Zemsame tɩ b kõ yãmb Wẽnnaam Rĩungã
Zemsame tɩ b kõ yãmb Wẽnnaam Rĩungã
“Yãoã yaa bãnd sẽn wilgd tɩ Wẽnnaam bʋʋd yaa tɩrga, la b na n geelgame tɩ [zemsame tɩ b kõ yãmb Wẽnnaam Rĩungã, NW].”—2 TES. 1:5.
1, 2. Wẽnnaam yãka raar n na n maan bõe, la ãnd n na n kao bʋʋdã?
YƲƲMD 50 soabã sẽnes a Zezi rogmã poore, tʋm-tʋmd a Poll da bee Atɛn tẽngã. A sẽn yã tɩ tẽn-kãngã neb wʋsg pʋʋsda bõn-naandsã, sãama a sũur wʋsgo, tɩ kɩt t’a na n sõs ne-b ne yam n kõ-b kasetã. A Poll goamã baasgẽ, a yeela a kɛlgdbã sẽn da pa mi Wẽnnaam ning sẽn ka to wã bũmb sẽn kɩt tɩ b tags wʋsgo. A yeel-b-la woto: ‘Masã [Wẽnnaam] togsda nebã fãa sẽn be zĩiga fãa tɩ b tek yam n kos sugri. Tɩ bõe, a yãka raare, tɩ rao ninga a sẽn yãka na n kao dũniyã bʋʋd tɩrga. La a kõo neba fãa bãnd sẽn wilgd tɩ bõn-kãng yaa sɩda, b sẽn vʋʋg a Zezi wã yĩnga.’—Tʋʋ. 17:30, 31.
2 Wẽnnaam sẽn yãk raar n na n kao ãdem-biisã bʋʋdã sɩd yaa yel-kãsenga, tɩ sek d na tags a zug neere! A Poll sẽn sõs ne Atɛn nebã, a yeelame tɩ bʋ-kaoodã na n yɩɩ a Zezi Kirist, Wẽnnaam sẽn vʋʋgã. A Zezi na n kaoa nebã fãa bʋʋdo. Kẽer keoor na n yɩɩ vɩɩm, la b na n sãama sẽn na n kong-b bʋʋmã.
3. Bõe yĩng tɩ Wẽnnaam maan kaool ne a Abrahaam, la ãnd dãmb n tar tʋʋm kãseng kaool kãng pidsgã pʋgẽ?
3 Bʋ-kaoorã daar na n kaoosa yʋʋm 1000. Yaa a Zezi sẽn yaa Wẽnnaam Rĩungã Rĩmã n na n kao bʋʋdã, la a pa na n yɩ a yembr ye. A Zeova tũusda neb ãdem-biisã sʋk tɩ b na n tɩ naag a Zezi n dɩ naamã la b kao nebã bʋʋd yʋʋm tusrã fãa pʋgẽ. (Ges-y Luk 22:29, 30.) Sẽn na maan yʋʋm 4000 woto sẽn looge, a Zeova sẽn wa n maan kaool ne wẽn-sakd a Abrahaam, a wilga pipi bũmb ning yẽ sẽn na n maan n kɩt tɩ bʋ-kaoorã tõoge. (Karm-y Sɩngre 22:17, 18.) Kaoolã sɩnga pidsg yʋʋmd 1943 sẽn deng a Zezi rogmã. Yaa vẽeneg t’a Abrahaam da pa mi kaoolã sẽn na n naf ãdem-biisã to-to wã fasɩ ye. La rũndã-rũndã, tõnd yẽ miime tɩ kaoolã goam wilgdame t’a yagensã na n tʋma tʋʋm-kãsenga, sẽn na yɩl tɩ Wẽnnaam wa tõog n pids bũmb ning a sẽn dat n maan ãdem-biisã bʋʋd kaoob yĩngã.
