Bũmb nins a Zeova sẽn naanã wilgda a yamã sẽn ka koakã
Bũmb nins a Zeova sẽn naanã wilgda a yamã sẽn ka koakã
“Bũmb nins sẽn naan hal dũniyã naanegã wakatã pukda Wẽnnaam zemsg nin sẽn ka tõe n yã ye.”—ROM 1:20.
1. Neb nins b sẽn get rũndã-rũndã wa bãngdbã sagls maanda nebã bõe?
RŨNDÃ-RŨNDÃ, b geta neb wʋsg wa yam dãmba, la naoor wʋsgo, nin-kãensã yam yaool n paoodame. B boonda neb kẽer tɩ yam dãmba, b sẽn tar bãngr yĩng bala. La dũniyã neb nins b sẽn get wa bãngdbã yaool n pa tõe n sõng nebã tɩ b bãng b vɩɩmã võor ye. Neb nins sẽn tũud nin-kãensã saglsã lebgda wa “kamb sẽn ka yam sẽn sakd kareng buud toor-toor wa sobg sẽn dɩkd bũmbu, la nebã belgre la b sɩlem wẽngã b sẽn baood weer tɩ belg nebã.”—Ef. 4:14.
2, 3. a) Bõe yĩng tɩ yaa a Zeova n ‘yaa yam soab n ka to’? b) Wãn to la yam ning sẽn yit Wẽnnaam nengẽ wã yaa toor ne ãdem-biisã yam?
2 Ad neb nins sẽn paamd yam hakɩkã sẽn yit Wẽnnaam a Zeova nengẽ wã sɩd yaa toor fasɩ ne nin-kãensã! Biiblã yet-d lame t’a Zeova n “yaa yam soab n ka to.” (Rom 16:27) Sɩd me, yaa yẽ bal n mi ãndũniyã bũmba fãa sẽn naan ne bũmb ninsã hal sõma, la a leb n mi b naanegã wakat me. Bãngdbã sak n deegame tɩ ãndũniyã bũmba fãa tũuda noyã, la b tikd no-kãens zut n maand vaeesg toor-toore. La yaool n yaa a Zeova n lugl no-kãens fãa. Rẽ kɩtame tɩ bõn-kãsems nins ãdem-biisã sẽn maandã fãa pa yɛɛsd-a, tɩ b sẽn get-b rãmb wa yam dãmbã me tags-bɛd pa yɛɛsd-a ye. “Dũni kãngã yam yaa yalemd ne Wẽnnaam.”—1 Kor. 3:19.
3 Biiblã yeta tõnd t’a Zeova ‘kõta a nin-buiidã yam.’ (Yel. 2:6) Yam ning Wẽnnaam sẽn kõtã yaa toor fasɩ ne ãdem-biisã yam sẽn ka yõodã. Yam ning sẽn yit Wẽnnaam nengẽ wã kɩtdame tɩ ned tõogd n wʋmd yɛlã võore, la a rɩkd a bãngrã n tʋmd n welgd yel-kãens tɩ zemsdẽ. (Karm-y Zak 3:17.) Tʋm-tʋmd a Poll da gom a Zeova yam sẽn ka koakã yell n pẽg-a hal wʋsgo. A yeela woto: “Ges Wẽnnaam yam la b bãngr sẽn ka tɛka. Ned ka tõe n bãng bãmb yam yãkra ye, la a ka tõe n fees n bãng bãmb sẽn maand bũmb ninsa me ye.” (Rom 11:33) A Zeova yamã sẽn ka koakã yĩnga, d kɩsa sɩd tɩ noy nins a sẽn kõ tõndã fãa be d nafr yĩnga. Pʋd n yaa a Zeova bal n mi bũmb ning sẽn tõe n kõ tõnd sũ-noogã n yɩɩda.—Yel. 3:5, 6.
