Tũ-y Wẽnnaam Gomdã noy laafɩ wã baoob wɛɛngẽ
Tũ-y Wẽnnaam Gomdã noy laafɩ wã baoob wɛɛngẽ
“Nong [a Zeova] fo Wẽnnaam ne f sũur fãa, la ne f ratem fãa, la ne f yam fãa, la ne fo pãngã fãa.”—Mark 12:30.
1. Wẽnnaam da ratame tɩ ninsaalbã vɩɩm yɩ wãn-wãna?
WẼNNAAM a Zeova sẽn wa n naan pipi ninsaalbã, a ra pa rat tɩ b wa bẽ tɩ b sokd kũum ye. A zĩniga a Ãdem ne a Hawa Edɛn zẽedã pʋgẽ b sẽn boond me tɩ “nuura zẽed zĩigẽ” wã, n yeel-b tɩ b ‘ko-a la b gũ-a’ wakat sẽn kõn sa yĩnga. B ra pa segd n zĩnd be n kaoos yʋʋm 70 wall yʋʋm 80 bal ye. (Sɩng. 2:8, 15; Yɩɩl 90:10) Pipi raoã ne a pagã sã n da kellẽ n wilgẽ tɩ b nonga a Zeova n sak a naamã sẽn ka to wã, b ra pa na n tol n wa lʋɩ bãase, b pa na n kʋʋlẽ tɩ b gomd kũum meng ye.
2, 3. a) Wãn-wãn la Koɛɛg Soab sebrã bilgd kʋʋlmã sẽn wat ne yɛl ninsã? b) Yaa ãnda n kɩt tɩ ninsaalbã kiidẽ wã, la wãn-wãn la b na n kɩt tɩ yel-kãens fãa sa?
2 Koɛɛg Soab sebrã sak 12 wã bilgda kʋʋlmã sẽn wat ne tood nins n kõt ãdem-biisã sẽn yaa neb sẽn pa zems zãngã. (Karm-y Koɛɛg Soaba 12:1-7.) B maka sẽn kʋʋl-bã zoob-peendã ne ‘amand tɩɩg’ puudu, la b mak b sẽn pa ye tõe n kẽn sõma wã ne gãndaoog sẽn kuudi. B goma b nina nenem sẽn boogã yelle, n yeel tɩ yaa wa neb sẽn lɩkd roog võorẽ n pa tõe n yã ye. B goma b yẽna sẽn vi wã me yelle, n mak rẽ ne pagb sẽn da be neerẽ n werd n wa “bas werbo, b sẽn ka le waoogã yĩnga.”
3 Yaa vẽeneg tɩ Wẽnnaam da pa rat tɩ ninsaal wa kʋʋl t’a ninã nenem boog t’a yẽn vi, wall a wa kẽnd n kuudẽ ye. Sẽn paase, kũumã a Ãdem yel-wẽndã sẽn wa ne wã naaga “Sʋɩtãanã tʋʋma” sʋka. La Wẽnnaam Bi-riblã na n sãama tʋʋm kãens fãa ne Mesi Rĩungã maasem. Tʋm-tʋmd a Zã sɩd ra yeelame tɩ “Wẽnnaam Biigã waame n na n sãam Sʋɩtãanã tʋʋma.”—1 Zã 3:8.
D sẽn tʋll n tar laafɩ wã segdame
4. Bõe yĩng t’a Zeova Kaset rãmbã sẽn get b laafɩ wã yellã zemse, la bõe la b ningd b yamẽ?
4 Bãasã la kʋʋlmã namsda a Zeova nin-buiidã kẽer me wa sẽn namsd ãdem-biisã fãa wã. Dẽnd d sã n get d laafɩ wã yelle, d bee bʋʋm. D sã n tar laafɩ, pʋd n na n naf-d lame, bala d tʋll n dɩka ‘d pãngã fãa’ n maan a Zeova raabã. (Mark 12:30) La baa ne d sẽn dat yĩns keelmã, d segd n ninga d yamẽ tɩ d pa tõe n pa bẽ, la d pa tõe n pa kʋʋl me ye.