4, 5. a) A Abrahaam yagen-kãsengã yaa ãnda, la bõe la a yeel Rĩungã wɛɛngẽ? b) Wakat bʋg la Wẽnnaam sɩng sẽn na n kẽng-b saasẽ wã yãkre?
4 Kaoosg zugẽ, b bãngame t’a Abrahaam yagens nins yell b sẽn pĩnd n gomã tara taoor soab sẽn yaa a Zezi. Yẽ la yagen-kãsengã. Yʋʋmd 29 soabã pʋgẽ,Wẽnnaam zae-a-la ne vʋʋsem sõng t’a lebg Mesi ning sẽn da segd n wa wã bɩ Kiristã. (Gal. 3:16) Rẽ poore, a Zezi rɩka yʋʋm a tãab la pʋɩ-sʋk n moon Rĩungã koe-noog Zʋɩf rãmbã. B sẽn wa n yõk a Zãmbatiisã poore, a Zezi goma goam sẽn wilgd tɩ neb n na n paam n yɩ rĩm dãmb Rĩungã pʋgẽ. A yeelame t’a Zãmbatiis wakatã tɛk n tar n watẽ, neb n maood b pãng tɛk n dat n paam tɩ b kõ-b saasẽ Rĩungã.—Mat. 11:12.
5 La nand t’a Zezi gom woto wã, a yeelame: “Mam yeta yãmb sɩda, tɩ pagbã sẽn dog-b rãmbã fãa sʋka, ned ka be sẽn yɩɩd a Zã ye. La sẽn ya-a yao-zʋʋg Wẽnnaam [Rĩungã] pʋgẽ wã yɩɩda yẽnda.” (Mat. 11:11) Bõe yĩng t’a Zezi yet woto? Bala, wakat kãng tɩ Wẽnnaam da nan pa sɩng kiris-neb nins sẽn na n kẽng saasẽ wã yãkr ye. Yɩɩ yʋʋmd 33 Pãntekotã raar b sẽn zae kiris-nebã ne vʋʋsem sõngã la b yãkrã sɩng-yã. La wakat kãng t’a Zãmbatiis kiime.—Tʋʋ. 2:1-4.
B geelga a Abrahaam yagensã wa nin-tɩrse
6, 7. a) A Abrahaam wakatã, b sẽn yeel t’a yagensã na n lebga wʋsg wa ãdsã ra rat yeelame tɩ bõe? b) A Abrahaam paama bark bʋgo, la bark bʋg sẽn wõnd rẽ la a yagensã paam-yã?
6 Wẽnnaam da yeela a Abrahaam t’a yagensã na n lebga wʋsg “wa ãds sẽn be saasẽ” la wa bĩisr sẽn be ko-kãsengã noore. (Sɩng. 13:16; 22:17) Woto rat n yeelame bal tɩ rẽ sasa tɩ ned ra nan pa tõe n bãng a yagensã sõor sẽn na n tek to-to ye. La b wa n wilga Wẽnnaam sẽn boond-b rãmb t’a Abrahaam yagensã sõor takɩ. A Zezi sẽn yãk a toogo, b fãa yaa neb 144000.—Wil. 7:4; 14:1.
7 A Abrahaam tẽebã wɛɛngẽ, Wẽnnaam Gomdã yeela woto: “A Abram tẽe [a Zeova], la bãmb geelga yãoã wa tɩrlem yẽ yĩnga.” (Sɩng. 15:5, 6) Yaa sɩd tɩ ãdem-biig sẽn yaa tɩrg zãng ka be ye. (Zak 3:2) La baasgo, a Abrahaam sẽn sɩd tẽ a Zeova ne a sũur fãa wã, a Zeova ning-a-la bark n geelg-a wa nin-tɩrga, hal n bool-a meng t’a zoa. (Ezai 41:8) B geelga neb nins sẽn naag a Zezi n yaa a Abrahaam yagens Wẽnnaam nifẽ wã me wa nin-tɩrse, tɩ b na n paam bark n yɩɩg a Abrahaam sẽn paamã menga.
