Sũ-tɩrs rãmbã sakda koe-noogã
Sũ-tɩrs rãmbã sakda koe-noogã
“Neb nins fãa sẽn dat vɩɩm sẽn-kõn-sa wã lebga tẽedba.”—TƲƲ. 13:48, NW.
1, 2. Bõe la pipi kiris-nebã maan n pids a Zezi bãngr-gomd ning sẽn yet tɩ koe-noogã segd n moona dũniyã gill zugã?
TƲƲM sebrã tara kiba-nood sẽn wilgd pipi kiris-nebã sẽn maan to-to n pids a Zezi bãngr-gomd ning sẽn yet tɩ koe-noogã segd n moona dũniyã gill zugã. (Mat. 24:14) B moona koɛɛgã ne yẽesem n bas mak-sõng neb nins sẽn na n wa-b poorẽ wã yĩnga. B sẽn moon ne yẽesem Zerizalɛmmã kɩtame tɩ neb wʋsgo, n paas “maan-kʋʋdb wʋsg” wa naag tigingã neba.—Tʋʋ. 2:41; 4:4; 6:7.
2 Misioneer dãmb nins sẽn zĩnd pipi kiris-nebã wakatẽ wã sõnga neb wʋsg tɩ b lebg kiris-neba. Wala makre, a Filip kẽnga Samari n tɩ moon koɛɛgã tɩ neb kʋʋng sak n kelge. (Tʋʋ. 8:5-8) A Poll kẽnga zĩis wʋsg ne neb toɛy-toɛy n tɩ moon koɛɛgã. Wala makre, a kẽnga Sipre, tẽns kẽer sẽn be Aazi Mineer babgẽ wã, Masedoane, Gɛrɛs la Itali. Zʋɩf rãmb la Gɛrk rãmb wʋsg lebga kiris-neba. (Tʋʋ. 14:1; 16:5; 17:4) A Tɩt moona koɛɛgã Kɛrɛte. (Tɩt 1:5) A Pɩɛɛr me ra moonda koɛɛgã Babilonne. A sẽn wa n gʋls a pipi sebrã yʋʋmd 62 n tãag 64 sẽnesã tɩ koe-noogã ra zoe n moon n taa Põ, Galasi, Kapadose, Aazi la Bitini. (1 Pɩɛ. 1:1; 5:13) Sasa kãensã segd n yɩɩ sũ-noog wakat tɛkẽ! Pipi kiris-nebã ra tara yẽesem wʋsg hal tɩ b bɛɛbã meng yeel tɩ b ‘rãmbda dũniyã.’—Tʋʋ. 17:6; 28:22.
3. Rũndã-rũndã, bi-bʋs la koe-moondbã paamda, la woto maanda yãmb bõe?
3 Rũndã-rũndã me, kiris-neb hakɩkã sõor fɩɩgda sõma. Tõnd sã n mi n karem rapoor ning sẽn wilgd a Zeova Kaset rãmbã tʋʋmd sẽn yɩ to-to yʋʋmdã pʋgẽ wã, pa kengd d raood sɩda? Yʋʋmd 2007 pʋgẽ, koe-moondbã zãmsa Biiblã ne neb milyõ a yoob la zaka. Rẽ yĩnga woto pa noogd sũur sɩda? Sẽn paase, neb nins sẽn wa a Zezi Kirist kũumã Tẽegrã sʋka, neb sẽn ta milyõ piig n pa a Zeova Kaset rãmba. La b sẽn wa wã wilgdame tɩ b rat n wʋma koe-noogã. Woto wilgdame tɩ tʋʋm wʋsg n kete.
4. Ãnd dãmb n sakd koe-noogã?
4 Wala pipi kiri-nebã wakatẽ wã, rũndã-rũndã me, neb nins fãa sẽn dat vɩɩm sẽn-kõn-sa wã sakd n kelgda koe-noogã. (Tʋʋ. 13:48) A Zeova kɩtdame tɩ nin-kãensã wat a siglgã pʋgẽ. (Karm-y Aze 2:7.) La sẽn na yɩl n tõog n sõng tɩ neb a taab wa a Zeova siglgã pʋgẽ, manesem bʋg la d segd n tall koe-moonegã pʋgẽ?
