Yɩ-y Kiristã karen-biig hakɩka

“Tɩ-sõng fãa womda bi-sõma, la tɩ-wẽng fãa womda bi-wẽnse.”—MAT. 7:17.

1, 2. Yaoolem da-kãensã pʋgẽ, bõe n kɩt tɩ b mi kiris-neb ne yʋʋrã ne sẽn sɩd tũud-b Kiristã n bake?

A ZEZI yeelame tɩ bũmb ning sẽn na n kɩt tɩ b bãng neb nins sẽn yagd tɩ b yaa yẽ karen-biisã n bak ne sẽn sɩd tũud-b yẽ ne pʋ-peelmã, yaa b “biisã,” rat n yeel tɩ bũmb nins b sẽn zãmsd nebã la b yel-manesmã. (Mat. 7:15-17, 20) Sɩd me, nebã yel-manesem bee ne b sẽn zãms-b bũmb nins tɩ be b sũyẽ wã la b tagsgẽ wã. (Mat. 15:18, 19) Bũmb ning b sẽn zãms-bã sã n yaa ziri, b na n woma “bi-wẽnse,” la b sã n sɩd wilg-b-la Wẽnnaam la a raabã neere, b na n woma “bi-sõma.”

² Rũndã-rũndã, dũniyã sẽn be a saabã wakatã yĩnga, d nee bi-sõma wã ne bi-wẽnsã n welg vẽenega. (Karm-y Daniɛll 12:3, 10.) Kiris-neb ne yʋʋrã pa mi Wẽnnaam sõma, b leb n pa tũud-a ne pʋ-peelem ye. La neb nins sẽn sɩd mi Wẽnnaamã waoogd-a-la “ne b sɩɩse la ne sɩda.” (Zã 4:24; 2 Tɩm. 3:1-5) B maoodame n dɩkd Kiristã togs-n-taare. La tõnd ned kam fãa yẽ? D na n goma yɛl a nu yelle. Yaa yɛl sẽn kɩtd tɩ b bãng kiris-neb hakɩkã ne kiris-neb ne yʋʋrã n bake. D sã n wa gomd b yell bɩ y sok y mens sogs-kãensã: ‘Rẽ yĩnga mam sẽn vɩ to-to wã la m sẽn zãmsd nebã bũmb ninsã zemsda ne Wẽnnaam Gomdã sẽn yetã bɩ? Mam wilgda nebã tɩ b yell pak-m lame la m zãmsd-b Biiblã sõma tɩ kɩtdẽ tɩ sẽn nong-b sɩdã tʋll n sak tũudum hakɩkã bɩ?’

Tũud-y Wẽnnaam noyã

3. Bõe n noom a Zeova, la rẽ baoodame tɩ kiris-neb hakɩkã maan bõe?

³ A Zezi yeelame tɩ ‘ka neb nins fãa sẽn boond yẽ tɩ Zusoaba, Zusoaba! n na n kẽ saasẽ soolmẽ wã ye. Yaa ned ning sẽn maand yẽ Ba sẽn be saasẽ wã raabã bala.’ (Mat. 7:21) Dẽnd sẽn noom a Zeova pa ned sẽn na n yet ne noor bal t’a yaa kiris-ned ye, yaa a soab sẽn na n maand bũmb nins kiris-ned sẽn segd n maanã. Kiris-neb hakɩkã miime tɩ woto baoodame tɩ b rɩkd Kiristã togs-n-taar b vɩɩmã nens fãa pʋsẽ. Wala makre, ligdã baoobo, nug tʋʋmã yãkre, reemã la pemsmã kokr wɛɛngẽ. B leb n miime tɩ b pa segd n maan rog-m-migs la tig nins sẽn kɩɩsd Biiblã noyã, tɩ b segd n waooga kãadmã, la b zãad b mens sõma ne nebã wakat fãa. La kiris-neb ne yʋʋrã yẽ tũuda dũniyã ne a nebã raabo, tɩ dũniyã ne a nebã yaool n lebgd wẽns n paasd yaoolem da-kãensã.—Yɩɩl 92:8.

4, 5. Wãn to la d tõe n tũ a Zeova goam nins sẽn be Malaki 3:18 wã?

