B lebs n bãnga sɩdã vɩɩmd wakat fãa tẽngã zugã wɛɛngẽ
B lebs n bãnga sɩdã vɩɩmd wakat fãa tẽngã zugã wɛɛngẽ
“Daniɛlle, solg bõn-kãensã . . . hal tɩ ta sɛɛba wakate. Neb wʋsg na n kẽnga ka la ka, la bãngr na n paasa wʋsgo.”—DAN. 12:4.
1, 2. Sogs-bʋs la d na n leok sõs-kãngã pʋgẽ?
RŨNDÃ-RŨNDÃ, neb milyõ rãmb n bãng vẽeneg tɩ Biiblã yetame tɩ tẽngã na n lebga arzãna, tɩ neb vɩɩmd a zug wakat sẽn pa sate. (Wil. 7:9, 17) D yaab a Ãdem ne a Hawa naanegã poore, Wẽnnaam wilgame t’a naana ninsaal t’a vɩɩmd wakat sẽn pa sat lakae, pa yʋʋm a wãn bal ye.—Sɩng. 1:26-28.
2 Israɛll nebã ra tẽedame tɩ Wẽnnaam na n wa kɩtame tɩ nebã le lebs n zems zãng wa a Ãdem sẽn da yaa to-to sɩngrẽ wã. Biiblã babg ning b sẽn gʋls ne gɛrkã wilgda tõnd Wẽnnaam sẽn na n maan rẽ to-to. La maana wãn tɩ neb wʋsg ra wa le pa tẽed pʋlem-no-kãngã? Wãn-wãn la b wa n lebs n wʋm a võorã la b kɩt tɩ neb milyõ rãmb bãng-a?
Neb n wa n kɩt tɩ b pa le tẽed-a ye
3. Bõe yĩng tɩ b sẽn kɩt tɩ ãdem-biisã pa miẽ tɩ neb n na n wa vɩɩmd tẽngã zug wakat sẽn kõn sa wã pa lingd tõndo?
3 A Zezi ra pĩnd n togsame tɩ zãmb bãngdb n da na n wa golem bũmb nins yẽ sẽn wilg nebã, n belg neb wʋsgo. (Mat. 24:11) Tʋm-tʋmd a Pɩɛɛr keooga kiris-nebã woto: “Zãmb karen-saam dãmb na n zĩnda yãmb sʋka.” (2 Pɩɛ. 2:1) Tʋmd-tʋmd a Poll me ra yeelame tɩ “wakat n na n wa tɩ nebã ka rat n sak sɩd koɛɛgã,” la a paas tɩ b ‘mens ratem yĩnga, b na n baoo karen-saam dãmb wʋsg sẽn na n togs koɛɛg sẽn noom bãmb bala.’ (2 Tɩm. 4:3, 4) Yaa a Sʋɩtãan n tudgd nebã n pa rat tɩ b bãng sɩdã sẽn noogd sũurã ye. A tũnugda ne kiris-neb ne yʋʋrã n kɩtdẽ tɩ nebã pa tõe n bãng Wẽnnaam sẽn dat bũmb ning ne ãdem-biisã la ne tẽngã ye.—Karm-y 2 Korẽnt dãmb 4:3, 4.
4. Bõe la Biiblã yeta, tɩ kiris-neb ne yʋʋrã tũudmã taoor dãmb kɩɩse?
4 Biiblã wilgdame tɩ Wẽnnaam Rĩungã yaa saasẽ goosneema, la t’a na n wa menesa ãdem-biisã goosneema rãmba. (Dan. 2:44) Kiristã naam sẽn na n kaoos yʋʋm tusrã sasa, b na n balga a Sʋɩtãan bog-zulung pʋgẽ. Dẽ poore, b na n vʋʋga sẽn ki-bã, la b sõng ãdem-biisã sẽn na n vɩɩmd tẽngã zugã tɩ b wa lebs n zems zãnga. (Wil. 20:1-3, 6, 12; 21:1-4) La kiris-neb ne yʋʋrã tũudum taoor dãmb sẽn wilg nebã bũmb ningã yaa toor ne Biiblã sẽn yetã. B nin-yend yɩɩ Alɛgsãndri rao a Orizɛn sẽn zĩnd yʋʋm 200 sẽnes a Zezi rogmã poorã. Nin-kãngã ra wilgda nebã tɩ pa zems tɩ b tẽ tɩ Kiristã sẽn na n wa rɩ naam yʋʋm tusrã na n waa ne bark n kõ neb tẽngã zug ye. La sebr a ye (L’Encyclopédie catholique [ãngil.]) pʋgẽ, b yeelame t’a Ogistẽ sẽn yit Hiponnã sẽn zĩnd yʋʋmd 354-430 wã pʋd n da yetame t’a Zezi pa na n wa rɩ naam yʋʋm tusr ye. *
5, 6. Bõe yĩng t’a Orizɛn ne a Ogistẽ kɩɩs Biiblã sẽn yet bũmb ning yʋʋm tusr naamã zugã?
