Tũudum hakɩkã pa sakd wẽng ye

TŨUDUM hakɩkã wilgda tõnd sẽn yaa sõma la wẽng n bakdẽ, la a sõngd-d tɩ d toeemd d zʋgã tɩ lebgd sõma. A sõngd-d lame tɩ d modgd n maand sẽn yaa sõma la a kɩtdẽ tɩ d lebgd nin-sõng n paasdẽ. Bõe n kɩt tɩ d yetẽ tɩ tũudum hakɩkã maanda woto?

Kelg-y bũmb ning tʋmd-tʋmd a Poll sẽn da yeel Korẽnt kiris-nebã. Korẽnt ra yaa tẽng sẽn da be Gɛrɛs soolmẽ wã, t’a yʋʋrã ra yi, a nebã tʋʋm-beedã yĩnga. A Poll yeela beenẽ kiris-nebã woto: “Da belg-y y mens ye. Tʋʋm-dẽgd maandbã, wẽn-naands pʋʋsdbã, nin-yoaadbã, wẽng maandbã, rapã wall pagb sẽn gãe taabã, wagda wã, yão-beed dãmba, sẽn yũud-b rãam n tũubdẽ wã, nin-tʋʋdbã, fãadbã, baa a ye kõn paam Wẽnnaam soolma wa a rogem-pʋɩɩr ye.” A Poll paasa woto: “Yãmb neb kẽer yaool n dag n yaa a woto. La yãmb paama pekre, b kɩtame tɩ yãmb lebg sõma, b kɩtame tɩ yãmb zemse, tõnd Zusoab a Zezi Kirist yʋʋrã maasem yĩnga, la ne tõnd Wẽnnaamã sɩɩg pãnga.” (1 Korẽnt dãmba 6:9-11, Kãab-paalgã Koe-noogo) Yãmb we n ges koe! Tũudum hakɩkã sõnga neb sẽn da tʋmd tʋʋm-wẽns buud toor-toor tɩ b tõog n lebg nin-tɩrse, neb sẽn lebg sõma n tũud Wẽnnaam.

La Biiblã yaool n da pĩnd n wilgame tɩ “wakat n na n wa tɩ nebã ka rat n sak sɩd koɛɛgã ye. La bãmb mens ratem yĩnga, bãmb na n baoo karen-saam-dãmb wʋsg sẽn na n togs koɛɛg sẽn noom bãmb bala.” (2 Tɩmote 4:3)

Yel-kãngã wɛɛngẽ, tũudum nins yãmb sẽn mi wã maanda bõe? B zãmsda nebã Biiblã noy sẽn yaa tɩrsã bɩ, bɩ b punda Wẽnnaam goamã, n taasd goam ‘sẽn noom nebã bala?’

Y sã n wa rat n bãng tũudum sã n womda bi-sõma, bɩ y bao n leok sogsg nins sẽn pʋgdã.

MAKRE: Kãadmã wɛɛngẽ.

BIIBLÃ YETA WOTO: “Bɩ kãadem zĩnd waoogr ne nebã fãa, la y ra sak tɩ gãag sãam ne wẽng ye. Tɩ bõe, Wẽnnaam na n kaoo raglem dãmbã ne nin-yoaadbã bʋʋdo.”—Hebre dãmba 13:4.

SOKRE: Rẽ yĩnga tũudum kãngã wilgda a nebã tɩ yaa tɩlae tɩ rao ne pag sẽn vɩ ne taab kẽ kãadem tɩ zems ne laloa wã bɩ?

MAKRE: Kãadmã kaoob wɛɛngẽ.

BIIBLÃ YETA WOTO: Daar a yembre, b soka a Zezi n na n bãng bũmb sã n beeme n tõe n kõ ned sor t’a kao a kãadem. La a Zezi leoka woto: “Mam yeta yãmba, tɩ ned sã n dig a paga, tɩ sã n ka yoob yĩnga, n dɩk a to, a maanda yoobo.”—Matɩe 19:9, Kãab-paalgã Koe-noogo.

SOKRE: Rẽ yĩnga tũudum kãngã wilgda a nebã tɩ yaa yoob poorẽ bal la ned tõe n kao a kãadem wa a Zezi sẽn yeelã bɩ?

MAKRE: Yoobã wɛɛngẽ.

BIIBLÃ YETA WOTO: “Bɩ y zoe yoobo. Yel-wẽn a taaba ned sẽn maanda ka be a yĩngã pʋgẽ ye; la ned ninga sẽn maand yoobo a sãamda a meng yĩnga.”—1 Korẽnt dãmba 6:18.

“Bãmb pagbã teka gãag tɩ lebg sẽn ka zems ninsaal dẽnda. La rapã me basa pagbã gãag sẽn zems ninsaal dẽnda; la bãmb  daglma yĩnga, rap gãanda ne taaba n maan yãnde, la b reega b yaood ninga sẽn zems bãmb kongrã b yĩnsã pʋsẽ.”—Rom dãmba 1:26, 27.

SOKRE: Rẽ yĩnga tũudum kãngã wilgda a nebã tɩ yoob yaa wẽnga, la tɩ rao ne a to wall pag ne a to sã n kẽ ne taaba, yaa yel-wẽnd bɩ?

MAKRE: Tũudum hakɩkã pa basd ned sẽn kɩɩsd Biiblã noy a nebã sʋk ye.

BIIBLÃ YETA WOTO: ‘Ra maan-y tũud-n-taar ne ned sẽn boond a meng tɩ ba-biiga, n yaool n yaa nin-yoaada, wall zoe-bõn soaba wall bõn-naands pʋʋsda wall nin-tʋʋsa wall rã-yũuda wall fãad ye, hal tɩ yãmb da sak n dɩ ne ned a woto ye.’ (1 Korẽnt dãmba 5:11) Bõe la b segd n maan neb nins sẽn yet tɩ b yaa kiris-neb n yaool n maand yel-wẽnã n pa rat n tek yam n kos sugrã? Wẽnnaam Gomdã leokda woto: “Bɩ y yiis nin-wẽng kãng yãmb sʋka.”—1 Korẽnt dãmba 5:13.

SOKRE: Rẽ yĩnga tũudum kãng yiisda neb nins sẽn kɩɩsd Biiblã noyã la b pa ra tek yam n kos sugrã a nebã sʋk bɩ?

[Foto, seb-neng a 6]

Tũudum bʋg n be tɩ nebã fãa miẽ t’a pa basd ned sẽn kɩɩsd Biiblã noy a nin-buiidã sʋka?