Wẽnnaam tagsg yaa bõe rãamã yũub wɛɛngẽ?

TÕND Naandã nonga tõndo, n dat d neere. A pa gɩdg rãam yũ n zems ye. * A Gomdã pʋd n yetame tɩ yaa yẽ n kõ ninsaalbã ‘rãam sẽn kõt-b sũ-noogo, la kaam sẽn salemd b nense, la rɩɩb sẽn kengd b sũyã.’ (Yɩɩl Sõamyã 104:15) Daar a yembr a Zezi sẽn wa n kẽng kãadem kibsa, a kɩtame tɩ koom lebg rãam tɩ paas kibsã noom. B yeelame meng tɩ yɩɩ “rã-noogo.”—Zã 2:3-10.

Yaa vẽeneg tɩ d Naandã mii rãamã sẽn tõe n maan ninsaal yĩngã la a kalkõtã bũmb ninga. D saasẽ Ba wã yet-d-la a Gomdã pʋgẽ t’a ‘zãmsda tõnd d mens sõngr yĩnga.’ A sagenda tõnd tɩ d lak d mens fasɩ ne rãamã yũ tɩ loogã. (Ezai 48:17) Wala makre, kelg-y gom-kãensã sẽn yaa vẽenesã:

“Gũus-y ne rã-tɩgre: yaa tʋʋm-yood la a wat ne.” (Efɛɛz rãmba 5:18, Sebr Sõngo) “Sẽn yũud-b rãam n tuubdẽ wã, . . . baa a ye kõn paam Wẽnnaam soolmã wa a rogem-pʋɩɩr ye.” (1 Korẽnt dãmba 6:9-11, Kãab-paalgã Koe-noogo) Wẽnnaam Gomdã gɩdga “rã-tɩgre, yão-beedo, la bũmb sẽn wẽnd woto.”—Galat dãmba 5:19-21.

Masã, bɩ d gom yɛl kẽer dã-tɩgrã sẽn tõe n wa ne wã yelle.

Rã-tɩgrã sẽn wat ne yɛl ninsi

Yaa sɩd tɩ rãam tõe n maana ned neere, la a tõe n sãama ninsaal yĩngã la a yamã me. Ad yɛl kẽer dã-tɩgr sẽn tõe n wa ne:

Rãam sã n loog neda, luta a yamã t’a pa le tõe n tags tɩrg ye. (Yelbũna 23:33) D tẽeg a Allen sẽn da yaa rã-yũud-kãagã yelle. A yeela woto: “Rã-tɩgr pa komsd ninsaal yĩnsã bal ye. A luta yam, n kɩtdẽ tɩ f tʋʋmã pa le lebd be, tɩ f toor pa be ne rẽ sẽn namsd f taabã to-to wã me ye.”

 Rãam tõe n kɩtame tɩ ned maan sẽn kisi. Biiblã keoogd-d-la woto: ‘Rãam menesda ned yam.’ (Oze 4:11) Wãn to? Bala, rãam sã n loog-fo, f tõe n wa getame tɩ tagsa, tʋlsem wall yɛl kẽer sẽn kis pa tolg n yaa wẽng woto, wall kɩt tɩ b pʋd n be yamleoog ne-fo. Baa f sã n da rat n maand tɩrg wakat fãa, rãamã tõe n kɩtame tɩ f yĩm dẽ. Rãamã tõe n tus-f lame tɩ f sak n maan yɛl kẽer n sãam f zoodã ne Wẽnnaam.

Wala makre, rao a ye yʋʋr sẽn boond t’a John ra zaba ne a pag n fão n yi n kẽng rã-roogẽ. A ta n deega rãam n yũ, n zĩ n gũudẽ t’a sũurã sigi, tɩ pag a ye kolg n sɩng sõsg ne-a. Rẽ poore, a reega butell a wãn n paase, la a sak n tũ pagã n tɩ yo. Yellã zugẽ, a John sũurã sãama hal wʋsgo, bala sã n da pa rãamã yĩnga, a ra kõn saag n maan a buud ye.