A Zezi yaa “tʋʋm-mita”
4. Bõe la d tõe n maan tɩ d sõng-d tɩ d bãng t’a Zeova yamã ka koaka?
4 Bũmb nins a Zeova sẽn naanã fãa wilgda a yamã ne a pãn-tõodã toor-toorã sẽn ka be mak-n-taarã vẽenega. (Karm-y Rom dãmb 1:20.) Bõn-kãsemsã la bõn-kɩdsã fãa a Zeova sẽn naanã wilgda a sẽn yaa Wẽnnaam ning buudã. D sẽn gesẽ fãa, yaa saasã tɩ yaa tẽngã zug ka, d yãta kaset toor-toor sẽn wilgd vẽeneg tɩ naandã yam sɩd ka koaka, la t’a nong-d lame me. D sã n getẽ la d bʋgsd bũmb nins a Zeova sẽn naanã zutu, sõngd-d lame tɩ d bãngd-a n paasdẽ.—Yɩɩl 19:2; Ezai 40:26.
5, 6. a) Ãndũniyã naaneg sasa, ãnd n zĩnd a Zeova sɛɛgẽ n sõng-a? b) Bõe la d na n ges masã, la bõe yĩnga?
5 A Zeova ra pa a yembr a sẽn wa n ‘naand saasã la tẽngã’ ye. (Sɩng. 1:1) Biiblã wilgdame tɩ nand tɩ Wẽnnaam naan bũmb nins fãa nif sẽn ne wã, a reng n naana malɛka. Rẽ poore, a naana “bũmb fãa” ne malɛk kãng maasem. Malɛk kãng la b sẽn boond tɩ Wẽnnaam bi-ribl-yende, la “bi-kãseng sẽn yɩɩd bõn-naandsa fãa” wã. Yaa yẽ la sẽn wa n zĩnd tẽng zug ka tɩ b bool-a t’a Zezi wã. (Kol. 1:15-17) A Zezi me yaa yam-kãseng soab wa a Zeova. Sɩd me, Yelbũn sak a 8 wã pʋgẽ, b bilg-a-la wa yam sẽn gomde. Sak-kãng pʋgẽ me, b boola a Zezi tɩ Wẽnnaam “tʋʋm-mita.”—Yel. 8:12, 22-31.
6 Dẽnd bũmb nins fãa tõnd sẽn tõe n yã ne nifã wilgda vẽeneg t’a Zeova ne a tʋʋm-mit a Zezi yaa yam-kãsems rãmba. D tõe n dɩka yam wʋsg bõn-kãens fãa pʋsẽ. Bɩ d gom bõn-vɩɩlɩ a naas yelle. B bilg-b-la Yelbũn 30:24-28 wã pʋgẽ n yeel tɩ b “tara yam wʋsgo.” *
Gũur sẽn tʋmd wʋsgã kõt-d-la saglga
7, 8. Bõe la gũur maand tɩ sek pẽgre?
7 D sã n ges tẽngã bõn-vɩɩlɩ, la baa bõn-vɩɩlɩ nins sẽn paood wʋsgã sẽn yaa to-to la b sẽn tʋmd tʋʋm ninsã, d tõe n dɩka yam. Bõn-kɩds kãens sʋka, d tõe n sõdga gũuri. Wẽnnaam naana gũur t’a tar yam.—Karm-y Yelbũn 30:24, 25.
8 Vaeesdbã kẽer tagsdame tɩ gũyã sẽn be dũniyã gill zugã sõor yɩɩda ninsaalbã sõor naoor 200 000, la b fãa tʋmda wʋsg tẽn-gãongã zug la a pʋgẽ. Gũyã vɩ sul-sula, la sull fãa pʋgẽ la bala, b yãta gũy bugs a tã: Yaa gũur yaaba, gũ-raado, la tʋm-tʋmdba. Sullã pʋgẽ, gũur buk fãa tara tʋʋmd a sẽn segd n tʋm b fãa neer yĩnga. Gũur buud a yembr n be tɩ vaeesdbã boond-a tɩ koaad sẽn tar minim wʋsgo. Bõn-vɩɩl-kãngã paoodame, la a yaool n mii tẽngã põnegr hal sõma. A leb n mi a sẽn na n sel gũud la a ges a yell to-to tɩ yi wʋsgo. Vaeesdbã mikame tɩ gũ-kãngã sẽn tar koob minimã kooda gũudã tɩ zemsd b sull fãa rɩɩb bal kɛpɩ. *
9, 10. Bõe la d segd n maan n yɩ neb sẽn tʋmd wʋsg wa gũuri?
