell n “moon Wẽnnaam koɛɛgã.”—Karm-y 2 Tɩmote 4:1, 2, 5.
3. Bõe yell la sõs-kãngã ne sõss a yiib nins sẽn pʋgdã na n gome?
3 Sõs-kãngã pʋgẽ, d na n bãnga d sẽn tõe n maan to-to n tõog zu-loees nins d sẽn paamd koe-moonegã pʋgẽ wã, la d bãng d sẽn tõe n maan to-to n sõng neb wʋsg n paase. Sõsg ning sẽn pʋgdã pʋgẽ, d na n bãnga d sẽn tõe n maan to-to n zãms nebã Biiblã neere. Tãab-n-soabã pʋgẽ, d na n bãnga koe-moondbã sẽn moon koɛɛgã dũniyã gill zug tɩ wom biis ninsã, tɩ keng d raoodo. La nananda, d na n lebg n tẽega bũmb ning sẽn kɩt tɩ tõnd wakatã yaa toog woto wã.
Bõe n kɩt tɩ neb wʋsg pa tar saagre?
4, 5. Yel-bʋs n paamd ninsaalbã, la neb wʋsg tara manesem bʋgo?
4 Yɛlã sẽn maand dũniyã zugã wilgdame tɩ d vɩɩ yaoolem wakatã, la tɩ dũniyã saab kolgame. A Zezi ne a karen-biisã ra pĩnd n togsa yɛl kẽer sẽn na n zĩndi, tɩ wilg tɩ d vɩɩ “yaoolem wakatã.” Yaa wala zabã, komã, tẽn-digimdg la yel-beed a taab sẽn namsd ninsaalbã rũndã-rũndã wã. Zĩig fãa, nebã pa ye tũud noyã ye. B tagsda b mens yell bala, la b maand Wẽnnaam sẽn kisi. Tõnd wakatã yaa “tood” wakat meng ne neb nins sẽn modgd n tũud Biiblã noyã.—Mat. 24:3, 6-8, 12; 2 Tɩm. 3:1-5.
5 La nebã wʋsg pa mi yɛl nins sẽn be dũniyã zug rũndã-rũndã wã võor ye. Rẽ n so tɩ wʋsg maand yɩɩre, bãmb ne b zakã rãmb koglg yĩnga. Neb wʋsg nin-nongr kũum bɩ yel-beed a taab kɩtame tɩ b sũy sãam wʋsgo. Nin-kãensã pa tol n tar saagre, bala b pa mi bũmb ning sẽn kɩt tɩ yel-kãensã beẽ, la b pa mi b tɩɩmã me ye.—Ef. 2:12.
6. Bõe yĩng tɩ “Babilon kãsengã” pa tõog n sõng a nebã?
6 “Babilon kãsengã” sẽn yaa dũniyã gill ziri tũudmã fãa wã pa tõog n keng ninsaalbã raood ye. A pʋd n kɩtame t’a “yoobã rãam” yilimd neb wʋsg nens tɩ b pa mi b sẽn tõe n maan to-to n pẽneg Wẽnnaam ye. Sẽn paase, ziri tũudmã maanda wa pʋg-yoodre, n belgd “dũniyã nanambs” tɩ b maand a sẽn datã, la a tũnugd ne zãmsg sẽn pa sɩd n belgd neb wʋsg tɩ b tũud politik nanambsã wa zoense. Rẽ kɩtame tɩ ziri tũudmã paam pãnga, baa ne a sẽn bas sɩdã zãng-zãngã.—Wil. 17:1, 2, 5; 18:23.
