“Kɩɩs-y Sʋɩtãanã” wa a Zezi sẽn maanã
“Kɩɩs-y Sʋɩtãanã” wa a Zezi sẽn maanã
“Kɩɩs-y Sʋɩtãanã, la yẽ na zoe n bas yãmba.”—Zak 4:7.
1. A Zezi ra zoe n miime tɩ bõe n na n paam-a tẽngã zugu, la rẽ na n baasa wãna?
A ZEZI KIRIST ra sɩng n miime t’a Sʋɩtãan na n nams-a lame. Wẽnnaam sẽn yeel malɛg-wẽng ning sẽn gom ne waafã maasmã bũmb ningã ra wilgda rẽnda. Wẽnnaam yeel-a-la woto: “Mam na n ninga beem foo ne pagã, [a Zeova saasẽ siglgã] sʋka, la fo yageng ne yẽ yageng sʋka. Yẽ [a Zezi Kirist] na n pogla fo zugu, la fo na n pogla yẽ na-kãsenkãare.” (Sɩng. 3:14, 15; Wil. 12:9) A Zezi na-kãsenkãarã poglgã ra yaa a sẽn na n wa tẽngã zug tɩ b kʋ-a tɩ rẽ poor bilf bɩ Wẽnnaam vʋʋg-a t’a leb saasẽ wã. La waafã zug poglgã wilgdame tɩ sãmpogr ning a Sʋɩtãan sẽn na n paamã na n tũu ne a sãoong zãng-zãnga.—Karm-y Tʋʋma 2:31, 32; Hebre dãmba 2:14.
2. Bõe yĩng t’a Zeova ra kɩs sɩd t’a Zezi na n tõog n kɩɩsa a Sʋɩtãana?
2 A Zeova ra kɩsa sɩd t’a Zezi sã n wa tẽngã zugu, a na n tõog n kɩɩsa a Sʋɩtãan n pids tʋʋmd ning yẽ sẽn bobl-a wã. Bõe yĩng t’a Zeova ra bas a yam ne rẽ? Yaa t’a reng n naana a Zezi tɩ kaoos yʋʋm wʋsg t’a yaool n na n naan sẽn ketã fãa. Woto kɩtame t’a mi a Zezi sẽn yaa a “tʋʋm-mit” la a “bi-kãseng sẽn yɩɩd bõn-naandsã fãa” wã hal sõma. (Yel. 8:22-31; Kol. 1:15) Rẽ n so tɩ Wẽnnaam sẽn wa n tʋm-a tẽngã zug n kõ a Sʋɩtãan sor t’a mak-a hal tɩ baas ne a kũumã, a ra kɩs sɩd t’a bi-ribl-yendã na n tõoga a Sʋɩtãan n pids a tʋʋmdã.—Zã 3:16.
A Zeova kogenda a nin-buiidã
3. Bõe la a Sʋɩtãan maand a Zeova nin-buiidã?
3 A Zezi ra goma a Sʋɩtãan yell n bool-a tɩ “dũniyã naaba,” la a wilg a karen-biisã t’a na n nams-b-la wa a sẽn nams yẽ wã. (Zã 12:31; 15:20) Dũniyã fãa sẽn be wẽng soab a Sʋɩtãan nugẽ wã yĩnga, a nebã kisa kiris-neb hakɩkã, bala b tũuda a Zeova la b yaa tɩrlem koe-moondba. (Mat. 24:9; 1 Zã 5:19) Yaa kiris-neb nins sẽn paam vʋʋsem sõngã zaeeb n ket tẽngã zugu, la b na n wa tɩ naag Kiristã n yɩ saasẽ Rĩungã rĩm dãmbã la a Sʋɩtãan zabd ne n yɩɩda. La a zabda ne a Zeova Kaset rãmb nins sẽn na n wa vɩɩmd wakat sẽn kõn sa arzãnã pʋgẽ tẽngã zugã me. Wẽnnaam Gomdã keoogda tõnd woto: “Yãmb bɛyã sẽn yaa Sʋɩtãanã gõoda wa gɩgemd sẽn kelemda, n baood a sẽn tõe n paam a soab n sãame.”—1 Pɩɛ. 5:8.