5 Bõe yĩng t’a Orizɛn ne a Ogistẽ wa kɩɩs Biiblã sẽn yet bũmb ning yʋʋm tusr naamã zugã? A Orizɛn da tẽeda wa gɛrk rãmbã tɩ ninsaal tara sɩɩg sẽn pa kiidi. Tũudum yɛl mit a Werner Jaeger yeelame tɩ yaa a Orizɛn n “kɩt tɩ kiris-neb ne yʋʋrã karen-saam dãmb wa zãmsd nebã tɩ ned kũum poore, a sɩɩgã kẽngda zĩis toɛy-toɛyã,” bala, a Orizɛn da tẽeda a Platõ sẽn da yet bũmb ning sɩɩgã zugã. Woto kɩtame t’a Orizɛn wilg tɩ bark nins Rĩungã yʋʋm tusr naamã sẽn na n wa ne wã na n yɩɩ saasẽ, la tɩ pa tẽngã zug ye.
6 Yaa a Ogistẽ sẽn wa n tar yʋʋm 33 la a tuub n sak kiris-neb ne yʋʋrã tũudum. Sẽn deng rẽ, a ra lebga neoplatonisti, rat n yeel tɩ ned sẽn tẽed a Plotinis sẽn zĩnd yʋʋmd 200 soabã poorã. Nin-kãngã ra lebg n dɩka a Platõ zãmsgã n wilgd nebã. Baa a Ogistẽ tuubgã poore, a ra ket n tẽeda a Plotinis zãmsgã. Sebr a yembr (The New Encyclopædia Britannica) goma a Ogistẽ yelle, n yeel tɩ yaa yẽ n yɩ sabab tɩ b wẽnemd Biiblã babg ning b sẽn da gʋls ne gɛrkã sẽn yet bũmb ninsã tɩ zems ne a Platõ zãmsgã. La a Platõ zãmsgã yaool n da yita gɛrk rãmbã sẽn da tẽed bũmb ninsã pʋgẽ. Sebr a to (L’Encyclopédie catholique) me yeelame t’a Ogistẽ bilga Wilgr sebrã sak 20 wã sẽn yet bũmb ning Rĩungã yʋʋm tusr naamã zugã ne a meng tagsgo. Seb-kãng paasa woto: “Bãngdb nins sẽn zĩnd a Ogistẽ loogr poorã saka a sẽn bilg yɛlã to-to wã, tɩ kɩt tɩ nebã wa pa le tẽed tɩ saasẽ Rĩungã sɩd na n wa rɩɩ naam yʋʋm tusr tẽngã zug ye.”
7. Yaa tẽeb-bʋg sẽn pa sɩd n wa n kɩt tɩ nebã pa le tẽed tɩ ãdem-biis n na n vɩɩmd tẽngã zug wakat sẽn kõn sa wã, la rẽ sɩnga wãna?
7 Yaa tẽeb sẽn sɩng pĩnd wẽndẽ Babilonnã pʋgẽ n wa piuug dũniyã gill zug la b kɩt tɩ nebã tẽ n bas Biiblã sẽn yetã. Babilon nebã ra tẽedame tɩ ninsaal tara sɩɩg sẽn pa kiidi. Kiris-neb ne yʋʋrã tũudum taoor dãmb sẽn sak Babilon nebã tẽeb-kãngã poore, b bãngdbã golma Biiblã goama, n na n kɩt tɩ nebã tẽ t’a wilgdame tɩ nin-tɩrsã fãa na n kẽnga saasẽ. Sã n yaa ne bãmba, Wẽnnaam zĩniga ninsaal tẽngã zug sẽn na yɩl n ges t’a sã n yaa nin-tɩrg bɩ a kɩt t’a tɩ vɩɩmd saasẽ. Bũmb a woto me n kɩt tɩ zʋɩf rãmbã wa le pa tẽed tɩ neb n na n wa vɩɩmd tẽngã zug wakat sẽn kõn sa ye. Zʋɩf rãmbã sẽn wa n yik n tẽed wa gɛrk rãmbã tɩ ninsaal tara sɩɩg sẽn pa kiidã, kɩtame tɩ b tẽed masã tɩ vɩɩm sẽn pa satã na n yɩɩ saasẽ. Ad woto sɩd yaa toor fasɩ ne Biiblã sẽn yet ninsaal zugã! Ninsaal yaa nems ne zɩɩm. Wẽnnaam pa naan-a sẽn na yɩl t’a vɩɩmd saasẽ ye. A Zeova ra yeela d yaab a Ãdem woto: “Fo yaa tẽng tom.” (Sɩng. 3:19) Ninsaal segd n vɩɩmda tẽngã zug wakat sẽn pa sate, pa saasẽ ye.—Karm-y Yɩɩl Sõamyã 104:5; 115:16.