7. Bõe n gũud neb wʋsgo, la wãn to la d tõe n sõng kẽere?
7 A Zezi yeelame tɩ neb wʋsg rɩka so-yaleng ning sẽn tar n debd sãoong zĩigẽ wã. (Mat. 7:13, 14) Neb kẽer kẽnda so-yalengã zugu, bala bãmb meng n yãk yam n na n kɩɩs Biiblã sẽn yet bũmb ningã. La wʋsg yẽ kẽnda a zugu, bala b tũudmã taoor dãmb tudg-b lame, n pa zãms-b tɩ b bãng a Zeova sẽn sɩd rat tɩ b maan bũmb ningã ye. La tõe tɩ d sã n sõng kẽer tɩ b wʋm Biiblã võor sõma, b na n toeemame. La neb nins yẽ sẽn na n pa Babilon kãsengã pʋgẽ n kell n tõdg tɩ b kõn tũ Biiblã noyã pa na n põs “to-kãsengã” sasa ye.—Wil. 7:14.
D kell n moon koɛɛgã ‘n da bas ye’
8, 9. B sẽn wa n namsd pipi kiris-nebã, manesem bʋg la b tall-yã, la bõe yĩnga?
8 A Zezi yeelame t’a karen-biisã segd n moona Rĩungã koe-noog la b maan karen-biisi. (Mat. 28:19, 20) Rẽ n so tɩ kiris-neb hakɩkã moond koɛɛgã wakat fãa, bala rẽ n wilgd tɩ b yaa wẽn-sakdba, la tɩ b sɩd tara tẽebo. A Zezi pipi karen-biisã ra moondame, baa ne nebã sẽn da namsd-b rẽ yĩngã. B pʋʋsa a Zeova n kos t’a kõ-b pãng tɩ b tõog n kell n tall raood wʋsg n togs a koɛɛgã. A Zeova leoka b pʋʋsgã n kõ-b vʋʋsem sõngã, tɩ b tõog n togs a koɛɛgã ne raoodo.—Tʋʋ. 4:18, 29, 31.
9 Nebã sẽn wa n yik n namsd a Zezi karen-biisã wʋsgã, rẽ yĩnga b komsa raood n bas n pa le moond koe-noogã bɩ? Ayo! B pa tol n koms raood n bas ye. La b sẽn da ket n moondẽ wã puuga Zʋɩf rãmbã taoor dãmb sũy tɩ b kɩt tɩ b yõg tʋm-tʋmdbã n pãbe, la b yeel-b tɩ b ra le saag n moon koɛɛgã ye. La baa ne rẽ, tʋm-tʋmdbã kell n “zãmsa nebã la b moon a Zezi Kirist koe-noogã n ka bas ye.” B ra mii vẽeneg tɩ b segdame n “sak Wẽnnaam n yɩɩd nebã.”—Tʋʋ. 5:28, 29, 40-42.
10. Zu-loe-bʋs la kiris-nebã paamd rũndã-rũndã, la b manesem sõngã tõe n kɩtame tɩ bõe maane?
10 Rũndã-rũndã, Wẽnnaam nin-buiidã wʋsg pa kẽed bãens bɩ n paamd pãbr b sẽn moond koe-noogã yĩng ye. La kiris-neb hakɩkã fãa paamda makr la zu-loees buud toor-toore. Wala makre, tõnd sẽn zãms n bãng bũmb ning Biiblã pʋgẽ wã baoodame tɩ d tall yel-manesem sẽn pa wõnd neb a taabã rẽnd ye. Tõnd tʋmd-n-taasã, d karen-bi-taasã bɩ d yagsã tõe n tagsdame tɩ tõnd yamã pa weke, bala tõnd tũuda Biiblã noyã. La baasgo, rẽ pa segd n koms d raood ye. Dũniyã nebã fãa bee lik pʋgẽ tẽebã wɛɛngẽ, la kiris-nebã segd n ‘yãga b sʋk wa fɩtl dãmba.’ (Fil. 2:15) Tõe tɩ pʋ-peelem dãmb yã tõnd tʋʋm-sõma wã tɩ yɩ-b noog tɩ b pẽg a Zeova.—Karm-y Matɩe 5:16.