⁴ Sɩd me, ne no-rɛɛs a Malaki maasem, Wẽnnaam da yeela woto: “Yãmb na n le tõog n bãnga nin-sõng ne nin-wẽng n bake, la ned sẽn sakd maam ne ned sẽn ka sakd maam n bake.” (Mal. 3:18) Y sã n wa bʋgsd gom-kãensã zug bɩ y sok y meng woto: ‘Rẽ yĩnga mam wõnda dũniyã nebã bɩ, bɩ m yaa toore? Mam nong n sakda m zo-rãmbã raab lekollẽ wã wall m tʋʋmã zĩigẽ bɩ, bɩ m sakda Biiblã noy wakat fãa la m pʋd n wilgd rẽ võor vẽenega?’ (Karm-y 1 Pɩɛɛr 3:16.) Yaa sɩd tɩ d pa rat tɩ wa lebg wa tõnd n yaa tɩrs tɩ neb a taabã yaa nin-yoodo, la d segd n modgame n yɩ toor ne neb nins sẽn pa nong a Zeova la b pa rat n maan a raabã.

⁵ Y sã n mik tɩ y tara manesem kẽer y sẽn segd n toeeme, bɩ y pʋʋs Wẽnnaam n kos t’a sõng-yã, la y wɩng ne bũmb nins sẽn na n paas y tẽebã pãngã maanego, rat n yet tɩ Biiblã zãmsgo, pʋʋsgã la tigissã kẽnde. Yaa y sẽn na n tũud Wẽnnaam Gomdã noyã wakat fãa, la y na n womd “bi-sõma,” tɩ y sẽn na n ‘kɩt kaset ne noor goam [Wẽnnaam] yʋʋrã’ yĩngã be bi-sõma kãens sʋka.—Heb. 13:15.

 Moon-y Wẽnnaam Rĩungã

6, 7. Rĩungã koɛɛgã mooneg wɛɛngẽ, welg bʋg n be kiris-neb hakɩkã ne kiris-neb ne yʋʋrã sʋka?

⁶ A Zezi ra yeela woto: “Yaa tɩlae tɩ mam moon Wẽnnaam soolem koe-noog tẽns a taab me; tɩ bõe, b tʋma maam bõn-kãng yĩnga.” (Luk 4:43) A Zezi koe-moonegã sasa, bõe yĩng t’a ra gomd Wẽnnaam Rĩungã yell n yɩɩda? Yaa t’a ra miime tɩ yẽ sẽn yaa Rĩungã Rĩmã, ne a ba-biis nins sẽn paam vʋʋsem sõngã zaeebã sẽn na n wa vʋʋgã, na n wa naaga taab n menes bũmb nins sẽn wat ne ninsaalbã zu-loeesã, rat n yeel tɩ yel-wẽndã la a Sʋɩtãana. (Rom 5:12; Wil. 20:10) Rẽ n so t’a kõ a karen-biisã noor tɩ b moon Rĩung kãng koɛɛgã hal n tãag dũniyã saabo. (Mat. 24:14) Neb nins sẽn yet ne noor bal tɩ b yaa Kiristã karen-biisã pa tʋmd tʋʋm kãngã, la b pʋd n pa tõe n tʋm-a ye. Bõe yĩnga? D sõdg bʋʋm a tãab bala: Pipi, yaa tɩ b pʋd n pa mi Wẽnnaam Rĩungã sẽn yaa a soab ye. Yiib-n-soaba, yaa tɩ Rĩungã koɛɛgã mooneg tõe n kɩtame tɩ b yaal-f la b kɩɩs-fo, la nin-kãensã pa tar sik-m-meng la raood n tõe n sak rẽ ye. (Mat. 24:9; 1 Pɩɛ. 2:23) La tãab-n-soaba, kiris-neb ne yʋʋrã pa tar Wẽnnaam vʋʋsem sõngã ye.—Zã 14:16, 17.