8. Bark bʋs la neb nins b sẽn geelg wa a Abrahaam yagensã na n paame?
8 Wẽnnaam geelga kiris-neb nins sẽn paam vʋʋsem sõngã zaeebã wa nin-tɩrse, b sẽn tẽed t’a Zezi kii tõnd yel-wẽna yĩngã. (Rom 3:24, 28) A Zeova kõ-b-la b yel-wẽna sugr zãnga, n zae-b ne a vʋʋsem sõngã tɩ b lebg a kamb la a Zezi Kirist ba-biisi. (Zã 1:12, 13) Yaa ne nin-kãensã la b sẽn maan kaool-paalgã. B boonda b sullã tɩ bu-paalga, la b boond-b me tɩ Wẽnnaam Israɛlle. (Gal. 6:16; Luk 22:20) Ad woto fãa sɩd yaa waoogr tɛkẽ! Wẽnnaam sẽn waoog-b woto wã yĩng kɩtame tɩ b sẽn gũud bũmb ningã pa vɩɩmd tẽngã zug wakat sẽn kõn sa ye. B sak n na n bõna vɩ-kãnga, sũ-noog ning b sẽn na n paama sẽn pa tõe n bãng n bilgã yĩnga. B na n wa tɩ zĩnda ne a Zezi saasẽ bʋ-kaoorã daare, la b rɩ naam ne-a.—Karm-y Rom dãmba 8:17.
9, 10. a) Yɩɩ wakat bʋg la b zae kiris-neb ne vʋʋsem sõngã pipi, la baraar tɛka, bõe la bãmb dãmbã segd n maane? b) Wãn-wãn la b sõng sẽn zae-b ne vʋʋsem sõngã?
9 Yʋʋmd 33 Pãntekotã raare, b kõo ãdem-biis sẽn yaa wẽn-sakdb sor tɩ b na n zĩnd sẽn na n naag-b a Zezi n dɩ naam bʋ-kaoorã daarã sʋka. A Zezi karen-biis 120 n paam vʋʋsem sõngã lisg baraare, n lebg pipi neb b sẽn zae ne vʋʋsem sõngã. La sẽn na yɩl n paam b keoorã, nin-kãensã zaeebã poor tɛka, baa a Sʋɩtãan sẽn na n nams-b to-to fãa, b segd n kell n sakda a Zeova. B tog n sak-a lame n tãag b kũum.—Wil. 2:10.
10 Sẽn na yɩl n sõng kiris-nin-kãensã tɩ b tõog n kell n yɩ sakdba, a Zeova tũnuga ne a Gomdã la tigissã n kõ-b sagls la sõngr ning b sẽn datã. Wala makre, tʋm-tʋmd a Poll gʋlsa sẽn da be-b Tesalonik tẽngã n yeel-b woto: “Yãmb bãngame tɩ tõnd maana yãmb ned kam fãa wa ba sẽn maand a kamba. Tõnd sagla yãmba, la d bels yãmba, la d togs yãmb tɩ y kẽn wa sẽn zems Wẽnnaam daabo, bãmb sẽn bool yãmb tɩ y paam bãmb soolem la b waoogrã yĩnga.”—1 Tes. 2:11, 12.