4. Kaset bʋg n wilgd rũndã-rũndã tɩ Wẽnnaam nin-buiidã tõogd n kɩɩsda a Sʋɩtãana?
4 Wẽnnaam a Zeova sẽn be a siglgã poorẽ n sõngd a nin-buiidã yĩnga, d tõogd n kɩɩsda a Sʋɩtãana. D tara kaset sẽn wilgd rẽ. Wala makre, yʋʋm koabg ning sẽn nan loogã pʋgẽ, na-toos n mak a Zeova Kaset rãmbã menesgo. La dũniyã gill zugu, Kaset rãmbã sõor ket n tara paasgo, hal tɩ rũndã-rũndã b sõorã kolg 7 000 000, tɩ b tigimsã me sõor yɩɩd 100 000. Yaa na-toos nins sẽn mak a Zeova Kaset rãmbã menesgã n meneme!
5. Wãn-wãn la Ezai 54:17 goamã pidsd a Zeova nin-buiidã zugu?
5 Wẽnnaam da goma ne pĩnd wẽndẽ Israɛll nin-buiidã gill a sẽn da boond t’a “pagã” n kãab-a woto: “Zab-teed nins fãa neb sẽn maand n na n zab ne fooma ka na n tõog ye. Fo na n sãama zɩlem nins fãa sẽn dõt fooma. Yaa Zusoabã tʋm-tʋmdbã pʋɩɩr la woto. Bãmb tɩrlem yita mam nengẽ.” (Ezai 54:6, 17) Kãab-kãngã pidsda a Zeova nin-buiidã zug yaoolem da-kãensã pʋsẽ. (2 Tɩm. 3:1-5, 13) Tõnd ket n kɩɩsda a Sʋɩtãana, la zab-teoog buud kae a sẽn tõe n tall n menes Wẽnnaam nin-buiidã ye. Bala Wẽnnaam bee ne-do.—Yɩɩl 118:6, 7.
6. A Daniɛll sebrã yet-d lame tɩ bõe n na n paam a Sʋɩtãan naamã?
6 Dũni kãngã saabã kolgda tao-tao, la b na n menesa a Sʋɩtãan naamã fãa fasɩ wakat kãnga. Wẽnnaam da pĩnd n vẽnega no-rɛɛs a Daniɛll t’a wilg rẽ. A yeela woto: “Rĩm dãmb kãense, [rũndã-rũndã rĩm dãmbã] sẽn dɩt naam wakate, Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãense, [sẽn be-b rũndã-rũndã wã] fãa tɩ b menem n bas-a t’a yaas wakat fãa.” (Dan. 2:44) Rẽ na n kɩtame t’a Sʋɩtãan naamã la ãdem-biisã sẽn pa zems zãngã goosneema rãmbã ra tol n ye zĩnd abada. A Sʋɩtãan dũniyã na n menema fasɩ, tɩ Wẽnnaam Rĩungã rɩ naam dũniyã gill zug n pa tol n le tall bɛ ye.—Karm-y 2 Pɩɛɛr 3:7, 13.