Vẽenemã puka bilfu
8. Bõe la bãngdb sẽn zĩnd yʋʋmd 1600 soabã sẽnes n da vaeesd Biiblã yeel vɩɩm sẽn pa satã wɛɛngẽ?
8 Baa tũudum nins sẽn yet tɩ b yaa Kiristã tũudmã fãa la bal sẽn kɩɩsd tɩ neb pa na n wa vɩɩmd tẽngã zug wakat sẽn kõn sa wã, pa wakat fãa la a Sʋɩtãan tõog n solg sɩdã ye. Pĩnd wẽndẽ, vẽenem puka bilfu, tɩ neb kẽer sẽn maag b yĩng n vaees Biiblã sõma wʋm Wẽnnaam sẽn na n maan to-to n kɩt tɩ ãdem-biisã lebs n zems zãngã võor bilfu. (Yɩɩl 97:11; Mat. 7:13, 14; 13:37-39) Yʋʋmd 1600 soabã sẽnese, b sɩnga Biiblã lebgre, tɩ neb wʋsg tõe n paam-a. Yʋʋmd 1651 soabã pʋgẽ, Biiblã bãngd a yembr yeelame tɩ sẽn yaa a Ãdem “n kɩt tɩ ãdem-biisã kong arzãnã la vɩɩm sẽn pa satã tẽngã zugã,” dẽnd na n tũu ne Kiristã maasem tɩ “nebã fãa le paam n vɩɩmd tẽngã zugu. Sã n pa rẽ, b sẽn mak a Zezi ne a Ãdmã ka võor ye.” (Karm-y 1 Korẽnt dãmb 15:21, 22.) Ãngeletɛɛr ned a ye yʋʋr sẽn boond t’a John Milton n zĩnd yʋʋmd 1608 n tãag yʋʋmd 1674 soabã pʋgẽ gʋlsa sɛb a yiib sẽn pʋg taaba, (Le Paradis perdu et Le Paradis reconquis) n gom arzãn sẽn na n zĩnd tẽngã zug yelle. A sɛbã pʋsẽ, a goma wẽn-sakdb sẽn na n paam keoor arzãn pʋgẽ tẽngã zug yelle. Baa ne a Milton sẽn dɩk a vɩɩmã tõr la bal n zãms Biiblã, a sak n deegame tɩ sã n pa Kiristã waoong poore, b pa na n tol n tõog n wʋm Biiblã goam võor sõma ye.
9, 10. a) Bõe la a Isaac Newton yeel vɩɩm sẽn pa satã wɛɛngẽ? b) Bõe yĩng t’a Newton ra yetẽ tɩ na n kell n kaoosa wʋsg tɩ Kiristã yaool n wa?
9 Bãngd a to me yʋʋr sẽn boond t’a Isaac Newton n zĩnd yʋʋmd 1642 n tãag yʋʋmd 1727 soabã pʋgẽ, n da nong Biiblã zãms wʋsgo. A wa n bãngame tɩ neb la Wẽnnaam na n wa vʋʋg tɩ b kẽng saasẽ n tɩ naag Kiristã n dɩ naam. (Wil. 5:9, 10) A goma nin-kãens sẽn na n dɩ naamã neb nins zutã yell me, n yeel woto: “Bʋʋdã poore, neb n na n kell n vɩɩmd tẽngã zugu. La pa na n yɩ yʋʋm tusr bal ye, na n yɩɩ wakat fãa yĩnga.”