5. Biiblã kibay nins sẽn gomd Wẽnnaam neb sẽn da mao ne bãas yellã kõt-d-la sagl-bʋgo?
5 Biiblã gomda neb wʋsg sẽn zĩnd a Zeova nin-buiidã sʋk n da ka laafɩ yelle. Wala makre, a Epafordite. (Fil. 2:25-27) D tõe n sõdga tʋm-tʋmd a Poll tʋmd-n-ta-nongr a Tɩmote me. A Tɩmote pʋgã ra zabda naoor wʋsgo, t’a Poll sagl-a t’a yũ “rãam bilfu.” (1 Tɩm. 5:23) Tʋm-tʋmd a Poll mengã maoa ne toog sẽn da tar-a, hal t’a bool dẽ tɩ ‘yĩng gõaaga.’ Tõe tɩ ra yaa a ninã n da zabde, wall yaa komsem buud sẽn da pa tar tɩɩm wakat kãnga. (2 Kor. 12:7; Gal. 4:15; 6:11) A Poll toogã pʋgẽ, a pʋʋsa a Zeova ne a sũur fãa. (Karm-y 2 Korẽnt dãmba 12:8-10.) Wẽnnaam pa maan yel-solemd n tɩp a Poll “yĩng gõaagã” ye. A kõ-a-la pãng sẽn na yɩl t’a tõog tõogo. A Zeova sɩd paasa a Poll pãng wakat kãng a sẽn da wa n ka pãngã. D tõe n dɩka yam kiba-kãngã pʋgẽ.
Ra bas-y tɩ y laafɩ wã yell pak-y tɩ loog noor ye
6, 7. Bõe yĩng tɩ d pa segd n bas tɩ d laafɩ wã yell pak-d tɩ looge?
6 Wala y sẽn mi wã, a Zeova Kaset rãmbã sakda logtoɛɛmb sõngre, la tɩbsg buud a taaba. Réveillez-vous ! wã mi n tara sõss sẽn gomd laafɩ wã yelle. Yaa sɩd tɩ d pa pẽgd tɩbsg buud takɩ n wilgdẽ t’a sõmblem yɩɩda a taab ye. La d pẽgda logtoɛɛmbã sẽn sõngd-d ne tɩbsgã wʋsgo. D mii vẽeneg tɩ rũndã-rũndã, d nan pa tõe n tall yĩns keelem sẽn yaa sõma zãng ye. Rẽ n so tɩ d miẽ tɩ d pa segd n bas tɩ d laafɩ wã yell pak-d tɩ loog noor ye. D pa segd n maan wa neb nins sẽn pa tẽed tɩ dũni paalg n wate, tɩ kɩt tɩ b sakd tɩbsg buud fãa sẽn na yɩl n paam laafɩ wã ye. (Ef. 2:2, 12) D yãka yam n pa na n tol n sak tɩbsg sẽn kɩɩsd a Zeova noyã n bao n kogl d vɩɩmã ye. Bala, d kɩsa sɩd tɩ d sã n kell n sak a Zeova, d na n wa paama “vɩɩm hakɩkã” sẽn yaa vɩɩm sẽn kõn sa dũni paalgã pʋgẽ wã.—1 Tɩm. 6:12, 19; Kãab-paalgã Koe-noogo; 2 Pɩɛ. 3:13.
7 Bũmb a to me n kɩt tɩ d pa rat n bas tɩ d laafɩ wã yell pak-d tɩ loog noor ye. D sã n bas tɩ d laafɩ wã yell pak-d tɩ loog noore, tõe n kɩtame tɩ wa lebg tõnd mengã yell bal n pak-do. Tʋm-tʋmd a Poll lɛtr ning a sẽn tool Filip kiris-nebã pʋgẽ, a keoog-b-la yel-kãngã wɛɛngẽ. A yeel-b-la woto: “Bɩ yãmb ned kam fãa da ges a meng yell bal ye, bɩ y ges taab yell me.” (Fil. 2:4) Zemsame tɩ d ges d laafɩ wã yelle. La d sã n get d saam-biisã yell la d wilgdẽ tɩ neb nins d sẽn taasd ‘Wẽnnaam soolmã koe-noogã’ me yell pak-d lame, na n sõng-d lame tɩ d ra bas tɩ d yĩnsã laafɩ yell pak-d tɩ loog ye.—Mat. 24:14.
8. D sã n bas tɩ d laafɩ wã yell pak-d tɩ looge, tõe n wa kɩtame tɩ d maan bõe?
8 Kiris-ned sã n bas t’a laafɩ wã yell pak-a tɩ looge, wẽngã yaa tɩ tõe n wa kɩtame t’a lebs Rĩungã tʋʋm poorẽ. Leb n tõe n wa kɩtame tɩ lebg wa yẽ n mi tɩbsgo, rɩbd la tɩt nins sẽn yaa sõma wã, t’a rat n modgd a taabã tɩ b tũ a saglsã. Tʋm-tʋmd a Poll kõo saglg sẽn tõe n sõng-d tɩ d gil yel-kãngã. A yeela woto: “Sẽn na yɩl tɩ y tõog n bãng bũmb nins sẽn tar yõod n yɩɩdã, tɩ kɩt tɩ y kell n yɩ yɩlma, n da lub ned hal n tãag Kiristã raare.”—Fil. 1:10, NW.