7. Bõe n kɩt tɩ d miẽ t’a Zeova nin-buiidã ned kam fãa tõe n kɩɩsa a Sʋɩtãan n tõoge?
7 Yaa vẽeneg t’a Zeova na n ket n kogenda a siglgã la a ningd-a barka. (Karm-y Yɩɩl Sõamyã 125:1, 2.) La tõnd yẽ? Biiblã yet-d lame tɩ tõnd me tõe n kɩɩsa a Sʋɩtãan wa a Zezi sẽn maanã. Sɩd me, Kiristã wilga bãngr-gomd ning a sẽn kɩt tɩ tʋm-tʋmd a Zã togsã pʋgẽ tɩ baa a Sʋɩtãan sẽn na n maanega, dũni kãngã baasgẽ wã, sẽn saagd-b n na n wa vɩɩmd tẽngã zugã “kʋʋn-kãseng” n na n põse. Biiblã yeelame tɩ b zẽka b koees n kelem n yeel woto: “Fãagr yaa tõnd Wẽnnaam sẽn zao geerã zugã pãng yĩnga, la Pebilã [a Zezi Kirist] pãng yĩnga.” (Wil. 7:9-14) B wilgame tɩ sẽn zae-bã tõogda a Sʋɩtãana, tɩ b tũud-n-taasã b sẽn boond tɩ “piis a taabã” me tõogd n kɩɩsd-a. (Zã 10:16; Wil. 12:10, 11) La yɩl n tõog n kɩɩs a Sʋɩtãana, d segd n maooda d pãng tɛk la d pʋʋsd Wẽnnaam ne d sũur fãa n kotẽ t’a “fãag tõnd wẽng soabã nugẽ.”—Mat. 6:13.
Sẽn kɩɩs-a a Sʋɩtãan n kõ-d mak-sõng sẽn ka to wã
8. Rasempʋɩɩgẽ wã, a Sʋɩtãan reng n maka a Zezi n bao t’a maan bõe, la a Zezi leokame tɩ bõe?
8 A Sʋɩtãan maka a na tõog t’a Zezi sãam zems-n-taar ning a sẽn tar ne Wẽnnaamã. A maka a Zezi rasempʋɩɩgẽ wã n tʋlg t’a kɩɩs a Zeova. La a Zezi tõdgame n kõ tõnd mak-sõng sẽn ka to. Rẽ wẽnd t’a Zezi ra loeya noor wĩntoog ne yʋng n maan dasem piis-naase, tɩ kom da segd n tar-a wʋsgo. Rẽ n so t’a Sʋɩtãan yeel-a woto: “Yãmb sã n yaa Wẽnnaam Biiga, bɩ y kɩt tɩ kug-kãensã lebg buri.” La a Zezi tõdgame t’a kõn tʋm ne pãn-tõog ning Wẽnnaam sẽn kõ-a wã a meng nafr yĩng ye. A pʋd n leok-a-la woto: “A gʋlsame: ‘Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.’ ”—Mat. 4:1-4; Tõo. 8:3.
9. Bõe yĩng tɩ d segd n mao t’a Sʋɩtãan da tõog n tũnug ne d tʋlsem toɛy-toɛyã n kʋɩɩb-do?
9 Rũndã-rũndã, a Sʋɩtãan tũnugda ne tʋlsem toɛy-toɛy nins ãdem-biig fãa sẽn tarã n dat n bẽd a Zeova nin-buiidã. Woto yĩnga, d segd n maoa d pãng tɛk t’a ra tõog n kʋɩɩb-d ne yoobã sẽn tar piuugrã ye. Wẽnnaam Gomdã yeta vẽeneg woto: “Yãmb ka mi tɩ nin-wẽnsã ka na n paam Wẽnnaam soolem la? Da belg-y y mens ye. Nin-yoaadba ne bõn-naands pʋʋsdba la rap sẽn [maand b mens wa, NW ] pagb la raglem dãmb . . . ka na n paam Wẽnnaam soolem ye.” (1 Kor. 6:9, 10) Woto wilgda vẽeneg tɩ ned ning fãa sẽn vɩ vɩ-yook a woto la a pa rat n toeem pa na n kẽ Wẽnnaam dũni paalgã pʋgẽ ye.