10 A Newton ra yeelame tɩ ra na n kell n kaoosa yʋʋm kobs tɩ Kiristã yaool n wa. Kʋdemd yɛl mit a Stephen Snobelen yeela woto: “Bũmb a ye sẽn kɩt t’a Newton yeel tɩ Wẽnnaam Rĩungã waoong ket n zãrame wã, yaa a sẽn da ne b sẽn zãmsd nebã zĩig zãng tɩ Wẽnnaam yaa tãablem tɩ yaool n yaa ziri wã.” Nebã ra ket n nan pa wʋmd koe-noogã võor ye. Sẽn paase, a Newton ra pa ne kiris-neb sull sẽn tõe n sõng nebã tɩ b wʋm koɛɛgã ye. A yeela woto: “Sã n pa saabã wakat n ta, b pa na n tol n tõog n wʋm a Daniɛll bãngr-goamã ne bũmb nins a Zã sẽn yã [n gʋls Wilgr sebrã pʋgẽ] wã võor ye.” A Newton wilga bʋʋmã. A yeelame t’a Daniɛll yeela woto: “ ‘Neb wʋsg na n kẽnga ka la ka, la bãngr na n paasa wʋsgo.’ Bala b segd n moona koe-noogã dũniyã tɛk fãa tɩ to-kãsengã la dũniyã saab yaool n ta. Rẽnd b reng n moon koe-noogã sẽn na yɩl tɩ kʋʋn-kãseng ning sẽn na n põs to-kãsengã sasa, t’a nebã zãad koms vãad n yit soolem toɛy-toɛya, tɩ b sõorã pa tõe n sõd n sa wã tõog n sɩd yɩ wʋsg wa b sẽn yeelã.”—Dan. 12:4; Mat. 24:14; Wil. 7:9, 10.
11. A Milton ne a Newton wakatẽ wã, bõe tɩ wʋsg kell n pa bãng sɩdã vɩɩm sẽn pa satã wɛɛngẽ?
11 A Milton ne a Newton wakatẽ wã, ned sã n da saag n kɩɩs egiliizã taoor dãmb sẽn zãmsd nebã bũmb ninsã, ra tõe n tũu ne a soab yõore. Rẽ kɩtame tɩ b pa tõog n yiis b sɛb wʋsg b sẽn gʋls Biiblã zugu, sã n pa b kũumã poor ye. Yʋʋmd 1500 soabã sẽnese, egiliiz katolikã taoor dãmb sãnda zabame n welge, n bas b zãmsgã kẽere. B boola sẽn welg-bã tɩ Portɛstã rãmba. La baasgo, b fãa ra ket n zãmsda nebã b wẽnd-dotẽ wã tɩ ninsaal tara sɩɩg sẽn pa kiidi, tɩ b wʋsg me ra ket n tẽed t’a Ogistẽ sẽn wilg tɩ yʋʋm tusr naamã zoe n loogame wã yaa sɩda. La rẽ yĩnga saabã wakate, bãngrã sɩd paasa wʋsg bɩ?
“Bãngrã na n paasa wʋsgo”
12. Wakat bʋg la bãngrã ra segd n wa lebg wʋsgo?
12 No-rɛɛs a Daniɛll ra yeelame tɩ “sɛɛbã wakate,” yɛlã na n toeemame. (Karm-y Daniɛll 12:3, 4, 9, 10.) A Zezi me ra yeelame tɩ wakat kãnga, “nin-tɩrsã na n yãga wa wĩndga.” (Mat. 13:43) La maana wãn tɩ bãngrã wa lebg wʋsg saabã wakate? D miime tɩ saabã wakat sɩnga yʋʋmd 1914 soabã pʋgẽ. La bɩ d reng n ges yɛlã sẽn sɩng to-to yʋʋm a wãn sẽn deng rẽ.
13. A Charles Taze Russell sẽn vaees n na n wʋm Biiblã sẽn yeel tɩ ãdem-biisã na n wa paam n le zemsa zãngã võor poore, bõe la a yeel-yã?
