Pa-y Wẽnnaam nin-buiidã sʋka, n paam koglgo
Pa-y Wẽnnaam nin-buiidã sʋka, n paam koglgo
“Mam na n pẽga yãmb tiging kãsengã pʋgẽ.”—YƖƖL 35:18.
1-3. a) Bõe n tõe n wa kɩt tɩ zood ning kiris-ned sẽn tar ne a Zeova wã rat n sãam t’a pa miẽ? b) Yɛ la Wẽnnaam nin-buiidã tõe n paam koglgo?
KAMB a yiib n da wa n kẽng n na n tɩ reem koom. B sẽn wa n deemd kʋɩlgã pʋgẽ wã, b tũnuga reemã noom n zãagd zĩiga. La yaoã wa n yeela kẽemã t’a gũus tɩ b kolgda ko-sʋkã, t’a leok-a t’a ra yɛɛs tɩ bũmb pa na n maan-b ye. La a yaool n da yĩmame tɩ yẽbs n be kʋɩlgẽ wã. A sẽn wa n na n bãnge, yẽb-kẽeng n puk koomẽ wã n tees-a n watẽ, hal t’a yɛɛse. Bala a ra pa mi a sẽn tõe n maaneg n põs ye. La yẽbgã sẽn kolgã, a gõdgame n bas biigã n lebg n tutẽ.
2 Kiris-ned me tõe n wa basame t’a Sʋɩtãan dũniyã yɛl kẽere, wala makre, reemã, tʋʋmã la teed kẽer baoob wa kɩt t’a yɛgd yɛla, n pa miẽ ye. Kamb a yiibã kibarã wilgdame tɩ tara yõod tɩ tõnd me gũusdẽ, n da wa zãag ne d tẽed-n-taasã ye. Bala yaa d sã n be tigingã pʋgẽ la d tõe n paam koglgo. D gũus n da wa zãag ne d taabã tɩ wa kɩt tɩ d maan bũmb sẽn na n sãam a Zeova sũur ye. Y sã n wa mik tɩ y zãagdame bɩ y lebg n wa zĩig ning y sẽn paamd koglgã tao-tao. Sã n pa rẽ, y tõe n wa sãama y zoodã ne a Zeova.
3 Rũndã-rũndã, dũniyã neb vɩɩm sẽn lebg to-to wã kɩtame tɩ pa nana ne kiris-nebã ye. (2 Tɩm. 3:1-5) A Sʋɩtãan miime t’a wakatã lebga bilfu, tɩ kɩt t’a wɩngd n dat n paam sẽn pa gũusd-bã fãa n sãame. (1 Pɩɛ. 5:8; Wil. 12:12, 17) Baasgo, tõnd paamda koglgo. Bala, a Zeova segla koglg zĩiga, t’a nin-buiidã sã n be beenẽ bɩ kogend zood ning b sẽn tar ne-a wã. Zĩ-kãng yaa kiris-neb tigingã.
4, 5. Neb wʋsg tagsg beoog daarã zug yaa wãn-wãna, la bõe yĩnga?
4 Dũni kãngã siglsã tara noy sẽn kogend ãdem-biisã, la kogl-kãng baas n pa sekdẽ ye. Nebã pa tol n tõe n paam sũ-noog la bãan hakɩk ye. Nin-kʋʋrã, nen-kɛglem tʋʋmã, paam n kõ noorã la vɩɩmã zu-loees a taab kɩtame tɩ neb wʋsg zĩ ne yɩɩre. Sẽn paase, nebã fãa bẽedame la b kʋʋndẽ. Woto kɩtame tɩ baa sẽn tar-b tʋʋmã, zagse, ligd la yĩns keelmã pa mi b yɛlã sã n na n kell n yɩɩ woto n kaoos ye.