9 D tõe n dɩka yam gũur nengẽ. Gũur sẽn tʋmd to-to wã wilgda tõnd tɩ d sã n dat tɩ d tʋʋmd naf-do, rẽndame tɩ d mao wʋsgo. Biiblã yet-d-la woto: “Kʋɩɩma, kẽng n tɩ ges gũur sẽn maand bũmb ningã n bãng yam. Bãmb ka tar naab ne kãsem la soaal ye. Bãmb wʋkda b rɩɩb sɩpaolgo. La bõn-bɩʋʋng wakate, b wʋkda ki n bĩngdẽ.” (Yel. 6:6-8) A Zeova ne a tʋʋm-mit a Zezi fãa tʋmda wʋsgo. Sɩd me, a Zezi ra yeela woto: “Mam Ba tʋmda daar fãa, la mam me tʋmdame.”—Zã 5:17.
10 Tõnd me sẽn dɩkd Wẽnnaam ne Kiristã togs-n-taarã, d segd n yɩɩ neb sẽn nong tʋʋma. Baa sẽn yaa tʋʋmd ning la d tar tigingã pʋgẽ, tõnd fãa segd n tʋma “Zusoabã tʋʋmd wʋsgo.” (1 Kor. 15:58) Woto yĩnga, d segd n tũu noor ning a Poll sẽn kõ Rom kiris-nebã. A yeel-b-la woto: “Bɩ y wɩnge, la y ra tʋm ne kʋɩɩng ye. Bɩ y wɩng n sak Zusoabã n maan bãmb tʋʋmd ne y sũyã fãa.” (Rom 12:11) Modgr ning fãa d sẽn maand a Zeova tʋʋmdã pʋgẽ wã pa na n yɩ zaalem ye. Biiblã yet-d-la woto: “Tɩ bõe, Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋrã yĩnga” ye.—Heb. 6:10.
D sẽn tõe n kogl zood ning d sẽn tar ne a Zeova wã to-to
11. Bilg-y seer sẽn yaa to-to.
11 Rũng a ye n be n paoodẽ tɩ b boond-a tɩ seere. D tõe n dɩka yam wʋsg yẽ me nengẽ. (Karm-y Yelbũn 30:26. *) A ra na n wõnegẽ-la soaamba, la a tʋbã yaa koees la gilsi, t’a naoã me yaa koeese. Rũn-kãngã sẽn paoodã tuuda a bokã kug-bɛd sẽn beẽ. A ninã sẽn ne yɩɩgã n paas a sẽn tuud a bokã kugr tẽngrã kogend-a lame. Sẽn paase, a pa wae n vɩ a yembr ye. Waoodã sasa, b sũuda taab bog-yend pʋgẽ, la woto kɩtdame tɩ b paamd koglg me. *
12, 13. Yam bʋs la d tõe n dɩk seerã nengẽ?
12 Yam bʋg la d tõe n dɩk seerã nengẽ? Tẽeg-y tɩ rũn-kãngã kogenda a meng sẽn na yɩl tɩ b ra paam-a n kʋ ye. A sẽn ne yɩɩgã n paas a sẽn pa zãagd ne bogdã yĩnga, sõngd-a lame t’a sã n yã bũmb sẽn dat n dɩ-a bɩ a zoet n solgd tao-tao. Wala seere, tõnd me segd n modgdame n tõogd n dengd n yãt bẽds nins a Sʋɩtãan dũniyã sẽn bẽt-dã. Tʋm-tʋmd a Pɩɛɛr sagla kiris-nebã woto: “Yõk-y y mens n gũusi; tɩ bõe, yãmb bɛyã sẽn yaa Sʋɩtãana gõoda wa gɩgemd sẽn kelemda, n baood a sẽn tõe n paam a soab n sãame.” (1 Pɩɛ. 5:8) A Zezi sẽn da wa n be tẽng zugã, a ra gũusda wakat fãa sẽn na yɩl t’a Sʋɩtãan da wa tõog n kɩt t’a beeg Wẽnnaam ye. (Mat. 4:1-11) Ad a Zezi sɩd kõ a karen-biisã mak-sõngo!