13 Sẽn deng yʋʋmd 1900 wã tɩ pʋ-peelem dãmb kẽer n da vaeesd n na n wʋm ‘gom-sõma wã mamsg’ võore. (2 Tɩm. 1:13) Wala makre, a Charles Taze Russell. Yʋʋmd 1870 soabã pʋgẽ, yẽ ne neb bilf sẽn da vaeesd n na n bãng sɩdã naaga taab n maan sull n zãmsd Biiblã. Yʋʋmd 1872 soabã pʋgẽ, b baoome n na n wʋm ãdem-biisã sẽn na n wa paam n le zems zãng wa a Ãdem sẽn da yaa to-to wã võor sõma. Kaoosg zugẽ, a Russell yeela woto: “Sẽn deng yʋʋmd 1872 wã, tõnd da nan pa mi welg-kãseng ning sẽn be keoor ning Egiliizã (bɩ sẽn paam-b vʋʋsem sõngã zaeebã) sull sẽn be makr pʋgẽ masã wã sẽn na n paamã, la nin-tɩrs a taabã sẽn na n paam keoor ningã sʋk vẽeneg ye.” Nin-tɩrs a taabã na n wa paamame tɩ b sõng-b tɩ b “lebs n zems zãng wa d yaab a Ãdem sẽn da yaa to-to a sẽn da wa n ket Edɛnnã.” A Russell wilgame t’a sẽn wa n baood n na n wʋm Biiblã võor sõma wã, Biiblã vaeesdb a taab n sõng-a. Yaa ãnd dãmba?
14. a) Wãn-wãn la a Henry Dunn ra wʋmd Tʋʋm 3:21 wã võore? b) A Dunn yeelame tɩ ãnd dãmb n na n wa vɩɩmd tẽngã zug wakat sẽn pa sate?
14 A Henry Dunn naaga neb nins sẽn sõng a Russellã sʋka. A Dunn gʋlsa sebr n gom “wakat ninga Wẽnnaam sẽn da kɩt tɩ b no-rɛɛsdb-sõma wã gom hal kʋdemd wakatã” yelle, rat n yeel tɩ “bũmb fãa manegr wakatã.” (Tʋʋ. 3:21) A Dunn ra bãngame tɩ Wẽnnaam sẽn na n wa kɩt tɩ nebã lebs n zems zãng n vɩɩmd tẽngã zug Kiristã naamã sasa wã naaga bũmb fãa manegrã. Sẽn paase, a baoome n na n leok sokr a ye sẽn da yaa toog ne neb wʋsgo. Sok-kãng la woto: “Yaa ãnd dãmb meng la sẽn na n vɩɩmd tẽngã zug wakat sẽn pa satã?” A Dunn bilgame tɩ b na n wa vʋʋga neb milyõ rãmba, n sõng-b tɩ b bãng sɩdã, tɩ b paam sor n wilg b sã n na n tẽe Kiristã.
15. Bõe la a George Storrs vaees Biiblã n bãng kũum vʋʋgrã wɛɛngẽ?
15 Yʋʋmd 1870 soabã pʋgẽ, a George Storrs me vaeesa Biiblã n bãng tɩ b na n vʋʋga neb sẽn pa tɩrse, tɩ b sã n yɩ sakdb rẽ poore, bɩ b wa paam n vɩɩmd wakat sẽn kõn sa. Sẽn paase, a bãngame tɩ b sã n vʋʋg ned t’a pa kell n yɩ sakda, ‘baa a soab sã n taa yʋʋm koabga,’ a na n kiime. (Ezai 65:20) A Storrs zĩnda Bruklin sẽn be Niuyorkã, n da yiisd zʋrnall b sẽn da boond tɩ Scrutateur de la Bible.
16. Bõe n kɩt tɩ Biiblã Zãmsdb ra yaa toor ne kiris-neb ne yʋʋrã?
16 A Russell vaeesa Biiblã n bãng tɩ wakat ra taame tɩ b segd n moon koe-noogã zĩig zãnga. Rẽ n so tɩ yʋʋmd 1879 soabã pʋgẽ, a sɩng Le Phare de la Tour de Sion — Messager de la Présence de Christ b sẽn boond rũndã-rũndã tɩ Gũusg Gasgã moonda a Zeova Rĩungã yiisgu. Sẽn deng rẽ, ra yaa neb bilf bal n da wʋmd Biiblã sẽn yet bũmb ning vɩɩm sẽn pa satã wɛɛngẽ wã võore. La rẽ tɛka, tẽns wʋsg pʋsẽ, Biiblã Zãmsdb sulã sɩnga Gũusg Gasgã zãmsgo. Biiblã Zãmsdbã ra wilgdame tɩ yaa neb bilf bal n na n wa tɩ vɩɩmd saasẽ, tɩ neb milyõ rãmb sẽn na n lebs n zems zãng vɩɩmd tẽngã zug wakat sẽn kõn sa. Woto kɩtame tɩ b ra yaa toor fasɩ ne kiris-neb ne yʋʋrã tũudum wʋsgo.