5 Neb wʋsg mikame tɩ yɛl kẽer sẽn da wõnd na n kɩtame tɩ b paam sũ-noog pa kõ-b sũ-noog hakɩk ye. Sɩd me, neb ka tɛk ra tagsame tɩ b sã n kẽ kãadem wall b rog kamba, b vɩɩmã na n yɩɩ noogo. La wʋsg sẽn maan woto ket n baas n pa tar sũ-noog ye. Tũudmã wɛɛngẽ me, neb wʋsg sẽn kẽnd pʋʋsgã sũy sãama ne b tũudmã, tɩ b yam yood ne bũmb nins b sẽn zãms-bã. Tũudum kãensã taoor dãmbã yel-manesem la b sẽn wilgdã sẽn pa tũud Biiblã sẽn yetã yĩnga, sɩd pa tõe n pa sãam b nin-buiidã sũy ye. Woto kɩtame tɩ wʋsg kong n tẽed tɩ yɛlã tɩɩm na n tũu ne siãnsã, wall nebã sẽn na n kʋmd taab la b modgd n maand neere. Sɩd pa lingr tɩ neb wʋsg maand yɩɩr beoog daarã wɛɛngẽ, tɩ kẽer pʋd n pa rat n tags a yell n zãag ye.
6, 7. a) Bõe n kɩt tɩ Wẽnnaam nin-buiidã sẽn get beoog daarã to-to wã yaa toor ne neb a taabã? b) Bõe zug la d na n sõse?
6 Ad kiris-neb hakɩkã sẽn get yɛlã to-to wã sɩd yaa toor fasɩ ne neb a taabã sẽn get-b to-to wã! Yaa sɩd tɩ zu-loees kẽer sẽn paamd neb a taabã me mi n paamda a Zeova nin-buiidã, la baasgo, yɛlã taoore, tõnd manesmã yaa toor fasɩ ne nebã rẽnda. (Karm-y Ezai 65:13, 14; Malaki 3:18.) Bõe yĩnga? Bala Biiblã wilgda tõnd bũmb ning sẽn kɩt tɩ ãdem-biisã yɛl yaa woto wã, la sẽn paase, d paamda sagls sẽn na yɩl n mao ne zu-loeesã. Woto kɩtame tɩ tõnd pa maand yɩɩr wʋsg beoog daarã wɛɛngẽ ye. D sẽn tũud a Zeova wã, d zãagda d mens ne tags-kɛgã la tʋʋm-yoodã, tɩ kɩtdẽ tɩ d gind rẽ sẽn wat ne zu-loees ninsã. Woto kɩtame tɩ kiris-nebã tar bãan buud neb a taabã sẽn pa tare.—Ezai 48:17, 18; Fil. 4:6, 7.
7 Kibay n be n tõe n sõng-d tɩ d bãng tɩ neb nins sẽn tũud a Zeova wã sɩd tara sũ-noog la bãan neb a taabã sẽn pa tare. D sã n sõs kiba-kãens zugu, tõe n kɩtame tɩ d fees d mens n ges d sã n pa segd n maneg n wɩsg d meng n tũ Wẽnnaam saglsã a sẽn kõt tõnd d koglg yĩngã.—Ezai 30:21.
‘Kellẽ-la bilf bal tɩ mam naoã yõsge’
8. Hal pĩnd n tãag rũndã, bõe la a Zeova nin-buiidã pa maanda?
8 Hal pĩnd wẽndẽ n tãag rũndã, neb nins sẽn yãk yam n tũud a Zeova wã maoodame n pa baood neb nins sẽn pa maand a Zeova raabã zood ye. Sɩd me, a Zeova pĩnd n wilgame tɩ beem n na n zĩnd sẽn tũud-b yẽ wã ne a Sʋɩtãan poorẽ dãmbã sʋka. (Sɩng. 3:15) Wẽnnaam nin-buiidã sẽn tũud a noyã ne b sũy fãa wã yĩnga, kɩtame tɩ wakat fãa, b manesmã ne neb a taabã rẽnd pa tol n wõnd taab ye. (Zã 17:15, 16; 1 Zã 2:15-17) La pa wakat fãa la woto maaneg yaa nana ne-b ye. Rẽ kɩtame tɩ wakat kẽere, a Zeova nin-buiidã kẽer mi n sokd b mens sã n sɩd tara yõod tɩ b ket n modgd n maand a raabã.
9. Bõe n da namsd Yɩɩll Sõamyã 73 soabã gʋlsda?
9 Yɩɩl Sõamyã 73 soabã gʋlsd sɩd ra wa n sokda a meng sã n sɩd tara yõod t’a kell n modg n tũ a Zeova. Wõnda yaa a Azaf yageng a ye n gʋls yɩɩn-kãngã. A ra wa n getame tɩ yaa wa nin-wẽnsã yɛl manegdame tɩ b tar sũ-noogo, tɩ neb nins sẽn modgd n maand Wẽnnaam daabã yaool n namsdẽ, hal tɩ sãamd a sũuri.—Karm-y Yɩɩl Sõamyã 73:1-13.