10. Sẽn zems ne Matɩe 4:5, 6 goamã, a Sʋɩtãan kosa a Zezi t’a maan bõe n sãmb a na sak n kɩɩs Wẽnnaam?
10 A Sʋɩtãan sẽn mak a Zezi naoor a yiib-n-soab rasempʋɩɩgẽ wã wɛɛngẽ, Biiblã yeta woto: “Sʋɩtãanã talla bãmb n kẽng tẽn-sõngẽ wã, n zĩndg bãmb Wẽnnaam doogã zug n yeel bãmb yaa: ‘Yãmb sã n yaa Wẽnnaam Biiga, bɩ y lʋɩ tẽnga, tɩ bõe, a gʋlsame: “Bãmb na n kɩtame tɩ b malɛk rãmbã gũ foom. Bãmb na n talla foom ne b nusi, tɩ fo ra wa lak f naoor ne kugr ye.” ’ ” (Mat. 4:5, 6) A Sʋɩtãan da tẽedame t’a Zezi na n sakame n bao n wilg nebã fãa nifẽ tɩ sɩd yaa yẽ la Mesi wã. A Zezi sẽn tõdgã zemsame. Bala ra na n wilgame t’a yaa wuk-m-soaba, tɩ kɩt tɩ Wẽnnaam sũur sãam ne-a t’a pa kogl-a ye. La a Zezi ye kell n saka a Zeova n leok ne Biiblã verse n yeel woto: “A gʋlsame me: ‘Ra mak Zusoaba fo Wẽnnaam ye.’ ”—Mat. 4:7; Tõo. 6:16.
11. Bõe la a Sʋɩtãan tõe n kɩt tɩ d tʋlg n maane, la tõe n baasa wãna?
11 A Sʋɩtãan tõe n kɩtame tɩ d tʋlg ne manesem toor-toor n bao ziiri. A tõe n kɩtame me tɩ d tʋlg n dɩk dũniyã neb togs-n-taare, b sẽn manegd b mensã to-to wã wɛɛngẽ. Wala makre, b futã la b zutã manegre. Wall a kɩt tɩ d nong reem la filim dãmb sẽn pa ta Wẽnnaam yam. La rẽ yĩnga d sã n kɩɩs Biiblã sagls n bao n na n wõneg dũniyã neba, d tõe n tẽeme tɩ malɛgsã na n kogl-d-la ne bi-wẽns nins d kɩɩsgã sẽn na n wa ne wã sɩda? Baa rĩm a Davɩɩd sẽn kos sugr a sẽn yo ne a Batseba la a maan yel-wẽn ninsã poorã, Wẽnnaam pa kogl-a t’a põs a yel-wẽnã biis ye. (2 Sãm. 12:9-12) Bɩ d ra tol n kɩɩs a Zeova n tẽed t’a na n kogl-d lame tɩ d põs d kɩɩsgã biis ye. Wala makre, d ra nong dũniyã ye.—Karm-y Zak 4:4; 1 Zã 2:15-17.
12. Sẽn zems ne Matɩe 4:8, 9 goamã, a Sʋɩtãan tʋlgame tɩ Wẽnnaam bi-riblã maan bõe, la a leokame tɩ bõe?
12 A Sʋɩtãan sẽn mak a Zezi rasempʋɩɩgẽ wã, a wa n kãab-a-la naam. A wilga a Zezi dũniyã soolem toɛy-toɛyã fãa ne b naam n yeel-a yaa: “Yãmb sã n na sak n wõgemd n waoog maam, mam na kõ yãmb bõn-kãensã fãa.” (Mat. 4:8, 9) Ad woto sɩd ra yaa sɩlem buud sẽn na yɩl n kɩt t’a Zezi waoog-a ne waoogr ning sẽn segd ne Wẽnnaam a Zeova a ye balã n paam taale! Sɩngrẽ wã, a ra yaa malɛk-sõngo, la yaa a sẽn wa n tʋlg waoog-kãngã sẽn pa segd ne-a wã n kɩt t’a maan yel-wẽnd n lebg Sʋɩtãanã. (Zak 1:14, 15) La a Zezi pa tʋlg n na n wõneg-a baa bilf ye. A kell n saka a saasẽ ba wã bal n leok-a yaa: “Sʋɩtãana, looge, tɩ bõe, a gʋlsame: ‘Waoog Zusoaba fo Wẽnnaam, la f sak bãmb bala.’ ” Ka me, a Zezi kell n kɩɩsa a Sʋɩtãan vẽenega. Wẽnnaam bi-riblã tõdga fasɩ t’a kõn yɩ a Sʋɩtãan dũniyã rẽnda, n pa tol n sak n na n waoog wẽng soabã baa bilf ye!—Mat. 4:10; Tõo. 6:13; 10:20.