11. a) Neb kẽer tara manesem bʋg koe-moonegã wɛɛngẽ? b) Zu-loe-bʋg la tʋm-tʋmd a Poll paam-yã, la a talla manesem bʋgo?
11 Sẽn na yɩl n tõog n ket n moond Rĩungã koe-noogo, d segd n talla raoodo. Neb kẽer tõe n yaala tõnd bɩ n maan b sẽn tõe fãa sẽn na yɩl n koms d raoodo. Tõe n yɩɩ tõnd roagdb menga. (Mat. 10:36) B pãba tʋm-tʋmd a Poll naoor wʋsgo, a sẽn da moond koɛɛgã n ka basdẽ wã yĩnga. La ges-y a manesmã sẽn yɩ to-to. A yeela woto: “Tõnd sẽn da nams n paam toog wʋsgã, . . . tõnd Wẽnnaam kõo tõnd daood tɩ d togs yãmb bãmb Koe-noogã.” (1 Tes. 2:2) Yaa vẽeneg tɩ b sẽn wa n yõk a Poll n pãrs a futã n pãb-a ne kalwaas la b kẽes-a bi-bees roogã, a sã n da pa tar daoodo, a ra pa na n tõog n kell n moon koe-noogã ye. (Tʋʋ. 16:19-24) La bõe n keng a raood t’a kell n moone? Yaa a sẽn da rat ne a sũur fãa n kell n tʋm tʋʋmd ning Wẽnnaam sẽn bobl-a wã.—1 Kor. 9:16.
12, 13. Zu-loe-bʋs la neb kẽer tara, la wãn to la b maand n tõogd zu-loeesã?
12 Sã n mik tɩ tõnd sẽn moondẽ wã neb wʋsg pa be b zagsẽ, bɩ wʋsg pa rat n kelge, tõe n yɩɩ toog tɩ d kell n tall d yẽesmã. La bõe la d tõe n maane? Tõe tɩ na n yɩɩ tɩlae tɩ d tall raood n paase, sẽn na yɩl n moon nebã tõnd sẽn seg-b zĩig ning fãa. Tõe me tɩ d na n manega d sẽkã n moon wakat ning nebã sẽn be b zagsẽ wã, bɩ n nang pãng n moon zĩis nins d sẽn tõe n yã neb wʋsgã.—Ges-y Zã 4:7-15 ne Tʋʋm 16:13; 17:17.
13 Kʋʋlmã la bãasã me komsda neb wʋsg tɩ b pa tõe n moon koe-noogã wa pĩndã ye. Sã n mik tɩ yaa woto ne yãmba, bɩ y ra koms raood ye. A Zeova mii yãmb sẽn tõe n maan tɛka. La a nanda yãmb sẽn tõogd n maand bũmb ninsã hal wʋsgo. (Karm-y 2 Korẽnt dãmba 8:12.) Nebã sã n namsd tõndo, n pa kelgd tõnd bɩ sã n mik tɩ d yaa bãadã, sẽn yaa a soab fãa, bɩ d moon nebã koe-noogã wa d me sẽn tõe tɛka.—Yel. 3:27; Ges-y Mark 12:41-44.
‘Kell-y n tʋm-y y tʋʋmdã neere’
14. Mak-sõng bʋg la a Poll kõ a tẽed-n-taasã, la sagl-bʋg la a kõ-yã?
14 Tʋm-tʋmd a Poll ra moonda koe-noogã ne a sũur fãa. A sagla a tẽed-n-taasã me tɩ b maan woto. (Tʋʋ. 20:20, 21; 1 Kor. 11:1) Pipi kiris-nebã wakate, ned a ye la a Poll kõ saglg takɩ koe-moonegã wɛɛngẽ. Yaa a Arsipe. A lɛtr ning a sẽn gʋls Kolos rãmbã pʋgẽ, a yeela woto: “Bɩ y yeel a Arsip t’a gũus neer n tʋm tʋʋmd ninga Zusoaba sẽn kõ yẽ wã n maan-a n baase.” (Kol. 4:17) D ka mi a Arsip sẽn da yaa ned ninga, bɩ a yɛlã sẽn da yaa to-to ye. La d miime bal t’a sak n tʋma tʋʋmd ning b sẽn bobl-a wã. Yãmb sã n deega lisg n lebg a Zeova Kaset soaba, yãmb me sakame tɩ b bobl-y tʋʋmde. Rẽ yĩnga yãmb ket n tʋmda y tʋʋmdã neer sẽn na yɩl n tʋm-a n baas bɩ?
