Wa n kelg-y sõsga

Tũudum sẽn tat Wẽnnaam yam beeme bɩ?

Neb wʋsg tũuda b sẽn dog n mik b roagdbã ne tũudum ningã. Neb kẽer yaa b sẽn wat n lebg kãsemb la b yãkd tũudum ning b sẽn date. Sɩd me, tũudmã sõor waoogame, tɩ ned kam fãa tõe n yãk a sẽn dat a soaba. La tõe tɩ y mi n sokda y meng n dat n bãng y tũudmã sã n tata Wẽnnaam yam.

Sõsg ning d sẽn boond nebã fãa tɩ b wa kelgã na n sõng-y lame tɩ y bãng rẽ. A gom-zugã yaa: “Tũudum sẽn tat Wẽnnaam yam beeme bɩ?” B na n wɛgsã sõs-kãngã sẽn tik Biiblã zugã dũniyã gill zugu, sẽn yɩɩd tẽns 230 pʋsẽ. Zĩis wʋsgo, na n yɩɩ a Zeova Kaset rãmbã Rĩung rot pʋsẽ, yʋʋmd 2009 tʋʋl-​nif kiuugã rasem 26 daarã. A Zeova Kaset rãmb nins sẽn be yãmb babgẽ wã na n wilga yãmb sẽn na n yɩ zĩig ning la wakat ninga. D boond-⁠y lame tɩ wa kelg sõsgã.