“Kɩɩs-y Sʋɩtãanã, la yẽ na zoe n bas yãmba”
13, 14. a) A Sʋɩtãan sẽn wa n wilg a Zezi dũniyã soolem toɛy-toɛyã fãa ne b naamã, a ra kãabd-a-la bõe? b) Bõe la a Sʋɩtãan maand n dat n kʋɩɩb tõndo?
13 A Sʋɩtãan sẽn wilg a Zezi dũniyã soolem toɛy-toɛyã fãa ne b naamã, a ra rat n kõ-a-la naam buud ãdem-biig baa a ye sẽn da na zɩ n paame. A Sʋɩtãan da tẽedame tɩ woto na n yɩ a Zezi noogo, tɩ kɩt t’a tʋlg n yɩ dũniyã politikã nin-kãseng sẽn ka to. Rũndã-rũndã, a Sʋɩtãan pa kãabd tõnd soolem toɛy-toɛy naam n na n kʋɩɩb-d ye. La a tũnugda ne d sũyã sẽn tʋll bũmb ninsã, d ninã sẽn ne n datã, d tʋbã sẽn kelgdã la bũmb nins yell d sẽn tagsdã n dat n kʋɩɩb-do.
14 Yaa a Sʋɩtãan la dũni kãngã naaba. Woto yĩnga, a kɩtdame tɩ dũniyã kibay fãa zemsd ne a raabo. Rẽ n so tɩ dũniyã neb sɛbã pʋsẽ goam la b fot rãmba, b filim dãmba, b sõssã bɩ b yɩɩlã sẽn wae n wilgd yoob yɛl wall nen-kɛglmã pa lingd tõnd ye. Piblisite rãmb wʋsg dũniyã lɛɛbdb sẽn maand yaa sẽn na yɩl n kɩt tɩ d ra teed wʋsgo, tɩ yaool n pa teedã fãa n yaa tɩlae ne-d ye. A Sʋɩtãan tũnugda ne piblisite kãens n dat tɩ d getẽ wall d kelgdẽ pa rẽ bɩ d tagsd te-kãens yell t’a paam-d n bẽde. La d sã n tõdg n pa karem bɩ n ges wall d kelg bũmb sẽn kɩɩsd Biiblã noyã, yaa wa d sẽn yet a Sʋɩtãan yaa: “Looge”! D sã n maand woto n tõdgd a Sʋɩtãan dũniyã yel-yoodã, d rɩkda a Zezi togs-n-taare. D sẽn wilgd ne raood d tʋʋmã zĩisẽ, d lekoll dãmbẽ, d sagsã pʋsẽ la d mitinsã taoor tɩ d yaa a Zezi karen-biis la a Zeova Kaset rãmbã yĩnga, kɩtame tɩ nebã mi vẽeneg me tɩ d sɩd pa a Sʋɩtãan dũniyã rẽnd ye.—Karm-y Mark 8:38.
15. Bõe yĩng tɩ yɩl n tõog n kɩɩs a Sʋɩtãan baoodẽ tɩ d gũusd wakat fãa?
15 A Sʋɩtãan sẽn mak t’a na n kɩt t’a Zezi kɩɩs Wẽnnaam naoor a tãab-n-soabã n pa tõogã, a “basa a Zezi.” (Mat. 4:11) La ra pa rat n yeel t’a pa na n tol n ye mak a kʋɩɩbg ye. Bala kibarã yeta woto: “Sʋɩtãanã sẽn mak a Zezi ne bõn-kãens fãa [rasempʋɩɩgẽ wã], a loogame n bas bãmba, n dat t’a sã n le paam weer nindaar bɩ a le mak bãmba.” (Luk 4:13) A Sʋɩtãan sã n wa mak-d n pa tõoge, d segd n pʋʋsa a Zeova barka. La d segd n ket n kota Wẽnnaam sõngre, bala a Sʋɩtãan sã n le paam weere, rat n yet tɩ sasa d sẽn tõe n pa tẽed meng t’a na n mak-d lame, a na n le waame. Woto yĩnga, d segd n gũusda wakat fãa, la d mao tɩ d sẽn wa n tɩ be yell ning fãa taoor bɩ d kell n sak a Zeova bala.