11. Bõe la a Zeova kɩt tɩ b gʋls kiris-neb nins b sẽn boond tɩ Wẽnnaam Israɛllã yĩnga?
11 Pãntekotã loogr poore, sẽn yɩɩd yʋʋmd 60 pʋgẽ a Zeova kɩtame tɩ b gʋls a Zezi koe-moonegã kibaya, a sẽn tall manesem ning ne a karen-biisã, la sagls nins a sẽn kõ tigimsã rẽ wẽndã. Rẽ poore, a kɩtame tɩ b rɩk seb-kãens b sẽn gʋls ne gɛrkã n paas Biiblã sɛb nins b sẽn gʋls ne hebre wã sẽn da sɩng n beẽ wã. Ra yaa Israɛll buudã sẽn wa n yaa Wẽnnaam dẽndã sasa la a kɩt tɩ b gʋls Biiblã babg ning sẽn yaa ne hebre wã n kõ-ba. La ra yaa kiris-neb nins sẽn zae ne vʋʋsem sõng n lebg a Zezi ba-biis tɩ b boond-b tɩ Wẽnnaam Israɛll la Wẽnnaam kambã yĩng la b gʋls babg ning sẽn yaa ne gɛrkã. La wa Biiblã babg ning b sẽn gʋls ne hebre wã kareng la a zãmsg sẽn da nafd buud a taabã nebã, yaa vẽeneg tɩ babg ning b sẽn gʋls ne gɛrkã kareng la a zãmsg me nafda kiris-neb nins sẽn pa paam vʋʋsem sõngã zaeebã hal wʋsgo.—Karm-y 2 Tɩmote 3:15-17.
12. Bõe la a Poll tẽeg kiris-neb sẽn da paam vʋʋsem sõngã zaeebo?
12 Wẽnnaam geelga pipi kiris-nebã wa nin-tɩrse, n zae-b ne a vʋʋsem sõngã sẽn na yɩl tɩ b wa paam n tɩ reeg keoor ning b sẽn tar saasẽ wã. La b sã n nan ket tẽngã zugu, b sẽn zae-b ne vʋʋsem sõngã yĩng pa kɩt tɩ b zoe n yaa rĩm dãmb n so b taabã ye. Yaa vẽeneg tɩ pipi kiris-nebã wẽndẽ, sãnda ra wa n baood n na n sooga b tẽed-n-taasã tigimsã pʋsẽ. Rẽ kɩtame t’a Poll yeel-b woto: “Masã, yãmb tɩgame, masã yãmb yaa arzɛgs rãmba, la yãmb sɩngame n dɩt naam tɩ tõnd ka be yãmb sʋk ye. La mam nonga yãmb sã n dɩ naam menga, tɩ tõnd me tõe n dɩ naam ne yãmba.” (1 Kor. 4:8) A Poll leb n tẽega kiris-neb nins sẽn paam vʋʋsem sõngã zaeeb wakat kãngã me woto: “Ka tɩ tõnd dat n [sooga, NW ] yãmb y tẽebã pʋg ye, la yaa tɩ tõnd dat n naaga yãmb n tʋm tɩ y paam sũ-noogo.”—2 Kor. 1:24, Kãab-paalgã Koe-noogo.
B lokda sõor ning b sẽn da pĩnd n togsã
13. Yʋʋmd 33 soabã loogr poore, wãn-wãn la b kell n tall sẽn zae-bã sõor lokre?
13 Pipi kiris-nebã wakatẽ, b pa paam neb 144000 sõor zãng ye. Tʋm-tʋmdbã wakatẽ, b ra ket n yãkda neb n na n lok b sõorã. La wõnda rẽ loogr poore, b sẽn yãk neb ninsã sõor pa yɩ wʋsg ye. Hal n tãag rũndã-rũndã, b ket n yãkda neb n lokd b sõorã. (Mat. 28:20) La a Zezi sẽn deeg naam saasẽ yʋʋmd 1914 tɛkã, yɛlã kẽnga taoor tao-tao.
14, 15. Yʋʋmd 1935 soabã poore, bõe n maan sẽn na n kẽng-b saasẽ wã yãkr wɛɛngẽ?