D moon koɛɛgã n da bak ned ye
5. Nin-bʋs buud n tat a Zeova yam?
5 Pipi kiris-nebã bãngame tɩ “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.” (Tʋʋ. 10:34, 35) Ned sã n dat n paam zems-n-taar ne a Zeova, a segd n talla tẽeb ne a Zezi maoongã. (Zã 3:16, 36) Sẽn paas me, a Zeova ratame tɩ “nebã [buud] fãa paam fãagr la b bãng sẽn yaa sɩda.”—1 Tɩm. 2:3, 4.
6. D sã n wa moond koɛɛgã, bõe la d pa segd n maane, la bõe yĩnga?
6 D pa segd n ges ned sẽn yaa to-to, a tarem bɩ a tũudum, n pa moon-a koɛɛgã ye. Tags-y bilf n gese: Ned ning sẽn yɩ-a pipi n moon yãmb koɛɛgã pa bak yãmb n bas ye. La yaa vẽeneg tɩ rũndã-rũndã, yãmb sũurã nooma a sẽn pa bak yãmbã. Dẽnd yãmb me pa segd n bak ned n bas n pa togs-a koɛɛg ning sẽn tõe n fãag a yõorã ye. Bala tõe tɩ nin-kãng sak n kelge.—Karm-y Matɩe 7:12.
7. Bõe yĩng tɩ d pa segd n kao neb nins d sẽn moondã bʋʋdo?
7 A Zeova yãka a Zezi t’a yaa bʋ-kaooda. Dẽnd tõnd pa tar sor n na n kao ned baa a ye bʋʋd ye. Woto zemsame, bala tõnd tikda d nin sẽn ne la d tʋb sẽn wʋmd bal n kaood bʋʋdo. La a Zezi yẽ tõe n bãnga sẽn be ned sũurẽ.—Ezai 11:1-5; 2 Tɩm. 4:1.
8, 9. a) Nand t’a Soll lebg kiris-neda, a ra yaa nin-bʋg buudu? b) Bõe la tʋm-tʋmd a Poll kibarã segd n zãms tõndo?
8 Neb buud toor-toor n lebg a Zeova Kaset rãmba. Ned a ye kibar sẽn pa wõnd a taab yaa a Soll sẽn yit Tarsã, sẽn wa n lebg tʋm-tʋmd a Pollã kibare. A Soll ra yaa Fariziẽ sẽn namsd kiris-nebã hal wʋsgo. A sẽn da tẽed ne a sũur fãa tɩ kiris-nebã pa wẽn-tũudb hakɩkã yĩng n kɩt t’a nams-bã. (Gal. 1:13) Sã n yaa ne tõnd ninsaalbã, a Soll ra pa wõnd ned sẽn na n wa lebg kiris-ned abada! La a Zezi yãame t’a Soll tara sũ-sõngo, t’a bobl-a tʋʋm-kãsenga. Rẽ poore, a Soll me lebga kiris-ned sẽn tar yẽesem wʋsg koe-moonegã pʋgẽ.
9 Bõe la a Poll kibarã zãmsd tõndo? Tõnd koe-moonegã zĩigẽ, tõe tɩ neb n be n pa nong tõnd sẽn moond koɛɛgã ye. Baa sã n wõnda b baa a ye pa tõe n lebg kiris-ned hakɩka, d segd n ket n modgdame n gomd Biiblã yell ne-ba. Wakat ninga, yaa neb nins tõnd sẽn pa tẽed tɩ b na n kelgame wã n kelgde. Tõnd sẽn segd n maan bũmb ninga, yaa d ket n moond nebã fãa n pa basdẽ ye.—Karm-y Tʋʋma 5:42.
Neb nins sẽn moond koɛɛgã n pa basdẽ wã na n paama barka
10. Bõe yĩng tɩ d pa segd n bas n pa moon neb nins sẽn wõnd nin-toosã? Togs-y kibar sẽn zĩnd yãmb tẽngẽ wã bɩ y tigingã pʋgẽ.
