Yaa tũudmã fãa n tat Wẽnnaam yam bɩ?

Nebã sẽn yete:

▪ “Tũudmã fãa yaa soay sẽn debd Wẽnnaam nengẽ.”

▪ “F sẽn tẽed bũmb ninsã pa pak ye. F we n yaa pʋ-peelem soaba.”

A Zezi yeelame tɩ bõe?

▪ “Bɩ y kẽ zak noor sẽn yaa sẽka. Tɩ bõe, zak noor sẽn yaa yalenga la sor sẽn yaa yalenga rabda sãoong zĩiga, la neb wʋsg kẽeda beenẽ. La zak noor sẽn yaa sẽka la sor sẽn yaa bãanega rabda vɩɩm zĩigẽ, la a yãtb yaa bilfu.” (Matɩe 7:13, 14) A Zezi ra pa tagsd tɩ tũudmã fãa tata Wẽnnaam yam ye.

▪ “Baraare neb wʋsg na n yeela maam yaa: Zusoaba, Zusoaba, tõnd da ka togs bãngr-goam ne yãmb yʋʋre, la d rig zĩn-dãmb ne yãmb yʋʋre, la d maan bõn-bãn wʋsg ne yãmb yʋʋr sɩda? La mam na n yeela bãmb vẽeneg yaa: Mam ka mi yãmb baa bilf ye. Bɩ y bas maam, yãmb tʋʋm wẽns maandba.” (Matɩe 7:22, 23) A Zezi pa reegd neb nins fãa sẽn yet ne noor bal tɩ b tũud-a lame wã ye.

NEB wʋsg bee tũudum pʋsẽ, la b ket n tũuda b mens tagsg la rog-n-migsi. La sã n mik tɩ bõn-kãens pa zems ne Biiblã sẽn yetã? A Zezi sẽn wa n gomd ne tũudmã taoor dãmbã, a wilgame tɩ rog-n-migsã b sẽn da tũudã pa sõma ye. A yeel-b-la woto: “Ne yãmb minungã yãmb maanda Wẽnnaam tõogã tɩ lebg zaalem.” A paasame tɩ Wẽnnaam yeta woto: “Nin-kãensã waoogda maam ne no-bɩmse, la b sũurã zãra ne maam. Bãmb sẽn waoogd maama yaa zaalem, bãmb zãmsda neba ninsaalb tõod bala.”—Matɩe 15:1-9; Ezai 29:13.

Pa d sẽn tẽed bũmb ninsã bal n tar yõod ye. D segd n talla manesem sõngo. Neb nins sẽn yet ne noor bal tɩ b tũuda Wẽnnaamã wɛɛngẽ, Biiblã yeta woto: “B yetame tɩ b mii Wẽnnaam, la ne bãmb tʋʋma bãmb kɩɩsda Wẽnnaam.” (Tɩt 1:16) Biiblã wilgdame tɩ rũndã-rũndã nebã yaa neb “sẽn nong dũniyã sũ-noog n yɩɩd Wẽnnaam. Bãmb wẽnda wa b sẽn sakd Wẽnnaam, la b yaool n kɩɩsda bãmb pãnga. Lak ne bãmb dãmba.”—2 Tɩmote 3:4, 5.

D segd n yɩɩ pʋ-peelem dãmba. La pa rẽ bal ye. Bala ned tõe n yaa pʋ-peelem soaba, t’a sẽn tẽed bũmb ninsã yaool n yaa ziri. Rẽ n so tɩ d segd n bao n bãng Wẽnnaam sẽn sɩd yaa a soabã. (Rom dãmba 10:2, 3) D sã n baood n bãngd Wẽnnaam la d tũud Biiblã sẽn yetã, d na n taa a yam wakat fãa. (Matɩe 7:21) Sẽn na yɩl tɩ d sẽn tũud Wẽnnaam to-to wã ta a yam, d segd n talla yam sõngo, d sẽn tẽed bũmb ninsã segd n zemsa ne Biiblã sẽn yetã, la d tall manesem sõngo. Tall manesem sõng rat n yeelame tɩ d maand Wẽnnaam daabã daar fãa.—1 Zã 2:17.

Y sã n dat n bãng Biiblã sẽn yet bũmb ning Wẽnnaam zug n paase, bɩ y kos a Zeova Kaset rãmbã tɩ b wa zãms-y Biiblã y yir zaalem.

[Foto, seb-neng a 9]

Tũudum sã n tat Wẽnnaam yam, a nebã pʋs pɛɛlame, b tẽeda Biiblã, b manesmã yaa sõma