Yãmb mii Wẽnnaam bɩ?

B SàN sok yãmb woto y na n leokame tɩ bõe? Nebã tagsdame tɩ Wẽnnaam beeme, n zoet-a, la b pa mi bũmb wʋsg a zug ye. Yãmb sã n tẽed tɩ Wẽnnaam beeme, wãn to la y na n leok sogsg nins sẽn pʋgdã?

1. Wẽnnaam bee zĩig fãa bɩ?

2. Wẽnnaam tara yʋʋr bɩ?

3. A Zezi yaa Wẽnnaam sẽn ka to soabã bɩ?

4. Mam yell paka Wẽnnaam bɩ?

5. Yaa tũudmã fãa n tat Wẽnnaam yam bɩ?

Yãmb sã n sok nebã sogs-kãensã, y na n paama leoor buud toor-toore. Dẽnd nebã sẽn tar tags-kɛg Wẽnnaam zugã pa ling tõnd ye.

Bõe yĩng tɩ d segd n bao n bãng sogs-kãensã leoore?

A Zezi Kirist sẽn wa n gomd ne pag a ye bulg noore, a wilgame tɩ tara yõod tɩ d bao n bãng Wẽnnaam sẽn yaa a soaba. Pagã ra yita Samari, la a sak n deegame t’a Zezi yaa Wẽnnaam no-rɛɛsa.  La bũmb võor la a ra pa wʋmde. A Zezi ne yẽ ra pa be tũudum a ye pʋgẽ ye. A sẽn wilg a tagsgã, a Zezi yeel-a-la vẽeneg woto: “Yãmb Samari rãmba waoogda yãmb sẽn ka mi.” (Zã 4:19-22) Vẽenega, a Zezi ra rat n wilgame tɩ pa neb nins fãa sẽn tar tũudmã n sɩd mi Wẽnnaam ye.

La rẽ yĩnga a Zezi sẽn yeel bũmb ningã rat n yeelame tɩ ned baa a ye pa tõe n bãng Wẽnnaam sẽn yaa a soab bɩ? Ayo. A Zezi paasa woto: “Wẽnnaam waoogdb [hakɩkã] na n waooga Ba a Wẽnnaam ne b sɩɩse la ne sɩda. Tɩ bõe, yaa neb a woto la Wẽnnaam baood tɩ b waoog bãmba.” (Zã 4:23) Yãmb me waoogda Wẽnnaam ne ‘sɩɩs la ne sɩd’ bɩ?

Tara yõod wʋsg tɩ y bao n bãng sok-kãngã leoore. Bõe yĩnga? A Zezi wilga a pʋʋsg pʋgẽ tɩ bãngr hakɩkã yaa tɩlae. A yeela woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) Yaa d sẽn na n bãng Wẽnnaam sẽn sɩd yaa a soabã n na n kɩt tɩ d paam vɩɩm beoog daare.

Rẽ yĩnga d sɩd tõe n bãnga Wẽnnaam sẽn sɩd yaa a soab bɩ? N-ye. La wãn to la d tõe n bãng-a? A Zezi yeela yẽ mengã wɛɛngẽ woto: “Mam yaa sore la sɩda la vɩɩm. Ned ka tõe n ta m Ba nengẽ a sã n ka mam maasem yĩng ye.” (Zã 14:6) A yeela woto me: “Ned ba a yembr ka mi Ba sẽn ya a soab ye, sã n ka Biiga bala, la Biiga sẽn dat n vẽneg ned ninga ne bãmba.”—Luk 10:22.

Yaa Wẽnnaam biig a Zezi Kirist sẽn zãms nebã bũmb ningã pʋgẽ la d bãngd Wẽnnaam sẽn sɩd yaa a soabã. A Zezi yeela woto: “Yãmb sã n tall mam goama, yãmb yaa mam karen-biis hakɩka. Yãmb na bãng sɩda, la sɩda na kõ yãmb lohorem.”—Zã 8:31, 32.

Wãn to la a Zezi ra na n leok sogs a nu wã sẽn be sõsgã sɩngrẽ wã?

[Foto, seb-neng a 4]

Yãmb tũuda Wẽnnaam y sẽn pa mi sõma bɩ?