⁷ La kiris-neb hakɩkã yẽ mii Wẽnnaam Rĩungã sẽn yaa a soaba, la a sẽn na n maan bũmb ninsã. Sẽn paase, b lʋɩɩsda Rĩung kãng taoor b vɩɩmã pʋgẽ, n moond-a dũniyã gill zug ne a Zeova vʋʋsem sõngã sõngre. (Zak. 4:6) Rẽ yĩnga yãmb naagd n tʋmda tʋʋm kãngã wakat fãa bɩ? Y modgdame n dat n paas y moonegã sõmblem, n moond wʋsg n yɩɩd pĩndã wall y maood sẽn na yɩl tɩ y tʋʋmdã womd biis bɩ? Neb kẽer zãmsda b sẽn tõe n tall Biiblã to-to n sõng nebã tɩ b wʋm koɛɛgã sõma. Sɩd me, tʋm-tʋmd a Poll sẽn da minim n talld Wẽnnaam Gomdã n bilgd nebã koɛɛg ning a sẽn taasd-bã ra yeelame tɩ ‘Wẽnnaam gomdã vɩɩme la a tara pãnga.’—Heb. 4:12; Tʋʋ. 17:2, 3.

8, 9. a) Kiba-bʋs n wilgd tɩ Biiblã kareng koe-moonegã sasa tara yõodo? b) Wãn to la d tõe n maan n wa tõog n tʋmd ne Biiblã sõma?

⁸ Saam-biig a ye sẽn da moond koɛɛgã zak-zak sega rao a ye sẽn yaa katolik tũudmã neda. A karmã Daniɛll 2:44 goamã la a wilg raoã Wẽnnaam Rĩungã sẽn na n wa maan to-to n kɩt tɩ laafɩ la bãan hakɩk zĩnd dũniyã zugã. Dẽ poore, raoã leok-a-la woto: “Mam sũur nooma hal wʋsgo, fo sẽn lak Biiblã n karem n wilg maam, n pa togs-m koe-kãngã woto balã.” Saam-biig a to me n da wa n seg pag a ye sẽn yaa gɛrk ortodogs tũudmã neda, n karem vɛrse t’a kelge. Rẽ poore, pagã soka sogs-wʋsgo. La saam-biigã ne a pagã talla Biiblã n leok a sogsgã fãa. Kaoosg zugẽ, pagã wa n yeela woto: “Yãmb mii bũmb ning sẽn kɩt tɩ mam kelg-yã bɩ? Yaa y sẽn zã Biiblã n wa la y tall-a n leok m sogsgã yĩnga.”

⁹ Yaa sɩd tɩ sɛb nins d sẽn yiisdã tara yõodo, tɩ d segd n kõ-b nebã. La yaa Biiblã la d pipi tʋʋm-teoogo. Woto yĩnga, y sã n da pa minim n karemd Biiblã wʋsg koe-moonegã sasa, d sagend-y lame tɩ y modg n karemd-a n wilgd nebã. Wala makre, y tõe n deng n tũusa vɛrse rãmb a wãn bal sẽn wilgd Wẽnnaam Rĩungã sẽn yaa a soab la a sẽn na n welg zu-loees sãnda sẽn namsd y moonegã zĩigẽ neb to-to. Rẽ poor bɩ y mao tɩ y sã n wa moondẽ bɩ y karem-b n wilg y kɛlgdbã.

Zã-y Wẽnnaam yʋʋrã ne zu-zẽkre

10, 11. Wẽnnaam yʋʋrã boolgã wɛɛngẽ, welg-bʋg n be a Zezi ne kiris-neb ne yʋʋrã sʋka?

¹⁰ “ ‘Yãmb yaa mam kaset dãmba.’ Yaa [a Zeova,] n yeele. ‘Mam yaa Wẽnnaam.’ ” (Ezai 43:12) A Zezi Kirist sẽn yaa a Zeova Kaset soab sẽn ka to wã ra getame t’a sẽn paam n zãad Wẽnnaam yʋʋrã, la a segd n wilg yʋ-kãng nebã yaa zu-zẽkre. (Karm-y Yikr 3:15; Zã 17:6; Hebre rãmb 2:12.) Sɩd me, b boonda a Zezi tɩ “kaset soab sɩd-sɩda,” a sẽn wilg nebã a Ba wã yʋʋrã yĩnga.—Wil. 1:5; Mat. 6:9.

¹¹ La neb wʋsg yẽ sẽn yet tɩ b yaa Wẽnnaam la a bi-riblã tʋm-tʋmdb maana yɛl sẽn paoogd Wẽnnaam yʋʋrã. B pʋd n yãka a yʋʋrã b Biibl dãmbã pʋsẽ. Wala makre, sẽn pa kaoose, lɛtr a yembr la b gʋls egiliiz katolikã evɛk rãmba, n yeel-b tɩ “pa segd tɩ b pʋd tetagrammã  (YHWH) sẽn yaa Wẽnnaam yʋʋrã” b pʋʋsgã sasa ye. * Ad woto sɩd yaa wẽng tɛkẽ!