10. Bõe yĩng tɩ tõnd ned kam fãa segd n tags yɩɩl-gʋlsdã goamã zug neere?
10 Rẽ yĩnga yel-kãensã zoe n sãama yãmb me sũur bɩ? Sã n yaa rẽ bɩ y ra ning y meng taale, wall y tags tɩ y tẽebã pãng n boogd ye. Bala neb wʋsg sẽn tũ a Zeova pĩnd wẽndẽ, la hal baa neb a sẽn kɩt tɩ b gʋls Biiblã sɛb kẽer meng ra talla tags-kãensã buudu. (Zoob 21:7-13; Yɩɩl 37:1; Zer. 12:1; Hab. 1:1-4, 13) La rẽ yĩnga sɩd tara yõod tɩ d ket n modgd n tũud Wẽnnaam bɩ? Ned ning fãa sẽn tʋll n tũ a Zeova segd n tagsa sok-kãngã zug neere, la a sak n deeg t’a Zeova tũub sɩd tara yõodo. Bala no-koeemd ning a Sʋɩtãan sẽn wa ne Edɛnnã kẽeda sʋka, tɩ d fãa tog n wilg d sã n sak n deegame tɩ yaa a Zeova n sɩd segd n yɩ yĩngr la tẽng naaba. (Sɩng. 3:4, 5) Woto yĩnga, tõnd ned kam fãa segd n tagsa yɩɩl-gʋlsdã goamã zug neere. Rẽ yĩnga d segd n maana sũ-kiir ne nin-wẽnsã sẽn wukd b mense, tɩ wõnd b pa tar zu-loeesã bɩ? D segd n basa a Zeova raabã maaneg la d maan wa nin-kãensã bɩ? Yaa vẽeneg tɩ yaa woto la a Sʋɩtãan data.
11, 12. a) Bõe n sõng yɩɩl-gʋlsdã t’a yam gãande, la bõe la rẽ wilgd tõndo? b) Bõe n sõng yãmb tɩ y sak n deeg yɩɩl-gʋlsdã sẽn wa n bãng bũmb ningã?
11 Bõe n sõng yɩɩl-gʋlsdã t’a yam gãande? Baa a sẽn sak n deeg tɩ kellẽ-la bilf t’a naoã yõsg yel-kãngã wɛɛngẽ wã, bũmb n wa n kɩt t’a toeem yam. A wa n tɩ bee wẽnd-doogẽ wã ne a tẽed-n-taasã me sẽn wɩngd ne Wẽnnaam tũubã, la wakat kãnga, a bʋgsa Wẽnnaam daabã zugu, tɩ kɩt t’a toeem yam. Rẽ tɛka, yɩɩl-gʋlsdã bãnga vẽeneg t’a pa segd n dɩk nin-wẽnsã togs-n-taare, n wa naag-b n sãam ye. A bãngame tɩ nin-wẽnsã sẽn yãk yam n vɩ to-to wã kɩtame tɩ yaa wala b sẽn be “zĩ-saalsẽ.” Yɩɩl-gʋlsdã bãngame tɩ neb nins fãa sẽn basd a Zeova n maand wẽngã na n sãama nif kamsg pʋgẽ, n menem ne yɛɛsgo, la tɩ neb nins sẽn tũud a Zeova wã na n paama a koglgo. (Karm-y Yɩɩl Sõamyã 73:16-19, 27, 28.) Yaa vẽeneg tɩ yãmb me sak n deega woto. Neb kẽer tõe n getame tɩ ned sã n maand a yam n pa tũud Wẽnnaam noyã, tara yamleoogo. La sẽn maand-a woto pa tõe n põs rẽ sẽn wat ne bi-wẽns ninsã ye.—Gal. 6:7-9.
12 Bõe me la yɩɩl-gʋlsdã kibarã wilgd tõndo? A paa Wẽnnaam nin-buiidã sʋka, n paam yam la koglgo. Yaa a sẽn wa n kẽng n tɩ naag a tẽed-n-taasã a Zeova roogẽ wã la a yamã yaool n sɩng vẽnegre. Rũndã-rũndã me, tigissã sasa, d paamda sagls toor-toore, la d bãngd a Zeova n paasdẽ. Dẽnd a Zeova sẽn sagend a nin-buiidã tɩ b ra vaand tigissã, a sɩd bee bʋʋm. Tigissẽ wã, d paamda raood la yam sẽn sõngd-d tɩ d maand sẽn segde.—Ezai 32:1, 2; Heb. 10:24, 25.