15. Kiris-ned sẽn dɩk a meng n kõ Wẽnnaam segd n maana bõe, la sogs-bʋs la a segd n sok a menga?
15 Nand tɩ tõnd reeg lisgã, d pʋʋsa a Zeova ne d sũur fãa n yeel-a tɩ d rɩka d meng n kõ-a. D sẽn yeel-a woto wã wilgdame tɩ d yãka yam n na n maan a raabã masã. Dẽnd yaa sõma tɩ d sok d mens woto: ‘Rẽ yĩnga yaa Wẽnnaam daabã maaneg n sɩd tar yõod n yɩɩd mam vɩɩmã pʋgẽ bɩ?’ Bũmb wʋsg n be t’a Zeova rat tɩ d maane, wala makre tʋm n tõog n ges d zak rãmb yelle. (1 Tɩm. 5:8) La tõnd sã n zoe n maanda rẽ, bõe la d maand ne d sẽkã la d pãngã sẽn ketã? Tõnd vɩɩmã pʋgẽ, bõe n pak tõnd n yɩɩda?—Karm-y 2 Korẽnt dãmba 5:14, 15.
16, 17. Bõe la kiris-neb nins sẽn yaa kom-bɩɩsã, la sẽn pa tar-b zak zɩɩbã tõe n maane?
16 Yãmb yaa bi-bɩɩg sẽn deeg lisgu, n karem lekoll n sa bɩ n kolgd saab bɩ? Tõe tɩ y nan pa tar pag ne kamb ye. La bõe la yãmb geend n na n wa maane? Bõe ne bõe maaneg n tõe n sõng-y tɩ y sɩd maan a Zeova raabã sõma n paase, wa y sẽn pʋlm-a y lisgã sasa wã? Wʋsg maneg n sigla b tʋʋm la b yɛl sõma sẽn na yɩl n lebg so-pakdba, la rẽ kõ-b-la sũ-noog wʋsgo.—Yɩɩl 110:3; Koɛ. 12:1.
17 Tõe tɩ yãmb yaa kãsem bilfu, n tʋmdẽ la y pa tar zak zɩɩb ye. Tõeeme me tɩ yãmb naagdame n tʋmd tigingã tʋʋm fãa wa y sẽn tõe tɛk tɩ rẽ kõt-y sũ-noogo. Rẽ yĩnga yãmb miime tɩ y tõe n maana bũmb tɩ y sũ-noogã paas sɩda? Yãmb zoe n tagsa y sẽn tõe n maan to-to n moon koɛɛgã n paas bɩ? (Yɩɩl 34:9; Yel. 10:22) Zĩis kẽere, tʋʋm wʋsg n kete, bala neb wʋsg n ket n nan pa wʋm koe-noogã sẽn fãagd yõyã ye. Rẽ yĩnga yãmb tõe n gesa y sẽn tõe n manes y yɛl kẽer tõ-to sẽn na yɩl n paam n tɩ sõng n moon zĩis nins b sẽn dat koe-moondb n paasã bɩ?—Karm-y 1 Tɩmote 6:6-8.