13 Bũmb sẽn na n sõng-d tɩ d kell n yɩ gũusdba, yaa d sẽn na n sakd segls nins fãa a Zeova sẽn dɩkd n na n kogl-dã. Wala makre, d segd n zãmsda Wẽnnaam Gomdã la kẽnd tigissã wakat fãa. (Luk 4:4; Heb. 10:24, 25) Wala seer sẽn pa vɩ a yembr tɩ kɩtdẽ t’a paamd koglg a taabã sʋkã, tõnd me segd n nonga d tẽed-n-taasã zĩigẽ. Rẽ, d fãa na n ‘lagemda taab n paamd raoodo.’ (Rom 1:12) D sã n sakd koglg ning a Zeova sẽn kõt-dã, d wilgdame tɩ d sak n deega bũmb ning yɩɩl-gʋlsd a Davɩɩd sẽn da yeelã. A yeela woto: “Zusoabã yaa mam pĩiga, la mam pãng zĩiga, la mam fãagda. Mam Wẽnnaam yaa mam kugri, mam baooda zĩig bãmb nengẽ n na n soonde.”—Yɩɩl 18:3.
Kell-y n pẽdg-y baa ne kɩɩsgã
14. Baa kalwaar a ye sẽn pa tõe n maan bũmbã, b sã n sũ taaba, bõe la b tõe n maane?
14 D tõe n dɩka yam kalwaar me nengẽ. Kalwaar woglem pa ta ninsaal nug-raoog sõma ye. Kalwaar a yembr meng pʋd n pa tõe n maan bũmb ye. La b sã n sũ taaba, seka rabeem. (Karm-y Yelbũn 30:27. *) Kalwaar dɩta wʋsgo, la bũmb me pa tõe n gɩdg-a ye. Woto kɩtame tɩ b sã n kẽ pʋʋg kẽebg sasa, b tõe n sa koodã zĩig pʋgẽ. Biiblã maka bʋʋr ning kalwaar sẽn maand b sẽn wat n sũ taab n watẽ wã ne saar dãmb rãamde, la bugum sẽn dɩt mo-koeemse. (Zoɛll 2:3, 5) Kalwaar waoong sasa, nebã mi n yõgenda bugum n na n gɩdg-ba. La naoor wʋsgo, pa yãkd neng ye. Bõe yĩnga? Bala bugmã sẽn kʋʋd-b rãmbã wẽnegd n kiisda bugmã, tɩ sẽn ketã tar sãagre. Baa ne kalwaar sẽn pa tar naabã, b sigla sõma wa sodaase, tɩ bũmb pa tõe n gɩdg-b ye. *—Zoɛll 2:25.
15, 16. Bõe n kɩt tɩ d yetẽ tɩ Rĩungã koe-moondb wõnda kalwaare?
15 No-rɛɛs a Zoɛll maka a Zeova nin-buiidã sẽn tʋmd to-to wã ne kalwaar sẽn maand bũmb ningã. A yeela woto: “Bãmb zoeta wa gãndaad sẽn be zabr pʋgẽ n gãngd lalga. Bãmb ned kam fãa tũuda a sor n ka bʋdgdẽ ye. Bãmb ka dɩdgd taab ye. Bãmb ned kam fãa kẽnda a zĩigẽ n wẽdgd gɩdgre n ka yaasdẽ ye. [Pɛɛmã tata kẽer tɩ b lʋɩtẽ, la b taabã ket n nangda pãng n pa yalsdẽ ye, NW ].”—Zoɛll 2:7, 8.