Bõe yõod n yɩɩde?
9. Bõe n tar yõod n yɩɩd tɩ d pa segd n maan yam-kaalg ne-a, la bõe yĩnga?
9 D sã n baood n bãngd bũmb nins sẽn tar yõod n yɩɩdã, d na n wɩsgda d mens n moond koe-noogã la d zãmsd nebã Wẽnnaam Gomdã sẽn na yɩl tɩ b bao zood ne-a. Tʋʋm kãngã sẽn kõt sũ-noogã nafda tõnd la neb nins d sẽn sõngdã. (Yel. 17:22; 1 Tɩm. 4: 15, 16) Gũusg Gasgã la Réveillez-vous ! wã mi n gomda d saam-biis sẽn bẽed bã-toos yelle. Kiba-kãensã pʋsẽ, b mi n wilgda saam-biisã sẽn sõngd nebã tɩ b bãngd a Zeova la bõn-sõma nins a sẽn kãabã, tɩ kɩtdẽ tɩ bãmb mensã tɩ b tõogd toogo, wall b pʋd n yĩmd b toogã bilfu. *
10. Bõe yĩng tɩ d segd n gũus ne tɩbsg buud nins d sẽn yãkdã?
10 Bãasã tɩbsg wɛɛngẽ, kambã sẽn yãk b toogo, yaa kiris-ned fãa n segd n ‘tʋk a meng zɩɩbo,’ bala yẽ n segd n yãk tɩbsg buud ning a sẽn na n tũ n tɩbs a bãagã. (Gal. 6:5) La d pa segd n yĩm tɩ tɩbsg buud ning d sẽn na n yãkã tõe n ta a Zeova yam wall sãam a sũur ye. Wala d sẽn sakd Biiblã noy n pa reegd zɩɩmã, d segd n saka a noy nins sẽn gɩdg tɩbsg buud a taab sẽn tõe n sãam zood ning d sẽn tar ne a Zeova wã me. (Tʋʋ. 15:20) Tɩbsg buud kẽer wõnda wa b tũuda ne zĩn dãmb sõngre. Israɛll nebã sẽn da wa n bas a Zeova n teeg bagrã, a sũur sãama ne-b t’a yeel-b woto: “Ra le wa-y ne maand sẽn ka võor mam nengẽ ye. Mam kisa bãmb bug-zõosã yũug la y ki-paalgã ne y vʋʋsg raarã fãa. . . Mam pa tõe n kell n sak [tɩ y sokd bagba] la y tigimd taab n waoogd maam ye.” (Ezai 1:13, NW ) Vẽenega, pʋd n pa d sẽn wat n ka laafɩ la d na n maan bũmb sẽn tõe n kɩt t’a Zeova pa le kelg d pʋʋsgo, n sãam zood ning d sẽn tar ne-a wã ye.—Wiis. 3:44.
Y segd n gũusame
11, 12. D sã n wa rat n yãk tɩbsg buudu, wãn-wãn la d tõe n wilg tɩ d gũusdame?
11 D sã n wa bẽedẽ, d pa gũud t’a Zeova tɩp-d ne yel-solemd ye. La d tõe n pʋʋsame n kos t’a sõng-d tɩ d tall yam n bãng n yãk tɩbsg buud sẽn pa kɩɩsd Biiblã noyã. D bãagã sã n yaa kɛgenga, sẽn zems ne Yelbũn 15:22 wã sẽn yetã, yɩta sõma tɩ d tɩ yã logtoɛɛmb toor-toore. Verse kãng yeta woto: “Yẽsg sã n kaẽ, ned ka tõe n maan bũmb ye. La sagendb wʋsg sẽn beẽ, b tõogdame.” Tʋm-tʋmd a Poll da sagla a tẽed-n-taas tɩ b ‘gũus b mens dũniyã ka masã n maan tɩrga, la b sak Wẽnnaam.’—Tɩt 2:12.
12 Rũndã-rũndã, bãad rãmb wʋsg nengẽ lebga wa pag a ye sẽn da bẽed a Zezi wakatẽ wã t’a kibarã be Mark 52:25, 26 pʋgã. Be, d karemda woto: “Pag a yembre n da be be tɩ bãag tar-a hal yʋʋm piig la a yiib tɩ zɩɩm yita. Yẽ ra namsa wʋsgo tɩpdb wʋsg nengẽ tɩ b reeg a sẽn tara fãa. La a ka paam sõngr ye, la bãaga tara paasg bala.” A Zezi sigsa pagã bãagã la a maan-a nimbãan-zoeere. (Mark 5:27-34) Kiris-neb kẽer wa n dat n saka tɩpg buud sẽn kɩɩsd Wẽnnaam noyã, b sẽn da wa n pa le mi b sẽn na n maaneg ne b bãaga.