18. Toeen-bʋs la ned ne a pag maan-yã, la nafa bʋs la b paam-yã?
18 D kelg a Kevin ne a Elena sẽn yit Etazĩni wã kibare. * B sẽn wa n kẽ kãadem paalmã, b tagsame tɩ yɩta sõma tɩ b ra zaka, wala bãmb tẽngã neb nins sẽn kẽ kãadem paalmã sẽn nong n maandẽ wã. B yiibã fãa ra tʋmdame, tɩ kɩt tɩ b ra vɩ naar pʋgẽ. La b tʋʋmã, n paas b sẽn da segd n ges b roogã yellã kɩtame tɩ b pa tar vɩʋʋg wʋsg n na n moon koɛɛgã ye. B wa n gesame tɩ b rɩkda b sẽkã la b pãngã fãa la bal n get b tarmã yelle. La a Kevin ne a Elena yãame tɩ saam-biig ne a pag n yaa so-pakdb tɩ b tarmã pa wʋsgo, la b yaool n tara sũ-noog wʋsgo. A Kevin ne a Elena me yãka yam n na n toeem b vɩɩmã. B pʋʋsa a Zeova n kos a sõngre, rẽ poore b koosa b zakã n tɩ luaas roogo. A Elena booga wakat ning a sẽn da rɩkd n tʋmdẽ wã, tɩ rẽ kɩt t’a tõog n lebg so-pakda. Sũ-noog ning a sẽn da paamd koe-moonegã pʋgẽ wã kɩtame t’a sɩd a Kevin me bas a tʋʋmdã n lebg so-pakda. Rẽ poore, b yikame n kẽng Amerikdisiid tẽng a yembr pʋgẽ n tɩ sõnge, bala b da rata koe-moondb be. Ad a Kevin sẽn yeele: “Yaa sɩd tɩ tõnd ra sɩng n tara sũ-noog d kãadmã pʋgẽ. La tõnd sẽn yãk yam n tʋmd Wẽnnaam tʋʋmdã n paasdẽ wã, d sũ-noogã lebga wʋsg n paase.”—Karm-y Matɩe 6:19-22.
19, 20. Bõe yĩng tɩ rũndã-rũndã, koe-noogã mooneg tar yõod n yɩɩd tʋʋm a taabã fãa?
19 Rũndã-rũndã, yaa koe-noogã mooneg n tar yõod n yɩɩd tʋʋm a taabã fãa. (Wil. 14:6, 7) A sõngdame n kɩtdẽ t’a Zeova yʋʋrã paamd waoogre. (Mat. 6:9) Yʋʋmd fãa, neb wʋsg n sakd n tũud Biiblã sẽn yetã, tɩ rẽ manegd b vɩɩmã la tõe n kɩt tɩ b wa paam fãagre. La tʋm-tʋmd a Poll sokame tɩ nebã “na n yɩɩ wãn n wʋm tɩ ned ka togs koɛɛga?” (Rom 10:14, 15) Rẽ sɩd na n yɩɩ toogo! Dẽnd yɩta sõma tɩ d maan d sẽn tõe fãa n moon koɛɛgã.
20 Bũmb a to me la d tõe n maan n sõng nebã tɩ b bãng rũndã-rũndã zu-loeesã võore, la b bãng b sẽn yãkd yam n maand bũmb ninsã sẽn tõe n wa baas to-to. Yaa d sẽn na n zãmsd nebã Biiblã neere. Sõsg ning sẽn pʋgdã pʋgẽ, d na n bãnga d sẽn tõe n maan dẽ to-to.
[Tẽngr note]
^ sull 18 Pa b yʋyã meng la woto ye.
Wãn to la y na n leoke?
• Tʋʋm-bʋg la kiris-nebã tʋmd nebã sõngr yĩnga?
• Wãn to la d tõe n ket n moond koɛɛgã baa ne zu-loeesã?
• Wãn to la d tõe n pids tʋʋmd ning Wẽnnaam sẽn kõ tõndã?
[Zãmsgã sogsgã]
[Foto, seb-neng a 9]
Rẽnda d tall raood n tõog n moone, baa b sã n namsd tõndo
[Foto, seb-neng 10]
D sã n pa mikd nebã b zagsẽ, bõe la d tõe n maane?