16 Ad bãngr-gom-kãngã sɩd bilgda Wẽnnaam Rĩungã koe-moondb sẽn tʋmd to-to rũndã-rũndã wã kɛpɩ! “Lalga,” rat n yeel tɩ gɩdgr buud baa a ye pa tõe n kɩt tɩ b bas koɛɛgã mooneg ye. B pʋd n dɩkda a Zezi togs-n-taare. Baa neb wʋsg sẽn da kis-a wã, a kell n pẽdga ne Wẽnnaam daabã maanego. (Ezai 53:3) Yaa sɩd tɩ “pɛɛmã tata kẽer tɩ b lʋɩtẽ,” bala b kʋʋ kiris-neb kẽer b tẽebã yĩnga. La koe-moonegã ket n kẽngda taoore, tɩ koe-moondbã sõor tar paasgo. Sɩd me, naoor wʋsgo, namsgã meng mi n kɩtame tɩ b paam n moon koɛɛgã neb b sẽn da pa na n paame. (Tʋʋ. 8:1, 4) Rẽ yĩnga koe-moonegã pʋgẽ, yãmb zoe n talla raood n pẽdg wa kalwaar sẽn maand to-to wã baa nebã sẽn mi n pa kelgdẽ tɩ sãnda meng kɩɩsdẽ wã bɩ?—Heb. 10:39.
‘Gãd-y sẽn yaa sõma kãn-kae’
17. Bõe n kɩt tɩ bãngenlegsr tõe n tabend zĩ-saalg n pa lak n lʋɩ?
17 Bãngenlegsr me yaa kɩdga, la bũmb a ye la a tõe n maan hal tɩ bãngdbã pẽgda. (Karm-y Yelbũn 30:28. *) A tõe n wudg n dʋʋ lalg sẽn saal wall a kẽn roog plafõ zug n pa lak n lʋɩ ye. Bõe n kɩt tɩ bãngenlegsr tõe n maan woto? Yaa a na-biisã sẽn naan to-to wã n sõngd-a. Bãngdbã vaeesame n mik t’a na-bil a ye fãa tara kõbd buud b sẽn pa tõe n yã ne nifu, tɩ b sõorã tõe n ta bãmb tusa. Kõb-kãensã tara bog-bõoneg b baasgẽ wã. Yaa bãmb n kɩtd t’a tõe n tabende. Rẽ n so tɩ baa bãngenlegsr zɩslem sẽn zem to-to fãa, a tõe n wudg baa vɩtr zug t’a poorã tees tẽnga, t’a yaool n pa lʋɩtẽ ye! Bãngdbã pẽgda bãngenlegsrã sẽn tõe n maan woto wã hal wʋsgo, la b tagsdẽ tɩ b sã n tõog n maan bũmb sẽn tabended wa a naoã, yɩta sõma. *
18. Bõe n tõe n sõng-d tɩ d kell n “gãd sẽn yaa sõma kãn-kae”?
18 Yam bʋg la d tõe n dɩk bãngenlegsr nengẽ? Biiblã sagend-d-la woto: “Bɩ y kisg sẽn yaa wẽnga, la y gãd sẽn yaa sõma kãn-kae.” (Rom 12:9) A Sʋɩtãan dũniyã neb manesem sẽn pa sõma baa bilfã tõe n wa kɩtame tɩ d bas Wẽnnaam noyã. Wala makre, yaa lekollẽ tɩ yaa tʋʋm zĩigẽ, wall ne yɛl a taab maasem, dũniyã neb tũud-n-taar tõe n wa kɩtame tɩ d pa ye tʋll n maan sẽn yaa sõma ye. Ra tol-y n bas-y tɩ yel-kãngã paam-y ye! Wẽnnaam Gomdã keoog-d-la woto: “Ra tags tɩ f tara yam wʋsg ye.” (Yel. 3:7) Woto yĩng bɩ d tũ saglg ning a Moiiz sẽn kõ Wẽnnaam nin-buiidã pĩnd wẽndẽ wã. A yeel-b-la woto: “Zoe-y Zusoab a Wẽnnaam la y sak bãmb n gãd bãmba.” (Tõo. 10:20) D sã n kell n gãd a Zeova, d rɩkda a Zezi togs-n-taare. Sɩd me, Biiblã ra goma a Zezi yell n yeel woto: “Fo nonga tɩrlem la f kisa wẽnga.”—Heb. 1:9.