13, 14. a) Wãn-wãn la a Sʋɩtãan tõe n bẽd-d tɩbsg yãkr sasa n kɩt tɩ d kɩɩs Wẽnnaam? b) Bõe yĩng tɩ d segd n lak d mens ne sõngr buud fãa sẽn yit zĩn dãmb nengẽ?
13 A Sʋɩtãan na n tũnuga ne bũmba fãa n bao tɩ d bas tũudum hakɩkã. Wa a sẽn lubd neb kẽer ne yoobã la laogã nonglmã, a tũnugda ne tɩbsg nins sẽn tũud ne zĩn dãmbã sõngrã n lubd sãnda me. D pʋʋsda a Zeova n kotẽ t’a “fãag tõnd wẽng soaba nugẽ” la a kogl-d ne “yel-wẽnã fãa.” Woto yĩnga, d pa segd n maan bũmb baa a ye ne zĩn dãmbã sõngr t’a Sʋɩtãan wa paam n soog-d ye.—Mat. 6:13; Tɩt 2:14.
14 A Zeova ra gɩdga Israɛll nebã tɩ b ra bʋg bagr la b ra sok kinkir-bagb me ye. (Tõo. 18:10-12) A Poll sõdga ‘bagrã’ n naag “yĩngã ratem biisã” sʋka. (Gal. 5:19, 20) Sẽn paase, ‘bagbã’ pa na n kẽ a Zeova dũni paalgã pʋgẽ ye. (Wil. 21:8) Woto wilgda vẽeneg t’a Zeova kisa bũmb ninga fãa sẽn tũud ne zĩn dãmb sõngre.
Kɩt-y tɩ nebã bãng tɩ y maanda bũmba fãa ne zemsgo
15, 16. a) Bõe yĩng tɩ tɩbsg yãkr baood yam? b) La sagl-bʋs la pipi kiris-nebã taoor lʋɩtb sull da kõ-yã?
15 Sagls nins d sẽn wʋmã yĩnga, n paas sẽn mik tɩ tɩbsg kẽer tũuda ne zĩn dãmb sõngrã yĩnga, d yam sã n yood ne tɩbsg buudu, yɩta sõma tɩ d tõdge. La pa rat n yeel tɩ d sã n pa tõe n bilg ned sẽn maand to-to n tɩpd bãaga, a tɩpgã tũuda ne zĩn dãmb sõngr ye. Tõog n tɩpd d mens tɩ zemsd ne Biiblã noy baoodame tɩ d tall yam ning sẽn yit Wẽnnaam nengẽ wã, la d yɩ neb sẽn gũusdi. Yelbũn sak a 3 wã pʋgẽ, b sagend-d-la woto: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã. . . . M biiga, tall yam ne yẽesem n da sak tɩ b loog n bas-f ye. Bãmb na n yɩɩ vɩɩm f yĩnga. La b na n yɩɩ wa kĩnd fo kokorẽ.”—Yel. 3:5, 6, 21, 22.
16 Baa d sẽn maood n dat n tar laafɩ wã, d segd n gũusame tɩ bãag bɩ kʋʋlem zu-loɛɛg ra wa kɩt tɩ d kong Wẽnnaam lohorem ye. D laafɩ wã baoob la yɛl a taabã fãa wɛɛngẽ, d segd n tũu Biiblã noy tɩ yɩ vẽeneg nebã nifẽ tɩ d maanda bũmba fãa ne zemsgo. (Fil. 4:5) Pipi kiris-nebã taoor lʋɩtb sull da gʋlsa tigimsã lɛta n sagl-b tɩ b lak b mens ne bõn-naands pʋʋsgo, ne zɩɩm la ne yoobo. Lɛt-kãng pʋgẽ, b yeel-b-la vẽeneg me tɩ b sã n lak b mens ne bõn-kãense, b na n nafame. (Tʋʋ. 15:28, 29) Na n naf-b-la wãn to?