12. Bõe n maan yʋʋmd 1931 soabã pʋgẽ, tɩ kɩt tɩ nebã sã n wʋm Zeova fãa bɩ b tol n tagsd a Kaset rãmbã yelle?

¹² Kiris-neb hakɩkã rɩkda a Zezi ne “kaset dãmb wʋsg” nins sẽn deng Kiristã togs-n-taare, n pʋt Wẽnnaam yʋʋrã ne zu-zẽkre. (Heb. 12:1) Sɩd me, yʋʋmd 1931 soabã pʋgẽ b sẽn sak tɩ b na n boond-b t’a Zeova Kaset rãmbã tɛka, kɩtame tɩ nebã sã n wʋm Zeova fãa bɩ b tagsd a Kaset rãmbã yelle. (Karm-y Ezai 43:10-12.) Dẽnd Kiristã karen-biis hakɩkã sɩd lebga buud b sẽn boond ne Wẽnnaam yʋʋrã.—Tʋʋ. 15:14, 17, NW.

13. Wãn to la d tõe n zã Wẽnnaam yʋʋrã sõma?

¹³ Wãn to la tõnd ned kam fãa tõe n wilg t’a zãada Wẽnnaam yʋʋrã sõma? Pipi, yaa d sẽn na n moond Wẽnnaam yʋʋrã ne d sũur fãa. Tʋm-tʋmd a Poll yeela woto: “Ned ninga fãa sẽn kot ne Zusoabã yʋʋre, a na n paama fãagre. Dẽ, b na n yɩɩ wãn n pʋʋs ne b sẽn nan ka tẽ a soabã yʋʋre? La b na n yɩɩ wãn n tẽ b sẽn nan ka wʋm a soab kibare? La b na n yɩɩ wãn n wʋm tɩ ned ka togs koɛɛga? La bãmb na n yɩɩ wãn n paam koe-moondba, ned sã n ka tʋm bãmba?” (Rom 10:13-15) Sẽn paase, d segd n sõnga nebã ne yam tɩ b bãng tɩ b tũudmã zãmsd-b-la yɛl sẽn pa sɩda, la sẽn paoogd d Naandã. Wala makre, b sẽn tẽed bugum yirã tɩ d yaool n miẽ tɩ Wẽnnaam yaa nonglem, la t’a pa tõe n tʋm wẽnem a woto wa a Sʋɩtãanã.—Zer. 7:31; 1 Zã 4:8; Ges-y Mark 9:17-27.

14. Neb kẽer manesem yɩɩ wãn b sẽn wa n bãng Wẽnnaam yʋʋrã?

¹⁴ Rẽ yĩnga yãmb sũy yaa noogo, y sẽn paam n zãad y saasẽ Ba wã yʋʋrã bɩ? Yãmb sõngda nebã sẽn na yɩl tɩ b bãng yʋ-kãngã sẽn yaa sõngã bɩ? Pag a ye sẽn be Paari, Fãrens soolmẽ wã wʋmame t’a Zeova Kaset rãmbã mii Wẽnnaam yʋʋrã. Rẽ n so t’a sẽn wa n seg a Zeova Kaset soaba, a kos-a lame t’a wilg-a Wẽnnaam yʋʋrã a Biiblã pʋgẽ. A sẽn karem Yɩɩl Sõamyã 83:19 wã, pagã sũur yɩɩ noog hal wʋsgo. A sak n sɩnga Biiblã zãmsgo, la rũndã-rũndã, a lebga a Zeova Kaset soab n be tẽn-zẽng n tũud Wẽnnaam ne a sũur fãa. Pag a to me sẽn yit Ostrali n da yaa katolik tũudmã ned sẽn wa n yã Wẽnnaam yʋʋrã Biiblã pʋgẽ, a sũur yɩɩ noog hal t’a raag nintãm. Rũndã-rũndã, a yaa wakat fãa so-pakd sẽn na maan yʋʋma. Sẽn nan pa kaoose, Zamayɩk soolmẽ wã, a Zeova Kaset rãmb n wilg pag a yembr Wẽnnaam yʋʋrã a mengã Biiblã pʋgẽ, tɩ pʋg-kãng me sũurã yɩ noog hal t’a raag nintãm. Woto yĩnga, bɩ y maan sũ-noog y sẽn paam n zãad Wẽnnaam yʋʋrã, la y rɩk a Zezi togs-n-taare, n sõngd nebã tɩ b bãngd yʋ-kãngã.