Tũus-y y zo-rãmbã ne yam
13-15. a) Bõe n paam a Dina, la bõe la rẽ wilgda? b) Bõe yĩng tɩ d tũud-n-taasã sã n yaa kiris-neb bɩ yaa koglgo?
13 A Zakoob bi-pugl a Dina paama zu-loeese, a sẽn yõg zood ne neb sẽn pa tũud a Zeova wã yĩnga. A kibarã sẽn be Sɩngr sebrã pʋgẽ wã wilgame t’a zakã rãmb sẽn da wa n tɩ sig Kanaã soolmã, a ra minim n kẽnd n sõsda ne tẽngã kom-pugli. Kanaã nebã yaool n da pa tũud noy nins a Zeova nin-buiidã sẽn tũudã ye. Tẽn-vaeesdbã sẽn vaees n yã bũmb ninsã wilgdame tɩ Kanaã nebã sẽn da vɩ to-to wã wa n kɩtame tɩ b tẽngã pid ne bõn-naands pʋʋsgo, raglem la nen-kɛglem tʋʋm buud toor-toore. (Yik. 23:23; Maan. 18:2-25; Tõo. 18:9-12) Tẽeg-y-yã a Dina ne nin-kãensã zoodã sẽn baas to-to wã.
14 Tẽngã rao a ye yʋʋr sẽn boond t’a Sikɛm, b sẽn da waoogd n “yɩɩd a ba yir dãmbã fãa” wã yãa a Dina, n modg-a “n gãand-a.” (Sɩng. 34:1, 2, 19) Ad woto sɩd yɩɩ yel-beed tɛkẽ! Rẽ yĩnga, yãmb tẽedame t’a Dina ra miime tɩ yel-kãngã ra tõe n paam-a lame bɩ? Tõe t’a ra baooda kom-bɩɩsã zood bala, n da pa tagsdẽ tɩ b na n sak n maan-a-la wẽng ye. La a Dina tudga wʋsgo.
15 Kiba-kãngã wilgda bõe? Wilgdame tɩ d pa tõe n yõg zood ne neb sẽn pa tũud Wẽnnaam, n tẽed tɩ bũmb pa na n maan-d ye. Biiblã yeela vẽeneg tɩ “tũud-n-ta-wẽns sãamda nin-sõamyã.” (1 Kor. 15:33) La y sã n tũusa y zo-rãmbã y tẽed-n-taasã sʋka, y tõe n kɩsa sɩd tɩ y fãa sẽn tũud a Zeova noyã la y nong-a wã yĩnga, bũmb pa na n maan-y ye. Zood a woto na n sõng-y lame tɩ y maand bũmb fãa ne yam.—Yel. 13:20.
“Yãmb paama pekre”
16. Tʋm-tʋmd a Poll yeelame tɩ Korẽnt tigingã neb kẽer da yɩɩ nin-bʋs buudu?
16 Kiris-neb tigingã sõnga neb wʋsg tɩ b tõog n bas tʋʋm-dẽgd b sẽn da tʋmde. Tʋm-tʋmd a Poll pipi lɛtr ning a sẽn tool Korẽnt tigingã nebã pʋgẽ, a sõdga tʋʋm-beed toor-toor b kẽer sẽn base, b sẽn tʋll n ta Wẽnnaam yamã yĩnga. Wala makre, b kẽer da yɩɩ yoaadba, bõn-naands pʋʋsdba, rap sẽn gãe rapa, wall pagb sẽn gãe pagba, wagda, rã-yũud-kãase. La a Poll yeel-b-la woto: “Yãmb paama pekre.”—Karm-y 1 Korẽnt dãmb 6:9-11.