16. Pãn-bʋg sẽn ka to la a Zeova kõt-do, la bõe yĩng tɩ d segd n pʋʋsd n kot pãn-kãnga?
16 Sẽn na yɩl n tõogd n kɩɩsd a Sʋɩtãana, d segd n pʋʋsda Wẽnnaam n kot a vʋʋsem sõngã sẽn yaa pãn-kãseng sẽn ka to wã, la d bas d yam t’a na n kõ-d lame. Pãn-kãngã na n sõng-d lame tɩ d tõog n maan yɛl d sẽn pa tõe n maan ne d meng tõogo. A Zezi ra wilga a karen-biisã tɩ Wẽnnaam sɩd na n kõ-b-la a vʋʋsem sõngã n yeel-b yaa: “A sã n yaa woto tɩ yãmb [sẽn dog ne yel-wẽn tɩ kɩt tɩ b tõe n yeel tɩ y yaa] nin-wẽnsã bãng tɩ kõ yãmb kambã kũun sẽn yaa sõma; dẽ, sẽn yɩɩda yãmb [saasẽ] Ba kõn kõ neb nins sẽn kot bãmb Sɩɩg Sõng bɩ?” (Luk 11:13) Bɩ d ket n pʋʋsd a Zeova n kot a vʋʋsem sõngã. Ne pãn-kãngã sẽn ka to wã sõngre, d na n ket n tõogd n kɩɩsda a Sʋɩtãana. La sẽn na yɩl n “tõog Sʋɩtãanã sɩlem fãa,” d segd n pʋʋsda wakat fãa la ne d sũur fãa, la d bob Wẽnnaam zab-teedã fãa me.—Ef. 6:11-18.
17. Sũ-no-bʋg n sõng a Zezi t’a tõog n kɩɩs a Sʋɩtãana?
17 Bũmb a to me n sõng a Zezi t’a tõog n kɩɩs a Sʋɩtãana, la bõn-kãng tõe n sõnga tõnd me. Biiblã yeela woto: “Bãmb [a Zezi] saka kũum [da-luk] n ka zoe yãnd ye, sũ-noog sẽn be bãmb taoorã yĩnga, la b zaoo Wẽnnaam geer dɩtgo.” (Heb. 12:2) Tõnd me sã n teend a Zeova naamã, n waoogd a yʋ-sõngã la d tẽegd vɩɩm sẽn pa satã d sẽn na n wa paamã yell wakat fãa, d na n talla sũ-noog ning sẽn sõng a Zezi wã buudu. B sã n wa menes a Sʋɩtãan ne a tʋʋmã fãa fasɩ tɩ b pa na n tol n ye zĩndi, tɩ ‘sũ-maasem dãmbã so dũniyã n maand sũ-noog laafɩ wʋsg yĩnga,’ d sũy sɩd na n yɩɩ noogo! (Yɩɩl 37:11) Woto yĩng bɩ y ket n kɩɩsd Sʋɩtãanã wa a Zezi sẽn maanã.—Karm-y Zak 4:7, 8.
Wãn to la y na n leoke?
• Bõe n wilgd t’a Zeova kogenda a nin-buiidã?
• Wãn-wãn la a Zezi kɩɩs a Sʋɩtãan n kõ-d mak-sõng sẽn ka to?
• Bõe la y tõe n maan n kɩɩs a Sʋɩtãana?
[Zãmsgã sogsgã]
[Foto, seb-neng 30]
Zood ne dũni kãngã yaa beem ne Wẽnnaam
[Foto, seb-neng 32]
A Zezi tõdga dũniyã soolem toɛy-toɛyã fãa naam a Sʋɩtãan sẽn kãab-a wã