Tagsd-y kũunã b sẽn kãab tõndã yelle

‘Mam dabda taoor n dat n paam kũunã.’—FIL. 3:14.

1. Kũun bʋg la b ra kãab tʋm-tʋmd a Polle?

TƲM-TƲMD a Poll b sẽn da boond me tɩ Tars raoã a Sollã ra yita nin-bɛd zakẽ. A ra paamame tɩ tõogã karen-saam kãseng a Gamaliɛll zãms-a a yaab-rãmbã tũudum noy neere. (Tʋʋ. 22:3) Woto kɩtame t’a Poll ra tõe n wa lebg nin-kãsenga, la a basa a tũudmã n lebg kiris-neda. Rẽ tɛka, yaa vɩɩm sẽn kõn sa kũun b sẽn kãab-a la a ra baooda. Kũun-kãng yaa wa paam n kẽng saasẽ, n tɩ naag n yɩ rĩm la maan-kʋʋd sẽn pa kiidi, Wẽnnaam Rĩungã pʋgẽ. Rĩung kãng na n zĩnda saasẽ n soog tẽngã gill sẽn na n lebg arzãna.—Mat. 6:10; Wil. 7:4; 20:6.

2, 3. Wãn-wãn la a Poll da get kũun ning a sẽn da na n wa tɩ reeg saasẽ wã?

² A Poll da nanda kũun kãngã hal wʋsgo, tɩ kɩt t’a yeel woto: “Bõn-kãensã sẽn da yaa mam yõodã, mam geelga bãmb wa bõn-zaalse Kirist yĩnga. Sɩda, mam geelgda bũmb fãa wa bõn-zaalse mam sẽn bãng Kirist Zezi mam Zusoaba sẽn yɩɩd bũmb fãa wã yĩnga. Yaa bãmb yĩng la mam bas bũmb fãa n geelgd bãmb wa sagdo.” (Fil. 3:7, 8) Neb wʋsg getame tɩ naam, arzɛka, tʋʋm-sõng la yʋʋr sẽn yi tara yõod wʋsgo. La a Poll sẽn wa n bãng a Zeova sẽn dat n maan bũmb ning n kõ ãdem-biisã, a geelga woto fãa wa sagdo.

³ A Poll sẽn bãng woto wã tɛka, lebga bãngd a Zeova ne Kiristã n paasdẽ n da tar yõod a nifẽ n yɩɩda. A Zezi ra goma rẽ yõodã yell n yeel woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) A Poll goam nins sẽn be Filip rãmb 3:14 wilgdame t’a sɩd da rata ne a sũur fãa n paam vɩɩm sẽn kõn sa wã. Be a yeela woto: “Mam dabda taoore n dat n paam Wẽnnaam [saasẽ] boolg kũuni Kirist Zezi maasem yĩnga.” Sɩd-sɩda, a Poll ra tagsda vɩɩm sẽn kõn sa wã kũun bɩ keoorã yelle. Rat n yeel t’a ra tagsda a sẽn na n wa paam n tɩ rɩ naam saasẽ, Wẽnnaam Rĩungã pʋgẽ wã yelle.

Vɩɩmd wakat sẽn kõn sa tẽngã zugu

4, 5. Kũun-bʋg la neb milyõ rãmb sẽn maand Wẽnnaam daabã rũndã-rũndã na n wa paame?

⁴ La neb wʋsg sẽn yãk yam n maand Wẽnnaam daabã na n wa paama kũun a to me sẽn yaa sõma hal wʋsgo. B na n wa paam n vɩɩmda wakat sẽn kõn sa Wẽnnaam dũni-paalgã pʋgẽ. (Yɩɩl 37:11, 29) A Zezi wilgame tɩ d sɩd tõe n wa paama rẽ n yeel woto: “Bark bee sũ-maasem dãmba zutu, tɩ bõe, bãmb na soog dũniyã.” (Mat. 5:5) Wa Yɩɩl Sõamyã 2:8 wã sẽn yetã, sẽn na n soog-a tẽngã n yɩɩd yaa a Zezi, bala yẽ n na n yɩ a naaba, tɩ neb 144 000 na n naag-a n dɩ naamã. (Dan. 7:13, 14, 22, 27) Neb nins b sẽn boond tɩ piisã na n sɩd vɩɩmda tẽngã zugu, n “soog” dũniyã b ‘sẽn segl b yĩng hal a naaneg wakatã.’ (Mat. 25:34, 46) La d kɩsa sɩd tɩ sẽn yaa Wẽnnaam n kãabe, la a “ka tõe n yag ziri” wã yĩnga, na n pidsame. (Tɩt 1:2) D sɩd tõe n kɩsa sɩd wa a Zozue tɩ Wẽnnaam kãabg fãa pidsdame. A ra yeela Israɛll nebã woto: “Yãmb Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas ba a ye tɩ vaal ye. Bãmb maana fãa, baa a ye ka pa ye.”—Zoz. 23:14.