Ned sã n tɩg rãam, a goamã ne a tʋʋmã lebgda yaare. Biiblã yeta woto: “Yaa ãnda sũur n sãam? Yaa ãnda n wẽed no-koeemd n yẽgemdẽ? Yaa ãnda n paam poglg zaalem? Yaa ãnda nin n mo? Yaa sẽn yũud-a rãam wʋsgã.” (Yelbũna 23:29, 30) Rãam sã n loog-fo, tõe n kɩtame tɩ f lebg “wa ned sẽn gãe ko-kãsengã zugu,” bɩ “wala ned sẽn gãe tɩɩg zugu.” (Yelbũna 23:34) Ned sã n yũ rãam n su tɩ wa yi n bas-a, tõe n ‘yaa wa b pãb-a lame t’a pa bãng ye.’—Yelbũna 23:35, Sebr Sõngo.

Rã-tɩgrã wata ne bãase. Biiblã yetame tɩ rãam “wat n dũma wa waafo, n kɛ wa põeere.” (Yelbũna 23:32, Sebr Sõngo) Rũndã-rũndã, logtoɛɛmbã sẽn bãng bũmb nins rãamã zugã wilgdame tɩ Biiblã gom-kãngã yaa sɩda. Bala b bilgdame tɩ rãamã tara zẽnem buudu, t’a sã n waoog ned yĩngẽ, bɩ a wat ne bãas buud toor-toore. Wala makre, kãnsɛɛr dãmba, sãoorã bãase, sɩkrã bãase, sũur bãas la bãas a taaba. Baa yaa vugr la ned tiig n yũ rãam tɩ loog-a wʋsgo, a tõe n sobgame wall a ki menga. La bũmb wẽnem sẽn yɩɩd woto fãa la rã-tɩgrã tõe n maan neda, la logtoeemd sebr baa a ye pa gomd rẽ yell ye.

A zu-loɛɛg ning wẽnem sẽn yɩɩdã. Baa ned sã n tõe rãam, a sã n yũud wʋsgo, Wẽnnaam sũur na n wa sãama ne-a.  Biiblã yeta woto vẽenega: “Toog bee neb nins zut sẽn yikd yibeoog pĩnd n baood rãam sẽn yilimd nengã, la sẽn yũud zaabr n kaoosdẽ hal t’a yilimd b nensã.” Bõe yĩnga? A Ezai wilga rẽ sẽn tõe n wa ne yɛl ninsã n yeel woto: “B ka nand Zusoabã tʋʋmã ye. Bãmb ka yãt bũmb nins Zusoabã nus sẽn maandã ye.”—Ezai 5:11, 12.

Wẽnnaam Gomdã sagenda tõnd tɩ d ‘ra tũ rã-yũudb ye.’ (Yelbũna 23:20) Zĩig a to me, a sagenda pʋg-yãansã tɩ b ra yɩ “rã-yũudb ye.” (Tɩt 2:3) Bõe yĩnga? Bala rã-yũud sɩngda bilf-bilfu. La a wat n pa bãng la lebg a minungu, t’a yũubã me tar paasg ye. Tarẽ-tarẽ, a wat n gõeeme n yet woto: “M na n yaa n neka wakat bʋgo? M yik-yã, ad-m na n le kosame n yũ!” (Yelbũna 23:35, Sebr Sõngo) Ned sã n nong rãam hal t’a sã n nek yibeoog fãa n pa paam n yũ tɩ sek-a bɩ a sũurã sãamdẽ, wilgdame t’a rã-yũurã paama pãnga.

Biiblã keoogdame tɩ neb nins sẽn nong “rã-tɩgr la yão-beedã . . . na n wa togsa b yɛlã sẽn segl-a n na n kao nin-vɩɩs ne kũum bʋʋdã taoore.” (1 Pɩɛɛr 4:3, 5) A Zezi ra pĩnd n goma tõnd wakatã sẽn yaa toogã yell n keoog woto: ‘Bɩ y gũus y mens n da sak tɩ yão-beed ne rã-yũuri, la vɩɩm kãngã yɛlã pak yãmb [t’a Zeova raarã] wa ling yãmb ye.’—Luk 21:34, 35.

La wãn to la sẽn yũud-b wʋsgã tõe n “gũus” tɩ rãamã yũub ra le ‘pak-ba’?

[Tẽngr note]

[Foto, seb-neng a 4]

Rã-tɩgrã wata ne zu-loees toor-toore