10 D tõe n yãa ned n tẽed t’a pa tõe n lebg a Zeova Kaset soaba, mik d tudgame. D ges a Ignacio * kibarã. Yaa a sẽn wa n be bãens roogẽ Amerikdisiid tẽng a ye pʋgẽ la a sɩng Biiblã zãmsg ne a Zeova Kaset rãmbã. Nebã ra zoet-a lame, bala a ra yaa nin-toaaga. Rẽ n so tɩ bãensã roog pʋgẽ, bi-bees sã n da koos teed ne bi-bees a taab n wa mik tɩ kẽer pa rat n yao, yaa a Ignacio la b kɩtd t’a tɩ sok samã. La a Ignacio sẽn sɩng Biiblã zãmsg la a tũud a sẽn zãmsdã tɛka, a lebga nin-sõngo. Ned baa a ye pa le kɩtd t’a tɩ sok samd ye. La a Ignacio sũurã noomame, bala a sẽn zãms bũmb ning Biiblã pʋgẽ wã, n paas Wẽnnaam vʋʋsem sõngã kɩtame t’a zʋgã toeem n lebg sõma. A leb n tara mi-beoog ne koe-moondbã sẽn modg n zãms-a Biiblã n pa bak-a wã, baa ne a sẽn da yaa nin-toaagã.
11. Bõe yĩng tɩ d lebgd n tʋgd n sõsd Biiblã zug ne nebã?
11 Bũmb a ye me n kɩt tɩ tõnd lebgd n tʋgd n sõsd ne neb nins tõnd sẽn da zoe n moon koe-noogã: Nin-kãensã yɛlã la b manesmã tõe n toeemame. Tõe tɩ tõnd sẽn da yi b nengẽ wã tɛka, wakat n wa n zĩnd tɩ bã-kɛgeng yõk-ba, bɩ b tʋʋmã sãamame, wall b ned n ki. (Karm-y Koɛɛg Soaba 9:11.) Zu-loeesã sẽn be rũndã-rũndã wã tõe n kɩtame tɩ neb kẽer sokd d mens b vɩɩmã sẽn na n wa baas to-to. Tõe n kɩtame meng tɩ ned sẽn da pa kelgd koɛɛgã sak masã n kelge. Rẽ n so tɩ d sẽn wa n paam wakat ning fãa, bɩ d ra bas n pa moon nebã koe-noogã ye.
12. Wãn to la d segd n ges neb nins d sẽn moondã, la bõe yĩnga?
12 Ninsaalbã nong n yãkda neb kẽer n kʋmb n yet tɩ b yaa woto la woto. La a Zeova pa woto ye. A geta ned kam fãa yembr-yembre, n mi ned kam fãa sẽn yaẽ sõma zĩig ninga. (Karm-y 1 Sãmwɛll 16:7.) Koe-moonegã sasa, tõnd me segd n maana woto. Kibay wʋsg n be n wilgdẽ tɩ d sã n pa tar tags-kɛg nebã zugu, koe-moonegã womda biisi.
13, 14. a) Bõe yĩng tɩ so-pakd a ye ges pag a ye n tags t’a pa tõe n lebg a Zeova Kaset soaba? b) Kiba-kãngã zãmsda tõnd bõe?
13 A Sandra yaa saam-bi-poak sẽn yaa so-pakd n be Karayiibe. A moona zak-zak daar a yembr n seg a Rut. A Rut ra nong n maanda reem ning b sẽn boond tɩ karnavallã, hal meng tɩ b yãk-a naoor a yiib tõr t’a yɩ karnavallã na-poak b tẽngã pʋgẽ. La a Sandra sẽn gom Biiblã yell ne-a wã, a kelga sõma hal tɩ b yiibã rɩk sɛk n na n sɩng Biiblã zãmsg ne taaba. A Sandra ket n tẽra yẽ sẽn lebg n kẽng tɩ yɩ to-to. A yeela woto: “Mam sẽn kẽ a Rut roogã pʋgẽ wã, mam yãa foto kẽeng t’a Rut maneg n ning karnavallã fut n yasẽ. M leb n yãa kũun nins a sẽn paam karnavall dãmbã sasa wã. Mam da tagsdame tɩ ned yʋʋr sẽn yi woto la sẽn nong karnavallã hal wʋsg woto pa tõe n zãms Biiblã tɩ kẽng taoor ye. Rẽ n so tɩ mam bas n pa le rebd a nengẽ ye.”