⁵ Vɩɩmã sẽn na n yɩ to-to Wẽnnaam dũni-paalgã pʋgẽ wã pa na n wõneg rũndã-rũndã  vɩɩmã sẽn ka barkã ye. Na n yɩɩ toor fasɩ! Zaba, tʋʋm-beed buud toor-toore, naongo, yel-kɛga, bãas la kũum pa na n ye zĩnd ye. Sasa kãnga, nebã fãa na n talla keelem. B na n vɩɩmda tẽngã sẽn na n lebg arzãnã zugu. Ned pa tõe n bãng n bilg vɩɩmã sẽn na n tall bark to-to wã fãa ye. Hakɩka, daar fãa d na n kɩdemda sũ-noogo. Ad kũun a woto sɩd segda ne baoobo!

6, 7. a) Bõe la a Zezi maan n wilg bũmb nins fãa sẽn na n zĩnd Wẽnnaam dũni-paalgã pʋgẽ wã? b) Bõe la sẽn na n vʋʋg-bã tõe n wa paame?

⁶ A Zezi sẽn da wa n be tẽngã zugã, Wẽnnaam kõ-a-la a vʋʋsem sõngã t’a maan yel-soalem n wilg bũmb nins fãa sẽn na n zĩnd dũni-paalgã pʋgẽ wã. Wala makre, daar a yembre, a Zezi yeela rao sẽn da gãe n pa tõe n yik hal na maan yʋʋm 38 t’a yik n kẽne. La Biiblã yeelame tɩ raoã sɩd yikame n sɩng kẽna. (Karm-y Zã 5:5-9.) Daar a ye me, a Zezi sega rao a to sẽn “dog ne zõndo,” n puk a ninã. Neb n wa n sok raoã sogsg ned ning sẽn puk a ninã wɛɛngẽ, t’a leok-b woto: “Hal dũniyã sɩngre, b nan ka wʋm tɩ ned n puk ned sẽn dog ne zond nin ye. Dao kãngã sã n da ka yi Wẽnnaam nengẽ, bãmb da ka tõe n maan baa fɩ ye.” (Zã 9:1, 6, 7, 32, 33) A Zezi maana bõn-kãensã fãa ne Wẽnnaam pãnga. A sẽn kẽng zĩig ninsã fãa, a maana yel-soalem n maag neb nins sẽn da bẽedã.—Luk 9:11.

⁷ Pa bãad-rãmbã la koms-rãmbã bal la a Zezi ra sãoogd ye. A vʋʋga kũ-rãmb menga. Wala makre, yʋʋm 12 bi-pugl n da ki hal t’a roagdbã sũy ra sãam wʋsgo. La a Zezi goma ne kũumã n yeel woto: “Bi-pugla, mam yeta foo tɩ f yiki.” La biigã sɩd yikame! Yãmb we n tags n ges biigã roagdbã la neb nins fãa sẽn zĩnd be wã manesem sẽn yɩ to-to. (Karm-y Mark 5:38-42.) Wẽnnaam dũni-paalgã pʋgẽ, neb milyaar dãmb n na n vʋʋge, tɩ d sũy na n yɩ noog wʋsgo. Biiblã yeelame tɩ nin-tɩrse, la neb sẽn pa tɩrs la b na n vʋʋge. (Tʋʋ. 24:15; Zã 5:28, 29) B na n kɩtame tɩ nin-kãensã lebs n vɩɩmde. B tõe n wa paam n vɩɩmda wakat sẽn kõn sa menga.

8, 9. a) Kirist naamã sẽn na n kaoos yʋʋm tusrã sasa, ãdem-biisã na n paama b mens fasɩ ne bõe? b) Wãn-wãn la b na n kao sẽn na n vʋʋg-bã bʋʋdo?