“Bɩ y ra nong dũniyã” ye

15, 16. Kiris-neb hakɩkã tagsg yaa wãn ne dũniyã, la sogs-bʋs la d segd n sok d mense?

¹⁵ “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye.” (1 Zã 2:15) Dũniyã ne a nebã raabã sẽn yaa wẽnsã kɩɩsda a Zeova la b kɩɩsd a raabã sẽn yaa sõma wã. Rẽ n so tɩ Kiristã karen-biis hakɩkã welgd b mens ne dũniyã la b pʋd n kis-a, bala b miime tɩ wa karen-biig a Zak sẽn yeelã, “zood ne dũniyã yaa beem ne Wẽnnaam.”—Zak 4:4.

¹⁶ Dũniyã sẽn pid ne yɛl wʋsg sẽn kʋɩɩbd nebã yĩnga, a Zak goamã tũub tõe n yɩɩ toogo. (2 Tɩm. 4:10) Yaa rẽ n so t’a Zezi pʋʋs Wẽnnaam a karen-biisã yĩnga, n kos woto: “Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soabã ra tõog-b ye. Bãmb ka dũniyã rẽnd wa mam sẽn ka dũniyã rẽndã.” (Zã 17:15, 16) Bɩ ned kam fãa sok a meng woto: ‘Rẽ yĩnga mam maooda sẽn na yɩl n da yɩ dũniyã rẽnd bɩ? Nebã miime tɩ mam pa maand tig la rog-m-migs sẽn kɩɩsd Biiblã, la baa b rãmb nins sẽn pa yit ziri tũudmã pʋgẽ n yaool zems ne dũniyã neb raabã bɩ?’—2 Kor. 6:17; 1 Pɩɛ. 4:3, 4.

17. Bõe n tõe n kɩt tɩ pʋ-peen-nebã sak a Zeova?

¹⁷ Yaa vẽeneg tɩ tõnd sẽn tũud Biiblã noyã yĩnga, dũniyã neb pa na n pẽg-d ye. La tõe n  kɩtame tɩ pʋ-peelem dãmb kẽer tʋlg n zãms Biiblã. Sɩd me, nin-kãensã sã n bãng tɩ tõnd sẽn tẽed bũmb ninsã yita Biiblã pʋgẽ, la b ne d sẽn sɩd tũud rẽ d vɩɩmã nens fãa pʋsẽ wã, tõe n kɩtame tɩ b sak n wa naag-do, tɩ yaa wa b sẽn yeel sẽn paam-b vʋʋsem sõngã zaeebã woto: “Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.”—Zak. 8:23.

Tall-y Kirist nonglmã buudu

18. D sẽn segd n nong a Zeova la d taabã ne nonglem ning buudã yaa wãn-wãna?

¹⁸ A Zezi yeela woto: “Nong Zusoabã fo Wẽnnaam ne f sũur fãa, la ne f sɩɩgã fãa, la ne f yam fãa.” La a paase: “Nong f [to] wa f menga.” (Mat. 22:37, 39) Gɛrk buud-gomdã pʋgẽ, b boonda nonglem kãngã tɩ agapɛ. Nonglem kãng buudã yaa bũmb sẽn segde, sẽn zems la sẽn pʋd n yaa tɩlae. La a yaool n pa rok-m-zugẽ nonglem ye. A bee yamleoogo, la a tõe n tall pãng hal wʋsgo. (1 Pɩɛ. 1:22) Ned sã n tar nonglem kãngã, a goamã la a tʋʋmã pʋgẽ, a pa wilgd t’a mengã yell bal n pak-a ye.—Karm-y 1 Korẽnt dãmb 13:4-7.

19, 20. Togs-y kibay sẽn wilgd nonglem ning sẽn be kiris-neb hakɩkã sʋkã sẽn tõe n maan bũmb ningã.