14 A Zezi sẽn deeg a naamã, a reng n diga Wẽnnaam naamã bɛɛb fãa saasẽ. (Karm-y Wilgri 12:10, 12.) Rẽ poore, a gesa sẽn na n tɩ yɩ-b rĩm dãmb saasẽ wã tigsg yelle, sẽn na yɩl n lok b sõorã. Yʋʋmd 1935 soabã tɛka, nin-kãensã sõorã ra kolga pidbu. Wʋsg sẽn da lebgd kiris-neb wakat kãng ra pa tar saasẽ vɩɩmã saagr ye. Bala, vʋʋsem sõngã ra pa kõt bãmb dãmbã kaset tɩ b yaa Wẽnnaam kamb ye. (Ges-y Rom dãmba 8:16.) B fãa ra miime tɩ b naaga neb nins b sẽn boond tɩ “piis a taabã.” Yaa bãmb la sẽn na n wa vɩɩmd wakat sẽn kõn sa arzãnã pʋgẽ tẽngã zugã. (Zã 10:16) Rẽnd yʋʋmd 1935 soabã tɛk n tar n watẽ wã, b sẽn moond koɛɛgã yaa sẽn na yɩl n tigim “kʋʋn-kãseng” ning tʋm-tʋmd a Zã sẽn yã wã. Bãmb la sẽn na n wa põs “to-kãsengã” sasa wã.—Wil. 7:9, 10, 14.
15 La baa yʋʋmd 1935 soabã loogr poore, neb bilf la b kell n yãk tɩ b na n kẽng saasẽ. Bõe yĩnga? Bala, tõe tɩ kẽer b sẽn da yãk wa n basa Wẽnnaam sakre, tɩ yɩ tɩlae tɩ b yãk neb a taab tɩ ledg-ba. (Ges-y Wilgri 3:16.) Tʋm-tʋmd a Poll meng bãnga neb sẽn da paam vʋʋsem sõngã zaeeb n wa bas Wẽnnaam sakre, t’a gom b yelle. (Fil. 3:17-19) Ãnd dãmb la b ra na n yãk tɩ b ledg nin-kãense? Vẽenega, yaa a Zeova n mi a sẽn na n yãk-b rãmba. La sẽn yaa a soab fãa, zemsame tɩ d tẽ tɩ pa neb sẽn nan deeg lisg paalem ye. Tog n yaa neb sẽn sɩng n wilgdẽ tɩ b yaa wẽn-sakdb baa namsg pʋgẽ, wa a Zezi karen-biis nins sẽn da be ne-a a sẽn wa n lugund Soaalã rɩɩbã. *—Luk 22:28.
16. Bõe la a Zeova maan sẽn zae-bã yãkr wɛɛngẽ tɩ kɩt tɩ d sũy yaa noogo, la d tõe n kɩsa sɩd me ne bõe?
16 La baasgo, wõnda d pa tõe n yeel tɩ b sẽn yãk-b rãmb yʋʋmd 1935 soabã tɛk n watẽ wã fãa segd n ledga neb ye. Dẽnd yaa vẽeneg tɩ yaa a Zeova n dat tɩ yɩ woto sẽn na yɩl tɩ kiris-neb sẽn zae ne vʋʋsem sõngã kell n zĩnd tõnd sʋk n tãag “Babilon kãsengã” * sãoongo. (Wil. 17:5) La d tõe n kɩsa sɩd t’a Zeova yãka wakate, tɩ rẽ wẽnd ne a ta bɩ na n mik tɩ neb 144000 sõor pidame, la tɩ b fãa lebga rĩm dãmb saasẽ. Sẽn paase, d tõe n kɩsa sɩd me tɩ bãngr-gomdã sẽn yeel tɩ kʋʋn-kãseng n na n kell n sak Wẽnnaamã na n pidsame. Rũndã-rũndã, b sõorã tara paasgo. Ka la bilfu, b na n ‘yii to-kãseng’ ning sẽn na n paam a Sʋɩtãan dũniyã pʋgẽ n kẽ Wẽnnaam dũni paalgã pʋgẽ ne sũ-noogo.
Wẽnnaam Rĩungã rĩm dãmbã sõor pidame la bala!
17. Sẽn zems ne 1 Tesalonik rãmb 4:15-17 la Wilgri 6:9-11 goamã, bõe la sẽn zae-b ne vʋʋsem sõngã n kell n sak Wẽnnaam n tãag b kũumã paam-yã?