⁸ Neb nins b sẽn na n vʋʋgã tõeeme n pa ye ki ye. B pa na n sɩbg-b yel-wẽn nins b sẽn maan nand tɩ b ki wã yĩng ye. (Rom 6:7) Kiristã naam sẽn na n kaoos yʋʋm tusrã sasa, b na n kɩtame tɩ neb nins sẽn be Rĩungã poorẽ wã fãa rɩ a maoongã nafa. Rẽ na n kɩtame tɩ b lebg neb sẽn pa tar yel-wẽnde, la b wa paam b mens fasɩ ne a Ãdem yel-wẽndã sẽn da wa ne tood ninsã. (Rom 8:21) A Zeova “na n sãama kũum wakat sẽn ka sɛta. Zusoabã sẽn yaa soaala na n yẽesa nintãm nins fãa sẽn be neba ninẽ wã.” (Ezai 25:8) Wẽnnaam Gomdã leb n yeelame tɩ sɛb la b na n lake, tɩ rẽ wilgdẽ tɩ b na n zãmsa neb nins sẽn na n vɩɩmd wakat kãngã bõn-paalse. (Wil. 20:12) Dẽnd b sã n wa manegd tẽngã t’a lebgd arzãnã, ‘dũniyã rãmb na n zãmsa tɩrlem.’—Ezai 26:9.

⁹ B na n kaoa neb nins sẽn vʋʋgã bʋʋdo, la pa na n yɩ yel-wẽn nins a Ãdem beegrã sẽn da kɩt tɩ b maanã poorẽ ye. B na n gesa b mensã sẽn na n yãk yam n maan bũmb nins b vʋʋgrã poorã n kao bʋʋdã. Wilgri 20:12 wã yeela woto: “Kũum bʋʋd kaoome sẽn zems bãmb tʋʋma sẽn gʋls seb-kãens pʋsã.” Woto sɩd wilgdame tɩ yaa bũmb nins b sẽn na n maan b vʋʋgrã poorã. Ad woto wilgda a Zeova tɩrlmã, a nimbãan-zoeerã la a nonglmã! Sẽn paase, nebã na n yĩma tood nins fãa sẽn da tar-b pĩnd dũniyã pʋgẽ wã, “b ka na n le tẽeg bũmb nins sẽn da zĩnd pĩnda yell ye, b ka na n le tags b yell ye.” (Ezai 65:17) Bõn-paals nins b sẽn na n zãmsã, n paas b vɩɩmã sẽn na n yɩ noog to-to wã na n kɩtame tɩ b pĩnd toodã ra ye sãamd b sũyã ye. B pa na n tol n tags b yell yɛs ye. (Wil. 21:4) Neb kʋʋngã sẽn na n põs Armagedõ sasa wã me vɩɩm na n yɩɩ woto.—Wil. 7:9, 10, 14.

10. a) Wẽnnaam dũni-paalgã pʋgẽ, vɩɩmã na n yɩɩ wãn-wãna? b) Bõe la y tõe n maan tɩ sõng-y tɩ y ket n tagsd kũunã yell wakat fãa?

 ¹⁰ Wẽnnaam dũni-paalgã pʋgẽ, ned pa na n ye bẽ wall a ki ye. Biiblã yeelame tɩ wakat kãnga, “tẽnga ned ba a ye ka na n le yeel t’a ka laafɩ ye.” (Ezai 33:24) B na n yikda ne laafɩ tɩ b sũy noome, b sẽn mi tɩ na n kell n yɩɩ woto daar fãa wã yĩnga. Ned kam fãa na n miime t’a taabã nong-a lame la b rat a neere. Sẽn paase, ned kam fãa na n tʋmda tʋʋm a sẽn nonge. Hakɩka, vɩɩm a woto sɩd segda ne baoobo! Pʋd-y n lak-y Biiblã n karem kãab-nood-kãensã sẽn be Ezai 33:24 ne sak 35:5-7 wã. Y sã n tagsd y vɩɩmã sẽn na n yɩ to-to sasa kãngã, tõe n sõng-y lame tɩ y ket n tagsd kũunã yell wakat fãa.

Neb sẽn yĩm kũunã yelle

11. Togs-y-yã a Salomo sẽn maan bũmb ning a naamã sɩngrẽ wã.

¹¹ D sẽn bãng kũun ning d sẽn tõe n wa paamã, segdame tɩ d mao n tagsd a yell wakat fãa, sã n pa rẽ, d tõe n wa yĩmame. Wala makre, pĩnd wẽndẽ, a Salomo sẽn wa n lebg Israɛll rĩmã, a sika a meng n pʋʋs Wẽnnaam n kos t’a kõ-a yam la bãngr tɩ sõng-a t’a soog a nin-buiidã wa Wẽnnaam sẽn datã. (Karm-y 1 Rĩm dãmba 3:6-12.) Biiblã pʋgẽ, b yeelame t’a Salomo sẽn kos woto wã yĩnga, ‘Wẽnnaam kõ-a-la yam ne bãngr la yẽesem wʋsgo.’ Sɩd me, “a Salomo yam da yɩɩda yam dãmbã fãa sẽn be yaangã ne Ezipt yam dãmbã me.”—1 Rĩm 5:9-12.