14 La kaoosg poore, a Rut wa n waa Rĩungã roogẽ. Tigisgã poore, a soka a Sandra yaa: “Bõe yĩng tɩ fo bas n pa le wat n zãmsd maam Biiblã?” A Sandra kosa sugr la a rɩk sɛk n na n lebg n tɩ sɩng Biiblã zãmsg ne-a. A Rut kẽnga taoor ne zãmsgã, n yags a karnavallã foto rãmba, n sɩng tigissã fãa waoong la koe-noogã moonego, n wa rɩk a meng n kõ a Zeova n deeg lisgu. Yaa vẽeneg t’a Sandra bãnga kaoosg zugẽ tɩ yẽ sẽn da tagsd bũmb ning a Rut zugã pa zems ye.
15, 16. a) Koe-moond a ye moona a rɛɛmb tɩ baas wãn to? b) Bõe yĩng tɩ tõnd roagd manesem pa segd n kɩt tɩ d pa moon-a koɛɛgã?
15 Neb wʋsg n moon b roagdb sẽn pa a Zeova Kaset rãmba, tɩ wom biisi. Nin-kãensã yaool n da wõnda neb sẽn pa na n sak n kelge. D ges a Joyce sẽn yaa saam-bi-poak sẽn yit Etazĩni wã kibare. A tara a rɛɛmb a ye sẽn kẽ bãens naoor ka wʋsg a bi-bɩɩlmã tɛka. A Joyce yeela a rɛɛmbã wɛɛngẽ woto: “Nebã ra yetame t’a vɩɩmã pa tar võore, bala a ra koosda dorge, n zuud la a tʋmd tʋʋm-beed a taaba. La baa ne rẽ fãa, mam goma Biiblã yell ne-a hal yʋʋm 37.” A Joyce sẽn kʋ a sũur n gom Biiblã yell ne a rɛɛmbã yʋʋm ka tɛkã woma biisi. A rɛɛmbã wa n sɩnga Biiblã zãmsg ne a Zeova Kaset rãmbã, n toeem a zʋgã hal wʋsgo. Sẽn pa kaoos mengã, a reega lisg tigis-kãseng sẽn zĩnd Californi sasa, rẽ ta tara yʋʋm 50. A Joyce yeela woto: “Mam sũurã yɩɩ noog hal tɩ m daag nintãm. Mam sũurã yaa noogo, m sẽn kell n moon-a koe-noogã n pa basã.”
16 Tõe tɩ yãmb yɛɛsdame n pa rat n gom Biiblã yell ne y roagdb kẽere, b vɩɩmã sẽn yaa to-to wã yĩnga. La a Joyce pa bas tɩ woto buud kɩt t’a pa moon a rɛɛmbã koɛɛgã ye. Tõnd pa tõe n bãng sẽn be ned sũurẽ ye. Tõe t’a soabã baooda ne a sũur fãa n dat n bãng sɩdã. Rẽ yĩngã, bɩ d ra bas n pa sõng nin-kãensã tɩ b bãng sɩdã ye.—Karm-y Yelbũna 3:27.
Sebr sẽn sõngd-d tɩ d zãmsd nebã Biiblã sõma
17, 18. a) Kiba-bʋs n wilgd Biiblã sɩd yetame tɩ bõe? sebrã yõodo? b) Bi-sõma bʋs la yãmb menga paam-yã, y sẽn tʋm ne seb-kãngã wã?