Bũmb nins Wẽnnaam sẽn naanã sagenda tõndo
19. a) Bũmb nins a Zeova sẽn naanã wilgda tõnd ned kam fãa bõe a zugu? b) Wãn to la yam ning sẽn yit Wẽnnaam nengẽ wã nafd tõndo?
19 Wa d sẽn yã wã, bũmb nins a Zeova sẽn naanã wilgda a sẽn yaa Wẽnnaam ning buudã, la bõn-kãens kõt-d-la sagl-sõma me. D sã n bʋgsd b zutu, d na n yãta vẽeneg t’a Zeova yamã sɩd ka koak ye. D sã n baood yam ning sẽn yit Wẽnnaam nengẽ wã la d tʋmdẽ tɩ zemsd ne yam kãnga, d na n paama sũ-noog rũndã-rũndã, la d paam koglg beoog daare. (Koɛ. 7:12) Hakɩka, d na n yãame tɩ goam nins sẽn be Yelbũn 3:13, 18 wã sɩd yaa sɩda. Be b yeta woto: “Ned sã n tar yam ne bãngre, a tara sũ-noogo. Yam yaa wa vɩɩm tɩɩg sẽn tar-a wã yĩnga. Ned sã n tar-a fãa, a tara sũ-noogo.”
[Tẽngr not rãmbã]
^ sull 6 Sẽn yɩɩd fãa, kambã tõe n tika tẽngr not rãmbã n vaees sɛb-nins b sẽn sõdgã, tɩ b sã n wa na n wɛgs Gũusg Gasgã sõs-kãngã tigingã pʋgẽ bɩ b tik b vaeesgã zug n leoke.
^ sull 8 Y sã n dat kibay gũur ning yell b sẽn gomdã zugu, bɩ y ges yʋʋmd 1997 tʋʋlg kiuug rasem 22 Réveillez-vous ! wã neng 31 la yʋʋmd 2002 sig-noy kiuug rasem 22 wã Réveillez-vous ! wã me neng 31.
^ sull 11 Yaa seerã la b sẽn lebg ka tɩ kɩɩgã. La pa kɩɩg ye.
^ sull 11 Y sã n dat kibay a taab seerã zug bɩ y ges yʋʋmd 1990 bõn-bɩʋʋng kiuug rasem a 8 Réveillez-vous ! wã neng 15-16.
^ sull 14 Kalwaarã yaa sʋʋr buudu. Yẽ la b sẽn bool ka tɩ sʋ-kinkirgã.
^ sull 14 Y sã n dat kibay kalwaarã zug n paase, bɩ y ges yʋʋmd 1977 wao-fugdg kiuug rasem a 8 Réveillez-vous ! wã neng 11.
^ sull 17 Yaa bãngenlegsr la b sẽn lebg ka tɩ bõn-poakã.
^ sull 17 Y sã n dat kibay bãngenlegsrã zug n paas bɩ y ges yʋʋmd 2008 tʋʋl-nif Réveillez-vous ! wã neng 26.
Y tẽrame bɩ?
Yam bʋg la d tõe n dɩk . . .
• gũur nengẽ?
• seer nengẽ?
• kalwaar nengẽ?
• bãngenlegsr nengẽ?
[Zãmsgã sogsgã]
[Foto rãmba, seb-neng 18]
Seer sẽn nong a taabã zĩigẽ wã yĩnga, a paamda koglgo. Y me nonga y tẽed-n-taasã zĩigẽ bɩ?
[Foto rãmba, seb-neng 20]
Kiris-nebã pẽdgda ne b koe-moonegã wa kalwaare
[Foto, seb-neng 20]
Kiris-nebã gãta sẽn yaa sõma kãn-kãe wa bãngenlegsr sẽn tabended bũmb to-to wã
[Fotã soaadba]
Stockbyte/Getty Images