12. Sagl-bʋg la a Zeova ra kõ ned ning fãa sẽn lebg rĩm Israɛll nebã sʋka?

¹² La a Zeova ra yeela Israɛll nebã tɩ b rĩm “ka tog n tall wiid wʋsgo,” la a “ka tog n peeg pagb wʋsg tɩ b wa kɩt t’a bʋdg ye.” (Tõo. 17:14-17) Rĩmã sã n bao n na n paas a wiidã sõore, a wilgdame tɩ yaa a sodaasã la a teeg-yã, la tɩ pa a Zeova la a teegẽ t’a koglg a tẽngã ye. La a sã n bao n na n paas a pagbã  sõore, a tõe n wa rɩgsa pagb tẽn-yagsã sẽn tũud wẽnnaam dãmb a taabã sʋka, tɩ b kɩt t’a bʋdg n bas tũudum hakɩkã sẽn yaa a Zeova tũudmã.

13. Bõe n kɩt t’a Salomo yĩm a Zeova yelle?

¹³ A Salomo pa tũ sagl-kãngã ye. A maana bũmb nins fãa a Zeova sẽn yeel rĩm dãmbã tɩ b ra maanã bal kɛpɩ. A wa n talla wiid tusa ne b wed-rʋʋdba. (1 Rĩm 5:6) La a wa n talla pagb 700 la roalb 300 me, tɩ b wʋsg ra yaa Israɛll tẽn-yagsã kamba. La pʋg-kãensã ‘tõog n wẽnemda a yamã t’a tũ buud a taab wẽnnaam dãmba, t’a yam ka le be ne [a Zeova] ye.’ A Salomo tũu a pagbã wẽnnaam dãmbã n beeg a Zeova. Rẽ kɩtame t’a Zeova yeel-a t’a “na n deega [a] rĩungã” n kõ a tʋm-tʋmda.—1 Rĩm 11:1-6, 11.

14. A Salomo sẽn kɩɩs Wẽnnaam tɩ wa kɩt tɩ nin-buiidã me kɩɩsã, baasa wãna?

¹⁴ A Salomo wa n yĩma fasɩ tɩ yaa Wẽnnaam n kɩt t’a lebg rĩma. Bu-zẽmsã wẽnnaam dãmbã tũub wa n kɩtame t’a tolg n bas a Zeova. La bilf-bilfã, nin-buiidã fãa wa n basa Wẽnnaam tũubu, tɩ baas ne b tẽngã sãoong yʋʋmd 607 soabã sẽn deng a Zezi rogmã. Baa Zʋɩf rãmbã sẽn wa n lebs n sɩng a Zeova tũubã, yʋʋm wʋsg poore, b manesmã sẽn da ket n yaa to-to wã yĩng kɩtame t’a Zezi yeel-b woto: “B na n deega Wẽnnaam soolem yãmb nengẽ n kõ buud ninga sẽn na n maan tʋʋm sẽn zemse.” La sɩd wa n baasa woto. A Zezi yeel-b lame: “Gese, b na n basa fo roog ne foo zaalem.” (Mat. 21:43; 23:37, 38) B sẽn bas Wẽnnaamã yĩnga, kɩtame t’a bas-b tɩ b ye pa a nin-buiid ye. Yʋʋmd 70 soabã pʋgẽ, Rom sodaasã wa n sãama Zerizalɛm ne a wẽnd-doogã, la b yõg zʋɩf rãmb wʋsg n tɩ maan yembse.

