A 2 soabã: Nin-wẽnsã rebda bugum yiri

Sɩnga wãn tɩ b wa tẽed woto? A Georges Minois yeela a sebr a ye pʋgẽ woto: “Gɛrk filozof kãsemsã fãa sʋka, sẽn yɩɩd fãa, yaa a Platõ n kɩt tɩ nebã wa tẽed tɩ bugum yir beeme wã.”—Histoire des enfers, seb-neng 50.

Sebr a to me yeta woto: “Yʋʋmd 150 soabã sẽnese, kiris-neb nins sẽn paam Gɛrk filozof rãmbã zãmsgã wa tagsdame tɩ rẽndame tɩ b bilg bãmb sẽn tẽed bũmb ninsã tɩ zems ne filozof rãmbã sẽn zãms-bã . . . Zãmsg ning sẽn da noom-b n yɩɩd yaa a Platõ rẽndã.—The New Encyclopædia Britannica (1988), Volim 25, a neng 890.

Sebr a to me yeta woto: “Egiliizã wilgda a nin-buiidã tɩ bugum yir beeme, la t’a bugmã pa kiid abada. Ned sã n ki t’a pa paam a yel-wẽnã sugri, zĩig pʋgẽ bala, a sɩɩgã loogda bug-tẽng n tɩ nams bugum ning sẽn pa kiidã pʋgẽ wakat fãa. Bug-tẽngã sɩbgr ning wẽnem sẽn tɩ yɩɩd a taabã yaa b sẽn na n zãag-f ne Wẽnnaam wakat fãa yĩnga.”—Catechism of the Catholic Church, yʋʋmd 1994 soabã, a seb-neng 270.

La bõe la Biiblã yeta? “Nin-vɩɩs miime tɩ b na n kiime. La kũum ka mi bũmb ye, . . . tʋʋmd ne tagsgo, la yam ne bãngr ka be kɩɩm-kulg fo sẽn dabd zĩig ningã ye.”—Koɛɛg Soaba 9:5, 10.

Hebre gom-bil ning b sẽn lebg ka kɩɩm-kulgã yaa Sheol. Rat n yeel tɩ zĩig ning b sẽn solgd kiid fãa wã. Biibl kẽer pʋsẽ, b lebg-a lame tɩ “bug-tẽnga.” La bõe la vɛrse ning b sẽn sõdg zugẽ wã wilgd sẽn ki-bã wɛɛngẽ? Rẽ yĩnga b yetame tɩ sẽn be-b Seollã namsda be b yel-wẽnã yĩng bɩ? Ayo. Vɛrse wã yeelame tɩ b “ka mi bũmb ye.” Yaa rẽ n so t’a Zoob bã-toaagã sasa, a kos Wẽnnaam woto: “Solg maam kɩɩm-kulg [bɩ Sheol ne hebre] pʋgẽ.” (Zoob 14:13) Seollã sã n da yaa namsg sẽn pa sat zĩigẽ, rẽ yĩnga a Zoob ra na kos tɩ b solg-a be sɩda? Biiblã pʋgẽ, b sã n gomd kɩɩm-kulgã kẽer sẽn lebgd tɩ bug-tẽngã yelle, yaa yaoogã yell la b gomda. La sẽn be-b yaad pʋsẽ wã pa tõe n maan bũmb ye.

Rẽ yĩnga woto pa sakd reegr n yɩɩda, la pʋd n zems ne Biiblã sẽn yet a zĩis a taab pʋsẽ wã sɩda? Sok-y y mens n ges yel-wẽn-bʋg bal la ned tõe n maan tɩ kɩt tɩ Wẽnnaam sẽn yaa nonglmã sak n nams-a wakat sẽn pa sate. (1 Zã 4:8) Woto wilgda vẽeneg tɩ bugum yir kae ye. La b sẽn yeel tɩ nin-tɩrsã fãa rebda saasẽ wã yẽ?

Ges-y Biiblã vɛrse kãensã: Yɩɩl Sõamyã 146:3, 4; Tʋʋm 2:25-27; Rom dãmb 6:7, 23.

SƖDÃ LA WOTO:

Wẽnnaam pa namsd nebã bugum yir ye

[Fotã soaadba, seb-neng a 5]

Barrators—Giampolo/The Doré Illustrations For Dante’s Divine Comedy/Dover Publications Inc.