17 Kibay sẽn yit tẽns wʋsg wilgdame tɩ neb wʋsg sẽn yaa pʋ-peelem dãmb sũy nooma ne Biiblã sɩd yetame tɩ bõe? sebrã. Saam-bi-poak a Penni sẽn yit Etazĩni wã tõog n sɩnga Biiblã zãmsg ne neb wʋsg seb-kãngã pʋgẽ. A sẽn zãmsd Biiblã ne neb ninsã sʋka, neb a yiib n yaa neb sẽn kʋʋle, la b ra tũud b tũudmã hal sõma. A Penni ra pa mi nin-kãensã manesem sẽn na n yɩ to-to ne Biiblã zãmsg nins sẽn be Biiblã yetame sebrã pʋgẽ wã ye. La a yeela woto: “B sẽn wilg yɛlã sebrã pʋgẽ tɩ yaa vẽenega, sɩda, la takɩ wã yĩnga, b saka nana-nana tɩ yaa sɩda, tɩ pa tũ ne gom-toog meng ye.”
18 Saam-bi-poak a Pat sẽn yit Ãngeletɛɛrã sɩnga Biiblã zãmsg ne pag a ye sẽn zoe Aazi tẽng a ye n wa be Ãngeletɛɛre. Sodaas n yõk pagã sɩd la a kom-dibli n loog t’a pa tol n le yã-b ye. A kong n zoeeme, bala b yõoga a roogã, tɩ rap wʋsg me yõg-a. Yel-kãensã fãa kɩtame t’a ra tagsdẽ t’a vɩɩmã pa le tar yõodo, hal meng t’a mak naoor wʋsg n na n kʋ a menga. La Biiblã zãmsg kõ-a-la saagre. A Pat yeela woto: “B sẽn wilg yɛlã võor faag-faag Biiblã yetame sebrã pʋgẽ wã, la makr nins b sẽn dɩk be tɩ b tõe n wʋm b võor nana-nana wã yɩ-a-la noog hal wʋsgo.” Pagã kell n kẽnga taoor ne Biiblã zãmsgo, n wa lebg koe-moonda, la a wilg t’a ratame tɩ tigis-kãseng ning sẽn watã bɩ a reeg lisgu. Tõnd sã n tõog n sõng pʋ-peelem soab t’a bãng Biiblã tɩ rẽ kõ-a saagre, d sũ-noogã yaa wʋsgo!
D “ra yɛ ne tʋʋm sõma maaneg ye”
19. Bõe yĩng tɩ koe-moonegã yaa tʋʋm-yãgdem?
19 Beoog sẽn vẽeg fãa, koe-noogã mooneg la karen-biisã maaneg lebgda tʋʋm-yãgdem n paasdẽ. Yʋʋmd fãa, neb wʋsg n sakd n kelgd koe-noogã sẽn na yɩl n bãng Wẽnnaam n paase. La ‘a Zeova ra-kãsengã sẽn kolgã’ yĩnga, rat n yeelame tɩ neb nins sẽn nan pa mi Wẽnnaam sõma wã yaa wa neb “b sẽn yõg n na n tɩ kʋ.”—Sof. 1:14; Yel. 24:11.
20. Bõe la tõnd ned kam fãa segd n modg n maane?
20 Tõnd ket n tõe n sõnga neb nins sẽn nan pa mi Wẽnnaamã. La sẽn na yɩl n tõog n maan dẽ, d segd n maana wa pipi kiris-nebã sẽn ‘zãms nebã la b moon a Zezi Kirist koe-noogã n ka basã.’ (Tʋʋ. 5:42) D tũ b mak-sõngã n ket n moond koɛɛgã baa ne zu-loeesã, n modgd n zãmsd nebã Biiblã neere, la d moond koɛɛgã n da bak ned ye. “Bɩ tõnd da yɛ ne tʋʋm sõma maaneg ye.” D sã n kell n modge, Wẽnnaam na n ning-d-la bark hal wʋsgo.—2 Tɩm. 4:2; karm-y Galat dãmba 6:9.
[Tẽngr note]
^ sull 10 B toeema neb kẽer yʋya.
Wãn to la y na n leoke?
• Ãnd dãmb n sakd koe-noogã?
• Bõe yĩng tɩ d pa segd n bakd neb n basdẽ n pa moondẽ?
• Bi-sõma bʋs la koe-moondb paam ne Biiblã sɩd yetame tɩ bõe? sebrã?
[Zãmsgã sogsgã]
[Foto rãmba, seb-neng 17]
Pʋ-peelem dãmb wʋsg sakd n kelgdame