A 3 soabã: Nin-tɩrsã fãa rebda saasẽ

Sɩnga wãn tɩ b wa tẽed woto? A Zezi tʋm-tʋmdbã kũum poore, rat n yeel tɩ sẽn zems yʋʋmd 100 soabã loogr poor bilf bala, Egiliizã taoor dãmb paama pãnga. Sebr a yembr goma bũmb nins nin-kãensã sẽn da zãmsd nebã yell n yeel woto: “B sẽn da zãmsd nebã n yɩɩd yaa tɩ ned kũum poore, b segd n deng n yɩlga a sɩɩgã tao-tao n yiis a yel-wẽnã t’a paam n kẽng saasẽ n tɩ paam barka.”—The New Catholic Encyclopedia (2003), volim a 6, seb-neng 687.

Bõe la Biiblã yeta? “Bark bee sũ-maasem dãmbã zutu, tɩ bõe, bãmb na soog dũniyã.”—Matɩe 5:5.

Yaa sɩd t’a Zezi yeela a karen-biisã t’a rebda saasẽ n na n tɩ maneg zĩig b yĩnga, la a wilg-b lame me tɩ pa nin-tɩrsã fãa n debd be ye. (Zã 3:13; 14:2, 3) A pʋʋsg a ye pʋgẽ menga, a kosame tɩ Wẽnnaam daabã ‘maan dũniyã zug wa sẽn maand [saasẽ wã].’ (Matɩe 6:9, 10) Woto wilgdame tɩ nin-sõma wã kẽer na n kẽnga saasẽ tɩ kẽer pa tẽngã zugu. Nin-tɩrs sõor bilf bal n na n tɩ rɩ naam saasẽ ne Kiristã, tɩ sẽn ket-bã fãa vɩɩmd tẽngã zug wakat sẽn kõn sa.—Wilgri 5:10.

Egiliizã wa n basa tʋʋmd ning a sẽn da segd n tʋmã, n kẽes a meng yɛl a taab pʋgẽ. Rẽ waa ne bõe? Sebr a ye (The New Encyclopædia Britannica) leoka woto: “Bilf-bilfã, Egiliizã sẽn siglg to-to wã kɩtame tɩ b wa tolg n get-a wa Wẽnnaam Rĩungã.” Egiliizã kɩɩsa a Zezi sẽn yeel tɩ yẽ karen-biisã pa segd n yɩ “dũniyã rẽndã,” n kẽes a meng politikã pʋgẽ sẽn na yɩl n paam naam la pãng n paase. (Zã 15:19; 17:14-16; 18:36) Rom naab a Kõnstãntẽ wakatã, a yɩɩ sabaab tɩ Egiliizã sak n toeem yɛl kẽer b sẽn da zãms nebã tũudmã pʋgẽ. Wala makre, b toeema b sẽn da tẽed bũmb ning Wẽnnaam mengã sẽn yaa to-to wã zugã.

Ges-y Biiblã vɛrse kãensã me: Yɩɩl Sõamyã 37:10, 11, 29; Zã 17:3; 2 Tɩmote 2:11, 12.

SƖDÃ LA WOTO:

Pa nin-tɩrsã fãa n debd saasẽ ye. B wʋsg na n vɩɩmda tẽngã zug wakat sẽn kõn sa

[Fotã soaadba, seb-neng a 6]

Art Resource, NY