Wilgd-y tɩ y miime tɩ laafɩ zãng-zãngã nan watame
17. D sẽn tũud Biiblã noyã, wãn-wãn la d nafda?
17 Tõnd ned kam fãa segd n soka a meng woto: ‘Rẽ yĩnga, m nee vẽeneg tɩ m sẽn tũud Biiblã noor ning sẽn gɩdg zɩɩmã reegr la yoobã, nafd-m lame bɩ? D tags n ges d sẽn naf to-to me, d sẽn modg n lak d mens ne bũmb nins sẽn dẽgemd yĩngã la yamã. (2 Kor. 7:1) D sẽn tũud Biiblã sagls n get d mengã yɩlemd yellã, d ginda bãas wʋsgo. D sẽn pa mogd taba, n pa yũud sɩgaar la d pa rɩkd dorgã, d kogenda d laafɩ wã la zood ning d sẽn tar ne a Zeova wã me. Sẽn paase, d sẽn pa yão-be-neb rɩɩbã la rãamã wɛɛngẽ wã paasda d yĩnsã laafɩ. (Karm-y Yelbũna 23:20; Tɩt 2:2, 3.) Yaa sɩd tɩ d sã n vʋʋsdẽ tɩ sekdẽ la d maand bũmb sẽn wɩsgd d yĩngã me, tõe n sõng-d lame tɩ d tall keelem. La yaa d sã n tũud Biiblã noy la d nafd n yɩɩda, bala kɩtdame tɩ d tar yĩns laafɩ sõma la d tar zood sõma me ne Wẽnnaam.
18. Bõe n segd n pak tõnd n yɩɩge, la bãngr-goam bʋs sẽn gomd laafɩ wã yell pidsg la d gũuda?
18 Sẽn yɩɩd fãa, d segd n maoome tɩ d tẽebã ket n yaa kãn-kãe, la d manegd zood ning d sẽn tar ne d saasẽ Ba a Zeova wã, bala yaa yẽ n yaa “vɩɩm ninga sẽn be masã wã la vɩɩm ning sẽn watã” Kõta. (1 Tɩm. 4: 8; Yɩɩl 36:10) Wẽnnaam dũni paalgã sẽn watã pʋgẽ, d na n paamame tɩ b kõ-d d yel-wẽnã sugr a Zezi maoongã maasem yĩnga. Rẽ na n kɩtame tɩ d paam laafɩ sẽn yaa sõma zãnga, tɩ zood ning d sẽn tar ne a Zeova wã me paas hal sõma. A Zezi Kirist sẽn yaa Wẽnnaam Pebilã na n tall-d lame n kẽng “vɩɩm ko-bundum zĩigẽ.” Wẽnnaam na n ‘yẽesa d nintãma fãa.’ (Wil. 7:14-17; 22:1, 2) Wakat kãnga, pʋlem-no-kãngã me na n pidsame. Wẽnnaam pʋlmame tɩ “tẽnga ned ba a ye ka na n le yeel t’a ka laafɩ ye.”—Ezai 33:24.
19. D sã n pa basdẽ tɩ d laafɩ wã yell pak-d tɩ loor noore, d wilgdame tɩ d basa d yam ne bõe?
19 Tõnd kɩsa sɩd tɩ fãagrã ta n saame, la d gũuda wakat ning a Zeova sẽn na n kɩt tɩ bãase, kʋʋlem la kũum da ye zĩndã ne yãgbo. La nananda, d basa d yam tɩ d saasẽ Ba wã sẽn nong-dã na n sõngd-d lame tɩ d tõogd n maood ne toog buud fãa, bala, ‘a geta tõnd yelle.’ (1 Pɩɛ. 5:7) Woto yĩng bɩ d get d laafɩ wã yelle, la d ra yĩm abada me tɩ segdame tɩ d sẽn maand rẽ to-to wã zemsd ne Wẽnnaam Gomdã noy ye!
[Tẽngr note]
^ sull 9 Zĩ-gũbr sẽn sõdgd sõss a woto buud n be yʋʋmd 2003 bõn-bɩʋʋng kiuugã pipi raar Gũusg Gasgã ne moorã pʋgẽ, a seb-neng 31 wã.
D lebg n tẽege
• Yaa ãnd n kɩt tɩ bãasã beẽ wã, la ãnd n na n yols tõnd ne yel-wẽndã biis fãa?
• Baa d sẽn tog n ges d laafɩ wã yellã, d segd n gũusa d mens ne bõe?
• Bõe yĩng tɩ d segd n gũus ne tɩbsg buud nins d sẽn yãkdã?
• Laafɩ wã baoob wɛɛngẽ, wãn-wãn la Biiblã noy tũub tõe n naf-do?
[Zãmsgã sogsgã]
[Foto, seb-neng 24]
Wẽnnaam da pa rat tɩ ninsaalbã wa kʋʋl la b bẽ ye
[Foto, seb-neng 26]
Koe-moonegã kõta a Zeova Kaset rãmb nins sẽn ka laafɩ wã sũ-noogo