17. Bõe n kɩt tɩ bãngrã wa lebg wʋsgo?
17 “Saabã wakat” ning yell b sẽn da pĩnd n goma sɩnga yʋʋmd 1914 soabã pʋgẽ. La rẽ yĩnga wakat kãng tɛka, b bãnga yɛl wʋsg vɩɩm sẽn pa satã wɛɛngẽ bɩ? (Dan. 12:4) Yʋʋmd 1913 soabã pʋgẽ, b yiisa a Russell sõss zʋrno rãmb 2 000 pʋsẽ, tɩ na maan neb 15 000 000 karm-ba. Yʋʋmd 1914 soabã ne a na n sa, tɩ b yiisa “ Photo-Drame de la Création ” filmã tẽns wʋsg pʋsẽ, hal tɩ sẽn yɩɩd neb 9 000 000 paam-a n gese. Filim kãng naaga ne foto rãmb sẽn bilgd Kiristã naam sẽn na n yɩ to-to. Yʋʋmd 1918 soabã n tãag yʋʋmd 1925 soabã, diskuur a ye (Des millions de personnes actuellement vivantes ne mourront jamais) la a Zeova Kaset rãmbã maan sẽn yɩɩd buud-goam 30 pʋgẽ dũniyã gill zugu. Diskuur kãng goma ãdem-biisã sẽn na n wa vɩɩmd wakat sẽn kõn sa tẽngã zugã yelle. Yʋʋmd 1934 soabã pʋgẽ, a Zeova Kaset rãmbã bãngame tɩ neb nins sẽn na n wa vɩɩmd tẽngã zug wakat sẽn kõn sa wã me segd n deega lisgu. B sẽn bãng rẽ wã kɩtame tɩ b maneg n yẽeg b mens n na n moon Rĩungã koe-noogã. Rũndã-rũndã, neb milyõ rãmb n wilgd a Zeova b mi-beoog ne b sũy fãa, b sẽn bãng tɩ b tõe n wa paam n vɩɩmda wakat sẽn kõn sa tẽngã zugã yĩnga.
‘Lohorem ne ziir’ wakat n wate!
18, 19. Ezai 65:21-25 wã wilgdame tɩ vɩɩmã na n wa yɩɩ wãn-wãna?
18 Wẽnnaam da kɩtame tɩ no-rɛɛs a Ezai pĩnd n gom a nin-buiidã sẽn na n wa vɩɩmd to-to tẽngã zugã yelle. (Karm-y Ezai 65:21-25.) A Ezai sẽn togs gom-kãensã wã rat n maana yʋʋm 2 700 masã. La wakat kãng tɩɩs n ket n vɩ hal ne rũndã. Tags-y n ges-y yãmb sẽn na n wa paam n vɩɩmd n kaoos yʋʋm a woto fãa n ket n tar pãng la laafɩ!
19 Wakat kãnga, d pa na n vɩɩmd yʋʋm a wãn bal la d ki ye. D na n tõog n vɩɩmda wakat sẽn kõn sa, n paam n me roto, n sel tɩɩse, la d zãms yɛl wʋsgo. D na n tõog n yõga zood ne neb wʋsgo. La tõnd ne d zo-rãmbã nonglmã na n tara paasg bala. Ad ‘Wẽnnaam kamb’ nins sẽn na n zĩnd tẽngã zugã sɩd na n paama ‘lohorem ne ziir’ tɛkẽ!—Rom 8:21.
[Tẽngr note]
^ sull 4 A Ogistẽ yeelame tɩ Wẽnnaam Rĩungã yʋʋm tusr naamã zoe n sɩnga egiliizã katolikã luglg tɛka, la tɩ rẽ yĩnga pa bũmb sẽn nan wat ye.
Y tõe n wilgame bɩ?
• Bõe n kɩt tɩ b wa pa le tẽed tɩ neb n na n vɩɩmd wakat sẽn kõn sa tẽngã zugu?
• Yʋʋmd 1600 soabã tɛka, bõe la Biiblã vaeesdb kẽer bãng-yã?
• Sẽn deng yʋʋmd 1914 soabã, wãn to la b bãng tɩ neb n na n wa vɩɩmd wakat sẽn kõn sa tẽngã zugu?
• Bõe n kɩt tɩ b wa bãng vɩɩm sẽn kõn sa wã sẽn na n pids to-to wã sõma?
[Zãmsgã sogsgã]