Wãn to la bũmb ning y sẽn bãng bug-tẽngã wɛɛngẽ wã na n sõng-yã?

NEB nins sẽn zãmsd b taabã tɩ bug-tẽngã yaa zĩig b sẽn namsdẽ nebã sãamda Wẽnnaam a Zeova yʋʋre. La yaa b bãng tɩ Biiblã wilgdame tɩ Wẽnnaam na n sãama nin-wẽnsã. (2 Tesalonik rãmba 1:6-9) Yaa sɩd tɩ Wẽnnaam sũur yikda yel-kɛg taoore, la a nonglmã n yɩɩde.

Wẽnnaam pa wẽnem soaba, sẽn dat bal n sɩbg nebã ye. A pʋd n yeta woto: “Mam ka rat tɩ nin-wẽng ki ye.” (Ezekɩɛll 18:23) Nin-wẽnsã kũum sã n pa noom Wẽnnaam, a na n yɩɩ wãn n sak tɩ b nams wakat sẽn ka sate?

Wẽnnaam yaa nonglem. (1 Zã 4:8) N-ye, ‘Zusoaba maanda nebã fãa neere, la a nimbãan-zoeerã tata a tʋʋmã fãa.’ (Yɩɩl Sõamyã 145:9) La Wẽnnaam datame tɩ tõnd me nong yẽ ne d sũur fãa.—Matɩe 22:35-38.

Yãmb tũuda Wẽnnaam y sẽn nong-a yĩng bɩ, bɩ yaa y sẽn zoet bugmã yĩnga?

Tũudum wʋsg sẽn wilgd tɩ ninsaal tara sɩɩg sẽn tʋgd n namsd bug-tẽngã kɩtame tɩ nebã zoet Wẽnnaam a na n wa sɩbg-b yĩnga. La ned sã n yaool n bãng Wẽnnaam sẽn sɩd yaa a soabã la a nong-a, a na n zoet-a-la a sẽn nong-a n pa rat n sãam a sũurã yĩnga. Yɩɩl Sõamyã 111:10 yeta woto: “Zusoabã zoees yaa yam sɩngre. Neb nins fãa sẽn zoet bãmbã tara yam sõma.” D segd n zoeta Wẽnnaam d sẽn nong-a ne d sũur fãa wã, lakae pa a sẽn na n wa sɩbg-d yĩng ye. Zoe-kãngã buud kɩtdame tɩ d maand a raabã d sẽn pa rat n maan sẽn pa tat a yamã yĩnga.

Ges-y pag a Kathleen sẽn tar yʋʋm 32 n da yũud dorgã sẽn bãng bug-tẽngã sẽn sɩd yaa bũmb ningã sẽn naf-a to-to. A vɩɩmã pʋgẽ, ra yaa reem, zaba, la yoobã n da pak-a, a ra kisa a mengã me. A yeela woto: “Mam da mi n maaga m yĩng n ges m yʋʋm-yend bi-puglã n yeel m meng woto: ‘Ges f sẽn maand f biigã bũmb ningã! B na n yõog-f-la bug-tẽng rẽ yĩnga.’ ” A Kathleen maoome n na n bas dorgã la a pa tõog ye. A yeela woto: “Mam da ratame n lebg nin-sõngo. La m da getame tɩ m vɩɩmã, la bũmb nins sẽn be dũniyã pʋgẽ wã fãa pa tar yamleoog ye. Ra wõnda bʋʋm sẽn na n kɩt tɩ m lebg nin-sõng kae ye.”