17 Yʋʋmd 33 Pãntekotã tɛk n tar n watẽ, kiris-neb nins sẽn zae ne vʋʋsem sõngã neb tusa n tall tẽeb sõma, n sak Wẽnnaam n tãag b kũum. Wẽnnaam gesame tɩ zemsame t’a kõ nin-kãensã Rĩungã. A Zezi sẽn deeg naam saasẽ wã poor bilf bala, b sɩd paama b keoorã.—Karm-y 1 Tesalonik rãmba 4:15-17; Wilgri 6:9-11.
18. a) Kiris-neb nins sẽn paam vʋʋsem sõngã zaeeb n ket tẽng zugã kɩsa sɩd ne bõe? b) Piis a taabã sã n get b saam-biis nins sẽn paam vʋʋsem sõngã zaeebã tẽeb sẽn yaa to-to wã, bõe la b sakd n deegdẽ?
18 Kiris-neb nins sẽn paam zaeeb n ket tẽng zugã kɩsa sɩd ne b sũy fãa tɩ b sã n kell n sak Wẽnnaam, ka la bilfu, b na n tɩ reega b keoorã saasẽ. Piis a taabã sõor sẽn yaa milyõ rãmbã sã n get b saam-bi-kãens tẽebã sẽn yaa to-to wã, b sakd n deegda tʋm-tʋmd a Poll sẽn da yeel Tesalonik saam-biisã bũmb ningã. A yeel-b-la woto: “Tõnd me maanda sũ-noog yãmb yĩng Wẽnnaam tẽedba sʋka, yãmb sẽn maand sũ-mare, n tar tẽeb namsg ne tood nins fãa sẽn paamd yãmba pʋsẽ wã. Yãoã yaa bãnd sẽn wilgd tɩ Wẽnnaam bʋʋd yaa tɩrga, la b na n geelgame tɩ yãmb zemsame tɩ paam Wẽnnaam soolem yãmb sẽn namsd a yĩngã.” (2 Tes. 1:3-5) Yaa kiris-neb nins sẽn paam zaeeb n ket tẽngã zugã yaoolem soabã kaalem poor la Wẽnnaam Rĩungã rĩm dãmb sõor na n pid zãnga. D pa mi rẽ sẽn na n yɩ daar ningã ye. La sẽn yaa a soab fãa, na n sɩd yɩɩ sũ-noog tɛkẽ n kõ saasẽ la tẽng zug rãmbã fãa.
[Tẽngr not rãmbã]
^ sull 15 Ges-y yʋʋmd 1992 tʋʋlg kiuug pipi daar Gũusg Gasgã ne farendã seb-neng 20, sull 17 wã.
^ sull 16 Ges-y yʋʋmd 2007 sig-noy kiuug pipi raar Gũusg Gasgã ne farendã pʋgẽ “Karemdbã sogsgo.”
Y tõe n leokame bɩ?
• Bõe la Wẽnnaam da yeel a Abrahaam tɩ rẽ pidsg na n kɩt tɩ bʋ-kaoorã tõoge?
• Bõe yĩng tɩ Wẽnnaam geelg a Abrahaam wa nin-tɩrga?
• B sẽn geelg neb nins b sẽn bool t’a Abrahaam yagensã wa nin-tɩrsã kɩtame tɩ b na n paam bõe?
• Kiris-nebã fãa kɩsa sɩd ne bõe?
[Zãmsgã sogsgã]
[Foto, seb-neng 24]
A Zezi sagla a karen-biisã tɩ b mao tɩ b kõ-b Rĩungã
[Foto, seb-neng 25]
Yʋʋmd 33 Pãntekotã daare, a Zeova sɩnga a Abrahaam yagengã pʋgds tũusgu
[Foto rãmba, seb-neng 26]
Piis a taabã sũy yaa noog b sẽn paam tɩ sẽn zae-bã kẽer ket tẽngã zug ne-b yaoolem dayã pʋgẽ wã