17. Wãn to la Biiblã noy tũub toeem neb wʋsgo?
17 Neb nins sẽn pa tũud Wẽnnaamã pa tar no-sõma n tũudẽ ye. B ned kam fãa maanda a yam, wall b sakd n tʋmd tʋʋm-beed nins b taabã sẽn tʋmdã, tɩ kɩt tɩ b yaa wa Korẽnt nebã me sẽn da yaa to-to nand tɩ b lebg tẽedbã. (Ef. 4:14) La ned sã n wa bãng Wẽnnaam Gomdã la a raabã võor tɩ kɩt t’a tũud Biiblã noyã, tõe n toeem-a-la hal sõma. (Kol. 3:5-10; Heb. 4:12) Neb wʋsg sẽn lebg kiris-neb rũndã-rũndã tõe n kõo kaset sẽn wilgd tɩ nand tɩ b bãng a Zeova noyã la b sɩng b tũubu, b ra vɩɩ yaare. B vɩɩmã ra ka võore, b ra pa tar sũ-noog me ye. Yaa b sẽn wa n sɩng Wẽnnaam nin-buiidã tũub n sakd Biiblã noyã, la b paam sũur pʋgẽ bãane.
18. Bõe n paam bi-pugl a yembre, la rẽ wilgda bõe?
18 La neb kẽer sẽn da yaa kiris-neba, n wa yãk yam n bas tigingã paama zu-loeese, n maand b bãngẽ masã. Wala makre, saam-bi-poak a ye yʋʋr sẽn boond t’a Tanya yeelame tɩ yẽ rogame n mik a roagdbã sɩdã pʋgẽ, la t’a sẽn wa n tar yʋʋm 16, a basa tigingã n na n pʋg dũniyã. La a paama zu-loees wʋsgo. Wala makre, a tol n dɩka pʋg n yiis menga. A sẽn lebg n wa tigingã pʋgẽ wã, a yeela woto: “Mam sẽn bas tigingã yʋʋm a tãabã pʋgẽ, m paama zu-loees m sẽn pa na n tol n yĩmi. Sẽn yɩɩd fãa, m sẽn yiis pʋgã. . . . Mam yeta kom-bɩɩs nins fãa sẽn dat n lemb dũniyã baa yaa bilfã tɩ b ra saag ye. Sɩngrẽ wã tõe n yɩɩ noogo, la na n baasa wẽnga. Bõn-sõng pa tol n be dũniyã pʋgẽ ye. Mam mii rẽ vẽenega, bala m lembame n gese. Pa-y-yã a Zeova siglgã pʋgẽ. Yaa be bal la y tõe n paam sũ-noogo.”
19, 20. Kogl-bʋg buud la tigingã kõt tõndo, la d paamd-a-la wãn-wãna?
19 Yãmb we n tags n ges y vɩɩmã sẽn na n lebg to-to, y sã n bas tigingã sẽn yaa koglg zĩigã. Neb wʋsg sã n tẽeg b sẽn da be dũniyã pʋgẽ tɩ b vɩɩmã pa tol n tar nengã yelle, sidgda b yĩnsi. (Zã 6:68, 69) Y tõe n põsa nimbãaneg la yel-beed nins sẽn paamd a Sʋɩtãan dũniyã neb wʋsgã, y sã n bao zo-rãmb y tẽed-n-taasã sʋka. Y sã n maan dẽ, la y wɩngd ne tigissã kẽnde, na n tẽegd-y lame t’a Zeova kõ-y-la a noyã y koglg yĩnga. Sẽn paase, na n kengda y raood me tɩ y tũud no-kãense. Y tara bʋʋm wʋsg n na n dɩk yɩɩl-gʋlsdã togs-n-taare, n ‘pẽgd a Zeova a tiging kãsengã pʋgẽ.’—Yɩɩl 35:18.
20 Yaa sɩd tɩ yell ning mi n paama kiris-neda, tɩ wõnd yaa toog t’a tõog n kell n sak Wẽnnaam. La tõe tɩ wakata kãnga, a ratame bal tɩ ned tẽeg-a sẽn segdã. Woto yĩnga, d tẽed-n-taag sã n wa tar zu-loeese, bõe la tigingã neb a taabã tõe n maan n sõng-a? Sõsg ning sẽn pʋgdã na n wilga y sẽn tõe n ‘paas y taabã raoodo, la y bɩɩs b tẽebã’ to-to.—1 Tes. 5:11, Kãab-paalgã Koe-noogo.
Y na n leokame tɩ bõe?
• Yɩɩll Sõamyã 73 soabã gʋlsdã kibar wilgda tõnd bõe?
• Bõe la a Dina kibarã wilgd tõndo?
• Bõe yĩng tɩ d yetẽ tɩ tigingã kõt-d-la koglgo?
[Zãmsgã sogsgã]
[Foto, seb-neng a 9]
Da tũ-y koomã reeng noom n zãag ye. Pa-y ne y taabã!