Daar a yembre, a Kathleen wa n sega a Zeova Kaset rãmba. Ad a sẽn togse: “B wilga maam tɩ bug-tẽng pa be tɩ b sɩd yõogd neb be ye. Biiblã verse nins b sẽn karem n wilg maamã sɩd wilgda rẽ vẽenega. Mam sẽn bãng tɩ b pa na n yõog-m bug-tẽngã, sɩd yiisa m yɩɩrã zãng fasɩ.” A bãngame me tɩ Wẽnnaam kãabame t’a na n wa menesa wẽnem buud fãa la a kɩt tɩ ninsaalbã vɩɩmd tẽngã zug wakat sẽn kõn sa. (Yɩɩl Sõamyã 37:10, 11, 29; Luk 23:43) A yeela woto:  “Masã mam saagdame n na n wa vɩɩmd arzãn pʋgẽ wakat sẽn kõn sa!”

Rẽ yĩnga a Kathleen ra na n tõog n basa dorgã, baa ne a sẽn pa le zoet a na n wa kẽ bugmẽ wã bɩ? A yeela woto: “Dorgã yamleoog sã n wa tar maam, m pʋʋsda Wẽnnaam a Zeova n kos sõngre. Mam tagsda a sẽn kis dorgã yelle, la m pa rat n sãam a sũur ye. La a leokda m pʋʋsgã.” (2 Korẽnt dãmba 7:1) A Kathleen sẽn zoet Wẽnnaam a sẽn pa rat n sãam a sũurã yĩng kɩtame t’a tõog n bas dorgã.

Vẽenega, d sã n nong Wẽnnaam la d zoet-a d sẽn pa rat n sãam a sũur yĩnga, la pa a sẽn na n wa nams-d bug-tẽng yĩnga, tõe n sõng-d lame tɩ d maan a raabã sẽn na yɩl n wa paam sũ-noog wakat sẽn kõn sa. Yɩɩl gʋlsdã sɩd yeela woto: “Bark bee neb nins fãa sẽn zoet Zusoabã n kẽnd bãmb soayã pʋsẽ wã zutu.”—Yɩɩl Sõamyã 128:1.

[Zĩ-gũbri/Foto rãmba, seb-neng a 9]

ÃND DÃMB LA B NA N VƲƲGE?

Biibl kẽer pʋsẽ, b lebga Géénna la Hadès sẽn yaa gɛrk gom-biis võor sẽn yaa toor-toorã tɩ “bug-tẽnga,” walla “kɩɩm-kulgu.” Biiblã pʋgẽ, Géénna wã wilgda sãoong zãng-zãnga, tɩ vʋʋgr kaẽ ye. La neb nins sẽn be Hadɛsã na n wa vʋʋgame.

A Zezi sẽn ki tɩ Wẽnnaam vʋʋg-a wã poore, tʋm-tʋmd a Pɩɛɛr wilga neb sẽn da kelgd-a tɩ b pa bas a Zezi “kɩɩm-kulg pʋgẽ ye.” (Tʋʋma 2:27, 31, 32; Yɩɩl Sõamyã 16:10) Yaa gɛrk gom-bil ning sẽn yaa Hadɛsã la b sẽn lebg verse kãngã pʋgẽ tɩ kɩɩm-kulgã. La a Zezi yaool n pa kẽng namsg zĩigẽ ye. Hadɛs yaa yaoogã. La pa a Zezi a ye bal la Wẽnnaam na n yiis Hadɛs pʋgẽ ye.

Vʋʋgrã wɛɛngẽ, Biiblã yeta woto: “Kũum ne kɩɩm-kulg basa kũum sẽn be bãmb pʋsẽ.” (Wilgri 20:13, 14) Kɩɩm-kulgã sẽn bas kũ-rãmbã wilgda Wẽnnaam sẽn na n wa vʋʋg neb nins a sẽn get tɩ b segda ne vʋʋgrã. (Zã 5:28, 29; Tʋʋma 24:15) Sasa kãnga, sɩd na n yɩɩ sũ-noogo, bala d neb nins sẽn maan kaalmã na n vʋʋgame n yi yãadẽ wã tɩ d yã-ba! Yaa Wẽnnaam a Zeova sẽn nong tõnd wʋsgã n na n maan dẽ.