¹⁹ Nonglmã sẽn yaa Wẽnnaam vʋʋsem sõngã n kõtã yĩnga, kiris-neb hakɩkã tõogd n maanda yɛl neb a taabã sẽn pa tõe. Wala makre, b pa kẽed politikã sẽn welgd dũniyã nebã pʋgẽ, b yĩngã kõbg wall b buudã sẽn pa yembrã me pa welgd-b ye. (Karm-y Zã 13:34, 35; Gal. 5:22) Pʋ-peelem dãmbã sã n yã nonglem ning sẽn be b sʋkã, kɩtdame tɩ b tʋll n wa naag-ba. Wala makre, Israɛll bi-bɩɩg a ye sẽn yaa zʋɩf n kẽng tõnd tigisgẽ, n yã zʋɩf rãmb ne araab rãmb sẽn naag taab n tũud a Zeova, tɩ ling-a hal wʋsgo. Woto kɩtame t’a sɩng tigissã kẽnd n pa vaandẽ, la a sak n na n zãms Biiblã. Rẽ yĩnga yãmb sɩd nonga y saam-bi-taasã woto bɩ? Y modgdame n pʋʋsd sãambã sẽn wat Rĩungã roogẽ wã noog-noog n pa get b sẽn yit tẽng ninga, b yĩngã kõbgo, pa rẽ bɩ b tarem bɩ?

²⁰ D sẽn yaa kiris-neb hakɩkã yĩnga, d modgdame n nong nebã fãa. Salvadoor tẽngã pʋgẽ, pʋg-sad a ye sẽn yaa koe-moond n da zãmsd Biiblã ne pʋg-yãang sẽn tar yʋʋm 87, n da yaa katolik tũudmã ned sẽn nong a tũudmã wʋsgo. Daar a yembre, pʋg-yãangã lʋɩya bãag tɩ b gãneg-a logtor yiri. A sẽn wa n yi logtorã yir n kulã, saam-bi-pogsã kẽng n tɩ ges-a lame, la b zã rɩɩb n tɩ kõ-a. B maana woto kiuug tõre. La pʋg-yãangã egiliizã ned baa a ye pa wa lɩk n ges-a ye. Baasa wãna? A wʋka a bõn-naandsã fãa n lobe, n kɩt tɩ b yẽes a yʋʋrã egiliizã sɛb pʋsẽ, la a maneg n na n wɩng ne Biiblã zãmsgo. Kiba-kãngã wilgda vẽeneg tɩ nonglem ning sẽn be kiris-neb hakɩkã sʋkã tara pãnga! D sã n wilgd nebã ne d tʋʋmã tɩ d nong-b lame, tõe n sõng-b lame tɩ b sak koɛɛgã n yɩɩd d sẽn na n moond-b bala.

21. Bõe la d tõe n maan n kɩt tɩ saagr ning d sẽn tar beoog daar yĩngã tall pãnga?

²¹ Ka la bilfu, a Zezi na n yeela neb nins fãa sẽn yagd tɩ b yaa a karen-biisã woto: “Mam ka mi yãmb baa bilf ye. Bɩ y bas maam, yãmb tʋʋm wẽns maandba.” (Mat. 7:23) Woto yĩnga, bɩ d fãa womd biis sẽn waoogd Ba wã ne a Biigã fãa. A Zezi yeela woto: “Ned ninga fãa sẽn wʋmd goam ninga mam sẽn togsã n sakd bãmba, yẽ na n yɩɩ wa yam soab sẽn me a roog kugr zugu.” (Mat. 7:24) Sɩd me, d sã n wilgdẽ tɩ d yaa Kiristã karen-biis hakɩka, Wẽnnaam na n ning-d-la barka, la sẽn paase, saagr ning d sẽn tar beoog daar yĩngã na n talla pãng wala roog sẽn yẽbg kugr zugu!

[Tẽngr note]

Y tẽrame bɩ?

• Bõe n kɩt tɩ kiris-neb hakɩkã yaa toor ne kiris-neb ne yʋʋrã?

• Sõdg-y “biis” kẽer sẽn kɩt tɩ b mi kiris-neb hakɩkã n bake?

• Bõe la y tõe n yãk yam n maan tɩ sõng-y tɩ y wom biis nins kiris-ned sẽn segd n womã n paase?

[Zãmsgã sogsgã]