15. Sõdg-y neb kẽer sẽn pa kell n tags bũmb nins sẽn tar yõod n yɩɩdã yelle.

¹⁵ A Zida Iskariot yɩɩ a Zezi tʋm-tʋmdb 12 wã nin-yende. A ra kelgda bõn-sõma nins a Zezi sẽn da wilgd nebã la a yãt yel-soalem nins a sẽn da maand ne Wẽnnaam vʋʋsem sõngã maasmã. La a Zida pa bas tɩ woto fãa kẽe a sũurã sõma ye. Yẽ n da zãad b ligdã korgo, la a sẽn yaa wagdrã, a ra “zuuda bãmb sẽn suiid a pʋgẽ wã.” (Zã 12:6) A bõn-zoeerã wa n paama pãnga, hal t’a kẽng maan-kʋʋdbã kãsem dãmb nengẽ, n tɩ zems ne-b n na n zãmb a Zezi n kõ-b la a reeg wanzuri ligd 30. (Mat. 26:14-16) Ned a to me sẽn yĩm bũmb nins sẽn tar yõod n yɩɩdã yell yaa tʋm-tʋmd a Poll tũud-n-taag a Demas. Yẽ me pa gũus a meng ye. A Poll goma a yell n yeel woto: “A Demas basa maam n kẽng Tesalonik a sẽn nong dũniyã yĩnga.”—2 Tɩm. 4:10; karm-y Yelbũna 4:23.

Sagls tõnd ned kam fãa yĩnga

16, 17. a) Bõe la a Sʋɩtãan tar n zabd ne tõndo? b) La bõe n na n sõng-d t’a ra tõog-do?

¹⁶ Wẽnnaam nin-buiidã fãa segd n mao n dɩka yam Biiblã kibay pʋsẽ, bala Biiblã meng yet-d-la woto: “Bõn-kãens maana bãmb tɩ yɩ mamsgo, la bãmb gʋlsa tõnd saglg yĩnga, tõnd sẽn be dũniyã sɛɛb wakatã yĩnga.” (1 Kor. 10:11) Rũndã-rũndã, d vɩya a Sʋɩtãan dũniyã yaoolem wakate.—2 Tɩm. 3:1, 13.

¹⁷ A Sʋɩtãan sẽn yaa “dũni kãngã wẽnnaamã” miime t’a ‘wakatã yaa bilfu.’ (2 Kor. 4:4; Wil. 12:12) A na n maana a sẽn tõe fãa n bao tɩ neb nins sẽn tũud a Zeova wã kɩɩs a noyã. Yaa a Sʋɩtãan n so dũni kãngã ne a kiba-kɩtbã fãa n tũnugd ne-b n zabd ne-do. La ne rẽ fãa, Wẽnnaam nin-buiidã tara sõngr sẽn yɩɩd rẽ. Wẽnnaam kõt-b-la pãngã. (2 Kor. 4:7) D tõe n teega pãn-kãngã Wẽnnaam sẽn kõt-dã n tõog t’a Sʋɩtãan  da tol n kʋɩɩb-d ye. Rẽ n so tɩ b sagend-d tɩ d pʋʋsd wakat fãa n kɩs sɩd t’a Zeova kõta vʋʋsem sõngã neb nins sẽn kot-a wã.—Luk 11:13.

18. Bõe la d pa segd n yĩm dũni kãngã wɛɛngẽ?

¹⁸ D sẽn mi me t’a Sʋɩtãan dũniyã na n menema ka la bilfu, la d miẽ tɩ kiris-nebã na n põsame wã, kengda d raoodo. Biiblã yeelame tɩ “dũniyã ne a ratem wẽngã me loogdame, la ned ninga sẽn maand Wẽnnaam daab paada wakat sẽn ka sɛta.” (1 Zã 2:17) Woto yĩnga, ned sã n tags tɩ bũmb n be dũniyã pʋgẽ n tar yõod n yɩɩd zood ning a sẽn tar ne a Zeova wã, sɩd yaa kaeto! A Sʋɩtãan dũniyã yaa wa koom koglg sẽn bõrd ne neba, la a Zeova tʋma “koom koglg a to” n na n fãag a nebã. Koom kogl-kãng yaa tigingã. A nebã sẽn gũud dũni-paalgã yĩnga, b tõe n kɩsa sɩd t’a gom-kãensã na n pidsame. A yeela woto: “Tʋʋm-wẽns maandbã na n sãamame la neb nins sẽn tẽed Zusoabã na n sooga dũniyã.” (Yɩɩl 37:9) Woto yĩng bɩ y ket n tagsd kũunã b sẽn kãab tõndã yell wakat fãa!

Y tẽrame bɩ?

• Wãn to la a Poll ra get kũun ning b sẽn kãab-a wã?

• Bõe la b na n ges n kao nebã bʋʋd tɩ b yaool n paam n vɩɩmd wakat sẽn kõn sa tẽngã zugu?

• Bõe la d segd n maan masã?

[Zãmsgã sogsgã]

[Foto, seb-neng 13]

Rẽ yĩnga y sã n wa karemd kibar Biiblã pʋgẽ, y mamsda y kũunã y yamẽ bɩ?